Sociedá L’Academia acoyerá’l 5 de mayu a Manuel García, , como miembru d’honor by asturnet 23 d'abril, 2006 L’Academia de la Llingua Asturiana da anuncia de qu’esti añu l’actu oficial del Día de les Lletres Asturianes fairáse’l día 5 de mayu, vienres, a les 20 hores nel Teatru Filarmónica, asitiáu na hestórica Plaza Porlier d’Uviéu. Na solemne sesión académica tomará posesión como nuevu Miembru d’Honor de l’Academia D. Manuel García Galano. L’Academia de la Llingua Asturiana quier, d’esti mou, amosar el so compromisu irrenunciable cola asturianidá de les tierres del Navia-Eo y coles persones ya instituciones que trabayen pol caltenimientu de la cultura y la llingua d’Entrambasauguas. Arriendes del discursu institucional de la Presidenta de l’Academia de la Llingua Asturiana, l’actu va abrise cola actuación del gaiteru Iñaki Sánchez Santianes y la cantante de tonada Bibiana Sánchez García; y va pesllase col grupu folk DRD. L’Academia de la Llingua Asturiana, siguiendo’l facer entamáu la edición pasada, fai un brinde a los asistentes pa que, na midida de les sos posibilidaes, lleven traxe asturianu de mou qu’ésti puea, pasu ente pasu, dir asitiándose nos actos más solemnes. Hai que dicir, arriendes de lo anterior, que la sesión académica podrá siguise en tol mundu en tiempu real al traviés d’Internet, darréu que l’ALLA quier festexar con Radio Sele’l fechu de llevar 20 años nes ondes, nun inequívocu compromisu cola normalización social de la llingua asturiana. Como vien socediendo tolos años, llueu del actu académicu habrá una espicha, abierta a la participación de tola xente, nel restaurante La Gruta, con bailles y música asturiana. 23 d'abril, 2006 0 FacebookTwitterPinterestEmail
Sociedá Darréu esixe un plan pa la promoción del asturianu ente la mocedá dAvilés by asturnet 23 d'abril, 2006 La organización moza d’izquierdes Darreu, venceyada a Andecha Astur, depues de que se volviere abrir la Oficina de Promoción Llingüística d’Aviles (‘Ellicta’), pide’l desarrollu d’un plan pa la promoción y normalización de la llingua asturiana ente los mozos del conceyu, pa qu’estos servicios de normalización, que califica de “cesión que fai’l PSOE ente IX pa que se xustifique ente parte del so ellectoráu”, nun sían “un pasu en falsu que quier despistar a tol movimientu de reivindicación llingüística” Según pide la mocedá de Darreu, la reactivación de la Estaya de Llingua y de Cultura Tradicional Asturiana d’Aviles, conocida como Ellicta, tien de tener como ún de los sos oxetivos principales “l’espardicimientu del nuestru idioma ente la mocedá avilesina”, pa lo qu’esixen que se faiga un proyectu ampliu de promoción del asturianu que garantice la so presencia en tolos ámbitos pelos que se mueva la xuventú d’esti conceyu. La estaya avilesina de Darreu asegura tar “convencida de qu’estes oficines nun tien más oxetivu que dar un pasu en falsu que quier despistar a tol movimientu de reivindicación llingüística”, polo que manifiesten que nun tán acordies cola esistencia de tal serviciu, “por insuficiente y porque nun vien a satisfacer denguna esperanza nin a solucionar denguna de les esixencies hestóriques del movimientu de reivindicación llingüística”. Sicasí, Darreu ta decidida a esixir que tala oficina faiga’l so trabayu con eficiencia y con resultaos. 23 d'abril, 2006 0 FacebookTwitterPinterestEmail
Sociedá L’Atenéu Obreru de Xixón echa una mirada a la sociedá asturiana d’anguaño by asturnet 23 d'abril, 2006 Güei, llunes 24 d’abril a les siete y media la tarde, l’Ateneu Obreru de Xixón va acoyer una tertulia dedicada a analizar la sociedá asturiana d’anguaño, enmarcada dientro de los actos de cellebración de los VIII Encuentros Les Otres Cares del Planeta. La tertulia va xirar alrodiu de los datos qu’aporten los estudios sociolóxicos que describen a la xente que vive n’Asturies: valores, hábitos, edaes, situaciones llaborales, grau de satisfacción,etc. Holm Detev Köler (Profesor del Departamentu d0Economía Aplicada de la Universidá d’Uvieu), va introducir la tertulia, na que tamien van participar Boni Ortiz (críticu teatral y directivu del Ateneu Obreru de Xixón), Ángel Alonso (Profesor d’Enseñanza Secundaria y directivu del Ateneu Obreru de Xixón), Javi Savoy (hosteleru y músicu), Pilar Sampedro (psicóloga y sexóloga), Ana Suárez (presidenta de la Coordinadora Asturiana d’ONGD y coordinadora del Conseyu de Mocedá d’Asturies) y Javier Orozco (coordinador del Programa d’Atención a Víctimes de Violaciones de Dererechos Humanos en Colombia). 23 d'abril, 2006 0 FacebookTwitterPinterestEmail
Sociedá Un grupu de militantes del PP píde-y a Cascos que se presente a les autonómiques by asturnet 20 d'abril, 2006 Los asturianos clamen que Francisco Álvarez-Cascos se ponga al frente de la política del Principáu. Con esti encabezamientu, dellos militantes del PP tán recoyendo firmes pa pidir que’l que fore ministru de Fomento, Francisco Álvarez-Cascos, vuelva a participar na vida política, lliderando la candidatura popular nes ellecciones autonómiques que se van cellebrar l’añu qu’entra. Per otra parte, los populares alvierten que nun van consintir la reforma del Estatutu d’Autonomía nesta llexislatura. Nel pliegu que tán pasando dende hai unos díes dellos militantes del Partíu Popular asturianu pidiendo la vuelta a la política d’Álvarez-Cascos, estimen que ‘diba ser un erru nun esixi-y al señor Álvarez-Cascos que vuelva a l’actividá política nunes ellecciones clave pal futuru d’Asturies’; al tiempu qu’asguen qu’estos comicios van ser la ocasión de ‘rechazar a los que quieren cambiar la Constitución’. Nesti mesmu sen, Ovidio Sánchez posicionase escontra la reforma estatutaria argumentando que los asturianos nun clamen por estos cambios. Mentestanto, Vicente Alberto Álvarez Areces, presidente del Gobiernu asturianu, recibía esta mañana de manes de Bernardo Fernández la memoria ellaborada pol Conseyu Consultivu, cola que l’equipu del PSOE va trabayar la so comunicación pal debate políticu na Xunta Xeneral. 20 d'abril, 2006 0 FacebookTwitterPinterestEmail
Sociedá Tino Venturo echa contra los que saquen polémiques absurdes cola toponimia de Xixón by asturnet 20 d'abril, 2006 El conceyal de la Zona Rural del Ayuntamientu de Xixón, Faustino García, más conocíu como ‘Tino Venturo’, defendió ayeri’l trabayu de la Xunta Asesora de Toponimia y l’espediente aprobáu nel so conceyu, echando contra los que saquen ‘polemiques absurdes’ colos nomes tradicionales. Como respuesta a los que piden que se corrixa l’espediente aprobáu nel Plenu, faciendo que tola toponimia apaeza billingüe, Venturo aclarió que l’Ayuntamientu xixones sólo va pidir que se camuden dellos acentos de talu espediente que taben trescritos mal por enquivocación. Nuna charra organizada ayeri na Casa’l Pueblu de Xixón y que tuvo como ponente al director de la Oficina de Política Llingüística del Principáu, Ramón d’Andres, Tino Venturo defendió’l trabayu de los espertos asegurando que dalgunos topónimos que foron cuestionaos públicamente, como fue’l casu de Puao, L’Arena o L’Abadía Cenero, van quedar como tán; y que los únicos cambios que se van facer sobre esi espediente correspuenden a ‘dellos acentos que taben trescritos mal por enquivocación’. Ramón d’Andres aprovechó la conferencia pa eloxar la unanimidá cola que los políticos del consistoriu xixones aprobaron l’espediente toponímicu, asina como’l llabor de l’alcaldesa de Xixón, Paz Fernández Felgueroso, que dende’l primer momentu defendió institucionalmente tales propuestes ‘en medio d’una polemica falsa’. 20 d'abril, 2006 0 FacebookTwitterPinterestEmail
Sociedá La buelga asturiana percuerre Cuba by asturnet 19 d'abril, 2006 La XVIII edición del Festival “La Huella de España”, que dende l’añu 1988 lleva cellebrándose en L’Habana y que tien a la baillarina cubana Alicia Alonso como principal promotora, va tar dedicáu a la buelga d’Asturies na islla caribeña. Ente los díes 22 y 29 d’abril una representación asturiana, encabezada por cuatro conseyeros del Gobiernu del Principáu amás de los representantes del Conseyu de Comunidaes Asturianes, va llevar a pintores, músicos, cantantes, danzadores y escritores al Gran Teatru de L’Habana, l’Anfiteatru y la Casa de la Obrapía. La conseyera de Cultura, Ana Rosa Migoya, sustituyendo al presidente del Principáu que, por problemes d’axenda, nun puede asistir a la capital cubana, el conseyeru de Trabayu, Graciano Torre, la conseyera de Vivienda, Laura González y el conseyeru de Xusticia, Francisco Javier García Valledor, van ser los representantes del gobiernu asturianu que dende güei van tar na islla caribeña, encabezando una comitiva de la que tamien formen parte’l director de l’Axencia de Cooperación, Rafael Palacios, la presidenta de la Xunta, María Jesús Álvarez, los portavoces parllamentarios na Cámara, asina como’l presidente y el vicepresidente del Conseyu de Comunidaes Asturianes, Manuel Fernández de la Cera y Roberto Perez. La representación artística asturiana nel festival va tar integrada pola cantante llírica Tina Gutierrez, el conxuntu folclóricu Señaldá, l’escritor Xuan Bello xunta’l gaiteru Flavio Benito, el cantante Chus Pedro y la moza Anabel Santiago, qu’esta nueche actúa nel Teatru Xovellanos de Xixón. El Coru ‘La Flor’ y el grupu de teatru ‘Margen’, que va llevar a escena la obra ‘El viaje a ninguna parte’ del dramaturgu Arturo Castro, son otros de los representantes asturianos nel Festival “La Huella de España”. Xunta toos ellos, siete artistes asturianos van enseñar les sos obres, baxo una muestra que lleva por títulu “Nuevos itinerarios del arte asturiano”. La exposición que se va colgar na Casa de la Obrapía de L’Habana Vieya axunta pieces d’Edgar Plans, Jorge Nava, Irma Álvarez, Víctor García, Elena Rato, Carlos García y Maria Vallina. 19 d'abril, 2006 0 FacebookTwitterPinterestEmail
Sociedá Izquierda Asturiana denuncia’l ‘secuestru’ de la toponimia per parte del gobiernu del Principáu by asturnet 19 d'abril, 2006 El portavoz nacional d’Izquierda Asturiana, Ignaciu Llope, denuncia’l ‘secuestru’ per parte del gobiernu del Principáu de nueve expedientes toponímicos asina como la falta d’usu de los que yá foron aprobaos. Pal representante de la organización d’izquierda, pesie a que los conceyos aprueben la toponimia asturiana esta ye “retenida de forma inxustificada y aplazada” la so aprobación “sine die”, lo que fue calificao por Llope como “intolerable y una total tomadura de pelo”. IAS esixe d’esta manera l’aprobación inmediata d’esos expedientes así como l’usu de los que yá son oficiales. Según el portavoz d’IAS, “pesie a qu’estos 9 ayuntamientos (Ayer, Colunga, Llaviana, Morcín, Nava, Pezós, La Ribera, Riosa y Samartín del Rei Aurelio) aprobaron, na mayor parte los casos por unanimidá y hai meses, la solicitú de que s’oficialicen los nomes asturianos de los pueblos y llugares, el gobiernu asturianu, dende l’iniciu del procesu ta faciendo un llabor de dilación pa evitar que se lleve a efectu la oficialización rial d’esos nomes”. Pa Llope “el PSOE ta sorprendíu del grau d’aceptación que la nuestra toponimia ta teniendo inclusive nos cuadros locales de les sos propies files”, poro ta tratando de frenar esti procesu per vía alministrativa. Ignaciu Llope añedió que la prueba d’esta falta de voluntá ye que los topónimos de los conceyos aprobaos en Conseyu de Gobiernu nin siquier se tan usando nes publicaciones oficiales. Tocante al papel d’IX-BA nel talu gobiernu, el portavoz d’IAS señaló que “ye tan pateticu que nun merez calificación, yá que l’actitú del PSOE básase en rise a la cara del so sociu y nun cumplir los sos compromisos, a sabiendes de que la capacidá d’aguante d’IX-BA ente los desplantes y insultos del PSOE ye directamente proporcional al amor qu’aquellos tienen a los sos puestos y cargos nel Gobiernu”. 19 d'abril, 2006 0 FacebookTwitterPinterestEmail
Sociedá Inaciu Galán presenta esti xueves en Xixón el so Diccionariu básicu asturianu-inglés / inglés-asturianu by asturnet 18 d'abril, 2006 El mozu Inaciu Galán y González presenta esti xueves día 20 d’abril a les siete y media la tarde na Escuela d’Hostelería y Turismu de Xixón (Paseu Begoña, 30) el so Diccionariu básicu asturianu-ingles, ingles asturianu, espublizáu pola Editorial Trabe. El trabayu, introducíu por un entamu d’Ana Cano, presidenta de l’Academia de la Llingua Asturiana, tien unes 14.000 entraes y cerca de 40.000 acepciones, y nél apaez un apendice nel que figuren los númberos cardinales y una llista colos principales verbos irregulares ingleses. Ediciones Trabe, que tien nel so catálogu dos de los meyores diccionarios qu’ofrez el mercáu asturianu (el Diccionariu asturianu castellanu de Xuan Xose Sánchez Vicente, y el Diccionariu castellanu asturianu de sinónimos y equivalencies, de Luis Alberto Prieto), tien previsto espublicar esti mesmu añu’l so Diccionariu gaelicu-irlandes asturianu / asturianu gaelicu-irlandes, de Xuan Xose Lajo, y un Diccionariu tecnicu básicu de telecomunicaciones ya informática, de Pablo Suárez García. 18 d'abril, 2006 0 FacebookTwitterPinterestEmail
Sociedá Los Trabayadores de la Normalización denuncien el so esmolimientu poles oficines de Llangréu y Mieres by asturnet 16 d'abril, 2006 L’Asociación de Trabayadores de la Normalización Llingüística quier denunciar públicamente la falta de planificación y compromisu pa cola normalización llingüística per parte del Gobiernu del Principáu d’Asturies y de los conceyos; considerando más que preocupante’l casu de Llangreu, que ta acabante de sacar a concursu una plaza pa un responsable del so serviciu de Normalización Llingüística, ensin que la convocatoria cumpla los mínimos esixibles pa cubrir tal serviciu. Los trabayadores de la Normalización Llingüística denuncien que, sacando la plaza a concursu nel mes d’abril, tala vacante nun se va cubrir hasta mayu nel meyor de los casos, dexando pasar mediu añu ensin cubrir esi puestu. El conceyu llangreanu, ún de los que cuenta con más tradición na ufierta d’estos servicios, saca agora la plaza a media xornada cuando nos cuatro años que tuvo furrulando primero dichu trabayu fue a xornada completa. En cuantes a les prebes de selección, l’Asociación quexase de que nun hai dengún tipu de temariu pa tala oposición, consistiendo una de les prebes nuna simple redacción escrita; mentes que l’Asociación tien propuesto y ofrecío a disposición de los conceyos un temariu y una evaluación de meritos adecuada pa cubrir una plaza de tecnicu como esta. L’Asociación de trabayadores pola Normalización Llingüística fai pública d’esta manera la so crítica a la política de subvenciones qu’aplica la Conseyería de Cultura, Comunicación y Turismu nesti sen, yá que nun teniendo unos mínimos de condiciones nin un siguimientu claru de tala subvención, vuelve ineficaz cualquier midida d’apoyu a la Rede de Normalización nos conceyos asturianos. 16 d'abril, 2006 0 FacebookTwitterPinterestEmail
Sociedá La Rede Mercator estrena nueva web en mercator-central.org by asturnet 13 d'abril, 2006 La Rede Europea Mercator acaba de poner en marcha un nuevu portal n’Internet na direición www.mercator-central.org pa xuntar nelli la información qu’ufren les tres axencies que componen la rede. El sitiu web ta escritu pel momentu namái que n’inglés pero ta previsto que darréu se puea ufiertar en catalán, galés, alemán, francés y frisón. Mercator ye una rede europea compuesta por tres axencies que tienen como obxetivos cimeros trabyar nel ámbitu de les llingües minoritaries. Toes les tres tienen los sos particulares proyeutos, allugándose en Frisia’l Centru empobináu a temes d’Educación, que dirixe la Academia Frisona en Holanda, en Barcelona’l CIEMEN o centru empobináu a temes de lexislación y na Universidá d’Aberistwyth (Gales) el Centru pa temes de comunicación. Dende l’añu 2003, la rede entama tolos años un Congresu pa estudiar la situación de les llingües minoritaries europees y la información sobre los documentos d’esos congresos puen consultase na nueva web, onde tamién s’atoparán noticies sobre cada una de les llingües minoritaries que se falen nel continente. Nueva web de Mercator 13 d'abril, 2006 0 FacebookTwitterPinterestEmail