Sociedá L.lena entama una campaña pa promocionar l’asturiano nel comerciu local by asturnet 24 de marzu, 2006 El Serviciu de Normalización Llingüística del conceyu de L.lena acaba de poner en marcha una campaña de promoción del usu del asturiano ente’l comerciu local. La iniciativa cuenta con un presupuestu de 2.000 euros y tien como oxetivu’l d’implicar a los profesionales del sector na promoción y normalización de la nuestra llingua nes relaciones mercantiles y afitar los nomes llariegos que s’ empleguen de manera avezada nos intercambios comerciales del conceyu. La campaña fue elaborada pol Ayuntamientu de L.lena en colaboración con Xixón, Siero y la Mancomunidá del Cabu Peñes, conceyos qu’integren anguaño la Rede de Normalización Llingüstistica. Escoyóse’l pequeñu y medianu comerciu como oxetivu de la iniciativa por tratase d’un sector nel qu’esiste un contactu directu cola ciudadanía y porque apréciase una perda de palabres n’asturiano en determinaos campos léxicos (cada vez son menos empleaos nos comercios términos como gochu, piescos o tiñosu, por exemplo). Los materiales que se van distribuir ente los comerciantes l.leniegos son:cinco trípticos, dedicaos a pescao, fruta y verdures; carne y embutíos; pan lleche y derivaos; y l’últimu dedicáu a la ropa, nos que s’informa del nome n’ asturiano de tolos productos avezaos. Inclúin amás dalguna información y suxerencia. La campaña implica tamién la creación y diseñu d’una marca diferenciadora que va identificar l’usu de la llingua asturiana nos comercios y la edición de pegatines de regalu pa poner nos paquetes con lemes como esti regalu ye pa o espero que te preste. La campaña va cuntar tamién con distribución de bolses de papel nes que figura la imaxen de la campaña y cartelos informativos, que se van colgar nos comercios. 24 de marzu, 2006 0 FacebookTwitterPinterestEmail
Sociedá Les asociaciones xudiciales conservadores refuguen l’usu de les llingües del estáu by asturnet 24 de marzu, 2006 Cuatro asociaciones profesionales de xueces, fiscales y secretarios de xulgáu ufiertaron esti xueves 23 una rueda de prensa conxunta en Madrid pa refugar la posibilidá d’espardir l’usu de les llingües cooficiales al ámbitu xudicial, a la que consideren “una concesión del gobiernu a los nacionalistes”, según del documentu firmáu por esos colectivos. L’Asociación Profesional de la Maxistratura (APM), el Foru Xudicial Independiente (FJI), l’Asociación de Fiscales (AF) y el Colexu Nacional de Secretarios Xudiciales xuntáronse pa refugar el que’l conocimientu d’otra llingua estatal, amás del castellano, seya un méritu nel accesu a la carrera xudicial y cuiden que detrás d’esta posibilidá escuéndese la intención de convertila en requisitu obligatoriu. Pa los convocantes de la rueda de prensa, la redacción final del nuevu estatutu pa Cataluña -causante d’esta protesta- no tocante al papel de la llingua propia d’esa comunidá nel ámbitu xudicial ye “claramente inconstitucional”, ya que según estes asociaciones “provoca desigualdaes al otorgar absoluta prioridá, al marxen de cualquier otra consideración» profesional, a los qu’amuesen conocimientu del idioma autonómicu. Les cuatro asociaciones -toles cuatro de signu conservador- amosáronse empara partidaries de fomentar la «racional y progresiva implantación» de les llingues cooficiales n’Administración, pero rechacen lo que consideren «absurdu de convertir el so conocimientu n’inmediatamente obligatoriu». Noticia relacionada 24 de marzu, 2006 0 FacebookTwitterPinterestEmail
Sociedá L’Academia emplaza a los partíos parlamentarios a qu’escueyan un modelu d’oficialidá by asturnet 23 de marzu, 2006 L’Academia de la Llingua Asturiana espón nel editorial del últimu númberu de la so revista Lletres Asturianes el resultáu de les xestiones entamaes pola institución colos estremaos axentes políticos y sociales alrodiu de la propuesta llanzada nel Día de les Lletres de 2005 pola so presidenta Ana Cano. Arriendes de la propuesta de consensu y de la situación actual l’Academia emplaza a los grupos políticos presentes na Xunta Xeneral a que seyan ellos los qu’escueyan el modelu de redacción del artículu onde se reconoza la oficialidá nel nuevu Estatutu. Pa la másima institución llingüística asturiana esti modelu d’oficialidá había ser “el que más s’axuste a les condiciones sociolóxiques” del país. Piden tamién que seyan los partíos parlamentarios los que “digan hasta ónde quieren llegar coles midíes normalizadores, a qué ritmu y con qué fases” y arriendes d’ello a que “pongan techu a la dotación presupuestaria pa facer efeutiva la normalización y que too ello lo faigan velando siempre pa que se llogre l’aceutación social y política de les midíes normalizadores”, afirma l’Academia que califica les sos propuestes de realistes y moderaes. La institución llanza una clara andanada crítica contra les fuerces polítiques que n’Asturies nieguen la posibilidá de reconocer la cooficialidá y defenden nel Congresu de los Diputaos de Madrid iniciatives parlamentaries pa pidi-y al Gobiernu qu’afale la diversidá idiomática del estáu, n’alusión a la proposición non de llei presentada pol grupu socialista nel Congresu apocayá y na que se caltenía que la oficialización de les diverses llingües del estáu contribuía a fomentar la convivencia llingüística. El mensaxe central del editorial de Lletres Asturianes insiste na idea ya formulada con abonda reiteración pola Academia de qu’una Llei de Normalización de la Llingua Asturiana “ha desendolcar los aspeutos básicos de la puesta en práutica de la oficialidá. 23 de marzu, 2006 0 FacebookTwitterPinterestEmail
Sociedá Refugada la propuesta d’ERC pa que gallego, eusquera y catalán fueran oficiales en tol estáu by asturnet 23 de marzu, 2006 La Mesa del Congresu de los Diputaos refugó esti miércoles 21 colos votos del PSOE y del PP admitir a trámite una propuesta d’Esquerra Republicana de Catalunya (ERC), sofitada por IU-ICV, CiU, PNV, BNG y Chunta, na que se pidía que’l calter de llingües oficiales del gallego, el catalán y l’eusquera algamare a tol estáu. Esquerra considera que la posición de los socialistes énte la so iniciativa ponen en cuestión el proyectu de la España plural defendíu pol presidente Zapatero. Darréu de conocese’l refugue de la propuesta el portavoz republicanu nel Congresu Joan Tarda afirmó que la posición del PSOE ye “la preba del algodón que permitía comprebar la consistencia del proyectu d’ España plural preconizáu por altos dirixentes socialistes y pol mesmu presidente del Gobiernu” y recordó que el compromisu d’ERC en Madrid fue dar estabilidá a un gobiernu col fin de promover un xiru a la izquierda en polítiques sociales y pa reconocer la riqueza y la diversidá del Estáu, dalgo que pal diputáu son “dos compromisos indisociables, son inseparables pa promover una España onde’l respetu ente pueblos y cultures y la consolidación del Estáu del bienestar seyan les prioridaes de l’acción política”, declaró. 23 de marzu, 2006 0 FacebookTwitterPinterestEmail
Sociedá El Principáu robla en Madrid el trespasu de la dotación estatal pa Sanidá by asturnet 23 de marzu, 2006 El conseyeru de Xusticia y Esteriores del Principáu, Francisco Javier García Valledor y el ministru d’Administraciones Públiques, Jordi Sevilla firmen esti viernes en Madrid la dotación complementaria pa la financiación de l’asistencia sanitaria n’Asturies. La cuantía d’esta dotación ye de 14,5 millones d’euros, el 2,9 % del total alcordáu na II Conferencia de Presidentes de Comunidaes Autónomes y que fue de 500 millones d’euros pa tol estáu. Xunta’l conseyeru Valledor a la reunión na sé del Ministeriu d’Administraciones Públiques van asistir pela parte asturiana, los conseyeros d’Economía y Administración Pública, Jaime Rabanal, d’ Educación y Ciencia, José Luis Iglesias Riopedre; de Mediu Ambiente, Ordenación del Territoriu ya Infraestructures, Francisco González Buendía; Salú y Servicios Sanitarios, Rafael Sariego; xunto a Jesús Iglesias, miembru la Comisión Mista desináu pola Xunta Xeneral. 23 de marzu, 2006 0 FacebookTwitterPinterestEmail
Tecnoloxía Los profesores d’informática van a la fuelga pa que la so asignatura sea obligatoria by asturnet 22 de marzu, 2006 La Plataforma Nacional d’Asociaciones de Profesores d’Informática tien convocada pa esti miércoles 22 una fuelga de calter estatal col fin de reclamar que la so asignatura algame’l calter d’obligatoria na enseñanza secundaria. Los docentes piden qu’esta obligatoriedá quede recoyida na Llei Orgánica de la Enseñanza (LOE), anguaño en fase de tramitación parlamentaria. Según el colectivu qu’axunta a los profesores d’esa materia, l’español xunto a l’italianu son los únicos estaos comunitarios onde l’asignatura d’informática nun tien calter obligatoriu na enseñanza secundaria. La plataforma convocante de la fuelga d’esti miércoles remembra los encamientos de la UNESCO pa que los conocimientos informáticos se consideren al mesmu nivel que l’accesu a la llectura y a la escritura analóxiques. 22 de marzu, 2006 0 FacebookTwitterPinterestEmail
Sociedá Política Llingüística organiza una xornada técnica sobre traducción administrativa by asturnet 22 de marzu, 2006 La Oficina de Política Llingüística del Principáu entama esti viernes 24 una xornada técnica de documentos xurídicos y fraseoloxía administrativa col fin d’elaborar un archivu prácticu nesa materia n’idioma asturianu. La iniciativa inclúi exercicios prácticos, talleres y análisis de testos xurídico-administrativos. La xornada va escomenzar con un taller coordináu pol responsable de Política Llingüística de la Conseyería de Cultura, Ramón d’Andrés sobre principios xenerales pa la traducción de documentación administrativa. Al taller va siguilu una práctica d’análisis de testos xurídicos y modelos administrativos, ente ellos l’Estatutu d’Autonomía, Llei d’Usu, decretos, etc. El segundu taller de la xornada va dedicase a la cartelería, formularios municipales, bandos, anuncies, etc. d’usu n’administración de los conceyos. Los pliegos, actes, concursos van ocupar l’últimu de los talleres. 22 de marzu, 2006 0 FacebookTwitterPinterestEmail
Sociedá Moratinos alude al calter non oficial del asturiano pa xustificar la so ausencia na UE by asturnet 17 de marzu, 2006 El ministru español d’Esteriores, Miguel Ángel Moratinos, xustificò esti xueves 16 n’Uviéu l’ausencia de la llingua asturiana nes instituciones europees, ente los demás idiomes del estáu, nel so calter de llingua non oficial. El presidente asturianu, Vicente Álvarez Areces, sofitó la posición del ministru recalcando que “el bable nun ye oficial, que ye la que’l gobiernu d’España había de reclamar”, afirmó. Na rueda de prensa que siguió al alcuentru calteníu ente Moratinos y Areces n’Uviéu ún de los informadores presentes preguntó-y al ministru pola carta enviada va más d’añu y mediu pol conseyeru Valledor na que-y encamentaba al gobiernu español defender l’asturiano énte les instituciones europees como una de les llingües del estáu. El titular d’Esteriores del executivu de Zapatero fue escuetu na so respuesta: “Namás podemos defender les llingües que son cooficiales”. Areces respaldó la posición del ministru afirmando, visiblemente molestu pola pregunta, que “Asturies tien una llei d’usu y promoción del bable que desarrollamos plenamente y hai un plan votáu por unanimidá nel Parlamentu, pero ye evidente que nun ye llingua cooficial, que ye la que’l Gobiernu d’España taría obligáu a citar (énte Europa)”, afirmó. 17 de marzu, 2006 0 FacebookTwitterPinterestEmail
Sociedá IX de Mieres pide desplicaciones pola Oficina de Normalización Llingüística by asturnet 17 de marzu, 2006 La conceyal d’Izquierda Xunida de Mieres, Beatriz González, pidió desplicaciones al equipu de gobiernu municipal pola situación de la Oficina de Normalización Llingüística, creada en payares de 2005 y paralizada en xineru, dos meses después de la so puesta en marcha. Según declaró a los medios informativos locales la edil d’IX, l’Ayuntamientu mierense, recibió de la Oficina de Política Llingüística del Principáu, 15.600 euros empobinaos a sufragar los gastos de personal y la puesta en funcionamientu del serviciu normalizador. Agora, tres la paralización de la Oficina en xineru, por cese de la persona encargada de la mesma, González cuida que puede perdese esa cantidá de dineru, si nun ta ya perdida, al nun poder xustificar el consistoriu los gastos derivaos de la contratación de personal. Na so denuncia a los medios, la conceyal d’Izquierda Xunida, relató la breve y axitada esistencia del serviciu: en setiembre de 2005 el conceyu recibió una subvención de 15.600 euros de la Conseyería de Cultura pa poner en marcha la Oficina; un mes después publicáronse les bases pa cubrir la plaza de responsable y en payares escomenzó a funcionar. En xineru de 2006 la persona encargada del serviciu de normalización cesó y dende entós la oficina dexó de funcionar, ensin que l’Ayuntamientu entamara nenguna midida pa recuperar la so puesta en marcha. 17 de marzu, 2006 0 FacebookTwitterPinterestEmail
Sociedá Jesús Iglesias respalda a Laura González na so defensa del proyectu de Niemeyer p’Avilés by asturnet 16 de marzu, 2006 El coordinador xeneral d’Izquierda Xunida d’Asturies, Jesús Iglesias aprovechó la presentación de la campaña en remembranza del 75 aniversariu de la II República entamada pa desautorizar a los cargos públicos uvieínos de la coalición qu’en díes pasaos truñaron contra la conseyera Laura González. Iglesias defendió l’equipamientu de Niemeyer p’Avilés y reafirmó la identidá republicana d’IX, afirmando que “los insultadores nun tienen sitiu equí”. Pal responsable de la formación d’izquierdes el futuru centru cultural proyectáu pol arquitectu brasileiru ye dalgo de fonda importancia p’Avilés que llogra asina “dalgo a lo que tien derechu y que resulta imprescindible pa la so dinamización y desarrollu económicu”, ya que, según dixo Iglesias: “llevaba años reivindicando que después de padecer décades de procesos de reconversión industrial, desixía un compromisu del restu d’Asturies col so desarrollu y contribuir amás al desarrollu global d’esta Comunidá”. El coordinador d’IX refirióse a la engarradiella de l’agrupación uvieína de la coalición cola conseyera Laura González y afirmó nun entender el que dende esa organización se sacaran “los pies del cestu”, al empar que recalcaba el so respaldu y solidaridá cola responsable de Vivienda y Servicios Sociales. Al respective, Jesús Iglesias, pidió respetu a los cargos públicos de la coalición y en tonu sarcásticu, aludiendo a la eshibición de republicanismu de los ediles díscolos carbayones, ironizó con que “dalgunos al paecer namás se descubren republicanos cuando se empieza a dicir que’l famosu Muséu de los Premios Príncipe, nun se va facer n’Uviéu, cuando se diba facer n’Uviéu, paez que nun s’alcordaben que yeren republicanos”, perende la sorpresa, dixo Iglesias, “de contemplar que el nuevu Coronel Aranda cuenta con estraños acólitos”. 16 de marzu, 2006 0 FacebookTwitterPinterestEmail