Sociedá El PP da-y el so apoyu al Plan de Normalización Social pal asturianu del Gobiernu PSOE-IX-Bloque by asturnet 23 de xunu, 2005 El Partíu Popular (PP) dio’l so votu favorable a l’aprebación del Plan de Normalización Social pa la llingua asturiana que sometíase ayer al so refrendu na Xunta Xeneral. Los otros grupos, PSOE y Izquierda Xunida-Bloque por Asturies, a la so vez, aceptaron incorporar al Plan les ocho propuestes de los populares. Joaquín Arístegui relacionó l’apoyu del so grupu al Plan cola prósima reforma del Estatutu énte la qu’afirmó “l’asturianu ye un tema crucial y lo bastante importante como pa nun andar a piedraes con ello”. El Plan de Normalización Social de la llingua asturiana aprebáu pel Conseyu de Gobiernu del Principáu cuenta dende ayer col respaldu unánime de tolos grupos políticos representaos na Xunta Xeneral, incluíu el Partíu Popular, que s’amosara hasta agora percríticu col paquete d’acciones de política llingüística de la Conseyería Cultura. Na so intervención énte’l plenu el representante del PP relacionó el consensu agora algamáu alrodiu de la normalización de la llingua asturiana cola prósima reforma del Estatutu: “nós queremos un nuevu Estatutu que seya sólidu, estable, duraderu y nun vamos ser los que pongamos obstáculos a llogralu por un asuntu como’l del bable, que se puede solventar col alcuerdu de toos”. Na rueda de prensa que siguió a la discusión y posterior votación del Plan, el diputáu popular Joaquín Aréstegui quiso resaltar la trescendencia de lo vivío esti xueves nel hemiciclu de la Xunta Xeneral, un fechu que dixo “revaloriza al parlamentu asturianu al amosar que los distintos grupos tamién podemos entendenos a veces y llegar a alcuerdos como esti, énte un asuntu importante p’Asturies, que nunca tensionó la sociedá asturiana y énte el que nun vamos ser nós los que prevoquen esa tensión nunca”. El representante del PP, sicasí censuró tanto a la conseyera de Cultura como a los dos grupos que formen parte del gobiernu por “presentar un Plan aprebáu enantes de da-y la oportunidá al partíu de la oposición a discutilu o amosar la so opinión”, de cualquiermiente, Aréstegui, quiso aparcar les diferencies col gobiernu nesta ocasión y na so intervención parlamentaria anunció la intención del so grupu de votar favoratiblemente al Plan de Normalización. La conseyera de Cultura, Ana Rosa Migoya, defendió na so intervención la politica llingüística entamada pol gobiernu del Principáu y que tien la so articulación nel Plan de Normalización Social de la llingua asturiana, del que dixo “val pa desbloquear la cuestión llingüística n’Asturies” y respective a les posibles crítiques y desconfiances que xenerare nos sectores más favorables a la normalización afirmó na parte final, espresándose n’asturianu que “naide nun puede dicir que’l Plan supón nengún retrocesu, al contrario ye un azance respetuosu con toles sensibilidaes”. La conseyera tamién advirtió sobre posibles inxerencies esternes respective al gallego-asturiano y defendió que “el Principáu y les sos instituciones son la única administración con competencies en materia llingüística pa esa zona”. Paloma Uría, pela so parte, nuna intervención íntegramente en llingua asturiana, apoyó el Plan de Normalización y saludó como positives les propuestes feches pol grupu popular. Al empar la representante d’IX-BA especificó que pal so grupu “la normalización ye dir camín de la oficialidá” y quiso remembrar les situaciones “d’arnormalidá” que vive la nuestra llingua anguaño, “especialmente nel ámbitu de la enseñanza, onde non tolos alumnos que deseen recibir l’asignatura pueden facelo nel so centru y onde la situación ye sobremanera preocupante no que cinca al profesoráu, y n’especial el que nun tien estabilidá”. José Luis Montes, en nome del grupu socialista dixo que “esti ye un bon Plan”, anunció l’apoyu de los socialistes a les ocho propuestes del PP y terminó la so intervención faciendo usu del asturianu. Na rueda de prensa -informal énte l’ausencia de cámares de televisión y con pocos medios yá presentes na sala- que siguió al debate y aprebación del Plan de Normalización los tres grupos quisieron escenificar la so xuntura nun fechu con pocos precedentes na vida parlamentaria y nella coincidieron en señalar la importancia de que la política llingüística diseñada nel Plan cuente col respaldu del parlamentu en plenu, con tolos grupos políticos d’alcuerdu. Nesti alcuentru colos representantes de los medios informativos, Joaquín Aréstegui volvió recalcar la importancia del consensu algamáu “de cara al debate que va abrise nun futuru prósimu sobre la reforma del Estatutu”, pal diputáu popular “el tema del asturianu ye crucial nesa reforma pero nun queremos que seya el principal, por eso convién algamar alcuerdos como esti que son el reflexu de lo que quier la sociedá asturiana:quieren y estimen al bable, pero al empar d’una manera mayoritaria nun acepten la obligatoriedá, nin nenguna imposición, nun quieren una imersión llingüística que nun respete la voluntariedá”. Nel repartu de les intervenciones énte los escasos medios presentes na rueda de prensa, el diputáu socialista José Luis Montes, coincidió col representante del PP en “que la oficialidá y la propia llingua nun tienen que protagonizar la reforma del Estatutu, que s’entamará l’añu que vien, ye importante recordalo y nesi sen ye mui positivo ver que la totalidá de la Xunta respalda’l Plan de Normalización aprebáu pel gobiernu”. Montes remembró “los prexuicios qu’inda esisten na sociedá respective al asturianu, nun fai falta alcordase qu’equí siempre se consideró una fala menor, d’aldeanos, el Plan de Normalización va valir pa dignificar la llingua y acabar con munchos prexuicios”. Pel so llau, Paloma Uría, que facía nones espresivos mientres los representantes de los otros dos grupos parlamentarios refugaben la oficialidá como una posibilidá pa plantear a curtiu plazu y cuando-y llegó’l turnu afirmó: “nun ye del too correcto relacionar oficialidá con obligatoriedá, hai munches clases d’oficialidá, nel estáu español esisten anguaño situaciones mui distintes, nun hai un modelu únicu y nós nun renunciamos a qu’Asturies tamién tenga’l propiu”. Pa Uría “la normalización social, talo nós la entendemos, tien valir pa sensibilizar a la xente de qu’hai de siguir dando pasos nesi camín y ún que consideramos fundamental y qu’ha llegar ye’l del reconocimientu de la oficialidá que garantice dafechu la situación llegal del asturianu”. 23 de xunu, 2005 0 FacebookTwitterPinterestEmail
Sociedá El PP considera al asturianu “tema d’estáu” y espón ocho propuestes pa la so normalización social by asturnet 22 de xunu, 2005 El diputáu del Partíu Popular na Xunta Xeneral del Principáu Joaquín Arístegui ofreció ayer nuna rueda prensa la colaboración del so partíu na normalización de la llingua asturiana. Énte’l debate parlamentariu del Plan elaboráu pola Conseyería de Cultura y aprebáu pol Conseyu de Gobiernu del Principáu, Arístegui afirmó que’l so grupu va presentar ocho propuestes p’amestar al paquete de midíes normalizadores del gobiernu, que los populares califiquen de “insuficiente”. Les propuestes del PP pa la normalización del asturianu refiérense na so mayoría a la enseñanza de la llingua que proponen espardir a tolos centros educativos de la rede pública; un plan d’evaluación y supervisión del desarrollu de los currículos d’asturianu; la inclusión de l’asignatura de llingua ente les materies optatives pa toles modalidaes de bachilleratu y la creación de secciones específiques de materiales relacionaos cola llingua y cultura asturianes en centros escolares. Tocante a la normalización social propiamente dicha, el PP propón entamar campañes informatives y divulgatives sobre l’asturianu nel ámbitu municipal y sobre les funciones de la Xunta de Toponimia. Tamién proponen campañes específiques empobinaes a la xente mozo y a les muyeres mayores de 30 años, los dos sectores que según, afirmó Arístegui, más ayenos tán a la realidá llingüística, según datos del so partíu. El portavoz de los populares descartó na so comparecencia énte los medios que’l PP apueste pola oficialidá: “inda pa la mayoría d’asturianos la llingua ye un tema bien queríu, un 70 o un 80 por cientu tán en contra de cualquier obligatoriedá”. Ënte’l debate del Plan de Normalización Social del Principáu na XUnta Xeneral, Joaquín Arístegui, ofreció el diálogu y la colaboración del so partíu nun tema que calificó de “tema d’estáu” y nesi sen van les propuestes elaboraes polos populares. El diputáu del PP, criticó’l procesu siguíu pa elaborar el Plan de CUltura, nel que “nun se nos tuvo en cuenta” y afirmó que’l partíu de la oposición “nun quier un divorciu” sobre esti tema. Arístegui declaró que’l trámite parlamentariu de la xornada de güei “ha servir pa tender puentes ente tolos grupos, porque’l parlamentu ta pa llegar a alcuerdos. 22 de xunu, 2005 0 FacebookTwitterPinterestEmail
Sociedá El conceyu d’Ayer saca a información pública la propuesta de la Xunta de Toponimia by asturnet 22 de xunu, 2005 L’Ayuntamientu d’Ayer remitió a les asociaciones culturales y vecinales del conceyu el nomenclátor elaboráu pola Xunta de Toponimia del Principáu y ya publicáu nel BOPA pa ufiertar la posibilidá de que se presenten les alegaciones afayaíces. El consistoriu quier reunise darréu con estes asociaciones locales pa estudiar en xunto la propuesta de los espertos en toponimia del Principáu, enantes de reenviala a la Conseyería de Cultura pa la so revisión. L’Ayuntamientu ayerán tien enviao la relación de nomes de la Xunta de Toponimia a les asociaciones y caltién abiertu un plazu de 20 díes pa la presentación d’alegaciones. Asina se diz nuna nota emitía pol propiu Ayuntamientu. Una vez estudiaes y del aconceyamientu coles asociaciones, unviaráse de nuevu a la Oficina de Política Llingüística de la Conseyería de Cultura y darréu d’esta última revisión, la propuesta toponímica va volver a pasar pel plenu municipal. 22 de xunu, 2005 0 FacebookTwitterPinterestEmail
Sociedá La delegación asturiana a los territorios saharauis ocupaos denuncia la represión de Marruecos by asturnet 21 de xunu, 2005 Los ocho integrantes de la delegación oficial asturiana que viaxaron esti domingu a Marruecos col fin de visitar los territorios saharauis ocupaos ufiertaron ayer una rueda de prensa n’Uviéu na que relataron lo sucedío y denunciaron la “dura represión” que’l gobiernu de Rabat ta aplicando a los refuxaos. Pal coordinador d’IX Jesús Iglesias, integrante de la delegación, la negativa de les autoridaes marroquines a dexalos desembarcar y la represión de les protestes saharauis amuesen “al típicu gobiernu autoritariu y débil que teme lo ocurrío en El Aaiun pueda ser un mal exemplu a siguir polos sos ciudadanos”. Iglesias tamién tuvo palabres dures pal Ministeriu d’Asuntos Esteriores español y afirmó sentise “traicionáu” cuando dende esti Departamentu se informó de que la delegación asturiana fuera advertida el viernes pasáu de que la so visita “nun se diba poder llevar a la práctica” y que les autoridaes de Rabat “nun diben permitilo”. Pal coordinador d’Izquierda Xunida d’Asturies “nun ye de recibu” el comunicáu d’Asuntos Esteriores y darréu de manifestar el so alcuerdu cola actitú del gobiernu español n’otros conflictos “que suceden a miles de kilómetros” consideró “inconcebible que cierren los güeyos énte lo que sucede en Marruecos”. Los miembros de la delegación asturiana a la que les autoridaes marroquines impidieron desembarcar esti domingu anunciaron que la visita de delegaciones d’otres comunidaes va siguir al pesar de l’actitú del gobiernu de Rabat y la prósima va ser una embaxada humanitaria d’Andalucía. Na rueda de prensa los integrantes de la delegación institucional asturiana entregaron a los medios diversu y abundante material gráficu recoyío pola propia delegación. Nes semeyes obteníes polos representantes institucionales asturianos puede vese el momentu nel qu’axentes de la policía de Marruecos impiden la baxada del avión de los observadores. Otres imáxenes amuesen la manifestación pro-gubernamental que supuestos ciudadanos saharauis conformes cola ocupación del so país entamaron nes pistes mesmes del aeropuertu de L’Aiunn pa protestar contra “la inxerencia estranxera nel nuestru país”, talo rezaba una pancarta n’español. Respective esa protesta pro-marroquina, Jesús Iglesias y otros miembros de la delegación, ironizaron sobre “el fechu curiosu de que les banderes de Marruecos yeren toes del mesmu tamañu y la mesma factura, igual que los retratos oficiales del monarca alauita, como si-yos los acabaran de repartir”. La embaxada asturiana taba formada por miembros del “Intergrupu pal Sahara” de la Xunta Xeneral del Principáu, representantes políticos y sindicales y de la Plataforma Astur-Cántabra de conceyos solidarios col Sahara. 21 de xunu, 2005 0 FacebookTwitterPinterestEmail
Sociedá Valencia adelántrase a Asturies na conmemoranza del centenariu de Severo Ochoa by asturnet 21 de xunu, 2005 Valencia, la ciudá a la que’l premiu Nóbel asturianu Severo Ochoa dexó el so legáu, va ser la sé principal de los actos de rememoranza del centenariu del científicu. El Muséu de les Ciencies Príncipe Felipe de la ciudá levantina prepara ya delles d’estes actividaes como una gran esposición sobre’l legáu y les investigaciones del físicu valdesanu y la comunidá valenciana apuesta por sofitar el centenariu d’Ochoa al través del Conseyu Valencianu de Cultura, que preside Santiago Grisolía, mentantu la celebración del centenariu na tierra natal del Nóbel sigue tando na incertidume al pesar de los deseos del Principáu y d’otres instituciones como’l conceyu de Valdés pa remembrar a ún de los asturianos más relevantes del sieglu pasáu. La iniciativa del Conseyu Valencianu de Cultura y del Muséu de les Ciencies de Valencia ye hasta agora la única que ta puesta en marcha pa celebrar el centenariu del Nóbel, mientres se baraxen diverses iniciatives que podía entamar la Fundación Carmen y Severo Ochoa, presidía por César Nombela y cola que podíen colaborar tanto el gobiernu del Principáu, como la comunidá madrilana, onde tien la sé esta institución. Sicasí, de momento, estes posibles iniciatives inda tán por perfilar y poco ye lo que se conoz d’elles. En tantes se solventen les incógnites sobre los actos del centenariu d’Ochoa n’Asturies y el restu del estáu, Valencia paez ser la única comunidá na que se trabaya anguaño por da-y a la celebración la relevancia meritada. A esa comunidá y al Muséu de les Ciencies Príncipe Felipe, dexó el científicu asturianu tol so legáu y ende nesa última institución tien una sala dedicada, xunto a otru espaciu dedicáu al tamién Nóbel Santiago Ramón y Cajal. 21 de xunu, 2005 0 FacebookTwitterPinterestEmail
Sociedá Presentóse un estudiu de la salú de les muyeres asturianes con reflesiones d’elles propies by asturnet 21 de xunu, 2005 Carmen Mosquera Tenreiro, médica-epidemióloga, Marían Uría Urraza, socióloga de la salud y la psicóloga y sexóloga Mercedes García Ruiz, son les autores del llibru “La salud de las mujeres en Asturias. Reflexiones desde las propias mujeres”, que se presentó esti miércoles 21 n’Uviéu. Editáu pol Institutu Asturianu de la Muyer y la Conseyería de Salú, aborda les principales cuestiones sanitaries qu’esmolecen a les muyeres na nuestra comunidá dando voz a les propies protagonistes. La Directora del Institutu Asturianu de la Muyer, Begoña Fernández, y el Director Xeneral d’ Organización de les Prestaciones Sanitaries, José Ramón Riera, fueron los encargaos de presentar esti estudiu, que complementa otru de 2002: “La salud en las mujeres”, centráu n’ indicadores cuantitativos de les prestaciones sanitaries a les muyeres asturianes. El nuevu trabayu qu’agora se presenta aborda el tema de la salú dende una perspeutiva cualitativa y, al través d’una metodoloxía basada nos grupos de discutiniu, da voz a les propies muyeres, tanto a les profesionales como a les usuaries del sistema sanitariu. Les reflexones y conclusiones que s’espeyen nel llibru son les aportaciones de siete grupos de discusión nos que participaron más de 50 muyeres: médiques de familia, obstretes, xinecólogues, psicólogues, comadrones, enfermeres y trabayadores sociales; muyeres representantes del entornu asociativu del Vai del Nalón, de Llugones y de la zona central; muyeres moces del ámbitu asociativu xuvenil y alumnes del I.E.S. Alfonso II d’Uviéu. Toes elles traten sobre les principales esmoliciones que preocupen a les muyeres asturianes en cuestiones sanitaries, dende l’anticoncepción, la sexualidá, la medicalización de la vida de la muyer, o los problemes de salú provocaos pola violencia de xéneru. 21 de xunu, 2005 0 FacebookTwitterPinterestEmail
Sociedá La Fundación Municipal de Cultura de Xixón ufierta un diversu programa d’actividaes pal veranu by asturnet 21 de xunu, 2005 El calandariu d’actividaes culturales entamaes pal veranu de la Fundación Municipal de Cultura de Xixón ofrez una diversa gama de propuestes empobinaes tanto a la xente del conceyu como a los visitantes de fuera. Una amuesa sobre les ciencies nel mundu andalusí de la Fundación Caixa, otra sobre l’artista Joaquín Sorolla nel Muséu Nicanor Piñole ufiértense como los platos fuertes d’un calandariu d’actividaes onde la música y les propuestes d’ociu pa los más mozos tamién tienen un papel destacáu. Nel capítulu musical y tocante a la formación son los Talleres d’Improvisación que van impartise ente los díes 11 al 15 de xunetu y qu’inclúin actividaes teóriques y práctiques sobre armonía, combos, jam sessions y música jazz moza. La celebración de la VIII Selmana de Música Antigua ye otru de los eventos culturales, que nesti casu va tar dedicada a la música del tiempu de Cervantes, coincidiendo col so cuartu centenariu. Ente’l 16 y el 28 d’agostu celébrase un añu más el New Millenium Piano Festival, que va traer al Teatru Xovellanos a dellos solistes de proyección internacional. Otra cita que se repite ye’l ciclu de cine “Peor imposible”, esti añu dedicáu al cine de Serie B de monstruos emabaxo’l títulu “El sueño de la razón. La sonrisa del monstruo”,con producciones de Xapón Thailandia, Italia, Arxentina y México. Colonies y talleres empobinaos a rapacinos, constitúin la ufierta educativa destinada a los más mozos y na que van tener un papel destacáu les actividaes relacionaes cola conservación del patrimoniu. Les propuestes culturales de la FMC-UP pal veranu xixonés compleméntense cola ufierta de cursos y talleres de la Universidá Popular. Fundación Municipal de Cultura de Xixón 21 de xunu, 2005 0 FacebookTwitterPinterestEmail
Sociedá Al d’Asturies denuncia la política d’inmigración del estáu español y d’otros estaos de la Unión Europea by asturnet 20 de xunu, 2005 Isabel Miguel, responsable d’inmigración d’Amnistía Internacional d’Asturies, presentó esti llunes 20 n’Uviéu un informe da la organización humanitaria referíu al estáu español nel que s’asegura qu’ésti incumple les sos obligaciones internacionales de protección a refuxaos ya inmigrantes. La presentación del informe “Frontera Sur” fízose coincidiendo cola celebración del Día Mundial del Refuxáu. Pa los responsables d’A.I. les polítiques migratories adoptaes pol estáu español y los otros estaos miembros de la Unión Europea (UE), asina como la entamada en terceros países como Marruecos impiden a les persones que fuxen de graves violaciones de derechos humanos llegar a España, pidir asilo y algamar protección. Amás, según la organización humanitaria, nos procesos d’espulsión, nun se garantiza el principiu de non devolución de persones a países nos qu’hai serios nicios de que van ser vulneraos los sos derechos humanos. La responsable de migración d’Aministía Internacional d’Asturies, Isabel Miguel aseguró que “estes polítiques estatales contravienen les obligaciones internacionales de protección de los refuxaos ya inmigrantes”. Pa la portavoz d’AI:tanto les autoridaes españoles, como los medios de comunicación invisibilicen a los refuxaos”. Miguel afirmó que “mientres se fai referencia al fluxu de ilegales, ocúltase la realidá de los que fuxen de persecución y graves abusos nos sos países d’orixe. Asina, según AI: “na Frontera Sur española refúguense solicitúes d’asilu de persones procedentes de países como República Democrática del Congo o Sudán, onde se producen abusos y violaciones de los derechos humanos., aseguró Isabel Miguel,na presentación n’Uviéu del Informe Frontera Sur: El Estado da la espalda a los derechos humanos de los refugiados e inmigrantes. Este informe pone de manifiesto los obstáculos que encuentran muchas personas que huyen de persecución y graves abusos en sus países de origen, así como la situación en la que se encuentran los refugiados, solicitantes de asilo e inmigrantes que llegan a territorio español a través de la Frontera Sur (Ceuta, Canarias, la Costa Andaluza y también Melilla), que es una de las fronteras de mayor afluencia de Europa. 20 de xunu, 2005 0 FacebookTwitterPinterestEmail
Sociedá El director del Desfile de San Patriciu de Nueva York visita Asturies invitáu pol gobiernu del Principáu by asturnet 20 de xunu, 2005 El manaxer xeneral de la organización del Día de San Patriciu en Nueva York, John T. Dunleavy, llega güei a Uviéu invitáu pol gobiernu del Principáu a una visita na que’l director de la Gran Parada va tener ocasión de conocer diverses manifestaciones de la cultura popular asturiana. Dunleavy, correspuende asina al brinde que la delegación del gobiernu autonómicu-y fizo en Nueva York pa visitar la nuestra comunidá. El cabezaleru del Desfile de San Patriciu va aprovechar la so visita pa entrega-yos a les Bandes de Gaites de Corvera y Lluanco el premiu al meyor conxuntu estranxeru de la última Parada John T. Dunleavy va asistir na tarde d’esti martes 21 a una espicha de confraternización nun llagar de Tiñana onde va alcontrase col conseyeru de Xusticia y Esteriores Francisco José García Valledor. Mañana el mánayer del San Patriciu niuyorquín va visitar la Xunta Xeneral onde lu va recibir la presidenta del parlamentu María Jesús Fernández y pela tarde entregará’l premiu a les bandes de gaites asturianes nun actu nel Palaciu del Marqués de Camposagrado n’Avilés. El xueves, Dunleavy viaxa hasta Cuadonga y darréu visitará’l Dolmen y la capiella de Santa Cruz en Cangues d’Onís. Pela nueche tien una cena organizada nel llagar Tierra Astur de Cualloto na que van acompañalu amás del conseyeru Valledor y del director xeneral de Política Llingüística y Promoción Cultural, Carlos Madera, músicos y miembros de colectivos culturale asturianos, como la cantante Annabel Santiago, el gaiteru Bras Rodrigo, y el colectivu Belenos. A medianueche, el director del desfile de San Patriciu, va poder asistir a la Foguera de San Xuan na Plaza la Catedral, y a l’actuación de la compañía de teatru “Margen” y del grupu Tejedor. El programa de la visita de John Dunleavy a Asturies complétase el viernes 24 con una visita al Muséu de la Gaita de Xixón y al Festival Internacional de Gaita de Nava, onde actúa el músicu irlandés Michael Murphy, director de la Banda de Gaites Carrigaline Pipe Band. El sábadu Dunleavy va asistir al Festival de la Oveya Xalda d’Argüeru (Villaviciosa) y el domingu, remata la so visita a Asturies con un paséu pela catedral d’Uviéu y la Cámara Santa. 20 de xunu, 2005 0 FacebookTwitterPinterestEmail
Sociedá Una delegación asturiana viaxa a L’Aaiun pa interesase pola situación de los refuxaos saharauis by asturnet 16 de xunu, 2005 Una delegación asturiana, formada por representantes del Intergrupu pal Sáhara de la Xunta Xeneral del Principáu y de la Plataforma Astur-cántabra de Conceyos Solidarios col Sáhara, viaxa esti sábadu 18 a L’Aaiun pa interesase pola situación de los refuxaos saharauis. La delegación desplázase a esta zona ocupada por Marruecos pa conocer en sitiu les consecuencies de la respuesta represiva del réxime alauita a los últimos movimientos de protesta entamaos n’antigua capital del Sáhara, español, talo ficieran apocayá otres delegaciones institucionales de diverses comunidaes del estáu. Les autoridaes marroquíes impidieron nes caberes selmanes la entrada nel territoriu anguaño embaxo la so xurisdición a les distintes delegaciones del estáu qu’acudíen a interesase pola situación de los refuxaos saharauis. Pa los representantes de la delegación asturiana que viaxa esti sábadu a L’Aaiun, la negativa del gobiernu de Marruecos a dexar entrar delegaciones estranxeres, “fai temer lo peor” sobre la situación de los derechos humanos ente la población procedente del Sáhara Occidental. Los delegaos asturianos quieren constatar sobre’l terrenu la veracidá o non de les violaciones de los derechos humanos denunciaes por ciudadanos y organizaciones saharauis. La representación institucional d’Asturies que viaxa a los territorios ocupaos por Marruecos va encabezada pol coordinador d’Izquierda Xunida d’Asturies, Jesús Iglesias; la diputada autonómica de la mesma organización Diana Camafeita; el presidente de la Plataforma Astur-cántabra de Conceyos Solidarios col Sáhara, Eleuterios Bayón; Juan Luis Vallina Ariznavarreta, conceyal de Llanera; Ramón Villar, conceyal de Parres; Miguel Ángel Villalba y María Rosa Fernández, conceyales nel Ayuntamientu d’Avilés; y los dirixentes sindicales Roque Galcera y Adrián Redondo. La delegación entama na tarde d’esti sábadu 18 dende l’aeropuertu d’Asturies el viaxe que la va empobinar con destín a L’Aaiun. 16 de xunu, 2005 0 FacebookTwitterPinterestEmail