Sociedá Jesús Iglesias afirma que la oficialidá ye la última batalla pa la llingua asturiana by asturnet 26 d'avientu, 2005 El coordinador xeneral d’Izquierda Xunida, Jesús Iglesias afirma que la oficialidá “ye la última batalla pal asturianu y paga la pena pelear”. Pal responsable de la coalición d’izquierdes la reforma del estatutu ye la ocasión onde se espeya esta última oportunidá pa la llingua asturiana y el nun facelo, al so xuiciu, diba suponer “qu’en mui poco tiempu vamos tar falando d’una llingua muerta”. Iglesias fizo estes declaraciones nuna entrevista que publica la edición d’esti martes 26 del diariu La Nueva España. Na entrevista tamién se refier a la propuesta llanzada por IX pa entamar el debate sobre la reforma estatutaria n’Asturies. El coordinador de la coalición anuncia qu’a partir de xineru van escomenzar a recoyer opiniones de los distintos axentes sociales sobre esti debate. Tocante a la oficialidá de la llingua asturiana, Jesús Iglesias atribúi les rocees del PSOE a “prexuicios y pantasmes” y caltién qu’anguañu hai un clima más afayadizu pa sentar a discutir de la reconocencia llegal del nuestru idioma: “nos últimos tiempos, el debate serenóse y mesmo se dieron pasos na Xunta (Xeneral) pa despolitizalo, por eso veo más esperances de que sea posible afrontalo de manera racional”, diz el coordinador d’IX, pal que nun hai que poner llendes al debate y, según afirma: “los plazos y el mou de la oficialidá pueden discutise”. 26 d'avientu, 2005 0 FacebookTwitterPinterestEmail
Sociedá Francisco Llera afirma que Navia-Eo ta tan abandonao en materia llingüístico como’l restu d’Asturies by asturnet 22 d'avientu, 2005 El sociólogu y caderalgu de la Universidá del País Vascu Francisco Llera Ramo afirma que dende un puntu de vista llingüísticu los ciudadanos de la tierra Navia-Eo “tán tan abandonaos o más que los del restu d’Asturies”. En declaraciones al diariu El Comercio Llera califica de “neurosis obsesiva que la xente nun tien” la rocea de los socialistes asturianos a la oficialidá. Pal autor de los principales estudios sociollingüísticos fechos na nuestra comunidá la polémica sobre la tentación colonizadora del nacionalismu gallegu “ye más un problema asturianu que de Galicia”, ya qu’al so xuiciu “el problema qu’hai n’Asturies exemplifica l’asimetría d’una zona onde la llingua tá normalizada y ye oficial y otra onde la llingua malpenes tien medios pa sobrevivir”. Nes sos declaraciones, Llera Ramo, militante del PSE-PSOE, diz nun entender les razones poles que los sos compañeros de partíu asturianos nun acepten la oficialidá: “sorpréndeme que’l PSOE sea el que menos ta pol llabor, nun entiendo que mieu tien, amuesen una neurosis obsesiva que nun tien la xente de la cai. Respective a los datos algamaos nos sos estudios de la opinión ciudadana sobre la cuestión llingüística y la posibilidá de reconocer oficialmente l’idioma nel estatutu, el sociólogu observa que “nun hai comunidá que declarara la cooficialidá y dispunxera d’una información sociolóxica tan importante” como l’asturiana, lo que pal profesor caravianu de la Universidá del País Vascu amuesa “que ye más una cuestión de voluntá y sentíu común qu’otra cosa”. 22 d'avientu, 2005 0 FacebookTwitterPinterestEmail
Sociedá Bloque por Asturies pide-y al BNG que dexe la so ‘política agresiva’ pa trabayar a común pol exe atlánticu by asturnet 20 d'avientu, 2005 La dirección nacional del Bloque por Asturies (BA) pidió-y ayer al Bloque Nacionalista Galego (BNG) qu’abandone “la so política agresiva y de xestos inútiles” pa trabayar a común nel fortalecimientu del exe atlánticu “dende la solidaridá y el respetu a cada comunidá”. Los socios d’Izquierda Xunida afirmen que “cualquier propuesta que nun tenga en cuenta a los ciudadanos nun dexa de ser una impostura”. Pal Bloque asturianu la posición caltenida pol BNG pa defender los aspectos más polémicos de la so propuesta de nuevu estatutu pa Galicia ye “propia del nacionalismu románticu del sieglu XIX” y non d’esti sieglu “nel tiempu de los nacionalismos cívicos y de diálogu ente comunidaes”. La formación política asturiana considera que “plantear desafíos sin sentíu y sin futuru namás diba llevar a una situación de desconfianza” y diba valir “pa reforzar les posiciones polítiques del nacionalismu español y de la derecha oportunista”. El Bloque por Asturies diz que tanto la llingua asturiana como’l gallego-asturiano son “parte irrenunciable” del patrimoniu cultural d’Asturies y que como talo tienen ver reconocida la so oficialidá nel prósimu estatutu d’autonomía. 20 d'avientu, 2005 0 FacebookTwitterPinterestEmail
Sociedá Migoya valora positivamente que’l Ministeriu sofite la compra de llibros pa les biblioteques by asturnet 20 d'avientu, 2005 El Ministeriu de Cultura va sofitar la compra de llibros destinaos a aumentar los fondos de les biblioteques públiques. Asina lo anunció esti llunes 19 en Toledo la responsable del departamentu Carmen Calvo na conferencia sectorial de conseyeríes de Cultura de les comunidaes autónomes. La titular del Principáu Ana Rosa Migoya valoró “mui positivamente” esta iniciativa. La ministra anunció que l’estáu va empobinar 8,3 millones d’euros a la compra de fondos bibliográficos. La conseyera Migoya afirmó al respective que “esta ayuda ye importante pa nós ya que complementa el gran esfuerzu presupuestariu que facemos dende’l Principáu” y adelantró que pal añu 2006 la cuantía pa l’ adquisición de fondos bibliográficos va duplicase respective al últimu presupuestu autonómicu. 20 d'avientu, 2005 0 FacebookTwitterPinterestEmail
Sociedá El Centru Asturianu de Madrid programa un cursu de llingua asturiana by asturnet 20 d'avientu, 2005 El Centru Asturianu de Madrid programa un cursu de llingua asturiana pal que ta abierta la matrículas hasta’l prósimu 12 de xineru. Dirixíu pol filólogu Pablo Suárez García el taller consta de noventa hores y va impartise tolos martes y xueves n’horariu de tardes dende’l 17 de xineru hasta’l 30 de mayu. El conteníu d’esti cursu va tar estremáu en tres apartaos: conocencia de la realidá sociollingüística d´Asturies; conocencia de la llingua asturiana (léxicu, ortografía y sintaxis) y conocencia de la cultura asturiana (antropoloxía social y cultural). Al finar el cursu entregaráse un diploma a los alumnos asistentes. La matrícula facese na Secretaría del Centru Asturianu de Madrid (cai Farmacia, 2 4ª planta) Teléfonos 915 328 281 / 915 328 245; Fax 915 328 256 Corréu Electrónicu: centroasturianomadrid@infonegocio.com enantes del xueves 12 dexineru de 2005 y ye de baldre pa tolos alumnos (socios y non socios del CAM). Más información 20 d'avientu, 2005 0 FacebookTwitterPinterestEmail
Sociedá Anxo Quintana califica de ‘inesistente’ la posibilidá d’anexón a Galicia de conceyos foriatos by asturnet 19 d'avientu, 2005 El secretariu xeneral del Bloque Nacionalista Galego (BNG) y vicepresidente de la Xunta de Galicia Anxo Quintana afirmó énte varios miles de siguidores esti sábadu 17 qu’hai “sectores interesaos en que’l nacionalismu gallegu apareza como’l tercer problema del estáu, después de los ‘problemes’ d’Euskadi y Cataluña”. Pal dirixente ‘bloqueiro’ seríen esos sectores los autores de la polémica sobre lo que calificó de “inesistente posibilidá” d’anexón de conceyos d’Asturies y Castiella-Lleón a la comunidà gallega. Quintana atribuyó el “tremendu líu” (nes sos palabres) armáu a cuenta de la propuesta de nuevu estatutu del BNG a “aquellos qu’entienden la Constitución como una arma arroxadiza” y calificó de “posibilidade inexistente” la d’anexonar territorios de Asturies y Castiella-Lleón a Galiza-, una polémica creada, dixo porque “dende Madrid nun se contaba con que Galiza presentase un Estatutu de Nación: namás contaben con Euscadi y Cataluña, y agora temen que nos convirtamos nun tercer problema”. El vicepresidente del gobiernu gallegu afirmó nel so discursu ente los simpatizantes del Bloque que “una nación nun pide permisu pa decidir el so futuru nin rinde vasallaxe a naide” y preguntó “a los qu’agora se rasguen les vestidures” si taríen dispuestos a “dexar Galiza al marxen del debate territorial una vez qu’Euskadi y Cataluña tegan un nuevu testu estatutariu. Pel so llau el PSdG, en voz del so dirixente Paulino Varela, pidió-yos a los sos socios de gobiernu del Bloque que “abandonen los maximalismos” y “trabayen por un Estatutu de consensu de tolos gallegos”. 19 d'avientu, 2005 0 FacebookTwitterPinterestEmail
Sociedá Areces descarta la oficialidá n’Asturies pa otra llingua que nun sea l’español by asturnet 16 d'avientu, 2005 El presidente del gobiernu asturianu Vicente Álvarez Areces descartó qu’ente les intenciones de la so llinia política tea la de declarar la cooficialidá na nuestra comunidá autónoma. Areces inxertó diverses consideraciones personales sobre la realidá llingüística d’Asturies na respuesta a una de les preguntes que los informadores-y ficieron esti miércoles 15 en Madrid alrodiu de la polémica entamada col BNG pola propuesta de nuevu estatutu pa Galicia d’esti partíu. Preguntáu sobre la posibilidá recoyida nel testu de los nacionalistes gallegos de que la comunidà vecina pida a otres comunidaes la cooficialidá del gallegu nel so territoriu el presidente del Principáu descartó “la posibilidá de contemplar la cooficialidá en zones asturianes” y afirmó: “Nós tenemos un idioma que ye l’Español, el Castellano, como quieran nomalo, y tenemos tamién nel nuestru Estatutu d’Autonomía el Bable o Asturiano, que pretendemos promover el so uso y la so difusión, porque forma parte del nuestru bagaxe cultural”. Areces añadió que “l’Asturiano, amás, tien modalidaes llingüístiques que formen parte de fales o maneres de falar en dalgunes zones d’Asturies, onde, evidentemente, hai raigones llingüísticos d’otru tipu”, pa a renglón siguíu recalcar que “nun consideramos políticamente acertao el da-y una denominación de cooficialidá y poro esa ye la nuestra opinión”. Una opinión que calificó de “respetuosa y de la que dixo que “amás, creo coincide cola de la inmensa mayoría de los asturianos que se sienten fondamente asturianos nesos conceyos limítrofes, que falen lo que veníen falando siempre y que nun quieren nenguna guerra d’esi tipo, porque me parez una guerra d’una esterilidad absoluta y d’un planteamientu que nunca enantes se formulara, y que nun van añadir nada si se formula agora. 16 d'avientu, 2005 0 FacebookTwitterPinterestEmail
Sociedá El parlamentu asturianu aprobó por unanimidá la Llei del Procurador Xeneral by asturnet 16 d'avientu, 2005 El plenu de la Xunta Xeneral del Principáu aprebó na so sesión d’esti xueves 16 el proyectu de Llei que va regular la figura del Procurador Xeneral y llenda les funciones y les incompatibilidaes del cargu. La creación de la nueva figura institucional aprebóse por unanimidá de los tres grupos tres la incorporación de delles enmiendes presentaes poles diverses fuerces polítiques. El Procurador Xeneral d’Asturies va exercer les funciones propies d’un defensor de los ciudadanos énte los abusos o arbitrariedaes de les administraciones públiques dientro’l territoriu de la comunidá autónoma del Principáu y el so cargu ye incompantible con otros de rangu políticu o públicu. Na nueva llei aprebada’l nome institucional del cargu tien la so designación oficial en llingua asturiana como Procurador Xeneral. 16 d'avientu, 2005 0 FacebookTwitterPinterestEmail
Sociedá Los tres grupos de la Xunta Xeneral sofiten una propuesta en favor de l’asturianidá del Navia Eo by asturnet 15 d'avientu, 2005 Los tres grupos parlamentarios de la Xunta Xeneral firmaron una proposición non de llei conxunta na que se reafirma l’asturianidá del Navia Eo y se caltién que tanto la llingua asturiana como la fala “formen parte irrenunciable del patrimoniu cultural asturianu” y que como talo “ha ser atendío, protexío y trensitío a les xeneraciones futures poles instituciones” d’Asturies. La iniciativa presentada conxuntamente polos grupos socialista, popular y d’Izquierda Xunida-Bloque por Asturies, diz que “tolos ciudadanos asturianos somos heriedes de la bayura llingüística y cultural de toles tierres d’Asturies, porque toes conformen la nuestra forma de ser y de sentinos asturianos”. Darréu alude a l’actualidá afirmando que “nestos momentos en que dende sectores ensin dulda poco informaos de la nuestra realidá cultural y cohesión social intenta cuestionase l’ asturianía social y cultural del territoriu asturianu del Navia-Eo” la Xunta Xeneral del Principáu d’Asturies declara que “l’asturianía social y cultural del territorio asturiano del Navia-Eo ye incuestionable”. La proposición defende nesi sen que “tanto la llingua asturiana como la fala formen parte irrenunciable del patrimoniu cultural asturianu y que como tal patrimoniu ha de ser atendío, protexío y tresmitío a les xeneraciones futures poles instituciones que’l pueblu asturiano se dio a él mesmu” y que tien d’evitase “cualquier acción negativa, sea esta proveniente tanto d’otres administraciones como d’asociaciones o grupos sociales, y especialmente aquelles que puedan poner en tela de xuiciu tala asturianía”. La iniciativa, firmada polos portavoces de los tres grupos: Fernando Lastra, Ovidio Sánchez y Noemí Martín, admitióse a trámite el pasáu 29 de payares y va recibir el sofitu de la cámara autonómica nel plenu parlamentariu d’esti xueves. 15 d'avientu, 2005 0 FacebookTwitterPinterestEmail
Sociedá Valledor pide firmeza y prudencia al estáu nel Cume Européu by asturnet 15 d'avientu, 2005 El conseyeru de Xusticia y Esteriores del Principáu, Francisco Javier García Valledor, pide-y firmeza y prudencia al gobiernu central pa defender el caltenimientu d’ayudes europees a comunidaes como Asturiesnel Cume comunitariu qu’escomienza esti xueves en Bruseles. Valledor amuesa’l so esmolecimientu énte la postura llantada anguaño embaxo la presidencia británica de la Unión Europea. El titular d’Esteriores del gobiernu asturianu considera qu’hai razones pa esmocelcese no que cinca al procesu de negociación cola actual presidencia británica, derivada de la so propuesta inicial a la que calificó de insolidaria y que supón un recurtie importante del presupuestu comunitariu. Nun ye razonable nin entendible pa los ciudadanos que se pretenda construir más Europa con menos perres, señaló’l Conseyeru, pal qu’esa reducción afecta “a los intereses de Asturias y de España pero sobretoo afecta mui gravemente al principiu de cohesión, que nun hai d’escaecer -añadió-, constitúi un pegollu fundamental de la UE. Valledor, sicasí, alegróse de que la propuesta británica que se dio a conocer a lo llargo d’esta mañana representa una meyora curiosa respective a la d’entamu anque nun cubra les demandes d’Asturies, n’opinión del conseyeru. El responsable de Xusticia y Relaciones Esteriores del Principáu aporfió de cualquiermiente nel so esmuelgu pol desarrollu de la negociación nel Cume de Bruseles, sobremanera no tocante al marxen financieru pa les comunidaes afectaes pol llamáu efectu estadísticu: Si a la parálisis institucional y política se-y acaba xuntando la posible parálisis financiera les consecuencies van ser impredicibles y podíen ser potencialmente catastrófiques pa la UE y diben poner en riesgu la so propia continuidá, señaló. 15 d'avientu, 2005 0 FacebookTwitterPinterestEmail