Sociedá L’asturianismu reivindica Conceyu Bable como grupu imprescindible pa entender la sociedá d’anguaño by asturnet 19 de payares, 2004 L’Asturies d’anguaño, nel so sentíu más ampliu, nun s’entendería ensin Conceyu Bable. Con esa reivindicación presentóse esti mediudía n’Uviéu un programa d’actos que “conmemora, non cellebra” el trenta aniversariu del collectivu qu’articuló el Surdimientu y que, según los promotores de la conmemoración, determinó en parte l’actual esistencia del Principáu d’Asturies como comunidá autónoma singular. Según destacó el cantante Xune Elipe, ún de los organizadores de los actos que compareció güei pa presentar el programa conmemorativu -xunta Ismael González Arias y Nacho González-, los asturianos dében-y amás al llabor de Conceyu Bable la inclusión del artículu 4 del Estatutu d’Autonomía, el primer preceptu llegal qu’obligó a l’Alministración a alitar l’usu de la llingua asturiana. “Como comunidá humana, non sólo no llingüístico, l’Asturies de güei nun s’entendería ensin Conceyu Bable”, proclamó Elipe. Y magar d’esa reconocencia, los organizadores del programa d’aniversariu de Conceyu recordaron que la situación de la llingua anguaño “ye crítica” y poro alvirtieron que “llevamos 30 años equí y si fai falta taremos otros 30 años más”. Una misa cellebrada y cantada n’asturianu abrirá’l domingu la llista de les cellebraciones, a partir de les 20 hores, na ilesia parroquial del Cristu les Cadenes, n’Uviéu. El llunes habrá un alcuentru d’artistes plástiques en Xixón y na biblioteca d’El Fontán, n’Uviéu, abrirá les sos puertes una esposición de pegatines. Depués de sendos recitales de Carlos Rubiera en Xixón y de tonada en L’Entregu, dambos el martes, el teatru Campoamor acoyerá el miércoles l’actu central, un conciertu de cantautores del Surdimientu coles entraes a un preciu simbólicu de 6 euros. Un alderique con miembros de Conceyu Bable (xueves), dos conciertos folk y rock en Mieres (vienres y sábadu, respectivamente) y un recital poéticu d’autores del Surdimientu en Llanes (sábadu) piesllen el programa d’actos. Conceyu Bable echó a andar nel añu 1974 cola revista ‘Asturias semanal’ como epicentru de les sos reivindicaciones y la defensa de la llingua asturiana por bandera. Na asociación confluyeron los pioneros del movimientu asturianista, que col pasu’l tiempu ramificóse n’estremaos collectivos y corrientes y vio aselecer la que ta considerada como la so organización fundacional. 19 de payares, 2004 0 FacebookTwitterPinterestEmail
Sociedá Ayer axúntase a la llista d’ayuntamientos interesaos en contar con oficina de promoción del asturianu by asturnet 18 de payares, 2004 Ayer apúntase a la llista. El municipiu gobernáu pol socialista Gabriel Pérez Villalta busca asesoramientu na Oficina de Política Llingüística del Principáu pa crear un serviciu de normalización de la llingua asturiana asemeyáu a los que yá tán en marcha en Xixón, L.lena, Llangréu y la Mancomunidá’l Cabu Peñes. Responsables de la Corporación ayerana amosaron interés por entamar un departamentu llocal de promoción del asturianu y mantienen nesti aspectu conversaciones col titular de la Oficina de Política Llingüística, Ramón D’Andrés, nun procesu nel que tamién participen dos conceyos que comparten llendes col ayerán, L.lena y Mieres. El primeru d’ellos tien en marcha un serviciu municipal de promoción llingüística que propició l’entamu, el pasáu 6 de payares, de señalización n’asturianu d’entrada y salida a poblaciones del conceyu. Pol so llau, l’Ayuntamientu de Mieres forma parte d’una llista, xunta Cangas de Narcea, Llanes y Avilés, de municipios qu’estudien la creación en feches prósimes d’oficines propies de normalización. El departamentu de Política Llingüística del Gobiernu autonómicu plantega como la so prioridá cimera pa 2005 el puxu de la denominada Rede de normalización nos conceyos. L’Ayuntamientu de Xixón peslló ayeri unes xornaes monográfiques sobro iniciatives llocales pa la promoción llingüística. 18 de payares, 2004 0 FacebookTwitterPinterestEmail
Sociedá D’Andrés relaciona l’aumentu presupuestariu cola rede de normalización nos conceyos by asturnet 17 de payares, 2004 El responsable de la Oficina de Política Llingüística, Ramón d’Andrés Fernández, aprovechó la última sesión de les Xornaes sobre Normalización nos Conceyos pa confirmar que’l caltenimientu y espardimientu de la rede de servicios llocales “ye una prioridá absoluta” del so departamentu y relacionó directamente el 20 por cientu aumentáu nos presupuestos autonómicos en materia de promoción del asturianu con ello: “gran parte d’esi 20 por cientu va destinase a la rede”, aseguró. Les primeres Xornaes sobre Normalización Llingüística nos Conceyos peslláronse en Xixón con una sesión de mañana dedicada a esponer el trabayu desenvueltu pola Oficina Municipal de la Llingua del conceyu agospiador per parte de la so responsable técnica María Xosé Fernández y na sesión de la tarde nuna ponencia de Ramón d’Andrés, siguida d’una mesa redonda colos cabezaleros de los cuatro servicios locales qu’anguaño esisten n’Asturies.Nel cursu de la so intervención, el Xefe de Serviciu de la Oficina del Principáu, confirmó que la puesta en marcha de la rede municipal ye xunto a la igua toponímica, una de les dos prioridaes fundamentales de l’acción del so departamentu. “El 20 por cientu que s’aumentó en materia llingüística repuende a la necesidá d’apoyar esa rede y bien d’eses perres van destinase a tal fin”, dixo d’Andrés. Respective a un de los tremores que manifestaron tolos cuatro responsables de les oficines normalizadores anguañu esistentes no tocante a la continuidá de los servicios, al marxe de clime políticos más o menos favorables, el representante de la Conseyería de Cultura apuntó la necesidá “d’amarrar bien les coses consensuando ente tolos grupos” representaos nes corporaciones “p’asegurar la continuidá del serviciu de normalización más alló de que cambien les coyuntures polítiques”, esti consensu había pasar per “dotar a les oficines de la estructura administrativa oportuna pa que naide les pueda tocar nun futuru”. L’apoyu de l’adminstración asturiana foi otru de los elementos necesarios que Ramón d’Andrés calificó de “indispensable” pa la rede de servicios locales. Una de les realidaes coles que se van tener d’enfrentar los planes de Política Llingüística, reconocio d’Andrés, ye la “de la diversidá qu’hai ente los 78 conceyos d’Asturies”, el representante del Principáu, añadió “paez obvio que falar de 78 servicios municipales nun tien sentíu, poles dimensiones que tienen munchos conceyos”, la mancomunación d’estes oficines diba ser una solución pa d’Andrés: “inda nun tenga correspondese coles mancomunidaes esistentes, pueden mancomunase servicios de conceyos limítrofes y siempre atendiendo a la realidá llingüística a la que pertenecen estos conceyos”, matizó, aludiendo al casu que pudieren presentar conceyos como los de la mancomunidá costera occidental de les Cinco Villes. La posibilidá d’esparder la rede normalizadora inda s’amosaba como una quimera bien llonxana, tanto na intervención de Ramón d’Andrés como a les que la siguieron de los cuatro técnicos llingüísticos de Xixón, Llangréu, L.lena y Mancomunidá de Peñes. Na mesa redonda toos, incluíu’l responsable del gobiernu asturianu, coincidieron en que lo primero ye afitar los servicios qu’hai agora y dir apoyando la creación d’otros. Respective a les característiques qu’había tener una oficina local pa tener asegurada la so continuidá, la técnica del Conceyu de Xixón señaló tres imprescindibles: “presupuestu propiu, espaciu físicu propiu y personal propiu”. Nuna de les sos últimes intervenciones Ramón d’Andrés reconoció qu’hai “resistencies, hailes y diba ser una babayura negales”, al pesar d’estes rocees “presentes en tolos ámbitos de les administraciones”, el Xefe de Serviciu de la Oficina del Principáu quiso llanzar un guiñu d’optimismu moderáu refiriéndose al “clima positivu que ta algamando pocoñín a poco el reconocimientu social de la llingua” y una de les claves pa siguir avanzando nesti reconocimientu ye pa d’Andrés resaltar los valores positivos que puede tener la normalización del asturianu non namás nel ámbitu cultural sinón n’ámbitos económicos como por exemplu el turísticu y el sector servicios: “un conceyu que se distinga pola so política de promoción del asturiano o una empresa o comerciu qu’use esa llingua tan ufiertando un atractivu potencial a la xente, pensemos por exemplu énte los visitantes d’otres comunidaes qu’a menudo vienen buscando equí lo propio y distinto”, eso ye dalgo qu’inda nun se tien en cuenta n’amplios sectores sociales “anclaos nun conservadurismu decimonónicu qu’inda piensa que lo meyor ye tener una llingua namás y idees asemeyaes”, dixo d’Andrés.Respective a los planes más inmediatos de puesta en marcha de nueves oficines el responsable de Política Llingüística anunció la prósima creación “ya ta faciéndose la selección de personal” d’un serviciu en Sieru, otros conceyos interesaos en poner a funcionar servicios normalizadores seríen los integraos na Mancomunidá de la Sidra, Cangas, Avilés y la Mancomunidá de les Cinco Villes. 17 de payares, 2004 0 FacebookTwitterPinterestEmail
Sociedá Cultura acuta una partida nos presupuestos pa sufragar nueves beques destinaes a fomentar la creación lliteraria by asturnet 16 de payares, 2004 Novedaes nos númberos. El presupuestu de la Conseyería de Cultura, Comunicación Social y Turismu pa 2005 acuta una partida d’al rodiu de 15.000 euros pa sufragar nueves ayudes a la creación lliteraria en llingua asturiana, prevé suprimir les subvenciones pa la torna d’obres n’asturianu a otres llingües pola baxa demanda y estudia dos víes distintes pa estimular con dineru públicu la normalización nos conceyos. Según un documentu al que tuvo accesu Asturnews, y nel que se detallen les cantidaes acutaes pa promoción del asturianu nunes cifres que previsiblemente aprobará’l Parlamentu autonómicu colos votos favoratibles de los partíos nel Gobiernu -PSOE ya Izquierda Xunida-Bloque por Asturies-, una partida específica d’al rodiu de 15.000 euros destínase pa nuevos incentivos a los escritores, mientres que los 54.000 euros qu’esti añu s’emplegaron pa subvencionar tornes d’obres asturianes a otros idiomes repartiránse n’otres estayes, énte les poques solicitúes recibíes nesti sen dende les editoriales. Amás d’eses dos novedaes, Cultura prevé aumentar sensiblemente les ayudes económiques a los ayuntamientos pa qu’éstos promocionen l’usu de la llingua asturiana. Nesti puntu, los responsables autonómicos de Política Llingüística -departamentu dirixíu por Carlos Madera dende la Dirección Xeneral de Promoción Cultural- estudien articular dos calces estremaos de financiación: D’un llau, alcuerdos específicos colos municipios; d’otru, subvenciones especiales pa los conceyos que tengan o pongan en marcha oficines llocales de normalización. La Conseyera de la Presidencia, María José Ramos, y otros altos cargos d’esi departamentu defendieron ayeri énte la Comisión de’Economía y Alministración Pública de la Xunta Xeneral del Principáu el Proyectu de Llei de Presupuestos Xenerales pa 2005, que con calter xeneral aumenta nun 20 por cientu los fondos destinaos a política llingüística. Archivu. Presentación de los presupuestos de Cultura 16 de payares, 2004 0 FacebookTwitterPinterestEmail
Sociedá Espertos asturianos piden planificación y continuidá na pólitica llingüística by asturnet 16 de payares, 2004 La planificación rigurosa de cualquier proyectu de normalización social entamáu poles distintes administraciones xunto a la continuidá y evaluación de les polítiques desenvueltes consideráronse claves pal ésitu d’estes acciones. Esa foi el principal puntu nel que coincidieron xestores culturales y el representante del movimientu cívicu pol asturianu na mesa celebrada güei en Xixón. La voluntá real de los gobernantes resaltóse tamién como un elementu decisivu nestes actuaciones públiques. Adolfo Camilo Díaz, xestor de diversos proyectos culturales en conceyos; Penélope Miranda, responsable del Serviciu de Normalización de L.lena y Yolanda Montes, responsable de la oficina de Llangréu y Fernando Balbuena representante de la Xunta pola Defensa la Llingua fueron los encargaos de debatir na mesa titulada “Mormalización y ciudadanía” el casu asturianu.Adolfo Camilo Dïaz espunxo les diverses esperiencies d’acción positiva desenvueltes nos conceyos onde trabayó en proyectos de xestión cultural y resaltó de toos ellos “la bona y normal acoyida” que despertaben nel conxuntu los ciudadanos, una acoyida que contrastaba “cola actitú a veces xeneralizada de rocea o desinterés de los responsables políticos”. Una de les claves de la bona respuesta de la xente foi pal actual xestor cultural del Ayuntamientu d’Avilés “l’usu d’una llingua cercana y reconocible polos mesmos falantes” y resaltó como la principal carencia “na falta de continuidá de los proyectos, munches veces suxetos al vaivén de los cambios políticos o de persones con estes responsabididaes”, esto supón “tamién el trabayar en precario y ensin unes mínimes posibilidaes d’asegurar el llabor fechu”. La falta de continuidá de les acciones emprimaes en materia de promoción llingüística foi dalgo que tamién coincidieron en denunciar les resposables de les oficines de Normalización de L.Lena y Llangréu, Penélope Miranda y Yolanda Montes: “De los cuatro servicios normalizadores qu’esisten nos conceyos, namás dos d’ellos, el de Xixón y el de la mancomunidá de Peñes, tienen presupuestu propiu, L.Lena y Llangréu dependen escluvamente de les subvenciones”, afirmó la responsable de normalización de L.lena. Pela so parte, la responsable del serviciu llangreanu, aportó la necesidá d’aprovechar nos conceyos les posibilidaes del texíu asociativu, sobremanera el de les asociaciones moces pa facer actividaes de promoción del idioma. L’ausencia d’una “planificación programada, rigurosa, continuada nel tiempu y sometía a una evaluación periódica” ye ún de los rasgos que caltericen el casu d’Asturies en materia de normalización pal representante de la Xunta pola Defensa de la Llingua Fernando Balbuena, qu’apuntó a la “evidente falta de voluntá política” como la desplicación d’esta carencia. “Faen falta non un plan, sinón seguramente munchos planes, en cada administración” afirmó Balbuena “y que nellos se detalle lo que se va facer, cómo, con qué medios, temporalización y una evaluación cola que se sigan les coses entamaes pa ver les que funcionen y les que non”. El voceru de la Xunta faló tamién de la necesidá de que cualquier política llingüística había dir empobinada a consiguir “la perpetuación del idioma” y a incidir na “quiebra xeneracional que se ta dando na tresmisión del asturianu”. Fernando Balbuena refirióse a otru de los asuntos comentaos na intervención anterior de Adolfo Camilo Díaz, el del tipu de llingua usada “si falla la ferramienta” dixo “y los propios falantes nun se reconocen na llingua utilizada ye seña de que se ta faciendo mal, eso ta claro”. A la mesa redonda siguióla un animáu coloquiu nel qu’intervinieron dende’l públicu, xunto a dellos asistentes a la xornada,el responsable de la Oficina de Política Llingüística d’Asturies Ramón d’Andrés y la conceyal de Mocedá del Ayuntamientu de L.lena. D’Andrés comprometióse a que la planificación y la continuidá diben ser los exes enriba los que se diba desenvolver la política del so departamentu y insistió na importancia d’asegurar “les perres necesaries, asina como l’asesoramientu y l’apoyu” de l’Adminsitración autonómica pa que los conceyos puedan trabayar n’iniciatives de normalización social. El cabezaleru de la Oficina de Política Llingüística aludió tamién a la “falta de formación” de munchos responsables políticos o d’entidaes sociales “con bona voluntá, pero ensin nengún criteriu a la hora de facer les coses” La xornada terminó col conciertu “Nueche d’insomoniu” del cantautor Toli Morilla. Mañana van siguir estes primeres Xornaes de Normalización nos Conceyos con una sesión de mañana dedicada a la ponencia: La normalización llingüística en Barcelona: Ente una metodoloxía clásica y los nuevos retos La normalització lingüística a Barcelona: entre una mètodologia clàssica i els nous reptes.” de Toni Mataix Ubach, del Centre de Normalització Lingüística de Barcelona y a la entidá organizadora d’estos alcuentros cola conferencia: La Oficina Municipal de la Llingua de Xixón: un añu faciendo camín pola normalización llingüistica de la so responsable Xosé Rodríguez López. Les xornaes piésllense pela tarde cola ponencia La rede de normalización llingüística nos conceyos dAsturies a cargu de Ramón dAndrés Díaz, Xefe del Serviciu de la Oficina de Política Llingüística del Principáu dAsturies a la que va siguir una mesa redonda colos responsables de los cuatro servicios municipales qu’hai agora funcionando n’Asturies: Eloi Antuña Zamarro, Mancomuidá de Peñes; Yolanda Magdalena Montes, Llangréu; Penélope Miranda Fernández, L.lena y MªXosé Rodríguez López, Xixón. 16 de payares, 2004 0 FacebookTwitterPinterestEmail
Sociedá Entamen en Xixón les I Xornaes sobre la Normalización Llingüística nos conceyos by asturnet 15 de payares, 2004 Especialistes en normalización llingüística d’Aragón, Cataluña, País Vascu, Galicia y Valencia xuntense en Xixón dende esti llunes 15 pa debatir el papel de los conceyos nel desenvolvimientu social de los idiomes minorizaos. Xunta ellos, axentes implicaos na normalización de la llingua asturiana van tratar d’afondar na problemática y soluciones pal nuestru idioma nes administraciones municipales. Les xornaes van celebrase los díes 15, 16 y 17 de Payares, organizaes pola Oficina Muncipal de la Llingua del Ayuntamientu de Xixón. Les I Xornaes sobre la Normalización Llingüística nos Conceyos van desenvolvese nel Centru de Cultura Antigu Institutu en sesiones de mañana y tarde. Les mañanes van tar dedicaes a amosar les distintes esperiencies que se vienen faciendo en cinco comunidaes autónomes con idioma propiu y nes sesiones de la tarde trataráse específicamente’l casu asturianu. La primer sesión va desarrollase’l 15 d’ochobre na sala conferencies del CCAI cola ponencia del valencianu César Mateu i Beltrán titulada “El serviciu de Dinamización Llingüística d’Almassora, una esperiencia en rede”. Esa mesma mañana Socorro García Conde, del departamentu de llingua gallega del conceyu de Santiago, va lleer la so aportación a les xornaes col títulu: ‘La esperiencia del Serviciu Llingüísticu del Conceyu de Santiago: L’aprovechamientu de les redes”. Les esperiencies normalizadores del País Vascu y Aragón van conocese na sesión de mañana del día 16 cola ponencia ‘Patronatu Municipal d’Euskera, 17 años na normalización en Donostia-San Sebastián’, presentada pol conceyal delegáu de Cultura y Euskera del ayuntamientu donostiarra, Ramón Etxezarreta Aizpuru; darréu va ser Franco Nagore Laís, vicedireutor del Institutu d’Estudios Altoaragoneses el que llea la so comunicación: ‘Aspeutos de la normalización y normativización del aragonés’. La última de les sesiones dedicada a les esperiencies de dinamización llingüística va dar a conocer na mañana del día 17 la esperiencia catalana: ‘La normalización llingüística en Barcelona: Ente una metodoloxía clásica y los nuevos retos’ de Toni Mataix Ubach, del Centre de Normalización Lingüística de Barcelona, y va cerrar el ciclu María Xosé Rodríguez cola ponencia: ‘La Oficina municipal de la Llingua de Xixón: un añu faciendo camín pola normalización llingüística’. La situación específica del asturianu va tratase nes sesiones de tarde. El día 15 el profesor de Derechu administrativu de la Universisá d’Uviéu, José Manuel Pérez Fernández va presentar la ponencia ‘Normalización y Administración nos conceyos’. La sesión del día siguiente va tratar el tema ‘Normalización y ciudadanía’, con Dolfo Camilo Díaz como ponente y la última na tarde del día 17, el responsable de Política Llingüistica del Principáu, Ramón d’Andrés va falar de ‘La rede de normalización llingüística nos conceyos d’Asturies’. Les comunicaciones d’estes sesiones enfocaes al casu asturianu van debatise en meses redondes nes que van participar especialistes del ámbitu institucional y de los movimientos sociales pola defensa de la llingua. Programa completu de les Xornaes de Normalización de Xixón 15 de payares, 2004 0 FacebookTwitterPinterestEmail
Sociedá Les Xornaes de Normalización de Xixón abren con una defensa de la llingua como “la mayor seña d’identidá” by asturnet 15 de payares, 2004 La llingua como “la mayor seña d’identidá d’un pueblu”. Con esa reivindicación abrió esta mañana la conceyala xixonesa de Promoción del Asturianu, Carmen Rúa, les Xornaes sobre la Normalización Llingüística nos Conceyos que Xixón acueye hasta’l prósimu miércoles. Nel mesmu actu d’apertura, el titular de la Oficina de Política Llingüísitca del Principáu, Ramón d’Andrés, alertó de la “gran llamuerga” na que ta somorguiáu l’asturianu dientro de l’Alministración pública. Nuna intervención na qu’eloxó l’esfuerzu y el llabor de los servicios llocales de promoción de la llingua asturiana, D’Andrés recordó qu’esos departamentos municipales tienen “dificultaes evidentes” pa facer el so trabayu, y aseguró que delles vegaes “piénsase que ta too fecho, pero nun ye asina”. Mui al contrario, el xefe de Política Llingüística del Principáu precisó qu’esisten “inercies negatives d’un nivel descomanáu” nel usu y promoción del asturianu tanto en delles Corporaciones Llocales, como na propia Alministración autonómica. Magar d’ello, D’Andrés reivindicó el llabor de la oficina de dirixe y de les oficines municipales de la Llingua como les úniques víes posibles, anguaño, pa normalizar l’emplegu del asturianu dende dientro del aparatu políticu, ya insistió en que gran parte del aumentu presupuestariu -un 20 por cientu respecto a esti añu- del que va beneficiase la Oficina de Política Llingüística en 2005 destinaráse a sofitar la normalización nel ámbitu llocal. Pol so llau, la conceyala Carmen Rúa (Izquierda Xunida-Bloque por Asturies) evocó la so propia infancia como exaltación del valir de les pallabres y refugó’l pantasma de la desapaición de la llingua asturiana, porque eso diba producir “una espantible sensación d’abandunu”. En términos cuasi de ‘guerrilla llingüística’, Rúa proclamó que “si dalguién espera la nuesa rendición -na recuperación del idioma-, nun alcontrará la nuesa rempuesta”. Les Xornaes sobre Normalización nos Conceyos axunten dende esta mañana y hasta’l miércoles en Xixón a especialistes d’Aragón, Cataluña, País Vascu, Galicia, País Valencianu y Asturies. Pa la xornada de güei tán previstes les intervenciones, ente otros, de Socorro García, responsable de normalización nel Ayuntamientu de Santiago de Compostela, y José Manuel Pérez, profesor de Drechu Alministrativu de la Universidá d’Uviéu. Programa íntegru de les xornaes 15 de payares, 2004 0 FacebookTwitterPinterestEmail
Sociedá El Principáu echa a andar una web informativa sobro la Constitución Europea con conteníos n’asturianu by asturnet 15 de payares, 2004 Información y discutiniu con tres meses d’antelación. El Gobiernu autonómicu presentó esta mañana n’Uviéu una páxina web sobro la Constitución Europea qu’inclúi información por defectu dafechu en llingua asturiana y que ye’l puntu más visible d’una campaña institucional que, según el conseyeru de Xusticia y Relaciones Esteriores, Francisco Javier García Valledor, quier alitar l’alderique ente los ciudadanos. Esi ye ún de los oxetivos de la campaña, que s’echa a andar colos güeyos puestos nel referéndum -non vinculante- pol qu’España se pronunciará a favor o en contra del testu constitucional el prósimu 20 de febreru. Los otros dos pegollos de la iniciativa’l Principáu son, según Valledor, informar a los asturianos sobro tolo que cinca a la Constitución y promover la participación de los ciudadanos nel propiu referéndum. Nel nuevu sitiu web del Gobiernu, que ta desendolcáu en billingüe pero cuya versión asturiana apaez automáticamente al acceder a la páxina, l’usuariu pue atopar documentos referíos al testu constitucional, noticies d’actualidá y una axenda d’actos actualizada. Amás d’ello, la web incorpora un foru d’opinión nel que l’Executivu asturianu responderá les entrugues de los navegantes. Nel so envís d’abrir un discutiniu sobro la Carta Magna d’ámbitu européu, firmada’l pasáu 29 d’ochobre en Roma polos 25 xefes de Gobiernu de la Unión, el Principáu pondrá en circulación un resume de la Constitución, apoyará’l discutiniu nos medios de comunicación y entamará conferencies, la primera de les cuales pronunciarála el prósimu vienres n’Uviéu el secretariu d’Estáu pa la UE, Alberto Navarro. La firma de Navarro rubricaba una carta empobinada al conseyeru de Xusticia, Seguridá Pública y Relaciones Esteriores del Principáu, Francisco García Valledor, na que l’altu cargu afitaba’l deséu del ministeriu d’Esteriores de que l’asturianu seya oxetu d’una atención “especial” na UE pero negaba la posibilidá de consideralu como llingua oficial n’Europa. Web del Principáu sobro la Constitución Europea 15 de payares, 2004 0 FacebookTwitterPinterestEmail
Sociedá José Manuel Pérez fala de “coficialidá parcial” y alerta de fallos llegales n’ordenances del asturianu by asturnet 15 de payares, 2004 “Coficialidá parcial”. Nesi conceptu encaxó esta tarde José Manuel Pérez, profesor de Drechu Alministrativu de la Universidá d’Uviéu, la situación de la llingua asturiana dende una mirada de xurista. El docente universitariu cuestionó’l calter “minimalista” de les ordenances aprobaes pa promover l’usu del asturianu en Villaviciosa y L.lena, y alertó de posibles fallos llegales n’otres normes homólogues. “Pueo dirixime a l’Alministración en llingua asturiana, pero nun tengo’l drechu a que me contesten nesa llingua”, razonó Pérez n’alusión a ún de los drechos reconocíos na Llei d’Usu del Asturianu, y esa “coficialidá d’una sola dirección”, en términos del xurista, prueba que los ciudadanos del Principáu viven nuna situación de “coficialidá parcial, anque menos ye nada”. Nuna intervención nes Xornaes sobre normalización nos conceyos que se cellebren en Xixón, el profesor de Drechu Alministrativu puntualizó que la protección de la llingua asturiana ye una obligación de los poderes públicos y eloxó con matices la propia Llei d’Usu, yá que na so opinión incluyó puntos “que supusieron un gran avance a lo menos nel papel, porque’l testu pue tomase como exemplu de facer lleis pa que nunca nun s’apliquen”. Al xuiciu de José Manuel Pérez, esa norma llegal adecuó un espaciu afayadizu pa que xorrezan -como agora lo tán faciendo- les entidaes llocales de promoción del asturianu, pero les ordenances que rixen el llabor d’eses entidaes, alertó’l xurista, muévense dacuando na llende de la llegalidá, o son enforma “voluntaristes y minimalistes”. Como exemplu d’esto último, Pérez citó los testos aprobaos en L.lena y Villaviciosa, “que puen resumise nuna pallabra: ‘podrán'”, posibilidá que, entiende’l profesor de la Universidá d’Uviéu, debería enunciase como obligación p’algamar una protección efectiva del idioma. Nel estremu opuestu, José Manuel Pérez citó les ordenances de Nava y el proyectu de norma qu’ultima Xixón, y avisó que dambos testos incluyen redacciones de duldosu valir llegal, como la potestá de l’Alministración d’empobinase al ciudadanu n’asturianu “ensin perxuiciu de facelo en castellán”, o la obligación de llevantar actes de sesiones municipales na llingua na qu’éstes se desendolcaron, “cuando sólo’l castellán tien valir llegal”. 15 de payares, 2004 0 FacebookTwitterPinterestEmail
Sociedá La llegada de la seronda baxó los precios de la cultura n’Asturies, según l’Institutu d’Estadística by asturnet 12 de payares, 2004 Los productos y servicios culturales siguen conteniendo l’aumentu xeneralizáu de los precios. Conforme asoleyó esta mañana l’Institutu Nacional d’Estadística (INE), les tarifes de la cultura baxaron un puntu n’Asturies durante’l mes d’ochobre y compensaron la xubida xeneral de precios, que foi del 1,2 por cientu. La proyección de datos del Institutu d’Estadística amuesa, amás, que los asturianos paguen agora un 1 por cientu menos qu’hai un añu por consumir cultura, mientres que l’indicador d’inflación acumulada -perda progresiva del valor del dineru no que va d’añu, manifestada nel aumentu de los precios-, allúgase pa la estaya d’ociu y cultura nel valor negativu del 1,2 por cientu, ye dicir, que les tarifes son agora un 1,2 por cientu más barates qu’en xineru. A la vista de talos datos, la cultura afítase n’Asturies como un sector que contién l’aumentu xeneral de los precios, yá que sólo los precios d’alcohol, tabacu, comunicaciones y hostelería baxaron n’ochobre, pero toos ellos en términos casi impercibibles que nun superaron el 0,2 por cientu. Con calter xeneral, los asturianos padecieron nel mes pasáu un notable incrementu nes tarifes del vestíu y el calzáu, un 9,2 por cientu, principal causante del aumentu del IPC nel Principáu xunta les más discretes xubes rexistraes na enseñanza, el tresporte y la vivienda, ente’l 1,2 y el 1,7 por cientu. Datos íntegros na web del Institutu Nacional d’Estadística 12 de payares, 2004 0 FacebookTwitterPinterestEmail