Sociedá El Serviciu de Normalización de Cangas ya tien responsable y va abrise nos prósimos díes by asturnet 31 de mayu, 2005 El Serviciu de Normalización de Cangas del Narcea va empezar a funcionar nos prósimos díes una vez que ya tien responsable. Después d’una primera convocatoria na que’l tribunal calificador decidiera dexar desierta la plaza, ayer martes, tres celebrase les nueves prebes, un de los candidatos, Inaciu González, algamaba la másima puntuación. Cangas xúntase asina a la rede municipal de servicios y oficines de normalización, siendo’l primer conceyu occidental en poner en marcha esti departamentu d’atención al ciudadanu. El Serviciu de Normalización Llingüística de Cangas del Narcea va abrir les sos puertes la prósima selmana na capital del conceyu y ubicáu nel Edificiu de Servicios Múltiples del centru la villa. El responsable d’esta nueva oficina de la rede municipal de normalización ye Inaciu González, uvieín d’orixe occidental, maestru de primaria y col títulu d’Espertu en Filoloxía Asturiana. La persona seleccionada algamó la másima puntuación nes pruebes realizaes ayer martes 31 pol tribunal calificador del que formaben parte el director de la Oficina de Política Llingüística del Principáu, Ramón dAndrés, y el secretariu de l’Academia de la Llingua Asturiana, Roberto González-Quevedo, amás de conceyales y técnicos municipales. Una de las primeras actuaciones del Servicio de Normalización va ser reunise coles asociaciones del conceyu pa conocer les sos necesidaes en materia llingüística y proponer un marcu de colaboración. Cangas del Narcea conviértese asina nel primer conceyu del Occidente en dar el pasu de crear un Serviciu de Normalización. El Plenu correspondiente al mes de febreru aprobó, colos votos favorables de PSOE, IU-BA y URAS, la puesta en marcha d’un serviciu que va contar, hasta avientu de 2005, coles víes de financiación que la Conseyería de Cultura destina a la creación y mantenimientu de la rede municipal de normalización. Con esta puesta andar de la oficina, la capital del suroccidente súmase a Xixón, Siero, Comarca de la Sidra, Mancomunidá de Peñes, L.lena, Llangréu y Avilés, que tamién cuenten con servicios dedicaos la normalización del asturianu dientro’l marcu los sos conceyos. Talo señalen dende l’Ayuntamientu de Cangas: “l’oxetivu d’esta oficina va ser el de facer normal a nivel institucional lo que ya ye normal na calle”. D’alcuerdu con esti planteamientu, la nueva oficina va ufiertar un serviciu permanente de traducción, elaborando documentos públicos en asturiano, incentivando la colocación de carteles indicativos en llingua asturiana ya implicando na promoción llingüística a les entidaes públiques y privaes del conceyu. La oficina va abrir nun principiu tres díes a la selmana:miércoles, xueves y viernes n’horariu de mañanes. 31 de mayu, 2005 0 FacebookTwitterPinterestEmail
Sociedá El pasu del Plan de Normalización pela Xunta evidenció les sos contradicciones by asturnet 30 de mayu, 2005 El pasu del Plan de Normalización Social del Principáu pela Xunta Xeneral volvió poner en claro les contradiciones ente la puesta en marcha d’iniciatives normalizadores pal asturianu y el desamparu llegal nel que s’atopa la nuestra llingua ensin la so reconocencia oficial.Grupos parlamentarios y representantes de distintes entidaes comprometíes colos drechos llingüísticos espunxeron los sos estremaos puntos de vista, el más xeneralizáu ente los defensores de la supervivencia de la nuestra llingua foi la necesidá irrefugable d’algamar la oficialidá, tamién coincidieron n’alertar sobre’l futuru inciertu de la llingua asturiana énte la perda de falantes y l’ausencia de midíes efectives pa contrarrestar esta situación. La valoración nel parlamentu del Plan diseñáu pola Conseyería de Cultura convirtióse nun debate xeneral sobre el casu nel que ta la llingua asturiana, la única xunta l’aragonés qu’inda nun goza del so reconocimientu oficial. Más qu’enxuiciar les midíes propuestes nel Plan de Normalización, cásique tolos representantes d’entidaes comprometíes cola supervivencia del asturianu, aprovecharon les sos intervenciones pa resaltar lo que falta. Nun hubo un rechazu frontal a la iniciativa de Política Llingüística inda fueron más les voces que coincidieron en señalar qu’énte la situación real que vive la llingua asturiana les midíes propuestes alpenes van algamar eficacia en cuantes a la necesidá urxente d’adoptar polítiques actives de normalización social amparaes por un marcu llegal qu’implique dafechu a tolos poderes públicos d’Asturies y garantice los derechos sociales de los ciudadanos. El Plan de Normalización Social pa la llingua asturiana aprebáu va unes selmanes pol Gobiernu del Principáu pasó güei pela Comisión de Cultura de la Xunta Xeneral nuna sesión na que representantes d’instituciones como l’Academia de la Llingua, del movimientu cívicu como la Xunta Pola Defensa de la Llingua y el Conceyu Abiertu pola Oficialidá o entidaes como l’Observatoriu Llingüísticu, la Fundación Caveda y Nava o el Seminariu de Filoloxía Asturiana espresaron les sos opiniones estremaes respective a la normalización del asturianu y a la situación na que s’alcuentra la nuestra llingua. Los únicos puntos onde coincidieron los comparecientes foi na necesidá d’incluir la cooficialidá de la nuestra llingua nel Estatutu y n’alertar sobre la perda cada vez más evidente de falantes, dalgo que podía llevar a la despaición real de l’asturianu si nun se tomen midíes eficaces pa contrarrestalo. El Plan de Normalización de la Conseyería de Cultura ye “fondamente insatisfactoriu” pa la másima institución llingüística d’Asturies, l’Academia de la Llingua y talo señaló “nin siquier puede llamase propiamente de normalización, porque nun normaliza nada, en cualquier casu ye un plan que podía llamase de dignificación”, pa Cano “la normalización nun ye posible ensin la reconocencia de la oficialidá”. Encargóse de remembralo una vez más la propia presidenta de la institución, Ana Cano, na so comparecencia na Xunta Xeneral pa valorar la iniciativa aprebada nun va muncho pol Gobiernu del Principáu. Cano tuvo un xuiciu percríticu hacia’l Plan, espresáu nos mesmos términos nos que se vieno manifestando l’Academia dende la conocencia del testu onde s’articula la iniciativa de la Conseyería de Cultura y que la so presidenta recalcó nel so discursu institucional del Día les Lletres nel Teatru Campoamor. Pa la representante de la Xunta pola Defensa de la Llingua, Pilar Fernández, el Plan de Normalización Social ellaboráu pola Oficina de Política Llingüísticanun incide nel que consideró el principal problema sociollingüísticu d’Asturies: la perda de falantes. La representante de la Xunta recordó a los políticos que “tienen de xestionar el patrimoniu llingüísticu de la que pudiera ser la última xeneración de falantes d’asturianu” y pidió qu’exerceran la so “potestá pa construir un futuru meyor pa la llingua asturiana faciéndola oficial”. Pa la Xunta la non inxerción de la cooficialidá na inminente reforma del Estatutu diba ser “una gravísima irresponsabilidá” de los políticos, no que calificó de “medía definitiva y crucial pa la llingua asturiana”.Fernando Ornosa, voceru del Conceyu Abiertu pola Oficialidá espresóse en términos asemeyaos a la representante de la Xunta, pal que “el futuru de la nuestra llingua pasa por reconocer la oficialidá, una demanda cada vez más clara de la sociedá asturiana”. El más comprensivu col Plan de Cultura foi el profesor de la Universidá del País Vascu, Francisco Llera que valoró “positivamente” les midíes entamaes dende la Oficina de Política Llingüística y les “espectatives qu’abría”. El sociólogu caraviesu, qu’acudía en calidá de miembru del Observatoriu Llingüísticu a la Xunta Xeneral, coincidió sicasí colos otros comparecientes na necesidá de recoyer la oficialidá nel Estatutu, talo demanda una parte importante de la sociedá asturiana, según los estudios d’opinión entamaos pol propiu Llera Ramo. Xulio Viejo, del Seminariu de Filoloxía Asturiana, calificó el Plan de “bien concebíu pero mal definíu”. Pela tarde tocó-y defender el Plan de Normalización Social pa la llingua asturiana a la conseyera de Cultura, Ana Rosa Migoya, que compareció acompañada del responsable de Política Llingüística, Ramón d’Andrés y del conseyeru d’Educación José Luis Riopedre. La conseyera, que fexo parte de la so intervención n’asturianu, defendió les midíes entamaes pol gobiernu del Principáu como una iniciativa que calificó de “pasu importante pa sentar les bases d’un consensu necesariu alrodiu de la llingua asturiana, superando enzancos y engarradielles inútiles”. Paloma Uría, en representación del grupu parlamentariu d’IX-Bloque, apoyó el Plan, inda recalcó la necesidá de nun escaecese del reconocimientu de la oficialidá como midía fundamental p’afondar na normalización del asturianu. Per parte del Partíu Popular, el diputáu Joaquín Aréstegui calificó el Plan de Cultura de “oportunista” y “nada eficaz”, pal representante de la oposición: “ye un plan fechu namás pa llavase la cara énte los sos socios de coalición”.Tres la so aprebación definitiva pol Conseyu de Gobiernu del Principáu, yera esta la primer ocasión na que’l Plan se debatía nel parlamentu y cola opinión de distintos axentes sociales comprometíos cola defensa de los drechos llingüísticos asturianos. 30 de mayu, 2005 0 FacebookTwitterPinterestEmail
Sociedá A.I. denuncia nel so informe de 2005 que’l nuevu orde mundial nun cuenta colos derechos humanos by asturnet 26 de mayu, 2005 Los representantes d’Amnistía Internacional n’Asturies ufiertaron un panorama mundial que tocante a los derechos humanos nun invita a pensar que’l nuevu orde políticu tea favoreciendo una realidá acordies col respetu a la integridá de les persones y al desenvolvimientu de los pueblos. Na presentación n’Uviéu del Informe añal correspondiente a 2005, Pilar Lobo, portavoz d’Ammistía n’Asturies afirmó que Los gobiernos nun tán cumpliendo la so promesa d’establecer un orden mundial basáu nos derechos humanos, sinón que tán siguiendo una nueva y peligrosa axenda. Na presentación énte los medios del Informe Añal 2005 d’Amnistía Internacional, la organización afirmó que “los gobiernos nun dieran amueses d’ integridad nel exerciciu del so lideralgu y tienen rendir cuentes”. Pa Amninstía Internacional anguaño “ta elaborándose una nueva axenda na que s’utiliza el llinguaxe de la llibertá y la xusticia p’aplicar polítiques de mieu ya inseguridá”. Con tal fin, según la organización humanitaria ta intentándose, ente otras cosas, “redefinir la tortura pa facela admisible, manifestó Pilar Lobo Fernández, vicepresidenta de la Unidad Territorial de Amnistía Internacional en Asturias. Esta nueva “axenda, sumada a la indiferencia y la inacción de la comunidá internacional”, afirmó Lobo, “dexó a incontables millares de persones abandonaes a la so suerte en crisis humanitaries y conflictos olvidaos” a lo llargo de 2004. La representante d’Aministía Internacional n’Asturies enumeró los casos más graves vivíos nel pasáu añu. Asina, l’informe de la organización humanitaria remembra qu’en Darfur, el gobiernu sudanés “provocó una catástrofe de derechos humanos, y la comunidá internacional fizo mui poco p’abordar la crisis y abondo tarde, defraudando asina a centenares de miles de persones. La situación d’Haití, ye otra d’eses catástrofes humanitaries onde “se permitió ocupar de nuevu posiciones de poder a individuos responsables de graves violaciones de derechos humanos. Tamién nel este de la República Democrática del Congo, según Amnistía Internacional “nun hubo una respuesta efectiva a la violación sistemática de decenes de miles de muyeres, neñes y neños, incluíos bebés”. Afganistán, foi otru de los escenarios denunciaos pola organización humanitaria, onde “al pesar de celebrase elecciones, Afganistán precipitóse nuna espiral de desorden ya inestabilidad” y en Irak, “la violencia yera endémica en 2004”, afirma l’informe. Nel planu nacional, los gobiernos, según Amnistía “traicionaron los derechos humanos con un coste terrible pa los ciudadanos d’a pie”, asina, según informes en poder de la organización, “los soldados rusos torturaron, violaron y agredieron sexualmente a muyeres chechenes con impunidá”;el gobiernu de Zimbabue “manipuló la escasera d’alimentos con fines políticos”. Pa Amnistía, la traición de los gobiernos a los derechos humanos tuvo acompañada d’actos cada vez más terribles de terrorismu, “al llegar los grupos armaos a un grado inaudito de brutalidá”. La decapitación televisada de cautivos n’Irak; el secuestru de más de milenta persones, incluíos centenares de neños, nuna escuela de Beslan, y la matanza de centenares de viaxeros de trenes de cercaníes de Madrid, sescudieron al mundu, manifestó Pilar Lobo. Sicasí”, pa la representante d’A.I. n’Asturies, los gobiernos “nun tán abordando la so falta d’ésitu na llucha contra el terrorismu, sinón qu’insisten n’aplicar estratexes fallíes pero convenientes dende el puntu vista políticu”. A.I. considera que, cuatro años después del 11-S, “la promesa de facer del mundu un sitiu más seguru sigue ensin cumplise. La política de los Estos Uníos en materia de seguridá tampoco escapa a les denuncies de la organización humanitaria pa la que “los intentos del gobiernu estadounidense de suavizar la prohibición absoluta de la tortura por mediu de nueves polítiques y de terminoloxía cuasi administrativa como manipulación medioambiental, postures estresantes y manipulación sensorial, fueron ún de los ataques más perxudiciales a los valores globales. Pa Aministía Internacional “la duplicidá de los gobiernos y la brutalidá de los grupos armaos alcuentren cada vez más oposición, en forma de decisiones xudiciales, resistencia popular, presión pública ya iniciatives de reforma de la ONU señaló Pilar Lobo, pa la que agora el reto que se plantea al movimientu de derechos humanos consiste n’aprovechar la potencia de la sociedá civil pa obligar a los gobiernos a cumplir les promeses que ficieran en materia de derechos humanos. 26 de mayu, 2005 0 FacebookTwitterPinterestEmail
Sociedá L’Academia amúesase contenta del acoyimientu que ta recibiendo la so propuesta de pautu social pola llingua y la cultura asturianes by asturnet 24 de mayu, 2005 L’Academia de la Llingua Asturiana emitió ayer un comunicáu nel que manifiesta’l so contentu pola acoyida que ta algamando la so propuesta d’entamar un gran pautu pola llingua y la cultura d’Asturies. La propuesta féxola pública la presidenta de la institución nel so discursu institucional del Día les Lletres y inclúi un alcuerdu alrodiu de la oficialidá, la normalización de la llingua y l’inxerimientu de la cultura asturiana en toles estayes de la enseñanza y de la vida social de la nuestra comunidá. Sindicatos y partíos asturianistes tan acoyendo la propuesta de l’Academia con bon tiez, según fizo saber la institución. Hasta agora el másimu organismu en materia llingüística del Principáu caltuvo reuniones coles organizaciones sindicales UXT, Comisiones Obreres, USO, SUATEA y Corriente Sindical d’Izquierda, asina como cola mayoría de los grupos políticos nacionalistes y asturianistes, amás d’organizaciones sociales implicaes na defensa de los drechos llingüísticos. Na valoración que fai l’Academia d’estos alcuentros amúesase contenta. Agora l’espardimientu de la so propuesta va tener una segunda fase a lo llargo de la primer quincena de xunetu col treslláu de los conteníos de la ufierta de pautu al gobiernu autonómicu, al central, a la Xunta Xeneral del Principáu y a los grupos parlamentariod presentes nella. La propuesta scadémica nomada Alcuerdu Social y Políticu sobre la Llingua y la Cultura dAsturies, resúmese nos siguientes puntos:reconocimientu del asturianu como llingua co-oficial nel Estatutu dAutonomía dAsturies; afitamientu de los conteníos de la normalización y plazos na so puesta en práutica; pautu presupuestariu, conseñandol mínimu necesariu pa facer vidable y efeutivu lusu social de la llingua;dignificación, recuperación y divulgación de la cultura asturiana (arte, folklore, etnografía, historia, música ) nel ámbitu educativu; inxerimientu de lAntropoloxía Cultural Asturiana, nel nivel que correspuenda, dientro de la Universidá dUviéu. Na nota de prensa emitía ayer l’Academia de la Llingua afima que ta enfotada en “que les perbones perspeutives quhasta esti momentu sacolumbren puedan confirmase coles xuntes que van caltenese nes próximes selmanes y que, en definitiva, lalcuerdu pueda ser una realidá a mediu plazu” y anuncia que la institución dirá informando públicamente de les novedaes que se vayan produciendo a lo llargo del procesu d’espardimientu de la so propuesta. 24 de mayu, 2005 0 FacebookTwitterPinterestEmail
Sociedá Simone Veil algama’l Premiu Príncipe d’Asturies de Cooperación Internacional by asturnet 24 de mayu, 2005 El xuráu del Premiu Príncipe d’Asturies de Cooperación Internacional fexo pública esti meudía la decisión d’apurrir el galardón a la francesa Simone Veil. La premiada ye un referente moral na Europa contemporánea de la llucha polos derechos humanos y contra la intolerancia. Superviviente del campu d’esterminiu d’Auschwitz y presidenta del primer parlamentu européu, tien destacao al empar por trabayar en pos de la unidá comunitaria. Anguaño ye presidenta de la Fundación pa la Memoria de la Shoah (Holocausto), una institución dedicada a remembrar a les víctimes del nazismu. El xuráu del Premiu Príncipe d’Asturies de Cooperación Internacional tuvo presidíu pol ex presidente español Leopoldo Calvo Sotelo, y formébenlu la presidenta de la Xunta Xeneral del Principáu María Jesús Álvarez González, Enrique Barón, Emilio Cassinello, Alicia Castro Masaveu, Manuel Díaz Ron, Severino García Vigón, Antonio Garrigues Walker, Laura González, Álex Grijelmo, Luis Lada Díaz, Ricardo Martí Fluxá, José María Martín Patino, Marcelino Oreja Aguirre, Yago Pico de Coaña, Francisco Pinto Balsemão, Luis Ruiz de Gopegui, Alfonso de Salas, Luis Sánchez-Merlo, Nicolás Sartorius, Gustavo Suárez Pertierra y Teodoro López-Cuesta, como secretariu. La premiada Simone Veil nació na ciudá francesa de Niza en 1927. En 1944,na ocupación de Francia polos alemanes, deportáronla con so madre y una hermana, al campu de concentración d’Auschwitz. So padre y otru hermanu desapaecieron y nunca más volvió a sabese d’ellos. Una vez lliberada, en mayu de 1945, instalóse en París, onde se llicenció en Derechu y diplomóse nel Institutu d’Estudios Políticos. Veil ingresó en 1957 por oposición na Macistratura como agregada del Ministeriu de Xusticia. En 1969 pasó a desempeñar el cargu de conseyera técnica del mesmu Ministeriu y ente 1970 y 1974 fue secretaria xeneral del Conseyu Superior de la Maxistratura. Mientres el mandatu presidencial de Valery Giscard d’Estaing, en 1974, convirtióse na primera muyer ministra de la Quinta República al facese cargu del Ministeriu de Sanidá y Seguridá Social, cartera qu’ocupó cinco años, nos que modernizó la organización hospitalaria de Francia. Nes elecciones al Parlamentu Européu de 1979 encabezó la llista de la Unión pa la Democracia Francesa y fue nombada presidenta del primer Parlamento Europeo elexíu por sufraxu universal directu, un cargu qu’ ocupó hasta febreru de 1982, en que pasó a desempeñar la presidencia de la Comisión Xurídica del mesmu Parlamentu. Nos comicios europeos de 1984 encabezó la llista lliberal-conservadora y convirtióse en presidenta del grupu lliberal. En 1989, salió escoyía eurodiputada por “Centru pa Europa” y formó parte de la Comisión d’Asuntos Políticos del Parlamentu. En 1993, tres el triunfu electoral d’Edouard Balladur, fue nomada ministra d’Estáu d’Asuntos Sociales, Sanidá y Ciudadanía, cargu qu’ocupó hasta 1995. Ye, dende 1998, miembru del Conseyu Constitucional de Francia y, dende 2001 presidenta de la Fundación pa la Memoria de la Shoah (Holocaustu). 24 de mayu, 2005 0 FacebookTwitterPinterestEmail
Sociedá Ana Cano sigue al frente de l’Academia by asturnet 24 de mayu, 2005 Ana Cano como presidente y Miguel Ramos Corrada como vicepresidente, foron escoyíos esta selmana xunta Roberto González-Quevedo como secretariu, Urbano Rodríguez como vicesecretariu y Carlos Lastra como ayalgueru pa formar la Xunta de Gobiernu de l’Academia de la Llingua Asturiana, repitiendo la direición que venía calteniéndose hasta agora. Les eleiciones na institución académica desendolcáronse con normalidá dafechu, afitándose la continuidá de la direición caltenida hasta agora, xustamente nel momentu que l’Academia tien plantegada una propuesta d’entamar un gran pautu pola llingua y la cultura d’Asturies. La propuesta féxola pública la presidenta de la institución nel so discursu institucional del Día les Lletres y inclúi un alcuerdu alrodiu de la oficialidá, la normalización de la llingua y l’inxerimientu de la cultura asturiana en toles estayes de la enseñanza y de la vida social de la nuestra comunidá. 24 de mayu, 2005 0 FacebookTwitterPinterestEmail
Sociedá La villa mallorquina de Santa Margalida organiza unes xornaes pola llingua y la cultura d’Asturies y de la isla by asturnet 22 de mayu, 2005 La villa mallorquina de Santa Margalida va celebrar los prósimos díes 27 y 28 de mayu la Diada per la llengua, cultura y tradicions dels pobles de Mallorca y d’Asturies. La iniciativa d’esti alcuentru ente les cultures catalana de les isles Balearses y l’asturiana ye de la parroquia del llugar y collaboren nella per parte del Principáu, la Oficina de Política Llingüística y la Conseyería de Xusticia y Esteriores. Les xornaes coinciden cola Acampallengua, una acampada en defensa del idioma catalán nes isles que va celebrase’l prósimu fin de selmana nel llugar cercanu de Porreres. 22 de mayu, 2005 0 FacebookTwitterPinterestEmail
Sociedá La villa mallorquina de Santa Margalida va celebrar unes xornaes dedicaes a la llingua y la cultura d’Asturies y de les isles by asturnet 22 de mayu, 2005 La villa mallorquina de Santa Margarida va celebrar los prósimos díes 27 y 28 de mayu la primera Diada pola llingua, cultura, tradiciones de los pueblos de Mallorca y d’Asturies. La iniciativa ye de la parroquia del llugar y per parte asturiana tien el sofitu de la Oficina de Política Llingüística y de la Conseyería d’Esteriores. Estes xornaes coinciden cola celebración el prósimu fin de selmana de l’Acampallengua, una xuntanza reinvindicativa en defensa de la llingua catalana de les isles, que va entamase en Porreres, un llugar al llau de Santa Margalida. Talo desplica Inaciu Galán, coordinador na parte asturiana de les actividaes que van entamase en Mallorca, la iniciativa d’organizar esta Diada partió del párracu de Santa Margalida, Gillem Feliu: “qu’exerce nesi pueblu con poco más de cuatro mil habitantes d’auténticu animador cultural y ye un apasionáu d’Asturies y la so cultura”. El cura mallorquín, desplica Galán,ye tamién “un hestóricu defensor de la llingua y la cultura catalanes en Baleares” y tocante al so interés por Asturies, l’actual párracu de Santa Margalida, vivió un tiempu n’Uviéu onde exerció los sos llabores pastorales na ilesia de San Francisco Javier. Les xornaes d’alcuentru ente Asturies y Mallorca empiecen la tarde del prósimu viernes 27 con entrambes charres, una de Xuan Santori sobre la realidá llingüística de la nuestra comunidá y otra del profesor de la Universital Oberta de Catalunya Jaume Corvena, alrodiu de la situación del idioma catalán nes isles. Tres les conferencies va haber una sesión de castellets y un conciertu de rock a cargu de los grupos Roborter y Useil de Foc. Al día siguiente, sábadu, a lo llargo de la tarde van facese una proyección de cortometraxes n’asturiano y catalán, habrá una llectura de poesía na nuestra llingua, una nueva amuesa de castellets y una misa billingüe. Pela nueche un conciertu de música folk cola participación de los astur-catalanes Risca l’Alba y grupos de Mallorca, va poner remate a la Diada. 22 de mayu, 2005 0 FacebookTwitterPinterestEmail
Sociedá El Conceyu Abiertu entama una ruta de Monte na so campaña pola oficialidá de la llingua by asturnet 17 de mayu, 2005 El Conceyu Abiertu pola Oficialidá de la llingua asturiana va entamar una ruta de Monte el prósimu 29 de mayu col oxetu de siguir remembrando la necesidá del reconocimientu de los drechos llingüísticos asturianos na reforma del Estatutu y al través del inxeríu nél de la oficialidá. La marcha va salir de Tuiza de Riba con llegada a Espineo, nel Conceyu de L.lena y la organización espera qu’esta nueva acción tenga l’ésitu de les sos últimes convocatories. L’oxetivu d’esta marcha de monte ye dar continuidá a les acciones reivindicatives del Conceyu Abiertu y nun perder la referencia de la necesidá de caltener viva la demanda pola oficialidá, según manifestaron a Asturnews fontes de la organización. En palabres de Xulio Casado, voceru de la Xunta pola Defensa de la Llingua, la organización entamadora del Conceyu, trátase de “continuar les actividaes del CAO después de la última manifestación del Día les Lletres, que foi la más importante en participación de toles que se celebraron y paeznos fundamental nun desaprovechar esi aliendu de movilización necesaria pola oficialidá”. Pa Casado igual de necesario ye siguir manteniendo l’espíritu unitariu que presidió la manifesación del pasáu 6 de mayu: “dende siempre la Xunta y agora el Conceyu Abiertu pola Oficialidá apostamos pola necesidá de xuntar esfuerzos en común y poner asina en claro col mayor apoyu una demanda que la sociedá asturiana desixe cada vez con más fuerza, como s’amosó na manifestación de les Lletres”. La marcha de monte pel conceyu de L.lena puede interpretase como una puesta a puntu de los motores del Conceyu Abiertu pola Oficialidá de cara al veranu y colos güeyos puestos nel reiniciu del cursu políticu después del periodu vacacional nel que podía entamar a debatise la reforma del Estatutu d’Autonomía. La convocatoria d’esta ruta ye abierta a toles persones que quieran participar y nun se requier especialmente una preparación física estraordinaria pa entamala, según Xulio Casado “ye una ruta cenciella, non mui llarga, pa que puedan participar nella los que quieran, ensin necesidá d’una preparación especial”. Nel trecursu de la marcha va haber un alcuentru colos medios de comunicación pa remembra-yos la razón pola que s’entama esta actividá dientro la campaña pola oficialidá del Conceyu Abiertu. 17 de mayu, 2005 0 FacebookTwitterPinterestEmail
Sociedá Los gais asturianos reivindiquen el 17 de mayu by asturnet 16 de mayu, 2005 La organización Xente Gai Astur(XEGA)súmase esti 17 de mayu a otres cuarenta organizaciones de diversos países que-y piden a la ONU la declaración de la data de güei como Día Internacional contra la Homofobia y la Transfobia. Los gais y lesbianes d’estes organizaciones quieren membrar que’l diecisiete de mayu de 1990 la Organización Mundial de la Salú (OMS) suprimía nel so llistáu d’enfermedaes mentales la homosexualidá.El director de l’Axencia Asturiana de Cooperación, Rafael Palacios y el coordinador de XEGA, José Manuel González firmen un manifiestu nel que se pide la instauración d’esti Día Internacional y el fin de les discriminaciones inda esistentes. Pa los firmantes del manifiestu del 17 de Mayu celebrar esti día “supón reforzar la solidaridá con toles lesbianes, gais, bisexuales y transexuales (colectivu GLBT) del mundu enteru y reafirmar el compromisu colos qu’en cualquier parte sufren les consecuencies de la Homofobia y la Transfobia”. El manifiestu remembra que si bien “lesbianes, transexuales, gais y bisexuales esfruten güei de más llibertá que nunca: tán presentes y son visibles na cai, nes revistes, na televisión, nel cine… Parez una realidá completamente aceptada, sobre too si se tienen en cuenta los avances lexislativos más recientes en dellos países, nos que se vienen reconociendo los derechos pa les pareyes del mesmu sexu, incluíu en dalgunos el derechu al matrimoniu. Hai una opinión enforma xeneralizada de que, magar seyan necesarios dalgunos axustes pa desaniciar les últimes discriminaciones, la evolución de les mentalidaes y el simple pasu del tiempu van permitir que se llegue a una situación de normalización plena y a consolidar un procesu qu’entamó hai unes cuantes décades”, tamién ye cierto que tovía n’ochenta estaos la homosexualidá ta persiguida como delitu (Arxelia, Senegal, Camerún, Etiopía, Líbano, Xordania, Armenia, Kuwait, Puerto Rico, Nicaragua, Bosnia…); y qu’en varios países esta condena pue llegar a ser superior a diez años de prisión (Nixeria, Libia, Siria, India, Malaisia, Cuba, Xamaica…); a vegaes la llei contempla la cadena perpetua (Guyana, Uganda), y nuna decena de naciones aplícase la pena de muerte (Arabia Saudita, Afganistán, Irán…). N’otros países, recuerden los firmantes del manifiestu, la situación nun ye meyor pa los homosexuales y lesbianes, asina: “Nun va muncho, dellos presidentes d’estaos africanos afirmaron brutalmente’l so determín pa lluchar personalmente escontra una plaga -la homosexualidá- qu’ellos califiquen d’antiafricana. Incluso n’otros países onde la homosexualidá nun ta tipificada nel códigu penal, multiplíquense les persecuciones. En Brasil, por exemplu, los escuadrones de la muerte y los skin heads semen el terror: ente 1980 y 2000 censáronse oficialmente 1.960 asesinatos homofóbicos”. Por toes estes razones, afirmen los firmantes del manifiestu:” celebramos esti 17 de mayu como’l Día Internacional Contra la Homofobia y la Transfobia. Nesti día recordamos que’l 17 de mayu de 1990 l’Asamblea Xeneral de la Organización Mundial de la Salú (OMS) suprimió definitivamente la homosexualidá de la llista d’enfermedaes mentales, onde nunca debió tar. Esta midida acabó con cuasi un sieglu d’homofobia médica y de discriminación sistemática escontra lesbianes, gais y bisexuales”. .La propuesta d’un Día Mundial Contra la Homofobia y la Transfobia ye una iniciativa que cuenta col sofitu de la Asociación Internacional de Lesbianes y Gais (ILGA) y col de munchos colectivos y entidaes presentes en más de 40 países. N’Asturies, el presente añu 2005 celébrase per primer vez esta xornada, empobinada por Xente Gai Astur (XEGA) y l’Axencia Asturiana de Cooperación al Desarrollu (Conseyería de Xusticia, Seguridá Pública y Relaciones Esteriores).Más información 16 de mayu, 2005 0 FacebookTwitterPinterestEmail