Educación Les protestes contra la llista d’interinos llogren aparar la convocatoria by asturnet 19 de setiembre, 2006 Tres de les protestes de dalgunos sindicatos como SUATEA contra los ‘graves errores’ na baremación de la llista d’interinos, la Conseyería d’Educación decidió ayer el suspender la convocatoria selmanal de places. Anque l’Alministración negó nun primer momentu estos ‘errores’, ayer, na so negociación colos sindicatos, reconoció que les faltes nes puntuaciones de los opositores vinieron por nun baremase colos mesmos criterios les esperiencies docentes, de manera qu’agora va pasase a la revisión de toles llistes, aplicando un criteriu uniforme, que permita la espublización d’una nueva llista pal próximu martes. Tres de les correcciones, ta previsto que sía esti vienres cuando s’espublice una nueva llista, abriendo asina un plazu de reclamación de diez díes y faciendo que, previsiblemente, el martes día 26 salga una nueva convocatoria. Pesie a la rectificación d’última hora per parte de la Conseyería d’Educación, los sindicatos amosaron el so malestar pola publicación tardía d’un llistáu que puediere ser arregláu en tiempu, a la vez qu’amenazaron con recurrir les llistes y l’actuación del Principáu ente’l tribunal de lo Contencioso-Alministrativo si los errores siguen ensin correxir. 19 de setiembre, 2006 0 FacebookTwitterPinterestEmail
Educación SUATEA denuncia ‘graves irregularidaes’ na fechura de les llistes provisionales d’interinos y desixe que s’apare la convocatoria by asturnet 18 de setiembre, 2006 El sindicatu de profesionales de la enseñanza SUATEA desixó nun comunicáu la ‘paralización de la convocatoria y adxudicación de places en toles especialidaes convocaes a oposición n’Asturies’ mentes que nun s’arreglen los ‘graves errores materiales’ de les llistes provisionales d’interionos, nes que ‘munchos de los aspirantes tán mal baremaos, de forma y manera que nun va poder optar a les places ufiertaes’. L’erru más grande denunciáu por SUATEA provocaría un cambiu sustancial nes llistes en casu de ser solucionáu. Asina, resulta ser que na baremación foi valorada de manera más favorable la esperiencia previa a aquellos aspirantes que nun se presentaron a les oposiciones d’esti branu n’Asturies. Ello quier dicir que ‘perxudiquen a los que prefirieron quedase n’Asturies respective a los que marcharon a otres Comunidaes o simplemente nun se presentaron’. Pesie a que l’Alministración respondió a esta denuncia de los interinos asegurando que ‘nun lo consideren un erru, sinón que sólo aplicaron l’Alcuerdu sobre profesoráu interinu robláu coles Organizaciones sindicales ANPE y FETE-UXT’, SUATEA desixe la ‘paralización de la convocatoria asina como l’adxudicación de places en toles especialidaes convocaes a oposición n’Asturies en tanto en cuanto nun se resuelvan toos estos errores’, al tiempu que desixe a los firmantes de talu alcuerdu que ‘con calter urxente, tomen les midides necesaries pa da-y una solución xusta a les persones afectaes por esta grave situación’. 18 de setiembre, 2006 0 FacebookTwitterPinterestEmail
Comunicación Radio Sele empieza a emitir dende’l 106.1 de la FM porque la RTPA tapaba la so señal by asturnet 11 de setiembre, 2006 Desque la Radio del Principáu d’Asturies comenzare cola so emisión en pruebes nel dial 106.4 de la FM, la emisora asturiana Radio Sele, que venía emitiendo pel 106.5, vióse obligada a cambiar el so dial, yá que sofría abondes interferencies que tapecíen la so retresmisión. A partir d’agora, la radio independiente y n’asturianu va emitir al travies del 106.1 de la FM, amás del so servicio habitual pela internet na páxina www.radiosele.net. 11 de setiembre, 2006 0 FacebookTwitterPinterestEmail
Comunicación TPA empezó a emitir al traviés del satélite Hispasat 1C y pela Internet by asturnet 10 de setiembre, 2006 Televisión del Principáu d’Asturies (TPA) empiezó’l pasáu vienres 8, festividá del Día d’Asturies, les sos emisiones per satelite p’America, Europa y Norte del Africa, al travies del Hispasat 1C. Dende esi día, les emisiones tamien pueden siguise na Internet, na dirección http://www.rtpa.net . La emisión TPA per satelite va dinfundise 24 hores los 365 díes del añu, na modalidá de multidifusión, col envís d’axustar la programación a los diferentes usos horarios de los diferentes países. La señal de la TPA n’America va integrase na plataforma de RTVE, qu’hasta agora espardía un paquete de 7 les canales españoles de Televisión (Canal Internacional de TVE, 24 hores, DOCU TVE; les autonómiques TV3, ETB y TVG y Antena 3 Internacional). Pa Europa y Norte del Africa, TPA va integrse na plataforma Europa, qu’anguaño esparde un paquete de 6 canales españoles (Teledeporte, Canal Clásicu, Docu TVE, TVE 50 años y Clan TVE). La comunidá asturiana fuera del Principáu estímase, según datos del Conseyu de Comunidaes Asturianes, nunes 300.000 persones. 10 de setiembre, 2006 0 FacebookTwitterPinterestEmail
Comunicación La TPA estrena programación matinal y la radio homenaxea a Felpeyu nel empiezu de la emisión en pruebes by asturnet 6 de setiembre, 2006 La Televisión del Principáu d’Asturies va estrenar la so emisión matinal mañana, festividá del Día d’Asturies, con una programación especial dende’l Santuariu de Cuadonga. Pela so parte, la Radio del Principáu va empezar tamien la so emisión en pruebes mañana col tema musical ‘Xirandiyes’, una adaptación de tres dances asturianes fecha por Felpeyu, que s’escoyó como recuerdu y homenaxe a los músicos Igor Medio y Carlos Redondo que morrieron el pasáu mes de xunu nun accidente de tráficu. La celebración del Día d’Asturies va vali-y a la RTPA pa estrenar les sos emisiones mesmo na televisión, cola programación matinal, que na radio. Los periodistes Cristóbal Ruitiña y Diana Sánchez van ser los encargaos de presentar un programa especial dende Cuadonga, nel que se va retresmitir l’oficiu relixosu y la procesión a la Santina. Nesti programa especial televisivu tamien se va poner un reportaxe especial grabáu pela mañana con una cámara subacuática nel Llagu Enol de la qu’unos submarinistes saquen una replica de la Virxe del fondu del llagu. Per otra parte, el periodu de pruebes de la Radio del Principáu d’Asturies va emitir un bucle siguíu de música pa meter, a lo llargo de tol mes de setiembre, los sos espacios informativos. Mañana, amás de rindir homenaxe a Igor Medio y Carlos Redondo col tema de Felpeyu ‘Xirandiyes’, la RPA va poner especial atención nos temes de los grupos que van intervenir nos conciertos programaos en Nava con motivu del Día d’Asturies. 6 de setiembre, 2006 0 FacebookTwitterPinterestEmail
Comunicación Encuesta d’Asturnews sobro la política de vuelos de baxu costu del Principaú by asturnet 4 de setiembre, 2006 zp>La reciente anuncia del entamu d’operaciones d’Air Asturias y la de les conesiones que va entamar darréu Air Berlin, con escala en Palma Mallorca, dan un xiru inesperáu a la política alrodiu de los vuelos de baxu costu del Principaú d’Asturies, hasta agora fondamente criticada. Nuna nueva encuesta, Asturnews propón dende esti entamar de Setiembre que los llectores manifiesten la so opinión sobre la política del gobiernu del Principáu, dende la so portada, na tema de les conesiones pol aire col estranxeru con esta entruga: ¿Ye bona la política’l gobiernu colos vuelos de baxu costu? 4 de setiembre, 2006 0 FacebookTwitterPinterestEmail
Comunicación El Principáu convoca un concursu pa una canal de televisión dixital n’Asturies y reserva otres trés pa si by asturnet 24 d'agostu, 2006 El conseyeru d’Economía y Alministración Pública, Jaime Rabanal, anunció ayeri la convocatoria d’un concursu públicu pa una nueva canal de televisión dixital autonómica. De les cuatro canales de la TDT rexonal, el Gobiernu asturianu reservó pa si tres d’ellos, destinando ún pa la TPA; guardando un segundu pa la mesma fin; y dexando’l terceru pa prestar servicios ‘on line’ como yá lo fai’l Principáu dende la internet. La ufierta pública pa la canal que’l Principáu sacó a concursu ta abierta hasta’l prósimu 30 de setiembre y va tar basada en siete puntos, según desplicó Jaime Rabanal, nos que se va estimar los conteníos de la mesma, el plan tecnicu del proyectu y la so ayuda pal desarrollu económicu, tecnolóxicu ya industrial d’Asturies. Los licitadores de la ufierta habrán de tener un capital mínimu d’ún millón d’euros, desembolsáu polo menos nun cincuenta por cientu, y namás van poder presentar una propuesta. La concesión de la canal va ser por un plazu de 10 años, con posibilidá de ser prorrogaos por otros diez, y obliga a emitir, a lo menos, cuatro hores diaries de producción propia. 24 d'agostu, 2006 0 FacebookTwitterPinterestEmail
Comunicación Salas acueye una esposición quamuesa la visión que se tien dAsturies nel esterior by asturnet 13 d'agostu, 2006 A partir d’esti miercoles, 16 d’agostu, y hasta’l prósimu día 31, la sala d’esposiciones del Edificiu de Servicios Múltiples de Salas va acoyer la esposición itinerante ‘Asi nos ven’; una muestra centrada nos artículos de prensa nacional ya internacional y na visión del ‘Paraísu Natural’ que tienen los periodistes que visitaron Asturies nos viaxes de conocimientu organizaos pola Sociedá Rexonal de Turismu. La muestra recueye tamien una serie d’imáxenes que faen un recurríu pol llabor promocional turísticu del Principáu d’Asturies. 13 d'agostu, 2006 0 FacebookTwitterPinterestEmail
Comunicación La xira europea contra la discriminación llaboral fai parada en Xixón by asturnet 13 d'agostu, 2006 El 10 d’agostu’l camión mariellu brillante de stop-discrimination de la UE marchó nel so tercer viaxe per toa Europa cola intención d’informar a los ciudadanos sobre los sos derechos sigún la llexislación de la UE y de cada país. Esta campaña, que fadrá parada en Xixón nel mes de payares, ta pensanda pa que la Unión Europea puxe pola llucha contra la discriminaicón y promocione la diversidá nel sitiu de trabayu. Con ocasión de la presidencia finlandesa de la UE, la xira d’esti añu va empezar en Helsinki y va pasar per 13 estaos miembros visitando 22 ciudaes de tola UE. Na xira de cuatro meses, el camín va recorrer 13610 quilómetros y XXX milles náutiques hasta’l final de payares, mes nel que la caravana va visitar España. Les sos últimes cites van ser n’España: en Xixón el 15 de payares, en Madrid el 17 y, finalmente, en Valencia’l 21 d’esi mes. L’escenariu de 50 metros cuadraos tendrá un programa informativu y d’entretenimientu fechu especialmente xunto colos socios locales de la campaña, incluyíos ministerios, sindicatos y asociaciones d’emplegu en cada país. Aquellos que visiten la caravana van recibir información y asesoramientu sobre cómo la xente puede protexese contra la discriminación nel puestu de trabayu cola ayuda de les directives de la UE. 13 d'agostu, 2006 0 FacebookTwitterPinterestEmail
Educación La Conseyería d’Educación mira por meter l’asignatura d’asturianu nes clases d’Infantil by asturnet 7 d'agostu, 2006 Jose Luis Iglesias Riopedre, responsable d’Educación del Gobiernu del Principáu d’Asturies, anunció na inauguración de los cursos de branu qu’organiza l’Academia de la Llingua Asturiana en Santantolín d’Ibias que la Conseyería de la que ye titular ta estudiando la posibilidá de meter, cola nueva reforma de la Llei Orgánica d’Educación, los estudios de cultura y llingua asturiana na educación Infantil. D’esta manera, según Riopedre, ‘completaríase’ la ufierta d’asturianu nes escueles públiques, que yá cunten cola llingua como asignatura optativa en Primaria y Secundaria. El conseyeru d’Educación, qu’estimó l’aumentu de profesores d’asturianu nos últimos cinco años nun 88 % y nun 33 % el d’alumnos que la escueyen como segunda llingua, dixo que la nueva opción ayudaría a ‘completar el currículo d’esta manera, promoviendo’l so aprendizaxe ente los escolinos ente 3 y 5 años’. 7 d'agostu, 2006 0 FacebookTwitterPinterestEmail