Sociedá IAS denuncia la escasa presencia del asturiano na Gaceta de Xixón by asturnet 13 de marzu, 2006 L’agrupación xixonesa d’Izquierda Asturiana (IAS) denuncia nun comunicáu la escasa presencia de la nuestra llingua nel boletín d’información municipal del Ayuntamientu “La Gaceta” a la que califica de ridícula. Los nacionalistes ponen como exemplu l’últimu númberu d’esta publicación que se distribúi de baldre en tolos llares de Xixón y que namás cuenta nesta entrega con una de les cuarenta y tres páxines n’asturiano. Según denuncia el portavoz local d’IAS, Pablo Rodríguez, “nel el númberu de marzu de la Gaceta, namás una de les sos 43 páxines tá n’ asturiano, representando un porcentaxe ridículu nel total del conteníu d’esta revista municipal”. Pal representante de Izquierda Asturiana la situación nun ye escepcional nel momentu actual ya que según afirmó: “dende fai unos meses vien apreciándose una paulatina reducción de la presencia del asturiano nesta publicación, que si ya enantes yera escasa, agora ye absolutamente ridícula”, una amuesa pa Rodríguez “del nulu interés que tien el gobiernu municipal en promocionar el nuestru idioma, que si en formatu impresu la presencia es más que mínima, nos espacios de radio y televisivos ye inesistente”, diz Pablo Rodríguez. El portavoz nacionalista califica la situación de “sangrante, ya que ye un mediu costeáu por tolos ciudadanos de Xixón, que según amuesa la reciente encuesta sociollingüística elaborada pol profesor Llera Ramo demanden una presencia digna y una mayor promoción pal asturiano de la que actualmente esistente, si ye que esiste dalguna”. Rodríguez ve en fechos como esti “un claru exemplo de la política que respective a la nuestra llingua lleva a cabu el gobiernu municipal del PSOE-IU-BA, nun faciendo el mas mínimu esfuerzu na normalización del asturiano” y añade que “si del PSOE mui poco podemos esperar a favor del asturiano, d’IU-BA, auténticos títeres de los socialistes, polo que vemos tampoco”. 13 de marzu, 2006 0 FacebookTwitterPinterestEmail
Sociedá Representantes vecinales de Xixón piden que se conserven los topónimos castellanizaos xunto los asturianos by asturnet 13 de marzu, 2006 Les ediciones locales de los dos principales diarios asturianos recueyen estos díes estremaes opiniones de representantes vecinales de barrios y parroquies de Xixón alrodiu del nomenclátor oficial aprebáu el viernes 10 nel plenu municipal. La mayor parte de los testimonios publicaos piden que se conserve la denomación castellanizada xunto la tradicional. Representantes vecinales y vecinos de los distintos llugares del conceyu xixonés opinen na prensa local alrodiu de la oficialización de los nomes fecha nel espediente de la Xunta de Toponimia del Principáu. Les posiciones van dende la defensa arguyosa del topónimu como ye’l casu de l’Asociación de Vecinos de Cimavilla hasta los que s’oponen radicalmente como nel casu de L’Arena. Sicasí, ente partidarios y detractores de la oficialización de los nuevos topónimos, la voz más común ye la que pide’l caltenimientu de la denomación billingüe asturiano -castellano cola escepción de los nomes de llugar menores. 13 de marzu, 2006 0 FacebookTwitterPinterestEmail
Sociedá La Escuela de Maxisteriu acueye’l XI Alcuentru Internacional de Llingua Minoritaria y Educación by asturnet 12 de marzu, 2006 Los recursos y estratexes didáutiques van ser la tema del programa del XI Alcuentru Internacional de Llingua Minoritaria y Educación, que se tien de desendolcar ente’l 29 y el 31 d’esti mes de marzu na Escuela Universitaria de Maxisteriu d’Uviéu. Christian Puren (de la Université Jean Monnet de Saint-Etienne) entamará l’Alcuentru’l miércoles 29 con una conferencia sobre la “Enseñanza de les llingües: dende l’enfoque comunicativu hasta la perspeutiva aicional”. Esi día tamién intervendrán nel alcuentru’l profesor de llingua asturiana Xulio Berros y la profesora de la Universidá de Barcelona Celia Romea. El xueves 30 ta previsto que participen nel Alcuentru la collaboradora de Mercator Education Alie Van Der Schaff, Loreto Díaz, de la Universidá d’Uviéu y Joaquím Dolz de la de Genève. Y pa finar los alcuentros tienen d’intervenir el vienres 31 Xandro Martino, Ruth González y Fernando Padilla. El programa del alcuéntru enca`´armase entres conferencies y comunicaciones que se desendolquen de 18 a 19 hores, de 19 a 19:30 hores y de 19:30 a 20:30 hores. L’Academia de la LLingua y el CPR d’Uviéu, orgenizadores del Alcuentru, fairán entrega del certificáu d’asistencia a estes xornaes. 12 de marzu, 2006 0 FacebookTwitterPinterestEmail
Comunicación El Principáu encamienta a la Fundación Príncipe a actuar contra Pérez Espinosa by asturnet 11 de marzu, 2006 El gobiernu asturianu salió al pasu de les declaraciones de la conceyal popular uvieína Isabel Pérez Espinosa nes qu’afirmaba que la ubicación del Muséu de los Premios Príncipe d’Asturies n’Avilés yera’l resultáu d’un alcuerdu ente’l director de la FPA, Graciano García y el presidente del Principáu, Vicente Álvarez Areces. El Principáu caltién que la Fundación ye ayena a la negociación pol afayamientu del muséu y anima a esta institución a actuar xudicialmente contra Espinosa. L’executivu autonòmicu al través d’un comunicáu fechu públicu tres l’últimu Conceyu de Gobiernu califica les manifestaciones de la conceyal del PP de “calumnioses ya inaceptables” y recalca que l’alcuerdu algamáu ente l’administración asturiana y l’Ayuntamientu d’Avilés pal afayamientu del proyectu d’Oscar Niemeyer respuende a equipamientos ya contemplaos nel PGOU d’esi conceyu. Unos proyectos que’l Principáu considera decisivos pal futuro d’Aviles y la so comarca, polo que considera “inadmisible que dende l’Ayuntamientu d’Uviéu se quiera cuestionar la llegalidá d’unes decisiones tomaes democráticamente” pola corporación avilesina. Darréu l’executivu autonómicu manifiesta que “la Fundación Príncipe d’Asturiesy les persones que la representen, ye totalmente ayena al alcuerdu tomáu poles citaes administraciones públiques, polo que consideramos totalmente inxurioso atacar al Presidente y al Director de la Fundación, por parte de la citada portavoz”. Pa rematar, el Principáu cuida que los términos empleaos por Isabel Pérez Espinosa “obliguen, en defensa de la honorabilidá d’instituciones y persones afectaes a encamentar a los Servicios Xurídicos l’inicio de les actuaciones pertinentes pa treslladales al ámbitu xudicial”. 11 de marzu, 2006 0 FacebookTwitterPinterestEmail
Sociedá Ramón d’Andrés defende un modelu de cooficialidá propiu p’Asturies by asturnet 10 de marzu, 2006 El responsable de la Oficina de Política Llingüística del Principáu, Ramón d’Andrés, defendió un modelu propiu de cooficialidá p’Asturies nel cursu d’una conferencia que pronunció esti xueves 9 en Xixón na Casa del Pueblo de l’agrupación local del PSOE. D’Andrés punxo como exemplu espardible a tolos conceyos l’espediente toponímicu xixonés aprebáu nel plenu municipal d’esti viernes y apostó por superar prexuicios énte la normalización social de la llingua asturiana. Na so conferencia énte los socialistes de Xixón el responsable de Política Llingüística del gobiernu asturianu afirmó que “nun hai un modelu únicu de oficialidá, sinón que caún respuende a la so propia realidá” y defendió pa la nuestra comunidá una fórmula de validación xurídica “que nun tien por qué ser calcada a la d’otres comunidaes”. Una de les característiques de la cooficialidá n’Asturies había ser pa Ramón d’Andrés la conocencia del asturianu pa tolos ciudadanos y el so inxerimientu en tolos niveles de la enseñanza ensin qu’ello representare un principiu d’obligatoriedá, talu lu contemplen los marcos xurídicos d’otres comunidaes. Respective al papelu de la Televisión del Principáu d’Asturies (TPA) na normalización llingüística, D’Andrés amosóse esperanzáu de que l’asturiano va dir entrando a poco a poco y afirmó que lo importante ye que s’escomience “con bon pie”. L’espediente toponímicu que’l plenu del Ayuntamientu de Xixón aprebaba esti viernes 10 ye pal xefe de la Oficina de Política Llingüística “un modelu a siguir polos otros conceyos”, tanto en cuantes a la so minuciosidá y procuru como al consensu social ufiertáu na so elaboración. Pa Ramón d’Andrés el fechu de qu’esti nomemclátor oficial tenga’l vistu bonu d’un equipu de gobiernu municipal como’l de Xixón ye tamién una amuesa de que les coses pueden facese namás con entamales bien dende un principiu. D’Andrés tamién espresó el so enfotu en que la sociedá asturiana sepa superar situaciones pasaes y trabayar activamente na normalización de la llingua en tolos niveles. 10 de marzu, 2006 0 FacebookTwitterPinterestEmail
Sociedá El Conceyu de Xixón lleva al Plenu el so espediente toponímicu by asturnet 9 de marzu, 2006 El Plenu del Ayuntamientu de Xixón va tratar esti viernes 9 l’aprebación del espediente de revisión de la toponimia del conceyu elaboráu pola Xunta Asesora del Principáu. L’informe ye’l resultáu d’un llargu y pormenorizáu trabayu nel que los espertos estudiaron nomes de llugar de tolos núcleos de población menores y mayores, urbanos y rurales. L’espediente xixonés va ser el primeru d’una de les tres ciudaes con más población d’Asturies. La Xunta de Toponimia, organismu multidisciplinar de l’administración asturiana, estudió a lo llargo de meses los topónimos de les venti parroquies rurales de Xixón y de los seis distritos urbanos pa iguar el nomenclátor final al que’l Plenu va dar el so vistu bonu na so sesión d’esti viernes. Va ser la primer vez nel que parroquies importantes como Xove, Valdornón, Ciares o Montiana recuperen oficialmente los sos nomes tradicionales.L’espediente toponímicu del conceyu playu fue ún de los que cuntaron con una participación ciudadana más amplia de tolos que se vienen entamando hasta agora, llegando en munchos casos al debate detalláu ente vecinos y espertos sobre la correción de los topónimos estudiaos. 9 de marzu, 2006 0 FacebookTwitterPinterestEmail
Sociedá La conceyal del PP n’Uviéu Isabel Pérez Espinosa afirma que Graciano García pactó con Areces el muséu d’Avilés by asturnet 9 de marzu, 2006 La conceyal del Partido Popular (PP) d’Uviéu, Isabel Pérez Espinosa, manifestó esti miércoles 8 en declaraciones a diversos medios que l’equipu de gobiernu municipal entiende que’l futuru Muséu de los Premios Príncipe d’Asturies y el centru cultural diseñáu por Oscar Niemeyer pa la ría d’Avilés son proyectos distintos o pueden selo, según la interpretación que da’l Consistoriu carbayón de lo espresao pol Patronatu de la FPA tres la so reunión en Brasil col arquitectu. Pérez Espinosa citó tamién les palabres del presidente Areces calificando’l futuru centru cultural de la ría avilesina como “muncho más que l’equipamientu d’un muséu” y recalcó la idea de que la batalla uvieína por ser la sé del Muséu de los Premios Príncipe “nun ta perdida y puede ganase si los ciudadanos siguen sofitando la campaña del Ayuntamientu”. La edil popular dirixó les sos crítiques al director de la Fundación, el periodista Graciano García, al qu’acusó de pactar col presidente del Principáu l’afayamientu del proyectu de muséu n’Avilés “d’una manera que él tendrá de desplicar alcuando”, dixo Espinosa. L’Ayuntamientu que preside Gabino de Lorenzo lleva recoyíes más de diez mil firmes dende que va unos díes escomenzó la so campaña p’allugar el muséu de la FPA na ciudá del carbayón. Isabel Pérez Espinosa declaró que la recoyida de firmes y la campaña van siguir “hasta que sea oficial que’l muséu queda n’Uviéu”. 9 de marzu, 2006 0 FacebookTwitterPinterestEmail
Comunicación Areces cifra nunos 24 millones d’euros el costu del muséu de Niemeyer by asturnet 7 de marzu, 2006 El presidente del gobiernu asturianu Vicente Álvarez Areces cifró nunos 24 millones d’euros el costu de l’afayamientu del futuru muséu de los Premios Príncipe d’Asturies n’Avilés proyectáu pol arquitectu brasileiru Oscar Niemeyer. El xefe del executivu fizo pública esta estimación dende Río de Janeiro a onde acudió pa firmar col autor del proyectu arquitectónicu l’alcuerdu pol que’l Premiu Príncipe d’Asturies de les Artes cede a la comunidá autónoma la so obra. Pel so llau la conseyera de Comunicación Social y Cultura, Ana Rosa Migoya, espresó’l so enfotu de que la licitación de les obres del muséu na Ría d’Avilés pueda tar fecho pa finales d’esti añu o principios de 2007. Areces manifestó el deséu del so gobiernu de que Nieyemer pueda tar n’Asturies celebrando’l so centenariu coles obres del so proyectu entamaes y afirmó que si eso fuera posible el Principáu organizaría “una gran folixa” pa festeyalo. Nel otru llau de la realidá, l’alcalde d’Uviéu Gabino de Lorenzo publicó esti llunes 6 na prensa diaria asturiana un bandu nel qu’animaba a los ciudadanos carbayones a sumase a a campaña entamada dende l’equipu de gobiernu municipal pa reclamar el muséu de la Fundación Príncipe pa la capital del Principáu. 7 de marzu, 2006 0 FacebookTwitterPinterestEmail
Sociedá Diversos actos conmemoren el Día Internacional de la Muyer by asturnet 7 de marzu, 2006 Diversos actos van conmemorar esti ocho de marzu, Día Internacional de la Muyer. Una concentración n’Uviéu convocada por colectivos feministes, actividaes reivindicatives y lúdiques, xunta les celebraciones institucionales igüen el programa de la xornada na que se remembra la llarga llucha de les muyeres pola so llibertá. La primer organización en celebrar un actu relacionáu col 8 de Marzu fue la formación moza Darréu qu’esti sábadu 4 entamó una concentración cívica en Candás na que se lleó un comunicáu sobre la necesidá de xunir la llucha polos derechos de les muyeres a la llucha polos derechos populares. Esti miércoles 8 va ser la Mocedá d’Izquierda Asturiana (MIAS) la encargada de protagonizar un actu na sala polivalente del Campus del Milán a les 17,00 hores con una conferencia titulada “Rellaciones patriarcales n’estremaos ámbitos sociales”. Al pieslle de la conferencia de MIAS va actuar el grupu de pandereteres Dulcamara, alrodiu de les 19.30. Pel so llau el Conceyu de Xixón aprovecha la celebración del 8 de Marzu p’abrir una cai dedicada a la científica asturiana Margarita Salas y entama, al través de la Fundación Municipal de Cultura, la esposición “Mujeres en la ciencia”, que va poder visitase hasta’l 31 de marzu nel Antigu Institutu de Xixón. 7 de marzu, 2006 0 FacebookTwitterPinterestEmail
Sociedá La Generalitat valenciana promueve la Ciudá de les Llingües pa difundir l’español by asturnet 7 de marzu, 2006 L’anunciu del presidente de la Generalitat de Valencia, Francisco Camps, de crear en Castelló la Ciudá de les Llingües, destinada a convertise nun centru internacional de difusión del español, provoca’l refugue de grupos defensores de la identidá cultural valenciana pa los que’l proyectu del gobiernu autonómicu “distorsiona la realidá llingüística” de la comunidá llevantina. El más activu d’estos colectivos Acció Cultural del País Valenciá calificó de “burla y menospreciu sin precedentes contra la cultura y la llingua propies del País Valencianu”, el proyectu del presidente Camps y considera “inaceptable” la propuesta de la Ciudá de les Llingües. La hestórica asociación cultural manifestó que “mientres la demanda de munchos padres valencianos por llevar a los sos fíos a programes d’enseñanza na nuestra llingua alcuentra dificultaes por escasa, el Gobiernu valencianu pretende dar toles facilidaes a alumnos estranxeros pa deprender español en Castelló”. El presidente de la Generalitat valenciana, el ‘popular’ Francisco Camps aprovechó la última convención nacional del PP pa presentar y promocionar el so proyectu de la Ciudá de les Llingües, una iniciativa que busca, según les sos palabres: “Facer d’España una marca que se conoza nel mundu enteru y del idioma español una fonte d’ingresos pal nuestru país, como ya la vien siendo de cuantayá”. El futuru centru de deprendizaxe del español va tar empobináu a estudiantes estranxeros que quieran perfeccionar el conocimientu del castellano. 7 de marzu, 2006 0 FacebookTwitterPinterestEmail