Sociedá La villa mallorquina de Santa Margalida organiza unes xornaes pola llingua y la cultura d’Asturies y de la isla by asturnet 22 de mayu, 2005 La villa mallorquina de Santa Margalida va celebrar los prósimos díes 27 y 28 de mayu la Diada per la llengua, cultura y tradicions dels pobles de Mallorca y d’Asturies. La iniciativa d’esti alcuentru ente les cultures catalana de les isles Balearses y l’asturiana ye de la parroquia del llugar y collaboren nella per parte del Principáu, la Oficina de Política Llingüística y la Conseyería de Xusticia y Esteriores. Les xornaes coinciden cola Acampallengua, una acampada en defensa del idioma catalán nes isles que va celebrase’l prósimu fin de selmana nel llugar cercanu de Porreres. 22 de mayu, 2005 0 FacebookTwitterPinterestEmail
Sociedá La villa mallorquina de Santa Margalida va celebrar unes xornaes dedicaes a la llingua y la cultura d’Asturies y de les isles by asturnet 22 de mayu, 2005 La villa mallorquina de Santa Margarida va celebrar los prósimos díes 27 y 28 de mayu la primera Diada pola llingua, cultura, tradiciones de los pueblos de Mallorca y d’Asturies. La iniciativa ye de la parroquia del llugar y per parte asturiana tien el sofitu de la Oficina de Política Llingüística y de la Conseyería d’Esteriores. Estes xornaes coinciden cola celebración el prósimu fin de selmana de l’Acampallengua, una xuntanza reinvindicativa en defensa de la llingua catalana de les isles, que va entamase en Porreres, un llugar al llau de Santa Margalida. Talo desplica Inaciu Galán, coordinador na parte asturiana de les actividaes que van entamase en Mallorca, la iniciativa d’organizar esta Diada partió del párracu de Santa Margalida, Gillem Feliu: “qu’exerce nesi pueblu con poco más de cuatro mil habitantes d’auténticu animador cultural y ye un apasionáu d’Asturies y la so cultura”. El cura mallorquín, desplica Galán,ye tamién “un hestóricu defensor de la llingua y la cultura catalanes en Baleares” y tocante al so interés por Asturies, l’actual párracu de Santa Margalida, vivió un tiempu n’Uviéu onde exerció los sos llabores pastorales na ilesia de San Francisco Javier. Les xornaes d’alcuentru ente Asturies y Mallorca empiecen la tarde del prósimu viernes 27 con entrambes charres, una de Xuan Santori sobre la realidá llingüística de la nuestra comunidá y otra del profesor de la Universital Oberta de Catalunya Jaume Corvena, alrodiu de la situación del idioma catalán nes isles. Tres les conferencies va haber una sesión de castellets y un conciertu de rock a cargu de los grupos Roborter y Useil de Foc. Al día siguiente, sábadu, a lo llargo de la tarde van facese una proyección de cortometraxes n’asturiano y catalán, habrá una llectura de poesía na nuestra llingua, una nueva amuesa de castellets y una misa billingüe. Pela nueche un conciertu de música folk cola participación de los astur-catalanes Risca l’Alba y grupos de Mallorca, va poner remate a la Diada. 22 de mayu, 2005 0 FacebookTwitterPinterestEmail
Sociedá El Conceyu Abiertu entama una ruta de Monte na so campaña pola oficialidá de la llingua by asturnet 17 de mayu, 2005 El Conceyu Abiertu pola Oficialidá de la llingua asturiana va entamar una ruta de Monte el prósimu 29 de mayu col oxetu de siguir remembrando la necesidá del reconocimientu de los drechos llingüísticos asturianos na reforma del Estatutu y al través del inxeríu nél de la oficialidá. La marcha va salir de Tuiza de Riba con llegada a Espineo, nel Conceyu de L.lena y la organización espera qu’esta nueva acción tenga l’ésitu de les sos últimes convocatories. L’oxetivu d’esta marcha de monte ye dar continuidá a les acciones reivindicatives del Conceyu Abiertu y nun perder la referencia de la necesidá de caltener viva la demanda pola oficialidá, según manifestaron a Asturnews fontes de la organización. En palabres de Xulio Casado, voceru de la Xunta pola Defensa de la Llingua, la organización entamadora del Conceyu, trátase de “continuar les actividaes del CAO después de la última manifestación del Día les Lletres, que foi la más importante en participación de toles que se celebraron y paeznos fundamental nun desaprovechar esi aliendu de movilización necesaria pola oficialidá”. Pa Casado igual de necesario ye siguir manteniendo l’espíritu unitariu que presidió la manifesación del pasáu 6 de mayu: “dende siempre la Xunta y agora el Conceyu Abiertu pola Oficialidá apostamos pola necesidá de xuntar esfuerzos en común y poner asina en claro col mayor apoyu una demanda que la sociedá asturiana desixe cada vez con más fuerza, como s’amosó na manifestación de les Lletres”. La marcha de monte pel conceyu de L.lena puede interpretase como una puesta a puntu de los motores del Conceyu Abiertu pola Oficialidá de cara al veranu y colos güeyos puestos nel reiniciu del cursu políticu después del periodu vacacional nel que podía entamar a debatise la reforma del Estatutu d’Autonomía. La convocatoria d’esta ruta ye abierta a toles persones que quieran participar y nun se requier especialmente una preparación física estraordinaria pa entamala, según Xulio Casado “ye una ruta cenciella, non mui llarga, pa que puedan participar nella los que quieran, ensin necesidá d’una preparación especial”. Nel trecursu de la marcha va haber un alcuentru colos medios de comunicación pa remembra-yos la razón pola que s’entama esta actividá dientro la campaña pola oficialidá del Conceyu Abiertu. 17 de mayu, 2005 0 FacebookTwitterPinterestEmail
Sociedá Los gais asturianos reivindiquen el 17 de mayu by asturnet 16 de mayu, 2005 La organización Xente Gai Astur(XEGA)súmase esti 17 de mayu a otres cuarenta organizaciones de diversos países que-y piden a la ONU la declaración de la data de güei como Día Internacional contra la Homofobia y la Transfobia. Los gais y lesbianes d’estes organizaciones quieren membrar que’l diecisiete de mayu de 1990 la Organización Mundial de la Salú (OMS) suprimía nel so llistáu d’enfermedaes mentales la homosexualidá.El director de l’Axencia Asturiana de Cooperación, Rafael Palacios y el coordinador de XEGA, José Manuel González firmen un manifiestu nel que se pide la instauración d’esti Día Internacional y el fin de les discriminaciones inda esistentes. Pa los firmantes del manifiestu del 17 de Mayu celebrar esti día “supón reforzar la solidaridá con toles lesbianes, gais, bisexuales y transexuales (colectivu GLBT) del mundu enteru y reafirmar el compromisu colos qu’en cualquier parte sufren les consecuencies de la Homofobia y la Transfobia”. El manifiestu remembra que si bien “lesbianes, transexuales, gais y bisexuales esfruten güei de más llibertá que nunca: tán presentes y son visibles na cai, nes revistes, na televisión, nel cine… Parez una realidá completamente aceptada, sobre too si se tienen en cuenta los avances lexislativos más recientes en dellos países, nos que se vienen reconociendo los derechos pa les pareyes del mesmu sexu, incluíu en dalgunos el derechu al matrimoniu. Hai una opinión enforma xeneralizada de que, magar seyan necesarios dalgunos axustes pa desaniciar les últimes discriminaciones, la evolución de les mentalidaes y el simple pasu del tiempu van permitir que se llegue a una situación de normalización plena y a consolidar un procesu qu’entamó hai unes cuantes décades”, tamién ye cierto que tovía n’ochenta estaos la homosexualidá ta persiguida como delitu (Arxelia, Senegal, Camerún, Etiopía, Líbano, Xordania, Armenia, Kuwait, Puerto Rico, Nicaragua, Bosnia…); y qu’en varios países esta condena pue llegar a ser superior a diez años de prisión (Nixeria, Libia, Siria, India, Malaisia, Cuba, Xamaica…); a vegaes la llei contempla la cadena perpetua (Guyana, Uganda), y nuna decena de naciones aplícase la pena de muerte (Arabia Saudita, Afganistán, Irán…). N’otros países, recuerden los firmantes del manifiestu, la situación nun ye meyor pa los homosexuales y lesbianes, asina: “Nun va muncho, dellos presidentes d’estaos africanos afirmaron brutalmente’l so determín pa lluchar personalmente escontra una plaga -la homosexualidá- qu’ellos califiquen d’antiafricana. Incluso n’otros países onde la homosexualidá nun ta tipificada nel códigu penal, multiplíquense les persecuciones. En Brasil, por exemplu, los escuadrones de la muerte y los skin heads semen el terror: ente 1980 y 2000 censáronse oficialmente 1.960 asesinatos homofóbicos”. Por toes estes razones, afirmen los firmantes del manifiestu:” celebramos esti 17 de mayu como’l Día Internacional Contra la Homofobia y la Transfobia. Nesti día recordamos que’l 17 de mayu de 1990 l’Asamblea Xeneral de la Organización Mundial de la Salú (OMS) suprimió definitivamente la homosexualidá de la llista d’enfermedaes mentales, onde nunca debió tar. Esta midida acabó con cuasi un sieglu d’homofobia médica y de discriminación sistemática escontra lesbianes, gais y bisexuales”. .La propuesta d’un Día Mundial Contra la Homofobia y la Transfobia ye una iniciativa que cuenta col sofitu de la Asociación Internacional de Lesbianes y Gais (ILGA) y col de munchos colectivos y entidaes presentes en más de 40 países. N’Asturies, el presente añu 2005 celébrase per primer vez esta xornada, empobinada por Xente Gai Astur (XEGA) y l’Axencia Asturiana de Cooperación al Desarrollu (Conseyería de Xusticia, Seguridá Pública y Relaciones Esteriores).Más información 16 de mayu, 2005 0 FacebookTwitterPinterestEmail
Tecnoloxía Telecable celebra el so décimu aniversariu by asturnet 13 de mayu, 2005 Telecable celebró ayer los sos diez años d’esistencia nel mercáu de les telecomunicaciones con un actu públicu nel Auditoriu d’Uviéu que quiso compartir colos sos accionistes y empleaos pa rembrambrar el camín andáu hasta agora y preparase pa los nuevos retos del futuru. Nel actu, presidíu pol másimu responsable de la operadora asturiana, Roberto Paraja, presentóse’l llibru d’Eduardo García: “Diez años de telecable” y el profesor Fernando Pardo ufiertó una conferencia alrodiu de la tesis de que dientro otros diez años “nada va ser como ye anguaño” y “namás los que tean preparaos van ser quien a sobrevivir a los nuevos cambios”. El profesor Pardo, encarrilador de proyectos audiovisuales como la televisión autónomica andaluza Canal Sur y espertu n’economía de les telecomunicaciones,emprimó la so conferencia confesándose un “admirador” del proyectu de Telecable dende los sos oríxenes n’Asturies y al ver que yera “la primera operadora española de cable que ganaba dinero”. Fernando Pardo emponderó la xestión desenvuelta hasta agora pol equipu directivu de la empresa y congratulóse del sitiu qu’ocupa anguaño nel ránking de les operadores de cable del estáu. De siguío, el conferenciante, pasó esponer la so tesis basada en que “dientro d’otros diez años nada de lo que güei conocemos y facemos con ésitu va ser igual”, polos cambios revolucionarios que se producen aína nel ámbitu tecnolóxicu: “olvidáivos de coses qu’anguaño son corrientes como que la telefonía fixa va pagase al preciu qu’agora se paga en comparanza coles otres formes de comunicación de voz, olvidáivos de que puedan siguir esistiendo empreses qu’ofrezan namás un solu serviciu, como delles cadenes de televisión actualmente líderes nel so campu”. El futuru dibuxáu pol profesor Pardo resúmese na evidencia de qu’entós “too va ser dixital, tola información va unviase en cachinos y en paquetes, porque eso fai les redes más eficaces, dirá too en cachinos, la llamada que facemos por teléfonu, los archivos audiovisuales qu’unviemos, y si too va ser asina, too va dir pela mesma llinia”. Pa esti espertu nel mercáu de les nueves tecnoloxíes nesi futuru prósimu namás van sosistir los xugadores múltiples: “los xugadores triples, el que crea qu’ufiertando un solu serviciu va siguir nel mercáu, ya puede xubilase o marchar al esiliu voluntariu, porque va aviáu”. La dicotomía ente llinia ADSL y ente llinia de banda ancha de cable va dirimise nos nuevos tiempos como “una griesca ente’l vieyu esperimentáu de la ADSL y el mozu fuerte del cable y la fibra óptica”, sigún el símil del profesor Pardo. Nesa griesca, a xuiciu del espertu, “nun se sabe quién va vencer, lo único claro ye que’l vieyu esperimentáu por más que quiera nunca va ganar en mocedá y el mozu fuerte cuenta con esa ventaya, y la de tener la oportunidá de preparase lo meyor posible pa afrontar cualquier retu”. Tampoco la posibilidá d’escoyer ente cable y aparatos inalámbricos esmolez especialmente a Pardo pal que “vamos vivir nun mundu nel que naide conciba que pa falar por teléfonu l’aparatu tenga tar conectáu a un cable con servicios que namás van llegar por llinia de cable o fibra óptica”. Pela so parte el periodista Eduardo García, na presentación del so llibru sobre la hestoria de Telecable, discurrió en tonu desenfadáu alrodiu de los cambios qu’esperimentara’l mundu desque él yera “un críu que xugaba peles cais de Xixón y que diba con munchos otros xixoneses a poneme delantre l’escaparate d’una tienda d’electrodomésticos a ver los partíos televisaos”, hasta la realidá actual na que “tola información ta al algame de cualquiera en tiempu real”. Afirmó que cuando entamó la so investigación sobre la operadora asturiana desconocíalo too “del mercáu de les nueves tecnoloxíes y del mesmu funcionamientu y estructura de la empresa”, la esperiencia, confesó valió-y “pa tener una imaxe de verdá atractiva, mui prestosa y provechosa d’esti proyectu qu’agora conozo casi como si fuera un empleáu de la casa”, darréu ironizó: “bono, meyor qu’un empleáu, como si fuera dalguién de fuera”. Telecable, la única operadora de cable asturiana y cabezalera del sector na nuestra comunidá, afronta’l so décimu aniversariu sabedora de ser, según datos ufiertaos por un recién estudiu del Institutu Nacional d’Estadística, líder n’Asturies en conexón a Internet per cable, per enriba de competidores como Telefónica, Wanadoo o Ya.com, y responsable de que la nuestra comunidá ocupe un sitiu destacáu ente les comunidaes autónomes qu’apuestes pola banda ancha. 13 de mayu, 2005 0 FacebookTwitterPinterestEmail
Tecnoloxía Telecable cumple diez años asitiando a Asturies ente les comunidaes cabezaleres na banda ancha by asturnet 12 de mayu, 2005 La empresa de telecomunicaciones asturiana Telecable celebra los diez años de la so esistencia con un actu que va celebrase esta tarde nel Auditoriu d’Uviéu y nel que va presentase’l llibru “Telecable 10 años” del periodista Eduardo García. Nel mesmu actu de conmemoranza del décimu aniversariu de la operadora Francisco Pardo pronunciará una conferencia titulada:”¿Y los prósimos diez años?”.Dende la so creación Telecable lidera n’Asturies el mercáu de les telecomunicaciones y tien asitiao a la nuestra comunidá ente les cabezaleres na banda ancha. La operadora asturiana celebra los sos diez años d’esistencia colos güeyos puestos nel futuru del sector n’Asturies y nel restu del estáu. En febreru d’esti añu l’Institutu Nacional d’Estadística facía públicu un informe sobre’l desenvolvimientu de les telecomuniaciones nel que se percontiaba a Telecable como la empresa líder na nuestra comunidá na prestación de servicios de banda ancha, superando a les conexones d’ADSL qu’ufierten otros competidores como Telefónica, Wanadoo o Ya.com. Según otru informe, de la so más directa competidora, Telefónica d’España, namás hai cinco comunidaes autónomas nes que los operadores de cable superen a la operadora nacional, y, d’elle, la diferencia más grande alcuéntrase n’Asturies. Les otres comunidaes son Cantabria, Murcia, País Valencianu y País Vascu. 12 de mayu, 2005 0 FacebookTwitterPinterestEmail
Sociedá Grupos reintegracionistes clamien pol gallego “so administración asturiana y castellano-lleonesa” by asturnet 10 de mayu, 2005 Catorce asociaciones culturales de distintos llugares de Galicia y partidaries del reintegracionismu tienen convocada una manifestación pal prósimu domingu 15 de mayu en Santiago embaxo’l lema: “Na Galiza vamos viver em galego”. La convocatoria entamada al través de la Cordenadora de Centros Sociaes defende’l monollingüismu del gallegu y programes de promoción d’esti idioma “nes comarques so administración asturiana o castellano-leonesa”. La manifestación de los colectivos reintegracionistes celébrase por segundu añu consecutivu y nesta ocasión la convocatoria pide un plan de normalización llingüística “real” pal gallegu. Los grupos atropaos alrodiu de la Cordenadora de Centros Sociaes tienen elaborao un decálogu reivindicativu pa la so manifestación nel que se pide l’establecimientu de la enseñanza monollingüe en gallegu, la creación d’escueles p’adultos nesti idioma, la galleguización íntegra de les instituciones y administraciones públiques y lexislación pa la galleguización integral de les entidaes privaes. La Coordenadora tamién pide’l puxu del texíu asociativu en llingua gallega, la reformulación de la RTVGA “como verdaderu mediu galleguizador” y la desixencia “efectiva” del idioma pal desempeñu de cargos públicos. Los puntos reivindicativos más polémicos de los reintegracionistes son los que se refieren a la reconocencia de la unidá “llinguística y cultural” gallego-portuguesa, el fomentu de les relaciones colos países de la Lusofonía, amás del ya citáu puntu nel que se clamia pola defensa y promoción de la llingua gallega “nes comarques so administración asturiana o castellano-leonesa”. La convocatoria de la manifestación “En Galiza vamos viver en galego” fírmenla los colectivos AGAL (Galicia), Alto Minho(Lugo),Artabria(Trasancos),Atreu (A Coruña),A Esmorga(Ourense),A Fouce de Ouro (Bertamiráns), Fala Ceive (El Bierzo), Galeguiza (Condado), A Gentalha do Pichel, C.S. Henriqueta Outeiro (Santiago), Revira (Pontevedra), Revolta (Vigo), SCD Condado y A.C. Treme a Terra(Pontedeume). Más información 10 de mayu, 2005 0 FacebookTwitterPinterestEmail
Sociedá L’Academia de la Llingua entregó los sos premios by asturnet 10 de mayu, 2005 L’Academia de la Llingua Asturiana dio esta mañana a conocer los fallos de los concursos de creación y investigación que convoca añalmente. Nun actu celebráu na sé de la institución xunto a la conocencia de los resultaos entregáronse los premios a los ganadores. Ente ellos destacó l’escritor y filólogu Pablo Rodríguez Medina, que consiguió’l premiu de teatru, quedar ex aequo xunto a Enrique Carballeira nel concursu d el llectures pa rapazos y un accesit na modalidá d’investigación lliteraria. Rodríguez Medina algamó’l premiu de teatru, dotáu con 600 euros, cola so obra “Cantu de gaviotes”, según la decisión d’un xuráu que formaben Miguel Ramos Corrada como presidente, Mª Paz Fonticiella Gutiérrez como vocal, faciendo de secretariu Adolfo Camilo Díaz. L’escritor entreguín tamién recibió un premiu ex aequo na modalidá de llectures pa rapazos pola so obra “Tapín de Picupáu”, xunta a Enrique Carballeira, autor del relatu “Los inventos de mio padre”. El xuráu d’esti premiu dedicáu a la lliteratura infantil y xuvenil formábenlu Urbano Rodríguez Vázquez como presidente, Vicente García Oliva como vocal, faciendo de secretariu Pablo Xuan Manzano Rodríguez. L’últimu premiu nel que consiguió una distinción Rodríguez Medina foi nel d’investigación lliteraria, algamando un accesit pol so trabayu tituláu “Los portfolios”, según el sentíu del fallu d’un xuráu compuestu porMiguel Ramos Corrada como presidente, Antonio Fernández Insuela como vocal, faciendo de secretariu Alfonso Martín Caso. Los otros ganadores foron Joaquín F.Collado na modalidá de curtios cinematográficos pol so trabayu “Marcha d’echase”. Nes estayes d’investigación, na referida a recoyida de material topónimico, el xuráu formáu por Ana María Cano González como presidenta, José Luis García Arias como vocal y Corsino García Gutiérrez decidió premiar con 600 euros el trabayu tituláu “Toponimia de la parroquia de Tuiza”, del que ye autora Noemí González García; asina como dar un accésit de 300 euros al trabayu tituláu “Toponimia de Llangréu. Parroquies de Tiuya y La Felguera”, del que ye autor Jorge Alberto García Fernández, otru accésit de 150 euros al trabayu tituláu “Toponimia de la Montaña de Ríu Negru. Conceyu de Valdés”, del que ye autora Esther García López y un segundu accesit de 150 euros al trabayu tituláu “Toponimia de la parroquia de Sobrefoz (Ponga)”, del que ye autor Xe M. Sánchez. Na modalidá de recoyida de material lliterario oral, el xuráu que formaben Roberto González-Quevedo González como presidente, Antonio Fernández Insuela como vocal, faciendo de secretariu Alfonso Martín Caso, decidió premiarcon 600 euros el trabayu tituláu “Dichos, refranes, cuentos ya otres narraciones de Villamexín (Proaza)”, del que ye autor Antonio Alonso de la Torre. Nel concursu de Concursu de Recoyida de Material Lliterario Escrito. Premiu “Federico G.-Fierro Botas”, el xuráu formáu por Ana María Cano González como presidenta, José Luis García Arias como vocal y Corsino García Gutiérrez faciendo de secretariu, apautóse en premiar con un accésit de 300 euros el trabayu tituláu “Charlas”: testos contra’l socialenchufismu (El Noroeste, 1932-1933)”, del que ye autor Rafael Rodríguez Valdés; dar un accésit de 150 euros al trabayu tituláu “Testos n’asturianu na revista Asturias de L’Habana. Facsímil de los númberos 1-50 (9 d’agostu de 1914-11 de xunetu de 1915”, del que ye autor Ramiro González Delgado; y dar un accésit de 150 euros al trabayu tituláu Un cartafueyu non recoyíu d’Aladino Fuente Vega, del que ye autor José Luis Campal Fernández. Los concursos “Llorienzu Novo Mier” de creación lliteraria, asina como los de recoyida de material oral asturianu ya investigación llingüística quedaron ermos. 10 de mayu, 2005 0 FacebookTwitterPinterestEmail
Sociedá El Muséu Pueblu d’Asturies de Xixón acueye los segundos Alcuentros de la Mocedá cola Llingua by asturnet 8 de mayu, 2005 La Oficina Municipal de normalización del asturianu del Conceyu de Xixón organiza por segundu añu consecutivu los Alcuentros de la Mocedá cola Llingua empobinaos a implicar a los alumnos de Secundaria y Bachilleratu de la ciudá na sensibilización pol nuestru idioma. Les actividaes d’estos II Alcuentros nomaos “¡Saca la Llingua!” van desenvolvese esti martes 10 de mayu nel recintu del Muséu Etnográficu Pueblu d’Asturies y participarán moces y mozos d’ocho institutos xixoneses. La Oficina Municipal de la Llingua va a desendolcar esti añu, por segunda vez, el 10 de mayu nel recintu del Muséu del Pueblu d’Asturies. “Saca la Llingua” ye un proyeutu empobináu a los alumnos y alumnes de llingua asturiana d’Educación Secundaria y Bachilleratu de los institutos de la ciudá. En collaboración con otres entidaes, la Oficina Municipal de la Llingua va desendolcar esti añu por segunda vez, el martes 10 de mayu, ente les 10 y les 14 hores nel recintu del Muséu del Pueblu d’Asturies de Xixón. L’añu pasáu, nos primeros alcuentros, sacaron la llingua 284 mozos y moces. Esta primavera van ser más de quinientes les llingües qu’enllenen tolos requexos del Pueblu d’Asturies p’amosar que la xuventú y los Centros d’Enseñanza son importantísimos axentes nel procesu de normalización llingüística, pa descubrir y afondar na cultura y la llingua asturiana y refelxonar sobre la situación actual del asturianu y la importancia d’activar aiciones a favor d’él; pero sobre too pa usar la llingua con ganes y con gustu. Esposiciones sobre instrumentos musicales, sobre la historia del futbol asturianu, xuegos tradionales asturianos, talleres de lliteratura, de percusión, de teatru, de historia de la música, de cuantacuentos, de la historia del Sporting, de cocina creativa, de cómic y de xuegos tradicionales nos que la mocedá podrá conocer y contactar col escritor Dolfo Camilo Díaz, Xulio Elipe el cantante de Dixebra, Ramón Blanco; el batería de los Berrones Xosé Ambás; el monologuista Cellero, el dibuxante Igor Medio, l’actor y guionista Maxi Rodríguez, ente otros son dalgunes de les actividaes que van poder disfrutar los mozos y moces. Los institutos que participen nesti alcuentru que son: IES Emilio Alarcos, IES Montevil, IES Mata- Xove, IES Rorario Acuña, IES Padre Feijoo, IES Roces, IES Universidá Llaboral ya IES Dña. Jimena. 8 de mayu, 2005 0 FacebookTwitterPinterestEmail
Sociedá L’Academia propón entamar un gran pautu pola llingua by asturnet 6 de mayu, 2005 La presidenta de l’Academia de la Llingua Asturiana, Ana Cano González, aprovechó el so discursu institucional del Día les Lletres pa proponer un gran pautu con implicación de tolos axentes sociales de la nuestra comunidá pal afitamientu d’una política xeneral comprometía cola llingua y la cultura asturianes en toles estayes de la vida pública. Cano criticó severamente les estratexes de promoción del asturianu desenvueltes pol Gobiernu’l Principáu y recalcó la necesidá de reconocer dafechu el calter oficial del asturianu nel Estatutu. Vistida col traxe tradicional del Occidente, la presidenta de la institución llingüística, tres acoyer a los nuevos académicos: Marta Mori y Xoaquín Iglesias, repasó la situación de la llingua asturiana dende l’últimu Día de les Lletres. Resaltó los avances positivos que significaran fechos como la inscripción nel Rexistru Mercantil d’una empresa cola documentación presentada namás na nuestra llingua, el conveniu recién soscritu ente’l Conceyu d’Uviéu y l’Academia, y congracióse del premiu al meyor cantar n’asturianu recibíu pol músicu Chus Pedro Fernández. Darréu, Ana Cano, foi enumerando les principales dificultaes coles que se vieno atopando l’asturianu en diferentes estayes sociales, faciendo una remembranza específica a los problemes en tolos niveles de la enseñanza. Respective a les estorbises puestes a la titulación de Filoloxía Asturiana, la presidenta de l’Academia afirmó que “nun ye en Madrid onde tán los que más s’oponen, tan equí, n’Asturies” y llamentó “les vegaes nes que m’atopé sola, dafechu sola defendiendo la titulación ensin recibir dalu respaldu polos qu’habíen dalu dende Asturies”. Les acciones entamaes pola Conseyería de Cultura en materia llingüística foron sobremanera criticaes y refugaes por Cano nel so discursu institucional: “falen de planes de normalización, pero nun hai normalización posible ensin la reconocencia de la oficialidá y esa reconocencia nun apaez per dayures el nomáu Plan de Normalización Social”. Pa la presidenta de la másima institución llingüística asturiana les cifres presupuestaries que se contemplen pa executar les diverses acciones del Plan de Cultura “nun se correspuenden cola realidá, ye una engañifa dicir que s’aumenten eses dotaciones coles cifres que se ficieron públiques”. Un capítulu especial meritó l’enfrentamientu que caltién l’Academia cola Conseyería de Cultura a cuentu de la Xunta Asesora de Toponimia: “talo denunciémos na presentación del Mapa Toponímicu apocayá, hai un tentu de querer suplantar les funciones asignaes llegalmente a l’Academia y de querer nega-y l’autoridá llingüística que-y ufierta la Llei d’Academies del Principáu, y toles disposiciones esistentes al respective”. En repitíes ocasiones Ana Cano recalcó la necesidá irrefugable de que la prósima reforma estatutaria recueya la cooficialidá pa la llingua asturiana y pal gallegu-asturianu, encamentando a los partíos políticos representaos na Xunta Xeneral a “facer de só un deséu de la sociedá asturiana que reflexen toes les encuestes”. El platu fuerte del discursu de les Lletres dexólu Ana Cano pa la parte final de la so intervención y consistió na propuesta entamada pola Academia de la Llingua pa consiguir “un gran pautu social, a semeyanza d’otros ya fechos” nel que tolos axentes públicos d’Asturies soscribieran un compromisu materializable pa la normalización del asturianu en tolos niveles de la sociedá, l’administración y la enseñanza. Esti alcuerdu espardiríase tamién a la promoción y caltenimientu de la cultura asturiana en tolos ámbitos sociales. Ana Cano, ofrecióse personalmente, na so calidá de presidenta de la másima institución llingüística d’Asturies, pa facer el papel de “moderadora” si asina lo consideraran los axentes implicaos nesi futuru pautu pola llingua y la cultura del país. La propuesta de l’Academia pa liderar un gran pautu social pa la supervivencia y normalización de los elementos cimeros de la identidá cultural asturiana yera la sorpresa del discursu institucional de les Lletres que s’esperaba énte les estremaes situaciones conflictives que tien protagonizao esta institución, como garante de los drechos llingüísticos de los asturianos, especialmente coles autoridaes culturales del executivu asturianu. Enantes, l’Academia, aconceyada en xunta pública estraordinaria acoyera a los sos nuevos miembros: Xoaquín Iglesias, como académicu de númberu, y Marta Mori, como académica correspondiente. Iglesias nel so discursu d’ingresu na institución esplayóse alrodiu los problemes principales colos que s’enfrenta la llingua asturiana anguañu, sobretoo los que cinquen al mundu de la enseñanza. Mori, pel so llau, quiso centrar el so discursu nuna reflesión en defensa del “amestao”, como forma de pervivencia del idioma n’estayes de la sociedá asturiana onde la nuestra llingua fuera desplazada pol castellanu: “Yo nun provengo del mundu rural, criéme nun ambiente urbanu y amecigayáu como’l de los barrios de Xixón onde l’amestáu yera la fala corriente”. L’actu de les Lletres cuntó cola presencia del gaiteru José Manuel Tejedor p’abrir y pesllar la xunta pública de l’Academia, y acabante’l discursu institucional d’Ana Cano, los periodistes Sonia Avellaneda y Próspero Morán, vistíos de rigor col traxe tradicional, dieron llectura a dellos de los poemes espublizaos nel númberu monográficu de la revista “Lletres asturianes”, dedicáu añalmente a los creadores na nuestra llingua. L’actuación del grupu Lliberdón, a la que se xuntaron Xune de Dixebra y el cantaor Horacio Huerta, punxo remate al actu del Campoamor, que remató colos sones del “Asturies patria quería”, interpretaos pol gaiteru Tejedor y conseñes en favor de la oficialidá pol numberosu públicu qu’abarrotaba’l coliséu uvieín. 6 de mayu, 2005 0 FacebookTwitterPinterestEmail