Sociedá La Escuela Fermín Penzol apoya la manifestación del 5 de payares by asturnet 3 de payares, 2005 La Escuela Fermín Penzol nun comunicáu firmáu pol so coordinador el caderalgu de la Universidá de Vigo Xosé Henrique Costas espresa’l so apoyu y la so solidaridá a la convocatoria del Conceyu Abiertu pola Oficialidá del prósimu 5 de payares. Nel mesmu escritu el foru diríxese al asturianismu llingüísticu y cultural pa propone-y caminos de colaboración. Nel documentu dizse que la Escuela Fermín Penzol solidarízase “coas persoas, entidades e organizaciois que luitan pola plena cooficialidade das dúas linguas autóctonas de Asturias: el asturiano e a variedade lingüística galego-portuguesa denominada oficialmente en Asturias galego-asturiano, e apoia a celebración e os obxectivos da manifestación do día 5 de novembro”. El foru pídi-y al gobiernu asturianu la cooficialidá p’asturianu y gallegu-asturianu: “sen cooficialidade pódense acometer algúas medidas de protección que nunca poderán garantir el futuro das linguas, peró con cooficialidade aínda pode haber algúa oportunidade prás dúas linguas propias de Asturias”, manifiéstase nel escritu, onde se reconoz tamién al Principáu como “única institución competente en materia de política lingüística en Asturias”. Mientres esa midida llegal demandada nun seya efectiva pídese l’aplicación de la Llei d’Usu y de los encamientos del Comité d’Espertos del Conseyu d’Europa sobre la materialización n’Asturies de Carta de les Llingües Minoritaries. Respective al mensaxe que la Escuela Fermín Penzol unvía al asturianismu, pídese nel comunicáu que “enterrarmos mediáticos prexuízos propositadamente inducidos, pecharmos vellas feridas e camiñarmos polos vieiros da colaboración, el respecto e os proxectos comúns en defensa das nosas identidades”, ya que “é muito el que nos une e serán muitos os logros se traballamos unidos”, diz el comunicáu, que remata asegurando que “el futuro del asturiano en Asturias e del galego-asturiano están indisolublemente unidos por estaren baxo a mesma lexislació” y que “el éxito de un é el éxito dos dous e el fracaso de un é el fracaso dos dous”. 3 de payares, 2005 0 FacebookTwitterPinterestEmail
Sociedá La Fundación Caveda y Nava noma patronos a Pilar Fernández Pardo y Hugo Morán by asturnet 3 de payares, 2005 La Fundación Caveda y Nava va acoyer como nuevos patronos a la presidenta del Partíu Popular de Xixón, Pilar Fernández Pardo y al presidente de la Federación Asturiana de Conceyos y alcalde de L.lena, Hugo Morán. L’acoyida va celebrase’l prósimu 12 de payares nun actu nel que la Fundación va rendir homenaxe al políticu maliayés y autor de la primer antoloxía lliteraria asturiana que-y da nome. L’ex presidente del Real Uviéu, Manuel Lafuente va ser l’encargáu d’introducir a la cabezalera del PP xixonés Pilar Fernández Pardo y el diputáu socialista Faustino Álvarez fadrá lo propio col alcalde l.leniegu Hugo Morán. Tres l’acoyida de los nuevos miembros va presentase’l trabayu “El marco legal del asturiano: vías para el reconocimiento de los derechos llingüísticos” del xurista José Manuel Pérez, patronu de la Fundación. Un homenaxe a Caveda y Nava énte la so casa natal na cai del Agua de La Villa servirá de pieslle al conceyu públicu d’esti foru cívicu. 3 de payares, 2005 0 FacebookTwitterPinterestEmail
Sociedá Candás acueye nos prósimos díes la so Feria del Llibru y del Discu n’Asturianu by asturnet 3 de payares, 2005 Candás va acoyer dende esti viernes 4 hasta’l domingu 6 de payares la so primer Feria del Llibru y del Discu n’Asturianu, programada dientro les actividaes de la III Selmana de Cultura Astur qu’entamen el grupu de baile San Félix y l’Ensame Xuvenil Trisquel de la villa carreñesa. Un amagüestu popular y un conciertu completen el cartelu de los actos d’esta selmana cultural. Coincidiendo cola celebración de la Feria del Llibru y del Discu esti viernes 4 a les 19.00 hores va entamase un alderique sobre’l futuru de los productos culturales na nuestra llingua cola participación de Xosé Ramón Iglesias Cueva, Xune Elipe, Ana Vanessa Gutiérrez, Pablo Rodríguez Medina, Xuan Santori y Alain Fernández. El sábadu cinco de payares, pela tarde y la nueche va celebrase un amagüestu popular y darréu un conciertu cola presencia de La Bandina’l Tombo, Gueta na Fonte y Skama na Rede. Los horarios de la Feria del Llibru y del Discu van ser viernes y sábadu de 17.00 hores a 21.00 y el domingu, de 12.00 a 14.00 hores y de 17.00 a 20.00 hores. Nel recintu de la Feria van proyectase cortomotraxes n’asturianu y va haber actuaciones de cuentacuentos con otres actividaes dedicaes a los más neños. 3 de payares, 2005 0 FacebookTwitterPinterestEmail
Sociedá El Bloque por Asturies desmárcase d’Izquierda Xunida énte l’Estatut catalán by asturnet 3 de payares, 2005 El Bloque por Asturies decidió na so última xunta nacional desmarcáse del apoyu dau pol grupu parlamentariu d’IX-BA a la iniciativa presentada pol PSOE nel plenu de la Xunta Xeneral del pasáu 27 d’ochobre. La formación nacionalista afirma qu’esi votu namás representa a Izquierda Xunida. La iniciativa socialista apoyada polos parlamentarios del grupu d’IX-BA facía referencia al proyectu de Nuevu Estatutu pa Cataluña qu’estos díes se debate nel Congresu y sobre esti apoyu, el Bloque espresa’l so refugue por entender que la posición defendida polos sos socios de coalición nun fue alcordada con ellos. El portavoz nacional del Bloque por Asturies, Rafael Palacios y el so secretariu xeneral, Roberto Colunga, ufiertaron esti meudía n’Uviéu una rueda de prensa pa desplicar el so desmarque de la posición caltenida polos diputaos d’Izquierda Xunida énte l’Estatut catalán. Pal Bloque “el votu del Grupu Parlamentariu d’IX-BA representa namás y esclusivamente la posición d’Izquierda Xunida, posición que en nengún momentu alcordó col Bloque por Asturies y que’l Bloque por Asturies nun comparte”. 3 de payares, 2005 0 FacebookTwitterPinterestEmail
Sociedá El Conseyu Consultivu del Principáu escomenzó los sos llabores by asturnet 3 de payares, 2005 El Conseyu Consultivu del Principáu escomenzó esti miércoles 2 los sos llabores como organismu asesor de la comunidá. Ente les sos xeres principales ta l’estudiu de la reforma estatutaria y solventar les duldes que les distintes instituciones d’Asturies-y planteen. Hasta agora el Conseyu Consultivu recibió abondes peticiones d’asesoramientu d’administraciones locales esmolecíes por solventar asuntos de calter patrimonial. De agora pa en delantre esti organismu va ser l’encargáu d’escamplar tales cuestiones. El Conseyu Consultivu del Principáu ta presidíu por Bernardo Fernández y formen parte d’él Francisco Bastida, Luisa Fernanda del Valle Caldevilla, Fernando Fernández Noval y Juan Luis Rodríguez-Vigil. 3 de payares, 2005 0 FacebookTwitterPinterestEmail
Sociedá El Conceyu de Xixón promociona l’usu del asturianu nel comerciu by asturnet 2 de payares, 2005 La Oficina Muncipal de la Llingua del Conceyu de Xixón y la Unión de Comerciantes local acaben de poner en marcha la campaña “Nel comerciu asturianu yes bienveníu/bienvenida” col oxetivu de fomentar l’usu de la nuestra llingua nes pequeñes y medianes empreses d’esi sector.La campaña inclúi 25.000 trípticos, bolses, axendes y ‘chuletes’ cola traducción de los principales productos. La iniciativa de la Oficina de la Llingua de Xixón féxóse pública va unos díes con presencia de la conceyal de la estaya llingüística Carmen Rúa y del edil responsable de Comerciu y Promoción Económica, José María Pérez. Nel actu de presentación tamién tuvieron el director de la Oficina de Política Llingüístia del Principáu, Ramón d’Andrés y la presidenta de la Unión de Comerciantes de Xixón, Ana Menéndez. La representante de les pequeñes y medianes empreseses d’esti sector amosóse convencida de que la ufierta de la comunicación n’asturianu significa “un valor añadíu” a los productos en vienta. La campaña ta financiada por Política Llingüística en 4.000 de los 9.368 euros nos que ta basáu el so coste. El númberu de trípticos que van repartise cola traducción de los principales productos y frases usuales ye de 25.000, repartíos en bloques de 5.000 por cada sector del comerciu: frutería, pescadería, etc. La Unión de Comerciantes de Xixón participa nel Conseyu Asesor de la Oficina Municipal de la Llingua y esta ye la primer iniciativa qu’entama en colaboración col Ayuntamientu pa fomentar l’usu del asturianu nel comerciu local. 2 de payares, 2005 0 FacebookTwitterPinterestEmail
Sociedá Les conclusiones de la Escuela Fermín Penzol encamienten a instituciones gallegues y asturianes el so compromisu coles llingües d’entrambes comunidaes by asturnet 2 de payares, 2005 Les conclusiones finales de la Escuela Permanente Fermín Penzol celebrada’l pasáu fin de selmana en Ribadeo piden-y al gobiernu del Principáu la oficialidá de la llingua asturiana y del gallegu-asturianu, ente otres midíes de normalización social. Al empar encamiéntase a instituciones y colectivos de Galicia qu’énte la problemática llingüística d’Asturies actúen con “diplomacia y solidaridá”. El documentu final apaez firmáu polos profesores de la Universidá de Vigo Xosé Henrique Costas y Anxo Lorenzo, asina como pol profesor de la Universidà d’Uvièu Xulio Viejo, tolos tres en calidá de coordinadores del testu que sofiten los representantes de les otres universidaes gallegues presentes: A Coruña y Santiago. El puntu col qu’escomienza’l documentu ye un llamáu de los participantes nel alcuentru de Ribadeo a la sociedá y a les instituciones de Galicia y d’Asturies “pavanzar na reconocencia y el respetu de les respectives tradiciones y patrimoniu cultural y llingüísticu”. El segundu puntu de les conclusiones insta al Gobiernu del Principáu a facer oficial na prósima reforma estatutaria l’asturianu y el gallegu-asturianu “nos territorios onde son variedades autóctonas”, mentantu pídese que se faga efectiva la Llei d’Usu “destas linguas” y a que siga les recomendaciones feches pol Conseyu d’Europa sobre l’aplicación de la Carta Europea de les Llingües Rexionales y Minoritaries. Les recientes iniciatives provenientes de Galicia hacia Asturies y la polémica entamada a esti llau del Eo tamién se traten nes conclusiones de la Escuela Fermín Penzol cuando se pide “al gobiernu gallegu y a los movimientos sociales, políticos y culturales de Galicia a actuar con diplomacia y solidaridá tocantes a la problemática llingüística dAsturies”. Tocante a la normalización nel Principáu pídese l’apoyu del gobiernu autonómicu a la rede municipal de servicios llingüísticos y a los conceyos de la Tierra Navia-Eo a “la realización d’una política decidida de normalización de la so variedá llingüística” nesa comarca. Les conclusiones rematen con un llamamientu a que les instancies académiques gallegues y asturianes dialoguen “col envís de superar malentendíos y entamar víes de collaboración científica ya intercambiu intelectual” y la Universidá de Vigo ofrezse como interlocutor “siempre que se trate de promover el diálogu, la reflexón y l’ establecimientu d’espacios d’alcuentru abiertos y participativos”. 2 de payares, 2005 0 FacebookTwitterPinterestEmail
Sociedá El RIDEA rescata la obra “El habla de Lena” de Jesús Neira by asturnet 2 de payares, 2005 El Real Institutu d’Estudios Asturianos (RIDEA) acaba de reeditar “El habla de Lena” de Jesús Neira, una obra ya clásica de la dialectoloxía asturiana publicada en 1955 y que marcó un fitu nel estudiu de los estudios llingüísticos del país. El trabayu de Neira ye una obra de referencia de los estudiosos de temes filolóxicos relacionaos cola llingua asturiana y nella ta la base de les polémiques teoríes del investigador l.lenense sobre la diversidá dialectal del nuestru idioma. “El habla de Lena” ye al empar un volume de consulta imprescindible p’afondar na conocencia de les peculiaridaaes locales del asturianu nel conceyu natal del que col tiempu diba ser un de los másimos detractores del movimientu pola recuperación llingüística y fundador, xunto al profesor Alarcos y l’eruditu Jesús Evaristo Casariego, de l’asociación Amigos de los Bables. 2 de payares, 2005 0 FacebookTwitterPinterestEmail
Sociedá Llamazares afirma que nun hai nada qu’impida’l qu’Asturies sea Nación by asturnet 2 de payares, 2005 El coordinador xeneral d’Izquierda Unida Gaspar Llamazares declara nuna entrevista concedida a un diariu d’Uviéu que nun hai nada qu’impida na Constitución española pa qu’Asturies pueda definise como nación “igual que ye Principáu” y qu’ello depende namás de “la voluntá política” de la propia comunidá. Na entrevista apurrida pol coordinador federal d’IU al periódicu La Nueva España, Llamazares respuende a la pregunta de si Asturies podía definise nel so Estatutu como nación, lo mesmo que Cataluña nel proyectu de nuevu Estatut, respuende que eso “depende de los asturianos” y que “nada na Constitución impide que, al igual que ye Principáu, sea tamién nación, namás ye voluntá política” y diz que sobre’l respective “habrá de pronunciase la comunidá autónoma”. Na mesma entrevista el cabezaleru federal d’Izquierda Unida manifiesta l’enfotu de la so formación el que’l pautu de gobieru IX-BA col PSOE termine la lexislatura: “tamos convencíos de que vamos presentar un bon balance”. Llamazares advierte respective a esta visión positiva del pautu de que “nun queremos qu’esa llectura la faga el PSOE d’asuntos que nós llevamos a fechu, como política social y vivienda”. 2 de payares, 2005 0 FacebookTwitterPinterestEmail
Sociedá Les instituciones gallegues piden l’entendimientu con Asturies nel congresu de Ribadeo by asturnet 31 d'ochobre, 2005 La polémica entamada a esti llau del Eo tuvo bien presente nes xornaes celebraes en Ribadeo embaxo l’agospiu de la Escola Fermín Penzol de la Universidá de Vigo. Xosé Henrique Costas, representante de la institución organizadora, reclamó nel empiezu del congresu la cooficialidá pal asturianu y pal gallegu-asturianu, y criticó l’espolín que s’armó por estes xornaes n’Asturies. Otros participantes nel alcuentru coincidieron con Costas y reivindicaron la Escola Permanente como llugar d’atopada ente les dos comunidaes. Xosé Henrique Costas, de la Universidá de Vigo, calificó de “ignorantes interferencias políticas” les reacciones suscitaes a esti llau del Eo pola convocatoria del congresu de Ribadeo y denunció les que consideró «presións para boicotear a colaboración do galego e do asturiano». Na mesma llinia el primer teniente d’alcalde del conceyu agospiador Fernando Suárez criticó a los “detractores que intentan dinamitar o noso entendimento”. El responsable de la Oficina de Política Llingüística del Principáu, Ramón d’Andrés respondió a les crítiques dica Asturies na so intervención en Ribadeo afirmando que “l’entendimientu tamién pasa pola diplomacia y pola comprensión” que Galicia tien de tener pa coles instituciones d’Asturies. D’Andrés dixo nel alcuentru que les reacciones de dalgunos conceyos del Navia-Eo yeren “comprensibles” énte determinaes iniciatives “poco afortunaes”, al tiempu que pidió un consensu sobre les llingües falaes n’Asturies. Na xornada de pieslle de les xornaes el director xeneral de Difusión Cultural de la Xunta de Galicia, Luis Bará, afirmó que “l’entendimientu y el respetu mutuu” yeren imprescindibles p’asegurar la sobrevivencia de la llingua asturiana y de la fala del Navia-Eo. 31 d'ochobre, 2005 0 FacebookTwitterPinterestEmail