Sociedá Valledor recibe esti domingu en Tazones a una delegación bretona y a otra irlandesa by asturnet 1 de xunetu, 2005 Dos delegaciones de los conceyos de Glomel (Bretaña) y Camp (Irlanda) lleguen esti domingu a Tazones pa roblar l’hermanamientu del puertu maliayés con estos llugares de la ribera l’Arcu Atlánticu. Los representantes de los conceyos bretón ya irlandés van ser recibíos pol conseyeru de Xusticia y Esteriores, Francisco Javier García Valledor qu’asiste al actu d’hermanamientu y convida a les delegaciones a una espicha nun llagar cercanu a Tazones. El conseyeru va pronunciar el discursu de bienllegada a los representantes de Glomel y Camp -casi un cientu de persones-, y de siguío va apurri-yos un regalu institucional y la enseña d’Asturies a cada miembru de les delegaciones. L’actu va celebrase a les 20.30 de la tarde nel Llagar El Catalín con una espicha na que’l conceyu de Maliayo y el Gobiernu del Principáu conviden a los delegaos bretones ya irlandeses. Según manifestó la Conseyería de Xusticia y Esteriores esti hermanamientu del llugar de Tazones coles ciudaes de Glomel y Camp “enmárcase dientro una deseable y fructífera política de reconocimientu mutu ente los países del Arcu Atlánticu al que pertenez Asturies por xeografía y por afinidaes culturales”. 1 de xunetu, 2005 0 FacebookTwitterPinterestEmail
Sociedá La llingua vasca sigue arrequexada n’Iparrralde pol centralismu xacobín del estáu francés by asturnet 29 de xunu, 2005 L’Observatoriu Vascu de Derechos Llingüísticos Behatokia presentó ayer un informe sobre la situación del euskera n’Iparralde nel que s’amuesa que’l fundamentu cimeru de l’administración central gala en materia de normalización de la llingua de los tres territorios vasco-franceses ye, en palabres del miembru del Observatoriu, Paul Bilbao “l’ausencia de política llingüística”. Según informa na so edición de güei el diariu dixital Euskalherria.com, Bilbao resaltó «la gravedá de la situación no que respeta a los derechos llingüísticos individuales y colectivos» na realidá desaminada por esti organismu independiente. Na presentación del informe, Behatokia quiso correxir dalgún de los conceptos que ellos mesmos vinieran usando respective a l’actitú del Estáu francés. En concreto, Bilbao reconoció que foi un erru apellidala de «tolerante hacia les llingües minorizaes, pos ye evidente, sobretoo vista la evolución de los últimos diez años, que lleva una política ca vez más restrictiva y más aferrada al so calter xacobín». El voceru del Observatoriu espunxo dellos exemplos, como la camudación del artículu segundu de la Constitución francesa que dicta que la única llingua oficial reconocida ye’l francés, la nomanda Llei Toubon que establez una política de salvaguarda y normalización del francés o la negativa reiterada del Gobiernu a ratificar la Carta Europea de les Llingües Minorizaes. Paul Bilbao dixo “que fai falta presionar al Estáu francés, mesmo a nivel d’estamentos internacionales”, pa que reconoza los derechos de les comunidaes llingüístiques d’esi estáu y concede-yos “la necesaria oficialidá pa poder garantizalos”. Pel so llau la vicepresidenta de Behatokia, Maixan Merkapide destacó que se dieran dalgunos avances, inda que después matizólos. Punxo como exemplu la creación de la Oficina Pública del Euskara pal País Vascu embaxo alministración francesa, de la que dixo que naz con un «déficit importante, y ye qu’ente los sos oxetivos o proyectos nun recueye la necesidá de dotar de protección llegal al euskara, colo que la normalización llingüística depende de la voluntá del políticu de turnu». Behatokia encamentó a la Oficina a entamar un diágnosticu detalláu de la situación pa detectar les carencies estructurales y poder establecer les midíes estratéxiques y puntuales qu’adoptar pa garantizar los derechos de los euskaldunes n’Iparralde. 29 de xunu, 2005 0 FacebookTwitterPinterestEmail
Sociedá Oficialidá y la Xunta estudien acciones llegales contra’l Rector por refugar una tesis n’asturianu by asturnet 29 de xunu, 2005 L’asociación Oficialidá y la Xunta pola Defensa de la Llingua anunciaron qu’estudien entamar acciones llegales contra’l rector de la Universidá d’Uviéu, Juan Vázquez, pola so negativa a admitir la inscripción n’asturianu d’una tesis escrita y defendida nesa llingua pol so autor, l’hestoriador Faustino Zapico. Pa entrambes asociaciones l’actitú de Vázquez -que soscribió de puñu y lletra el refugue- amás d’una “clara conculcación de derechos llingüísticos” podía constituir un posible delitu de prevaricación. L’autor de la tesis, el profesor d’Hestoria y doctorandu, Faustino Zapico presentó la documentación pa inscribir la so tesis nel rexistru de la Universidá y al nun ser admitía esta posibilidá pola institución académica, presentó un recursu a esta decisión alegando que la tesis ya fuera defendida n’asturianu nel so día énte’l tribunal de la Facultá de Xeografía y Hestoria. Tamién argumentaba’l doctorando qu’esistíen diversos precedentes nos que sí s’admitiera la inscripción de tesis en llingua asturiana. La institución nun documentu firmáu pol rector Juan Vázquez refugaba los argumentos de Zapico, que reveló ayer nuna comparecencia énte los medios, la esistencia d’otra carta na que’l rector afirmaba respective a los precedentes nos que s’admitió l’asturianu que “nun cabe la igualdá na illegalidá”. Vázquez y el propiu informe xurídicu de la Universidá col que s’acompañaba el refugue a la tesis remembren el calter del asturianu como llingua non oficial y que la institución académica ta “nel Principáu pero non pertenez al Principáu, al tratase d’una institución del estáu”. Pa la Xunta pola Defensa de la Llingua y l’asociación Oficialidá el refugue a la posibilidá d’inscribir una tesis n’asturianu supón una “grave conculcación de los derechos llingüísticos” del autor d’esi trabayu académicu y la intervención directa nel asuntu del rector Juan Vázquez podía ser constitutiva d’un posible delitu de prevaricación. Eses son les razones que lleven a les dos asociaciones en defensa de los derechos llingüísticoa a entamar acciones llegales, de mano la presentación d’un recursu contenciosu administrativu y los servicios xurídicos de les dos entidaes estudien la posibilidá d’espardir les sos acciones al rector por si la so actitú pudiera ser constitutiva d’un posible delitu de prevaricación. Faustino Zapicó defendió la so tesis -un trabayu sobre los movimientos asturianistes y rexonalistes del sieglu XIX y primeros años del XX- énte un tribunal académicu presidíu pol decanu de Xeografía y Hestoria, José Girón y recibió del tribunal la meyor calificación pol so llabor de doctoráu. Na llectura pública de la tesis el tribunal nun-y impidió al so autor l’usu de la llingua asturiana y foi namás cuando Faustino Zapico quiso inscribir el so trabayu nel rexistru de la Universidá cuando s’atopó cola torga de poder facelo n’asturianu. Hasta agora diversos trabayos académicos del mesmu calter admitieran ser presentaos na nuestra llingua ensin nengún problema en facultaes como la de Filoloxía. 29 de xunu, 2005 0 FacebookTwitterPinterestEmail
Sociedá El Día del Arguyu Gai asturianu convirtióse nun clamior contra la homofobia y la discriminación by asturnet 28 de xunu, 2005 El xarabatiu d’una inoportuna nube de veranu nun foi aguar la convocatoria entamada por Xente Gai Astur (XEGA)pa celebrar el Día del Arguyu Gai con una marcha peles cais de Xixón a la qu’asistieron varios miles de manifestantes. Banderes colos colores del arcu iris y asturianes, pancartes contra la homofobia y conseñes contra los sectores ultres españoles personificaos na xerarquía episcopal y el PP, encarrilaron una manifestación que foi un anticipu de la que preparen en Madrid pal sábadu 2 de xunetu colectivos homosexuales de tol estáu. Enantes de la marcha un actu institucional, presidíu pola alcaldesa Paz Fernández Felgueroso, valió pa reconocer a los defensores de los derechos cívicos d’esti colectivu y pa remembrar el camín que tovía queda por andar na llucha contra la discriminación. Los obispos y l’únicu partíu democráticu que sofitó la manifestación del pasáu 18 de xunu contra la nueva llei del matrimoniu, el Partíu Popular, fueron los principales oxetivos de les conseñes que se llanzaron na manifestación de Xixón pa remembrar los munchos enzancos que tovía tien de superar la sociedá al pesar de los nuevos aires favorables que soplen dende’l gobiernu de José Luis Rodríguez Zapatero. Pancartes esplícites como la que firmaben el Bloque por Asturies ya Izquierda Xunida: “Los ObisPPos que digan misa” o impregnaes de coña familiar como la que llevaba al llombu una rapacina a recostines de so padre: “Mio má nun yera alcohólica, pero ¿sabe la Botella si la so fía quier más peres o mazanes?”, xuníense a los estandartes mariellos y con lletra rosa, estilu americanu, nos que se clamiaba contra’l fin de la homofobia. A la fin de la manifestación un comunicáu lleíu a tres voces por una lesbiana, un gai y un transexual nel que se recordaba que “los mesmos motivos que llevaron al doctor Menguele a entamar esperimentos seudocientíficos con seres humanos de los colectivos presos nos campos d’esterminiu nazi siguíen moviendo el llabor supuestamente terapéuticu d’homes como Aquilino Polanio, l’espertu citáu pol PP pa opinar nel Senáu sobre los matrimonios homosexuales” y que los derechos reivindicaos polos colectivos de gais y lesbianes del estáu yeren “tamién los de tolos que defenden una sociedá llibre, igualitaria y laica”. Enantes de la marcha celebrárase nel Antigu Insitutu un multitudinariu actu políticu institucional, presidíu pola alcaldesa de Xixón y pol teniente d’alcalde de la ciudá, Jesús Montes Estrada, que tamién cunto cola presencia del conseyeru de Xusticia y Esteriores, Francisco Javier García Valledor. Nel actu entregáronse los premios de los concursos de cartelos y cuentos, y les distinciones “Tríangulu rosa” y “Ladrillu rosa” a les persones o instituciones que resaltaran bien por persiguir los derechos de los homosexuales o polo contrario. Julián Alonso recordó na entrega “que yeren innumerables los candidatos tanto pa un premiu como pa otru, porque la sociedá na que vivimos inda xenera y fomenta actitúes discriminatories y homófobes”, sicasí los militanes de XEGA quisieron centrase esti añu nes actitúes énte la nueva llei de casoriu que da igualdá de derechos a heterosexuales y homosexuales, y personificar nos diputaos y senadores asturianos la posición de los sos respectivos políticos. Fernando Lastra, parlamentariu autonómicu del PSOE, recoyó el “triángulu rosa” en nome de los sos compañeros y la tamién diputada asturiana d’IX-Bloque Diana Camafeita el “triángulu rosa” especial col que los gais y lesbianes d’Asturies quisieron reoconocer el compromisu d’Izquierda Xunida cola llucha polos sos derechos y concede-y esta distinción a Gaspar Llamazares. Al actu nun acudió nengún representante del PP a recoyer “ladrillu” pola postura homófoba de los conservadores españoles. Tanto nel actu institucional como na manifestación posterior fueron abondos los representantes del mundu políticu y social, ente ellos parlamentarios autonómicos, conceyales y cuadros del PSOE y d’IX-BA, ente ellos María Antonia Felgueroso, Dulce Gallego, Jesús Iglesias, Guillermo Ballina, l’ex secretariu xeneral del sindicatu CSI Cándido González Carnero o el responsable de la Selmana Negra, Paco Ignacio Taibo, la escritora Esther Prieto o el poeta David González. 28 de xunu, 2005 0 FacebookTwitterPinterestEmail
Sociedá El PSOE amuésase receptivu a solventar el bloquéu a les ordenances llingüístiques de Xixón by asturnet 28 de xunu, 2005 El PSOE taría dispuestu a favorecer l’espardimientu del usu de la llingua asturiana nes distintes estayes administratives del Ayuntamientu de Xixón contempláu nel proyectu d’ordenances que diseñó el Conseyu Asesor de la Oficina de la Llingua. Después de trescurrir varios meses col proyectu paráu y una negativa inicial per parte’l grupu socialista a asumir na so totalidá les ordenances propuestes, dende’l grupu municipal d’Izquierda Xunida-Bloque detéctase una actitú positiva de los sos socios de gobiernu pa solventar esta situación y avanzar na normalización llingüística nel conceyu. Según pudo saber Asturnews, tres la negativa del grupu socialista y de la propia alcaldesa a aceptar les ordenances redactaes pol Conseyu Asesor y tres la devolución a ésti del proyectu pa camudalu, celebráronse dellos contactos ente representantes del grupu d’IX-BA con miembros de la dirección local del PSOE y nel trescursu d’estes reuniones los socios mayoritarios del gobiernu municipal amosáronse partidarios de solventar la situación creada y cumplir los sos compromisos de pautu políticu en materia llingüística. Darréu la devolución de les ordenances al Conseyu Asesor y de qu’ésti se negara a la so vez a camudales la situación permanecía bloqueada hasta l’empiezu d’esos contactos. La dirección local del PSOE tamién quier caltener un aconceyamientu col Conseyu Asesor qu’esti organismu indipendiente-yos solicitara pa conocer les razones de la postura socialista y falar de la manera de solucionar la situación creada. Los socialistes tamién tienen previsto celebrar nos prósimos díes una nueva reunión sobre l’asuntu con representantes del grupu municipal d’Izquierda Xunida-Bloque. El Conseyu Asesor de la Oficina Municipal de la Llingua amuesa dende fai varios meses una gran esmolición sobre les intenciones del grupu socialista n’avanzar nel terrén de la normalización del asturianu nel conceyu. Tres la negativa del PSOE a aceptar les ordenances redactaes pol Conseyu, produciéronse dellos fechos, en principiu ayenos a esta situación, pero qu’incidieron nel esmolecimientu de los miembros d’esti organismu, ente ellos la desubicación de la propia Oficina de la Llingua por obres na Casa de Nava. Anguaño y a la espera d’una sé definitiva, la Oficina ta nuna dependencia del Centru de Cultura Antigu Institutu y el mesmu Conseyu tien agora que celebrar les sos reuniones nun local provisional. Los contactos ente la dirección local socialista y Izquierda Xunida-Bloque tenten solventar toos estos asuntos pendientes, sobremanera centraos na regulación del espardimientu del usu de la llingua asturiana dientro los distintos departamentos, empreses, fundaciones y patronatos del Ayuntamientu de Xixón. Dende IX-BA obsérvase, nesi sen, una actitú receptiva per parte del PSOE. Esa actitú habrá esclariase nes prósimes reuniones que los socialistes tienen previsto caltener colos sos socios de gobiernu municipal y col Conseyu Asesor de la Oficina de la Llingua. 28 de xunu, 2005 0 FacebookTwitterPinterestEmail
Sociedá La victoria de Touriño en Galicia y la so esperable andecha col BNG esmolecen na Tierra Navia-Eo by asturnet 27 de xunu, 2005 La confirmación de la victoria final de la candidatura encabezada pol socialista Emilio Pérez Touriño tres finar el recuentu al votu emigrante y la so previsible andecha de gobiernu col Bloque Nacionalista Galego d’Anxo Quintana, supón l’entamu d’una nueva etapa política na comunidá vecina, tres décades de mayoría del PP. No que respeta a Asturies, el previsible pautu PsdG-BNG puede suponer un cambiu nes bones relaciones avezaes ente entrambes comunidaes si el nuevu executivu lleva alantre les pretensiones de nacionalistes y socialistes gallegos sobre l’espardimientu de la llingua propia del so territoriu per otres fasteres pertenecientes a otres comunidaes, como la Tierra Navia-Eo. Inda l’apueste poles fales que los pangaleguistes nomen “galego esterior” nun ye una de les prioridaes cimeres de la política llingüística amosada nos programes electorales del Partíu Socialista de Galicia y el Bloque, que ponen per delantre l’afitamientu de la normalización social en tolos niveles onde inda nun tien la relevancia necesaria, les pretensiones sobre la tierra d’Entrambasaguas apaecen conseñaes como un de los puntos programáticos del Bloque nesa materia y ye conocida la coincidencia nel asuntu del partíu de Pérez Touriño colos nacionalistes del BNG. Va pocos meses el grupu parlamentariu del PSdG na Xunta de Galicia presentó una iniciativa pa fomentar l’espardimientu de la llingua y la cultura gallega per otres comunidaes vecines, ente elles l’asturiana, qu’a la fin nun llegó a tramitase tres les converses calteníes por representantes de la FSA colos sos compañeros gallegos. Sicasí, la previsible coalición del PSdG col partíu del nacionalista Anxo Quintana, puede reforzar esta reivindicación vieya del galleguismu más aferráu a les sos esencies radicales, ente les que s’afayen les pretensiones de considerar parte de la Galicia cultural y nacional fasteres asitiaes fuera del territoriu hestóricu d’esi país onde la so influencia cercana xenera zones de transición fronteriza, mesmo nel terrén llingüísticu hacia les fales del troncu común galaico-portugués. Lo lóxico en dialéctica política había ser que la bona sintonía presidiera esta nueva etapa abierta en Galicia pola presencia nel gobiernu de la Xunta d’un executivu con asemeyada composición ideolóxica al del Principáu y con predominiu del mesmu partíu al que pertenecen la FSA y el PSdG. Sicasí la cuestión llingüística, si a la fin, se materialicen les pretensiones sobre la Tierra Navia-Eo, podíen abrir un periodu de fondes tensiones institucionales énte les dos comunidaes, nel que ye posible nun resulten tan eficaces como hasta agora los toques d’atención y el diálogu ente socialistes gallegos y asturianos. En reiteraes ocasiones, alcaldes de los conceyos, asociaciones ciudadanes y los propios vecinos d’Entrambasaguas tienen amosao la so esmolición cada vez que dende Galicia se pon de manifiestu la reivindicación llingüística, cultural y hasta política sobre esta rexón asturiana. L’únicu estudiu sociollingüísticu xeneral entamáu hasta agora na zona, por un equipu dirixíu pol caderalgu de la Universidá del País Vascu Francisco Llera Ramo, nun dexaba duldes alrodiu de la percepción que tienen mayoraitariamente los vecinos d’Entrambasaguas tocante a la so identidá colectiva, inequívocamente asturiana. Agora la nueva etapa política abierta en Galicia puede volver semar les esmoliciones na Tierra del Navia-Eo. 27 de xunu, 2005 0 FacebookTwitterPinterestEmail
Sociedá Los gais y lesbianes celebren el so Día con un actu institucional y una manifestación en Xixón by asturnet 26 de xunu, 2005 Los gais y lesbianes asturianos celebren esti martes 28 en Xixón el Día del Arguyu Gai con entrambos actos, ún de calter políticu-institucional y una manifestación contra la homofobia. Entamaos embaxo l’agospiu del colectivu XEGA, los homosexuales de la nuestra comunidá, xúnense asina a los miles qu’estos díes celebren per tol mundu la so xornada internacional con una remembranza de tolos estaos onde los gais y les lesbianes inda son persiguíos y discriminaos pola so orientación sexual. L’aprebación de la nueva llei que va facilitar el matrimoniu ente persones del mesmu sexu n’igualdá de condiciones col restu de los ciudadanos y la recién manifestación entamada polos sectores más conservadores de la derecha católica española, ensin dulda van tar presentes na celebración del Día del Arguyu Gai que Xega va entamar en Xixón esti martes 28. A les 20.00 hores hai un actu institucional nel Centru de Cultura Antigu Institutu de Xixón con intervenciones de representantes de fuerces polítiques, sociales y sindicales, nel que tamién se va facer entrega de los premios “Ladrillu Rosa” y “Triángulu Rosa” y de los concursos de cartelos y cuentos entamaos con motivu d’esta celebración. Darréu, a les 21.00 ta convocada una manifestación dende la Plaza’l Parchís que va rematar nel Paséu de Begoña cola llectura d’un manifiestu tituláu “La homofobia, un asignatura pendiente”. El colectivu de gais y lesbianes d’Asturies tamién tien previsto participar na manifestación estatal del prósimu sábadu 2 en Madrid. 26 de xunu, 2005 0 FacebookTwitterPinterestEmail
Sociedá La rede de Normalización demanda estabilidá y continuidá como garantíes pa la so eficacia by asturnet 26 de xunu, 2005 El prósimu viernes 1 de xunetu los responsables de los servicios municipales de normalización anguañu esistentes van celebrar una xunta col xefe de la Oficina de Política Llingüística del Principáu, Ramón d’Andrés Díaz, pa espone-y les principales necesidaes y faltes que presenten les oficines de la Rede. La unificación de criterios a la hora configurar estos servicios, la estabilidá, la continuidá y la dignificación llaboral de los sos técnicos, son les bases principales pa que l’acción d’estos organismos seya eficaz, según los responsables de normalización nos conceyos. Nel borrador del documentu nel que técnicos llingüísticos municipales van poner en común col responsable de Política Llingüística del Principáu l’estáu actual de los servicios integraos na rede y les sos necesidaes, detéctase de mano la estremada situación na que tán caúna d’estes oficines. Nin el so asitiamientu nel organigrama de servicios de los sos respectivos Ayuntamientos nin les condiciones de contratación de los técnicos llingüísticos, nin la dotacíón presupuestaria son asemeyaos nes ocho oficines esistentes. La unificación de criterios nesti sen, ye pa los responsables municipales de normalización, una prioridá cimera. La situación llaboral de los técnicos nesti momentu ye de contrataciones dependientes de subvenciones en siete de los casos y namás nel casu de la Oficina de la Llingua de Xixón la contratación tien un calter estable y la so dotación económica depende de los presupuestos municipales. Tampoco la consideranza d’estos servicios dientro l’Administración local de cada conceyu ye la mesma y los técnicos advieren que non siempre les sos propuestes reciben la mesma atención per parte de los responsables de los sos Ayuntamientos. Nesi sen los técnicos llingüísticos demanden la dignificación de les oficines, la so estabilidá y la so continuidá, garantizada pola Conseyería de Cultura, como elementos indispensables pa llevar a términu con ésitu el llabor pal que se crearon. Ente les propuestes que los responsables municipales de normalización van presentar na so xunta con Ramón d’Andrés, tan la d’unificar la denomación de les estremaes oficines alrodiu del términu “normalización”, como manera de resaltar la función fundamental d’estos servicios. Tamién se propón que les oficines dependan directamente d’una conceyalía o de la propia alcaldía nos organigrames municipales. L’horariu llaboral a xornada completa ye otra de les demandes p’asegurar la calidá del serviciu prestáu. En cuantes a les formes pa convocar les places de técnicos reponsables nel borrador d’esti documentu señálense les llinies esenciales poles qu’habíen rexise les bases de la convocatoria y el perfil académicu de los posibles candidatos, qu’han tener la correspondiente titulación d’Especialista o Espertu en Llingua Asturiana de la Universidá d’Uviéu. A lo cabero señálense los recursos materiales mínimos colos que tenía cuntar cada serviciu municipal. Respective al control del funcionamientu de les oficines de normalización remémbrase que la competencia en materia de política llingüística ye de la Conseyería de Cultura del Gobiernu asturianu y considérase que l’administración autonómica, al través de la Oficina de Política Llingüística, había exercer el control del llabor de los servicios de la rede. Nesi sen propónse la puesta en marcha d’una comisión que desempeñe esi llabor y pueda tar al tantu de les principales necesidaes y demandes de les oficines integraes na Rede municipal. La formación contina de los responsables de los servicios normalizadores diba ser otra de les posibles funciones d’esta comisión. Anguaño son ocho les oficines de normalización qu’hai n’Asturies: Xixón, Llangréu, Avilés, L.Lena, Mancomunidá del Cabu Peñes, Mancomunidá de la Sidra, Cangas del Narcea y Siero. 26 de xunu, 2005 0 FacebookTwitterPinterestEmail
Sociedá Bimenes celebra la so novena Fiesta de la Oficialidá by asturnet 25 de xunu, 2005 El pasáu viernes 23 presentóse’l programa de la IX Fiesta pola Oficialidá nun actu que remató con un conciertu del cantautor Toli Morilla. Los actos entamen esti llunes 27 cola inauguración na Casa Cultura de San Xulián d’una amuesa d’humor gráficu asturianu cedida pola Obra Social y Cultural de Caxastur. A lo llargo de la selmana y hasta la xornada festiva del sábadu 2, diversos debates y conferencies sobre la realidá llingüística asturiana van sucedese nel conceyu yerbatu. El martes 28, a les 20 hores, na Casa Cultura, va celebrase un debate sobre la oficialidá énta la reforma del Estatutu organizáu pola Xunta pola Defensa la Llingua. Al día siguiente, a la mesma hora y nel mesmu sitiu, l’hestoriador Rafael Rodríguez Valdés pronuncia una conferencia sobre “Movimientu obreru y llingua asturiana (1900-1937)”. El miércoles 29 la compañía de teatru Telón de Fondo pondrá n’escena el so montaxe “Una hora ensin televisión” y el xueves 30 a les 18.00 hai programáu un debate sobre la escolarización n’asturianu y mirandés. El mesmu xueves a les 19.30 va facese la entrega de los premios del Concursu de Cuentos pola Oficialidá y a les 21.00 va celebrase un certame de monólogos cola presencia de Cellero y Milio del Nido. El día grande de la X Fiesta va ser el sábadu nel ya tradicional Prau de La Vegona. A les 11.00 hores inaugúrase a III Feria d’Artesanía ya Industria Agoralimentaria y diversos pasucais van percorrer les cais del conceyu. A les 12.30 na Casona de los Careaga (Xenra) Francisco Llera Ramo pronuncia’l pregón y darréu va celebrase un una misa n’asturianu. Nel Prau de La Vegona entama a les 14.30 una xinta popular y a les 17.00 entama una amosanza d’Entibadores Mineros a cargu del Club Deportivu Entibadores del Caudal. La parte musical de la folixa escomienza a les 19.30 con un festival de tonada nel que participen El Ché de Cabaños, Annabel Santiago ya Ismael Tomás. Los grupos Xera y Los Berrones van poner el broche final a esta IX Fiesta pola Oficilidá con nun conciertu programáu pa les 22.00 hores. 25 de xunu, 2005 0 FacebookTwitterPinterestEmail
Sociedá El PP da-y el so apoyu al Plan de Normalización Social pal asturianu del Gobiernu PSOE-IX-Bloque by asturnet 23 de xunu, 2005 El Partíu Popular (PP) dio’l so votu favorable a l’aprebación del Plan de Normalización Social pa la llingua asturiana que sometíase ayer al so refrendu na Xunta Xeneral. Los otros grupos, PSOE y Izquierda Xunida-Bloque por Asturies, a la so vez, aceptaron incorporar al Plan les ocho propuestes de los populares. Joaquín Arístegui relacionó l’apoyu del so grupu al Plan cola prósima reforma del Estatutu énte la qu’afirmó “l’asturianu ye un tema crucial y lo bastante importante como pa nun andar a piedraes con ello”. El Plan de Normalización Social de la llingua asturiana aprebáu pel Conseyu de Gobiernu del Principáu cuenta dende ayer col respaldu unánime de tolos grupos políticos representaos na Xunta Xeneral, incluíu el Partíu Popular, que s’amosara hasta agora percríticu col paquete d’acciones de política llingüística de la Conseyería Cultura. Na so intervención énte’l plenu el representante del PP relacionó el consensu agora algamáu alrodiu de la normalización de la llingua asturiana cola prósima reforma del Estatutu: “nós queremos un nuevu Estatutu que seya sólidu, estable, duraderu y nun vamos ser los que pongamos obstáculos a llogralu por un asuntu como’l del bable, que se puede solventar col alcuerdu de toos”. Na rueda de prensa que siguió a la discusión y posterior votación del Plan, el diputáu popular Joaquín Aréstegui quiso resaltar la trescendencia de lo vivío esti xueves nel hemiciclu de la Xunta Xeneral, un fechu que dixo “revaloriza al parlamentu asturianu al amosar que los distintos grupos tamién podemos entendenos a veces y llegar a alcuerdos como esti, énte un asuntu importante p’Asturies, que nunca tensionó la sociedá asturiana y énte el que nun vamos ser nós los que prevoquen esa tensión nunca”. El representante del PP, sicasí censuró tanto a la conseyera de Cultura como a los dos grupos que formen parte del gobiernu por “presentar un Plan aprebáu enantes de da-y la oportunidá al partíu de la oposición a discutilu o amosar la so opinión”, de cualquiermiente, Aréstegui, quiso aparcar les diferencies col gobiernu nesta ocasión y na so intervención parlamentaria anunció la intención del so grupu de votar favoratiblemente al Plan de Normalización. La conseyera de Cultura, Ana Rosa Migoya, defendió na so intervención la politica llingüística entamada pol gobiernu del Principáu y que tien la so articulación nel Plan de Normalización Social de la llingua asturiana, del que dixo “val pa desbloquear la cuestión llingüística n’Asturies” y respective a les posibles crítiques y desconfiances que xenerare nos sectores más favorables a la normalización afirmó na parte final, espresándose n’asturianu que “naide nun puede dicir que’l Plan supón nengún retrocesu, al contrario ye un azance respetuosu con toles sensibilidaes”. La conseyera tamién advirtió sobre posibles inxerencies esternes respective al gallego-asturiano y defendió que “el Principáu y les sos instituciones son la única administración con competencies en materia llingüística pa esa zona”. Paloma Uría, pela so parte, nuna intervención íntegramente en llingua asturiana, apoyó el Plan de Normalización y saludó como positives les propuestes feches pol grupu popular. Al empar la representante d’IX-BA especificó que pal so grupu “la normalización ye dir camín de la oficialidá” y quiso remembrar les situaciones “d’arnormalidá” que vive la nuestra llingua anguaño, “especialmente nel ámbitu de la enseñanza, onde non tolos alumnos que deseen recibir l’asignatura pueden facelo nel so centru y onde la situación ye sobremanera preocupante no que cinca al profesoráu, y n’especial el que nun tien estabilidá”. José Luis Montes, en nome del grupu socialista dixo que “esti ye un bon Plan”, anunció l’apoyu de los socialistes a les ocho propuestes del PP y terminó la so intervención faciendo usu del asturianu. Na rueda de prensa -informal énte l’ausencia de cámares de televisión y con pocos medios yá presentes na sala- que siguió al debate y aprebación del Plan de Normalización los tres grupos quisieron escenificar la so xuntura nun fechu con pocos precedentes na vida parlamentaria y nella coincidieron en señalar la importancia de que la política llingüística diseñada nel Plan cuente col respaldu del parlamentu en plenu, con tolos grupos políticos d’alcuerdu. Nesti alcuentru colos representantes de los medios informativos, Joaquín Aréstegui volvió recalcar la importancia del consensu algamáu “de cara al debate que va abrise nun futuru prósimu sobre la reforma del Estatutu”, pal diputáu popular “el tema del asturianu ye crucial nesa reforma pero nun queremos que seya el principal, por eso convién algamar alcuerdos como esti que son el reflexu de lo que quier la sociedá asturiana:quieren y estimen al bable, pero al empar d’una manera mayoritaria nun acepten la obligatoriedá, nin nenguna imposición, nun quieren una imersión llingüística que nun respete la voluntariedá”. Nel repartu de les intervenciones énte los escasos medios presentes na rueda de prensa, el diputáu socialista José Luis Montes, coincidió col representante del PP en “que la oficialidá y la propia llingua nun tienen que protagonizar la reforma del Estatutu, que s’entamará l’añu que vien, ye importante recordalo y nesi sen ye mui positivo ver que la totalidá de la Xunta respalda’l Plan de Normalización aprebáu pel gobiernu”. Montes remembró “los prexuicios qu’inda esisten na sociedá respective al asturianu, nun fai falta alcordase qu’equí siempre se consideró una fala menor, d’aldeanos, el Plan de Normalización va valir pa dignificar la llingua y acabar con munchos prexuicios”. Pel so llau, Paloma Uría, que facía nones espresivos mientres los representantes de los otros dos grupos parlamentarios refugaben la oficialidá como una posibilidá pa plantear a curtiu plazu y cuando-y llegó’l turnu afirmó: “nun ye del too correcto relacionar oficialidá con obligatoriedá, hai munches clases d’oficialidá, nel estáu español esisten anguaño situaciones mui distintes, nun hai un modelu únicu y nós nun renunciamos a qu’Asturies tamién tenga’l propiu”. Pa Uría “la normalización social, talo nós la entendemos, tien valir pa sensibilizar a la xente de qu’hai de siguir dando pasos nesi camín y ún que consideramos fundamental y qu’ha llegar ye’l del reconocimientu de la oficialidá que garantice dafechu la situación llegal del asturianu”. 23 de xunu, 2005 0 FacebookTwitterPinterestEmail