Sociedá Colectivos políticos y sociales critiquen a Trevín pol casu del militante nacionalista deteníu en Xixón by asturnet 18 de setiembre, 2005 Diversos colectivos políticos y sociales de la izquierda asturiana firmen un comunicáu conxuntu nelq que piden la dimisión del Delegáu del Gobiernu n’Asturies, Antonio Trevín, pola so actuación nel casu de la detención del militante nacionalista Fernando G.R. y nos recientes sucesos de Cangues. Los firmantes del comunicáu acusen a Trevín de conculcar los derechos de presunción d’inocencia del deteníu y de desvelar los sos datos personales nes informaciones ufiertaes a los medios, asina como de tentar criminalizar a colectivos y a idees. Andecha Astur, Corriente Sindical d’Izquierda, Darréu, FUSOA y COSAL d’Uviéu y Xixón critiquen nel so comunicáu l’actitú d’Antonio Trevín al permitir la celebración d’un actu ultraderechista en Cangues el pasáu 10 de setiembre y de lo que califiquen de “violenta represión de les persones movilizaes pa denunciar la convocatoria antidemocrática”, asina como de la falta d’axilidá pa resolver casos como’l de la recién agresión n’Uvièu a una militante del Sindicatu d’Estudiantes. Tocante al casu del nacionalista deteníu la otra selmana en Xixón y qu’anguaño ta recluíu en réxime de prisión incondicional na cárcel madrilana de Navalcarnero, los colectivos firmantes del comunicáu, darréu de considerar que l’actuación del Delegáu del Gobiernu, nun respetó los derechos fundamentales del deteníu, caltienen “desproporcionada l’aplicación de la Llei Antiterrorista” y afirmen que midíes como éstes “nun respuende como se pretende a garantizar la seguranza de la ciudadanía sinón a la necesidá d’aparar les crítiques polos comportamientos enantes denunciaos y sobre too pola falta de resultaos policiales na solución d’estos sucesos”. Estos colectivos acusen nel so comunicáu a la Delegación del Gobiernu de orquestar “una campaña mediática que namás tien por oxetu la criminalización d’idegues, persones, organizaciones y movimientos sociales de la izquierda asturiana”. Los firmantes afirmen que nel casu de Fernando G.R., ésti “ya careció un xuiciu previu al través de los comunicaos de Delegación del Gobiernu y de los medios de comunicación”. Por último, los colectivos autores del comunicáu, defenden la trayectoria personal y ideolóxica del militante nacionalista deteníu al que califiquen de “persona con un indiscutible compromisu social y políticu, fondamente enraigonáu na sociedá asturiana y d’una calidá humana fuera de toa dubia”. Fernando G.R. alcuéntrase anguaño presu nel centru penitenciariu de Navalcarnero, na comunidá de Madrid y esti fin de selmana recibiò la visita de los sos familiares. 18 de setiembre, 2005 0 FacebookTwitterPinterestEmail
Sociedá Valdés prepárase pa conmemorar el centenariu de Severo Ochoa by asturnet 18 de setiembre, 2005 El conceyu de Valdés prepárase pa entamar los actos de remembranza del centenariu del nacimientu de Severo Ochoa. La contribución al homenaxe del conceyu natal del científicu y Premiu Nóbel empieza esti sábadu 24, fecha del centenariu, cola inauguración d’un mural nel puertu de L.luarca, la presentación d’un sellu comemorativu y un conciertu del cantante Chus Pedro na Plaza l’Ayuntamientu. A lo llargo de los prósimos meses van siguir les actividaes programaes pol conceyu valdesanu pa remembrar al so fíu más ilustre. Conferencies de la investigadora Margarita Salas, l’ex director de la UNESCO Francisco Mayor Zaragoza y d’Emiliano Aguirre, Premiu Príncipe d’Asturies d’Investigación Científica, ente otros, van constituir los actos principales del centenariu. Ente les diverses actividaes entames n’homenaxe al Nóbel asturianu el prósimu viernes 23 va presentase na capital del conceyu valdesanu el fotollibru “Luarca, descubriendo emociones: un homenaje a Severo Ochoa», con fotografías d’Ernesto García (ganador del Certamen de Arte de L.luarca del añu paáu) y testos de Román Suárez Blanco. 18 de setiembre, 2005 0 FacebookTwitterPinterestEmail
Sociedá L’Audiencia Nacional ordena la prixón incondicional pal militante nacionalista deteníu en Xixón by asturnet 15 de setiembre, 2005 Fernando G.R., el vecín de Xixón deteníu pola Brigada d’Información de la Comisaría de Xixón esti martes, pasó ayer a disposición de l’Audiencia Nacional de Madrid, trescurríu’l plazu llegal de 48 hores llantáu na Llei Antiterrorista. El xuez Felix Degallón, del xulgáu númberu 6 de l’Audiencia, ordenó el so ingresu na cárcel de Soto del Real en situación de prixón incondicional tres toma-y declaración. Mientres Fernando G.R. yera treslladáu a Madrid pa declarar n’Audiencia Nacional, varios centenares de persones, convocaos polos familiares y amigos del deteníu concentráronse na Plaza’l Parchís de Xixón pa pidir la so puesta en llibertá y clamiar la so inocencia.Los manifestantes cortaron tamién la entrada a l’autopista, a l’altura de l’antigua Casa Sindical, na so protesta. Nun comunicáu distribuíu na protesta, los familiares y amigos del deteníu afirmen que la nota de prensa difundía por Delegación del Gobiernu n’Asturies “namás trata de condenalu a priori énte la sociedá ensin respetar el so derechu a la presunción d’inocencia” y que “amás d’una manera completamente infundada con tou tipu d’elucubraciones intenten imputar a Fernando nun ensin fin de fechos ocurríos n’ Asturies dende va cuatro años”. Pa los allegaos de Fernando G.R “ta sobredimensionándose’l tema ensin prebes, acusándolu d’un delitu de terrorismu pa llevalu asina a l’Audiencia Nacional en Madrid lloñe de la so familia y amigos/es prolongando d’esta manera la incomunicación”. El comunicáu de la familia y los amigos del deteníu acaba diciendo que se “tenta criminalizar una vez más a idees polítiques y organizaciones nes que Fernando militó a lo llargo de la so vida. Esti colectivu tamién denuncia la situaciòn d’indefensión del deteníu, ensin posibilidá de ver al so abogáu. La policía acusa a Fernando G.R. de ser l’autor de dieciocho atentaos cometíos n’Asturies nos últimos cuatro años y de ser el principal aglutinador nel país de grupos radicales afines al independentismu vascu. Unes acusaciones que familiares y conocíos d’esti xixonés nieguen. 15 de setiembre, 2005 0 FacebookTwitterPinterestEmail
Sociedá Esquerra va retirar la referencia al gallegu n’Asturies tres falar con Andecha by asturnet 14 de setiembre, 2005 Esquerra Republicana de Catalunya (ERC) va eliminar cualaquier referencia a los conceyos asturianos del Navia-Eo na so propuesta pa oficializar en toles administraciones del estáu l’usu del gallegu, catalán y euskera. Representantes d’Andecha Astur treslladaron a los sos socios d’Europa de los Pueblos la so esmolición y ERC comprometióse a iguar la confusión provocada nos términos referíos al idioma gallegu na so iniciativa parlamentaria. Andecha informa na so páxina web que como resultáu de los contactos calteníos colos republicanos catalanes la referencia al gallegu en conceyos del occidente astur sustitúise nel testu de la propuesta presentada nel Congresu pol diputáu Joan Tarda por “territorios onde se fale esa llingua”. La organización nacionalista asturiana desplica que los representantes d’Esquerra reconocieron el so erru, frutu de la so desconocencia de la realidá llingüística d’Asturies y de falta de coordinación colos sos socios d’Andecha. Nel comunicáu colgáu na web d’A.A. asegúrase qu’ERC va presentar la so iniciativa col nuevu testu nel que s’elimina la demanda de que la llingua gallega s’oficialice en fasteres de la nuestra comunidá. Web d’Andecha Astur 14 de setiembre, 2005 0 FacebookTwitterPinterestEmail
Sociedá La policía detién a un militante nacionalista supuestamente relacionáu con fechos investigaos poles fuerces de seguridá by asturnet 14 de setiembre, 2005 Axentes de la Brigada d’Información de Xixón detuvieron na madrugada del martes a Fernando G. R. pola so posible relación colos incidentes del pasáu 10 de setiembre en Cangues, según informen dellos medios informativos, citando fontes oficiales. Tres la so detención, la policía investiga la posible relación del deteníu con otros fechos, ente ellos los ataques a sés de partíos políticos, según los mesmos medios. Fernando G.R. ta deteníu ya incomunicáu nos calabozos de la Comisaría de Xixón n’aplicación de la Llei Antiterrorista. Según informen diversos medios asturianos na so edición de güei, citando fontes de la Delegación del Gobiernu, el deteníu podía pasa a disposición de l’Audiencia Nacional trescurríu’l plazu de 48 hores establecíu na lexilación pa delitos relacionaos col terrorismu. Dende la so detención familiares y amigos de Fernando G. R. concentráronse énte la Comisaría xixonesa pa pidir la llibertá del deteníu. Esti xueves 15 hai convocada una concentración a les 19.00 hores na Plaza’l Parchís de Xixón pa reclamar la so puesta en llibertá. Los familiares del deteníu declararon en dellos medios desconocer les razones del apresamientu de Fernando G. R. y denunciaron la falta d’información de les autoridaes policiales tocante a la situación del deteníu. Nun comunicáu difundíu en medios alternativos los familiares llamen l’atención sobre’l fechu de que nun-y permitieran al deteníu ver al so abogáu y informen que solicitaron pa él l’aplicación del habeas corpus. Fernando G.R. ye miembru activu de diversos colectivos asturianistes y cumplió dos años de prixón nel Centru Penitenciariu de Villabona condenáu por insumisu al serviciu militar obligatoriu. Nel momentu de redactar esta información desonocíase si el deteníu fuera puestu en llibertá o pasara a disposición xudicial. 14 de setiembre, 2005 0 FacebookTwitterPinterestEmail
Sociedá El Bloque pide desplicaciones a Delegación del Gobiernu polos fechos de Cangues by asturnet 13 de setiembre, 2005 Rafael Palacios y Roberto Colunga, portavoz nacional y secretariu xeneral del Bloque por Asturies, respectivamente, ufiertaron esti martes 13 una rueda de prensa pa condenar l’actuación de la Guardia Civil nos incidentes del pasáu 10 de setiembre en Cangues d’Onís y pidir desplicaciones a Delegación del Gobiernu por estos fechos. Los cabezaleros de la organización nacionalista remembraron que díes enantes de celebrase en Cangues un actu del grupu ultraderechista Democracia Nacional, el Bloque advirtió al Delegáu del Gobiernu, Antonio Trevín, de la eventualidá d’incidentes violentos entamaos polos neofacistes y encamentáronlu a nun permitir esti actu convocáu pa una xornada que coincidía cola llegada a la zona d’una etapa de la Vuelta Ciclista a España. Los dirixentes de BA consideren que los sos advertíos nun yeren de baldre en vista de lo sucedío en Cangues el sábadu 10. El Bloque, que sofitaba una convocatoria de refugue a la concentración ultra nel mesmu llugar de la celebración d’aquella, criticó por voz de los sos cabezaleros la intervención de la Guardia Civil: “en Cangues dOnís asistimos a lo que podíemos denominar el mundiu del revés -afirmaron Palacios y Colunga- la Guardia Civil protexendo a los neofacistes y golpeando de forma brutal a los demócrates”. El Bloque calificó de “desmidida” ya “inxustificable” l’actuación de les fuerces de seguridá que se saldó cola detención de doce manifestantes antifascistes. Respective a les agresiones que la Guardia Civil afirmó recibir per parte de los militantes d’izquierda, los dirixentes de BA manifestaron que fueron los propios ultres los qu’entamaron estos incidentes: “tenemos conocimientu de la esistencia dultres y neofacistes que, mezclaos ente la población, llanzaron piedres y botelles contra la Guardia Civil col oxetivu estudiáu de provocar la so actuación”, aseguraron Rafael Palacios y Roberto Colunga. El Bloque por Asturies pidió al Delegáu del Gobiernu, Antonio Trevín, l’apertura d’una investigación polos sucedíos de Cangues, la depuración de les posibles responsabilidaes internes y l’archivu de los tramites sancionadores puestos en marcha contra los militantes antifascistes deteníos tres los incidentes. Pa la organización nacionalista “nun s’entiende cómo ye posible quel Delegáu en el Gobiernu nAsturies nun autorice manifestaciones por tar redactada la solicitú en Llingua Asturiana y ensin embargu autorice una concentración en Cangues dOnís dun conocíu grupu neofacista y pronazi, racista, xenófobu, y violentu por definición”. 13 de setiembre, 2005 0 FacebookTwitterPinterestEmail
Sociedá Andecha va aconceyar con ERC pa tratar de la so propuesta sobre llingües del Estáu by asturnet 13 de setiembre, 2005 Andecha Astur va aconceyar colos sos socios na coalición Europa de los Pueblos d’Esquerra Republicana de Catalunya (ERC) pa pidi-y a la formación de Josep Lluis Carod Rovira qu’elimine la referencia al Navia-Eo na so propuesta nel Congresu pa que gallego, catalán y eusquera seyan oficiales nes administraciones del estáu. La organización nacionalista asturiana informa na so web oficial que prósimamente van reunise con representantes d’Esquerra col fin d’advertilos del “erru grave” de considerar na so iniciativa parlamentaria ala estaya más occidental d’Asturies como territoriu de fala gallega. Andecha asegura tener el comencimientu de qu’esti erru namás puede debese “a la desconocencia de la realidá llingüística asturiana”. Los socios asturianos de la coalición Europa de los Pueblos consideren “d’una gravedá inusitada el “que se pretenda dar esti avance irreversible nel procesu de colonización al que ta sometíu l’occidente asturianu” y advierte a los sos coaligaos d’ERC que de llevase a fechu la so iniciativa nos términos actuales “condicionaría perdafechu les rellaciones con esa formación”. Web d’Andecha Astur 13 de setiembre, 2005 0 FacebookTwitterPinterestEmail
Sociedá Distritu Oeste entama un ciclu de conferencies nel Atenéu de La Calzada by asturnet 11 de setiembre, 2005 Mañana martes 13 de setiembre de 2005 a les 19:30 hores escomienza un ciclu de charres y conferencies nel Ateneu de La Calzada, qu’entama’l Distritu Oeste de l’Agrupación Socialista de Xixón,con un coloquiu presentación del Centru d’Atención Integral a muyeres víctimes de la violencia que se va facer en Montevil. Ta previsto que Serxu Solares(coordinador del Distritu Oeste), Dulce Gallego (conceyala de Polítiques d’Igualdá) y Maria Jose Ramos(conseyera de la Presidencia) participen mesmo nesti coloquiu que nes que se van cellebrar nos meses de setiembre, ochobre y payares. Siendo toes elles gratuites y d’accesu llibre pa tol públicu. El martes 20 de setiembre, nel mesmu local del Ateneu de La Calzada, a les siete y media la tarde, tendrá llugar el siguiente coloquiu con tema ‘Socialismu nel movimientu vecinal’. 11 de setiembre, 2005 0 FacebookTwitterPinterestEmail
Sociedá El gallego podía ser oficial nel Navia-Eo si prospera la iniciativa nel Congresu d’ERC sobre llingües oficiales by asturnet 11 de setiembre, 2005 La propuesta pa esparder per tolea administraciones del estáu l’usu del catalán, el vascu y el gallegu d’ERC nel Congresu propón qu’esta última llingua sea oficial en parte del territoriu d’Asturies y de la comunidá de Castiella-Lleón. La Mesa del Congresu estudia esta selmana la iniciativa d’Esquerra. Na proposición non de llei pendiente d’aceptar la so tramitación parlamentaria deféndese no tocante a la llingua gallega qu’esta pueda tener tener usu administrativu en territorios galaicofalantes de fuera la comunidá autónoma onde ye idioma cooficial y cítase esplícitamente les comunidaes asturiana y castellano-lleonesa. Fontes d’ERC manifestaron nos díes pasaos en distintos medios que’l so grupu negocia col PSOE la salida alantre de la iniciativa como una de les condiciones pal sofitu de los independentistes a los presupuestos del gobiernu de José Luis Rodríguez Zapatero. Hasta agora namás el Partido Popular manifestó de manera clara el so refugue a la propuesta d’Esquerra, que podía salir alantre si a la fin el grupu socialista la sofita. 11 de setiembre, 2005 0 FacebookTwitterPinterestEmail
Sociedá IAS pidi-y a Delegación del Gobiernu que se depuren responsabilidaes poles actuaciones del pasáu sábadu en Cangues dOnís by asturnet 11 de setiembre, 2005 Izquierda Asturiana condena les detenciones d’un grupu de mozos que protestaben pola celebración ‘fascista’ del pasáu sábadu en Cangues d’Onís y tacha d’’indignante qu’una delegación del Gobiernu democráticu de permise pa la celebración d’actos qu’esplícitamente promueven la xenofobia dende postulaos neofascistes’. Nel comunicáu emitíu por IAS, denúnciase, ente los testimonios qu’aseguren que la Guardia Civil ‘cargó de manera desproporcionada contra los manifestantes antifascistes mentes protexía a persones qu’esibíen simboloxía neonazi illegal y facíen xestos de cortes fasticista’. Por esta razón, dende Izquierda Asturiana esíxen-y al delegáu del gobiernu, Antonio Trevín, que dea esplicaciones y depure responsabilidaes cuanto primero meyor. IAS considera estos fechos especialmente sangrinos, si se tien en cuenta que la llegalización d’esa manifestación vien d’una delegación de gobiernu ‘que nunca nun tien autorizao una concentración o manifestación que fuere solicitada en llingua asturiana’. 11 de setiembre, 2005 0 FacebookTwitterPinterestEmail