Sociedá El Conceyu pola Oficialidá cellebra la so primer espicha pública en Tiñana by asturnet 8 de xunetu, 2004 El Conceyu Abiertu pola Oficialidá, plataforma qu’axunta a más de 80 organizaciones polítiques, sindicales, cíviques y culturales na defensa de la declaración del asturianu como llingua oficial na inminente reforma l’Estatutu d’Autonomía del Principáu d’Asturies, cellebra esta nueche la so primer espicha pública nel establecimientu Llagar Quelo, allugáu na llocalidá de Tiñana (Siero). La folixa va incluyir actuaciones en directu de grupos asturianos y nel so trescursu intervendrán voceros de les estremaes organizaciones que formen la plataforma, presentada oficialmente el pasáu 22 de xunu y que la selmana qu’entra cellebrará alcuentros con cabezaleros del PSOE asturianu pa buscar el so apoyu esplícitu a la inclusión de la oficialidá na reforma estatutaria. El preciu p’acceder a la espicha ye de 20 euros por persona, y les entraes puen mercase nel chigre El Naranco, n’Uviéu; llamando al númberu de teléfonu 985229553, o bien unviando un corréu ellectrónicu a la dirección info@exunta.org. El Conceyu Abiertu busca’l compromisu formal del PSOE na oficialidá del asturianu 8 de xunetu, 2004 0 FacebookTwitterPinterestEmail
Sociedá L’Academia tilda de “sumamente llamentable” el pasu atrás nos convenios del asturianu nos conceyos by asturnet 8 de xunetu, 2004 “Sumamente llamentable”. Nesos términos define la presidenta de L’Academia de la Llingua Asturiana, Ana Cano, la situación creada na normalización del asturianu nos conceyos, depués que la Conseyería de Cultura, Comunicación Social y Turismu sustituyera los convenios pa crear nuevos servicios llingüísticos llocales por otra fórmula alministrativa considerada ‘a la baxa’ polos municipios. N’opinión de la presidenta de L’Academia, tala decisión -tomada hai agora una selmana- supón rebaxar enforma les midíes plantegaes pol Gobiernu pa la promoción de la llingua asturiana, y vien a demostrar un argumentu que nun ye nuevu: “Nun ye posible facer una política llingüística seria ensin un marcu llegal que la sofite, y esi marcu ye’l de la oficialidá”, argumenta Cano. La visión de la másima institución encargada de mirar pola salú del asturianu sigue siendo crítica col Executivu autonómicu que rixen en coalición PSOE ya Izquierda Xunida-Bloque por Asturies. Según Ana Cano, esi Gobiernu “nun dio nengún pasu alantre en serio pal futuru de la llingua” nel so primer añu de camín, y actuaciones como la paralización de los convenios con nueves oficines llocales de normalización demuestren que sedría “imperdonable” nun incluyir la coficialidá del asturianu na inminente reforma del Estatutu d’Autonomía del Principáu. Según adelantó Asturnews na mañana’l pasáu martes, la Conseyería de Cultura determinó, nun alcuentru de trabayu cellebráu el vienres 2 ente la titular del departamentu, Ana Rosa Migoya, y los directores de Promoción Cultural y de la Oficina de Política Llingüística -Carlos Madera y Ramón D’Andrés, respectivamente- suprimir los convenios previstos pa crear nuevos servicios llocales de normalización y cambialos por subvenciones nominatives que sufraguen actividaes, non gastos de personal. Mientres Madera sostién que’l cambiu débese a cuestiones de puru “encaxe alministrativu” y niega que la modificación vaiga retrasar la puesta en marcha de nueves oficines llingüístiques, los propios conceyos afectaos de mou inmediatu -el municipiu de Siero y les Mancomunidaes de la Sidra y del Cabu Peñes, que yá solicitaren firmar convenios con Cultura- falen de postergación, y el grupu parlamentariu d’Izquierda Xunida-Bloque por Asturies afirma que va tresllada-y la so “esmolición” pol asuntu a los sos socios socialistes nel Gobiernu autonómicu. Magar que les perres concertaes acabarán aportando a los municipios, darréu se supere’l retrasu, nel entornu de los conceyos afectaos y en fontes consultaes del propiu Executivu asturianu interprétase la midida de Cultura como un duru güelpe a la Rede de Normalización nos Conceyos en favor d’actuaciones individuales con cada municipiu que debiliten un movimientu conxuntu favoratible al asturianu dende l’ámbitu llocal. Madera sostién que’l frenu a los convenios de normalización llocal débese a “encaxe alministrativu” 8 de xunetu, 2004 0 FacebookTwitterPinterestEmail
Sociedá Xixón estrena’l so serviciu de bicicletes gratuites con 24 vehículos y tres puntos de recoyida by asturnet 7 de xunetu, 2004 Xixón estrena les sos primeres 24 bicicletes públiques con tiempu revueltu. La primer xornada completa del nuevu serviciu, reserváu a propietarios de la denominada tarxeta ciudadana -credencial gratuita qu’emite el Conceyu pa usar servicios municipales-, atrái güei a escasos usuarios a los tres puntos de recoyida y devolución de los vehículos, allugaos na plaza’l Parchís, la playa de Poniente y l’avenida Constitución, na confluencia coles cais Carlos Marx y Pérez d’Ayala. A eses terminales van axuntáse-yos darréu, según los responsables del equipu de gobiernu llocal, otros cinco puntos, asitiaos en L’Acerona, Cuatro Caminos, el centru municipal d’El Coto, el parque la Fábrica’l Gas y l’avenida de Shultz. L’ampliación del serviciu cubriráse amás cola incorporación de más bicicletes, hasta superar el cientu. La ventolera y la lluvia intermitente con qu’alboreció la ciudá tán provocando que los ciudadanos s’amuesen güei roceanos a utilizar el nuevu serviciu públicu de tresporte, que permite circular nes bicicletes un másimu de dos hores a partir del momentu nel que se recueyen y siempre dientro’l cascu urbanu. Pa propiciar l’usu de les bicis, l’Ayuntamientu anunció ayeri l’habilitación d’un nuevu carril-bici ente La Calzada y El Rinconín, pola costa, y el puxu del itinerariu yá posible poles avenides Schultz y Constitución. El serviciu ta empobináu a mayores d’edá o menores a partir de 16 años con autorización paterna espresa, y funcionará a lo llargo de tol veranu de 8,30 a 14 y de 17,30 a 21 hores. Nos meses d’inviernu, ente ochobre y marzu, les bicicletes públiques namás podrán utilizase n’horariu siguíu de 8,30 a 18, en dambos casos con penalizaciones si l’usuariu se retrasa na devolución del vehículu. 7 de xunetu, 2004 0 FacebookTwitterPinterestEmail
Sociedá El Conseyu Regulador apuesta pol asturianu pa promocionar y esplicar el mundu de la sidra by asturnet 7 de xunetu, 2004 La sidra, n’asturianu. El Conseyu Regulador de la denominación d’orixen inclúi dende’l pasáu martes una versión de la so páxina web en llingua asturiana, depués de siete meses pa tornar los conteníos y de que la entidá recibiera crítiques por ‘castellanizar’ el léxicu propiu de la sidra asemeyándolu a la terminoloxía del vinu. En desendolcu dende payares de 2003 cola collaboración de L’Academia de la Llingua Asturiana, la nueva versión de la páxina web del Conseyu permite consultar n’asturianu tolos datos referíos a la entidá xestora de la denominación d’orixen, la hestoria y les variedaes de mazana, el procesu d’ellaboración de la bebida ya información práctica sobro l’escanciáu, la espicha y el vocabulariu ‘sidreru’. El Conseyu Regulador, en cuya web d’aniciu figura la opción de navegación en llingua asturiana xunta les yá esistentes en castellán ya inglés, defende la inclusión del asturianu pola “representatividá” de la industria de la sidra na cultura’l país, y amuesa’l so envís de collaborar na tresmisión d’esa “cultura tan asturiana”. Magar de too ello, la imaxe corporativa de la Denominación d’Orixen Protexida ‘Sidra de Asturias’ caltendráse asina, en castellán, con calter xeneral. Nesos términos apaez entá’l logotipu de la entidá na versión asturiana de la web. L’apuesta anicial del Conseyu Regulador pol usu’l castellán pa promocionar y esplicar el mundu de la sidra asturiana motivó nos caberos meses de 2003 airaes protestes d’organizaciones como la Xunta pola Defensa de la Llingua Asturiana, que denunció entós la promoción de la sidra de denominación con una campaña cuyu lema yera ‘Llámala por su nombre’ y qu’emplegaba “el palabreru propiu de la cultura del vino”, con alusiones a ‘bodegas’ en cuenta de ‘llagares’, ‘cata’ en llugar de ‘espicha’ o ‘preba’ y ‘barril’ por ‘pipa’. Web oficial del Conseyu Regulador de la sidra 7 de xunetu, 2004 0 FacebookTwitterPinterestEmail
Sociedá Madera sostién que’l frenu a los convenios de normalización llocal débese a “encaxe alministrativu” by asturnet 7 de xunetu, 2004 Cultura sostién que la paralización de los convenios pa crear nuevos servicios de normalización del asturianu nos conceyos obedez a razones de “encaxe alministrativu”. Asina lo aseguró güei a Asturnews el director xeneral de Promoción Cultural y Política Llingüística del Principáu, Carlos Madera, que negó que’l cambiu de fórmula decidíu hai una selmana vaiga retrasar el nacimientu de nueves oficines municipales de promoción del asturianu. Según Madera, qu’asistió al alcuentru de trabayu que’l vienres pasáu mantuvieron la conseyera de Cultura, Comunicación Social y Turismu, Ana Rosa Migoya, y el director de la Oficina de Política Llingüística, Ramón D’Andrés, la decisión del Gobiernu de sustituir los convenios previstos colos distintos Ayuntamientos interesaos en crear una oficina llocal de normalización por subvenciones nominatives débese a “temes alministrativos”, y en nengún casu evidencia un cambiu de criteriu del Executivu autonómicu na promoción del asturianu. El tresfondu, según afirma’l director xeneral de Promoción Cultural, ta na “imposibilidá” de que la conseyería sufrague directamente gastos de personal, polo que l’apoyu del Gobiernu a los conceyos que quieran echar a andar nuevos servicios llocales de normalización materializaráse en “subvenciones p’actividaes”. Madera asegura amás que talu cambiu de procedimientu nun va retrasar la puesta en marcha d’esos nuevos servicios nos municipios, en claru contraste col director de la Oficina de Política Llingüística, que faló de “retrasu garantizáu” y coles espectatives de los nueve conceyos afectaos de forma inmediata: los seis qu’integren la Mancomunidá de la Sidra, los dos que formen la Mancomunidá del Cabu Peñes y el municipiu de Siero. Toos ellos esperaben firmar darréu l’alcuerdu con Cultura pa crear les sos respectives oficines de normalización, y toos contaben con qu’esi alcuerdu diba formalizase nun conveniu. Nesos términos s’espresa la Mancomunidá del Cabu peñes -integrada por Carreño y Gozón-, que’l pasáu 18 de xunu convocó un concursu pa esbillar a un responsable del so futuru serviciu de normalización. Na Mancomunidá de la Sidra, la previsión yera que’l pactu col Principáu tuviera peslláu a finales de xunu. Izquierda Xunida-Bloque treslladará-y al PSOE la so esmolición pol ‘parón’ del asturianu nos conceyos 7 de xunetu, 2004 0 FacebookTwitterPinterestEmail
Sociedá El programa ‘Erasmus’ algama’l premiu ‘Príncipe’ de Cooperación by asturnet 6 de xunetu, 2004 El programa ‘Erasmus’ d’intercambiu universitariu na Unión Europea, que sufraga dende 1987 la movilidá d’estudiantes ente países p’ameyorar la calidá de la educación superior y afitar la so dimensión europea, algamó esti mediudía el Premiu ‘Príncipe de Asturias’ de Cooperación Internacional 2004, que se falló n’Uviéu a partir d’una llista d’once candidatos. Según asoleyó el xuráu na so acta, el galardón quier distinguir al ‘Erasmus’ como “ún de los más importantes proyectos de cooperación internacional na hestoria de la Humanidá” que permitió hasta la fecha a dos millones d’estudiantes de 2.000 universidaes meyorar la so formación, “contribuyendo de manera eficaz a la creación de la ciudadanía europea” y afitando como un valor la diversidá cultural. Ensertáu na iniciativa ‘Sócrates’ dende la creación d’ésta hai agora nueve años, el programa ‘Erasmus’ homenaxea col so nome al pensador renacentista Erasmo de Rotterdam, que viaxó por distintos países d’Europa pa completar los sos conocimientos, y sufraga parcialmente la estancia y los estudios superiores d’alumnos universitarios n’Estaos distintos al suyu d’orixen. La candidatura’l programa de beques ‘Erasmus’, presentada pol xesuita y escritor José María Martín Patino, atropó les simpatíes de distintos miembros del xuráu nos primeros momentos de les deliberaciones, marcaes pol sentimientu común de la “oportunidá” de premiar a un candidatu européu nel añu en que la UE ta acabante medrar cola incorporación de diez nuevos Estaos y ultima l’aprobación de la primer Constitución transnacional pa la práctica totalidá del territoriu européu. Precisamente, los diez nuevos estaos qu’ingresaron na Unión el pasáu 1 de mayu integraben una candidatura conxunta al ‘Príncipe’ de Cooperación, al que tamién optaben el Tribunal Européu de Drechos Humanos y la Fundación Nuevu Periodismu Iberoamericanu, liderada pol premiu Nobel de Lliteratura Gabril García Márquez. Baxo la presidencia de Leopoldo Calvo-Sotelo, ex presidente’l Gobiernu central, los integrantes del xuráu revisaron más d’una decena de candidatures aportaes a Uviéu sobre too dende l’ámbitu européu: Chipre, Eslovaquia, Eslovenia, España, Estonia, Finlandia, Holanda, Hungría, Letonia, Lituania, Malta, Polonia, República Checa y Suiza, amás d’Estaos Xuníos y Cuba. El Premiu ‘Príncipe de Asturias’ de Cooperación Internacional 2004 ta empobináu a distinguir el llabor de persones o grupos de trabayu destacaos nel “mutuu conocimientu, el progresu o la fraternidá ente los pueblos”. Na edición anterior, resultó galardonáu l’actual presidente de Brasil, Luis Inázio Lula Da Silva. Web oficial del Programa ‘Erasmus’ n’España 6 de xunetu, 2004 0 FacebookTwitterPinterestEmail
Sociedá Izquierda Xunida-Bloque treslladará-y al PSOE la so esmolición pol ‘parón’ del asturianu nos conceyos by asturnet 6 de xunetu, 2004 Izquierda Xunida-Bloque por Asturies declárase “esmolecida” pol ‘parón’ nel que los sos socios nel Gobiernu’l Principáu somorguien la rede de normalización llingüística nos conceyos, noticia adelantada a primer hora d’ayeri por Asturnews. IX-BA plantegará l’asuntu como tema “fuerte” nuna xuntanza colos sos compañeros d’Executivu prevista pa les prósimes selmanes, antes de les vacaciones parlamentaries de veranu. Asina lo confirmó güei a esti periódicu un voceru’l grupu d’Izquierda Xunida-Bloque por Asturies na Xunta Xeneral del Principáu, que tien conocencia dende’l pasáu sábadu de la decisión de la Conseyería de Cultura, Comunicación Social y Turismu -rexida pola socialista Ana Rosa Migoya- de paralizar los convenios previstos p’alitar la creación de nuevos servicios municipales de normalización de la llingua asturiana y sustituyilos por otres fórmules consideraes ‘menores’ dende los propios conceyos. “Entá tamos dixiriendo esa noticia”, manifestó’l voceru’l grupu parlamentariu d’IX-BA, yá que, magar que’l director de la Oficina de Política Llingüística, Ramón D’Andrés, sostién que les ayudes previstes van aportar a la fin a los sos destinatarios, ábrese una postergación que’l propiu D’Andrés califica de “retrasu garantizáu” y qu’evidencia un pasu atrás na promoción del asturianu nel ámbitu llocal que’l PSOE venía avalando dende la puesta en marcha de la Oficina, el pasáu mes de xineru. Nesti sen, IX-BA amuesa’l so “absolutu apoyu” al responsable de la Oficina de Política Llingüística, qu’esta mesma selmana prevé entregar al director xeneral del ramu, Carlos Madera, el borrador definitivu del Plan de Normalización Sociollingüística, el documentu qu’organiza y estructura los pasos de la política llingüística del Gobiernu hasta’l fin del presente mandatu, en 2007. La decisión de Cultura de dar marcha atrás na firma de los convenios previstos y buscar fórmules alternatives afecta de forma inmediata a nueve conceyos, los seis qu’integren la Mancomunidá de la Sidra, los dos de la Mancomunidá del Cabu Peñes -Carreño y Gozón- y el municipiu de Siero. Toos ellos solicitaron yá l’apoyu del Principáu pa crear les sos respectives oficines de normalización, qu’agora tendrán qu’esperar. Noticia’l ‘parón’ na rede de conceyos, adelantada por Asturnews 6 de xunetu, 2004 0 FacebookTwitterPinterestEmail
Sociedá Cultura paraliza los convenios pa crear servicios de normalización nos conceyos by asturnet 5 de xunetu, 2004 La Conseyería de Cultura, Comunicación Social y Turismu retrasa la creación de nuevos servicios de normalización llingüística nos conceyos, y nun lo fai por razones nin burocrátriques, nin de presupuestu, según aseguraron a Asturnews fontes del propiu Gobiernu autonómicu. El ‘parón’, fechu realidá el pasáu vienres, posterga la puesta en marcha d’oficines llingüístiques en Siero y les Mancomunidaes del Cabu Peñes y la Comarca de la Sidra. En total, esa postergación afecta de mou inmediatu a nueve conceyos -Siero, Carreño, Gozón y los seis municipios ‘sidreros’-, y supón pone-y un seriu pilancu a la Rede de Normalización Llingüística nos Conceyos, anunciada pola propia conseyera de Cultura, Ana Rosa Migoya, nel so discursu institucional d’apertura de la XXV Selmana de les Lletres Asturianes y presentada el pasáu 25 de mayu pol director xeneral de Promoción Cultural y Política Llingüística, Carlos Madera. Nesa iniciativa enmarcábase l'”establecimientu de convenios cola Conseyería de Cultura” p’alitar la creación de nuevos servicios llocales de normalización -frase testual del discursu pronunciáu por Migoya- qu’agora queda en suspensu, nun camín qu’ensin embargu inda nun ye dafechu una vía muerta: Fontes consultaes dientro l’organigrama del Executivu autonómicu aseguren que, pesie a un retrasu que tilden d'”inesplicable”, les perres acabarán aportando a los conceyos darréu s’afayen fórmules alternatives a los convenios. Dende la Oficina de Política Llingüística, confírmase’l ‘parón’ con un escuetu ‘sí’. Otres fontes consultaes del entornu’l Gobiernu autonómicu, que quieren más preservar la so identidá, sostienen que midíes como ésta suponen “dificultaes innecesaries” nel llabor del organismu dirixíu por Ramón D’Andrés, “que tien los deberes bien fechos”, y sorpréndense de la postergación “porque namás se trataba d’ayudar a echar a andar a los servicios de normalización, dar un asesoramientu y conceder una pequeña ayuda económica al empiezu”. El ‘parón’ nos convenios que diben dar llugar a nueves oficines llocales de la Llingua -la de la Mancomunidá de la Sidra, por exemplu, prevía tar llista pa finales de xunu col preste de la Conseyería, y la del Cabu Peñes yá convocó una plaza pal so responsable- prodúxose amás alpenes 48 hores depués que’l Gobiernu de coalición ente PSOE, Izquierda Xunida y Bloque por Asturies asoleyara una valoracíón enforma positiva del so primer añu de xestión na defensa y promoción del asturianu, nun documentu nel qu’anunciaba el prósimu desarrollu de la Llei d’Usu y Promoción del Asturianu y reivindicaba los “alcuerdos de collaboración técnica con distintos conceyos que pusieron en marcha les sos oficines de normalización llingüística llocales o comarcales”. Noticia d’archivu de la presentación de la Rede de Normalización nos Conceyos 5 de xunetu, 2004 0 FacebookTwitterPinterestEmail
Sociedá El Conceyu Abiertu busca’l compromisu formal del PSOE na oficialidá del asturianu by asturnet 4 de xunetu, 2004 El Conceyu Abiertu pola Oficialidá apunta pal PSOE. El collectivu, qu’axunta a más de 80 organizaciones polítiques, sindicales, cíviques y culturales na defensa de la declaración del asturianu como llingua oficial na prósima reforma l’Estatutu d’Autonomía, cellebrará la selmana qu’entra entrevistes con cabezaleros autonómicos de los socialistes pa buscar el so apoyu, decisivu na tramitación política del cambiu estatutariu. Según precisó güei Xulio Casado, qu’actuó como voceru’l Conceyu, la plataforma yá tien concertaes les cites y busca con elles reforzar el sofitu yá recibíu de la estaya de Mocedá del PSOE, qu’apaeció na llista de firmantes asoleyada pol Conceyu Abiertu na so presentación pública énte los medios de comunicación, el pasáu 22 de xunu. Dicho n’otres pallabres: La entidá yá tien ente los sos partidarios a los militantes mozos del PSOE, pero persigue’l sofitu espresu de los sos ‘mayores’, los dirixentes de la Federación Socialista Asturiana, a la vista de que los 22 diputaos autonómicos que’l PSOE tien na Xunta Xeneral del Principáu sedrán claves na negociación del remocicáu testu del Estatutu. Esta mesma mañana, la xunta de voceros del Parlamentu autonómicu refugó la propuesta’l PP -que participa nel Conceyu pero inda ensin concretar el so apoyu con firma- pa reformar l’Estatutu, al considerala “caótica” tanto nel fondu como na forma. Tanto Casado como Pilar Fernández aconceyaron a primer hora d’esta tarde n’Uviéu, en representación del Conceyu, cola presidenta de l’Academia de la Llingua Asturiana, Ana Cano, nel primer alcuentru esternu que’l Conceyu Abiertu pola Oficialidá mantién con collectivos ya instituciones depués de la so presentación pública. Nuna comparecencia conxunta, Cano felicitóse de la constitución de la nueva plataforma y aseguró que la inminente reforma del Estatutu “ye un momentu que nun podemos perder pa que’l so artículu 4 contemple ensin reserves la oficialidá o cooficialidá del asturianu. El Conceyu Abiertu prevé entamar “campañes reivindicatives y de concienciación” a lo llargo del veranu, colos güeyos puestos “sobre too nes organizaciones polítiques con representación na Xunta Xeneral”. Militantes y firmantes de la plataforma tienen previsto cellebrar una primer espicha de confraternización el prósimu vienres, 9 de xunetu, nun llagar de Tiñana. El PSOE, clave na inminente negociación de la oficialidá, lidera la normalización nos conceyos 4 de xunetu, 2004 0 FacebookTwitterPinterestEmail
Sociedá Cultura crea un premiu específicu pa trabayos periodísticos audiovisuales n’asturianu by asturnet 1 de xunetu, 2004 Los grandes premios institucionales a la creación y comunicación n’asturianu pasen a ser cuatro: A los veteranos ‘Xosefa Xovellanos’ de novela, ‘Xuan María Acebal’ de poesía y el más mozu ‘Enriqueta González Rubín’ de periodismu escritu súmase un nuevu galardón, desdoblamientu d’esti últimu, empobináu a premiar con 3.000 euros el meyor trabayu periodísticu audiovisual concebíu y emitíu dafechu en llingua asturiana. Según publicó’l Boletín Oficial del Principáu d’Asturies (BOPA) na so edición d’ayeri, na presente edición de 2004 mantiénse nos mesmos términos la convocatoria del ‘González Rubín’ pa testos asoleyaos en prensa escrita, con una dotación de 3.000 euros, pero créase una segunda categoría pal sector audiovisual pensada pa galardonar les emisiones radiofóniques o televisives de tema llibre y de cualquier xéneru, difundíes dende el 1 de xineru pasáu y feches dafechu n’asturianu. El restu de la convocatoria de los grandes premios que’l Principáu concede añalmente p’alitar la creación en llingua asturiana y el so usu periodísticu nun varía sustancialmente respecto a 2003: Certifícase la defunción del premiu ‘Máximo Fuertes Acevedo’ d’ensayu, que yá nun se convocara l’añu pasáu y les dotaciones siguen siendo de 6.000 euros pa les meyores obres de narrativa y poesía. Eso sí, la convocatoria asoléyase esti añu con dos meses de retrasu sobro 2003, yá que’l BOPA recoyó l’añu pasáu les bases de los premios na so edición del 24 de marzu. El plazu d’almisión d’orixinales, que nun podrán tar premiaos en concursos anteriores, finará’l 30 d’ochobre, y el xuráu emitirá’l so veredictu nun plazu máximu de 45 díes a partir d’esa fecha. Bases íntegres de la convocatoria nel BOPA 1 de xunetu, 2004 0 FacebookTwitterPinterestEmail