Música Fontes sonores de la música tradicional asturiana by asturnet 14 de payares, 2006 Embaxo esti títulu recuéyense bien de grabaciones procedentes del Archivu de la Música Tradicional del Muséu del Pueblu d’Asturies. Dende l’añu 2001 esti proyectu vien enfotándose n’atropar les grabaciones audiovisuales esistentes nel país. Dende los años 50, del sieglu venti, bien d’asociaciones y persones particulares entamaron a facer encuestes y grabaciones de la cultura inmaterial asturiana. Ún de los oxetivos de la coleición Fontes sonores de la música tradicional asturiana ye asoleyar eses grabaciones y trabayos de campu pa ufriles al pueblu asturianu, amás d’a músicos ya investigadores. La colección Fontes sonores de la música tradicional asturiana remanez cola fin de proponer un espaciu común pa toles persones y grupos venceyaos a la xera de la recuperación de la cultura asturiana. Títulos asoleyaos pola Colección Fontes Sonores de la Música Tradicional Asturiana: Eduardo’l de Sabina. Música de tradición oral nel conceyu de L.lena Les ofrendes de ramos n’Asturies Ignacio Noriega. El gaiteru de San Roque L’Acebal Juan Uria Maqua. Vaqueiras y otras canciones asturianas 14 de payares, 2006 0 FacebookTwitterPinterestEmail
Música Algama organiza les Primeres Xornaes escontra’l terrorismu de xéneru by asturnet 13 de payares, 2006 Algama, asociación asturiana escontra la violencia de xeneru, organiza el prosimu Vienres 24 de Payares les “Primeres Xornaes escontra’l terrorismu de xéneru” con un conciertu na Sala Nuevo Savoy de Xixón a partir de las 20:00h. El conciertu entamará col grupu de Hip-Hop l’asturianu K-Nalón, que dende la cuenca’l Nalón tarán presentando la so primer maqueta “Conciencia Llibre”. Dempués el turnu tocara-yos al grupu mozu xixonés Ásperos, que a ritmu de Punk-Ska tarán interpretando dalgunos cancios de los que formaran la so prósima maqueta. Como tercer grupu enriba del escenario actuará La Tarrancha,, interpretando los cantares que tarán inxertaos nel so primer trabayu “QLT?”. Por últimu, Skontra sedrán los encargaos de piesyar la nuechi con cancios que pues escuchar nel so primer CD “Semeya de la rabia”. El preciu únicu d’esti conciertu ye de 3 euros, que dirá en sofitu a Algama, p’autofinanciar estes xornaes. Más información en www.algama.org 13 de payares, 2006 0 FacebookTwitterPinterestEmail
Música Los músicos afiten n’Ayande la necesidá de camudar les cadarmes de la promoción musical asturiana by asturnet 13 de payares, 2006 El destín de les subvenciones y la profesionalización de la industria cultural y musical asturiana foron delles de les cuestiones centrales del alderique que caltuvieron músicos, críticos, periodistes ya investigadores en La Puela d’Ayande, convocaos pola Fundación Belenos nel so VII Seminariu d’Estudios Asturianos pa falar de La música tradicional asturiana. Actualidá, tendencies y evolución. Los díes 11 y 12 de payares cellebróse na Puela d’Ayande el Seminariu d’EStudios Asturianos de la Fundación Belenos, qu’algamaba la so séptima edición. Esti añu dedicóse a la música tradicional y la so evolución nos últimos años. Y pa ello la Fundación Belenos cuntó con especialistes na materia como ye’l casu de Xosé Ambás, José Ángel Hevia o Ismael González Arias. El sábadu 11 de Payares entamaron los alcuentros, tres de la presentación de Lisardo Lombardía y l’alcalde d’Ayande, con una conferencia de Xosé Ambás col títulu de “El fondu de la tierra: la voz de la tradición na música asturiana danguanu, na que’l cantante ya investigador ufrió una bona amuesa de fontes orixinales nes que basaran les sos composiciones grupos como nos que participa elli y dellos otros casos de la música folk d’anguaño. Ambás dexó bien afitada la importancia de les fontes orixinales nel remanecer del folk asturianu. Tres de la conferencia d’Ambás toco-y el turnu a Inaciu Llope y la so conferencia Los signos del aire: una xenealoxía del folk asturianu, na que fizo un repasu enforma granible de la evolución reciente de la música folk nel país. Y tres de la xinta aportó la conferencia de José Angel Hevia, qu’embaxo’l títulu Industria cultural y música asturiana averó al públicu qu’enllenaba’l salón d’actos del Ayuntamientu d’Ayande a la necesidá de afrontar la música folk dende una perspeutiva más comercial ya industrial, al empar de los tiempos d’anguañu. Hevia debatió tres de la so conferencia dellesde les cuestiones per elli plantegaes, como’l tratu del músicu cola SGAE y la necesidá de firmar los arreglos de les músiques tradicionales emplegaes nes composiciones por parte’l músicu, dexando a les clares la so opinión de que les subvenciones deberíen empobinase a la promoción del consumu y non a la edición. El sábadu 11 presentóse tamién el discu colectivu “Homenaxe a Aires de Palo”, nel Café Centro de La Puela y, darréu cellebróse un Filandón nel mesmu llugar. Les xornaes finaron el domingu con una Mesa reonda sobre la Música tradicional asturiana: estáu de la cuestión, que moderada por Lisardo Lombardía cuntó cola participación d’Aurelio Argel, críticu musical, Ismael González Arias, Escritor y críticu musical,Ignaciu Llope y los músicos Xosé Ambás y José Ángel Hevia. 13 de payares, 2006 0 FacebookTwitterPinterestEmail
Música “Los años eléctricos” nel forum de la FNAC by asturnet 9 de payares, 2006 El documental sobre la historia de la música pop y rock asturiana fechu por José Braña y Chus Neira. Proyectaráse esti vienres dende les 19,00 nel forum de la FNAC. Los años eléctricos ye un documental de José Braña y Chus Neira producíu pola Productora de Programes del Principáu. El documental ye una recuperación del archivu audiovisual de la música pop y rock asturiana. Nel forum de la FNAC depués de la proyección abriráse un alderique nel que van tar los autores del documental. Darréu’l grupu Hotel Vaqueros, formáu por Noel Herbert y Javi Vallina ufrirán una selección de les tres últimes décades del rock y pop n’Asturies. 9 de payares, 2006 0 FacebookTwitterPinterestEmail
Música La fadista Ana Laíns nel Centru Cultural de Caxastur d’Uviéu by asturnet 8 de payares, 2006 La fadista Ana laíns presenta’l so primber discu en solitariu na sala de Caxastur d’Uviéu, güei miércoles 8 de payares a les 20,00 hores, y nel de Xixón el 9 de payares a la mesma hora. Ana Laíns ye una de les voces der la nueva xeneración de la música portuguesa, tien participao en bien de trabayos discográficos, dende’l so llanzamientu col album “Songs about Lisboa” o col recopilatoriu “Divas do Fado Novo”. Na so música fai un viaxe dende los estilos tradicionales del fado pasando pel jazz o la bossa nova. Pela so parte nos centros de Caxastur de Mieres y Llangréu van proyectase les películes “Lo que sé de Lola” y “Tiempos de Amor, Juventud y Libertad” 8 de payares, 2006 0 FacebookTwitterPinterestEmail
Música El Muséu del Pueblu d’Asturies va presentar “La Ofrendas de Ramos en Asturias” by asturnet 7 de payares, 2006 El llibru obra d’Herminia Menéndez y Eduardo Quintana presenta bien de grabaciones, coordinaes por Fernando Ornosa, sobre los cantares de ramu nos pueblos asturianos. El prólogu a esti trabayu de rencompilación musical ye de José Manuel Fraile Gil. La presentación fadráse esti vienres a les 20,00 na Sala de Conferencies del Antiguu Institutu de Xixón. Nel actu participarán Yolanda Cerra, autora del epílogu, Fernando Ornosa, coordinador de les grabaciones y los autores. 7 de payares, 2006 0 FacebookTwitterPinterestEmail
Música Entama’l Festival de Jazz de Xixón by asturnet 6 de payares, 2006 Dende esti miércoles y hasta’l domingu 12, Xixón covertiráse na capital de la improvisación, cola celebración del Festival de Jazz. Bien d’artistes, de diferentes estilos, acudirán a la cita xixonesa cola música contemporánea. João Bosco y Gonzalo Rubalcaba ufrirán el primer conciertu’l día ocho. Al día siguiente, vienres 9, Stacey Kent ufrirá un repertoriu averáu a Billie Holiday y Ella Fitgerald. El sábadu 10 actuarán Isaac Turienzo, Tino de Giraldo y Miguel Chastang. el sábadu día 11 Xixón va recibir al saxo Kenny Garret, que tien más de 50 discos grabaos. El día 12 jazz pa los y les más nuevos y como puntu final Michel Camilo y Tomatito. 6 de payares, 2006 0 FacebookTwitterPinterestEmail
Música Presentóse’l Ciclu de Conciertos Mieres Clásicu 2006 by asturnet 6 de payares, 2006 Los díes 7, 10 y 18 de payares los cuartetos CLarín y D’Acord y la soprano Paula Lueje acompañada por Manuel Bernardo al piano van tar presente nesti ciclu de conciertos Mieres Clásicu 2006. Les tres cites d’esta edición fadránse nel Salón d’Actos de la Obra Social y Cultural de Caxastur en Mieres, na cai Jerónimo Ibrán. La entrada ye llibre y les obres que se van poder escuchar sedrán: Día 7, Concierto del Cuarteto Clarín, para 2 violines, viola y violenchelo. Día 10, Concierto de Cuarteto D´Arcord, para flauta, viola, violonchelo y guitarra. Día 18, Concierto de soprano Paula Lueje, acompañada al piano por Mario Bernardo. El cartel recueye una variedá bien importante de música clásica, con alicientes como poder escuchar a dalgunes de les promeses musicales asturianes, como Paula Lueje o al pianista mierense Mario Bernardo, o el mesmu Cuartetu Clarín de Cuerda compuestu por músicos de la OSCO y la OSPA. 6 de payares, 2006 0 FacebookTwitterPinterestEmail
Música La XUGA robla un conveniu cola Conseyería de Xusticia by asturnet 6 de payares, 2006 El Conseyu de Gobiernu d’esti xueves, 2 de payares, aprobó la robla d’un conveniu ente la Xuntanza de Gaiteros Asturianos y la Conseyería de Xusticia, Seguridá Pública y Rellaciones Esteriores, l’oxetivu ye que la Xuntanza desenvuelva actividaes nos Centros Asturianos. Nesti programa d’actividaes incluiríense dende la participación de bandes de gaites, pareyes de gaita y tambor. La Xunta de Gaiteros Asturianos nació en mayu de 2006 cola fin de promocionar el llabor de los y les gaiteres asturianes, el so presidente ye’l gaiteru d’El Mazucu Xuacu Amieva 6 de payares, 2006 0 FacebookTwitterPinterestEmail
Música “Llangres” entama los conciertos del programa “Asturies cultural” by asturnet 31 d'ochobre, 2006 Dientro del Programa “Asturies Cultural” la Conseyería de Cultura programó una riestra de conciertos musicales de grupos integrantes de l’axenda musical 2006, qu’entamará cola actuación de “Llangres”. El segundo trabayu discográficu del grupu música folk Llangres, tituláu “Esnalar” presentóse’l martes 31 d’ochobre nel teatru Filarmónica. Esta ye la primer vegada que los sones del nuevu discu de Llangres van sonar na capital asturiana. Llangres ta formáu por: Esther Fonseca, vocal del grupu, Borja Baragaño, gaita y flauta, Yago Prado, harpa, guitarra y baxu pedal y Viriu Fernández, vanu y bouzouki,. Nel conciertu repasarán parte de los temes del nuevu tema, asina como dalgunos del so primer trabayu “Astura”. Llangres entamaron a tocar en 1998 con cuatro integrantes nel aula del Conservatoriu de música de Sama. Nel añu 2000, el grupu consolidóse faciendo actuaciones musicales nes nueches folk del país. Un añu depués entamaríen a tocar fuera d’Asturies, en concretu nel “Trigallia Celtic Folk”. En 2002 editaríen “Stura”. En 2004 algamaron el primber premiu nel concursu “Jameson Celtic Festival”, entrando nel grupu Esher Fonseca. En 2005 presentaríen el so discu “Esnalar”. Amás del conciertu de mañana, el teatru Filarmónica ufrirá’l 7 de payares, “Septeto Cubanchan”, el día 22 de payares actuará Tina Gutiérrez “Muyeres” y el día 5 d’avientu sedrá’l d’Isaac y Armando Obón. 31 d'ochobre, 2006 0 FacebookTwitterPinterestEmail