Sociedá La Fundación Príncipe reconoz que’l Centru Cultural Niemeyer y el Muséu de los Premios son proyectos distintos by asturnet 15 de marzu, 2006 El patronatu de la Fundación Príncipe d’Asturies sofita’l proyectu de Centru Cultural diseñáu por Oscar Niemeyer pa la ría d’Avilés y al empar reconoz qu’ésti ye un proyectu “nuevu y distintu” al del Muséu de los Premios planteáu de mano pola institución dirixida por Graciano García. Na reunión d’esti martes 14 el patronatu de la Fundación decidió evitar l’enfrentamientu col Ayuntamientu d’Uviéu y reivindicar el llabor desempeñáu pol so director y el so presidente, criticaos arispiamente pol equipu de gobiernu carbayón. Tres l’aconceyamientu del órganu rector de la FPA ésti emitió un comunicáu nel que se detalla la hestoria de les xestiones desenvueltes pola institución desque en payares de 2005 l’arquitectu brasileiru Óscar Niemeyer unvió un proyectu pal futuru Muséu de los Premios. Según esta narración la Fundación, en viendo que la envergadura del proyectu escedía les capacidaes de la institución, encamentó a les entidaes de gobiernu asturianes el treslláu de la iniciativa. De magar la FPA, actuó, según defende’l so patronatu, como meru axente intermediariu ente l’arquitectu y el gobiernu autonómicu. Tocante al momentu actual del camín andáu pola iniciativa orixinal de la Fundación, el so patronatu afirma nel comunicáu que “se complaz en constatar que de la idea inicial de la construcción del Muséu de los Premios fízose tránsitu a un proyectu nuevu y distintu, pero asinamesmo de gran relevancia pa la vida social y cultural del nuestru Principáu”. Nesi sen, la Fundación bríndase a colaborar nel desarrollu del proyectu y de les actividaes entamaes cuando’l futuru centru cultural d’Avilés seya una realidá acabada. La institución amuesa tamién na so declaración pública l’agradecimientu a les autoridaes del Principáu “pola so xenerosidá y prontitú” n’acoyer el proyectu y espresa la reconocencia pública al llabor del presidente de la Fundación, José Ángel Rendueles y del so director Graciano García, atacaos duramente pol alcalde d’Uviéu Gabino de Lorenzo y pola conceyal del so equipu Isabel Pérez Espinosa, en díes pasaos. Con esti pronunciamientu el patronatu de la Fundación dexa n’entedicho al presidente Areces que namás unes hores enantes declarara a la cadena Ser Asturies que nun yera cierto el que la Fundación considerara distintos los proyectos del so Muséu y del proyectu contratáu pol Principáu con Niemeyer va unos díes en Brasil. 15 de marzu, 2006 0 FacebookTwitterPinterestEmail
Sociedá Laura González y IU d’Uviéu enfréntense nun cruce de descalificaciones by asturnet 15 de marzu, 2006 L’espolín pol proyectu de Niemeyer pa la Fundación Príncipe d’Asturies chisca a les mesmes files d’Izquierda Xunida col cruce de descalificaciones entamáu ente la conseyera de Vivienda y Servicios Sociales, Laura González, y l’agrupación uvieína de la coalición. La conseyera afirmó en declaraciones a la prensa que los sos compañeros d’Uviéu nun merecíen tar en política por oponese al proyectu de Niemeyer y agora éstos retrúquen-y llamándola “monárquica conversa”. L’agrupación municipal uvieína d’IX publicitara na prensa un comunicáu nel que truñaben contra’l Principáu, l’equipu de gobiernu de Gabino de Lorenzo y la Fundación Príncipe, de la qu’afirmaben namás tenía por fines “la lexitimación del réxime monárquicu n’España”. En manifestaciones a dellos medios la conseyera de Vivienda y Servicios Sociales desmarcábase dafechu de la posición d’IU d’Uviéu y espresaba’l so disgustu hacia los dirixentes carbayones de la coalición (vinculaos al sector críticu del PCA de Francisco de Asís y el conceyal Celso González) de los que dicía “nun merecíen tar en política”. L’agrupación uvieína de la coalición d’izquierdes aprebó una resolución na que carguen contra la conseyera González na que se diz que “namás pueden entendese les esquizofréniques declaraciones de la Conseyera como una forma bastante tosca de facer méritos énte la Fundación Príncipe d’Asturies, de la que ye xuráu dende fai dellos años, tres la so tardía reconversión a les ideas y valores de la Monarquía española”. IU d’Uviéu descalifica con abonda dureza a Laura González na so resolución, na que se da vuelta a les palabres de la conseyera p’afirmar que (a González) “dan-y igual les idees republicanes que les monárquiques, les d’izquierdes que les de dereches, una cosa que la otra, y ési ye’l peor síntoma pa tar en política, sobretoo en nome d’unes siegles, les d’IU, que siguen defendiendo, mal qu’a Laura González-y pese, la tresformación de la sociedá y la implantación de la tercera República”. 15 de marzu, 2006 0 FacebookTwitterPinterestEmail
Sociedá Migoya amuesa’l preste del Principáu pola declaración del Patronatu de la FPA by asturnet 15 de marzu, 2006 La conseyera de Cultura y portavoz del gobiernu asturianu Ana Rosa Migoya ufiertó una rueda de prensa pa valorar la resolución del Patronatu de la Fundación Príncipe sobre’l proyectu d’Oscar Niemeyer pa la ría d’Avilés. La confusión xenerada alrodiu d’esti asuntu llevó a dellos informadores presentes na comparecencia a pregunta-y a Migoya si cuando falaba de “espaciu espositivu” taba falando de un muséu o “qué donó esactamente Niemeyer al Principáu”. Tres la repetición constante de lo que paecía un eufemismu en llabios de la conseyera: “espaciu espositivu”, “centru espositivu”, etc. ún de los periodistes entrugó-y a la portavoz del gobiernu: “¿Cuando dice centro expositivo dice museo?”, a lo que Ana Rosa Migoya respondió que’l términu “Muséu de los Premios” yera “una espresión coloquial” pa referise a un proyectu que nin la Fundación nin el Principáu nomaran enxamás d’esa manera y qu’entrambos queríen más referise a “un gran centru cultural nel que va haber un centru espositivu dedicáu a la memoria de los premiaos y a los valores qu’encarnen”. L’ambigüedá y los enredos llingüísticos de la portavoz del executivu autonómicu na so rueda de prensa nun contribuyeron a escamplar la confusión entamada nes últimes selmanes respective al centru cultural diseñáu por Oscar Niemeyer. Otru de los informadores llegó preguntar a la conseyera: “¿Qué ye esactamente lo que donó Niemeyer al Principáu?”, una cuestión que Migoya quiso solventar afirmando que “Niemeyer donó un anteproyectu, la idea, el diseñu, la so creación” y que “partir d’agora hai que desarrollar los proyectos d’execución, naturalmente”. 15 de marzu, 2006 0 FacebookTwitterPinterestEmail
Cine Un miniciclu de Caxastur recupera’l melodrama americanu en seis títulos clásicos by asturnet 14 de marzu, 2006 La Obra Social y Cultural de Caxastur escomienza esti martes 14 un miniciclu de cine dedicáu al melodrama. El programa, coordináu pol director del Festival de Cine de Xixón, José Luis Cienfuegos, presentóse esti llunes n’Uviéu y inclúi títulos como “Esplendor en la hierba” d’Elia Kazan o “Dos en la carretera” de Stanley Donen. Los primeros títulos en proyectase son el citáu de Donen: “Dos en la carretera”, que podrá vese esta tarde a les 20.15 nel centru cultural de Caxastur n’Uviéu y “Siempre hay un mañana” de Douglas Sirk, proyectáu nel Monte de Piedá de Xixón a la mesma hora. El ciclu va desarrollase nos centros culturales de la Obra Social de Caxastur de Xixón, Uviéu, Mieres y Sama hasta’l prósimu 29 de marzu cola proyección de “Quiero vivir” de Robert Wise, “Tu y yo” de Leo MacCarey y “Esplendor en la hierba” d’Elia Kazan. La programación entera y los horarios pueden consultase nel portal de la Obra Social y Cultural de Caxastur , na sección de ciclos . 14 de marzu, 2006 0 FacebookTwitterPinterestEmail
Sociedá Muerre a los 90 años Zamora Vicente, vildu de María Xosefa Canellada by asturnet 14 de marzu, 2006 El filólogu y miembru de la Real Academia de la Lengua Española, Alonso Zamora Vicente, falleció esti miércoles 14 en Madrid de muerte repentina, según informaron fontes familiares a diverses axencies informatives. L’académicu tuvo casáu cola tamién investigadora filolóxica y académica de la Llingua María Xosefa Canellada y ye autor de dellos trabayos sobre la tradición lliteraria y l’asturiano. Zamora Vicente fuera secretariu de la Real Academia Española de la Lengua y en calidá de talu fue miembru d’honor de l’Academia de la Llingua Asturiana, nomáu na primer xunta pública de la institución asturiana en 1981. Escritor, doctor en Filoloxía Románica y especialista en fonética -como la so muyer María Xosefa-, fue colaborador avezáu de diversos medios periodísticos y universitarios. La muerte prodúxose de manera repentina, según el so fíu Alonso Zamora Canellada, y fue debida, probablemente a un infartu de miocardiu. 14 de marzu, 2006 0 FacebookTwitterPinterestEmail
Sociedá IAS denuncia la escasa presencia del asturiano na Gaceta de Xixón by asturnet 13 de marzu, 2006 L’agrupación xixonesa d’Izquierda Asturiana (IAS) denuncia nun comunicáu la escasa presencia de la nuestra llingua nel boletín d’información municipal del Ayuntamientu “La Gaceta” a la que califica de ridícula. Los nacionalistes ponen como exemplu l’últimu númberu d’esta publicación que se distribúi de baldre en tolos llares de Xixón y que namás cuenta nesta entrega con una de les cuarenta y tres páxines n’asturiano. Según denuncia el portavoz local d’IAS, Pablo Rodríguez, “nel el númberu de marzu de la Gaceta, namás una de les sos 43 páxines tá n’ asturiano, representando un porcentaxe ridículu nel total del conteníu d’esta revista municipal”. Pal representante de Izquierda Asturiana la situación nun ye escepcional nel momentu actual ya que según afirmó: “dende fai unos meses vien apreciándose una paulatina reducción de la presencia del asturiano nesta publicación, que si ya enantes yera escasa, agora ye absolutamente ridícula”, una amuesa pa Rodríguez “del nulu interés que tien el gobiernu municipal en promocionar el nuestru idioma, que si en formatu impresu la presencia es más que mínima, nos espacios de radio y televisivos ye inesistente”, diz Pablo Rodríguez. El portavoz nacionalista califica la situación de “sangrante, ya que ye un mediu costeáu por tolos ciudadanos de Xixón, que según amuesa la reciente encuesta sociollingüística elaborada pol profesor Llera Ramo demanden una presencia digna y una mayor promoción pal asturiano de la que actualmente esistente, si ye que esiste dalguna”. Rodríguez ve en fechos como esti “un claru exemplo de la política que respective a la nuestra llingua lleva a cabu el gobiernu municipal del PSOE-IU-BA, nun faciendo el mas mínimu esfuerzu na normalización del asturiano” y añade que “si del PSOE mui poco podemos esperar a favor del asturiano, d’IU-BA, auténticos títeres de los socialistes, polo que vemos tampoco”. 13 de marzu, 2006 0 FacebookTwitterPinterestEmail
Sociedá Representantes vecinales de Xixón piden que se conserven los topónimos castellanizaos xunto los asturianos by asturnet 13 de marzu, 2006 Les ediciones locales de los dos principales diarios asturianos recueyen estos díes estremaes opiniones de representantes vecinales de barrios y parroquies de Xixón alrodiu del nomenclátor oficial aprebáu el viernes 10 nel plenu municipal. La mayor parte de los testimonios publicaos piden que se conserve la denomación castellanizada xunto la tradicional. Representantes vecinales y vecinos de los distintos llugares del conceyu xixonés opinen na prensa local alrodiu de la oficialización de los nomes fecha nel espediente de la Xunta de Toponimia del Principáu. Les posiciones van dende la defensa arguyosa del topónimu como ye’l casu de l’Asociación de Vecinos de Cimavilla hasta los que s’oponen radicalmente como nel casu de L’Arena. Sicasí, ente partidarios y detractores de la oficialización de los nuevos topónimos, la voz más común ye la que pide’l caltenimientu de la denomación billingüe asturiano -castellano cola escepción de los nomes de llugar menores. 13 de marzu, 2006 0 FacebookTwitterPinterestEmail
Sociedá La Escuela de Maxisteriu acueye’l XI Alcuentru Internacional de Llingua Minoritaria y Educación by asturnet 12 de marzu, 2006 Los recursos y estratexes didáutiques van ser la tema del programa del XI Alcuentru Internacional de Llingua Minoritaria y Educación, que se tien de desendolcar ente’l 29 y el 31 d’esti mes de marzu na Escuela Universitaria de Maxisteriu d’Uviéu. Christian Puren (de la Université Jean Monnet de Saint-Etienne) entamará l’Alcuentru’l miércoles 29 con una conferencia sobre la “Enseñanza de les llingües: dende l’enfoque comunicativu hasta la perspeutiva aicional”. Esi día tamién intervendrán nel alcuentru’l profesor de llingua asturiana Xulio Berros y la profesora de la Universidá de Barcelona Celia Romea. El xueves 30 ta previsto que participen nel Alcuentru la collaboradora de Mercator Education Alie Van Der Schaff, Loreto Díaz, de la Universidá d’Uviéu y Joaquím Dolz de la de Genève. Y pa finar los alcuentros tienen d’intervenir el vienres 31 Xandro Martino, Ruth González y Fernando Padilla. El programa del alcuéntru enca`´armase entres conferencies y comunicaciones que se desendolquen de 18 a 19 hores, de 19 a 19:30 hores y de 19:30 a 20:30 hores. L’Academia de la LLingua y el CPR d’Uviéu, orgenizadores del Alcuentru, fairán entrega del certificáu d’asistencia a estes xornaes. 12 de marzu, 2006 0 FacebookTwitterPinterestEmail
Sociedá Ramón d’Andrés defende un modelu de cooficialidá propiu p’Asturies by asturnet 10 de marzu, 2006 El responsable de la Oficina de Política Llingüística del Principáu, Ramón d’Andrés, defendió un modelu propiu de cooficialidá p’Asturies nel cursu d’una conferencia que pronunció esti xueves 9 en Xixón na Casa del Pueblo de l’agrupación local del PSOE. D’Andrés punxo como exemplu espardible a tolos conceyos l’espediente toponímicu xixonés aprebáu nel plenu municipal d’esti viernes y apostó por superar prexuicios énte la normalización social de la llingua asturiana. Na so conferencia énte los socialistes de Xixón el responsable de Política Llingüística del gobiernu asturianu afirmó que “nun hai un modelu únicu de oficialidá, sinón que caún respuende a la so propia realidá” y defendió pa la nuestra comunidá una fórmula de validación xurídica “que nun tien por qué ser calcada a la d’otres comunidaes”. Una de les característiques de la cooficialidá n’Asturies había ser pa Ramón d’Andrés la conocencia del asturianu pa tolos ciudadanos y el so inxerimientu en tolos niveles de la enseñanza ensin qu’ello representare un principiu d’obligatoriedá, talu lu contemplen los marcos xurídicos d’otres comunidaes. Respective al papelu de la Televisión del Principáu d’Asturies (TPA) na normalización llingüística, D’Andrés amosóse esperanzáu de que l’asturiano va dir entrando a poco a poco y afirmó que lo importante ye que s’escomience “con bon pie”. L’espediente toponímicu que’l plenu del Ayuntamientu de Xixón aprebaba esti viernes 10 ye pal xefe de la Oficina de Política Llingüística “un modelu a siguir polos otros conceyos”, tanto en cuantes a la so minuciosidá y procuru como al consensu social ufiertáu na so elaboración. Pa Ramón d’Andrés el fechu de qu’esti nomemclátor oficial tenga’l vistu bonu d’un equipu de gobiernu municipal como’l de Xixón ye tamién una amuesa de que les coses pueden facese namás con entamales bien dende un principiu. D’Andrés tamién espresó el so enfotu en que la sociedá asturiana sepa superar situaciones pasaes y trabayar activamente na normalización de la llingua en tolos niveles. 10 de marzu, 2006 0 FacebookTwitterPinterestEmail
Sociedá El Conceyu de Xixón lleva al Plenu el so espediente toponímicu by asturnet 9 de marzu, 2006 El Plenu del Ayuntamientu de Xixón va tratar esti viernes 9 l’aprebación del espediente de revisión de la toponimia del conceyu elaboráu pola Xunta Asesora del Principáu. L’informe ye’l resultáu d’un llargu y pormenorizáu trabayu nel que los espertos estudiaron nomes de llugar de tolos núcleos de población menores y mayores, urbanos y rurales. L’espediente xixonés va ser el primeru d’una de les tres ciudaes con más población d’Asturies. La Xunta de Toponimia, organismu multidisciplinar de l’administración asturiana, estudió a lo llargo de meses los topónimos de les venti parroquies rurales de Xixón y de los seis distritos urbanos pa iguar el nomenclátor final al que’l Plenu va dar el so vistu bonu na so sesión d’esti viernes. Va ser la primer vez nel que parroquies importantes como Xove, Valdornón, Ciares o Montiana recuperen oficialmente los sos nomes tradicionales.L’espediente toponímicu del conceyu playu fue ún de los que cuntaron con una participación ciudadana más amplia de tolos que se vienen entamando hasta agora, llegando en munchos casos al debate detalláu ente vecinos y espertos sobre la correción de los topónimos estudiaos. 9 de marzu, 2006 0 FacebookTwitterPinterestEmail