Comunicación Mocedá d’Izquierda Asturiana y Chobenalla Aragonesista soliciten dominios propios p’Asturies y Aragón by asturnet 14 de febreru, 2007 Les organizaciones xuveniles Chobenalla Aragonesista y Mocedá d’Izquierda Asturiana acaben d’asoleyar un comunicáu conxuntu nel que reclamen qu’Asturies y Aragón dispongan de dominios, n’internet, territoriales pa les sos respectives comunidaes culturales y llingüístiques. Les dos organizaciones vienen collaborando na coordinación de delles campañes ente les que destaca’l blog conxuntu ARAST. Pa estes organizaciones moces algamar un dominiu propiu p’Asturies y Aragón sedrá una aición prioritaria de les sos actividaes. Dende estes organizaciones consideren qu’ente los pasos que se dean pa garantizar la sobrevivencia de les cultures de los dos paises “la presencia y identificación na internet al traviés del .ara y del .ast seríen perimportantes”. Dende les dos organizaciones consideren que pa que la propuesta llegue a bon puertu tien de cuntar col apoyu de los gobiernos autonómicos d’Asturies y Aragón. MIAS y Chobenalla consideren qu’han ser estos los que presenten la candidatura de los dominios a la ICANN, entidá internacional encargada d’otorgar los dominios n’internet. La ICANN yá aniciól períodu de consultes y evaluación de los dominios destinaos a comunidaes específicos que-y presentaron, aprobando hasta agoral dominiu .cat destináu pa la comunidá llingüística y cultural catalana. Amás esisten anguaño distintes iniciatives orixinaes nes comunidaes culturales y llingüístiques dEscocia, Gales, Bretaña y Galicia solicitando los dominios .sco, .cym, .bzh y .gal respeutivamente. Dende les dos organizaciones xuveniles faen un llamáu a les asociaciones, empreses y colectivos, asina como al conxuntu de la ciudadanía pa qu’apoyen esta campaña que tien por finxu afitar la futura imaxe y identidá d’Aragón y Asturies na rede. N’Asturies la reclamación del dominiu .ast ta recibiendo apoyos na páxina por puntu ast que yá recibiere más de mediu centenar d’apoyos a la reclamación de l’aprobación d’un dominiu propiu que represente a la cultura y llingua asturianes na internet. 14 de febreru, 2007 0 FacebookTwitterPinterestEmail
Comunicación La exposición fotográfica de l’A.P.F.A nel Campus de Mieres var tar abierta un mes más by asturnet 7 de febreru, 2007 La exposición iguada pola Asociación Profesional de Fotoperiodistes d’Asturies, con motivu de les primeres Xornaes Internacionales de Periodismu cellebraes del 1 al 4 de Febreru , va tar disponible un mes más nel hall del Campus Universitariu de Mieres por mor de la bona rempuesta del públicu. La colección recueye más de 200 semeyes d’actualidá y venceyaes al mundu del fotoperiodismu. La muestra cuenta con fotografíes de l’axencia Reuters, Jose María Rubio, Gorka Lejarcegi del diariu “El País”, Javi Martínez de “El Mundo”, y “Plástica”, Miguel Berrocal d’ABC. Esta xera formó parte de les Primeres Xornaes de Fotoperiodismu xunto con charres, conferencies y un taller de fotoperiodismu al cargu d’Antonin Kratochvil, miembru de l’Axencia VII. Asina mesmo L’Asociación Profesional de Fotoperiodistes d’Asturies presentó la so publicación durante’l desendolcu de les xornaes. 7 de febreru, 2007 0 FacebookTwitterPinterestEmail
Comunicación Andecha Astur de Ribeseya sofita la campaña p’algamar un dominiu asturianu n’internet by asturnet 6 de febreru, 2007 Alrodiu de la concesión del dominiu propiu pal catalán .cat vuelven a sintise voces n’asturies. El Grupu Adecha Astur del Conceyu de Ribeseya mostro’l so sofitu a la campaña entamada recientemente pola plataforma “Por Un Puntu Ast” pa obtener un dominiu propiu n’internet “.ast “pa les páxines feches n’asturianu na rede. L’Asociación por un puntuAst entamó esta campaña en viendo los bonos resultaos obteníos na obtención del dominiu .cat en cataluña pa les páxines feches en catalán. La espaciu n’internet de la plataforma ye’l blog http://porunpuntuast.blogspot.com, onde se recueyen tolos sofitos que les distintes asociaciones o particulares quieran da-y a la propuesta. Andecha Astur de Ribeseya 6 de febreru, 2007 0 FacebookTwitterPinterestEmail
Comunicación Política Llingüística organiza un “Cursu d’asturianu faláu” cola RTPA by asturnet 2 de febreru, 2007 La Oficina de Política Llingüística del Principáu va desendolcar un “Cursu Básicu d’Asturianu Faláu pa Profesionales de la RTPA”, qu’entama en collaboración cola propia RTPA pa formar al so personal. El cursu desendolcaráse en 40 hores, acordies col programa que se reproduz darréu: CURSU BÁSICU D’ASTURIANU FALÁU PA PROFESIONALES DE LA RTPA (del 2 de febreru al 24 marzu del 2006) ENTAMEN: Radio Televisión del Principáu d’Asturies y Oficina de Política Llingüística del Principáu DIRECTOR: Ramón d’Andrés Díaz DURACIÓN: 40 hores MATRÍCULA GRATUITA ASIGNATURES Y PROFESORES: Variedaes xeográfiques de la llingua asturiana (8 hores). Profesor: Xosé Nel Comba Paz Ortoloxía de la llingua asturiana (10 hores). Profesor: Fernando Álvarez-Balbuena García Estilos y rexistros na llingua asturiana (8 hores). Profesor: Pablo Texón Castañón Práctiques y simulaciones d’asturianu faláu (14 hores). Profesor: Llinu Álvarez Santidrián FECHES: Díes 2-3, 9-10, 16-17, 23-24 de febreru del 2007 Díes 2-3, 9-10, 16-17, 23-24 de marzu del 2007 HORARIU: Vienres: de 18,00 a 20,00 hores. Sábados: de 10:00 a 13:00 hores. LLUGAR: Sede de la Radio Televisión del Principáu d’Asturies (Xixón) 2 de febreru, 2007 0 FacebookTwitterPinterestEmail
Educación Entamen a sentise rumores de rectificación alrodiu del Decretu de Primaria by asturnet 31 de xineru, 2007 Tres de la xunta caltenida ayeri ente’l Coseyeru d’Educación y los sindicatos paez afitase la posibilidá d’una rectificación del borrador que colocaba la optatividá de la llingua asturiana nuna situación de dsesaniciu. Poro, nun hai dengún testu nuevu nin cambios oficiales nos plazos de alegación que los sindicatos reclamaben como enforma curtios. Tres de la mentada xunta na que’l Conseyeru presentaba a los sindicatos el borrador del Decretu queda ver si de verdá camuda daqué con rapidez nun conflictu que dexa bien a les clares que puen tar en peligru munchos pasos daos alantre nos caberos venti años nel procesu de normalización social del asturianu, como perfitaba ayeri SUATEA nun comunicáu que se reproduz nesta mesma web. 31 de xineru, 2007 0 FacebookTwitterPinterestEmail
Educación Delles titulaciones de Filoloxía de la Universidá d’Uviéu podríen quedar desaniciaes by asturnet 30 de xineru, 2007 El Conseyeru d’Educación del Principáu José Luis Iglesias Riopedre declarose ayer tres de los actos de Santo Tomás d’Aquino celebraos na Universidá, dafechamente partidariu de suprimir les titulaciones de la que tengan con menos alumnos. Na Universidá asturiana hai cinco titulaciones qu’esti curso nun fueron a algamar los 10 alumnos de nuevu ingresu. El datu asoleyábase esti día nel Atlas de la España Universitaria. El Conseyeru fizo estes manifestaciones entendiendo que delles carreres podrían salvase, casu nel que taríen les “árees de conocimientu con relevancia pala marcha de la rexón”. En tou casu, los cambios nun se fadrán hasta que fine la reforma de la ley Orgánica de Universidades (LOU), depués de les eleiciones de mayu. 30 de xineru, 2007 0 FacebookTwitterPinterestEmail
Educación El borrador del Decretu que regula la Primaria conderga al asturianu by asturnet 30 de xineru, 2007 El Conseyeru d’Educación dio anuncia ayeri de los conteníos del futuru currículu d’Educación Primaria y ente les principales novedaes d’esti nuevu currículu alcuéntranse la de la optatividá de la enseñanza del asturianu, col agravante de que tendrá d’enfrentase con materies relacionaes cola informática y l’alfabetización dixital no que se considera una condena de muerte pala enseñanza de la llingua na primaria. El borrador de currículu que pue descargase de la páxina d’Educastur afita amás la medra de les hores de castellanu y matemátiques. Lliteralmente, el borrador de Decretu diz en castellán que “Quienes no deseen cursar Lengua asturiana realizarán actividades que contribuyan al desarrollo de competencias básicas fundamentalmente con la competencia en comunicación lingüística, la competencia en el conocimiento y la interacción con el mundo físico, la competencia en el tratamiento de la información y competencia digital, y la competencia cultural y artística”. La redacción de los nuevos currículos educativos encuádrase nel marcu del 35% de la enseñanza na qu’el gobiernu asturianu puede iguar a la so conveniencia. Les comunidaes nes que la so llingua ta declarada oficial el porcentaxe horariu sobre’l qu’actuen los gobiernos autónomicos ye del 45%. Una de les preocupaciones de Riopedre ye aumentar les hores de castellano que de 870 hores, ente los tres ciclos educativos, pasarán a ser 1.100 hores darréu s’apruebe’l futuru currículu. Otres de les asignatures que verán incrementáu’l so horariu llectivu son les matemátiques, l’ingles o conocimientu del mediu. Borrador del decreto 30 de xineru, 2007 0 FacebookTwitterPinterestEmail
Educación SUATEA pide la reforma del Decretu o la dimisión de Riopedre by asturnet 30 de xineru, 2007 SUATEA, el sindicatu mayoritariu de la escuela pública nAsturies, ta acabante despublizar un comunicáu col que quier manifestar la so indignación y sorpresa ante lagresiva y malintencionada propuesta del proyectu del decretu por que se regulal currículu de la Educación Primaria nAsturies no tocante al tratamientu que tien pa cola asignatura de llingua asturiana. Nesi comunicáu afirma que de nun seliminar esta propuesta con respecto a lasignatura dasturianu, pide la dimisión del conseyeru deducación por ser el responsable últimu desta situación. Pela importancia de la tema, reproducimos darréu íntegramentel comunicáu: Ayeri pela tardel señor Riopedre y la cúpula de la Conseyería dEducación presentaben a los sindicatos esti proyectu. Na disposición adicional segunda, nel apartáu 3 pon, testualmente, el siguiente párrafu: Quienes no deseen cursar Lengua asturiana realizarán actividades que contribuyan al desarrollo de competencias básicas fundamentalmente con la competencia en comunicación llingüística, la competencia en el conocimiento y la interacción con el mundo físico, la competencia en el tratamiento de la información y competencia digital, y la competencia cultural y artística. Na redacción de la propuesta manifiéstase la intención de xenerar una asignatura alternativa a la de llingua asturiana na que se lexitimal refuerzu en competencies básiques en comunicación llingüística y notres. La interpretación que damos con esto ye que los responsables de la redacción de la propuesta interpreten que nel estudiu de la llingua asturiana nun se desenrollen compentencies básiques llingüístiques, dalgo que nos paez sangrante y grave por demás. Esto, de facese, supondría la lenta y paulatina desapaición de lasignatura dientro del sistema educativu asturianu. Intenten, desta manera, que lasturianu tenga que competir con una alternativa que, tal y como se manifiesta en borrador, va ser, inclusive, más potente que les que tien que sufrir la materia en secundaria. Con esti ataque a la débil situación del idioma muestren, una vez más, la falta de sensibilidá, de responsabilidá y de defensa del patrimoniu cultural y idiomáticu común de los asturianos. El despreciu col que traten el problema llingüísticu y la falta de conexón cola realidá ye indignante dendel puntu de vista del nuestru sindicatu. Ye necesaria una rápida y axustada rectificación por parte desta conseyería, desti planteamientu enantes de quel proyectu tea definitivamente configuráu. Pidimos y desiximos, per otra banda, que se garantice la dignificación de la situación de lasignatura y que se dean pasos firmes pa buscar la so normalidá. De nun lo facer asina SUATEA va llamar a la movilización del profesoráu asturianu pola defensa dun tratu dignu de lasignatura, de la situación de los trabayadores y del idioma asturianu. Y hasta queso nun se produza SUATEA pide la dimisión del conseyeru deducación por nun tar a laltura de les circunstancies, por nun saber defender y apoyar col rixu necesariul patrimoniu cultural asturianu, por provocar con esta situación la progresiva desapaición de lasignatura. Pa ello SUATEA va ponese en contactu col restu de organizaciones sindicales, colectivos y instituciones asturianes pabrir un frente común de defensa. Llevamos 22 años descolarización precaria de lasignatura. Y hasta agora nun se dio nengún pasu nin se buscó solucionar la situación. Yá valió dabusos y de sectarismos propios dotres dómines. SUATEA, xunto con otros colectivos asturianos, cree que la única solución viable ye la declaración doficialidá de la llingua asturiana pa prevenir y desarmar estos ataques malintencionaos y amparar a los usuarios del idioma asturianu. 30 de xineru, 2007 0 FacebookTwitterPinterestEmail
Comunicación La Comisión Europea augura un crecimientu superior al 400 % de los conteníos creativos on line by asturnet 29 de xineru, 2007 Según un nuevu estudiu fechu pa la Comisión Europea, los ingresos por conteníos on line en Europa van alcanzar los 8 300 millones d’euros en 2010, lo que supón un crecimientu superior al 400 % namás en cinco años. L’estudiu fechu muestrase optimista col mercáu de los conteníos creativos y vaticina un gran crecimientu por mor del aumentu de la implantación de la banda ancha, el crecimientu de les redes de móviles avanzaes y la proliferación del consumu de dispositivos dixitales. La Comisaria de Sociedá de la Información y Medios de Comunicación, Viviene Reding declaró que “la converxencia dixital que se espera dende va tiempu ta convirtiendose nuna realidá económica que crea grandes oportunidaes para los consumidores, los proveedores de conteníos y les industries tecnolóxiques d’Europa”. Dende la CE considerase que p’aprovechar esta oportunidá ha d’iguar un paquete de midíes sobre los conteníos on line nel mercáu único europeu, que se va asoleyar posiblemente durante’l segundu semestre de 2007. L’estudiu nomáu “Conteníos interactivos y converxencia: consecuencies pa la sociedá de la información” demuestra que’l crecimientu del sector ye una realidá, anque Europa aun va a la zaga de los Estaos Xuníos nel desarrollu de la banda ancha, y de Xapón y Corea nel de servicios móviles. Un de los principales problemes pal desarrollu del sector ye la conectividá ya que, nel casu de la banda ancha persiste’l problema de que pue causar dixebres ente los distintos estaos miembros y nel ámbitu de los servicios móviles, aun pesen la poca implantación de la 3G y la mala regulación de les tarifes. Munchos d’estos obstáculos van solventase pola propia evolución del mercáu pero pa otros problemes va ser necesariu facer modificaciones nel marcu xurídicu europeu pa dar seguridá xurídica a los consumidores, a les empreses proveedores de conteníos y a la industria d’equipos. Anguaño tan estudiándose más de 175 contribuciones escrites con vistes a iguar un plan de trabayu en 2007. Más de 160 d’estes contribuciones fueron asoleyaes on line. 29 de xineru, 2007 0 FacebookTwitterPinterestEmail
Comunicación El gobiernu asturianu adxudica les canales de televisión dixital by asturnet 26 de xineru, 2007 El Conseyeru d’Economía y Administración Pública, Jaime Rabanal, dio anuncia de les concesiones de les llicencies de televisión dixital terrestre d’ámbitu autonómicu y local. Nel ámbitu autonómicu Productora Asturiana DTV, vinculada al grupu PRISA y qu’emite como Localia TV, algamó l’adxudicación de la llicencia autonómica. Nel local la editorial Prensa Asturiana algamó la llicencia nes 8 demarcaciones nes que se dixebró’l país. El Partíu Popular anunció la so intención d’apoyar la proposición non de llei d’Izquierda Xunida p’aumentar el númeru de llicencies autonómiques de TDT. La concesión administrativa pa estes canales tien una duración de diez años, y en pallabres del Conseyeru d’Economía con estes canales se van crear 835 puestos de trabayu. El Gobiernu asturianu invertirá 45.5 millones d’euros pa garantizar l’accesu a les nueves canales de televisión. Cada una de les canales puede ufrir cuatro programes dixitales, nos que s’incluyen les diferentes funciones adicionales del nuevu tipu de televisión. Los conceyos con más de 100.000 habitantes, Xixón y Uviéu, tienen la facultá d’adxudicar llicencies de televisión dixital terrestre. El Conseyeru dio anuncia de que la demarcación correspondiente a les Cuenques mineres del Caudal y del Nalón nun se adxudicó a la espera de que dende’l Ministeriu d’Industria reordené la mesma y se faiga una nueva qu’englobe los conceyos de la cuenca minera del Nalón. Les demarcarciones de la TDT, y les canales concedíes, son: Avilés: Editorial de Prensa Asturiana, El Comercio y Canal 48 Occidente. Cangas: Editorial Prensa Asturiana, Canal 48 Occidente y Mollares Pictures. Xixón: Editorial Prensa Asturiana, Televisión Local de Gijón y El Comercio Piloña: Editorial Prensa Asturiana, Canal 48 Occidente y UTE Opalo-Onix-Starteam. Llanes: Editorial Prensa Asturiana, Canal 48 Occidente y UTE Opalo-Onix-Starteam. L.luarca: Editorial Prensa Asturiana, Canal 48 Occidente y Centro Emisor de Occidente Uviéu: Editorial Prensa Asturiana, Oviedo Televisión y El Comercio El Conseyeru refirióse a les canales qu’emiten actualmente y que nun algamaron la llicencia. Rabanal dixo qu’estes empreses habrán “cumplir la llei y dexar d’emitir nos plazos correspondientes”. 26 de xineru, 2007 0 FacebookTwitterPinterestEmail