Sociedá Axustes nel testu orixinal demoren l’aprobación del plan integral de política llingüística by asturnet 1 de febreru, 2005 Axustes nel testu orixinal. Esa ye la causa principal de la demora na aprobación del Plan de Normalización, el documentu central de la política llingüística hasta 2007, cuya entrada en vigor taba comprometida pola conseyera de Cultura, Ana Rosa Migoya, pal mes de xineru. El testu ta otra vuelta nesi departamentu depués d’un primer análisis nel Conseyu de Gobiernu. Asina lo precisaron güei fontes del gabinete de la Conseyera, que señalaron que’l testu foi yá revisáu pol Executivu en plenu. Depués d’esa revisión, el documentu regresó a Cultura, onde agora ta siendo “retocáu” pa volver, yá colos nuevos cambios fechos pol departamentu dirixíu por Migoya, a un nuevu Conseyu de Gobiernu, onde finalmente sedrá aprobáu. ¿Quién fai les igües de les que saldrá’l testu definitivu del Plan de Normalización? Fontes prósimes al Executivu autonómicu apunten que “esa cuestión ye agora de gabinete”, y el director de la Oficina de Política Llingüística del Principáu y autor del testu orixinal, Ramón D’Andrés, evita espresamente responder a la pregunta y refuga facer comentariu dalu al respectu. Nesti contestu, Cultura nun precisa cuándo prevé tener llistos los axustes finales nel documentu pa que’l plan puea dar el pasu final p’hacia la so aprobación en Conseyu de Gobiernu. Los plazos verbales anteriores incumpliéronse sucesivamente: El pasáu 10 de payares, Migoya afirmó nuna comparecencia pública que’l Plan de Normalización Sociollingüística taría en vigor en xineru, depués que’l director xeneral de Política Llingüística, Carlos Madera, estimare que’l documentu podría empezar a aplicase yá na seronda pasada. Redactáu na so versión orixinal en marzu de 2004, el plan pon plazos mui precisos a les actuaciones pa normalizar l’usu del asturianu en toles estayes, con menciones específiques a la relixón, el deporte, la enseñanza y la radiotelevisión autonómica, a la que se-y dedica un capítulu espresu. Anque nun se fala espresamente d’oficialidá, el documentu plantega una coficialidá ‘de fechu’ a base de llevar a la práctica toles midíes pormenorizaes nel testu. Archivu. Avance de conteníos del plan 1 de febreru, 2005 0 FacebookTwitterPinterestEmail
Sociedá Venti redactores y fotógrafos participen nun cursu pioneru d’asturianu entamáu pol diariu ‘El Comercio’ by asturnet 28 de xineru, 2005 Deprender llingua asturiana pa poder emplegala na prensa escrita. Venti redactores y fotógrafos del diariu xixonés ‘El Comercio’ empiecen el martes prósimu un cursu inéditu d’asturianu pa periodistes entamáu pol propiu mediu de comunicación, con una duración de tres meses y dos hores de clases a la selmana. El monográficu coincide con sendos cursos convocaos pola Universidá y pola Xunta pola Defensa de la Llingua. Nel casu’l diariu xixonés -integráu nel Grupu Vocento de comunicación, antes Grupu Correo-, el cursu tien un nivel básicu y ta concebíu p’aniciar a los trabayadores del periódicu nel usu de la llingua asturiana, col envís de que llueu tean capacitaos pa emplegar esi idioma nel so llabor diariu. El monográficu, el primeru d’estes calterístiques qu’entama un periódicu n’Asturies, tará impartíu nes propies instalaciones del periódicu pola profesora Sabel Tuñón, integrante de la comunidá educativa’l colexu xixonés Javinto Benavente, y prollongaráse hasta finales d’abril cola participación adicional d’escritores, periodistes, músicos, profesores, etnógrafos y editores, qu’illustrarán a los alumnos con charres sobro les sos respectives especialidaes. La cellebración del cursu internu pa trabayadores del diariu ‘El Comercio’ coincide nes feches con otres dos convocatories formatives: Un cursu al rodiu de comunicación en situaciones de minorización llingüística entamáu pola Universidá d’Uviéu dientro’l so programa d’Estensión Universitaria y un monográficu formativu d’asturianu promovíu pola Xunta pola Defensa de la Llingua. 28 de xineru, 2005 0 FacebookTwitterPinterestEmail
Sociedá La capitalidá cultural concedida pola Unesco centrará la promoción turística d’Asturies by asturnet 28 de xineru, 2005 Asturies empezará por Xapón pa ‘vendese’ como “capital cultural del mundu”. El Gobiernu autonómicu abrirá nel país asiáticu la so nueva campaña de promoción turística, que tará centrada en destacar la capitalidá cultural concedida a Asturies pola Unesco ente ochobre de 2005 y payares de 2006, periodu nel que los Premios ‘Príncipe’ cellebrarán el so 25 aniversariu con una bayurosa axenda d’actividaes. El presidente autonómicu, Vicente Álvarez Areces, confirmó esta mañana en Madrid l’apueste del Gobiernu por promover una imaxe d’Asturies como epicentru cultural del mundu, y avanzó que’l primer ‘stand’ que’l Principáu asitiará nel estranxeru p’abrir esa promoción sedrá la Esposición Universal de la llocalidá xaponesa de Nagoya, el prósimu mes de xunetu. N’otres pallabres, l’aniversariu de los premios ‘Príncipe de Asturias’, que traerá al Principáu a dellos premiaos de relevancia internacional paparticipar en conferencies, conciertos y esposiciones, marcará l’axenda turística del Gobiernu autonómicu, nel mesmu añu nel que se cumplen dos décades de la creación de la imaxe institucional del ‘Asturias paraíso natural’. Los xestores públicos del turismu n’Asturies intentaránen 2005, poro, atrayer al Principáu a un mayor númberu de turistes estranxeros pregonando les bondaes del aniversariu de los premios ‘Príncipe’. Álvarez Areces asistió güei al Día d’Asturies na Feria Internacional de Turismu de Madrid (Fitur) en compaña, ente otres personalidaes, del presidente de la Fundación ‘Príncipe’, José Ramón Álvarez Rendueles. 28 de xineru, 2005 0 FacebookTwitterPinterestEmail
Sociedá L’espediente de ‘Llangreo’ supera’l primer trámite col apoyu de PP y PSOE y l’abstención d’IX-Bloque by asturnet 27 de xineru, 2005 Izquierda Xunida-Bloque por Asturies nun ve claro’l topónimu ‘Llangreo’. La coalición d’izquierdes abstúvose nel primer trámite municipal del llistáu de topónimos del conceyu, que salió alantre colos votos favorables de los representantes de PP y PSOE na comisión llocal de Cultura. IX-Bloque defende’l nome de ‘Llangréu’ argumentando’l so usu nel municipiu hai más de dos décades. La discrepancia d’Izquierda Xunida-Bloque por Asturies respecto al llistáu de 300 nomes tradicionales de llugar propuestu pola Xunta Asesora de Toponimia, que se reduz al topónimu de ‘Llangreo’ con ‘o’, escenificóse por primer vegada ayeri, na sesión de la comisión municipal de Cultura, Servicios Sociales, Política Llingüística, Turismu, Comerciu y Mercaos del Ayuntamientu llangreanu. Los dos representantes de la formación abstuviéronse na votación del espediente, que sí algamó los votos positivos de los tres miembros del PSOE na comisión y los dos del PP. La llista propuesta pola Xunta de Toponimia habrá pasar agora al Plenu del Ayuntamientu de Llangréu, pero tendrá qu’esperar a lo menos una selmana, yá que la votación del espediente toponímicu nun figura nel orde’l día de la reunión plenaria que se cellebra esta tarde. Usu “non documentáu” El pasáu 11 de xineru, representantes de la Xunta Asesora de Toponimia del Principáu entregáron-y la so propuesta de 300 topónimos tradicionales a l’alcaldesa llangreana, Esther Díaz, nun actu marcáu pola propuesta de que la denominación del conceyu en llingua asturiana pase de l’actual ‘Llangréu’ -incorporada incluso na imaxe corporativa del Ayuntamientu- a ‘Llangreo’. Los miembros de la Xunta sostienen la so proposición na inesistencia d’un usu documentáu del nome ‘Llangréu’ constatáu na tradición oral, según esplicaron el vocal de la entidá Fernando Álvarez Balbuena y el director de la Oficina de Política Llingüística’l Principáu, Ramón D’Andrés. Artículu d’opinión. ‘¿Llangreo?’ 27 de xineru, 2005 0 FacebookTwitterPinterestEmail
Sociedá El Conceyu pola Oficialidá busca más apoyos énte l’aniciu de la reforma estatutaria by asturnet 26 de xineru, 2005 Más apoyos. El Conceyu Abiertu pola Oficialidá, plataforma qu’axunta a decenes d’entidaes polítiques, sindicales, cíviques y de defensa llingüística, quier ampliar el grau de sofitu a les sos reivindicaciones y promueve una ampliación de la llista de firmantes qu’avalen el so manifiestu fundacional, nel que se reclama la “inescusable” inclusión de la coficialidá de la llingua asturiana na inminente reforma del Estatutu d’Autonomía. Ente otros collectivos, el Conceyu busca l’apoyu espresu del gremiu d’escritores n’asturianu, movilizáu nesti casu al traviés d’estremaos editores. L’envís principal de la plataforma ye algamar el mayor respaldu posible a les sos demandes énte la inminente apertura del procesu políticu pa reformar l’Estatutu d’Autonomía p’Asturies. Nesti sen, el Conceyu Abiertu pola Oficialidá prepara una manifestación pal mes de marzu na que la inclusión del asturianu como idioma cooficial nel nuevu testu estatutariu sedrá la reclamación esencial, acordies col manifiestu fundacional de la entidá, que pide esa coficialidá como “única ferramienta llegal que pue garantizar el respetu a los derechos civiles de tolos asturianos y asturianes y la sobrevivencia de la nuestra llingua”. En marcha dende xunu de 2004 cola participación de más d’ochenta entidaes de mui estramáu signu, el Conceyu plantega como “irrenunciable” la coficialidá del asturianu nel Estatutu renováu pa que “la llingua nun nos muerra nes manes” y anuncia la so propia disolución nel momentu en que se pieslle la reforma estatutaria. Archivu. El Conceyu Abiertu busca’l compromisu formal del PSOE na oficialidá del asturianu 26 de xineru, 2005 0 FacebookTwitterPinterestEmail
Sociedá Los políticos estudien la llista de la Xunta de Toponimia que propón el nome de ‘Llangreo’ by asturnet 25 de xineru, 2005 Entama’l discutiniu políticu del ‘Llangreo’ con ‘o’. La Comisión municipal de Cultura del conceyu mineru analizará mañana’l llistáu de trecientos nomes tradicionales de llugar propuestu pola Xunta Asesora de Toponimia, a cuya cabeza figura la controvertida forma ‘Llangreo’. El documentu podría llegar al Plenu de la Corporación llangreana esta mesma selmana. Según precisaron fontes de la conceyalía de Cultura de Llangréu, la llista avalada pola Xunta discutiráse na sesión que mañana, miércoles, va cellebrar la Comisión municipal de Cultura, Servicios Sociales, Política Llingüística, Turismu, Comerciu y Mercaos del Ayuntamientu llangreanu, primer pasu necesariu pa l’análisis políticu del llistáu de topónimos. Si’l documentu algama nesa xuntanza de trabayu el preste de la mayoría de conceyales que la integren -tres del PSOE, dos d’Izquierda Xunida-Bloque por Asturies y otros dos del PP-, abriríase la posibilidá de que’l llistáu s’abordare nel Plenu municipal que Llangréu cellebra esta selmana, fixáu pal prósimu xueves. El pasáu 11 de xineru, representantes de la Xunta Asesora de Toponimia del Principáu entregáron-y la so propuesta de 300 topónimos tradicionales a l’alcaldesa llangreana, Esther Díaz, nun actu marcáu pola propuesta de que la denominación del conceyu en llingua asturiana pase de l’actual ‘Llangréu’ -incorporada incluso na imaxe corporativa del Ayuntamientu- a ‘Llangreo’. Los miembros de la Xunta sostienen la so proposición na inesistencia d’un usu documentáu del nome ‘Llangréu’ constatáu na tradición oral, según esplicaron el vocal de la entidá Fernando Álvarez Balbuena y el director de la Oficina de Política Llingüística’l Principáu, Ramón D’Andrés. Artículu d’opinión. ‘¿Llangreo?’ 25 de xineru, 2005 0 FacebookTwitterPinterestEmail
Sociedá El Principáu podrá aplicar un plan llingüísticu integral nel Navia-Eo antes que s’impulse el gallegu na zona by asturnet 24 de xineru, 2005 El Principáu podrá plantegar midíes llingüístiques concretes nel Navia-Eo antes que la Xunta de Galicia. La comunidá vecina posterga la práctica entrada en vigor del so plan de normalización, que prevé impulsar l’usu del gallegu nel occidente d’Asturies, hasta depués de les elecciones autonómiques gallegues, que se cellebrarán na seronda. El Gobiernu asturianu, que reivindica la so potestá esclusiva pa facer política llingüística nel Navia-Eo, anunció p’antes de fin de xineru l’aprobación del plan pa normalizar la llingua asturiana d’equí a 2007. Depués de la controversia suscitada’l pasáu mes de payares, cuando l’Academia de la Llingua desveló que’l plan pa normalizar el gallegu pretende ‘galleguizar’ l’occidente d’Asturies, el director xeneral de Política Llingüística de la comunidá vecina, Xesús Pablo González Moreiras, precisó’l vienres qu’inda ta abiertu un plazu pa consensuar les midíes concretes del ‘Plan xeral de normalización da lingua galega’, midíes qu’en tou casu nun s’aplicarán -occidente asturianu incluyíu- hasta depués de les elecciones autonómiques, que previsiblemente cellebraránse nel mes d’ochobre. El primer plan integral del Gobiernu gallegu pa da-y puxu al so idioma, aprobáu en setiembre pasáu nel Parlamentu d’esa comunidá, presentóse oficialmente’l sábadu en Santiago de Compostela como un documentu “afable y modernu” que busca ampliar los “espacios d’usu” de la llingua gallega. Nesti sen, y según la denuncia de l’Academia de la Llingua, el plan propón actuaciones concretes p’afitar el gallegu fuera les llendes alministratives de Galicia, principalmente nel Navia-Eo y na comarca lleonesa d’El Bierzu. Magar que’l Principáu reivindicó dende l’empiezu de la polémica la so competencia esclusiva pa desendolcar polítiques llingüístiques nel occidente asturianu, el Gobiernu autonómicu entá nun sacó alantre el Plan de Normalización Sociollingüística, el documentu qu’inclúi midíes concretes pa preservar la modalidá’l gallego-asturianu nel Navia-Eo. Si cumple les sos propies previsiones, l’Executivu autonómicu aprobará’l documentu nel Conseyu de Gobiernu d’esta mesma selmana. Depués d’esa aprobación formal, quedará llevalu a la práctica, lluchando contra antecedentes de retrasu crónicu como la falta de desendolcu y aplicación en dellos puntos de la Llei d’Usu del Asturianu, aprobada en 1998, o la propia ellaboración del plan gallegu, presentada yá oficialmente en 2002. Archivu. Galicia defende y presenta en públicu el plan que plantega espardir l’usu del gallegu nel Navia-Eo 24 de xineru, 2005 0 FacebookTwitterPinterestEmail
Sociedá Espertos europeos insisten en reclama-y al Gobiernu autonómicu la coficialidá del asturianu by asturnet 24 de xineru, 2005 El Gobiernu asturianu tien qu’atender les recomendaciones de los espertos europeos que visitaron el Principáu n’avientu pasáu y ha declarar l’asturianu como llingua cooficial nel so territoriu. Esti ye’l veredictu de l’Asociación Internacional pa la Defensa de les Llingües y les Cultures Amenazaes, qu’ayeri remató una xuntanza de trabayu en Viena. Dende esa ciudá, el conseyu d’alministración de l’asociación emitió una resolución d’una fueya d’estensión na que-y encamienta al Gobiernu asturianu que tenga en cuenta el diagnósticu y les propuestes de los especialistes del Comité internacional pa la salvaguarda de los drechos llingüísticos n’Asturies, que n’avientu reclamaron n’Uviéu mayor “visibilidá” pal asturianu y la so coficialidá. Depués d’analizar la situación sociollingüística n’Asturies y la evolución de la llingua asturiana nos últimos años, esa entidá emitió un informe pal qu’agora pide atención l’Asociación pola Defensa de les Llingües Amenazaes. Si se siguen les recomendaciones d’esi documentu, sostienen los espertos aconceyaos en Viena, el patrimoniu llingüísticu asturianu quedaría salvaguardáu y evitaríense casos de discriminación personal pol usu del idioma como’l de la escolina Catuxa Bermeyu, que nun pue asistir a clase de Llingua nel so institutu pesie a querer facelo. Archivu. Especialistes europeos reclamen n’Uviéu mayor “visibilidá” pa la llingua asturiana 24 de xineru, 2005 0 FacebookTwitterPinterestEmail
Sociedá Galicia defende y presenta en públicu el plan que plantega espardir l’usu del gallegu nel Navia-Eo by asturnet 21 de xineru, 2005 Dos xornaes pa presentar y distribuir un documentu que plantega impulsar l’usu de la llingua gallega nel occidente d’Asturies. El Gobiernu de la comunidá vecina analiza y difunde, güei y mañana, el so plan de normalización, del que’l Principáu espera una copia comprometida pol departamentu de Política Llingüística de la Xunta. Esi compromisu alquiriólu’l director d’esi muérganu, Xesús Pablo González Moreiras, depués que l’Academia de la Llingua Asturiana denunciara nel mes de payares que’l ‘Plan Xeral de Normalización da Lingua Galega’, aprobáu dos meses antes nel Parlamentu de la comunidá vecina, alita a ‘galleguizar’ la comarca asturiana del Navia-Eo. El Gobiernu’l Principáu solicitó entós una copia ofial del plan pola qu’inda espera. El propiu González Moreiras intervién güei nos VIII ‘Encontros para a Normalización’, que se cellebren en Santiago de Compostela y dediquen tola xornada a analizar el procesu d’ellaboración y les midíes previstes nel pln gallegu, asina como les sos repercusiones concretes na eduación y na alministración. Mañana, sábadu, el director de Política Llingüística de la Xunta de Galicia presentará formalmente’l documentu nel trescursu d’un actu nel que s’esplicarán dafechu los conteníos del testu y entamaráse’l repartu de miles d’exemplares del plan. Ente otres propuestes, el documentu col que Galicia se dota pa da-y puxu al so idioma plantega reforzar la idega ente la población del occidente asturianu de que la so fala ye gallegu, “coles sos peculiaridaes dialectales, pero gallegu”, universalizar la cobertura de la televisión pública gallega nel Navia-Eo y alitar a los comerciantes de la comarca a retular los sos negocios en gallegu. Archivu. Galicia traza un plan pa ‘convencer’ a los habitantes del occidente asturianu de que falen gallegu 21 de xineru, 2005 0 FacebookTwitterPinterestEmail
Sociedá El Gobiernu posterga l’aprobación del plan de normalización hasta la llende’l plazu comprometíu by asturnet 20 de xineru, 2005 Nel últimu Conseyu de Gobiernu de xineru. L’Executivu autonómicu tendrá qu’aprobar la selmana qu’entra el documentu que rixe la política llingüística pa los prósimos tres años, si nun quier faltar al compromisu alquiríu pola conseyera de Cultura, Ana Rosa Migoya, quien anunció la entrada en vigor del testu pa esti mesmu mes. Fontes del Executivu aseguren que’l Conseyu de Gobiernu yá anició l’análisis del documentu. El pasáu 10 de payares, Migoya afirmó, na presentación pública del presupuestu de Cultura pa 2005, que’l Plan de Normalización Sociollingüística -primer documentu integral qu’aprobará’l Gobiernu autonómicu pa planificar la política llingüística con midíes concretes hasta 2007- entraría en vigor nesti mes de xineru, un plazu qu’escosa a mediaos de la prósima selmana yá que’l documentu precisa’l preste del Conseyu de Gobiernu y la última xuntanza del Executivu nesti mes produciráse previsiblemente’l xueves. Diverses fontes de la propia Conseyería de Cultura indicaron que nesa fecha ye factible que s’apruebe el plan, cuyu análisis yá s’entamó nel Conseyu de Gobiernu, anque l’aprobación del documentu comentóse como inminente nes anteriores reuniones que l’Executivu mantuvo esti mes -la última d’elles, ayeri- y finalmente nun se produxo. El partu’l Plan de Normalización remóntase al pasáu mes de marzu, fecha na que yá taba redactáu el borrador definitivu. A primeros de xunetu, el documentu aportó a la mesa de trabayu de la conseyera de Cultura, y a partir d’ehí, too foron especulaciones colos plazos pa la so aprobación y posterior entrada en vigor. El director xeneral de Promoción Cultural y Política Llingüística, estimó primero que’l plan podría empezar a aplicase en setiembre de 2004 y depués albidró que’l documentu aprobaríase nel “últimu Conseyu de Gobiernu de 2004 o el primeru de 2005”. Nun foi asina. A lo llargo de 64 páxines, nel Plan de Normalización pónense plazos mui precisos a les actuaciones pa normalizar l’usu del asturianu en toles estayes, con menciones específiques a la relixón, el deporte, la enseñanza y la radiotelevisión autonómica, a la que se-y dedica un capítulu espresu. Anque nun se fala espresamente d’oficialidá, el documentu plantega una coficialidá ‘de fechu’ a base de llevar a la práctica toles midíes pormenorizaes nel testu. Archivu. Avance de conteníos del Plan de Normalización 20 de xineru, 2005 0 FacebookTwitterPinterestEmail