Sociedá Areces descarta la oficialidá n’Asturies pa otra llingua que nun sea l’español by asturnet 16 d'avientu, 2005 El presidente del gobiernu asturianu Vicente Álvarez Areces descartó qu’ente les intenciones de la so llinia política tea la de declarar la cooficialidá na nuestra comunidá autónoma. Areces inxertó diverses consideraciones personales sobre la realidá llingüística d’Asturies na respuesta a una de les preguntes que los informadores-y ficieron esti miércoles 15 en Madrid alrodiu de la polémica entamada col BNG pola propuesta de nuevu estatutu pa Galicia d’esti partíu. Preguntáu sobre la posibilidá recoyida nel testu de los nacionalistes gallegos de que la comunidà vecina pida a otres comunidaes la cooficialidá del gallegu nel so territoriu el presidente del Principáu descartó “la posibilidá de contemplar la cooficialidá en zones asturianes” y afirmó: “Nós tenemos un idioma que ye l’Español, el Castellano, como quieran nomalo, y tenemos tamién nel nuestru Estatutu d’Autonomía el Bable o Asturiano, que pretendemos promover el so uso y la so difusión, porque forma parte del nuestru bagaxe cultural”. Areces añadió que “l’Asturiano, amás, tien modalidaes llingüístiques que formen parte de fales o maneres de falar en dalgunes zones d’Asturies, onde, evidentemente, hai raigones llingüísticos d’otru tipu”, pa a renglón siguíu recalcar que “nun consideramos políticamente acertao el da-y una denominación de cooficialidá y poro esa ye la nuestra opinión”. Una opinión que calificó de “respetuosa y de la que dixo que “amás, creo coincide cola de la inmensa mayoría de los asturianos que se sienten fondamente asturianos nesos conceyos limítrofes, que falen lo que veníen falando siempre y que nun quieren nenguna guerra d’esi tipo, porque me parez una guerra d’una esterilidad absoluta y d’un planteamientu que nunca enantes se formulara, y que nun van añadir nada si se formula agora. 16 d'avientu, 2005 0 FacebookTwitterPinterestEmail
Sociedá El parlamentu asturianu aprobó por unanimidá la Llei del Procurador Xeneral by asturnet 16 d'avientu, 2005 El plenu de la Xunta Xeneral del Principáu aprebó na so sesión d’esti xueves 16 el proyectu de Llei que va regular la figura del Procurador Xeneral y llenda les funciones y les incompatibilidaes del cargu. La creación de la nueva figura institucional aprebóse por unanimidá de los tres grupos tres la incorporación de delles enmiendes presentaes poles diverses fuerces polítiques. El Procurador Xeneral d’Asturies va exercer les funciones propies d’un defensor de los ciudadanos énte los abusos o arbitrariedaes de les administraciones públiques dientro’l territoriu de la comunidá autónoma del Principáu y el so cargu ye incompantible con otros de rangu políticu o públicu. Na nueva llei aprebada’l nome institucional del cargu tien la so designación oficial en llingua asturiana como Procurador Xeneral. 16 d'avientu, 2005 0 FacebookTwitterPinterestEmail
Sociedá Los tres grupos de la Xunta Xeneral sofiten una propuesta en favor de l’asturianidá del Navia Eo by asturnet 15 d'avientu, 2005 Los tres grupos parlamentarios de la Xunta Xeneral firmaron una proposición non de llei conxunta na que se reafirma l’asturianidá del Navia Eo y se caltién que tanto la llingua asturiana como la fala “formen parte irrenunciable del patrimoniu cultural asturianu” y que como talo “ha ser atendío, protexío y trensitío a les xeneraciones futures poles instituciones” d’Asturies. La iniciativa presentada conxuntamente polos grupos socialista, popular y d’Izquierda Xunida-Bloque por Asturies, diz que “tolos ciudadanos asturianos somos heriedes de la bayura llingüística y cultural de toles tierres d’Asturies, porque toes conformen la nuestra forma de ser y de sentinos asturianos”. Darréu alude a l’actualidá afirmando que “nestos momentos en que dende sectores ensin dulda poco informaos de la nuestra realidá cultural y cohesión social intenta cuestionase l’ asturianía social y cultural del territoriu asturianu del Navia-Eo” la Xunta Xeneral del Principáu d’Asturies declara que “l’asturianía social y cultural del territorio asturiano del Navia-Eo ye incuestionable”. La proposición defende nesi sen que “tanto la llingua asturiana como la fala formen parte irrenunciable del patrimoniu cultural asturianu y que como tal patrimoniu ha de ser atendío, protexío y tresmitío a les xeneraciones futures poles instituciones que’l pueblu asturiano se dio a él mesmu” y que tien d’evitase “cualquier acción negativa, sea esta proveniente tanto d’otres administraciones como d’asociaciones o grupos sociales, y especialmente aquelles que puedan poner en tela de xuiciu tala asturianía”. La iniciativa, firmada polos portavoces de los tres grupos: Fernando Lastra, Ovidio Sánchez y Noemí Martín, admitióse a trámite el pasáu 29 de payares y va recibir el sofitu de la cámara autonómica nel plenu parlamentariu d’esti xueves. 15 d'avientu, 2005 0 FacebookTwitterPinterestEmail
Sociedá Valledor pide firmeza y prudencia al estáu nel Cume Européu by asturnet 15 d'avientu, 2005 El conseyeru de Xusticia y Esteriores del Principáu, Francisco Javier García Valledor, pide-y firmeza y prudencia al gobiernu central pa defender el caltenimientu d’ayudes europees a comunidaes como Asturiesnel Cume comunitariu qu’escomienza esti xueves en Bruseles. Valledor amuesa’l so esmolecimientu énte la postura llantada anguaño embaxo la presidencia británica de la Unión Europea. El titular d’Esteriores del gobiernu asturianu considera qu’hai razones pa esmocelcese no que cinca al procesu de negociación cola actual presidencia británica, derivada de la so propuesta inicial a la que calificó de insolidaria y que supón un recurtie importante del presupuestu comunitariu. Nun ye razonable nin entendible pa los ciudadanos que se pretenda construir más Europa con menos perres, señaló’l Conseyeru, pal qu’esa reducción afecta “a los intereses de Asturias y de España pero sobretoo afecta mui gravemente al principiu de cohesión, que nun hai d’escaecer -añadió-, constitúi un pegollu fundamental de la UE. Valledor, sicasí, alegróse de que la propuesta británica que se dio a conocer a lo llargo d’esta mañana representa una meyora curiosa respective a la d’entamu anque nun cubra les demandes d’Asturies, n’opinión del conseyeru. El responsable de Xusticia y Relaciones Esteriores del Principáu aporfió de cualquiermiente nel so esmuelgu pol desarrollu de la negociación nel Cume de Bruseles, sobremanera no tocante al marxen financieru pa les comunidaes afectaes pol llamáu efectu estadísticu: Si a la parálisis institucional y política se-y acaba xuntando la posible parálisis financiera les consecuencies van ser impredicibles y podíen ser potencialmente catastrófiques pa la UE y diben poner en riesgu la so propia continuidá, señaló. 15 d'avientu, 2005 0 FacebookTwitterPinterestEmail
Sociedá El BNG caltién que la so propuesta estatutaria cueye na Constitución by asturnet 14 d'avientu, 2005 El portavoz del Bloque Nacionalista Gallegu (BNG) nel parlamentu de Galicia, Carlos Aymerich, afirmó esti martes 13 que la propuesta de nuevu estatutu del so partíu “ye una propuesta consitucional, cabe nes regles de xuegu, siempre que la Carta Magna nun la interpreten Fraga, Acebes o Zaplana” y dixo que la polémica armada a cuenta de la posible anexón de conceyos limítrofes que “ta fuera de sitiu”. El portavoz del Bloque retrucaba asina a les crítiques llanzaes pol ex presidente de la Xunta Manuel Fraga que calificara d’anticonstitucional la propuesta nacionalista. Aymerich declaró Respective al polémicu asuntu de la posible anexón territorial de conceyos d’otres comunidaes Aymerich manifestó que “la redacción ye bastante más prudente” que la del Estatutu de Castiella-Lleón y concluyó que “equí el problema ye que la propuesta vien dende Galiza, y pa enriba, de nacionalistes gallegos”. Pel so llau, el ministru de Xusticia, Juan Fernando López Aguilar, declaró n’Uviéu que’l nuevu estatutu del Bloque nun cuntaba col so prestu inda tampoco refugó el so discutiniu: “Nun toi d’alcuerdu cola propuesta, pero puede plantease un debate democráticu y basta con votar non”, dixo. 14 d'avientu, 2005 0 FacebookTwitterPinterestEmail
Sociedá Avilés acueye unes xornaes de solidaridá col pueblu saharaui by asturnet 14 d'avientu, 2005 La Casa de Cultura d’Avilés va ser los prósimos díes 16 y 17 d’avientu sé d’unes Xornaes de Solidaridá col Pueblu Saharaui qu’organiza l’Axencia Asturiana de Cooperación y que van cuntar cola presencia de varios miembros del gobiernu del Frente Polisariu. La cooperación cola República Árabe Saharaui Democrática, la situación de los derechos humanos nos territorios ocupaos o el cumplimientu de los alcuerdos internacionales son dellos de los temes que van tratase nestes xornaes. Otru de los asuntos que van centrar los conteníos de les Xornaes de Solidaridá col Pueblu Saharaui ye la espulsión al desiertu d’inmigranes subsaharianos poles autoridaes de Marruecos sobre la que se va proyectar un documental el prósimu sábadu 17. Nes xornaes participen por parte del gobiernu del Principáu el conseyeru de Xusticia y Esteriores, Francisco Javier García Valledor, asina como’l responsable de l’Axencia Asturiana de Cooperación, Rafael Palacios. Como invitaos de la República Ärabe Saharaui Democrátiva van participar Mohamed Sidati, ministru pa Europa, Hamada Selma, ministru de Xusticia, Brahim Gali, Delegáu del Frente Polisariu pal Estáu español, y representantes d’asociaciones de familiares de víctimes de la represión marroquí sobre los terriotios ocupaos. Les xornaes inaugúrense esti viernes 16 a les 19.00 hores nel salón d’actos de la Casa de Cultura d’Avilés. 14 d'avientu, 2005 0 FacebookTwitterPinterestEmail
Comunicación El Principáu busca la promoción internacional d’Asturies como marca turística by asturnet 13 d'avientu, 2005 La conseyera de Cultura Ana Rosa Migoya, anunció esti llunes en Madrid, tres asistir a la Conferencia Sectorial de Turismu, que’l Principáu tien la intención de promocionar Asturies nel esterior aprovechando marques como España Verde, Camín de Santiago y Ruta de la Plata. El gobiernu autonómicu quier valise del tirón de Fernando Alonso pa difundir el turismu na nuestra comunidá y furar nos estremaos mercaos internacionales. Migoya, tres aconceyar colos otros responsables autonómicos de Turismu y el ministru José Montilla, acoyó de bon grau la iniciativa conxunta del departamentu español d’Industria y del d’Agricultura pa fomentar el turismu rural y de naturaleza, xuniéndolos a la producción agroalimentaria de calidá cola elaboración de rutes gastronómiques. Asturies tien munches posibilidaes nesti campu pola cantidá pero tamién pola calidá de los sos productos, que ya son reconocíos internacionalmente, señaló la Conseyera. El principal focu d’atención pa esta promoción va ser Europa, pero col oxetivu d’entrar nel mercáu americanu y asiáticu. Ana Rosa Migoya xunióse a la esmolición espresada na Conferencia Sectorial de Turismu por otros responsables autonómicos respective a los altos precios de los servicios ufiertaos en tierra nos aeropuertos. Esta situación encarez los nomaos vuelos baratos y dificulta la so implantación. La Conferencia aprebó diversos planes d’escelencia turística, ente ellos ún pal conceyu asturianu de Rivadedeva. 13 d'avientu, 2005 0 FacebookTwitterPinterestEmail
Sociedá Los independientes de Muros piden un serviciu de normalización y d’ordenances n’asturianu by asturnet 13 d'avientu, 2005 El grupu municipal Cambio Siglo XXI de Muros del Nalón presentó nel plenu del Ayuntamientu del pasáu viernes 9 una moción na que reafirma l’asturianidá de tolos conceyos occidentales y pide la puesta en marcha d’un serviciu de normalización, asina como l’usu d’ordenances na nuestra llingua. Los tres conceyales independientes ufiertaron la moción redactada en llingua asturiana y acompañada d’un exemplar del llibru “El marcu llegal del asturianu” del xurista José Manuel Pérez. Nella piden al conceyu de Muros que refugue “toles iniciatives que tan teniendo llugar nos caberos meses por parte de grupos políticos y culturales de Galicia empobinades a espadir la llingua y el territoriu gallegos pol Occidente d´Asturias”. L’escritu, firmáu polos conceyales Marcelino García González, Luis Eloy Fdz. Cueto y Xuan Fernández Suárez, defende que “como primer conceyu del Occidente d´Asturias que somos, dende Muros decimos al altu la lleva que tolos conceyus que anguañu formen la nuesa autonomía son dafechu asturianos y asina lu amuesa la voluntá de sus vecinos”. Los conceyales del grupu independiente afirmen que “nun tamos dispuestos a consentir cualquier intrusión d´otra comunidá nes decisiones que-y correspuenden al Principáu d´Asturies en toles polítiques, incluida la llingüística” y reclamen la oficialidá pal asturianu y pal gallegu-asturianu nos territorios onde se fala. 13 d'avientu, 2005 0 FacebookTwitterPinterestEmail
Sociedá SUATEA denuncia les inxerencies de Galicia y la falta de contundencia del Principáu by asturnet 13 d'avientu, 2005 SUATEA denuncia nun comunicáu lo que considera “inxerencia de les instituciones, organizaciones y partíos políticos de Galicia n´asuntos que competen únicamente a Asturies”. Pal sindicatu d’enseñantes diverses iniciatives planteaes dende l’otru llau del Eo amuesen que “Galicia ta intentando apropiase de competencies que nun son suyes y esto paeznos que merez una rempuesta tamién dende´l nuestru Gobiernu que nun pon interés nesta cuestión”. La crítica a la falta d’atención del executivu asturianu nun significa pal sindicatu que se cuestione l’autoridá institucional del Principáu nesti asuntu: “Los conceyos del Navia EO son asturianos y como tales tan representaos poles Instituciones Asturianes” y que “cualisquier política que se refiera a esa fastera tien de facese dende Asturies”. Per otru llau SUATEA, xunta’l Sindicatu d’Estudiantes, tien convocada pa la xornada d’esti miércoles 14 d’avientu una fuelga na enseñanza contra’l proyectu de la LOE. A les 18.00 hores hai tamién entamada una manifestación dende la Estación de la Renfe d’Uviéu pol mesmu motivu. 13 d'avientu, 2005 0 FacebookTwitterPinterestEmail
Sociedá Touriño pide moderación al BNG y el cabezaleru del PP d’Ourense sofita a los nacionalistes by asturnet 13 d'avientu, 2005 El presidente de la Xunta de Galicia el socialista Emilio Pérez Touriño pidió esti llunes moderación a la hora d’abordar la reforma del Estatutu de la so comunidá y reclamó un nuevu testu “a favor del país, pa que’l país avance y non contra naide”. Pel so llau el presidente asturianu Vicente Álvarez Areces retrucó-y a Anxo Quintana considerando “inaceptables” los sos argumentos, “sobremanera el llingüísticu”, dixo. Pérez Touriño terció na polémica sobre la propuesta estatutaria del BNG pidiéndo-y al partíu col que gobierna en coalición que plantee una reforma “dende’l consensu y la moderación”. El presidente gallegu declaró después de falar del asuntu col so vicepresidente el nacionalista Anxo Quintana: «hai que reconducir esto al terrenu de la prudencia y al respetu mutuu, tanto del qu’opina dende fuera en relación a la reforma del Estatutu de Galicia, que tien dar la so opinión dende’l respetu, como el que la pronuncia, la formula y la promueve». indicó. La polémica, siacasí, nun amengua y salten al ruedu nuevos intervinientes como’l cabezaleru del Partíu Popular d’Ourense, José Luis Baltar, que sofitó la propuesta del Bloque de plantear la posibilidá de que conceyos d’otres comunidaes puedan incorporase a Galicia: “hai que dexar esa puerta abierta”, afirmó Baltar, según recueye’l diariu asturianu La Nueva España na so edición d’esti martes 13. El presidente asturianu tamién quixo intervenir de nuevu y fízolo pa retrucar a Anxo Quintana: “los sos argumentos son inaceptables, sobremanera el llingüísticu”, dixo Álvarez Areces a diversos medios de la nuestra comunidá. 13 d'avientu, 2005 0 FacebookTwitterPinterestEmail