Sociedá IAS va celebrar el 8 de setiembre con un actu reivindicativu en Xixón by asturnet 21 d'agostu, 2005 La Dirección Nacional d’Izquierda Asturiana (IAS) cellebrada’l pasáu vienres aprobó les actividaes y les llínies de discursu principales del partíu d’izquierda asturianista de cara al prósimu 8 de setiembre. El portavoz nacional d’Izquierda Asturiana (IAS), Ignaciu Llope, informó de dalgunes de les actividaes previstes pal 8 de setiembre que foron aprobaes na Dirección Nacional del partíu’l pasáu 19 d’agostu. Llope siñaló qu'”Izquierda Asturiana (IAS) tratará afirmar esi día como un día de reivindicación nacional asturiana nel qu’esti añu, y de cara a la prósima reforma del estatutu, se remarque la necesidá de reclamar que’l mesmu recueya la condición d’Asturies como nación y la oficialidá inaplazable, sin componendes nin retrasos, de la llingua asturiana.” Sigún el portavoz d’IAS “un día como’l 8 de setiembre y nun momentu de redefinición del estáu nel que tamos, ye fundamental recuperar la memoria d’un pasáu nel qu’en momentos difíciles o periodos costituyentes, como la Xunta Xeneral en 1808 o’l Conseyu Soberanu en 1937, el pueblu asturianu dotóse de mecanismos propios d’autogobiernu basaos na plena soberanía.” A les 13:00 hores del 8 de setiembre en Xixón, militantes del partíu y miembros de la Dirección Nacional d’IAS van facer una ofrenda d’un ramu lloréu al Conseyu Soberanu d’Asturies y Llión nel sitiu onde esti organismu, que representó la soberanía d’Asturies nun periodu de 1937, tuvo la so se, na Plaza del Parchís de Xixón. Nesti mesmu escenario, l’historiador y miembru de la Dirección Nacional d’IAS, Faustino Zapico, pronunciará unes palabres en recuerdu del Conseyu Soberanu, la so xenesis y significación histórica, asi como la necesidá de recuperar la so memoria. Izquierda Asturiana (IAS) va aprovechar pa reclamar nesti actu la devolución a Asturies de los orixinales de los Archivos del Conseyu Soberanu y solicitar la istalación nel edificiu de “la casa blanca” de la citada plaza d’una placa que recuerde que nesi sitiu radicaba la istitución soberana que rixió’l nuestru país nun periodu de la Guerra Civil. Ignaciu Llope siñaló que los actos d’Izquierda Asturiana (IAS) nun tán cerraos y nos prósimos díes va dase a conocer dalguna característica más de los mesmos. 21 d'agostu, 2005 0 FacebookTwitterPinterestEmail
Sociedá El Bloque por Asturies considera prioritariu l’asuntu llingüísticu na so relación con Izquierda Xunida by asturnet 21 d'agostu, 2005 El portavoz nacional del Bloque por Asturies y director de l’Axencia Asturiana de Cooperación Rafael Palacios, aseguró esti viernes que l’asuntu llingüísticu “ye prioritariu” pa la so organización na reforma estatutaria. Palacios aseguró qu’una renuncia a la oficialidá per parte de los sos socios d’Izquierda Xunida diba francer el so alcuerdu políticu. El Bloque consideraríase “desvinculáu” de la so andecha estratéxica con IX si esta organización aceptara una reforma del Estatutu que nun incluyera la oficialidá de la llingua asturiana. Asina lo declaró Palacios esti viernes al ser preguntáu pola postura del Bloque por Asturies nel cursu de la presentación de la memoria de los proyectos desenvueltos pola Axencia Asturiana de Cooperación. La organización nacionalista emitiera va unos díes un comunicáu nel que fixaba la so posición énte la negociación de la reforma estatutaria. Pal BA una reforma que nun reconociere los derechos básicos d’Asturies como pueblu, incluíos los llingüísticos, y la so equiparación coles comunidaes del estáu que tienen un marchu más ampliu d’autonomía, diba deslligar a esta organización de cualquier alcuerdu de gobiernu, coalición electoral o alianza política estratéxica. Na presentación de la memoria del departamentu que dirixe Rafael Palacios nel gobiernu asturianu ésti manifestó qu’hasta la fecha Izquierda Xunida nun tresmitiera al Bloque cuála yera la so postura respective a la llingua asturiana énte la reforma l’Estatutu y recordó-y a los sos socios de coalición que la oficialidá figura como una de les prioridaes nos alcuerdos firmaos ente IX y BA. 21 d'agostu, 2005 0 FacebookTwitterPinterestEmail
Sociedá Llamazares acusa a la FSA de pasividá énte la reforma estatutaria d’Asturies by asturnet 21 d'agostu, 2005 El coordinador xeneral d’Izquierda Xunida Gaspar Llamazares afirmó en declaraciones a diversos medios asturianos que’l nuestru país “había tar a la cabeza de les reivindicaciones estatutaries, porque tien una identidá propia y había de lluchar por defender la so propia sensibilidá”. Llamazares amosó les sos crítiques hacia l’actitú del PSOE nel estáu y de la FSA tocante a la reforma de los estatutos. El coordinador xeneral d’IX afirmó que la falta d’iniciativa n’Asturies respective a la so revisión estatutaria “causa estrañeza en tol estáu, porque Asturies había tar a la cabeza de les reformes y choca abondo que renuncie a un mayor autogobiernu”. Pa Llamazares la nuestra comunidà cuerre el riesgu de “convertise nuna comunidá fotocopia” énte la “falta de liderazgu del PSOE a nivel estatal y la pasividá de la FSA”. El másimu responsable d’IX fexo estes declaraciones mientres descansa unos díes n’Asturies enantes de reincorporase a los sos llabores nel cursu políticu tres el veranu. 21 d'agostu, 2005 0 FacebookTwitterPinterestEmail
Sociedá La Generalitat promueve un Plan pa facer del catalán una llingua del sieglu XXI by asturnet 17 d'agostu, 2005 La Generalitat de Catalunya promueve pal exerciciu 2005-2006 un plan d’acción política empobináu a la sobrevivencia del catalán como llingua d’usu normal. Los principales exes nos que s’articula la iniciativa son la equiparación administrativa col castellán, el fomentu del idioma ente los más mozos y los inmigrantes, asina como ufiertar aperios que valgan pa encarar los retos de les nueves tecnoloxíes y la sociedá de la información. Embaxo la llienda de “El catalán, llingua europea del sieglu XXI”, la Secretaría de Política Llingüística del gobiernu autonómicu allampia con esti Plan añal como un de los oxetivos principales el de puxar l’adopción de midides administratives y lexislatives pa garantizar l’usu del catalán y ensin restricciones en tolos niveles de la vida pública. Otru de los exes ye fomentar l’usu del idioma ente los más mozos (d’ente los 15 a los 29 años) y ente la población recién asitiada en Cataluña, asina como ente la xente adulto ensin alfabetizar na llingua d’esa comunidá. La puesta en marcha d’un cursu on-line de catalán destináu a estos sectores de la población ye una de les acciones propuestes nel plan, xunto a la meyora de los servicios d’asesoramientu llingüísticu. Ente les midíes destinaes a afaya-y un futuru a la llingua catalana ente los idiomes europeos del sieglu XXI propónse elaborar un programa específicamente dirixíu a les nueves tecnoloxíes, la sociedá de la información y la comunicación, arriendes de la xestión del multillingüismu. L’usu comercial del catalán y nel ámbitu profesional ya empresarial son tamién oxetivos del Plan, con un apartáu especial pa que na etiquetación de productos, la información corporativa y les webs de les empreses fagan usu del idioma. Respective a la industria cultural propónse el fomentu del cine en catalán y el doblaxe nesta llingua de películes rodaes n’otros idiomes. A la fin el Plan d’acción política propón l’espardimientu del usu del idioma en toles instituciones públiques de la comunidá, l’estáu y la Unión Europea. La iniciativa de la Generalitat busca tamién ente los sos oxetivos el reforzamientu de les relaciones y la colaboración colos territorios catalano-falantes del Roselló y l’Alguer. El catalán llingua europea del sieglu XXI 17 d'agostu, 2005 0 FacebookTwitterPinterestEmail
Sociedá Les organizaciones nacionalistes prepárense pal 8 de setiembre by asturnet 17 d'agostu, 2005 Les organizaciones nacionalistes asturianes prepárense pa celebrar el Día de la Nación el prósimu 8 de Setiembre. Hasta agora namás dos d’eses organizaciones desvelaran los llugares de les sos convocatories: PAS y URAS van tar n’Uviéu ya Izquierda Asturiana (IAS) en Xixón. Los actos institucionales escueyen esti añu la villa de Pravia pa la so celebración. Los partíos coaligaos de Xuan Xosé Sánchez Vicente y Sergio Marqués van entamar l’ochu setiembre pela mañana un actu na Plaza la Catedral d’Uviéu delantre la estatua del rei Alfonsu’l Segundu y pela tarde van celebrar una fartura de xermandía nun llagar de Xixón. Pel so llau IAS anunció que diba festeyar el Día de la Nación Asturiana en Xixón, a espera de concretar el programa de la so convocatoria. El Gobiernu del Principáu escueye nesta ocasión la villa de Pravia como sé de los actos festivos oficiales, que van tener, como ye d’avezu, la so ceremonia institucional n’Uviéu na sé de la Xunta Xeneral, cola entrega de les medalles d’Oro y de Plata d’Asturies y les intervenciones de los representantes políticos nel parlamentu asturianu. Esti añu l’atención de los medios gráficos va centrase nel conseyeru Valledor qu’anunció la so intención d’asistir a los actos oficiales col traxe nacional asturianu y esi va ser l’atuendu de gala que van usar tamién nellos otros representantes institucionales d’Izquierda Xunida-Bloque por Asturies. 17 d'agostu, 2005 0 FacebookTwitterPinterestEmail
Sociedá El Bloque afita la so posición propia énte la reforma del Estatutu by asturnet 16 d'agostu, 2005 El Bloque por Asturies afitó esti miércoles 17 la so posición énte la reforma l’Estatutu d’Asturies. La equiparación de la nuestra comunidá a les qu’anguaño gocen de tolos derechos políticos, sociales y llingüísticos ye un de los puntos cimeros de la so propuesta, na que la desixencia de la oficialidá pal asturianu deféndese como renunciable. Los socios nacionalistes d’IX afirmen que nun van participar en nengún gobiernu, coalición electoral o alcuerdu políticu nel que nun se garanticen tolos derechos del pueblu asturianu. Pal Bloque el nuevu estatutu tien de cumplir los siguientes requisitos: garantizar la suficiencia financiera d´Asturies, garantizar la solidaridá ente les Comunidaes del Estáu español, garantizar la solidaridá de la Unión Europea, garantizar la sanidá y la educación publiques, garantizar la Caxa Única de la Seguridá Social, garantizar el derechu a vivir y trabayar n´Asturies y garantizar tolos derechos humanos a tolos ciudadanos y ciudadanes ensin esclusión. Eses son les característiques qu’había tener un Estatutu reformáu pa cuntar col apoyu políticu de los nacionalistes del gobiernu tripartitu asturianu. Los exes fundamentales alrodiu los que había articulase l’Estatutu surdíu de la prósima negociación ente les fuerces presentes na Xunta Xeneral y nel executivu autonómicu seríen pal Bloque por Asturies: la capacidá política plena d´Asturies,el reconocimientu de la nuestra identidá colectiva y la oficialidá de la llingua Asturiana; l’ampliación de les competencies esclusives, de desarrollu lexislativu y d´execución, reforzando la entidá política ya institucional d´Asturies; y por último, la reforma fondera del sistema de financiación. El BA afirma, respective a la so futura política d’aliances estratéxiques que “nun va participar en dengún gobiernu, coalición ellectoral o alcuerdu políticu permanente o coyuntural, con denguna fuerza política que vote a favor o apoye una Reforma Estatutaria que nun reconoza los derechos políticos, económicos, sociales, culturales y llingüísticos que-y corresponden a Asturies, ente ellos, la Oficialidá de la Llingua Asturiana y del Gallego-Asturianu nel so territoriu”. 16 d'agostu, 2005 0 FacebookTwitterPinterestEmail
Sociedá AA acusa al ayuntamientu dAvilés docultar datos importantes pa la salú de los sos vecinos by asturnet 15 d'agostu, 2005 Andecha Astur critica’l desconocimientu al que ta sometida la población sobre les repercusiones medioambientales que va suponer la construcción d’una central termica de ciclu combináu de gas. Dende l’agrupación local d’Aviles tachen de “conducta hipócrita y d’engañu” el que quiera vendese una imaxe de la ciudá que nun ye la real. Andecha Astur – Conceyu d’Aviles fai públicu’l so rechazu a la falta d’información dada dende l’Ayuntamientu sobre les repercusiones que va tener la construcción de la central termica de ciclos combinaos de gas que la empresa Isolux quier llevantar nesi conceyu. Nes sos crítiques acusen al gobiernu local d’”ocultar datos sobre los riesgos pa la salú de los ciudadanos d’Aviles y comarca” y emplázalu a que faiga públicos los datos d’espulsiones de gases. P’Andecha Astur les centrales termiques de ciclu combináu de gas nun representen nenguna alternativa d’enerxía llimpia y entiende que’l desarrollu industrial tien que ser compatible con una meyora de la calidá de vida y respetuosu col mediu ambiente. 15 d'agostu, 2005 0 FacebookTwitterPinterestEmail
Sociedá LALLA pieslla los XXIII Cursos de Branu by asturnet 10 d'agostu, 2005 Mañana vienres día 12 d’agostu, a les 13’30 hores, nel Salón d’Actos de la Escuela-Hogar de Santantolín (Ibias), van pesllase les actividaes llectives de los XXIII Cursos de Branu de l’Academia de la Llingua Asturiana. Nesti actu col que finen les actividaes llectives del Programa Formativu de l’A.Ll.A, Xose Antón González Riaño, direutor de los Cursos, fairá un balance provisional del resultáu de los mesmos. Dende’l 1 al 12 d’agostu más de 150 persones participaron nos cursos Elemental y Avanzáu de Llingua Asturiana, nos Cursos d’Afondamientu Cultural y Llingüísticu y na 1ª Fase del Cursu de Capacitación en Gallego-Asturianu. La entrega oficial de diplomes y certificaciones va facese nel mes de setiembre nel Aula Magna de la Universidá d’Uvieu. 10 d'agostu, 2005 0 FacebookTwitterPinterestEmail
Sociedá Les llárimes de San Llurienzo dendel Monte Deva by asturnet 10 d'agostu, 2005 El Centru d’Interpretación de la Naturaleza del Monte Deva va abrir les sos puertes mañana, a partir de les diez de la nueche, con motivu del fenómenu denomináu ‘lluvia d’estrelles’, tamien conocíu como ‘llárimes de San Llurienzo’. La lluvia de Perseidas ye un eventu añal siguíu por cientos d’observadores d’estrelles que vuelve al cielu esta selmana. Esti añu va vese con claridá gracies a la lluz baxa de la Lluna que ta nes primeres fases del cuartu creciente. Coincidiendo con esta observación del fenómenu, l’Observatoriu Astronómicu del Monte Deva tamien tará abiertu a partir de les once pa que pueda ser visitáu. Nesti observatorio, espertos de l’Asociación Astronómica Omega van facer comentarios a les visiones de distintos cuerpos celestes. 10 d'agostu, 2005 0 FacebookTwitterPinterestEmail
Sociedá Gustavo Bueno llama-y a IX ONG del bable by asturnet 9 d'agostu, 2005 Tres del intercambiu de palabres ente l’economista y Premiu Príncipe d’Asturies, Juan Velarde, y el conseyeru de Justicia, Francisco Javier García Valledor, el filósofu Gustavo Bueno califica a IX como ‘ONG folclórica’. Pa Bueno, les afirmaciones del conseyeru, nes que definía a Velarde como ‘especime del Antiguu Rexime’, tán fuera de llugar y descalifiquen al propiu Valledor. El filósofu dixo que los dos tienen el so aquel de razón, anque dende diferentes puntos de vista: ‘Velarde tien razón dende la perspectiva de la economía política y Valledor dende los nacionalismos, que son el refugium pecatorium d’IX, ONG del bable’. Y terminó diciendo: ‘A ver que tien más pesu: un argumentu dende’l puntu de vista d’España o d’una ONG folclórica’. Pela so parte, Velarde da por terminada la polemica asegurando que ‘quien contesta con insultos, a sí mesmu se califica. Nun tengo más nada que dicir.’ Pal Secretariu Xeneral d’IX, Jesús Iglesias, ta dándose-y demasiada importancia a esti episodiu. Pero de toes maneres apoyó la postura defendida pol so compañeru de partíu, diciendo que Velarde será una autoridá en materia económica, pero nun lo ye na llingüística. 9 d'agostu, 2005 0 FacebookTwitterPinterestEmail