Sociedá La FSA adelanta la so negativa a referendar el futuru Estatu d’Asturies “por nun ser necesario constitucionalmente” by asturnet 23 de febreru, 2007 El secretartiu d’organización de la FSA, Jesús Gutiérrez, anunció la voluntá del so partíu de non someter a un referéndum la prósima reforma del Estatutu d’Autonomía. Gutiérrez dixo qu’el referéndum “nun ye necesario constitucionalmete y nun tien pies nin cabeza”, en contestación al lider de los populares asturianos Ovidio Sánchez. Pal secretariu d’organización de la FSA-PSOE un referéndum sobre l’Estatutu “confundiría a los ciudadanos” y que “nada impide qu’Asturies tenga un Estatutu al mesmu nivel que les demás comunidaes”. Ovidio Sánchez solicitó qu’el futuru referendum d’autonomía se someta a un referéndum popular pa la so aprobación, díes depués de la victoria del sí al nuevu estatutu andaluz, nuna xornada na que l’abstención fue la opción escoyida pola mayoría de los y les andaluces. 23 de febreru, 2007 0 FacebookTwitterPinterestEmail
Sociedá El primer cursu de Xíriga organizáu en Llanes cuenta con 20 alumnos by asturnet 22 de febreru, 2007 El prósimu llunes, 26 de febreru, finaliza na Casa de Cultura de Llanes el taller de Xíriga, la llingua de los teyeros llaniscos, que foi parte del programa de cursos municipales del conceyu de Llanes. Nel cursu, de calter divulgativu, participaron alumnos de delles parte del conceyu y d’ente 19 y 77 años d’edá. El taller plantegóse al rodiu d’un de los aspectos más interesantes de la historia de Llanes, nel so tarrén etnográficu, y vertebróse nuna serie de meses redondes nes que s’abordaron los aspectos llingüísticos y sociolóxicos de la Xíriga. Dalgunos de los antiguos teyeros y tamargos participaron n’esti cursu sobre un de los llinguaxes de comunicación gremiales qu’entovía se sienten en dalgunos llugares del conceyu llaniscu. 22 de febreru, 2007 0 FacebookTwitterPinterestEmail
Sociedá Andecha Astur de Carreño presenta nel plenu les ordenances d’usu del asturianu by asturnet 22 de febreru, 2007 El conceyal nacionalista Santiago Artime va presentar al plenu de la Casa Conceyu de Carreño la propuesta d’aprobación d’unes Ordenances Municipales que regulen l’usu del asturianu nes alministración municipal. La propuesta tramitaráse como d’urxencia ente la negativa del grupu mayoritariu, PSOE, a incluyir la propuesta nel orde del día. Artime presentó unes propuestes d’Ordenances Municipales del Usu del Asturianu hai un añu algamando’l respaldu de la Unión Independiente de Carreño, y el rechazu de PSOE y PP mientres qu’Izquierda Xunida y URAS abstuviéronse na votación. Les Ordenances Municipales del Usu del Asturianu establecen los derechos de los ciudadanos del conceyu a poder dirixise a l’alministración municipal n’asturianu, asina como faen la regulación de los diferentes éntes muncipales empobinaos a la normalización social del usu del asturianu. 22 de febreru, 2007 0 FacebookTwitterPinterestEmail
Sociedá El Conceyu Abiertu pola Oficialidá recibe’l sofitu de Quini by asturnet 22 de febreru, 2007 El míticu xugador de fútbol asturianu y actual delegáu del Sporting de Xixón, Enrique Castro Quini, aconceyó güei xunta a dellos xugadores del equipu con representantes del Conceyu Abiertu pola Oficialidá pa tresmitir el respaldu de la plantiya sportinguista a la causa de la oficialidá de la llingua asturiana. Esti nun ye’l primer de los apoyos públicos qu’el xugador sportinguista brinda a la Oficialidá del asturianu, asina n’avientu del añu pasáu Quini fue nomáu patronu d’honor de la Fundación Caveda y Nava. El Conceyu Abiertu pola Oficialidá tien ente los sos sofitos a bien de deportistes asturianos de fama mundial como Chechu Rubiera, Benjamín Noval o Manuel Busto. 22 de febreru, 2007 0 FacebookTwitterPinterestEmail
Sociedá Cellébrase’l Día Internacional de la Llingua Materna by asturnet 21 de febreru, 2007 El Día Internacional de la Llingua Materna foi proclamáu pola Conferencia Xeneral de la UNESCO nel mes de payares de 1999 cola fin de promover el multillingüísmu y la diversidá cultural. Nel documentu aprobáu pola UNESCO se faen recomendaciones a los estaos como crear les condiciones que conduzan a un pluralismu llingüísticu. Asina mesmo la UNESCO afita la promoción de la educación multillingüe, garantizando l’accesu democráticu al conocimientu de la llingua materna pa tolos ciudadanos como forma de construir un pluralismu llingüísticu. La UNESCO tien catalogaes les más de 6.000 llingües del mundu. La mitá de les llingües tien menos de 10.000 falantes, y la cuarta parte tien menos de 1.000 falantes. Esta pérdida del patrimoniu llingüísticu agrávase por mor de la influencia llingüística de les llingües con más falantes como l’inglés o el castellano. La situación de la llingua asturiana ye puntu d’observación de la UNESCO que cataloga al nuestru idioma dientro de los idiomes en peligru d’estinción. Nesti catálogu cítase qu’anque esistan neños y neñes falantes d’asturianu la contaminación llingüística del castellano provoca que nel futuru prósimu nun sean usuarios activos d’asturianu. Un de los apartaos nos que s’incide dende la UNESCO ye la necesidá de facilitar l’estudiu de les llingües maternes por parte de los y les escolinos como preséu de conservación de la vitalidá, y futuru, de la llingua propia. Llibru bermeyu de la UNESCO sobre les llingües amenazaes 21 de febreru, 2007 0 FacebookTwitterPinterestEmail
Sociedá El Ministeriu de Sanidá echa p’atrás el proyectu de Llei del alcohol by asturnet 21 de febreru, 2007 La Ministra de Sanidá, Elena Salgado, echó p’atrás l’anteproyectu de la llei del alcohol que recibió grandes crítiques por parte de los productores de sidra. Salgado anunció la retirada del proyectu de llei pa evitar “que se coniverta nun instrumentu de confrontación electoral”. La llei que se promovía dende’l Ministeriu de Sanitaria tenía como fin aplicar medíes restrictives del consumu de sustancies alcohóliques, axuntandoles dientro de los mesmos parámetros de riesgu ensin distinguir ente la graduación alcohólica o la tradición de la producción. Ente los asuntos más polémicos del proyectu, agora retiráu, figuraben la prohibición del consumu d’alcohol n’espacios recreativos lo que podría significar la desparición de les espiches o de les fiestes tradicionales asturianes. La introducción de la sidra dientro de la normativa que s’impulsó dende’l Gobiernu español recibió grandes crítiques por ser la sidra una de les bebides alcohóliques de producción tradicional de menor graduación, 6 graos, en comparación col vino, 12 graos. L’anteproyectu de llei tenía como fin evitar el consumu de sustancies alcohóliques por parte de menores pa lo que desenvolvía una serie de restricciones de la publicidá d’estes bebides dientro de los medios de comunicación. Asina imponía un horariu d’emisión de los espacios publicitarios de sustancies alcohóliques na televisión y radio pa evitar que na franxa horaria infantil estos anuncios comerciales nun se pudieren emitir. La cercanía de la retirada del anteproyectu de llei de les elecciones autonómiques y municipales provoca que los sectores afectaos n’Asturies nun baxen la guardia énte la posibilidá de que pasáu’l periodu electoral el Ministeriu de Sanidá vuelva a presentar un anteproyectu de característiques similares al agora retiráu. 21 de febreru, 2007 0 FacebookTwitterPinterestEmail
Sociedá Carlos Varela denuncia que “Hai xente que tien miéu a falar en gallego porque van a por ellos”. by asturnet 21 de febreru, 2007 Dientro d’un especial de La Voz de Galicia sobre l’Informe de l’Academia de la Llingua sobre’l gallego-asturianu l’académicu de la Real Academia Galega (RAG) pal Eo-Navia, Carlos Varela Aenlle, denunció que la intención de l’Academia de la Llingua Asturiana y los partíos asturianistes “promueven una perspectiva reducionista y unificadora que falsea la realidad lingüística del occidente asturianu”. L’académicu de la RAG denunció la esistencia de persones que “tienen miéu de falar en gallego, porque van a por elles”, poniendo asina de relieve la esistencia de galego-falantes en priváu que nel planu públicu nieguen esa condición. Denunciando asina mesmo que ye blancu d’amenaces y insultos, que siente especialmente doloroses porque afecten a la so vida personal y familiar. Varela denunció qu’el so nome tea denigráu nos foros d’internet y que yá tuvo que pidir a los sos moderadores la retirada de los comentarios pa evitar tresladalos a los tribunales. L’académicu de la RAG pal Navia-Eo reclamó, nel marcu del artículu de La Voz de Galicia, una actuación más decidida de la Xunta Galiza. Asina propón la creación como medida básica d’una oficina lingüística pa la zona “bien seya pola propia Academia, bien por Política Llingüística”. Criticó l’ausencia de la cuestión llingüística de la cimera ente los presidentes d’Asturies y Galiza. 21 de febreru, 2007 0 FacebookTwitterPinterestEmail
Sociedá Ganadores de les revistes Formientu by asturnet 19 de febreru, 2007 Asturnews y l’asociación cultural H.a Xareos acaben de facer el sortéu de les 10 revistes de Formientu, la revista de lliteratura mui moza. Los y les gandores pueden pasar pela llibrería Alborá de Xixón pa recoyer el so exemplar de la revista. La llista de ganadores ye la que vien darréu: Anibal González Miyares Xuan Ramón Naves Rodríguez Ricardo González Menéndez Chechu García Xosé Arsenio Coto Pérez Abraham García González Lucía Cuervo Fandos Vanesa Parajón Pérez Xosé Nel Comba Paz Ana Belén Antón Fidalgo Asturnews y Ha. Xareos feliciten a los y les gandores d’esti concursu. 19 de febreru, 2007 0 FacebookTwitterPinterestEmail
Sociedá Miles de persones reclamen la dignificación del asturianu nes escueles by asturnet 17 de febreru, 2007 La manifestación, convocada polos sindicatos d’enseñanza y la Xunta pola Defensa de la Llingua Asturiana, en defensa de la enseñanza del asturianu na educación primaria reune a cerca de 2000 persones n’Uviéu, a pesar del mal tiempu. La manifestación acabó na plaza de la Escandalera onde se lleó un manifiestu conxuntu de les organizaciones nel que s’afalaba a la modificación del curriculu educativu de primariu pa iguar la situación del asturianu pa garantizar l’exerciciu de los derechos educativos de los neños y neñes que quieren estudiar asturianu. Les organizaciones sindicales SUATEA, FETE-UXT, CC.OO. d’Enseñanza, y la Xunta pola Defensa de la Llingua Asturiana afirmaron , dientro del manifiestu, “que l’accesu al estudiu y conocimientu de la nuesa llingua ye un derechu reconocíu espresamente pola llexislación y qu’ha ser respetáu y garantizáu. Dende les entidaes convocantes consideren qu’el futuru currículu educativu ha garantizar la non competencia de l’asignatura con otres materies, sean o non curriclares. Los escolinos y escolines que tengan padres o tutores qu’escueyan nun cursar l’asignatura de Llingua Asturiana o Gallego-Asturianu na zona más occidental han recibir la debida atención educativa, pa que la escoyeta d’una o otra opción nun suponga discriminación nenguna. Esa atención en nengún casu ha llevar al aprendizaxe de contemos curriculares nin asociaos a cualquier área de la etapa, como asina recueye la Llei d’Usu del Asturianu nel so artículu 10, apartáu 3: “…Pa los que lo escueyan, el so aprendimientu o usu nun podrá torgar que reciban la mesma formación y conocimientos n ‘igualdá de condiciones que’l restu l’alumnáu.” 17 de febreru, 2007 0 FacebookTwitterPinterestEmail
Sociedá Preséntase la manifestación en defensa del asturianu nel currículu educativu by asturnet 16 de febreru, 2007 Representantes de les organizaciones convocantes de la manifestación pa esisxir la retirada de la propuesta curricular propuesta pola Conseyería d’Educación presentaron ayeri la manifestación y los sos conteníos. La manifestación, convocada polos sindicatos CC.OO, FETE-UXT y SUATEA, y pola organización de defensa de los derechos llingüísticos Xunta pola Defensa de la Llingua Asturiana, saldrá a partir de les 13.00 d’esti sábadu col lema “Llingua asturiana en toles escueles en condiciones dignes y de normalidá” La manifestación va entamar a les 13.00 hores dende la estación del Norte d’Uviéu p’acabar na Plaza de la Escandalera. Na rueda de prensa participaron Primi Abella, de CC.OO; María José Secades, de FETE-UXT; Llinu Álvarez Santidrián; y Xulio Casado de la Xunta pola Defensa de la Llingua Asturiana. Na rueda de prensa esplicaron que la propuesta de curriculu convertiría l’asignatura de llingua asturiana de materia voluntaria a asignatura optativa entrando en competencia con otres materies del curriculu. Esti fechu considérase dende les organizaciones convocantes como “un pasu atrás na normalización y na situación de la llingua”, amás de significar “la muerte lenta del asturianu na enseñanza”. El representante de la Xunta pola Defensa de la Llingua Asturiana, Xulio Casado, sorrayó qu’el gobiernu asturianu anque ellaborare un plan de normalización a finales de la llexislatura ta “dando pasos atrás na normalización llingüística”. Dende Comisiones Obreres, Primi Abella, recordóse que la Conseyería d’Educación entovía nun fizo l’estudiu xurídicu pa la creación de la especialidá de llingua asturiana, estudiu al que se compremetiere a desenvolver y tramitar. Los sindicatos de la enseñanza señalaron que la nueva redacción curricular pondría en peligru’l trabayu de 200 docentes qu’actualmente tán poniendo asturianu en primaria y secundaria. En casu de que l’asignatura perdiere la condición de voluntaria y se convirtiere, como pretende la Conseyería d’Educación, les tases de matriculación na mesma baxaríen, pola competencia d’otres asignatures, y con elles el númeru de profesores d’asturianu. 16 de febreru, 2007 0 FacebookTwitterPinterestEmail