Sociedá Nast reclama a Izquierda Xunida la oficialidá del asturianu que prometió públicamente by asturnet 18 de xunu, 2007 Redacción. Énte les negociaciones del PSOE-FSA ya Izquierda Xunida pa la formación de gobiernu n’Asturies, l’Asociación Cultural ‘N’ast’ emitió un comunicáu nel qu’esixe la oficialidá de la llingua asturiana. Dende N’ast recuerden qu’“IX prometió la oficialidá na campaña electoral” y qu’“esti ye un fechu qu’esperen s’algame”. Nel comunicáu, N’ast diz qu’“esta fuercia política (IX) yá prometiera na anterior llexislatura lo mesmo y qu’a pesar de que nun se cumpliera, gobernó xunto al PSOE y nun cumplió les sos promeses”. Por ello N’ast “vuelve a esixir públicamente’l cumplimientu d’estes promeses electorales y ve inaceptable que nun s’algame d’esta la dignificación del asturianu”. Acordies con esto, l’Asociación Cultural N´ast pídi-y al Conceyu Abiertu Pola Oficialidá “que pida a Izquierda Xunida, ún de los sos miembros, que cumpla l’oxetivu máximu d’esti Conceyu y que tome les midíes afayadices nel casu de que nun lo faiga”. N’ast remata’l comunicáu “esperando qu’IX nun se convierta, una vuelta más, nun responsable directu de la represión llingüística d’esti país y que nun entre nin collabore con un gobiernu que reprima y marxine la llingua de tolos asturianos”. 18 de xunu, 2007 0 FacebookTwitterPinterestEmail
Sociedá La Oficina de la Llingua de Xixón prepara la segunda edición de ¡Ruempi la mollera! by asturnet 13 de xunu, 2007 Redacción. Esti martes 11 de xunu fízose la entrega de premios del concursu ‘Ruempi la Mollera’, organizáu pola Oficina Municipal de la Llingua, y na que participaron 17 centros d’educación primaria del conceyu de Xixón. El concursu fízose col envís de que los escolinos conocieren y afondaren na hestoria y personaxes del conceyu al tiempu que practiquen la llingua asturiana. Asina fueron formulándose dende xineru a mayu ocho entrugues distintes, ente les que los neños teníen 15 díes p’aldovinar. La vieya fábrica de tabacos, el tranvía, la Lloca, Magnus Blikstad o les mil quinientes, yeren dalgunes de les rempuestes que fueron apurriendo los participantes dempues de ‘rompese la mollera’. La escuela ganadora foi’l Colexu Públicu Jacinto Benavente, de La Camocha. Más de 500 neños participaron nesta primer edición de ¡Ruempi la mollera!. Nun comunicáu emitíu polos responsables de la Oficina comenten qu’“El concursu tuvo una perbona acoyida, polo que ya se ta trabayando nes entrugues de la Segunda Edición de ¡Ruempi la Mollera!”. 13 de xunu, 2007 0 FacebookTwitterPinterestEmail
Sociedá LAxencia Europa Press entama un serviciu de noticies en llingua asturiana by asturnet 11 de xunu, 2007 Redacción. La prestisoxa axencia de noticies Europa Press entamó ayeri un serviciu de noticies en llingua asturiana pa los sos clientes y pa los llectores de la so web. La propia empresa fala de que la nueva canal ñaz “col enfotu de sofitar l’espardimientu y promoción de la llingua nos medios de comunicación y nos estremaos ámbitos de la sociedá”. El serviciu inclúi la traducción de les noticies, non namás d’Asturies, sinón estatales ya internaciones, qu’en munchos casos van dir acompangaes de material gráficu. El Serviciu ye gratuitu pa los medios de comunicación que yá tean apuntaos aboanos al Serviciu Autonómicu d’Europa Press. El serviciu de noticies actualízase de les nueve la mañana a les 21 hores, de llunes a vienres. Este ya la primer vegada qu’un mediu de comunicación d’ámbitu estatal ufierta un serviciu de noticies en llingua asturiana. La llingua asturiana súmase asina a les canales esistentes hasta’l momentu en catalán, vascu, gallegu y valencianu. Canal de noticies n’asturianu d’Europa Press 11 de xunu, 2007 0 FacebookTwitterPinterestEmail
Sociedá La Xunta pola Defensa de la Llingua Asturiana fai balance de los resultaos eleutorales nAsturies by asturnet 4 de xunu, 2007 Redacción. La Xunta pola Defensa de la Llingua Asturiana (XPDLA) emitióestos díes un comunicáu nel que fai balance de los resultaos de les eleiciones y les perspeutives del asturianu na reforma del Estatutu d’Autonomía d’Asturies. La XPDLA señala nel comunicáu qu’“el del asturianu ye un asuntu que nun s’acaba de solucionar políticamente”. “La posibilidá de reforma del Estatutu -diz el comunicáu- nesta próxima llexislatura y la necesidá d’incluyir nel la oficialidá punxeron la cuestión nel centru del debate anque dellos nun la quixeren tocar na campaña electoral”. Asina mesmo, la XPDLA reclama al Partíu Popular que siga dando pasos, yá qu’opinen “l’usu del asturianu pol alcalde d’Uvieu namás que pa facer chistes, por poner namás un casu, nun ye’l meyor camín pa dignificala si al llau nun hai usos serios como na documentación, na toponimia, na vida diaria del conceyu…”. En cuantes a la posición de la FSA-PSOE, la XPDLA diz que “bona parte de los sos militantes nun ven nengún problema a la reconocencia de los derechos llingüísticos” y qu’“hai un congresu pendiente de la FSA y tamos seguros de qu’esos plantegamientos predemocráticos d’una minoría tienen que desapaecer”. La XPDLA remata’l comunicáu diciendo que van siguir trabayando “ensin maximalismos de nengún tipu: valorando tamien los avances, por pequeños que sían, pero reclamando la oficialidá como únicu marcu llegal”. 4 de xunu, 2007 0 FacebookTwitterPinterestEmail
Sociedá Aceutada una ponencia nasturianu nel IV Alcuentru Internacional sobre Desenrrollu Caltenible y Población by asturnet 30 de mayu, 2007 Redacción. El Comite Direutor del ‘IV Alcuentru Internacional sobre Desenrrollu Caltenible y Población’ aceutó estos díes la ponencia sobre estratexes europees de caltenibilidá a David M. Rivas, miembru de l’Academia de la Llingua Asturiana y de l’asociación L’Arribada. El fechu llama l’atención por tar la ponencia escrita n’asturianu. Mientres los documentos n’asturianu atopen problemes nos rexistros del Gobiernu del Principáu, esti alcuentru, coordináu pola Universidá de Málaga (Andalucia) y la de Luján (L’Arxentina) y la Rede Iberoamericana de Desenrrolu Llocal-Global nun punxo nengún problema. L’eventu –celebráu cada dos años- ye ún de los principales aconceyamientos científicos nestes materies. Nesta ocasión cunta tamien con un simposiu sobre la crisis del agua y les estratexes pa evitala. Cola aceutación d’esta ponencia l’asturianu da un pasís más na so presencia internacional. L’autor de la ponencia, David M. Rivas, ye doctor n’economía y profesor titular d’estructura económica na Universidá Autónoma de Madrid. Ye miembru del Comite científicu de la Rede pa una Estratexa Europea de Desenrrollu Caltenible y de la Rede Europea de Desenrrollu Llocal, dependientes de la Comisión Europea, nes que trabaya con profesionales d’universidaes de Polonia, Inglaterra, Eslovenia, Alemaña, Italia, Escocia, Luxemburgo y Austria. Ye tamien profesor invitau d’universidaes de L’Arxentina, Perú, Uruguai y Guatemala, y miembru del Club de Roma. Tien publicada una ventena de llibros sobre estes materias n’ingles y castellán, asina como un llibru de rellatos n’asturianu ‘Xente de casa’. Tamien participó na política asturiana como candidatu d’Andecha Astur en dellos comicios, hasta que la xuntura d’una parte d’Andecha na coalición Unidá y la división interna del partíu lu llevaron a abandonar a principios d’esti añu. 30 de mayu, 2007 0 FacebookTwitterPinterestEmail
Sociedá Lasturianismu políticu fracasa nes eleiciones autonómiques y nos conceyos by asturnet 27 de mayu, 2007 Redacción. Los partíos que llevaben la oficialidá nel so programa consiguen en total 79.141 votos y un 13,42% de los votos una baxada de más de cinco puntos y de más de ventidós mil votos frente a los resultaos totales de 2003, onde’l conxuntu d’estes fuercies algamó los 101.534 votos con un 18,9% de votos. Sicasí, Izquierda Xunida-Bloque por Asturies-LV, única fuercia que lleva la oficialidá nel programa, caltien los cuatro diputaos que yá tenía na Xunta Xeneral. La Unión URAS-PAS, que presentaba per primer vegada a los dos partíos en coalición dexa unos resultaos mui negativos, baxando de los 28.928 votos que sumaben nes eleiciones de 2003 a los 13.255 d’estes. Sicasí, la Unión caltien bonos resultaos en dalgunos conceyos y saca en total 11 conceyales. Destaquen Villaviciosa, onde pasen d’unu a tres conceyales y Ponga. Amás consigue un conceyal en Tineu, Noreña, Illas, Llaviana, Cabrales y Carreño. Siendo llave de gobiernu en Villaviciosa, Ponga, Cabrales y Carreño. En cuantes a les a la esquierda nacionalista, los resultaos nun son meyores, la coalición Unidá, que se presentaba como la fuercia que diba axuntar el votu de la esquierda nacionalista asturiana nun consigue pasar a los resultaos d’esti sector (representaos en 2003 por Andecha Astur en solitariu) por más que ventisiete votos, quedando Andecha Astur con 2.726, unos mil menos que nes anteriores eleiciones. Sicasí, les formaciones d’esquierdes caltienen los cuatro conceyales que teníen nes anteriores eleiciones. Dos d’Asturianistes por Nava, unu d’Izquierda Asturiana en Piloña, onde van ser llave gobiernu y otru d’Andecha por Carreño. El PP, que fizo dalgún averamientu al asturianismu na campaña, ye l’únicu que partíu que xube en votos, pero’l PSOE namás baxa un diputáu y xube’l porcentaxe de votos. Vicente Alberto Álvarez Areces paez posicionase como’l próximu presidente d’Asturies, col apoyu d’Izquierda Xunida-Bloque por Asturies-Los Verdes. L’asturianismu políticu paez el gran perdedor d’estes eleiciones autonómiques, onde nun consigue posicionase nel Parllamentu Asturianu nin nos grandes conceyos, onde amás, Izquierda Xunida pierde posiciones. 27 de mayu, 2007 0 FacebookTwitterPinterestEmail
Sociedá La toponimia tradicional del conceyu dA Veiga aprobada pol Conseyu de Gobiernu del xueves by asturnet 24 de mayu, 2007 Redacción. El conceyu d’A Veiga convirtióse’l xueves nel númberu 24 n’oficializar los sos topónimos, cola aprobación del Conseyu de Gobiernu del Principáu d’Asturies. Con esta aprobación llegase a cuasi un terciu de los conceyos d’Asturies cola toponimia tradicional como la única oficial, como afitó yá nel añu 1998 la Llei d’Usu y Promoción del Asturianu. Los conceyos que teníen la toponimia oficializada hasta yeren Bimenes, Cabranes, Carreño, El Franco, Gozón, Llanes, Llangreu, L.lena, Nava, Sariegu, Villaviciosa, Xixón, La Ribera, Colunga, Corvera, Grau, Noreña, Amieva, Ribadeva, Pezós, Morcín, Grandas de Salime y Casu. Amás, Ayer, Balmonte de Miranda, Llaviana, Proaza, Riosa, Samartín del Rei Aurelio y Santu Adrianu yá aprobaron nel Plenu de les sos Cases de Conceyu correspondientes los llistaos de nomes. Nun procesu menos avanzáu tán diecinueve conceyos, que ficieron sesiones de trabayu pa revisar la so toponimia: Aviles, Ayande, Cangues d’Onís, Caravia, Castrillón, Castropol, Cangas del Narcea, Degaña, Llanera, Mieres, Parres, Piloña, Siero, Sobrescobiu, Tameza, Tapia, Taramundi, Teberga, Valdes y tres conceyos, que solicitaron revisar la so toponimia: Bual, Tineu y Uvieu. 24 de mayu, 2007 0 FacebookTwitterPinterestEmail
Cooperación Ábresel plazu pa presentar poemarios al concursu Fernán Coronas by asturnet 23 de mayu, 2007 Redacción. La Sociedá Cultural «La Regalina» de Cadaveu, del conceyu de Valdes, ta acabante d’abrier el plazu de presentación d’obres pal XIV Premiu de Poesía «Fernán Coronas». El premiu de poesía ta decicáu a la memorai de la figura de les lletres asturianes y sacerdote Padre Galo. Los poemarios tienen de cuntar cuntar con un mínimu de 275 versos y tar escritos en llingua asturiana. Pa presentalos hai que los unviar a la Cai Curión s/n, Cadaveu, llar social de La Regalina, enantes del 16 de xunetu, ensin firma o firmaos con nomatu y colos datos del autor nun sobre aparte. El premiu va fallase enantes del 7 d’agostu, día de ñacimientu del Padre Galo, cuando va facese públicu. El trabayu ganador va recibir un premiu de 1.300 euros y el sofitu pa ver asoleyada la obra. Esti concursu ganárolu en pasaes ediciones Susana Rodríguez Sela, Miguel Rojo, Taresa Lorences, Ricardo Candás y Humberto González ente otros. 23 de mayu, 2007 0 FacebookTwitterPinterestEmail
Sociedá El xueves terminal plazu papuntase a la Prueba de Conocencia de lAcademia de la Llingua Asturiana by asturnet 22 de mayu, 2007 Redacción. Como ye vezu cada añu per estes feches l’Academia de la Llingua Asturiana la so ‘Prueba de Conocencia’. La prueba va ser el 26 de mayu y el plazu de matrícula termina esti xueves 24. P’apuntase hai que se dirixir a la cai Marques de Santa Cruz 6, 2u, n’Uvieu, o bien llamar per telefonu al 985 21 18 37. Los conteníos de la prueba son, na ‘Estaya Llingüística’, el terner conocencia y dominiu del funcionamientu gramatical del asturianu y de la norma academica, tener un emplegu amañosu de la llingua, puestu en práutica gracies a exercicios gramaticales y de composición escrita y per último ser a pasar la prueba de práutica oral, nel que va mid¡ise’l nivel d’emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador. Amás, la prueba inclúi una entruga sobre ‘llingua y sociedá’, na que les persones que se presenten han tener conocencia “del allugamientu de la llingua dientro de la sociedá asturiana asina como del procesu de normalización en que ta inxerta”. Datos completos de la Prueba de Conocencia de mayu 22 de mayu, 2007 0 FacebookTwitterPinterestEmail
Sociedá Los partíos políticos presenten les sos propuestes en materia llingüística pa los próximos cuatro años by asturnet 21 de mayu, 2007 Redacción. Nun hai más que facer un repás pelos programes de tolos partíos que se presenten a les eleiciones pa saber que la materia de política llingüística ocupar un llugar en toos ellos. El PSOE lleva nel so programa un apartáu tituláu ‘El futuru del asturianu’ nel que recueye una serie de midíes “estableciendo soluciones y propuestes que respeten siempres los principios de llibertá y voluntariedá nel so usu pola ciudadanía y qu’espierten un grau de consensu abondo ente los asturianos”. En cuantes al PP asturianu, recueye un apartáu tituláu ‘llingua asturiana’ nel que promete un “marcu xurídicu definitivu pal asturianu qu’asegure la so supervivencia como llingua de los asturianos, con un ampliu consensu social y parlamentariu pa establecer el reconocimientu llegal necesariu del asturianu, que permita actuaciones inmediates y futures de promoción, usu y significación de la llingua con garantíes xurídiques plenes”. Amás puntualizsa sobre la presencia de la Filoloxía Asturiana “ente los estudios reglados de la Universidá d’Uvieu”, “la xeneralización de la ufierta de llingua asturiana a tolos centros educativos”, el “reconocimientu de la especialidá d’asturianu pol profesoráu” ente otres midíes. Sicasí, los únicos partíos que recueyen de manera clara la oficialidá pa la llingua asturiana nos sos programes siguen siendo nesta convocatoria d’eleiciones los mesmos que na anterior: Izquierda Xunida-BA-LV, que según les encuestes más recientes va caltener los cuatro diputaos que tien na Xunta Xeneral, Unión URAS-PAS al que les encuestes dan un diputáu y les fuercies Andecha Astur, PCPE y Unidá, que van quedar fuera del Parllamentu Asturianu, de cumplise les encuestes espublizaes en dellos periódicos asturianos. 21 de mayu, 2007 0 FacebookTwitterPinterestEmail