Música José Manuel Tejedor nes clases de gaita de Magistralia by asturnet 1 de mayu, 2006 Magistralia organiza la segunda edición de los cursos de branu pa gaiteros y estudiantes de gaita de toles edaes que se van cellebrar en Xixón ente los díes 13 y 23 de xunetu. Jose Manuel Tejedor va ser el gaiteru encargáu de poner clases, mesmo indivicuales que d’orquesta, nunos cursos cuyu plazu de matrícula va tar abiertu hasta’l 15 de xunu. Amás de los cursos de gaita, Magistralia vuelve a organizar los cursos d’orquesta sinfónica, impartíos por músicos y maestros d’orquestes como Los Virtuosos de Moscú, la OSPA y la OSCO; los cursos de perfeccionamientu orquestal pa neños hasta 2º de grau mediu; les xornaes Magistralia Informática + Composición; y el proyectu d’allegamientu y comprensión artística pa neños d’ente 5 y 12 años. 1 de mayu, 2006 0 FacebookTwitterPinterestEmail
Escéniques La Universidá d’Uviéu sal a escena cola Selmana de les Lletres Asturianes by asturnet 30 d'abril, 2006 Mañana martes la Universidá d’Uvieu sal a escena cola Selmana de les Lletres Asturianes inaugurando un ciclu de conferencies y representaciones teatrales que van repartise a lo llargo de tola selmana y que va traer al Salón d’Actos de la Biblioteca del Campus del Milán al escritor Jon Cortázar, ente otros. Aviles, Mieres y la Casa Cultura da Veiga son otros de los llugares que mañana van remembrar el teatru asturianu. Tres de la presentación oficial d’esta Selmana nel patiu de la Conseyería de Cultura a les once y media la mañana, la Universidá d’Uvieu va presentar les xornaes ‘Universidá n’escena’, que s’abren con una conferencia de la filóloga Inmaculada Urzainqui, directora del Institutu Feijoo d’Estudios del Sieglu XVIII, que va tratar ‘La entremesística asturiana’, pa depues dar pasu a la representación per parte de la compañía Telón de Fondo de ‘L’ensalmador’ d’Antón de Marirreguera. A les ocho la tarde, el Teatru Palacio Valdes d’Aviles va presentar un poema dramático-musical de la Banda de Música de Corvera, dirixida por Jesús Cracio, que lleva por títulu ‘Ente bambalines. El teatru que lleves dientro’. Actu siguío, va inaugurase la escultura ‘Ente bambalines’ del artista Fidel Pena n’homenaxe al teatru asturianu. A la mesma hora, Centru Cultural Caxastur de Mieres va llevar a escena la versión de la pieza de Strindberg ‘Xulia’ que fai la compañía de Teatru Margen. Mentes que la Casa Cultura da Veiga va acoyer la representación d’ ‘Informe pra úa academia’ de Franz Kafka que fai la compañía Bacanal Teatro. 30 d'abril, 2006 0 FacebookTwitterPinterestEmail
Música El percusionista Juanjo Guillém va poner clases na Escuela Internacional de Música by asturnet 29 d'abril, 2006 El percusionista y pedagogu Juanjo Guillem va poner clases maxistrales na Escuela Internacional de Música de la Fundación Príncipe d’Asturies. Esta Escuela, fecha con motivu de la cellebración del XXV Aniversariu de los Premios Príncipe d’Asturies, cuntó ente los sos maestros invitaos con dalgunos de los más destacaos músicos del mundu, como Teresa Berganza, Premiu Príncipe d’Asturies de les Artes 1991, que’l pasáu mes de marzu, punxo clases maxistrales n’Uvieu. El cursu va cellebrase nel Conservatoriu Eduardo Martínez Torner d’Uvieu ente los díes 20, 21 y 22 de mayu y plazu d’inscripción ta abiertu dende esta selmana. Nes clases van trabayase conceptos artísticos d’obres pa solista de percusión (marimba, timbales, vibráfonu, xilófonu, caxa orquestal, platillos, bombu, pandereta y triángulu) asina como repertoriu. 29 d'abril, 2006 0 FacebookTwitterPinterestEmail
Escéniques El Vital Aza convoca certame y presenta dos obres pola Selmana de les Lletres by asturnet 28 d'abril, 2006 El teatru Vital Aza de La Pola L.lena va sumase a los actos de cellebración de la Selmana de les Lletres Asturianes con una programación específica cola que, al travies del área de Cultura del so Ayuntamientu, quier promocionar el teatru n’asturianu, faciendolu llegar a públicos de diferentes edaes. ‘Interditu o Pleitín d’Aldea’ de la Compañía Asturiana de Comedies y ‘Mitología Asturiana’ de Mari Luz Pontón van ser les dos pieces a representar a lo llargo de la selmana qu’entra, na que l’Ayuntamientu de L.lena tamien presenta’l so Certame de Teatru Popular Asturianu ‘Vital Aza’. El miercoles 3 de mayu a les ocho la tarde la Compañía Asturiana de Comedies presenta la pieza costumbrista ‘Interditu o Pleitín d’Aldea’, mentes que los neños van tener el sábadu día 6 a les siete la tarde una actuación espresamente pensada pa ellos que va tener como protagonistes a los personaxes mitolóxicos de Mari Luz Pontón, cola obra ‘Mitología Asturiana’. Pero otra parte, dientro del marcu de los actos de cellebración de la Selmana de les Lletres Asturianes, la estaya de Cultura del Ayuntamientu de L.lena aprova pa dar anuncia a la convocatoria del IV Certame de Teatru Popular Asturianu ‘Vital Aza’. Nesti certame únicu n’Asturies van poder participar toles persones interesaes con obres inedites de temática llibre siempre y cuando s’adapten a les característiques del teatru popular y tean escrites n’asturianu. El plazu de presentación d’exemplares termina’l 15 d’ochobre. 28 d'abril, 2006 0 FacebookTwitterPinterestEmail
Música Ocho grupos pola oficialidá del asturianu by asturnet 27 d'abril, 2006 Los veteranos Dixebra, Skama la Rede, DRD, Corquieu, K-Nalón, Oi! N’Ast, Toli Morilla y La Col.lá Propinde, son los ocho grupos qu’esti sábadu, 29 d’abril, a partir de les siete la tarde van xubir a los dos escenarios previstos nel Campus d’Humanidaes de la Universidá d’Uvieu pa cellebrar la XVIII edición del Conciertu pola Oficilialidá, que como cada añu ta organizáu pola Xunta pola Defensa de la Llingua Asturiana. Pa esta cita reivindicativa y solidaria que tien como oxetivu principal la reclamación de la oficialidá pa la llingua asturiana, van instalase dos escenarios independientes nel Campus d’Humanidaes de la Universidá d’Uvieu, amás d’una carpa xigante pa tolos asistentes. Les entraes pal conciertu puen mercase per adelantáu por un preciu de 4 euros, o bien na puerta’l mesmu día 29 por un preciu de 5. 27 d'abril, 2006 0 FacebookTwitterPinterestEmail
Música Javier Torres presenta ‘Dando tumbos’ nel Fórum de la FNAC by asturnet 27 d'abril, 2006 El músicu madrilanu Javier Torres presenta mañana a les ocho la tarde, nel Fórum de la FNAC de Parque Principado, el so discu ‘Dando tumbos’ editáu pola compañía John Dove Records. Autor de discos como ‘Fracasos pequeños’ o ‘Roland Garros’, ta acompañáu nesti cd por músicos más que conocíos como ye’l casu de Carlos Raya, guitarrista habitual del cantautor Quique González. Compañeru de xeneración d’Antonio Vega (Nacha Pop) y Jose Ignacio Lapido (091), Javier Torres presenta en ‘Dando tumbos’ una atmósfera de corazones estrangualos, señaldaes y dudes al llímite, enfrentaes siempre dende una ironía que caracteriza l’estilu d’esti cantante de pop que lleva tocando dende los años ochenta. Nesti últimu trabayu Javier Torres ta acompañáu por músicos del altor de Carlos Raya (guitarra de Quique González), Happy Losers (coros), Salva Ruano (batería), Isabel Martínez (guitarras), Carlos Rodríguez (bajo), Nacho Hernán (coros) y Luis Lage (saxo). 27 d'abril, 2006 0 FacebookTwitterPinterestEmail
Música La Musgaña toca per primer vez n’Asturies by asturnet 26 d'abril, 2006 ‘La Musgaña’, una de les formaciones de música tradicional castellana más veteranes y de más prestixu, toca güei a partir de les ocho la tarde nel Auditoriu Príncipe Felipe d’Uvieu dientro del ciclu de folk qu’organiza Tribuna Ciudadana, nel que va ser el so primer conciertu n’Asturies. Esti grupu formáu a finales de los años ochenta y renovador de la música tradicional de Castiella, tien tocao per toa Europa algamando un gran esitu. Diego Galán, col vigulín, Carlos Receiro cola zanfona, el cistru y la guitarra, Jaime Muñoz col clarinete, les flautes y les gaites, Jorge Arribas cola curdión y Sebastián Rubio a les percusiones, ufierten un repertoriu tradicional nel que nun falten los ufiertorios relixosos, les charraes, los pindongos de Cáceres y les dances de Lleón o Burgos. Ente los discos d’esta agrupación destaquen ‘El diablo cojuelo’ (1988), ‘Las seis tentaciones’ (1995) y ‘El paso de la Estantigua’ (1989). 26 d'abril, 2006 0 FacebookTwitterPinterestEmail
Música Los Llanzones estrenen los conciertos del mes de mayu nel Tierra Astur de Cualloto by asturnet 24 d'abril, 2006 La bandina tradicional Los Llanzones, dedicada a recuperar la música tradicional pensada pa l’animación y el baille, axuntando xotes, saltones, polques y muñeires, van ser los encargaos d’estrenar el prósimu día 4 el ciclu de conciertos que, cada xueves pela nueche, organiza la sidrería Tierra Astur de Cualloto. La formación moza y recien ‘Verdasca’, Merlín y les pandereteres de Nerbia completen el programa musical d’esti mes de mayu. El xueves día 11 de mayu, la recien formación ‘Verdasca’, qu’axunta a Marina Pangua a la voz y les panderetes, a Sara F. Alvarez coles percusiones, Andre F. Juglar cola gaita asturiana, Rodrigo F. Juglar cola curdión diatónica y Llorián García al vigulín, toos ellos procedentes d’otres agrupaciones como la banda de gaites Xiranda o La Raitana, y con una media d’edá ente los sos componentes de 16 años, va presentar les sos composiciones propies asina como pieces del repertoriu tradicional mesmo asturianu que foriatu. Los xueves 18 y 25 de mayu van ser los conocíos Merlín y les pandereteres de Nerbia quienes s’encarguen d’animar la nueche musical de la sidrería Tierra Astur de Cualloto. 24 d'abril, 2006 0 FacebookTwitterPinterestEmail
Música El IV conciertu solidariu del FUSOA va ser un festival a la carta by asturnet 23 d'abril, 2006 La IV edición del conciertu solidariu del 1º de mayu organizáu pol Fondu Xunitariu de Solidaridá Obrera d’Asturies, que se va cellebrar el prósimu 30 d’abril na Atalaya de Xixón, va traer a Xixón a los catalanes ‘Insershow’, primer grupu interactivu de la historia de la música. Animadores d’un conciertu ‘a la carta’, los catalanes van compartir escenarios con grupos asturianos tan conocíos como Mala Reputación, Stoned Atmosphere, Skontra y La Bandina del Matu Grosso. L’apueste llamativu d’Insershow, grupu formáu por dellos músicos con experiencia na escena catalana, inclúi lo que se podría llamar un conciertu ‘a la carta’, porque la fomación reparte primero fueyes col conteníu del so repertoriu, formáu por 66 versiones de grupos tan estremaos como Banda Basotti yExtremoduro o los Clash y los Misfists, amás d’Estopa, Metallica o Triana, pa que sía’l públicu’l qu’escueya los 15 cantares que-y prestaría que tocare la banda en conciertu. Arriendes d’ello, les persones qu’arrespuendan van tener la opción de proponese ellos mesmos pa cantar col grupu, amás de poder encamenta-yos a deprender canciones nueves pa otros conciertos. Los miembros del grupu xúntense enantes de subir pal escenariu y ye entós cuando amañen el conciertu, garrando los temes más pidíos pol públicu. El festival, nel que tamien van tocar grupos asturianos tan conocíos como Mala Reputación, Stoned Atmosphere, Skontra y La Bandina del Matu Grosso, va cellebrase a partir les 15:30 la tarde y va durar hasta les 23 hores. Mesmo qu’años anteriores, na Atalaya va haber tamien un mercáu de movimientos sociales, onde se van atopar productos de comerciu xustu, llibros, discos, artesanía o camisetes. 23 d'abril, 2006 0 FacebookTwitterPinterestEmail
Fiestes La Flor de L.lena, cola oficialidá del asturianu by asturnet 21 d'abril, 2006 Esta fin de selmana va cellebrase en L.lena’l III Mercáu Tradicional conocíu como ‘La Flor de L.lena’, un eventu organizáu pola Xunta Cultural Rebelgu coincidiendo coles fiestes de La Flor nel que van participar cuasi un cientu d’artesanos y nel que van actuar Skontra, La Col.lá Propinde, Hector Braga y Dixebra, ente otros. Per otra parte, la Xunta Cultural Rebelgu quier apoyar al Conceyu Abiertu pola Oficialidá, polo que, amás de lleer un manifiestu nel so nome, va colgar nel escenariu una pancarta pidiendo que la prósima reforma del Estatutu reconoza la oficialidá del asturianu. El barriu vieyu La Caleya de La Pola acueye esta fin de selmana’l III Mercáu Tradicional de L.lena que va empezar mañana sábadu, a les once la mañana, con un pregón que va tar animáu por Pelagatos Trup y un pasucais per parte de la Banda de Gaites ‘Güestia’. A les seis de la tarde’l grupu de teatru Pelagatos Trup va representar la obra titulada ‘La Quiniela’, mentes que los encargaos de danzar van ser los miembros del grupu ‘Xanzaina’. Skontra y La Col.lá Propinde van ser los encargaos de poner música nel mercáu de La Flor a partir de les nueve y media la nueche. Dende les seis de la tarde, el músicu Hector Braga va ser el qu’abra la sesión musical del domingu, que va culminar con un conciertu de Dixebra a les diez y media la nueche. 21 d'abril, 2006 0 FacebookTwitterPinterestEmail