Sociedá SUATEA denuncia les inxerencies de Galicia y la falta de contundencia del Principáu by asturnet 13 d'avientu, 2005 SUATEA denuncia nun comunicáu lo que considera “inxerencia de les instituciones, organizaciones y partíos políticos de Galicia n´asuntos que competen únicamente a Asturies”. Pal sindicatu d’enseñantes diverses iniciatives planteaes dende l’otru llau del Eo amuesen que “Galicia ta intentando apropiase de competencies que nun son suyes y esto paeznos que merez una rempuesta tamién dende´l nuestru Gobiernu que nun pon interés nesta cuestión”. La crítica a la falta d’atención del executivu asturianu nun significa pal sindicatu que se cuestione l’autoridá institucional del Principáu nesti asuntu: “Los conceyos del Navia EO son asturianos y como tales tan representaos poles Instituciones Asturianes” y que “cualisquier política que se refiera a esa fastera tien de facese dende Asturies”. Per otru llau SUATEA, xunta’l Sindicatu d’Estudiantes, tien convocada pa la xornada d’esti miércoles 14 d’avientu una fuelga na enseñanza contra’l proyectu de la LOE. A les 18.00 hores hai tamién entamada una manifestación dende la Estación de la Renfe d’Uviéu pol mesmu motivu. 13 d'avientu, 2005 0 FacebookTwitterPinterestEmail
Sociedá Touriño pide moderación al BNG y el cabezaleru del PP d’Ourense sofita a los nacionalistes by asturnet 13 d'avientu, 2005 El presidente de la Xunta de Galicia el socialista Emilio Pérez Touriño pidió esti llunes moderación a la hora d’abordar la reforma del Estatutu de la so comunidá y reclamó un nuevu testu “a favor del país, pa que’l país avance y non contra naide”. Pel so llau el presidente asturianu Vicente Álvarez Areces retrucó-y a Anxo Quintana considerando “inaceptables” los sos argumentos, “sobremanera el llingüísticu”, dixo. Pérez Touriño terció na polémica sobre la propuesta estatutaria del BNG pidiéndo-y al partíu col que gobierna en coalición que plantee una reforma “dende’l consensu y la moderación”. El presidente gallegu declaró después de falar del asuntu col so vicepresidente el nacionalista Anxo Quintana: «hai que reconducir esto al terrenu de la prudencia y al respetu mutuu, tanto del qu’opina dende fuera en relación a la reforma del Estatutu de Galicia, que tien dar la so opinión dende’l respetu, como el que la pronuncia, la formula y la promueve». indicó. La polémica, siacasí, nun amengua y salten al ruedu nuevos intervinientes como’l cabezaleru del Partíu Popular d’Ourense, José Luis Baltar, que sofitó la propuesta del Bloque de plantear la posibilidá de que conceyos d’otres comunidaes puedan incorporase a Galicia: “hai que dexar esa puerta abierta”, afirmó Baltar, según recueye’l diariu asturianu La Nueva España na so edición d’esti martes 13. El presidente asturianu tamién quixo intervenir de nuevu y fízolo pa retrucar a Anxo Quintana: “los sos argumentos son inaceptables, sobremanera el llingüísticu”, dixo Álvarez Areces a diversos medios de la nuestra comunidá. 13 d'avientu, 2005 0 FacebookTwitterPinterestEmail
Sociedá Valledor afirma que la falta d’oficialidá propicia actitúes como les del BNG by asturnet 13 d'avientu, 2005 El conseyeru de Xusticia y Esteriores del Principáu, Francisco Javier García Valledor, considera que la falta d’una política llingüística y cultural nel Navia-Eo, asina como’l non reconocimientu oficial del asturianu y la fala d’Entrambasaguas, propicien actitúes como la del Bloque Nacionalista Galego (BNG) pa con Asturies. Valledor refugó la propuesta de los nacionalistes gallegos p’abrir nel nuevu estatutu de Galicia la posibilidá d’incorporar fasteres d’otres comunidaes y dixo que de llevase a fechu diba “impidir l’afitamientu d’una rexón euroatlántica”. El conseyeru d’Izquierda Xunida-Bloque declaró que si la llingua asturiana y el gallego-asturiano fueren oficiales, y si el Principáu desenvolviere una política propia nes zones más occidentales de la nuestra comunidá, propuestes como la del BNG o iniciatives asemeyaes “nun seríen posibles”. 13 d'avientu, 2005 0 FacebookTwitterPinterestEmail
Escéniques FETEN 2006 bate’l record de compañíes que piden la so participación by asturnet 12 d'avientu, 2005 Doscientes noventa y nueve compañíes teatrales de tol mundu presentaron los sos proyectos artíticos pa ser incluíos dientro la programación de la prósima Feria Europea de Teatru pa Neños (FETEN) que va celebrase en Xixón del 12 al 17 de febreru de 2006. El certame xixonés bate asina na so prósima cita’l so record de participación de compañíes. Les cerca de 300 compañíes pertenecen a 17 comunidaes y a 14 países (Arxentina, Armenia, Bélxica, Chile, Dinamarca, Finlandia, Francia, Inglaterra, Italia, Portugal, Puerto Rico, República Checa, Suiza y Venezuela). Tres el procesu de selección a cargu de técnicos de la Fundación Municipal de Cultura y especialistes en teatru infantil, más de 40 compañías van ser les que participen en FETEN 2006, una feria que va cuntar con más de 60 representaciones, ente les que s’ incluin espectáculos d’animación na cai, pasucais, y toa triba de técniques y de formatos. Les sedes de FETEN 2006 van ser les del añu pasáu: Teatru Xovellanos, Centru Municipal Integráu XiXón-Sur, Colexata San Xuan Bautista, Centru de Cultura Antigu Institutu, centros municipales y varies cais y places de la ciudá de Xixón. Les compañíes participantes en FETEN 2006 opten a los siete premios previstos (meyor espectáculu, meyor dirección, meyor interpretación masculina, meyor interpreteación femenina, meyor testu, meyor escenografía, meyor vestuariu y caracterización). 12 d'avientu, 2005 0 FacebookTwitterPinterestEmail
Sociedá Anxo Quintana pide a los gobiernos d’Asturies y de Castiella-Lleón que rectifiquen by asturnet 12 d'avientu, 2005 El vicepresidente de la Xunta de Galicia y secretariu xeneral del Bloque Nacionalista Galego (BNG) Anxo Quintana considera “deproporcionaes, ilóxiques y manipuladores” les crítiques a la propuesta de nuevu estatutu elaborada pol so partíu y qu’inclúi la posible incorporación a la comunidá vecina de conceyos limítrofes. Quintana pide a los gobiernos d’Asturies y de Castiella-Lleón una rectificación poles sos crítiques. El portavoz nacional del BNG anunció en declaraciones a diversos medios que va reclamar en nome de la Xunta una desplicación a les másimes autoridaes del Principáu y de la Junta de Castiella-Lleón polo que cuida “gravísimes acusaciones ya insultos” nes reacciones polítiques a la propuesta de nuevu estatutu pa Galicia del Bloque. Anxo Quintana afirmó que “voi dirixime tanto al gobiernu autónomu de Castiella y Lleón como al d’Asturies pa, dende una perspectiva cordial y col meyor sentíu de respetu institucional, protestar por una actitú desproporcionada, ilóxica, en dalgunos casos tremendamente manipuladora, y qu’evidencia’l desconocimientu profundu de lo que propón el BNG y de los sos propios estatutos”, dixo’l políticu gallegu. 12 d'avientu, 2005 0 FacebookTwitterPinterestEmail
Sociedá IAS participa na campaña europea contra la directiva Bolkestein by asturnet 12 d'avientu, 2005 La formación nacionalista Izquierda Asturiana (IAS) participa na campaña que diverses organizaciones de toa Europa desenvuelven contra la llamada directiva Bolkestein, un proyectu de normativa que tenta amenguar les prestaciones públiques nel vieyu continente.IAS ye hasta la fecha la única organización asturiana que participa na campaña. Más d’un cientu de colectivos de toa Europa opónense a la directiva del anterior comisariu européu, l’holandés Frits Bolkestein, que tenta lliberalizar la circulación de los servicios nos estados. D’adoptase esta directiva, afirma IAS: “tolos servicios suministraos en la Unión Europea seríen consideraos como cualquier mercancía”. La directiva Bolkestein tien puesto en guardia a organizaciones sociales, polítiques y sindicales de toa Europa que, dende’l pasáu mes de marzu, alcen la voz pa lluchar contra lo que IAS califica de “auténtica agresión a elementos fundamentales pal bientar social”, como son los sistemes públicos de pensiones, les polítiques d’integración, el sistema sanitariu, o los derechos de los trabayadores consagraos poles distintes lleis nacionales. 12 d'avientu, 2005 0 FacebookTwitterPinterestEmail
Sociedá La propuesta del BNG amuesa que la política asturiana sigue a remolque de Madrid by asturnet 11 d'avientu, 2005 El meyor exemplu de que la política asturiana va a remolque de la madrilena y nun tien mires propies afitóse estos díes depués de que se-y diere rempuesta a la propuesta del BNG d’incorporar a conceyos d’Asturies o Castiella que son falantes de galego. La rempuesta fízose depués de qu’espublizaren medios estatales y axencies de noticies la noticia y, ensin embargu, nun hebo rempuesta denguna cuando lo espublizaron dellos medios nel entamu d’Avientu, ente ellos Asturnews Nestos díes, el gobiernu asturianu consideró inaceptable una propuesta que ya conocía dende’l día 2 cuando s’espublizo en dellos medios, ente los que s’alcontraba Astunews, que “la propuesta de Nuevu Estatutu pa Galicia qu’ellaboró’l Bloque Nacionalista Galego (BNG)pa la so convención nacional del prósimu 17 d’avientu inclúi nes sos disposiciones transitories la posibilidá de que conceyos d’otres comunidaes puedan pidir la so incorporación a la comunidá gallega y encamiéntase a los parlamentos d’eses comunidaes a oficializar l’idioma de Rosalía”.Les referencies a la llamada Galicia esterior alcuéntrense na disposición transitoria primera que diz: “van poder incorporase a Galicia aquellos conceyos limítrofes de característiques hestóriques, culturales, económiques y xeográfiques análogues, al través de procedimientos democráticos regulaos por llei”. La otra referencia ye la contenía la disposición transitoria segunda qu’afala que’l parlamentu de Galicia reclame “a los parlamentos de les comunidaes autónomes a les que pertenecen les comarques limítrofes de fala gallega a que declaren cooficial nel territoriu de los conceyos d’eses comarques y nos órganos institucionales centrales de les respectives comunidaes autónomes”. Esta noticia nun tuvo denguna rempuesta porque lo que nun s’asoleya nos medios estatales nun tien seguimientu n’Asturies, como tampoco lo tien nos medios tradicionales impresos, que nun recoyeron tampoco neses feches la noticia, a pesar de la so gravéda. La espuela a esta situación política kafkiana punxola ayeri Anxo Quintana, pal que la postura amuesada polos dirixentes políticos asturianos son “tremendamente manipuladoras”. Esa postura amuesa sigún elli un “desconocimiento profundo, no sólo de lo que propone el BNG, sino de los Estatutos vigentes en sus propias Comunidades autónomas”, ya que la referencia a la incorporación de conceyos que llenden cola comunidá apaecen según el dirixente nacionalista “en los estatutos, no sólo del BNG, sino también de Castilla y León y de Asturias”. Más información na web del BNG 11 d'avientu, 2005 0 FacebookTwitterPinterestEmail
Sociedá AI y Nun Tris escenifiquen la denuncia de Guantánamo nel Día Internacional contra la Tortura by asturnet 10 d'avientu, 2005 Amnistía Internacional d’Asturies remembra esti sábadu 10 el Día Internacional contra la Tortura y fai una llamada d’atención sobre los abusos cometíos por dalgunos gobiernos en nome de la llamada “guerra contra’l terror”. Embaxo’l lema “Pesllemos Guantánamo”, la organización humanitaria alerta de que la prixón norteamericana ye “la punta de un iceberg d’abusos” contra los derechos de la persona. La compañía asturiana Nun Tris pon la mázcara histriónica a la denuncia fecha por AI sobre los escesos de la política antiterrorista llevada a fechu por gobiernos como’l de los Estaos Uníos. Un actu na Plaza l’Ayuntamientu d’Uviéu ye’l marcu escoyíu pa llanzar esta denuncia empobinada contra l’adminstración Bush y na que s’afirma que Guantánamo “ye’l símbolu de la ‘guerra contra el terror’ entamada pol gobiernu de los EEXX tres los atentaos del 11 de setiembre”. Según informes recibíos por Amnistía Internacional, Estados Xuníos tien llantao centros de detención secretos en dellos países: Xordania, Pakistán, Exipto, Tailandia, o Afganistán, amás de la base estadounidense Diego García, ubicada nel Océanu Índicu en territoriu británicu, ente otros. 10 d'avientu, 2005 0 FacebookTwitterPinterestEmail
Sociedá IX-BA fai una propuesta d’autogobiernu plenu énte la indiferencia de PSOE y PP by asturnet 9 d'avientu, 2005 La Federación Socialista Asturiana (FSA) y el Partido Popular d’Asturies consideren que’l procesu de reforma del estatutu ha tar acordies colos movimientos de la política autonómica estatal y refuguen poro la posibilidá de que la nuestra comunidá entame un camín propiu d’autogobiernu, talo proponen Izquierda Xunida y el Bloque por Asturies. La propuesta de nuevu estatutu presentada poles dos formaciones coaligaes esti miércoles 7 n’Uviéu nun tien afayao nengún ecu nin nel PSOE nin nel PP. Los másimos cabezaleros de les dos formaciones mayoritaries declararon a diversos medios que’l´fin de la propuesta d’IX-BA “nun ye lo que toca falara agora “, en palabres del popular Ovidio Sánchez, pal que “nun hai nenguna demanda na cai sobre esti tema”, afirmó. En términos asemeyaos pronuncióse’l socialista Javier Fernández que refugó valorar la iniciativa d’Izquierda Xunida-Bloque: “nun vamos facelo en debate públicu sinón cuando s’entame la ponencia parlamentaria” y dixo como robla del so refugue a debatir la propuesta presentada esti miércoles pola coalición d’izquierdes que “ye meyor pensar que correr”. Jesús Iglesias, cordinador xeneral d’Izquierda Xunida d’Asturies y Roberto COlunga, secretariu xeneral del Bloque por Asturies presentaron nuna rueda de prensa conxunta una tabla de propuestes pal nuevu estatutu cola que se pretende dotar a la nuestra comunidá d’un nivel d’autogobiernu asemeyáu al de les comunidaes estatutariamente más avanzaes. Amás de l’inxerimientu d’una serie de derechos ciudadanos non recoyíos específicamente na Constitución, IX-BA proponen un estatutu nel qu’Asturies quede definida como nacionalidá, l’asturianu comparta oficialidá col castellanu y el Principáu cuente con una policía autonómica, ente otres midíes. 9 d'avientu, 2005 0 FacebookTwitterPinterestEmail
Sociedá IAS pide una política clara d’afirmación asturiana na tierra del Navia-Eo by asturnet 7 d'avientu, 2005 Izquierda Asturiana (IAS) considera que les pretensiones del Bloque Nacionalista Galego (BNG)nel so proyectu de nuevu estatutu sobre la posible incorporación a Galicia de conceyos limítrofes d’otres comunidaes son el resultáu d’una falta de política clara d’afirmación asturiana nel Navia-Eo por parte del gobiernu del Principáu. Inaciu Llope, portavoz nacional d’IAS afirmó que “la falta del estatus llegal d’oficialidá del asturianu y del gallego-asturianu, asina como d’ una política cultural clara de reafirmación de la cultura y de les señes d’ identidá asturianes en toa Asturies, y n’especial nel territoriu comprendido ente’l Navia y el Eo, constitúin una escusa perfecta pa que ciertos sectores en Galicia intenten imponer polítiques actives n’Asturies teledirixíes dende Galicia, ya incluso, como vemos cola propuesta d’estautu del BNG, la incorporación a Galicia de territorios que dende siempre fueron parte constituyente del nuestru país”. La formación nacionalista considera qu’énte les pretensiones del BNG namás cabe dende Asturies “especialmente dende’l gobiernu y les instituciones”, la defensa “sin prexuicios nin ambiguedaes de la cultura ya identitá de la zona y fomentar económica y socialmente una zona secularmente olvidada, respetando, en tou casu, la palabra y los sentimientos de los sos habitantes que reivindiquen abiertamente la so asturianidá”. 7 d'avientu, 2005 0 FacebookTwitterPinterestEmail