Sociedá Asturnews da nome al periódicu ‘oficial’ del Simulador Políticu del País Astur by asturnet 9 de xineru, 2006 Un grupu d’estudiantes de Ciencies Polítiques son los autores y principales participantes del primer Simulador Políticu del País Astur, un xuegu nel que caún de los intervinientes asemeya militar en partíos nacionalistes d’Asturies, Lleón, Extremadura o Miranda do Douro y nel que les noticies dales un diariu que lleva’l nome d’Asturnews. El desenvolvimientu del simulador sofítase na idea de que cada xugador entame como militante de partíos como URAS, AA, IAS o la UPL, y afronten darréu, elleción tres elleción, el retu de construir un país astur prósperu. El xuegu inclúi la redacción d’una constitución, de lleis, de decretos, etc. El planteamientu inicial del SPPAS escomienza en xineru de 2006: tres un gobiernu provisional Asturlleonés de 4 meses del Presidente Vega, Estremadura y Miranda do Douro, deciden xunise al nuevu País Astur. Agora, falten pocos díes pa les elleciones y pa que los 2.5 millones d’ástures escoyamos el nuesu Conceyu Constituyente. D’esi momentu en delantre los xugadores habrán decidir lo que suceda nel imaxinariu País Astur. Simulador Políticu del País Astur 9 de xineru, 2006 0 FacebookTwitterPinterestEmail
Sociedá El Gobiernu del Principáu espera’l dictame del Conseyu Consultivu pa escomenzar la reforma estatutaria by asturnet 5 de xineru, 2006 El presidente del Principáu Vicente Álvarez Areces anunció la intención del so gobiernu de pidir el dictame del Conseyu Consultivu sobre la reforma del Estatutu esti mesmu mes. Si a la fin l’executivu aprebara esta solicitú, l’organismu asesor podía tener fechu l’informe pa la primavera, alrodiu’l mes d’abril, según aseguró’l presidente del Conseyu, Bernardo Fernández. El camín pa entamar la reforma inda nun dio nengún pasu alantre pero podía escomenzar a dalos si se cumple el deséu espresáu a diversos medios pol presidente Areces de solicitar esti mesmu mes el dictame correspondiente al Conseyu Consultivu. Los socios de gobiernu de la coalición Izquierda Xunida-Bloque por Asturies consideren sicasí que’l xefe del executivu nin el propiu PSOE nun tan pol llabor d’escomenzar la reforma y asina lo amosó’l diputáu Aurelio Martín pal que los socialistes “apuesten pola vía lenta” énte’l nuevu Estatutu. El presidente del Partido Popular d’Asturies, Ovidio Sánchez, manifestó estos díes en declaraciones a los principales medios de la comunidá que la so formación nun va xuntase a negociar la reforma estatutaria “mientres nun se solvente n’España’l problema nacionalista”, afirmó. La negativa del PP a participar nel debate sobre’l nuevu Estatutu de reafirmase diba impidir -pola cuantía numérica de los populares na Xunta Xeneral- cualaquier posible intentu d’entamar la reforma al igual que tán faciendo otres comunidaes autónomes. 5 de xineru, 2006 0 FacebookTwitterPinterestEmail
Sociedá Corvera súmase a los conceyos en solicitar la so revisión toponímica by asturnet 5 de xineru, 2006 El conceyu de Corvera va sumase a los cásique cuarenta ayuntamientos d’Asturies que tán inxertos en trámites de solicitar la revisión de la so toponimia. El prósimu viernes 13 de xineru representantes del equipu de gobiernu municipal van caltener una xornada de trabayu cola Xunta Asesora de Toponimia del Principáu pa escomenzar la elaboración del nomenclátor iguáu del conceyu. El responsable de la Oficina de Política Llingüística de la Conseyería de Cultura, Ramón d’Andrés, caltuvo apocayá entrambes reuniones con representantes del Ayuntamientu corverán pa entamar l’apertura del espediente toponímicu del municipiu. Na reunión del prósimu 13 de xineru los trámites pa la igua de los nomes de llugar de Corvera va dar un nuevu pasu que habrá de siguir el so cursu d’esi momentu pa en delantre como ya ficieran ya más de la mitá de los conceyos asturianos. 5 de xineru, 2006 0 FacebookTwitterPinterestEmail
Sociedá L’Academia de la Llingua convoca la so preba de conocencia de xineru by asturnet 4 de xineru, 2006 L’Academia de la Llingua Asturiana convoca la so Preba de Conocencia semestral correspondiente a xineru y que va celebrase’l prósimu día 28 d’esti mes. L’esame de capacitación ta abiertu a toles persones interesaes n’algamar el certificáu de conocencia y el plazu de matrícula ye del 16 al 26 de xineru. A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución. Les persones que nun superen les pruebes del nivel 1 podrán presentase a nueves convocatories toles vegaes que-yos pruya. Pal bon resultáu d’estes pruebes habrá tenese un dominiu básicu de les estayes Llingüística: na que s’asitien les materies de teoría gramatical: conocencia y dominiu del funcionamientu gramatical del asturianu y de la normativa académica; práutica escrita: emplegu amañosu de la llingua, puestu en práutica gracies a exercicios gramaticales y de composición escrita; práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador. Na otra estaya de Llingua y Sociedá recuéyense la Conocencia del allugamientu de la llingua dientro de la sociedá asturiana asina como del procesu de normalización en que ta inxerta. La prueba va tener dos partes, una escrita (dictáu, torna, exercicios gramaticales, redaición) y otra falada (conversación) y talo encamienta l’Academia, ye imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2005, 6ª ed.; Gramática de la Llingua Asturiana, ALLA, Uviéu, 2001, 3ª ed.). Asina mesmo, la institución llingüística aconseya la llectura de testos fechos acordies cola normativa, como los asoleyaos por esta Academia. Les inscripciones han facese dende’l 16 de xineru na sé de l’Academia de la Llingua en c/Marqués de Santa Cruz, 6 – 2u y el teléfonu d’información ye’l 985 21 18 37. Más información 4 de xineru, 2006 0 FacebookTwitterPinterestEmail
Sociedá Sergio Marqués anuncia que sigue como cabezaleru de la coalición URAS-PAS by asturnet 30 d'avientu, 2005 El presidente d’Unión Renovadora Asturiana (URAS) Sergio Marqués remaneció esti xueves 29 nuna rueda de prensa p’agradecer los apoyos recibíos mientres la so recién hospitalización y aprovechó pa reivindicar l’espaciu del asturianismu moderáu nuna situación política que l’ex presidente del Principáu criticó arispiamente. Marqués compareció énte los medios acompañáu del cabezaleru del PAS Xuan Xosé Sánchez Vicente y tres agradecer les amueses de solidaridá polos sos recientes problemes de salú afirmó que l’actual gobiernu asturianu del PSOE-IX-BA ta llevando a la nuestra comunidá a una situación que calificó de “perdifícil”. El so compañeru de coalición, Sánchez Vicente, sumóse a les crítiques pola situación política asturiana y entrambos coincidieron n’afirmar que la reforma del Estatutu “nun va ser nesta lexislatura, sinón más alló del 2007”. Na rueda de prensa el líder de la coalición URAS-PAS anunció la so intención de siguir encabezando esti proyectu electoral y de continuar el so llabor na política una vez superaos los problemes que lu llevaron apocayá a una repentina hospitalización. 30 d'avientu, 2005 0 FacebookTwitterPinterestEmail
Sociedá El conceyu de Muros pide la oficialidá del asturiano y del gallego-asturiano by asturnet 30 d'avientu, 2005 El plenu del Ayuntamientu de Muros, gobernáu pol PSOE, pidió esti xueves 29 cola unanimidá de tolos grupos la oficialidá pa la llingua asturiana y pal gallego-asturiano como solución pa refugar les contines intromisiones nel occidente del Principáu d’entidaes culturales y polítiques de Galicia. El grupu independiete Cambio Siglo XXI ye l’autor de la moción aprebada. Los cuatro conceyales socialistes, xunto a los tres ediles independientes y l’únicu representante del PP nel conceyu aprobaron una declaración na que se refuga cualquier intromisión fecha dende Galicia nel occidente d’Asturies tocante sobretoo a la realidá llingüística y reafirma l’asturianidá de tolos conceyos anguaño axuntaos nes llendes de la comunidá del Principáu. La segunda parte de la moción encamienta al gobiernu autonómicu a declarar la oficialidá de la llingua asturiana y del gallego-asturiano como manera de frenar los continos espolines con sectores de la comunidá vecina empeñaos n’inmiscuise na realidá llingüística de la Tierra Navia-Eo. L’alcaldesa socialista de Muros desplicó a los medios que de nun producise l’espolín con Galicia nun sofitara nin ella nin el so grupu una moción nos términos de la presentada polos conceyales independientes de Cambio Siglo XXI. Los autores de la moción acompañaron el documentu del informe publicáu apocayá pol xurista y profesor de derechu administrativu José Manuel Pérez sobre la reconocencia de la oficialidá de la llingua asturiana y d’un escritu -fuera de la moción- nel que s’encamentaba a desenvolver diverses iniciatives de normalización nel conceyu del Nalón. 30 d'avientu, 2005 0 FacebookTwitterPinterestEmail
Sociedá La Xunta Xeneral apreba unos presupuestos marcaos pol gastu social by asturnet 29 d'avientu, 2005 La Xunta Xeneral aprebó esti miércoles 28 col soifu de los grupos socialista y d’Izquierda Xunida-Bloque por Asturies los presupuestos autonómicos pal añu 2006. PSOE ya IX-BA refugaron toles enmiendes presentaes pol PP y coincidieron en señalar el calter social de les cuentes asturianes nel últimu exerciciu enantes de sufrir los efectos de la converxencia europea. Los terceros presupuestos del gobiernu de coalición PSOE-Izquierda Xunida-Bloque por Asturies ascienden a 3.609.356.446 euros, de los que 2.354 millones de euros (el 65% del total) empobínense a gastu social. Nel desglose de partíes resalten los 1.260 millones destinaos a Sanidá. Les 118 enmiendes presentaes pol grupu Popular a les cuentes autonómiques y a la llei d’ameyoramientu de los presupuestos refugáronse nel últimu exerciciu que van tener el mayor respaldu financieru de la Unión Europea, con 2.688 apurríos polos fondos comunitarios, alrodiu del 74% del presupuestu total. 29 d'avientu, 2005 0 FacebookTwitterPinterestEmail
Sociedá El conceyu l.lacianiegu de Palacios del Sil decide incorporase al Bierzu by asturnet 28 d'avientu, 2005 L’alcalde socialista de Palacios del Sil, Orlando López, anunció va unos díes la intención del so conceyu de decidir nel últimu plenu municipal del añu la so incorporación a la comarca del Bierzu, la única reconocida de Lleón. L’admisión del conceyu l.lacianiegu na organización supramunicipal ta prevista nos primeros meses del 2006. L’alcalde de Palacios declaró a diversos medios en díes pasaos que la incorporación del so conceyu a la comarca berciana va ufierta-y la posibilidá d’acceder a servicios de los qu’hasta agora nun disponía, sobremanera en materia medioambiental, forestal, de llimpieza, depuradores, etc. Cola incorporación de Palacios de Sil, perteneciente a la comarca tradicional -y non reconocida- de L.laciana, el Bierzu gana pa la so comarca el conceyu númberu 38. Palacios de Sil ye un de los conceyos inxeríos nel dominiu llingüísticu del astur-lleonés y ye’l llugar natal d’escritores na nuestra llingua como l’académicu Roberto González-Quedevo y la so madre, la poetisa Eva González. 28 d'avientu, 2005 0 FacebookTwitterPinterestEmail
Sociedá Areces califica de fuerza minoritaria al BNG y diz que los sos planteamientos nun tienen nenguna base n’Asturies by asturnet 28 d'avientu, 2005 El presidente del gobiernu asturianu Vicente Álvarez Areces afirmó esti martes 27 n’Uviéu que los planteamientos del Bloque Nacionalista Galego nel so proyectu de nuevu estatutu pa Galicia “son los d’una fuerza minoritaria” na comunidá vecina y que n’Asturies “de nengunamiente van prosperar”. Areces fexo estes declaraciones nel cursu d’una entrevista fecha esti martes 27 en Radio Nacional de España n’Asturies na que repasó dalgunos de los asuntos pendientes de la vida política del Principáu. Respective al recién espolín motiváu pol proyectu de nuevu estatutu gallegu del BNG y la so propuesta d’ufiertar la posible anexón a la comunidá vecina de conceyos d’otres comunidaes, el presidente autonómicu asturianu calificó estos planteamientos de “perfectamente respetables, inda non compartíos” y propios “d’una fuerza minoritaria en Galicia”, de los que dixo: “de nengunamiente van prosperar n’Asturies porque amás, necesitaríen un recorríu lexislativu perampliu” y sobremanera: “porque nun tienen nenguna base real n’Asturies: nin la ciudadanía lo comparte nin son elementos constructivos”. El presidente del Principáu anunció un cume astur-galaicu pal prósimu mes de xineru. 28 d'avientu, 2005 0 FacebookTwitterPinterestEmail
Sociedá Colectivos en defensa del asturiano convoquen una protesta pa les Campanaes de Telecinco n’Uviéu by asturnet 27 d'avientu, 2005 Diverses convocatories feches al través de SMS y corréu electrónicu circulen perende llamando a manifestase na nueche del prósimu 31 d’avientu na Plaza l’Ayuntamientu d’Uviéu, el sitiu escoyíu pola cadena estatal Telecinco pa retrasmitir les campanaes de fin d’añu. La emisión en directu de los doce toques del reló de la Casa Conceyu carbayona y del conciertu de Melendi que va siguir darréu na cadena xeneralista del grupu Vocento quier aprovechase pa que se faga oyer la reivindicación en defensa de la llingua asturiana y del so reconocimientu oficial. La noticia recuéyenla esti martes dellos medios, ente ellos la edición uvieína del diariu El Comercio. La convocatoria, siguiendo’l procedimientu del “pasáilo”, llama a acudir a la Plaza l’Ayuntamientu alrodiu de les 23.30 con pancartes, cartelos y enseñes reivindicatives. 27 d'avientu, 2005 0 FacebookTwitterPinterestEmail