Sociedá 3.892 topónimos oficiales n’asturianu by asturnet 9 de payares, 2006 El Director Xeneral de Promoción Cultura y Política Llingüística, Carlos Madera, acompañáu d’Hugo Morán y Ramón d’Andrés, ufrió ayer datos sobre la campaña d’oficialización de la toponimia asturiana, na que participen 42 de los 78 conceyos del país. Carlos Madera anunció qu’actualmente 3.982 topónimos tienen la so denominación oficial n’asturianu, reconocida y aprobada pol Boletín Oficial del Principáu d’Asturies (BOPA). De los 42 conceyos que tán na campaña d’oficialización de la denominación popular 12 conceyos yá tienen los sos topónimos oficiales n’asturianu, otros 12 tán en trámites d’oficialización y nos trece que queden tán teniéndose conceyos de trabayu y campañes d’ivestigación toponímica. Madera quiso afitar que’l sofitu a esta iniciativa dexaba claru que “l’apoyu del Gobiernu al asturianu ya inequívocu y que’l prespuestu de política llingüística sube un 20% pal 2007”. Hugo Morán, presidente de la Federación Asturiana de Conceyos y alcalde de L.lena -un de los primeros conceyos en desenvolver aiciones normalizadores- afitó que la función de la toponimia ye recuperar los nomes de los pueblos y ciudaes “que nuna época de la historia intentáronse esborriar”. Hugo Morá señaló lo “guapo” de la recuperación de los topónimos tradiconales ye que nun ye un procesu alministrativu tradicional sinon que surde d'”alcuerdos de los vecinos”. Ramón d’Andrés, xefe de la Oficina de Política Llingüística, manifestó que na campaña de recuperación toponímica van invertise 25.000 euros na distribución y diseñu de cartafueyos, empobinaos a difundir los nomes tradicionales. Ramón d’Andrés afirmó que’l gobiernu asturianu ta adaptándose pasín a pasín a estos cambios, mesmo na documentación alministrativa como na señalización de los núcleos. D’Andrés, en referencia los topónimos nos que’l so usu na forma tradicional y en castellano tea xeneralizada “nun habrá nengún problema na denominación billingüe”, como tampoco “si la casa conceyu d’esi llugar decidiere qu’apaeciera sólo n’asturianu” 9 de payares, 2006 0 FacebookTwitterPinterestEmail
Escéniques Asturactiva entama’l IV Festival de Cuentos de Xixón by asturnet 8 de payares, 2006 L’asociación Asturactiva entama dende’l 8 de payares al sábadu que vien, el IV Festival de Cuentos de Xixón “Cuentos pa un mundu posible”. Les actividaes incluyen la llectura de cuentos por Puala Carballeira, Félix Albo, Charo Pita y Tim Bowley. Los cuentos cuntaránse dende les 8 la tarde nel Muséu Barjola. El vienres Féliz albo fadrá una sesión especial dientro del programa d’ociu alternativu “Abierto hasta el amanecer” nel Centru Cultural d’El Llano dende les 11 de la nueche. 8 de payares, 2006 0 FacebookTwitterPinterestEmail
Sociedá Un centimu y mediu de cada euro de la Conseyería de Cultura destinaráse al plan de normalización del asturianu by asturnet 8 de payares, 2006 El presupuestu de la Conseyería de Cultura, Comunicación Social y Turismu pal añu 2007 sedrá de 164.387.036 euros, esto ye una xuba del 2.5% respectu al añu 2006. L’Axencia de Comunicación, na que s’inxerta l’ente públicu, recibirá 57.255.956 euros. La RTPA, Radio Televisión Principado de Asturias, inxerta na Axencia de Comunicación, tendrá 18.353.645 anque’l so presupuestu final tará en 23.029.503, esta cifra algamaráse, en pallabres de la responsable de la Conseyería, “mediante la publicidá y l’usu mercantil del ente de comunicación”. La partida empobinada a la promoción y difusión del asturianu medra un 20%, respectu a 2006, llegando a 2.474.416 euros, l’un con cinco por cientu del presupuestu total de la Conseyería. Ana Rosa Migoya, Conseyera de Cultura Comunicación Social y Turismu, afirmó que “da cobertura abondo pal cumplimientu de la última añalidá del plan de normalización social del asturianu y del gallego-asturianu”. El presupuestu de la promoción al asturianu inxértase na Dirección Xeneral de Cultura que tien una xuba del 27%, respectu a 2006, hasta llegar a los 49,206,721 euros. Ente les partíes empobinaes a la construcción y remodelación d’infrastuctures culturales, la Universidá Llaboral de Xixón recibirá una partida de 28.692.000 destinada a la finalización de les obres del edificiu de Cabueñes. El Centru Cultual “Niemeyer” d’Avilés tendrá una partida de 3.178.220 euros y l’ampliación del Muséu de Belles Artes 5.699.846. La construcción de la “Ciudá del Motor”, en Tinéu, y el Circuitu automovilísticu “Fernando Alonso” recibirán cauna un millón d’euros. De la Conseyería de Cultura dependen otros entes de derechu públicu como’l RIDEA, que recibirá 318.725 euros; el Conseyu de la Mocedá d’Asturies, 541.436; el Muséu de Belles artes, 3.033.570 euros. 8 de payares, 2006 0 FacebookTwitterPinterestEmail
Sociedá Valledor diz que la Oficialidá será innegociable nel futuru pactu de gobiernu by asturnet 8 de payares, 2006 El Conseyeru de Xusticia, Francisco Javier García Valledor, participó ayer nel programa “La Lupa” de Canal 10, dirixíu por Juan Neira. Valledor nel trescursu de la entrevista afirmó que la oficialidá “ye dalgo innegociable pa Izquierda Xunida” refiriéndose a un futuru nuevu pactu de gobiernu, en casu de que PSOE y IX volvieren a pactar depués de les elecciones de 2007. El númberu dos d’IX pa les elecciones autonómiques afirmó “aspirar” a repetir la fórmula de gobiernu n’anguaño, anque esixendo más pesu pa Izquierda Xunida, asina mesmo dixo que yera normal qu’una cuestión como la reforma estatutaria se tratará nel pactu de gobiernu. Na negociación esplicó que “se pueden llegar a alcuerdos sobre’l tipu d’oficialidá y los conteníos de la mesma” pero nun “van ceder” na esixencia de da-y esi calter llegal al asturianu. Valledor criticó tamién les “posiciones enfermices”, refiéndose a Javier Fernández, nes que la cuestión llingüística ponse como “tapadera de pantasmes nacionalistes”. Francisco Javier García Valledor espuso que la oficialidá nun “ha ser una obligación pa los ciudadanos” sorrayando que lo que si tien de ser ye una “obligación pa l’Alministracuón”, cuestión cola que los socialistes nun tán dalcuerdu, esprensándolo cola “belixerancia” de Fernández o col “silenciu” d’Areces, dixo’l Conseyeru de Xusticia. Pa finar Valledor mostróse convencíu de qu’habrá un alcuerdu sobre la cuestión. 8 de payares, 2006 0 FacebookTwitterPinterestEmail
Sociedá La Xunta pola Defensa de la Llingua Asturiana posicionóse sobre les declaraciones de Javier Fernández. by asturnet 7 de payares, 2006 La Xunta pola Denfensa de la Llingua Asturiana considera, nun comunicáu de prensa, que les declaraciones de Javier Fernández, secretariu xeneral de la FSA-PSOE “suponen un pasu más na escapada de los dirixentes socialistes asturianos hacia les postures más acérrimes y centralistes” en cuantes a la cuestión llingüística. Pal colectivu de defensa de los derechos llingüísticos la relación que fizo’l cabezaleru de la FSA ente la defensa de la llingua y oficialidá col nacionalismu y la imposición nun ye entendible sobre manera cuando “esi mesmu partíu defende la oficialidá nos demás territorios billingües del estáu”. Pa la Xunta “l’intentu de confusión ente la protección qu’ellos defenden y la oficialidá que defendemos otros, busca distraer y engañar a la xente”. La Xunta nel comunicáu de prensa unviáu esti llunes siñala que tán “seguros de que’l Sr. Fernández tien de saber de sobrea que nun ye posible garantizar la sobrevivencia d’una llingua na nuesa sociedá si nun tien validez xurídica y s’iguala en derechos a les otres llingües oficiales. Sábelo bien porque los sos compañeros de partíu n’otres comunidaes defenden la oficialidá de les sos llingües”. El colectivu entrúgase’l porqué de que si Javier Fernández “diz querer tanto a la llingua” puede dexar que’l so usu “seya illegal y ensin validez xurídica”. La Xunta cita “pa vergoña del Sr. Fernández” la proposición non de llei presentada pol grupu parllamentariu socialista nel Congresu onde se destacaba “La protección e impulso de las lenguas propias de las diferentes Comunidades Autónomas en las que rige un régimen de cooficialidad lingüística no sólo no se ha producido en menoscabo de la lengua común, sino que ha generado una dinámica de convivencia lingüística… Los ciudadanos tienen derecho a usar, de acuerdo con su libre elección y con plena validez jurídica, cualquiera de las lenguas oficiales en todos los ámbitos y tipo de relación”. Pa la organización cívica esta proposición non de llei reflexa “lo que significá la oficialidá” sicasí “Asturies pa los dirixentes socialistes asturianos ye diferente” diz la Xunta Pola Defensa de la Llingua nel so comunicáu. Pa la Xunta’l “problema” de la FSA ye que tán faciendo de menos a los y les asturianes al nun considerar la so llingua al mesmu nivel que les demás. “Defenden esactamente lo contrario que defenden n’otres comunidaes y eso la xente sábelo”. La Xunta pola Defensa de la Llingua esplica que se tán negando derechos a una parte de la población d’Asturies cuando la FSA-PSOE ta abanderando bien de derechos pa toles minoríes y non el recorte. La Xunta, p’acabar, pide que la FSA s’axunte a la mayoría d’asturianos y asturianes que ven con normalidá la oficialidá. 7 de payares, 2006 0 FacebookTwitterPinterestEmail
Sociedá El Conceyu Abiertu recuerda a la FSA que se tien de gobernar pa toos y defender los derechos de la ciudadanía by asturnet 7 de payares, 2006 Fernando Ornosa, voceru del Conceyu Abiertu pola Oficialidá, calificó, en declaraciones a Asturnews, que l’asitiamientu que fizo esta fin de selmana Javier Fernández, secretariu xeneral de la FSA-PSOE, ye una grave irresponsabilidá al pone-y a la vindicación de la oficialidá un “collor políticu determináu”. Ornosa recordó-yos al presidente d’Asturies, Vicente Álvarez Areces, y a Javier Fernández que la llingua asturiana ye un patrimoniu de los asturianos y como tal merez el másimu grau de protección llegal. Sobre les declaraciones de Fernández au dicía que la oficialidá supondría una carga económica p’Asturies, Ornosa aseguró que “nun ye una caraga sinon que supón un activu económicu de gran bayura p’Asturies y que se ta desaprovechando”. Fernando Ornosa refirióse al “pretendíu” dialogu sobre la normalización del que falaba’l secretariu xeneral de la FSA esta fin de selmana, recordando la negativa de la FSA a aconceyar col CAO depués de solicitase’l mesmu por bien de vies. Esto pal voceru del CAO supón una falta de respetu a la representatividá del Conceyu Abiertu qu’agrupa a más de 170 organizaciones polítiques, sindicales, ciudadanes, feministes, xuveniles, y ente les que s’alcuentren les Mocedaes Socialistes d’Asturies ente otres. Fernando Ornosa recordó que “la democracia ye gobernar atendiendo a toles necesidaes de la ciudadanía” y que n’Asturies mientres qu’una “parte de la población nun cuente con derechos llingüísticos la mesma democracia ye una asignatura pendiente”. 7 de payares, 2006 0 FacebookTwitterPinterestEmail
Sociedá Javier Fernández dixo que nun quier una cooficialidá que represente una “carga” pa los asturianos by asturnet 6 de payares, 2006 Jesús Iglesias, coordinador d’Izquierda Xunida n’Asturies, acusó a la FSA-PSOE d’intentar “demonizar” y estimular el “rechazu” a la llingua asturiana “fomentando peligros inexistentes”. Esta yera la respuesta del coordinador xeneral d’IX a les declaraciones de Javier Fernández, secretariu xeneral de la FSA-PSOE, que dixere que n’Asturies existe un proyectu de nacionalismu al traviés de la cooficialidá del asturianu. El máximu cargu del PSOE n’Asturies refirióse al idioma en dos actos, el vienres en Sariegu y el sábadu en Cangas. Fernández dixo que nun quier una cooficialidá que represente una “carga” pa los asturianos y amestó qu’hai un proyectu pa entamar el nacionalismu n’Asturies dende la referida cooficialidá. Al tiempu, amuesóse dispuestu pa “normalizar” el desenvolvimientu de la llingua asturiana. Iglesias recordó-y a Fernández que n’Asturies yá existen movimientos nacionalistes, “lo mesmo qu’en munchos otros puntos d’España”, ensin qu’esa circunstancia suponga “nada grave” “Los socialistes nun tán llexitimaos pa criticar agora’l nacionalismu cuando gobernaron con socios nacionalistes ne bien de territorios”, comentó. Detrás de les afirmaciones de Fernández, pa Iglesias, alcuéntrase por embargu la intención d'”alarmar” a la sociedá, “cuando equí nunca nun tuvimos nengún problema d’esi tipu”. Sicasí, Iglesias nun cree que’l discursu de Fernández tenga nengún efectu ente la sociedá asturiano, porque los sos “argumentos tienen tan pocu rigor y base, que caen por sí solos”. Amás Jesús Iglesias dixo que Fernández “falsea la realidá” al insinuar que n’Asturies puea haber un “despegue del nacionalismu al través de la cooficialidá. Nun hai relación directa ente lo un y l’otru”, dixo. Pa IX, la cooficialidá sólo tendría efectos positivos, porque representaría ampliar l’ámbitu de derechos y llibertaes de los asturianos, asina como’l reconocimientu del valor de la llingua asturiana como parte de la cultura y la tradición asturiana. 6 de payares, 2006 0 FacebookTwitterPinterestEmail
Sociedá XEGA y Tribades convoquen una concentración en Bimenes pa protestar pola agresión del 22 d’ochobre by asturnet 6 de payares, 2006 XEGA y Tribades convoquen pal sábadu 11 de payares, a les 13,00 hores, una concentración delantre la Casa Conceyu de Bimenes en protesta poles agresiones homófobes del 22 d’ochobre en Martimporra. Esi día una pareya de llesbianes foi insultada y agredida en Martimporra pol fechu de “nun tapecer la so afectividá”. Dos de les sos amigues, que fueren a da-yos sofitu, tamién fueren agredíes. Pa dir a la concentración XEGA y Tribades van poner autobuses dende Xixón y dende Uviéu. XEGA 6 de payares, 2006 0 FacebookTwitterPinterestEmail
Sociedá L’Abertal reta a l’Academia a demostrar la non filiación llingüística del gallego-asturianu col gallegu by asturnet 6 de payares, 2006 L’asociación cultural Abertal, presidida pol académicu non numerariu de la lengua gallega, Carlos Xesús Varela Aenlle afirmó que l’estudiu de l’Academia de la Llingua Asturiana nun ye otro más qu”un cartafueyu ridículu ensin rigor científicu”. Varela afirmó que “l’usu del gallego n’Asturies ye porcentualmente mui superior al asturianu”, fechu estadísticu reconocíu nos diferentes estudios sociollingüísticos desenvueltos n’Asturies . Pa l’asociación de defensa de la galleguidá llingüística del Navia-Eo “la tutela llingüística que l’Academia de la Llingua Asturiana na zona llende con Galicia y col norte de Lleón” ye tamién oxetu de protesta. L’asociación cultural Abertal retó a l’Academia a “amuesar cientificamente que lo que se fala nel Navia-EO nun ye una variante del gallego, porque ya se convirtieron col tiempu na risa de tola llingüística internacional”, afirmó Carlos Valera. 6 de payares, 2006 0 FacebookTwitterPinterestEmail
Sociedá L’Academia de la Llingua presentó’l “Informe sobre la fala o gallego-asturianu. Una perspeutiva hestórica, social y llingüística” by asturnet 3 de payares, 2006 L’Academia de la Llingua presentó esti xueves, en rueda de prensa, l'”Informe sobre la fala o gallego-asturianu”, un estudiu sobre la realidá llingüística y social de la fastera más occidental del país. L’Academia presentó esta obra como’l material de referencia en política llingüística pa esta zona, a la par de valir como preséu divulgativu, dao que ta avaláu por bien d’historiadores, filólogos, o sociólogos. Como material de referencia pa la política llingüística nel territoriu d’Entrambasguas l’ALLA unvió l’Estudiu a toles cases conceyu de la zona, Gobiernu d’Asturies, presidencia de la Xunta Xeneral, Grupos Parlamentarios, y demás actores implicaos nel procesu normalizador. L’Estudiu afita la posición de l’ALLA sobre la llingua eo-naviega como “llingua propia d’Asturies, que caltién elementos comunes col asturianu y col gallegu, amás de tener elementos independientes”. A esti respectu l’Academia de la llingua esixó los máximos derechos pa los y les falantes d’esta llingua, esixendo que l’asturianu sía la llingua oficial d’Asturies y l’eo-naviegu idioma cooficial nel so ámbitu de referencia. Afitando que “nun ye entendible una reforma -del estatutu- que nun prevea la cooficialidá del idioma”. Ana Cano esplicó que l’actuación inxértase dientro de los mandatos de l’Academia, nos que s’afala a que la institución curie de los derechos de los falantes d’esta llingua. Pa l’Academia de la Llingua “los intentos d’inxerencies de tipu llingüísticu y políticu sobre esta zona son evidentes” y dende’l gobiernu asturianu “nun siempre se respondió cola firmeza que debería, llegando en casos a respuestes tibies”. Pa l’Academia de la Llingua d’esistir un marcu lexislativu similar al del restu de llingües d’España estes inxerencies nun se produciríen. Dende 1996 l’Academia creó la Secretaría del Navia-Eo que vien desenvolviendo un llabor normalizador na fastera más occidental d’Asturies. L’Academia de la Llingua vien capacitando al profesoráu de gallego-asturianu dende l’añu 2001, faciendo cursos d’alfabetización en gallego-asturianu, asina como espublizando bien de trabayos sobre las realidá llingüística d’esta zona. L’Informe afita l’asturianidá llingüística, histórica y social de los habitantes del Navia-Eo, reclamando mídies educatives y de “discriminación positiva” pa los y les falantes de la fala del Navia-Eo 3 de payares, 2006 0 FacebookTwitterPinterestEmail