Música Dixebra esgota la primer edición del so discu “Ensin novedá” by asturnet 17 d'agostu, 2005 Dixebra tien esgotada la primer edición del so discu “Ensin novedá”(L’Aguañaz) alpenes dos meses después de ponelu a la venta. L’últimu trabayu grabáu de los avilesinos foi un de los cedés más demandaos nes tiendes de música y el cuartu nel hit parade de los más vendíos en Fnac. Mientres sigue la so xira braniega, la banda de Xune refierve nel que va ser el so prósimu discu, un trabayu en directu. La fidelidá de los fans de Dixebra y la so abatanada xira de veranu per toa Asturies son en parte curiosa los responsables de que la primer edición de “Ensin novedá” s’esgotara. Anguaño el sellu editor del grupu L’Aguañaz trabaya na publicación d’una segunda tirada de discos pa fartucar la demanda del últimu trabayu de la banda de Xune. El grupu cabezaleru del rock asturianu anunció na presentación en xunu del so últimu discu que’l prósimu diba ser un recopilatoriu grabáu en directu, un proyectu que Dixebra cuantayá allampiaba facer y que los sos numberosos fans ensin dulda van agradece-yos. 17 d'agostu, 2005 0 FacebookTwitterPinterestEmail
Patrimoniu Artistes y personaxes públicos siguen a sofitar la candidatura de Cuna y Cenera como Pueblu Exemplar by asturnet 17 d'agostu, 2005 Los vecinos de Cuna y Cenera siguen recibiendo sofitos del mundu del arte y la cultura asturianos. L’últimu emburrión a la candidatura del vai mierense a Pueblu Exemplar d’Asturies diéronlu los actores Máxi Rodríguez y Pedro Civera, y el director de cine José Antonio Quirós nuna visita al llugar de Vistrimir organizada polos promotores de la iniciativa. El Conceyu de Mieres, xunto a les asociaciones de Vecinos del Vai de Cuna y Cenera, hosteleros y la Unión de Comerciantes del Caudal, intensifiquen estos díes la promoción de la candidatura local al premiu Pueblu Exemplar d’Asturias 2005 con varios actos culturales y sociales. L’últimu actu tuvo al cine y al teatro, y al prropiu vai como protagonistes. Los actores Máxi Rodríguez, Pedro Civera protagonistes de la película “Pídele cuentas al rey” -rodada en parte nesa zona- y el director del filme José Antonio Quirós de la comarca, José Antonio Quirós tuvieron visitando Vistrimir estos díes, un de los llugares del vai con más escelencies paisaxístiques y naturales. Los actores y el cineasta súmense asina a la llarga llista de sofitos del mundu cultural que vienen apoyando la candidatura, como el cantante Víctor Manuel, los escritores Fulgencio Argüelles, Xuan Bello, Ana Vanessa Gutiérrez, Monstserrat Garnacho, el músicu Michael Lee Wolfe o xente del mundu de la industria cinematográfica como Luis San Narciso (Mierense director del casting de Mar adentro, Los Serrano…) y María Luisa Merlo. En Vistrimir, arropaos polos vecinos y una representación de conceyales del Ayuntamientu de Mieres, Maxi Rodríguez, Pedro Civera y José Antonio Quirós desficiéronse en halagos hacia el Vai na so visita. Los vecinos de Cuna y Cenera tan repartiendo al empar 20.000 postales con paisaxes del vai pa espardir la promoción y desenvuelven tamién una campaña publicitaria nos autobuses municipales de Xixón, Uviéu y Mieres, la participación na Feria Internacional de Muestras de Xixón con un día especial y la recepción de más de 12.000 firmes, que faen de la candidatura la que más calor popular ta recibido de les qu’opten esti añu a ser Pueblu Exemplar de Asturies. 17 d'agostu, 2005 0 FacebookTwitterPinterestEmail
Música Llugo vivel rock by asturnet 16 d'agostu, 2005 Dientro del programa les fiestes de Santa María de Llugo Llanera, l’asociación de cultura y festejos ‘Perllugo’ entama un conciertu gratuitu de rock. El ‘Rock in Lugo 05’ trai a Llanera pal llunes 22 d’agostu a Mala Reputación, Jacky Trap, Human, Desakato y Tormento. A les ocho la tarde del día 22 d’agostu entamará’l conciertu del ‘Rock in Lugo 05’. La entrada a esti conciertu ye de baldre y los grupos que van participar nel festival son Mala Reputación, Jacky Trap, Human, Desakato y Tormento. Les fiestes de Llugo Llanera van durar del 19 al 23 d’agostu. El día 20, pela tarde,l’Asociación de Muyeres de Llanera va representar la obra de teatru ‘Funky’. El domingu, a la una, habrá canción asturiana y pela tarde desfilarán grupos folclóricos xunta les tradicionales carroces, tres de les qu’actuarán los cómicos monologuistes de la Paramount Comedy. L’actu estrella del llunes ye l’anunciáu conciertu de rock, pero les fiestes nun van terminar hasta la nueche del martes, con una verbena amenizada poles orquestes Sonora Real y Assia. Asociación Cultural y de Festeyos ‘Perllugo’ 16 d'agostu, 2005 0 FacebookTwitterPinterestEmail
Música VI Festival + o – Celta de Baíña by asturnet 16 d'agostu, 2005 El vienres 26 d’agostu, a les diez de la nueche, entamará el VI Festival + o – Celta de Baíña, con un ampliu repertoriu d’actuaciones, nel que destaquen los históricos Nuberu, La Bandina, La Col.lá Propinde y Anabel Santiago. Con motivu de les fiestes de San Bartolome de Baíña, el día 26 d’agostu tien llugar el VI Festival + o – Celta. La organización del festeyu tien preparáu un conciertu con un ampliu cartel de grupos folk, colos históricos entreguinos de Nuberu, La Bandina, La Col.lá Propinde y Anabel Santiago acompañada pola Asturiana Mining Company. Pa facilitar l’accesu a la fiesta ta previsto qu’esa nueche se pongan autobuses – curuxa especiales dende Mieres. 16 d'agostu, 2005 0 FacebookTwitterPinterestEmail
Música Melendi va grabar un discu acompañáu d’una banda gaites en San Matéu by asturnet 16 d'agostu, 2005 Melendi va aprovechar el so conciertu dientro les fiestes de San Matéu n’Uviéu pa grabar un DVD en directu. L’alcuentru del rumberu carbayón col so públicu va ser el prósimu 20 de setiembre y a la so formación avezada va acompañala una banda de gaites nel que quier ser el conciertu más asturianu de la so xira braniega. Les pistes de San Llázaro son l’escenariu escoyíu polos responsables de programación de Festeyos del Ayuntamientu d’Uviéu pa asitiar l’actuación del rumberu de La Tenderina. Con esta ubicación, los organizadores quieren evitar que se produza un colapsu nos accesos al sitiu del conciertu como sucedió l’añu pasáu n’actuación de Melendi na Plaza la Catedral. La presencia d’una banda de gaites y l’espardimientu masivu de banderines colos colores de l’asturiana van ser el guiñu del uvieín a la so afición local. Melendi vuelve a la so ciudá col últimu discu publicáu: “Que el cielo espere sentao”. El prósimui va ser el CD-DVD que va grabase nel conciertu de San Matéu el 20 de setiembre, l’últimu día de les fiestes carbayones. 16 d'agostu, 2005 0 FacebookTwitterPinterestEmail
Música Corquiéu y les pandereteres de Nerbia nel Tierra Astur de Cualloto by asturnet 15 d'agostu, 2005 El xueves 18 d’agostu, Corquieu actuará na sidrería Tierra Astur de Cualloto a partir de les diez de la nueche. D’esta manera, la sidrería continua col so programa de espiches-conciertu de los xueves, nes que’l día 25 van tocar les pandereteres de Nerbia. Tarañu, Fardaxu, Folixa, Risca l’Alba y Toli Morilla, son dalgunos de los grupos que tienen participao nes espiches que cada xueves entama la sidrería Tierra Astur de Cualloto (xunto l’antigua fábrica l’Águila Negra), onde, amás de disfutar de la bayura de la xinta y la sidra d’Asturies, puede escuchase lo más granao del folk y la música tradicional del país. La banda de Ribesella Corquieu y les pandereteres de Nerbia van ser los siguientes en facelo, los díes 18 y 25 d’agostu. 15 d'agostu, 2005 0 FacebookTwitterPinterestEmail
Música Venticinco años de música y danza nel Festival Internacional avilesín by asturnet 15 d'agostu, 2005 ‘Sabugo, ¡tente firme!’ organiza’l XXV Festival Internacional de Música y Danza popular qu’entama mañana cola recepción de los grupos participantes nel ayuntamientu avilesín. Nel certame d’esti añu van participar ocho grupos de los cinco continentes a lo llargo de tola selmana. El primer actu que se va facer mañana peles cais d’Aviles va ser un desfile, anque, oficialmente, el certame arranca a les siete y cuartu la tarde na Plaza Álvarez Acebal cola Misa de les Naciones. Na selmana que dura’l Festival de Música y Danza van poder vese muestres del folclore africanu, representáu por ‘Zeke Ti Beafrica’; asiáticu, col conxuntu folclóricu nacional ‘Leymer’ d’Irán; d’Oceanía, a travies de ‘Vanuato’, de les isles del mesmu nome; americanu, col brasileñu ‘Ballet de Amazonia’ y ‘Mi linda Costa Rica’. Y, como nun podía ser mesnos, con representantes europeos, col conxuntu folclóricu academicu de la Republica de Chuvachia, ‘Radost’ de Bielorrusia, y los propios ‘Sabugo, ¡tente firme!’, organizadores del alcuentru. 15 d'agostu, 2005 0 FacebookTwitterPinterestEmail
Música Entamal IX Festival Intercélticu del Occidente by asturnet 15 d'agostu, 2005 El Festival Intercelticu del Occidente, entama mañana en Tapia con un programa repletu d’actos. El director xeneral de Promoción Cultural y Política Llingüística, Carlos Madera, va tar presente mañana miercoles, 17 d’agostu, na presentación d’esti festival, que se va durar hasta’l 22 d’agostu. L’eventu empieza coles actuaciones de «Bagad Landerneau», de Gran Bretaña; los asturianos «Camín de Fierru»; «Williamwood Pipe Band», d’Escocia; «Corisco», de Galicia, y el grupu alemán «Volkstanzgruppe». Amás, mañana va proyectase un vídeu sobre hórrios y paneres y ta prevista una conferencia sobre «bandurries» asturianes, que va presentar el profesor de la Escuela de Música del Ayuntamientu de Tapia Jose Ángel Llanera. De nueche va cellebrase la primera verbena tradicional asturiana, na que dos bandes van interpretar música ambientada nel sieglu XIX. El xueves va poder disfrutase de diversos talleres, como’l de dances bretonas, el taller d’harpa y la esposición «Rabeles en España». Amás de la conferencia sobre «Folclore Galicia siglo XXI». La nueche tará llena de folk, coles actuaciones de «Save The Dragons», d’Escocia, y «Folixa», de l’Arxentina. El fin de selmana entama’l viernes con una conferencia sobre la gaita n’Alemania y otra sobre la flauta dientro del mundu del folk, con Xurto Santote, amás d’un cursu de percusión de Manuel Durán. De nueche la música cuerre a cargu de los asturianos «Rum» y los gallegos «Xistra de Coruxo». Mentes qu’l sábadu habrá un taller de danza gallega, un taller de gaita escocesa y un pasacais de les bandes del festival. Esti día tendrá llugar la «nueche máxica», con cuatrocientos artistes y la representación del grupu de teatru «Margen». El domingu toca un gran conciertu de música folck nel que van participar «Les Batinses» de Canadá, los asturianos «Llangres» y los escoceses «Breizh Le Cam». El programa termina’l llunes con un cursu d’averamientu a la gaita asturiana. Nel actu de presentación de mañana van tar presentes tamien l’alcalde de Tapia, Gervasio Acevedo; el director del FID´O, Martín Fernández; el director del centru territorial de TVE n’Asturies, Pedro Alberto Marcos, y un representante de Cajastur, Sociedá Xeneral d’Autores y el diariu La Nueva España. Esti festival, organizáu pola Banda Gaites Marino Tapiega, vien cellebrándose dende hai nueve años con gran esitu, convirtiendose asina nun referente de la música celta. 15 d'agostu, 2005 0 FacebookTwitterPinterestEmail
Patrimoniu El Principáu presental proyectu de la Sienda del Parque Les Fuentes by asturnet 12 d'agostu, 2005 El Director Xeneral de Recursos Naturales y Protección Ambiental, de la Conseyería de Mediu Ambiente, Ordenación del Territoriu y Infraestructures, Cristino Ruano, presentó pela mañana na Feria Muestres el proyectu de costrucción de la Sienda de Gran Recorríu (GR 203) del Parque Natural de les Fuentes del Narcea, Degaña e Ibias. Nel actu tuvieron tamien presentes l’Alcalde de Cangas del Narcea, Jose Manuel Cuervo, l’Alcalde de Degaña, Jaime Gareth, y l’Alcaldesa d’Ibias, Nelida Barredo. Esta sienda, con un trazáu superior a los 200 kilómetros, constitúi un recorríu señalizáu pa canalizar les actividaes de marcha y escursionismu, que va tar habilitada pa poder facela en bicicleta o con caballeríes. El trazáu pasa principalmente per caleyes y siendas yá esistentes, dalgunos de carácter históricu y cultural, polo que se van conservar y recuperar diferentes caminos qu’en muchos tramos taben abandonaos. Nel proyectu prevense actuaciones como rozar caminos, facer tramos en piedra, restaurar muries, barandilles de maera, pasareles de maera, pontes y escaleres. El Gran Recorríu del Parque de les Fuentes tien un diseñu circular trazáu polos tres municipios que formen el Parque, dividíu n’once etapes, más otros cinco itinerarios dientro d’esti círculu y a mou de diferentes “radios” que permite facer distintos diseños de recorríu y de díes de duración. Les once etapes d’esti “círculu” son: Corias – Eirrondu; Eirrondu – Monasteriu de Coto; Monasteriu de Coto – Seroiro; Seroiro – San Antolín; San Antolín – Alguerdo; Alguerdo – Astierna; Astierna – Zarreu; Zarreu– L.leitariegos; L.leitariegos – Xinestosu; Xinestosu – Acebo; Acebo – Corias. Mentes que les cinco etapes internes a esti recorríu circular son: Abanceña – Agüera’l Coutu; Agüera’l Coutu– El Mual; El Mual – Larón; Xedre – Tresmonte; Tresmonte – Cangas. El presupuestu total ye de 390.194,15 € y el plazu d’execución de 12 meses. Esti proyectu ta cofinanciáu pola Conseyería de Mediu Ambiente, Ordenación del Territoriu y Infraestructures con una aportación de 230.194,15 € y los Ayuntamientos que formen el Parque a travies del programa operativu PRODER con una aportación de 160.000 €. 12 d'agostu, 2005 0 FacebookTwitterPinterestEmail
Comunicación Descártase dafechu la emisión de la televisión autonómica prevista pal 8 de setiembre by asturnet 11 d'agostu, 2005 El deséu espresáu de manera reiterada pol presidente del Principáu Vicente Álvarez Areces pa que la primera emisión de la futura televisión autonómica s’entamare el prósimu 8 de setiembre nun va poder materializase. Asina lo aseguraron fontes del Ente Públicu que señalen la primavera de 2006 como fecha posible pal empiezu de les tresmisiones. La complexidá del procesu d’antenización pa consiguir una recepción bona de la señal de la cadena de radiotelevisión ye la causa pola que les primeres emisiones nun se van poder captar hasta diento unos meses. El director de la canal autonómica, José Antonio Pérez Ornia, apuntara na so última comparecencia na Xunta Xeneral a finales d’esti añu o empiezos del prósimu pa la puesta en funcionamientu de la televisión y eses paecen les feches reales. La precipitación a la hora d’entamar les tresmisiones fuera una de les crítiques qu’Izquierda Xunida-Bloque teslladara a los sos socios del gobiernu presidíu por Álvarez Areces xunta’l métodu escoyíu pa convocar les places destinaes a cubrir la plantiella del Ente de Comunicación. Les dificultaes técniques de la puesta en marcha de la radiotelevisión asturiana vienen agora a asitiar nel tiempu l’empiezu de les emisiones. 11 d'agostu, 2005 0 FacebookTwitterPinterestEmail