Sociedá Política Llingüística organiza una xornada técnica sobre traducción administrativa by asturnet 22 de marzu, 2006 La Oficina de Política Llingüística del Principáu entama esti viernes 24 una xornada técnica de documentos xurídicos y fraseoloxía administrativa col fin d’elaborar un archivu prácticu nesa materia n’idioma asturianu. La iniciativa inclúi exercicios prácticos, talleres y análisis de testos xurídico-administrativos. La xornada va escomenzar con un taller coordináu pol responsable de Política Llingüística de la Conseyería de Cultura, Ramón d’Andrés sobre principios xenerales pa la traducción de documentación administrativa. Al taller va siguilu una práctica d’análisis de testos xurídicos y modelos administrativos, ente ellos l’Estatutu d’Autonomía, Llei d’Usu, decretos, etc. El segundu taller de la xornada va dedicase a la cartelería, formularios municipales, bandos, anuncies, etc. d’usu n’administración de los conceyos. Los pliegos, actes, concursos van ocupar l’últimu de los talleres. 22 de marzu, 2006 0 FacebookTwitterPinterestEmail
Sociedá Moratinos alude al calter non oficial del asturiano pa xustificar la so ausencia na UE by asturnet 17 de marzu, 2006 El ministru español d’Esteriores, Miguel Ángel Moratinos, xustificò esti xueves 16 n’Uviéu l’ausencia de la llingua asturiana nes instituciones europees, ente los demás idiomes del estáu, nel so calter de llingua non oficial. El presidente asturianu, Vicente Álvarez Areces, sofitó la posición del ministru recalcando que “el bable nun ye oficial, que ye la que’l gobiernu d’España había de reclamar”, afirmó. Na rueda de prensa que siguió al alcuentru calteníu ente Moratinos y Areces n’Uviéu ún de los informadores presentes preguntó-y al ministru pola carta enviada va más d’añu y mediu pol conseyeru Valledor na que-y encamentaba al gobiernu español defender l’asturiano énte les instituciones europees como una de les llingües del estáu. El titular d’Esteriores del executivu de Zapatero fue escuetu na so respuesta: “Namás podemos defender les llingües que son cooficiales”. Areces respaldó la posición del ministru afirmando, visiblemente molestu pola pregunta, que “Asturies tien una llei d’usu y promoción del bable que desarrollamos plenamente y hai un plan votáu por unanimidá nel Parlamentu, pero ye evidente que nun ye llingua cooficial, que ye la que’l Gobiernu d’España taría obligáu a citar (énte Europa)”, afirmó. 17 de marzu, 2006 0 FacebookTwitterPinterestEmail
Sociedá IX de Mieres pide desplicaciones pola Oficina de Normalización Llingüística by asturnet 17 de marzu, 2006 La conceyal d’Izquierda Xunida de Mieres, Beatriz González, pidió desplicaciones al equipu de gobiernu municipal pola situación de la Oficina de Normalización Llingüística, creada en payares de 2005 y paralizada en xineru, dos meses después de la so puesta en marcha. Según declaró a los medios informativos locales la edil d’IX, l’Ayuntamientu mierense, recibió de la Oficina de Política Llingüística del Principáu, 15.600 euros empobinaos a sufragar los gastos de personal y la puesta en funcionamientu del serviciu normalizador. Agora, tres la paralización de la Oficina en xineru, por cese de la persona encargada de la mesma, González cuida que puede perdese esa cantidá de dineru, si nun ta ya perdida, al nun poder xustificar el consistoriu los gastos derivaos de la contratación de personal. Na so denuncia a los medios, la conceyal d’Izquierda Xunida, relató la breve y axitada esistencia del serviciu: en setiembre de 2005 el conceyu recibió una subvención de 15.600 euros de la Conseyería de Cultura pa poner en marcha la Oficina; un mes después publicáronse les bases pa cubrir la plaza de responsable y en payares escomenzó a funcionar. En xineru de 2006 la persona encargada del serviciu de normalización cesó y dende entós la oficina dexó de funcionar, ensin que l’Ayuntamientu entamara nenguna midida pa recuperar la so puesta en marcha. 17 de marzu, 2006 0 FacebookTwitterPinterestEmail
Sociedá Jesús Iglesias respalda a Laura González na so defensa del proyectu de Niemeyer p’Avilés by asturnet 16 de marzu, 2006 El coordinador xeneral d’Izquierda Xunida d’Asturies, Jesús Iglesias aprovechó la presentación de la campaña en remembranza del 75 aniversariu de la II República entamada pa desautorizar a los cargos públicos uvieínos de la coalición qu’en díes pasaos truñaron contra la conseyera Laura González. Iglesias defendió l’equipamientu de Niemeyer p’Avilés y reafirmó la identidá republicana d’IX, afirmando que “los insultadores nun tienen sitiu equí”. Pal responsable de la formación d’izquierdes el futuru centru cultural proyectáu pol arquitectu brasileiru ye dalgo de fonda importancia p’Avilés que llogra asina “dalgo a lo que tien derechu y que resulta imprescindible pa la so dinamización y desarrollu económicu”, ya que, según dixo Iglesias: “llevaba años reivindicando que después de padecer décades de procesos de reconversión industrial, desixía un compromisu del restu d’Asturies col so desarrollu y contribuir amás al desarrollu global d’esta Comunidá”. El coordinador d’IX refirióse a la engarradiella de l’agrupación uvieína de la coalición cola conseyera Laura González y afirmó nun entender el que dende esa organización se sacaran “los pies del cestu”, al empar que recalcaba el so respaldu y solidaridá cola responsable de Vivienda y Servicios Sociales. Al respective, Jesús Iglesias, pidió respetu a los cargos públicos de la coalición y en tonu sarcásticu, aludiendo a la eshibición de republicanismu de los ediles díscolos carbayones, ironizó con que “dalgunos al paecer namás se descubren republicanos cuando se empieza a dicir que’l famosu Muséu de los Premios Príncipe, nun se va facer n’Uviéu, cuando se diba facer n’Uviéu, paez que nun s’alcordaben que yeren republicanos”, perende la sorpresa, dixo Iglesias, “de contemplar que el nuevu Coronel Aranda cuenta con estraños acólitos”. 16 de marzu, 2006 0 FacebookTwitterPinterestEmail
Sociedá L’Ayuntamientu d’Uviéu considérase ganador n’amarraza pol muséu de los Premios by asturnet 16 de marzu, 2006 Los conceyales del Partido Popular (PP) nel Ayuntamientu d’Uviéu, encabezaos pola portavoz Isabel Pérez Espinosa, comparecieron énte los medios un día después de que’l Patronatu de la Fundación Príncipe ficiera pública la so postura respective al centru cultural diseñáu p’Avilés por Óscar Niemeyer. L’equipu de gobiernu de Gabino de Lorenzo amosóse contentu de la resolución de la FPA y afirmó que los oxetivos de la campaña encabezada pol alcalde taben cumplíos: “el Muséu, si dalgún día se fai, va construíse n’Uviéu”, sentención la edil Espinosa. Pa los conceyales populares la resolución del patronatu de la Fundación da-y la razón al Ayuntamientu d’Uviéu y nun entienden el respaldu d’esti órganu al director y presidente de la institución, Graciano García y José Ramón García Rendueles, como una reprobación a la postura de Gabino de Lorenzo: “allá cada quién coles sos responsabilidaes”, dixo la portavoz de los ediles del PP. L’equipu de gobiernu del Ayuntamientu d’Uviéu considera rematada la polémica y siéntese vencedor de la pugna caltenida con Avilés y col Principáu. 16 de marzu, 2006 0 FacebookTwitterPinterestEmail
Sociedá La Fundación Príncipe reconoz que’l Centru Cultural Niemeyer y el Muséu de los Premios son proyectos distintos by asturnet 15 de marzu, 2006 El patronatu de la Fundación Príncipe d’Asturies sofita’l proyectu de Centru Cultural diseñáu por Oscar Niemeyer pa la ría d’Avilés y al empar reconoz qu’ésti ye un proyectu “nuevu y distintu” al del Muséu de los Premios planteáu de mano pola institución dirixida por Graciano García. Na reunión d’esti martes 14 el patronatu de la Fundación decidió evitar l’enfrentamientu col Ayuntamientu d’Uviéu y reivindicar el llabor desempeñáu pol so director y el so presidente, criticaos arispiamente pol equipu de gobiernu carbayón. Tres l’aconceyamientu del órganu rector de la FPA ésti emitió un comunicáu nel que se detalla la hestoria de les xestiones desenvueltes pola institución desque en payares de 2005 l’arquitectu brasileiru Óscar Niemeyer unvió un proyectu pal futuru Muséu de los Premios. Según esta narración la Fundación, en viendo que la envergadura del proyectu escedía les capacidaes de la institución, encamentó a les entidaes de gobiernu asturianes el treslláu de la iniciativa. De magar la FPA, actuó, según defende’l so patronatu, como meru axente intermediariu ente l’arquitectu y el gobiernu autonómicu. Tocante al momentu actual del camín andáu pola iniciativa orixinal de la Fundación, el so patronatu afirma nel comunicáu que “se complaz en constatar que de la idea inicial de la construcción del Muséu de los Premios fízose tránsitu a un proyectu nuevu y distintu, pero asinamesmo de gran relevancia pa la vida social y cultural del nuestru Principáu”. Nesi sen, la Fundación bríndase a colaborar nel desarrollu del proyectu y de les actividaes entamaes cuando’l futuru centru cultural d’Avilés seya una realidá acabada. La institución amuesa tamién na so declaración pública l’agradecimientu a les autoridaes del Principáu “pola so xenerosidá y prontitú” n’acoyer el proyectu y espresa la reconocencia pública al llabor del presidente de la Fundación, José Ángel Rendueles y del so director Graciano García, atacaos duramente pol alcalde d’Uviéu Gabino de Lorenzo y pola conceyal del so equipu Isabel Pérez Espinosa, en díes pasaos. Con esti pronunciamientu el patronatu de la Fundación dexa n’entedicho al presidente Areces que namás unes hores enantes declarara a la cadena Ser Asturies que nun yera cierto el que la Fundación considerara distintos los proyectos del so Muséu y del proyectu contratáu pol Principáu con Niemeyer va unos díes en Brasil. 15 de marzu, 2006 0 FacebookTwitterPinterestEmail
Sociedá Laura González y IU d’Uviéu enfréntense nun cruce de descalificaciones by asturnet 15 de marzu, 2006 L’espolín pol proyectu de Niemeyer pa la Fundación Príncipe d’Asturies chisca a les mesmes files d’Izquierda Xunida col cruce de descalificaciones entamáu ente la conseyera de Vivienda y Servicios Sociales, Laura González, y l’agrupación uvieína de la coalición. La conseyera afirmó en declaraciones a la prensa que los sos compañeros d’Uviéu nun merecíen tar en política por oponese al proyectu de Niemeyer y agora éstos retrúquen-y llamándola “monárquica conversa”. L’agrupación municipal uvieína d’IX publicitara na prensa un comunicáu nel que truñaben contra’l Principáu, l’equipu de gobiernu de Gabino de Lorenzo y la Fundación Príncipe, de la qu’afirmaben namás tenía por fines “la lexitimación del réxime monárquicu n’España”. En manifestaciones a dellos medios la conseyera de Vivienda y Servicios Sociales desmarcábase dafechu de la posición d’IU d’Uviéu y espresaba’l so disgustu hacia los dirixentes carbayones de la coalición (vinculaos al sector críticu del PCA de Francisco de Asís y el conceyal Celso González) de los que dicía “nun merecíen tar en política”. L’agrupación uvieína de la coalición d’izquierdes aprebó una resolución na que carguen contra la conseyera González na que se diz que “namás pueden entendese les esquizofréniques declaraciones de la Conseyera como una forma bastante tosca de facer méritos énte la Fundación Príncipe d’Asturies, de la que ye xuráu dende fai dellos años, tres la so tardía reconversión a les ideas y valores de la Monarquía española”. IU d’Uviéu descalifica con abonda dureza a Laura González na so resolución, na que se da vuelta a les palabres de la conseyera p’afirmar que (a González) “dan-y igual les idees republicanes que les monárquiques, les d’izquierdes que les de dereches, una cosa que la otra, y ési ye’l peor síntoma pa tar en política, sobretoo en nome d’unes siegles, les d’IU, que siguen defendiendo, mal qu’a Laura González-y pese, la tresformación de la sociedá y la implantación de la tercera República”. 15 de marzu, 2006 0 FacebookTwitterPinterestEmail
Sociedá Migoya amuesa’l preste del Principáu pola declaración del Patronatu de la FPA by asturnet 15 de marzu, 2006 La conseyera de Cultura y portavoz del gobiernu asturianu Ana Rosa Migoya ufiertó una rueda de prensa pa valorar la resolución del Patronatu de la Fundación Príncipe sobre’l proyectu d’Oscar Niemeyer pa la ría d’Avilés. La confusión xenerada alrodiu d’esti asuntu llevó a dellos informadores presentes na comparecencia a pregunta-y a Migoya si cuando falaba de “espaciu espositivu” taba falando de un muséu o “qué donó esactamente Niemeyer al Principáu”. Tres la repetición constante de lo que paecía un eufemismu en llabios de la conseyera: “espaciu espositivu”, “centru espositivu”, etc. ún de los periodistes entrugó-y a la portavoz del gobiernu: “¿Cuando dice centro expositivo dice museo?”, a lo que Ana Rosa Migoya respondió que’l términu “Muséu de los Premios” yera “una espresión coloquial” pa referise a un proyectu que nin la Fundación nin el Principáu nomaran enxamás d’esa manera y qu’entrambos queríen más referise a “un gran centru cultural nel que va haber un centru espositivu dedicáu a la memoria de los premiaos y a los valores qu’encarnen”. L’ambigüedá y los enredos llingüísticos de la portavoz del executivu autonómicu na so rueda de prensa nun contribuyeron a escamplar la confusión entamada nes últimes selmanes respective al centru cultural diseñáu por Oscar Niemeyer. Otru de los informadores llegó preguntar a la conseyera: “¿Qué ye esactamente lo que donó Niemeyer al Principáu?”, una cuestión que Migoya quiso solventar afirmando que “Niemeyer donó un anteproyectu, la idea, el diseñu, la so creación” y que “partir d’agora hai que desarrollar los proyectos d’execución, naturalmente”. 15 de marzu, 2006 0 FacebookTwitterPinterestEmail
Sociedá Muerre a los 90 años Zamora Vicente, vildu de María Xosefa Canellada by asturnet 14 de marzu, 2006 El filólogu y miembru de la Real Academia de la Lengua Española, Alonso Zamora Vicente, falleció esti miércoles 14 en Madrid de muerte repentina, según informaron fontes familiares a diverses axencies informatives. L’académicu tuvo casáu cola tamién investigadora filolóxica y académica de la Llingua María Xosefa Canellada y ye autor de dellos trabayos sobre la tradición lliteraria y l’asturiano. Zamora Vicente fuera secretariu de la Real Academia Española de la Lengua y en calidá de talu fue miembru d’honor de l’Academia de la Llingua Asturiana, nomáu na primer xunta pública de la institución asturiana en 1981. Escritor, doctor en Filoloxía Románica y especialista en fonética -como la so muyer María Xosefa-, fue colaborador avezáu de diversos medios periodísticos y universitarios. La muerte prodúxose de manera repentina, según el so fíu Alonso Zamora Canellada, y fue debida, probablemente a un infartu de miocardiu. 14 de marzu, 2006 0 FacebookTwitterPinterestEmail
Sociedá IAS denuncia la escasa presencia del asturiano na Gaceta de Xixón by asturnet 13 de marzu, 2006 L’agrupación xixonesa d’Izquierda Asturiana (IAS) denuncia nun comunicáu la escasa presencia de la nuestra llingua nel boletín d’información municipal del Ayuntamientu “La Gaceta” a la que califica de ridícula. Los nacionalistes ponen como exemplu l’últimu númberu d’esta publicación que se distribúi de baldre en tolos llares de Xixón y que namás cuenta nesta entrega con una de les cuarenta y tres páxines n’asturiano. Según denuncia el portavoz local d’IAS, Pablo Rodríguez, “nel el númberu de marzu de la Gaceta, namás una de les sos 43 páxines tá n’ asturiano, representando un porcentaxe ridículu nel total del conteníu d’esta revista municipal”. Pal representante de Izquierda Asturiana la situación nun ye escepcional nel momentu actual ya que según afirmó: “dende fai unos meses vien apreciándose una paulatina reducción de la presencia del asturiano nesta publicación, que si ya enantes yera escasa, agora ye absolutamente ridícula”, una amuesa pa Rodríguez “del nulu interés que tien el gobiernu municipal en promocionar el nuestru idioma, que si en formatu impresu la presencia es más que mínima, nos espacios de radio y televisivos ye inesistente”, diz Pablo Rodríguez. El portavoz nacionalista califica la situación de “sangrante, ya que ye un mediu costeáu por tolos ciudadanos de Xixón, que según amuesa la reciente encuesta sociollingüística elaborada pol profesor Llera Ramo demanden una presencia digna y una mayor promoción pal asturiano de la que actualmente esistente, si ye que esiste dalguna”. Rodríguez ve en fechos como esti “un claru exemplo de la política que respective a la nuestra llingua lleva a cabu el gobiernu municipal del PSOE-IU-BA, nun faciendo el mas mínimu esfuerzu na normalización del asturiano” y añade que “si del PSOE mui poco podemos esperar a favor del asturiano, d’IU-BA, auténticos títeres de los socialistes, polo que vemos tampoco”. 13 de marzu, 2006 0 FacebookTwitterPinterestEmail