Sociedá El plenu de Carreño refuga l’aprobación de les Ordenances Municipales d’Oficialidá by asturnet 26 de febreru, 2007 El plenu del conceyu de Carreño refugó’l pasáu vienres l’aprobación de les Ordenances Municipales d’Oficialidá presentaes pola organización nacionalista Andecha Astur. Na primer votación PSOE y PP axuntaron los sos 8 votos en contra de l’aprobación contra los 8 votos d’UICA, Andecha Astur y Izquierda Xunida, mientres el conceyal d’URAS s’abstenía, forciando una segunda votación na qu’el votu de calidá del alcalde inclinó la decisión munipal hacia la negativa a l’aprobación del documentu. 26 de febreru, 2007 0 FacebookTwitterPinterestEmail
Sociedá Areces siéntese arguyosu de la voluntariedá educativa del asturianu by asturnet 26 de febreru, 2007 foto1>Vicente Álvarez Areces diz que “crear una llingua cooficial nun tuvo nunca nel programa de los socialistes y creo que vaya tar”. El presidente asturianu faló sobre la llingua nuna entrevista publicada pol diariu El Comercio. Areces considera qu’el PSOE ye’l “primeru que defendió’l bable”, basándose en que la entrada del idioma nel sistema educativu foi durante’l gobiernu socialista. Na entrevista’l presidente del gobiernu asturianu afitóse na so posición de refugar la oficialidá de la llingua asturiana. A la pregunta d’El Comercio sobre la importacia que va dar IX a la oficialidá, de cara a una repetición del alcuerdu de gobiernu, Álvarez Areces evitó entrar en declaraciones centrándose na voluntariedá del aprendizaxe del asturianu de la que dixo que sentíense “arguyosos”. 26 de febreru, 2007 0 FacebookTwitterPinterestEmail
Sociedá Ovidio Sánchez diz que l’asturianu nun ye competitivu nel mundu globalizáu by asturnet 26 de febreru, 2007 El candidatu del Partíu Popular a la presidencia d’Asturies, Ovidio Sánchez, dixo a Canal 10 que “la llingua nun ye competitiva nel mundu globalizáu” durante una entrevista a esta canal televisiva . Sánchez remarcó la so voluntá de que’l marcu llegal del idioma continue como ta anguaño. Na entrevista’l llider popular abrió puertes a un posible pactu de gobiernu con Unión Asturianista. Sánchez defendió un modelu educativu nel que se crearen centros billingües castellano-inglés. Pal presidente del PP n’Asturies el marcu actual ye’l que se tien que desenvolver y nun habría porqué lu cambiar. Ovidio Sánchez foi un de los primeros políticos asturianos en reclamar un Estatutu de máximos pal país; esta situación foi variando radicalmente nel tiempu hasta llegar a les sos posiciones actuales nes que rechaza pidir pal país los máximos niveles d’autogobiernu. 26 de febreru, 2007 0 FacebookTwitterPinterestEmail
Sociedá MIAS denuncia la “desasturianización” del Antroxu Uvieín by asturnet 26 de febreru, 2007 La organización xuvenil vinculada a Izquierda Asturiana emitió un comunicáu nel que denuncia la “desasturianización” de la fiesta del Antroxu d’Uviéu. MIAS criticó l’ausencia d’elementos propios de la cultura asturiana nos actos de cellebración d’estes fiestes. La organización xuvenil considera que se tán dando pasos hacia un “carnaval al estilu tinerfeñu o gaditanu” dexando de llau los elementos asturianos. La nula presencia del asturianu nos programes de festexos, la realización d'”esperpentos” como la cellebración d’una Queimada gallega o l’actuación del grupu arxentín Ráfaga “dexando de llau la promoción de les tradiciones culturales propies como los frixuelos o la música del país” Dende la organización MIAS reclamen de los responsables de festexos “un mínimu de respetu y apreciu pola bayura cultural propia d’Asturies pa evitar la so desapaición”. La organización xuvenil criticó tamién la promoción de la Zarzuela madrileña que se ta desenvolviendo n’Uviéu mientres que nun hai “esmolición por defender les tradiciones milenaries de los les asturianes y asturianos” Mocedá d’Izquierda Asturiana 26 de febreru, 2007 0 FacebookTwitterPinterestEmail
Sociedá Izquierda Xunida y Partíu Popular apoyen la redacción d’una Llei de la Sidra by asturnet 24 de febreru, 2007 La norma ta solicitada pol colectivu de llagareros y tendría como fin regular la producción y consumu de la bebida asturiana. IX y PP quieren axuntar na mesma les diferentes regularizaciones esistentes sobre la sidra. Dende la FSA-PSOE contestóse que primero se tien de desenvolver una normativa estatal sobre l’alcohol. Dende Izquierda Xunida s’afala a la redacción d’un Plan Integral qu’axunte, y coordine, les diferentes aiciones que se vienen desenvolviendo sobre la sidra poles diferentes alministraciones. Jesús Iglesias esplicó qu’el vino tien medíes similares que supusieron una dinamización del sector. Y ye que la sidra ye actualemnte’l tercer subsector de l’agricultura asturiana, por detrás de los subsectores llacteu y cárnicu, amás de representar un bon porcentaxe de les ventes del sector hosteleru del país. El representante del Partíu Popular nel área rural na Xunta Xeneral Luís Pelaez considera que la llei propuesta necesita del consensu de les fuerces polítiques pa entamar la so redacción que nun traería problemes por ser “parte d’Asturies”. Dende la FSA-PSOE apúntase a esperar a qu’una llei estatal regule les bebides alcohóliques pa depués entamar la redacción específica pa una llei de la sidra.. Los tres grupos parlamentarios, PSOE, PP, IX, aprobaron esti mes una proposición non de llei na que s’instaba al Gobiernu asturianu a posicionase a favor de que la sidra reciba un tratamientu específicu. 24 de febreru, 2007 0 FacebookTwitterPinterestEmail
Sociedá David Rivas arrenuncia a encabezar la llista d’Andecha nes elecciones de mayu by asturnet 23 de febreru, 2007 Nuna sentida carta a la militancia d’Andecha Astur, unviada esti xueves 22 de febreru al Secretariu Xeneral del partíu nacionalista asturianu, Germán Abad, el que vien siendo candidatu dende va años, David Rivas, arrenuncia a encabezar la candidatura, faciendo entá más grave la crisis d’Andecha. Sigún diz David Rivas, nesa carta a la militancia, “dempués de da-y vueltes a la situación pela que tamos pasando n’Andecha Astur y de falar con dellos collacios y delles collacies, comunícovos la mio decisión d’arrenunciar a encabezar la llista de la organización nes prósimes elecciones de mayu, pa lo que fora elixíu nel Conceyu Nacional entamáu n’Uviéu y fináu en Candás hai yá cuasi un añu”. La carta, reproducímosla darréu na so totalidá: 2Nun voi calentavos la cabeza con argumentaciones ideolóxiques nin recurriendo a filosofíes polítiques porque nun ye’l casu. Si de daqué andamos sobraos ye d’ideoloxización estéril, al empar qu’andamos faltos de cintura estratéxica y d’una mínima sabiduría pa ponemos nos zapatos del otru. La mio decisión nun ye frutu d’un discursu teóricu, sinón de daqué tan cenciello como que ye imposible siguir asina ensin perder la racionalidá. Nel conceyu l’últimu celebráu conforme al reglamentu tamién fora elexía una xunta executiva que ye llexítima n’orixe y n’exerciciu pero a la que dalgunos compañeros negárany esta segunda llexitimidá. Por eso, cuando hai dos o tres meses la convivencia pente nós entamó a facese perdifícile, precisamente por ser elixíu unánimemente como candidatu, creyera que’l mio deber, como representante tamién llexítimu, punxi tola fuercia posible nun intentu de mediación que, a la postre, nun llegó a bon puertu. Pode que dalgunos nun atalantaran la mio posición o, al empar, yo nun supiera desplicala correchamente. Nin pretendí equidistancia como escribí nun documentu internu que ye onde se debe delidiar nestos casos nin muncho menos una ambigüedá calculada del tipu de a ver quien gana pa posicioname al final. Llevamos porque nun tuvi solu nesa xera dos meses o más intentando llegar a les elecciones de mayu careciendo de los menos güelpes posibles. Y trabayóse en silenciu, naguando polo meyor p’Andecha y pa la idega que toos defendemos. Paralelamente l’espectáculu de foros y páxines web ametía entá más problemes pa una salida pactada, una tregua, si queréis llamalo asina, na que yo, pola llexitimidá que’l vuesu votu unánime me diera en Candás, podía facer un serviciu importante. Nun fora posible. Una bona parte de la organización ya especialmente dellos siñificaos militantes prefirieran el conflictu. Ye evidente qu’aquel consensu del Conceyu Nacional tá rotu y que, d’esta forma, la unanimidá d’entós queda tremendamente relativizao, por más que naide plantegó polo menos onde tien que plantegase un cambéu na candidatura. Non obstante, a los problemes surdíos d’esta rotura hai qu’ameter que’l fechu de tener decidía la candidatura a un nivel tan altu como ye un conceyu provocaba situaciones un tanto chusques nes negociaciones que se pudieren caltener. Total, que por hache o por be, la mio innegable llexitimidá d’orixe quedaba amenorgada a midía que s’exercía. Y, como colofón, de poco sirvieran los mios intentos y, repito, tamién d’otres persones p’algamar una mínima alcordada pente nosotros. Llegué a plantegar nun presentame a les elecciones y facer una llista de compromisu pa centramos namái que nes municipales, onde los problemes internos son prácticamente inesistentes. Nada fora posible. Nun sé que pasará andaos unos meses. Los argumentos llegales y reglamentarios escápenseme porque, la verdá, nunca m’interesaran. Y los argumentos políticos tampoco nun me valen porque tán basaos, a lo menos la mayoría, en xuicios d’intenciones. Ya yo hai yá munchu tiempu que dexé de moveme por presunciones, por más qu’haiga vegaes que tengan una basa material más o menos defendible. De toles formes, pase lo que pase, queden les sigles ¡probes sigles! onde queden y permanezan n’activo unos, otros o los de más allá dicir que n’Andecha hai dos llinies ye simplono a maza porque si nun hai cuatro o cinco habrá nueve o diez‐, lo que sí ye claro ye que tendremos que transitar per otres víes. Esi cambéu, que se va dar necesariamente, aconseya camudar tamién les cares y los perfiles de los que representaron o representamos estratexes anteriores. Yo siempres pensé qu’estes elecciones o, como muncho, les europees del 2010, sedríen les últimes pa min. Siguiendo un símil fubolísticu hai de mover bancu y tirar de cantera. El casu ye que la evolución de les circunstancies retírenme un poco enantes. Nada grave, nada que nun tenga igua. Namái me queda agradecevos la confianza que siempres sopelexasteis haza mi ya espero que nun la traicionara munches vegaes; pero, si lo fixe, tenei la seguridá que nun fora a posta. Un saludu caldial. ¡Puxa Andecha Astur! ¡Puxa Asturies soberana! ” Carta de David Rivas a la militancia d’Andecha Astur 23 de febreru, 2007 0 FacebookTwitterPinterestEmail
Sociedá La FSA adelanta la so negativa a referendar el futuru Estatu d’Asturies “por nun ser necesario constitucionalmente” by asturnet 23 de febreru, 2007 El secretartiu d’organización de la FSA, Jesús Gutiérrez, anunció la voluntá del so partíu de non someter a un referéndum la prósima reforma del Estatutu d’Autonomía. Gutiérrez dixo qu’el referéndum “nun ye necesario constitucionalmete y nun tien pies nin cabeza”, en contestación al lider de los populares asturianos Ovidio Sánchez. Pal secretariu d’organización de la FSA-PSOE un referéndum sobre l’Estatutu “confundiría a los ciudadanos” y que “nada impide qu’Asturies tenga un Estatutu al mesmu nivel que les demás comunidaes”. Ovidio Sánchez solicitó qu’el futuru referendum d’autonomía se someta a un referéndum popular pa la so aprobación, díes depués de la victoria del sí al nuevu estatutu andaluz, nuna xornada na que l’abstención fue la opción escoyida pola mayoría de los y les andaluces. 23 de febreru, 2007 0 FacebookTwitterPinterestEmail
Cooperación El CMU reclama una rede wifi nos Centros Sociales d’Uviéu by asturnet 22 de febreru, 2007 La presidenta del Conseyu de la Mocedá d’Uviéu, Lucía Menéndez, aconceyó ayeri col conceyal de mocedá uvieín, Gerardo Antuña, cola fin de tresmiti-y les propuestes de la organización xuvenil en materia d’ociu y mocedá. Ente les propuestes del CMU figura la de la instalación d’una rede wifi nos centros municipales, rede que sólo ta instalada nel cibercentro de La Lila. Otres de les propuestes qu’el Conseyu de la Mocedá treslladó al Conceyal del aria fue la d’optimizar los recursos publicitarios de la conceyalía na promoción de les actividaes culturales. Ente los compromisos d’Antuña figura la construcción d’un nuevu Centru Xuvenil nel barriu de La Corredoria, actualmente principal zona d’espansión de la ciudá, y que vien siendo una de les principales vindicaciones de los movimientos xuvenil y vecinal uvieín, y que yá fuera comprometíu hai cuatro años. Les propuestes del Conseyu de la Mocedá d’Uviéu surden de les Meses de Trabayu que les asociaciones compusieron a lo llargo de 2006. Conseyu de la Mocedá d’Uviéu 22 de febreru, 2007 0 FacebookTwitterPinterestEmail
Sociedá El primer cursu de Xíriga organizáu en Llanes cuenta con 20 alumnos by asturnet 22 de febreru, 2007 El prósimu llunes, 26 de febreru, finaliza na Casa de Cultura de Llanes el taller de Xíriga, la llingua de los teyeros llaniscos, que foi parte del programa de cursos municipales del conceyu de Llanes. Nel cursu, de calter divulgativu, participaron alumnos de delles parte del conceyu y d’ente 19 y 77 años d’edá. El taller plantegóse al rodiu d’un de los aspectos más interesantes de la historia de Llanes, nel so tarrén etnográficu, y vertebróse nuna serie de meses redondes nes que s’abordaron los aspectos llingüísticos y sociolóxicos de la Xíriga. Dalgunos de los antiguos teyeros y tamargos participaron n’esti cursu sobre un de los llinguaxes de comunicación gremiales qu’entovía se sienten en dalgunos llugares del conceyu llaniscu. 22 de febreru, 2007 0 FacebookTwitterPinterestEmail
Sociedá Andecha Astur de Carreño presenta nel plenu les ordenances d’usu del asturianu by asturnet 22 de febreru, 2007 El conceyal nacionalista Santiago Artime va presentar al plenu de la Casa Conceyu de Carreño la propuesta d’aprobación d’unes Ordenances Municipales que regulen l’usu del asturianu nes alministración municipal. La propuesta tramitaráse como d’urxencia ente la negativa del grupu mayoritariu, PSOE, a incluyir la propuesta nel orde del día. Artime presentó unes propuestes d’Ordenances Municipales del Usu del Asturianu hai un añu algamando’l respaldu de la Unión Independiente de Carreño, y el rechazu de PSOE y PP mientres qu’Izquierda Xunida y URAS abstuviéronse na votación. Les Ordenances Municipales del Usu del Asturianu establecen los derechos de los ciudadanos del conceyu a poder dirixise a l’alministración municipal n’asturianu, asina como faen la regulación de los diferentes éntes muncipales empobinaos a la normalización social del usu del asturianu. 22 de febreru, 2007 0 FacebookTwitterPinterestEmail