Música La Royal Crown Revue trai’l swing a Xixón na presentación del so últimu discu by asturnet 19 de xunu, 2006 La banda norteamericana de swing Royal Crown Revue, vieyos conocíos d’Asturies pola so participación nel primer Crossroad Festival y nes xires de presentación de les dos ediciones siguientes, va llegar esti xueves, día 22, a les nueve y media la nueche, a la Sala Albeniz de Xixón pa presentar en directo Geetings From Hollywood, un trabayu que tien versiones de clásicos de la formación y composiciones inedites. Royal Crown Revue tán consideraos los padres del nuevu swing. Formáu en 1989, el grupu llideráu pol cantante Eddie Nichols algamó la fama a raíz de l’apaición del so tema Hey Pachuco na película La máscara. Na xira actual que los trai esti xueves a Xixón, la banda presenta’l so últimu trabayu, Greetings From Hollywood, qu’inclúi versiones de los temes más conocíos de la banda y dalguna canción inedita. 19 de xunu, 2006 0 FacebookTwitterPinterestEmail
Música ‘Conciencia Llibre’ de K-Nalón estrena la Selmana de la Música del Fórum de la Fnac by asturnet 18 de xunu, 2006 La presentación de la última maqueta de K-Nalón que lleva por títulu ‘Conciencia Llibre’ va abrir el ciclu de conciertos de la Selmana de la Música nel Fórum de la Fnac en Parque Principado (Siero) na tarde d’esti llunes, día 19 de xunu, a les ocho y cuartu. K-Nalón presenta asina la so última maqueta con temes fechos nestos dos años que distribúi’l propiu grupu pelos chibres y colectivos sociales asturianos, a parte de tar disponible pa la descarga na so páxina web. El grupu del Nalón de hip-hop combativu va d’esta manera faciendose un llugar nel panorama musical del país gracies al so compromisu social. Tori, vocalista, llidera una formación variable de xente que lleva trabayando dende 2003 y los sos conciertos son tou un espectáculu gracies a la fuerza de les lletres y la contundencia de les sos bases. 18 de xunu, 2006 0 FacebookTwitterPinterestEmail
Música Corquiéu viaxa a Canadá pa participar nel Mission Folk Music Festival by asturnet 14 de xunu, 2006 El Mission Folk Music Festival canadiense celebra nos díes 21, 22 y 23 de xunetu la so XIX edición cola participación del grupu ribeseyanu Corquieu. El certame, que se fai tolos años nel parque de la herencia del ríu Fraser, en Canadá, cuntá amás coles actuaciones de cantantes de reconocimientu internacional como Judy Collins, el guitarrista John Renbourn, los congoleses Kekele, los finlandeses Gjallarhonrn y la North Shore Celtic Ensemble, ente otros. Nos díes 21, 22 y 23 de xunetu, el grupu ribeseyanu Corquieu, ganadores de los premios al Meyor discu folk y Meyor canción folk na última edición de los premios AMAS,viaxará a Canadá pa participar nel XIX Mission Folk Music Festival onde presentará’l repertoriu del so últimu discu, ‘Salia’. Xunto a ellos, actuarán músicos de fama internacional como la cantautora Judy Collins; el guitarrista John Renbourn, consideráu’l padre de la música tradicional británica contemporánea; los congoleses Kekele; el grupu cubanu Sierra Maestra; los Happa de Hawaii; los finlandeses Gjallarhonrn; y la North Shore Celtic Ensemble, ente otros artistes. Pero Corquieu, que ta acabante d’incorporar a la so formación a la vigulinera lleonesa Blanca Sáenz y el flautista mierense Dani Álvarez, non sólo va tocar en tierres canadienses. A lo llargo d’esti branu, amás de repartise per diferentes nueches folk asturianes, como’l San Xuan de Llugones o la Nueche Folk Ribeseyana onde tocarán colos míticos Felpeyu y Llan de Cubel, van viaxar tamien al Tathiou Festival de Normandía onde’l 25 d’agostu van compartir escenariu colos gallegos Camaxe. 14 de xunu, 2006 0 FacebookTwitterPinterestEmail
Música Venticuatro bandes asturianes rinden homenaxe a La Polla Records by asturnet 13 de xunu, 2006 Depues d’unos cuantos meses de duru trabayu, l’homenaxe que venticuatro bandes asturianes faen a La Polla Records, el grupu de punk español más famosu de tolos tiempos, va salir a la cai’l prósimu día 17 de xunu. Gomeru, Skama la Rede, Glayiu y La Tarrancha, son dalgunos de los grupos que se sumaron a esti proyectu autoxestionáu pa rindir tributu a la formación vasca. En 1979 un grupu de mozos del pueblu d’Agurain (Euskadi) deciden axuntase pa formar una banda a la que-y punxeron por nome La Polla Records. Evaristo na voz, Fernandito na batería, Maleguin nel baxu y Txarly y Xume coles guitarres. Tres de la grabación d’una primer maqueta que pasó ensin pena nin gloria, en 1983 llogren editar cola discográfica Oihuka un elepe que se llamó”Y ahora que?”, formáu sólo por cuatro temes. ‘Salve’ va ser el so primer LP, grabáu en 1984, al que siguieron ‘Revolución’, ‘No somos nada’, ‘Donde se habla’, ‘En directo’, ‘Ellos dicen mierda nosotros amen’, ‘Los jubilados’, ‘Barman’, ‘Negro’ y ‘Hoy es el futuro’. Tres d’una demanda que los lleva a tener que dexar el so nome como La Polla, a seques, siguen trabayando en ‘Carne para la picadora’, ‘La Polla enturecto’ y el so últimu discu ‘Bocas’. Nel añu 1999 festeyaben los venti años de la so historia col cd ‘Toda la puta vida igual’. Tres de la muerte de Fernandito, una de les almes del grupu, y de la marcha de dalgún otru de los sos miembros, son agora les bandes asturianes, siguidores de los vascos, los que saquen a la cai un cd n’homenaxe a la mítica banda de punk. La rellación de grupos y canciones ye la que vien darreu: Vibora-Odio A Los Partidos; Duendes-Fucking USA; Boghura Khan-Estrella Del Rock; Ulan Bator-Angeles Caidos; Desorden-La Solucion Final; Konciencia Intrankila-Nadie Llorara Por Ti; La Tarrancha-Fin De Siglo; Bishamon-Alicia; Gomeru-La Futbolera; Kilometrozero-Ellos Dicen Mierda; Skama la Rede-Tumba 37; Zona Oscura-No Somos Nada; Zuklon-B-Cara Al Culo; Despellejo-Ya No Quiero Ser Yo; Glayiu-El Congreso De Los Ratones; Adizion Etilika-Muy Punk; Distorsion Pro-El Suicida ; Aspectos-El Avestruz; El hueso del policarpo-Jhonny; Frekuencia-Carne Pa La Picadora; Lakkra-Salve; Las t@xidermistas de ideas-Come Mierda; Yonbonyonkis-Y Ahora Que? y Expropiazion-Txus. 13 de xunu, 2006 0 FacebookTwitterPinterestEmail
Música Trebolgu celebra esta fin de selmana los VII Alcuentros Tradicionales by asturnet 12 de xunu, 2006 El prósimu sábadu día 17 de xunu va tener llugar la celebración de los VII Alcuentros Tradicionales de Trebolgu que nesta nueva edición va trayer a músicos de Bretaña, Irlanda, Galicia y Asturies como’l curdioneru bretón Alain Pennec, l’irlandes Padraig Rynne a la concertina, el gaiteru Anxo Lorenzo y el grupu Los Llanzones. Dende la mañana del sábadu les bandines tradicionales asturianes van empezar a animar una fiesta que llegará al escurecer de la mano de la Banda de Gaites ‘Ciudad de Oviedo’, pa dar pasu a partir de les diez y media la nueche a una nueche folk qu’axuntará nos escenarios a artistes asturianos y gallegos con otros nomes de referencia internacionales. Asina, Alain Pennec, que vendrá dende Bretaña, y Padraig Ryne, dende Irlanda, van actuar xunto al prestixosu gaiteru gallegu Anxo Lorenzo, amás del grupu asturianu Los Llanzones. La gran plaza circular del parque del Oeste d’Uvieu, nel barriu de L’Argañosa, ye’l llugar onde cada añu tienen llugar los Alcuentros Tradicionales organizaos pola asociación folclórica y cultural Trebolgu. Folixa, música y sidra pa una fiesta que busca revitalizar les nueches folk na capital d’Asturies. 12 de xunu, 2006 0 FacebookTwitterPinterestEmail
Música L’escocés Michael McGoldrick participa na Nueche de San Xuan de Llugones by asturnet 11 de xunu, 2006 La Nueche de San Xuan que se celebra nel Parque de la Paz de Llugones va empezar a les ocho la tarde del día 23 con un completísimu programa nel que van participar el dúu de tonada formáu por Jorge Tuya y Luis Estrada y l’actuación de Xuan Nel Expósito y Emilio Martínez, asina como los grupos La Bandina, Corquieu, Skama la Rede y, como invitáu especial, l’escoces Michael McGoldrick, miembru de bandes mítiques como Lúnasa y Carpercaillie. La nueche del 23 de xunu en Llugones va empezar cola entrega de premios del II Concursu d’hestories y dibuxos Nueche de San Xuan que va siguir cola muestra de tonada, solista y dialogada, ente los cantantes Jorge Tuya y Luis Estrada. Enantes del encendíu de la foguera, los músicos Xuan Nel Expósito y Emilio Martínez, a la curdión y la gaita respectivamente, van amenizar la xornada, na que van danzar el Grupu Folclóricu Principado. Pero ensin duda la estrella de la Nueche de Llugones va ser el músicu escoces Michael McGoldrick, maestru gaiteru y flautista autor de trabayos tan conocíos como ‘Fused’ y ‘Wired’, y miembru de grupos míticos como Lúnasa y Capercaillie. La fiesta va rematar cola actuación de La Bandina, Corquieu y Skama la Rede, estremaos y valiosos representantes de la música asturiana d’anguaño. 11 de xunu, 2006 0 FacebookTwitterPinterestEmail
Música Dixebra y Llan de Cubel nos festivales de Magosta Castañeda y Ortigueira 2006 by asturnet 11 de xunu, 2006 Los míticos festivales de Magosta Castañeda, en Cantabria, y Ortigueira, en Galicia, celebren una nueva edición cola fin d’amosase más mestizos y revisionistes que nunca y nesa música internacional de fusión nun pueden faltar bandes asturianes d’estremaos gustos y estilos, representantes de la música que se ta faciendo n’Asturies d’anguaño. D’esta manera, el Festival de Castañeda 2006, que se va celebrar ente los díes 30 de xunu y 2 de xunetu, va cuntar cola actuación del grupu avilesín Dixebra; mentes qu’Ortigueira’06 (6-9 de xunetu) tendrá como invitaos a Llan de Cubel. El Festival Magosta Castañeda 2006, que celebra la so XV edición, va cuntar cola participación d’artistes de prestixu internacional como Desorden Público, Bersuit, Tomasito, Tonino Cartonote o Mariem Hassan, ente otros. Nesti multitudinariu alcuentru nel que, xunto a les actuaciones musicales, tamien se ufierten actividaes complementaries como esposiciones, nueves propuestes esceniques, talleres creativos, proyecciones de cine y documentales, mercaos artesanales y comerciu xustu, fórmase una pequeña aldea global nel que conviven diferenten cultures, fusionándose al ritmu de la música. Pa la nueva edición de Castañeda 2006 tamien tienen confirmada la so participación grupos como Lamatumbá, Cronometrobudú, Xochimilca, Fresh, Mapache Hudalu y los asturianos Dixebra, que zarrarán los conciertos con una actuación na nueche del día 2 de xunetu. Pela so parte, el Festival Ortigueira’06 tamien apuesta pol mestizaxe musical y la revisión de los clásicos del folk. Ente los díes 6 y 9 de xunetu, van pasar pelos escenarios del certame grupos folclóricos como Lous Tchacayres, Dominic graham school of irish dance y Nova Galega de Danza; asina como espectáculos especiales como’l dedicáu al folk-fusión, encargáu de remembrar el centenariu d’Estrella de Gailicia, que va correr a cargu d’Escola de Gaitas de Ortigueira, el conocíu músicu Xose Manuel Budiño, Leilía y Uxía, que van collaborar con artistes invitaos como son Nova Galega de Danza, Jerry González, Jose Reinoso, Niño Josele, Concha Buika, Hip hop Roots y La Negra. El sábadu día 8 de xunetu, la nueche musical va xuntar nos escenarios a Bagad Beuzeg, Original Kokani Orkestar, Solas, Xochimilca & amigos y la banda asturiana Llan de Cubel. Ortigueira’06 va pesllar el domingu 9 de xunetu coles actuaciones de Berrogüetto, Four men and a dog, Session A9 y Gwendal. 11 de xunu, 2006 0 FacebookTwitterPinterestEmail
Música Asturies va ser la protagonista del I Festival de música folk de Torrejón by asturnet 8 de xunu, 2006 El Teatru Municipal Jose María Rodero de Torrejón d’Ardoz (Madrid) va ciarrar esta fin de selmana la so temporada col primer Festival Folk nel qu’Asturies ye l’autentica protagonista. El certame, que busca recuperar les formes populares de música y danza, asina como dar a conocer propuestes de los artistes y músicos contemporáneos en cuantes a la so innovación y modernización del folclore español, va tener como pieslle la presentación d’ “Étnico ma non troppo” d’Hevia. Na mañana del sábadu, el grupu de baille L’Alborá del Centru Asturianu de Madrid va dar pasu a l’actuación del compositor y cantautor Toli Morilla. Mentes que’l grupu Corquieu va ser l’encargáu de completar la ufierta musical de la primer nueche del Festival de música folk de Torrejón. El domingo día 11 de xunu va ser el gaiteru de La Villa, Jose Ángel Hevia’l que ciarre’l certame presentando’l so últimu trabayu discográficu, “Étnico ma non troppo”. 8 de xunu, 2006 0 FacebookTwitterPinterestEmail
Música Jerónimo Granda presenta en Xixón el discu “15×4=60” by asturnet 8 de xunu, 2006 El cantautor, humorista y poeta Jerónima Granda presenta mañana nel Teatru Xovellanos de Xixón, a partir de les ocho y media la tarde, el so últimu trabayu que recueye’l trabayu de los últimos diez años del artista baxo’l títulu de “15×4=60”. Nesti nuevu repertoriu de Granda puen alcontrase dende mezcles cola música ellectrónica, les vaqueiraes, canciones acústiques y música orquestal. Esti nuevu trabayu discográficu de Granda lleva los arreglos de cinco de les canciones per parte de Lozano, asina como l’acompañamientu de los músicos Moises Arnaiz y Sofía Miguelez. Los dibuxos de la caráctula del discu, consideraos “tou un luxu” pol artista, corrieron a cargu del pintor Jaime Herrero. 8 de xunu, 2006 0 FacebookTwitterPinterestEmail
Música El Pueblu d’Asturies recupera en dos llibros los cantares de L.lena y los repertorios de los Quirotelvos by asturnet 7 de xunu, 2006 La conceyala xixonesa d’Educación y del Pueblu d’Asturies, Carmen Rúa, presentó ayeri la espublización de los llibros ‘¿Xa Chegan os Quirotelvos!’, de Xose Miguel Suárez Fernández, y ‘Música de tradición oral en el concejo de Lena’, de María del Carmen Prieto González, nel que se recueyen dos estudios de campu sobre los cantares y melodíes tradicionales asturianes que, según Rúa, “olvidalos sedría una perdiga mui seria pa la nuestra tradición y el nuestru pueblu”. María del Carmen Prieto, autora del trabayu sobre L.lena, fixo un estensu trabayu de campu a base d’entrevistes, pal que se documentó con más d’un millar de canciones, anque nel llibru sólo se recueyan doscientes. El llibru, nel que se fai análisis y trescripción lliteral de les canciones, va acompáu por DVD coles voces de los propios interpretes. El llibru de Xose Miguel Suárez, ‘¿Xa Chen os Quirotelvos! Gaiteros, cuartetos y outros músicos populares nel estremo occidental d’Asturias’ recupera les dances y repertorios de los quirotelvos, unes bandes que diben pelos pueblos del occidente amenizando les fiestes populares. 7 de xunu, 2006 0 FacebookTwitterPinterestEmail