Sociedá IAS acusa a IX-BA de “esconder la cabeza embaxo l’ala” poles ordenances de Xixón by asturnet 27 de marzu, 2005 El voceru d’Izquierda Asturiana (IAS) en Xixón Federico Yustas afirma nun comunicáu que l’Ayuntamientu d’esti conceyu “ta burlándose de la ciudadanía y de la Oficina de la Llingua al nun tramitar la ordenanza del asturianu”. Esta organización acusa a los socios de gobiernu del grupu socialista de “esconder la cabeza embaxo l’ala” énte la negativa de los representantes del PSOE na corporación a asumir y tramitar les ordenances sobro usu de la llingua asturiana n’Administración Municipal elaboraes pola Oficina y refrendaes pol so Conseyu Asesor La situación de bloquéu na que ta esti proyectu pa normalizar l’usu del asturianu nel Ayuntamientu xixonés dende que’l grupu municipal socialista, per boca de l’Alcaldesa, Paz Fernández Felgueroso, se negare a aprebar les ordenances, ye oxetu de dures crítiques por IAS. Pa esta organización nacionalista el fechu de que les principales discrepancies poles que’l PSOE nun ta dispuestu a aceptar el reglamentu, les referíes al derechu de los ciudadanos a dirixise y recibir contestación en llingua asturiana ye “d’una gravedá inusitada ya qu’esi derechu ta consagráu na Llei d’Usu y Promoción del Asturianu”. Según manifestó en feches recientes la conceyala d’Educación, Llingua y Cultura Asturiana, Carmen Rúa, d’IX-BA, l’Alcaldesa, Paz Fernández Felgueroso, tresmitiéra-y personalmente el so desalcuerdu colos artículos de les ordenances referíos a les comunicaciones ciudadanes cola adminstración municipal n’asturianu, dalgo que, la presidenta de la corporación y el so grupu consideren “una oficialidá de fechu”, dalgo polo que nun taríen dispuestos a pasar. Rúa manifestara a Asturnews el so disgustu por esta negativa de los sos socios de gobiernu que se facía “ensin siquier dexar la puerta abierta a una negociación”. La situación permanez estancada dende entós y nun parez haber visos de que se solvente bien lluego. IAS, per boca del so voceru Federico Yustas, esparde les sos acusaciones al grupu d’IX-BA de los qu’afirmen “tán xugando un papel llamentable amosando que tola vehemencia y capacidá de presión qu’amuesen n’otros temes vuélvese docilidá ya inacción cuando se trata de defender la cultura asturiana de los ataques del PSOE” y caltienen qu’énte esti asuntu “IX-BA escuende la cabeza embaxo l’ala”. Por último Izquierda Asturiana de Xixón nel so comunicáu desixe al Ayuntamientu que rectifique y “aprebe en Xixón unes ordenances que’l PSOE asume como propies en L.lena o n’Uviéu”. 27 de marzu, 2005 0 FacebookTwitterPinterestEmail
Sociedá Esther Prieto publica una gramática usal pa escribir n’asturianu ensin duldes by asturnet 23 de marzu, 2005 Esther Prieto acaba de publicar ‘Gramática d’asturianu’, un manual prácticu d’usu de la llingua que surdió de la necesidá d’ufiertar una ferramienta útil y de fácil manexu pa solventar les principales duldes colos que s’atopa l’asturfalante mediu a la hora d’escribir. L’autora d’esti trabayu declaró a Asturnews que “al pesar de l’espardimientu del usu del asturianu n’ámbitos como los medios de comunicación o la lliteratura, cométense abondos errores alcuando de fácil solución”. Esta gramática usual “tenta ayudar a solventar esos erros y duldes frecuentes”. Filóloga y escritora, Esther Prieto confiesa que’l trabayu recién publicáu nació más de la so esperiencia como correctora profesional nuna editora en llingua asturiana: “llevo tiempu afueyando y lleendo orixinales nos que ye habitual atopar soluciones bien estremaes en cada autor pa les mesmes coses, eso llevóme a pensar n’ofrecer un instrumentu al que se pudiera recurrir pa esos casos”. La gramática, publicada por Trabe -la editorial onde Prieto trabaya de traductora-, va destinada a tou tipu de falantes, inda “puede valir especialmente p’aquellos que desarrollen una actividá lliteraria o escriben nos medios de comunicación”, desplica Prieto. Pa l’autora del manual los erros más frecuentes suelen venir motivaos polos clichés gramaticales y ortográficos del castellanu: “tengo observao que munches veces repítense calcos del castellanu seguro que d’avezu de manera inconsciente o automática, pongo por casu n’acentuación del “tu” pronominal o en delles soluciones non acordies col usu asturianu”. Otros erros avezaos son los tocantes a l’apostrofación: “xeneralmente col artículu “la” qu’a veces apostrófase cuando nun ye artículu y ta en función de pronome”. La gramática usual d’Esther Prieto nun tenta competir con otres esistentes o la canónica de l’Academia de la Llingua: “quier ser un complementu prácticu d’esa obra de referencia imprescindible pero que nun ye de manexu fácil pa asturfalantes non habituaos al conocimientu filolóxicu”. Col oxetu de facilitar la so llectura por tou tipu de públicu el manual de Prieto ufierta numberosos exemplos prácticos y al final de cada capítulu un breve apartáu coles duldes más frecuentes. Ensin ser especialmente optimista respective al futuru de la llingua asturiana como idioma socialmente normalizáu Esther Prieto reconoz “que güei hai un espardimientu del usu de la llingua asturiana n’ámbitos cada vez más amplios y a midida qu’avance esi usu van necesitase ferramientes práctiques como la que pretende ser esta gramática”. Les midíes programaes pola administración autonómica en política llingüística “pueden ayudar a esa normalización del usu social”, afirma Esther Prieto pa quien el Plan de Normalización apocayá aprebáu pol gobiernu asturianu: “ye un avance destacable en cuantes a que marca oxetivos y cuantíes concretes, puede favorecer l’espardimientu del usu del asturianu na sociedá” y lo que l’autora de ‘Gramática d’asturianu’ considera más importante: “a quita-y fierro y desdramatizar un asuntu como’l de la normalización de la llingua”. 23 de marzu, 2005 0 FacebookTwitterPinterestEmail
Sociedá Cangas del Narcea dedica la IV Selmana Cultural a la so fundación como villa by asturnet 22 de marzu, 2005 La Conceyalía de Cultura del Ayuntamientu de Cangas del Narcea va dedicar la cuarta edición de la so Selmana Cultural a conmemorar el 750 aniversario de la fundación de la Puebla de Cangas pol rei Alfonso X el sabiu. Les xornaes van desenvolvese ente los díes 28 de marzu y 1 d’abril y inclúin conferencies sobro’l pasáu hestóricu del conceyu, música asturiana, teatru y actividaes pa escolinos. La conmemoranza de la promulgación de la Carta Puebla de Cangas va espardese al restu del añu con diversos actos y iniciatives programaes El Conceyu cangués quier dar a la remembranza de la so fundación nel añu 1255 el relieve suficiente como pa que los actuales vecinos de la vieya puela medieval seya a reconocer los sos oríxenes nesi pasáu. Pa ello quier aprovechar el marcu de la so selmana cultural como exe central de los primeros actos conmemorativos y la Conceyalía de Cultura tien diseñao un variáu programa d’actividaes. Les xornaes ábrense el prósimu llunes 28, a les 20.30 h, con una conferencia nel Auditoriu Municipal sobro la Carta Puela a cargu de la cadelarga d’Historia de la Universidá d’Uviéu, Josefa Sanz Fuentes. El martes 29, nel Teatru Toreno, a la mesma hora, la Coral Polifónica de Cangas del Narcea va ofrecer el so repertoriu de canción asturiana. Al día siguiente, nel Auditoriu Municipal, a las 20.30 h, l’escritor Julio Alvarez Rubio imparte una conferencia alrodiu de la llienda de L.leitariegos. El xueves, a la mesma hora y nel Teatru Toreno, va representase la obra “La vieja esencia del Teatro” de mano del grupu Teatro del Norte. Pa finar, el viernes 1, a les 20.30 horas, nel Auditoriu Municipal, los arqueólogos David Flórez de la Sierra y Alejandro Sierra falarán sobro Cangas nos sieglos medievales. Nun van ser les estes les úniques actividaes conmemoratives de la fundación de la puela y a lo llargo del añu van sucedese conferencies o talleres sobro temes d’ esa época, amueses de indumentaria y vestíos tradicionales, charres sobro cultura lliteraria, un conciertu de música medieval y un mercáu del medievu.Paralelamente, la Conceyalía de Cultura tien programao un rastréu nel que van poder participar neños y neñes con edaes acutaes ente los 9 y los 12 años pa que los escolinos identifiquen distintos sitios, edificios, o personaxes que pudieron esistir nel año 1.255 na villa al través de diverses pistes. También ta previstu un concursu de dibuxu pa escolinos con edaes acutaes ente los 3 a 9 años asina como pa los mayores de 16 años. El tema del certame ye “Cangas: Asina cambiamos a lo llargo del tiempu”. Tamién, nel mes d’abril va entamase una olimpiada escolar nel Teatru Toreno. 22 de marzu, 2005 0 FacebookTwitterPinterestEmail
Sociedá Valdés prepárase pa celebrar el centenariu del científicu y Premiu Nóbel Severo Ochoa by asturnet 22 de marzu, 2005 El conceyu de Valdés quier implicase nos actos de celebración del Añu Ochoa, dedicáu al centenariu del científicu y Premiu Nóbel asturianu. A lo llargo d’esti añu diverses instituciones, entidaes privaes y la Fundación Severo y Carmen Ochoa van desenvolver diverses actividaes pa recordar la figura y el legáu del sabiu. La coordinación de toles iniciatives va correr a cargu d’una Comisión estatal, empobinada pola ministra d’Educación y Ciencia, María Jesús Sansegundo y presidida pola Casa Real. El conceyu valdesanu, la Universidá d’Uviéu y el gobiernu del Principáu quieren contribuir cola so participación y el sofitu institucional a remembrar l’orixe asturianu del científicu nacíu en L.luarca en 1905. L’alcalde de Valdés Juan Fernández Pelleiro manifestó en declaraciones a distintos medios d’Asturies la intención del ayuntamientu que preside n’implicase na celebración del Añu Ochoa “col fin d’averar la figura del ilustre investigador a la sociedá y sobremanera a los más mozos”. Nesi sen, el conceyu natal del científicu, sumaráse a los actos programaos pola Comisión estatal xunto al restu de les instituciones estatales. Una de les iniciatives que Valdés quier agospiar ye la presencia en L.luarca de la esposición “El legado científico de los Ochoa” que circulará por varios llugares del estáu. A lo llargo de la prósima seronda múltiples actos van encargase de remembrar la figura del Premiu Nóbel asturianu, con diversos alcuentros y congresos científicos nos que van tener un papel destacáu nomes como los de l’asturiana Margarita Salas, Santiago Grisolía o Carlos López Otín. La participación asturiana nel centenariu preténdese que sea lo más amplia posible y amás de la implicación del gobiernu autonómicu y el conceyu natal d’Ochoa, otres entidaes públiques y privaes como Caxastur o la Universidá d’Uviéu van contribuir a la celebración. 22 de marzu, 2005 0 FacebookTwitterPinterestEmail
Sociedá L’Observatoriu emplaza al gobiernu a cumplir el Plan de Política Llingüística y tilda de frivolidá el so rechazu by asturnet 21 de marzu, 2005 Tal como adelantrara Asturnews en díes pasaos l’Observatoriu de Política Llingüística fai una llectura positiva del Plan de Normalización elaboráu pola Conseyería de Cultura. L’organismu independiente afirma nun comunicáu que les llinies d’actuación propuestes nel Plan suponen “un progresu modestu pero oxetivu respecto a la realidá precedente”, encamienta al gobiernu al so cumplimientu y califica de “frivolidá la postura facer como si nun esistiera y desentendese del impulsu en política llingüística que con él se pue llograr”. L’Observatoriu ye especialmente críticu colos sectores que refuguen por insuficiente el Plan de Política Llingüística y defenden como única vía l’algame de la oficialidá: “Dende va cuantayá, en dellos sectores del asturianismu ta implantáu un discursu quafita como oxetivu únicu y escluyentel reconocimientu del asturianu como llingua oficial. Esti discursu, consagráu acríticamente como ‘políticamente correctu’ dientru del asturianismu, quier presentar cualquier avance parcial nel tarrén de la normalización social como incompatible cola oficialidá futura”, afirmen los miembros d’esti organismu independiente nel so comunicáu. Pa l’Observatoriu: “ye hora de romper con esa inercia inmovilista y frustrante. Los pequeños progresos quagora se faigan dendel Gobiernu nun son regalaos, sinón frutu dabondu esfuerzu, de munchu trabayu en condiciones difíciles, y merecen una valoración positiva y non el refugu despectivu de los que defenden sinceramente la llingua”. Respective a la valoración xeneral del Plan de Normalización como un avance significativu l’Observatoriu considera qu’hai elementos oxetivos pa enfotase nél y que resume nes considerances de “que compromete al Gobiernu a executar midíes concretes, con plazos marcaos y asignaciones presupuestaries, nun ye barrera nenguna pa oportunidaes que se produzan nel futuru; no solo ye compatible con futuros avances, sinón que los posibilita” y por último el Plan “ye frutu dun consensu políticu que pue valir de base pa futuros consensos de mayor conteníu y meyor afitaos”. El grupu de trabayu formáu por diverses personalidaes del mundu de la cultura y el movimientu pola defensa de la llingua considera imprescindible la puesta e n marcha d’una serie de directrices “d’acción inmediata” y que pal Observatoriu seríen:”La oficialización de los topónimos autóctonos, entamando de mou inmediatu pelos espedientes toponímicos de Carreño, El Franco y Llanes, y siguiendo col restu de los conceyos colos que la Xunta de Toponimia vien trabayando; lapoyu decidíu a la política llingüística municipal entamada por dellos ayun-tamientos, y, más en concreto, a les oficines o servicios que dellos conceyos y mancomunidaes tán creando col apoyu de la Oficina de Política Llingüística; lusu efectivu y visible del asturianu, y del gallego-asturianu nel so ámbitu, na publicidá, comunicación y imaxe corporativa de los organismos del Prin-cipáu dAsturies, sin escaecer la publicación de testos oficiales y lusu nos eventos despecial relieve, comol Día dAsturies; lamparu efectivu al derechu a la enseñanza de la nuestra llingua, evitando los casos de discriminación y ameyorando les condiciones llaborales y peda-góxiques desa enseñanza;lusu efectivu y dignu de la llingua asturiana na futura televisión pública as-turiana, dende les primeres emisiones y con un calter claramente normaliza-dor.”. El comunicáu del Observatoriu apaez firmáu por Francisco Álvarez, Ramón Lluis Bande, Xuan Bello, Adolfo Camilo Dí-az, Xandru Fernández, Manuel Fernández de la Cera, Cesáreo García, Ismael González Arias, Vanessa Gutiérrez, Francisco J. Llera Ramo, Taresa Lorences, Pedro Alberto Marcos, Noemí Martín, Gonzalo Olmos, Berta Piñán, Xuan Santori Vázquez José Uría Ríos ya Ignasi Vila Mendiburu. 21 de marzu, 2005 0 FacebookTwitterPinterestEmail
Sociedá El PP afirma que’l diálogu col CAO nun esclúi la so atención a grupos contrarios a la oficialidá by asturnet 18 de marzu, 2005 El diputáu Joaquín Aréstegui considera positivu l’alcuentru calteníu esta selmana con representantes del Conceyu Abiertu pola Oficialidá ensin que por ello “tamién tengamos interés n’escuchar les opiniones d’otros grupos, incluíos los que tienen planteamientos radicalmente distintos y nos qu’hai persones con un pesu intelectual del que nun se puede duldar”. El parlamentariu popular, sicasí, afirma que’l so partíu apuesta pola “potenciación de la llingua asturiana y del restu de les nuestres señes d’identidá” y que nun-y gustaría que “dalguién acusare alcuando al Partíu Popular de ser el responsable de la desaparición d’una d’eses señes d’identidá”. Respective a la oficialidá, pa Aréstegui, “nun ye una demanda social bultable y lo qu’amuesen les encuestes ye que los asturianos estimen la so llingua y quieren midíes de protección, pero la posición alrodiu la voluntariedá ye la mayoritaria, nun quieren imposiciones”. El diputáu popular considera positivu l’alcuentru calteníu col Conceyu Abiertu pola Oficialidá “porque nesti como en cualquier otru tema toos podemos aportar munches coses y nos nun refugamos nengún debate, incluíu el de la oficialidá, lo que nun quier dicir qu’agora mesmo creamos que la sociedá la demande, los datos de les encuestes reflexen l’enfotu por mantenese dientro la voluntariedá de les midíes pa potenciar la llingua, tal como afita la Llei d’Usu, una llei qu’aprebó, quiero recordar, un gobiernu del Partíu Popular”. Esa posición que los populares comparten col PSOE reflexa a xuiciu d’Aréstegui: “la posición de dos partíos que representen al 90 por cientu de la sociedá y nós tampoco díbamos entender que’l Partíu Socialista nun contara col Partíu Popular a la hora de tratar un tema como esti”. Joaquín Aréstegui considera que l’asturianu “ye una seña d’identidá que los asturianos valoren ente les más queríes” y que tien de protexese “acordies col marcu llegal de la Llei d’Usu y de la Carta Europea de les Llingües” inda nun considera “comparable la situación d’Asturies cola d’otres comunidaes con llingua propia como Baleares, Valencia, Galicia, Cataluña…caduna d’elles tamién distinta”. Preguntáu énte la situación na que diba quedar l’asturianu si, como s’espera, dientro les reformes de los estatutos Aragón recueye nel suyu la cooficialidá d’aragonés y catalán col castellanu Aréstegui declara que “n’Aragón fálense tres llingües, castellanu, catalán nuna franxa y nuna fastera mui pequeña, aragonés,y tampoco ellí ta cerrada esa cuestión énte la reforma del estatutu, referente a Asturies inda nun s’entamó´’l debate de la posible reforma nin tenemos noticies del PSOE al respective, la nuestra posición en cualquier casu ye la de caltener l’actual marcu llegal pal asturianu ensin cerranos a nengún debate con naide”. Respective a la política llingüística desenvuelta pol gobiernu del PSOE y Izquierda Xunida-Bloque por Asturies, Aréstegui tachóla “d’ambigua y insuficiente”, de la que sería un reflexu el Plan de Normalización: “el documentu recibímoslu ayer y vamos estudialu la prósima selmana, nuna primer llectura, sicasí, da la impresión de tar enllenu vaguedaes y ambigüedaes, nun paez mui distintu de lo que se facía hasta agora”. Nesa primer impresión, previa a la valoración política que va facer el so grupu una vez estudiáu el documentu, Aréstegui sí consideró “positivo el que tome como referencia la Llei d’Usu”. Joaquín Aréstegui adelantró qu’en prósimes feches el grupu popular va mantener alcuentros con instituciones como l’Academia de la Llingua y con “otros grupos, ente ellos los que tienen planteamientos radicalmente distintos y nos qu’hai persones d’un pesu y una calidá intelectual de les que nun se puede dudar, y que polo tanto, merecen ser tamién escuchaos”, dixo n’alusión a Amigos de los bables. Pal representante del PP trataríase de “desdramatizar un asuntu que nunca representó un problema grave nin un conflictu n’Asturies y que nun tien por qué representalo nun futuru”. 18 de marzu, 2005 0 FacebookTwitterPinterestEmail
Sociedá Un terciu de los conceyos d’Asturies entamó los trámites pa revisar la so toponimia by asturnet 17 de marzu, 2005 La recuperación de la toponimia asturiana, una de les aspiraciones hestóriques del movimientu pola revitalización de la llingua, ye una realidá cada vez más cerca de cumplise. Venticuatro conceyos, un terciu de los que formen Asturies, solicitaron ya oficialmente l’iniciu de los trámites pa que los nomes de los sos llugares vuelvan a recobrar la so forma tradicional depués de décades de castellanización. Los últimos en sumase a esta llista, los dos conceyos con más población, Uviéu y Xixón. Los primeros que van ver oficializaos los sos topónimos Llanes, Carreño y El Franco. Pocos meses después d’entamar los sos llabores la Xunta de Toponimia del Principáu tien visto llegar a la so mesa de trabayu les solicitúes de revisión de nomes de llugar de la mitá de los conceyos asturianos. Los más madrugadores a la hora de pidir la igua de la so toponimia: Carreño, Llanes y El Franco tienen ya cerráu el so espediente y preparáu pa que’l Conseyu de Gobiernu del Principáu-yos dea’l vistu bonu pa facelos oficiales. Según informaron a Asturnews fontes de la Conseyería de Cultura la oficialiación de la toponimia tradicional d’estos tres conceyos ye inminente y podía ser aprebada pel executivu autonómicu en feches mui prósimes. En puerta pa rematar el so espediente toponímicu ta L.Lena, al que van siguir darréu los conceyos de Gozón, Ayer y Llangréu. Los últimos en xubise al carru de los ayuntamientos que piden una revisión de los sos nomes de llugar fueron Uviéu, que lo solicitó formalmenta va unos díes y Xixón, onde se celebró ya la primer reunión ente’l Conceyu y la Xunta de Toponimia. 17 de marzu, 2005 0 FacebookTwitterPinterestEmail
Sociedá El Conceyu pola Oficialidá nota un cambiu d’actitú positivu nel PSOE y el PP tres reunise colos sos grupos parlamentarios by asturnet 16 de marzu, 2005 La principal conclusión que’l Conceyu Abiertu pola Oficialidá saca del alcuentru teníu ayer con representantes de los grupos parlamentarios del PSOE y el PP ye qu’anguaño en nengún de los dos partios paez esistir “una posición cerrada” tocante a la reconocencia oficial del asturianu y que nun descarten asumir esta demanda social nun futuru, inda nun consideren que’l momentu pa facelo seya’l de la prósima reforma estatutaria. Nel alcuentru del Conceyu Abiertu col otru grupu presente na Xunta Xeneral, Izquierda Xunida-Bloque, la plataforma ciudadana interesóse pola postura que va defender na discusión de la reforma la coalición y si va ser la mesma que caltién como organización integrada nel propiu CAO. En declaraciones a Asturnews, Fernando Ornosa, ún de los participantes nel alcuentru colos grupos parlamentarios, reconoció haber “percibio per primer vez que’l PSOE nun mantién una posición cerrada respective a la oficialida nin se niega a falar d’ella”, una actitú positiva que se detectó tamién nel alcuentru col Partíu Popular qu’a xuiciu del representante del CAO: “nun momentu dau podía tomar una decisión” favorable a la oficialidá inda “güei estean duldosos”. Nel cursu d’estos alcuentros, tanto’l representante del grupu socialista, el diputáu José Luis Montes, como’l parlamentariu popular Joaquin Aréstegui, amosaron una “actitú receptiva” énte les esmoliciones manifestaes pol Conceyu. Montes admitió qu’ente los miembros del CAO el que cada vez hai más militantes socialistes partidarios de reconocer los derechos llingüísticos asturianos y nun refugo la posibilidá de que nun futuru a mediu plazu el so partíu asuma la oficialidá, inda aclaró que pa ello había aprebase primero como alcuerdu nun congresu de la FSA. Como resultáu d’estos alcuentros colos grupos parlamentarios el Conceyu Abiertu pola Oficialidá tien llograo’l compromisu de los representantes del PSOE y del PP de facilitar entrambes entrevistes coles direcciones d’esos partíos n’Asturies pa que la plataforma unitaria espunxera a los másimos responsables políticos de los partíos mayoritarios la necesidá de solventar el problema llingüísticu con un alcuerdu de mínimos ente fuerces polítiques y sociales alrodiu de la reconocencia oficial del asturianu. Tanto el PSOE como’l Partíu Popular accedieron a que se produzan estes reuniones cola dirección n’Asturies de los sos partíos. L’alcuentru col grupu d’Izquierda Xunida-Bloque, los miembros de la delegación del CAO, llograron tamién el compromisu de la diputada Noemí Martín de concertar una reunión ente’l Conceyu Abiertu y la dirección d’Izquierda Xunida d’Asturies na que la coalición que dirixe Jesús Iglesias aclarase cuála va ser la so postura estratéxica na discusión de la reforma l’Estatutu. Según manifestó el representante del CAO, Fernando Ornosa, bona parte de l’argumentación cola que treslladaron a los grupos de la Xunta Xeneral les demandes de la plataforma cívica basóse na situación “única na que va quedar la llingua asturiana cuando s’apreben les reformes estatutaries pendientes y cuando, Aragón, por exemplu, la otra comunidá que nun tenía reconocida la oficialidá de les llingües que se falen nella, l’aprebe col consensu de tolos partíos políticos d’esa comunidá”. Esta situación, pa Ornosa, non namás va dexar Asturies como una escepción nel mapa autonómicu del estáu “sinón que va suponer importantes perxuicios de toa clase, mesmamente económicos” pal nuestru país,si tenemos en cuenta que munchos posibles recursos que se podíen consiguir dependen de la reconocencia oficial del asturianu” afirma’l miembru del CAO, que treslladó esti esmolecimientu a los parlamentarios de los tres grupos de la Xunta Xeneral. Amás d’estos contactos y de la vía abierta de diálogu colos partíos con representación nel parlamentu autonómicu, el Conceyu Abiertu pola Oficialidá nun descarta nueves movilizaciones como la vivida el 11 de marzu n’Uviéu. Pal CAO “la ocasión pa la oficialidá ye agora, na prósima reforma del estatutu, más alantre diba ser difícil algamalo y nós vamos encarrilar el nuestru llabor a que se llegue a consiguir”. 16 de marzu, 2005 0 FacebookTwitterPinterestEmail
Sociedá Cultura desixirá criterios normalizadores pa les subvenciones by asturnet 16 de marzu, 2005 La Conseyería de Cultura desixirá a los particulares, empreses y instituciones candidates a recibir dalguna de les subvenciones destinaes a la promoción del asturianu y del gallegu asturianu el que nos proyectos presentaos vengan detallaos con rigor y claridá los criterios normalizadores que se persigue en cada casu. Esti procuru por valorar l’interés y utilidá de los proyectos nel ámbitu de la normalización social y l’aumentu de la dotación asignada, la más importante en cuantía hasta la fecha, son les principales novedaes que presenten les ayudes de Cultura pa 2005. El responsable de la Oficina de Política Llingüísitica del Principáu, Ramón d’Andrés Día, presentó les diez llinies d’ayudes y beques que la Conseyería de Cultura tien convocao esti añu pa sofitar proyectos destinaos a la normalización social del asturianu y del gallegu asturianu. Un total de 1.830.395 euros ye la cantidá asignada pal conxuntu d’estes subvenciones, la más importante de les presupuestaes hasta agora por parte de l’administración autonómica. Na presentación de les beques, el responsable de Política Llingüística, resaltó “l’aumentu qu’esperimenten toles llinies d’ayudes, en dellos casos especialmente significativu, como ye’l casu de les subvenciones destinaes a medios de comunicación, un 21,5 por cientu y a los conceyos con iniciatives normalizadores, d’un 108,6 por cientu”.En xunto l’aumentu de la cuantía empobinada a subvenciones ye d’un 56 por cientu respective al añu pasáu. La importancia de la dotación asignada pa les diez llinies de subvenciones ye la novedá más resaltable en cuantes a convocatories anteriores. Al llau del aumentu presupuestariu, Ramón d’Andrés, quiso destacar el que va ser el criteriu fundamental a la hora de valorar los proyectos presentaos: “vamos desixir que los proyectos candidatos a recibir ayudes tengan claramente detalláu y con rigor el so interés pa la normalización social de la llingua asturiana y nel so casu del gallegu-asturianu”. Quedarán asina escluíos de la posibilidá d’acceder a estes ayudes proyectos nos que l’usu de la llingua o les actividaes programaes nun se correspuendan con intenciones normalizadores. Otres novedaes qu’ufierta la convocatoria pa 2005 ye la creación d’una ayuda específica pa la creación lliteraria empobinada directamente a los autores y la supresión de la subvención pa traducir obres orixinales n’asturianu a otres llingües, esta última motivada, según desplicó d’Andrés: “pola escasa acoyida que tenía en cuantes a proyectos presentaos y a la so poca efectividá real”. Les ayudes tan enfocaes pa sofitar económicamente proyectos de particulares, empreses privaes o instituciones, en tolos ámbitos del desenvolvimientu social de la llingua asturiana y del gallegu asturianu: edición y producción cultural, creación lliteraria y artística, medios de comunicación y instituciones d’ámbitu local, como los conceyos y la rede de servicios de normalización. Ente les ayudes a la edición, destaca la dedicada específicamente a la presentación de proyectos de testos d’enseñanza de l’asignatura de llingua y lliteratura asturiana pa 2º y 4º de la ESO. No tocante a los conceyos, Ramón d’Andrés, quiso destacar que se trata del aumentu más curiosu de toles llinies de subvención: un 108,6 por cientu más que l’añu anterior y que va dedicase a caltener la rede ya esistente de servicios y oficines de normalización, asina como pa poner en funcionamientu los servicios qu’inda nun tan abiertos. 16 de marzu, 2005 0 FacebookTwitterPinterestEmail
Sociedá Uviéu pide oficialmente la normalización de la so toponimia by asturnet 11 de marzu, 2005 La Oficina de Política Llingüística de la Conseyería de Cultura recibió esti viernes 11 la solicitù formal del Ayuntamientu d’Uviéu pa que s’inicie l’espediente de revisión de la so toponimia. El conceyu qu’agospia la capital administrativa d’Asturies conviértese asina nel primeru de la so importancia en sumase a la cada vez más amplia lista d’ayuntamientos que ponen en manes de la Xunta toponímica la correción de los sos nomes de llugar. Uviéu, el conceyu más importante que gobierna’l Partíu Popular, ye dende esti viernes 11 ún más de los que quieren ver iguaos los sos topónimos. Asina lo anunció la Oficina de Política Llingüística el mesmu día nel que se recibió nel rexistru de la Conseyería de Cultura la solicitú del consistoriu carbayón pa entamar l’espediente toponómicu del conceyu. Una vez recibía la solicitú del Ayuntamientu que preside Gabino de Lorenzo la Xunta de Toponimia entamará l’espediente de revisión de los nomes de llugar d’Uviéu col fin de satisfaer la pitición del conceyu y una vez concluíu el so llabor unviará l’espediente resueltu al Conseyu de Gobiernu del Principáu pa la aprebación y oficialización de les denominaciones igüaes. 11 de marzu, 2005 0 FacebookTwitterPinterestEmail