Sociedá Cuaña refuga la so inclusión nos territorios de la candidatura galaico-portuguesa a la UNESCO by asturnet 17 d'ochobre, 2005 Cuaña ye’l segundu conceyu de Navia-Eo -después de que lo ficiera Santiso d’Abres- que se pronuncia institucionalmente énte la candidatura a la UNESCO de Galicia y Portugal qu’inclúi territorios asturianos. El plenu municipal aprebó una moción del alcalde popular contraria al inxerimientu del conceyu dientro les fasteres de fala galaico-portuguesa que recueye la iniciativa pola declaración d’Obra Maestra del Patrimoniu Oral Inmaterial de la Humanidá. La moción presentóla nel plenu l’alcalde de Cuaña, Salvador Méndez, del PP, y provocó un enfrentamientu ente’l grupu gobernante y el socialista. Los conceyales del PSOE nun dieron el so votu a la moción contra la inclusión del conceyu na candidatura luxo-galaica, argumentando que desconocíen el conteníu de la iniciativa énte la UNESCO. A la fin la moción salió alantre coles abstenciones de los ediles socialistes. Cuaña conviértese asina nel primer conceyu d’Asturies que refuga los intentos espansionistes d’instituciones y grupos políticos de Galicia. En díes pasaos la formación nacionalista Andecha Astur presentara en tolos conceyos del Navia-Eo una iniciativa pa que los sos plenos decidieran oponese a ls so inclusión dientro los territorios de fala galaico-portuguesa. Santiso d’Abres debatió l’asuntu nun de los últimos plenos del Ayuntamientu y tamién refugó los intentos ‘espansionistes’ gallegos con unanimidá de tolos grupos municipales. 17 d'ochobre, 2005 0 FacebookTwitterPinterestEmail
Sociedá Una esposición enseña n’Uviéu los recuerdos de Fernando Alonso by asturnet 17 d'ochobre, 2005 El vestíbulu del Auditoriu d’Uviéu acueye hasta’l prósimu 20 d’ochobre una esposición entamada pola Fundación Príncipe d’Asturies con recuerdos personales del pilotu Fernando Alonso. Ente los materiales enseñaos tán el coche col que’l campeón mundial de Fórmula 1 compitió la temporada pasada y oxetos como cascos de karts colos qu’empezó correr de guaje El Nano. Na esposición, que después de tar n’Uvièu va poder visitase nel Palaciu Revillaxixéu de Xixón del 20 al 23 d’ochobre, amuésense monos vistíos pol pilotu carbayón nos equipos de Renault y Minardi, asina como volantes de los vehículos guiaos por Fernando Alonso na Fórmula Nissan y nos mundiales de karts. Per otru llau, la Fundación Príncipe d’Asturies pon dende esti martes 18 nes taquielles del Auditoriu alrodiu de 2.000 entraes gratuítes p’asistir al coloquiu abiertu al públicu que Fernando Alonso va celebrar el prósimu sábadu 22 na sala central del coliséu uvieín. Les invitaciones van poder retirase n’horarios de 10.00 a 14.00 hores y de 16.00 a 20.00 nes taquielles del auditoriu. 17 d'ochobre, 2005 0 FacebookTwitterPinterestEmail
Sociedá Política Llingüística programa dos cursos pa filólogos y periodistes by asturnet 16 d'ochobre, 2005 Ramón d’Andrés Díaz, responsable de la Oficina de Política Llingüística del Principáu, presentó esta mañana n’Uviéu entrambos cursos empobinaos a llicenciaos en Filoloxía y a profesionales de la información. Los modulos formativos tán entamaos en colaboración col Seminariu de Llingua Asturiana y dirixíos pol profesor Xulio Viejo. Con estos cursos “queremos capacitar tanto a periodistes como filólogos nel conocimientu de la llingua asturiana” afirmó d’Andrés na presentación d’esta mañana. El director de la Oficina de Política Llingüística relacionó’l cursu destináu a profesionales de los medios informativos colos celebraos va unos meses, de los que dixo “son una continuación, un módulu de perfeccionamientu” y anunció la programación d’un segundu cursu de calter prácticu pa la primavera “col fin de que los periodistes tamién puedan escribir, falar, pronunciar l’asturianu nel so trabayu”. El cursu empobináu a filólogos pretende formar encuestadores en dialectoloxía, toponimia y cultura popular. Ramón d’Andrés refirióse a la oportunidá d’esti cursu empobináu a llicenciaos en Filoloxía pa proveer a la Xunta de Toponimia de colaboradores y recopiladores formaos en trabayu de campu.El profesor Xulio Viejo Fernández va ser l’encargáu de coordinar y dirixir entrambos cursos, que son de calter gratuítu y cupu limitáu a 35 places. El plazu d’inscripción ta abiertu dende güei hasta’l 25 d’ochobre nel cursu pa filólogos y hasta’l 11 de payares nel cursu pa periodistes. El cursu pa encuestadores impartiráse dende’l 25 d’ochobre al 15 d’avientu y el cursu pa periodistes dende’l 11 de payares al 17 d’avientu. La Facultá de Filoloxía d’Uviéu y el Conseyu de la Mocedá de Xixón van ser los sitios onde s’impartan los cursos. 16 d'ochobre, 2005 0 FacebookTwitterPinterestEmail
Sociedá El conceyal de Cultura d’Ayer retruca al PP pola so rocea a aceptar la revisión toponímica by asturnet 16 d'ochobre, 2005 El conceyal de Cultura y Educación del Ayuntamientu d’Ayer, Santos Fernández, respuende nun escritu al Partido Popular del conceyu pola oposición d’esti grupu a la propuesta d’espediente toponímicu del Principáu. Fernández recuérda-yos a los populares los esfuerzos fechos pa detallar toa clase d’información per parte de la Xunta de Toponimia y píde-yos nun crear un problema onde nun lu hai. Pal conceyal de Cultura “el tema de la normalización llingüística de principiu nun debía xenerar un rechazu tan fuerte como pretende’l PP d’Aller, ya que si la importancia del mesmu ye notable, tampoco debemos convertilo en problema”, afirma nel so escritu. Nel mesmu desplica que “equí en Aller alcontrámonos con unes persones mui reacies a esa recuperación toponímica y por ello s’allargó varios meses” y recuerda que “per parte de los técnicos de la Conseyería facilitáronse varios documentos de los trabayos d’investigación y siempre pidieron más estudios, de talamiente que dichos técnicos, lleven dedicaos al Conceyu d’Aller más tiempu qu’ a nengún otru”. La polémica a la que fai referencia’l conceyal de Cultura ayerán entamóse cola oposición radical del PP a acpetar ente otros topónimos propuestos el d’Ayer por Aller, asina como Cabanaquinta por Cabañaquinta o Morea por Moreda. Nel so escritu el conceyal tranquiliza a los populares manifestando que “en nengún momentu se planteó esti cambiu, sinón tolo contrario, ya que’l mesmo secretariu de la Xunta Asesora, Don Ramón D´Andres, facilitó-yos un informe al respective’l pasáu mes de xunu. Nesi sen pa Fernández “ye absurdo salir a la prensa convirtiéndose en doctores de lexislación cuando esta información facilitóse dende la mesma Conseyería y el mesmu Ayuntamientu”. Ayer lleva paralizáu dende va meses el so espediente toponímicu y talo tecuerda nel so escritu’l conceyal, la COnseyería de Cultura, lleva d’abenayá tentando desbloquear la situación dando toa clase de facilidaes y aceptando un procedimientu escepcional al siguíu polos demás conceyos. 16 d'ochobre, 2005 0 FacebookTwitterPinterestEmail
Sociedá Areces asitia nel primer trimestre del 2006 l’empiezu de la reforma estatutaria by asturnet 13 d'ochobre, 2005 Vicente Álvarez Areces afirmó ayer en Cabranes que’l primer trimestre de 2006 va ser con toa probablilidá la data d’empiezu de los trámites pa entamar la reforma del Estatutu asturianu. El presidente del executivu autonómicu refuga la pretensión del PP d’aparcar la reforma hasta que s’aclarie’l destín del Estatut de Cataluña. Areces acudió a Cabranes pa inaugurar dellos equipamientos nuevos del conceyu, ente ellos la nueva casa consitorial. Ende, el presidente foi preguntáu polos informadores a propósitu de la pitición fecha pol dirixente popular Ovidio Sánchez pa qu’Asturies dexara pa prau la reforma del so Estatutu mientres se solventaba o non l’aprebación de la carta autonómica catalana. El presidente del Principáu fue claru: “Vamos abordar la reforma con absoluta prudencia, como quieren que se faga los ciudadanos asturianos”. Areces nun s’atrevió a poner fecha concreta pal empiezu del debate políticu y los posteriores trámites parlamentarios inda faló del primer trimestre de 2006, tres la puesta en marcha del Conseyu Consultivu, como l’escomienzu de la carrera dica’l nuevu Estatutu, un testu que podía tar tresnáu a finales de la lexislatura. 13 d'ochobre, 2005 0 FacebookTwitterPinterestEmail
Sociedá Izquierda Xunida-Bloque nun da por cerráu un alcuerdu col PSOE sobre los presupuestos autonómicos by asturnet 13 d'ochobre, 2005 La portavoz parlamentaria del grupu d’Izquierda Xunida-Bloque por Asturies, Noemí Martín recalcó nos pasiellos de la Xunta Xeneral la falta de concreción d’un alcuerdu ente la so formación y el PSOE sobre les cuentes autonómiques pal añu que vien. “Inda nun hai alcuerdu nin ta cerráu y son delles les discrepancies que caltenemos”, afirmó la diputada d’IX-BA, mientres el presidente autonómicu daba por seguru y robláu el proyectu presupuestariu del executivu. La coalición d’izquierdes va decidir nos prósimos díes si sofita y asume’l proyectu de les cuentes pal Principáu elaboráu polos sos socios de gobiernu, Hasta agora la principal discrepancia ente los dos socios taba na puesta o non d’una llende a les partíes destinaes al Salariu Social Básicu. Una vez escamplaes les diferencies sobre esti asuntu son otros los que faen duldar a Izquierda Xunida-Bloque a la hora d’asumir como propiu’l proyectu presupuestariu del PSOE. Vivienda, mediu ambiente, cultura, llingua y mocedá son temes sobre los que IX-BA caltién diferencies importantes colos socialistes. Pel so llau, el presidente Areces, amosóse optimista énte l’alcuerdu con Izquierda Xunida-Bloque y llegó a afirmar que se trataba ya d’un “asuntu cerráu”. El xete fel executivu declaró en Cabranes que “a nun ser detalles mínimos, el proyectu ta prácticamente rematáu y listu p’aprebase”. 13 d'ochobre, 2005 0 FacebookTwitterPinterestEmail
Sociedá La Xunta de Galicia fai una declaración institucional de sofitu a la candidatura galaico-portuguesa a la UNESCO by asturnet 13 d'ochobre, 2005 El gobiernu de la Xunta de Galicia firma una declaración institucional en sofitu de la candidatura del patrimoniu oral gallegu-portugués a Obra Maestra del Patrimoniu Oral Inmaterial de la Humanidá. L’executivu que preside’l socialista Touriño col apoyu del Bloque Nacionalista Galego (BNG) respalda asina oficialmente una iniciativa pendiente de resolver por un xuráu internacional de la UNESCO y qu’inclúi ente los territorios culturales de fala galaico-portuguesa delles fasteres d’Asturies. Na declaración de la Xunta de Galicia afírmase que “la cultura oral común galego-portuguesa conforma un ampliu abanicu de manifestaciones lliteraries, musicales y etnográfiques, enraigonaes na tradición y que perviven inda n’amplies zones del territoriu comprendíu ente’l Douro y el Cantábricu como expresiones d’una continuidá histórico-cultural que se remonta a más de 2.000 años” y considera que “esta comunidá cultural milenaria ta perdiendo vitalidá y munches manifestaciones que la constitúin tán en peligru de desaparición”. El pronunciamientu de la Xunta ye’l primeru que fai oficial el nuevu gobiernu de coalición PSdG-BNG a la candidatura que ya cuntó col respaldu del anterior executivu del PP, presidíu por Manuel Fraga. En medios prósimos a los promotores de la candidatura celebrábase esta declaración como un impulsu necesariu de les másimes instituciones gallegues nun momentu nel que la UNESCO ta a piques de decidir si concede la consideranza de Obra Maestra del Patrimoniu de la Humanidá a la cultura y la fala galaico-portuguesa. El testu de la candidatura preentada pola asociación cultural Ponte…nas Ondas inclúi dellos territorios pertenecientes a Asturies y nos últimos tiempos faise manifiestu’l rechazu qu’esta y otres iniciatives de promoción del idioma gallegu nel esterior tan provocando nos conceyos del Navia-Eo. Nos últimos díes diversos medios asturianos ficiéronse ecu del disgustu bultable qu’espresen alcaldes de la zona. Tamién l’Academia de la Llingua Asturiana fizo públicu’l so rechazu a les pretensiones de promocionar el gallegu en territoriu política y culturalmente asturianu y la organización nacionalista Andecha Astur presentó diverses iniciatives nos conceyos d’Entrambasaguas col fin de que solicitasen a la UNESCO la so esclusión de la candidatura promovida por Galicia y Portugal. 13 d'ochobre, 2005 0 FacebookTwitterPinterestEmail
Sociedá Política Llingüística y el Seminariu de Filoloxía Asturiana programen dos cursos de capacitación by asturnet 13 d'ochobre, 2005 La Conseyería de Cultura va presentar esti llunes dos cursos programaos pola Oficina de Política Llingüística en colaboración col Seminariu de Filoloxía Asturiana. Los ciclos formativos van entamar nes prósimes selmanes y van empobinaos a profesionales de la información y encuestadores orales, respectivamente. El cursu destináu a periodistes ye de nivel básicu de llingua asturiana y va impartise ente’l 25 d’ochobre y el 15 d’avientu. L’otru cursu va formar encuestadores de dialectoloxía, toponimia y cultura popular y ta programáu pa celebrase del 11 de payares al 17 d’avientu. 13 d'ochobre, 2005 0 FacebookTwitterPinterestEmail
Sociedá IX de Corvera entama un festival contra la política cultural del Ayuntamientu by asturnet 12 d'ochobre, 2005 L’agrupación local d’Izquierda Xunida de Corvera organiza un festival contra la política siguida pol equipu de gobiernu municipal del PP en materia de cultura y patrimoniu. La coalición d’izquierdes xúntase con esta iniciativa a les denuncies que dellos colectivos ciudadanos del conceyu corverán dirixen contra los responsables de xestionar la política cultural. El festival va entamase’l prósimu sábadu 15 d’ochobre a lo llargo de tol día con actuaciones teatrales, musicales, charles, debates y actividaes lliteraries. Cola convocatoria d’esta xornada de protesta IX de Corvera quier denunciar el retrocesu vivíu pola política cultural del conceyu dende la llegada al poder de la coalición USPC-PP. El festival “Contra’l xenocidiu cultural en Corvera” escomienza’l sábadu 15 a les 10.30 de la mañana con pasucais de gaiteros y remata a les 23.00 con un conciertu de K-Nalón y Dixebra, Contra’l xenocidiu cultural en Corvera 12 d'ochobre, 2005 0 FacebookTwitterPinterestEmail
Sociedá El Principáu presenta enmiendes sobre Muyer y Probeza nel Plenu européu de les Rexones by asturnet 12 d'ochobre, 2005 El director xeneral de Relaciones Esteriores y Asuntos Europeos del gobiernu asturianu, Darío Díaz va defender nel Plenu del Comité de les Rexones de la Unión Europea una serie d’enmiendes al Informe sobre Muyer y Probeza presentáu pol másimu organismu interrexonal comunitariu. Les enmiendes del Princopáu recaquen la necesidá de considerar el trabayu femenín de forma independiente y non como una fonte de recursos económicos complementaria a la unidä familiar;la consideración de la violencia de xéneru como una prioridá en caúna de les estratexes de Gobiernu de los diferentes Estaos Miembros, que rienen garantizar la puesta en marcha de planes globales y estratéxicos dotaos de los recursos adecuaos pa la so implementación. Al empar considérase que la errónea concepción de la conciliación de la vida familiar, personal y profesional como una problemática de calter esclusivamente femenín cuando “en realidá, afecta a las families nel so conxunto, tanto a padres y a madres, como a persones ensin fíos pero que tamién tienen la necesidá y el derechu a compaxinar la so vida privada cola profesional” y el fechu que na sociedá actual , los servicios d’ atención nun tienen centrase nos neños únicamente, sinón qu’abarca una realidá muncho más plural y una multiplicidá de situaciones complexes y diverses qu’esisten nes families, como son les persones mayores y aquélles que presenten una determinada discapacidÁ. El Plenu del Comité de les Rexones va tratar tamién na so sesión del Tercer Informe de Cohesión y los de política marítima europea, la llucha contra’l cambiu climáticu. 12 d'ochobre, 2005 0 FacebookTwitterPinterestEmail