Sociedá L’últimu informe del Eurobarómetro sobre les llingües de los europeos escaez l’asturiano by asturnet 22 de febreru, 2006 L’informe sobre Los europeos y les sos llingües dau a conocer esti martes 21 pol Eurobarómetro de la Comisión Europea escaez la esistencia de la llingua asturiana y caltién datos como que’l 89 por cientu de la población del estáu tien l’español como llingua materna. L’informe inclúi por vez primera al gallego, obviáu hasta esti documentu. L’Eurobarómetro defende’l multillingüismu del continente européu y encamienta a que nun futuru prósimu tolos ciudadanos de la Unión puedan falar polo menos dos llingües, incluída la materna. Tocante a la realidá llingüística del estáu español l’informe caltién amás del datu de que’l 89 por cientu de los ciudadanos tienen el castellano como primer llingua (nueve de cada diez ciudadanos), cifra nun 9 por cientu a los falantes de catalán, nun 5% a los de gallego y nun 1% a los d’euskera. 22 de febreru, 2006 0 FacebookTwitterPinterestEmail
Sociedá El CAO pídi-y a IX coordinación y diversificación nes sos posiciones públiques sobre la oficialidá by asturnet 22 de febreru, 2006 El Conceyu Abiertu pola Oficialidá caltuvo en díes pasaos entrambes reuniones cola dirección del Bloque por Asturies y col grupu parlamentariu d’Izquierda Xunida-BA dientro la ronda periódica de contactos de la plataforma con organizaciones polítiques y sociales. Na reunión el CAO tresmitió a la coalición d’izquierdes la necesidá d’unificar idees nes declaraciones públiques de responsables políticos y diversificar en personaxes públicos estos posicionamientos. Izquierda Xunida-Bloque, pel so llau, afaló al Conceyu na reunión que caltuvieron col grupu parlamentariu de la coalición a aumentar la presión social na cai pa influir nel movimientu de postures polítiques anguaño contraries a la oficialidá. Nel aconceyamientu que caltuvieron cola diputada d’IX-BA, Paloma Uría y Gustavo García, coordinador del Bloque na Xunta Xeneral, la coalición d’izquierdes comprometióse a facer de ponte ente el CAO y los grupos parlamentarios del PSOE y el PP. Según desplicó a Asturnews, el portavoz del Conceyu Abiertu pola Oficialidá, Fernando Ornosa, dende va unes selmanes la plataforma tenta que los reciban los grupos socialista y popular, ensin algamar hasta agora nenguna respuesta positiva nesi sen. Tampoco algamó hasta la fecha el CAO dala respuesta de la dirección de la FSA pa comprometer una reunión. Dotramiente nel aconceyamientu que’l Conceyu caltuvo cola dirección nacional del Bloque por Asturies, nuna reunión na que tuvieron presentes el so portavoz nacional Rafael Palacios y el conceyal por L.lena , Agripino García, la formación nacionalista reafirmó el so compromisu cola oficialidá y la so promesa firme d’abandonar cualquier lligazón con organizaciones polítiques que firmaren una reforma estatutaria ensin el reconocimientu cooficial del asturiano y del gallego-asturiano. Esta rutura diba ser con consecuencies de futuru, según aseguraron los miembros de la dirección del Bloque al CAO y aplicable a los sos actuales socios d’Izquierda Xunida si llegaren a aceptar un estatutu ensin oficialidá. La reiteración del compromisu pa desixir el reconocimientu llegal plenu de los derechos llingüísticos na reforma estatutaria fue clara tanto per parte del Bloque por Asturies como d’Izquierda Xunida, según aseguró a Asturnews Fernando Ornosa. El portavoz del CAO anunció la intención de la plataforma de redactar una moción ‘estándar’ pa presentar nos 78 conceyos d’Asturies y na que se pide a la Xunta Xeneral y al Gobiernu del Principáu la inclusión de la oficialidá nel estatutu. Izquierda Xunida y el Bloque comprometiéronse cola plataforma a actuar como introductores d’estes mociones nos conceyos onde tienen la posibilidá de facelo. La primera d’estes mociones podía rexistrase nel conceyu de L.lena, onde’l Bloque por Asturies cuenta con tres conceyales. 22 de febreru, 2006 0 FacebookTwitterPinterestEmail
Sociedá La Confederación de Sindicatos de Trabayadores de la Enseñanza pide la oficialidá by asturnet 21 de febreru, 2006 La Confederación de Sindicatos de Trabayadores de la Enseñanza-Intersindical (STES-i) aprobó nel so últimu congresu celebráu en Madrid los díes 18 y 19 de febreru una resolución na que denuncia la situación de la llingua asturiana y pide la so oficialidá. La iniciativa aprobóse por unanimidá de toles federaciones. La organización sindical na que s’inxere SUATEA denuncia nesti documentu que “Asturies vive nuna situación de billingüismu desequillibráu, na que los derechos llingüísticos de la población que fala asturianu nun tán llegalmente reconocíos, lo que lleva a una minorización social y a una perda xeneracional d´esta llingua, incumpliéndose n´Asturies l´artículu 3 de la Constitución” y afirma que “esta situación inxusta nun pue allargase por más tiempu”. Como solución el documentu caltién que namás una marcación xurídica na que se garanticen los derechos civiles a tolos asturianos y na nuestra comunidà se pueda vivir “con total normalidá tanto n’asturiano como en castellano”. La resolución aprebada nel congresu confederal de STES-i defende la nuestra llingua como patrimoniu común de tolos asturianos y entiende que necesita “un nivel de promoción y defensa mui superior al que tien agora”. Esi nivel de protección básase, pa la confederación sindical, na “necesidá inescusable” de que la futura reforma del estatutu d’Autonomía d’Asturies incluya la oficialidá del asturiano y del gallego-asturiano. 21 de febreru, 2006 0 FacebookTwitterPinterestEmail
Sociedá La UNESCO celebra’l Día Internacional del idioma Maternu apostando pol multillingüismu nel ciberespaciu by asturnet 21 de febreru, 2006 La UNESCO celebra esti martes 21 el Día Internacional del Idioma Maternu dedicáu en 2006 a la necesidá de favorecer el multillingüimu nel ciberespaciu y l’accesu de tolos idiomes a les nueves tecnoloxíes n’igualdá de condiciones. Na so declaración con motivu d’esta celebración la organización mundial denuncia que son menos del 1% les llingües utilizes n’Internet. Otra de les recordances que fai la UNESCO ye que de les 6.000 llingües falaes anguaño nel mundu más de la mitá cuerren seriu peligru de desapaición en poques xeneraciones. Les nueves tecnoloxíes y la so universalización pueden suponer una aceleración nel procesu de perda de les llingües minorizaes, sicasí tamién pueden ser les sos verdaderes tables de salvación si se ponen los medios afayaízos, según barrunta la UNESCO na so declaración institucional referida al multillingüismu nel ciberespaciu con motivu del Día Internacional del Idioma Maternu 2006 . Son los gobiernos, afirma la organización mundial, los encargaos de favorecer esos mecanismos d’algame pa toles llingües y tamién les grandes corporaciones informátiques. 21 de febreru, 2006 0 FacebookTwitterPinterestEmail
Sociedá Valledor comparte’l pesimismu de ‘Churruca’ énte l’Estatutu y avisa al PSOE de que nun puede “cambiar de pareya” by asturnet 21 de febreru, 2006 El conseyeru de Xusticia y Esteriores Francisco Javier García Valledor comparte la visión pesimista del so compañeru de formación el cabezaleru xixonés Jesús Montes Estrada ‘Churruca’ respective a la imposibilidá d’algamar la inclusión de la oficialidá nel prósimu Estatutu ensin cuntar col sofitu del PSOE. Pa Valledor esto “ye la constatación d’un fechu” y avisó a los socialistes de que “nun pueden cambiar de pareya pa tar col PP” nel asuntu del asturiano. El conseyeru d’Izquierda Xunida nel gobiernu del Principáu coincide col so compañeru ‘Churruca’ en que la cuantía numérica de los diputaos de la coalición na Xunta Xeneral condiciona la so fuerza política a la hora de negociar colos sos socios mayoritarios del PSOE y reconoció en declaraciones al diariu El Comercio qu’esa situación namás podía cambiar si “IX-Bloque medra en representación” nunes prósimes elecciones. García Valledor espresó la so rocea a que nun se cumplan los plazos previstos por socialistes y Izquierda Xunida-Bloque por Asturies pa tener afechada la reforma l’Estatutu y manifestó’l so mieu a qu’ensin la concurrencia del tercer partíu na Xunta Xeneral, el PP, pueda haber un nuevu estatutu na presente lexislatura. 21 de febreru, 2006 0 FacebookTwitterPinterestEmail
Sociedá Villa retruca al BNG pol repartu de los fondos mineros by asturnet 20 de febreru, 2006 El secretariu xeneral del SOMA-FIA-UXT, José Ángel Fernández Villa, aprovechó esti domingu 19 el tradicional actu nel cementeriu de Mieres en recordanza de Manuel Llaneza, pa retrucar al Bloque Nacionalista Galego (BNG) na polémica polos fondos mineros. Villa remembró que Galicia ye rexón hullera gracies a una fuelga de los mineros asturianos en 1989. El cabezaleru del SOMA dixo nel actu d’homenaxe al fundador del sindicatu que “Asturies nun recibe nada que nun-y correspuenda” y que “nun somos nin pidiones nin lladrones”, en referencia a les declaraciones del diputáu del BNG Francisco Rodríguez que acusó a la nuestra comunidá de atropar la mayor parte de los fondos mineros de la Uniòn Europea en detrimentu de comunidaes como la gallega. El líder sindical calificó de “calumnies” les palabres de los nacionalistes gallegos y pidió-y al gobiernu del Principáu una respuesta institucional. 20 de febreru, 2006 0 FacebookTwitterPinterestEmail
Sociedá El líder xixonés d’IX Montes Estrada diz que nun se puede pidir a la coalición “quemase a lo bonzo” pola oficialidá by asturnet 20 de febreru, 2006 El responsable políticu d’Izquierda Xunida en Xixón y vicealcalde d’esi conceyu, Jesús Montes Estrada ‘Churruca’, afirmó que nel asuntu de la oficialidá: “nun se nos pueden pidir xuegos malabares nin que nos quememos a lo bonzo”. El líder local de la coalición reconoció les dificultaes énte la negociación col PSOE del nuevu estatutu y tocante a la inclusión del asturiano oficial señaló que “sabemos perfectamente que van dicinos non”. En declaraciones al diariu El Comercio ‘Churruca’ enarboló la representación numérica d’Izquierda Xunida-Bloque por Asturies nel parlamentu autonómicu pa enfocar con realismu la prósima negociación de la reforma estatutaria: “con cuatro diputaos nun se nos pueden pidir xuegos malabares”, dixo. Respective a la verdadera responsabilídá de nun incluir la cooficialidá del asturiano nel nuevu testu manifestó que “nun se trata de que n’IX-Bloque por Asturies nos quememos a lo bonzo sinón de que la mayoría de los asturianos sepan que son les dos fuerces mayoritaries les que s’oponen”. 20 de febreru, 2006 0 FacebookTwitterPinterestEmail
Sociedá El Congresu debate una proposición pa oficializar l’árabe y el bereber en Ceuta y Melilla by asturnet 20 de febreru, 2006 La comisión de Cultura del Congresu de los Diputaos debate esti llunes 20 una proposición non de llei na que s’encamienta la cooficialidá del árabe en Ceuta y del tamazigh en Melilla xunta col castellano. La propuesta avalada polos grupos PNV, ERC y Mistu tien el refugue de les dos formaciones mayoritaries, PSOE y PP. Na iniciativa encamiéntase al Ministeriu d’Educación a que revise los diseños curriculares pa que, de manera progresiva y a partir del prósimu cursu, el tamazigh -llingua bereber que falen alrodiu venti millones de persones nel norte d’Äfrica- se introduza como idioma vehicular na enseñanza en Melilla y se faga lo mesmo col árabe en Ceuta. La proposición namás cuenta col sofitu del Partido Nacionalista Vasco, Esquerra Republicana de Catalunya y el Grupu Mistu. El Partido Popular opónse a la posibilidá d’abrir la puerta a la cooficialidá del árabe y el tamazight en Ceuta y Melilla al consideralo “estemporáneo” y por voz del so diputáu Antonio Gutiérrez afirma que nes ciudaes norteafricanes “ya se potencia la cultura bereber”. Na mesma llínea, el Partido Socialista de Melilla-PSOE acusó de “intromisión” a los grupos nacionalistes firmantes de la proposición non de llei y afirma qu’esta iniciativa ta redactada “dende’l más profundu desconocimientu de la realidá social de les ciudaes”. Nel otru llau de les postures de PSOE y PP, asitióse’l principal partíu de la oposición en Melilla, CpM (Coalición por Melilla), de base mayoritariamente musulmana, que defendió la protección, promoción y divulgación del tamazight como pasu previu a la cooficialidá col castellano de la llingua propia de los melillesos d’orixen bereber. El presidente del partíu musulmán, Mustafa Aberchán, señaló que l’oxetivu últimu del so partíu “ye llograr en Melilla una cooficialidá del tamazight col castellano como la qu’esiste n’otres comunidaes con llingua propia”. 20 de febreru, 2006 0 FacebookTwitterPinterestEmail
Sociedá L’Asociación Asturiana d’Amigos del Pueblu Saharaui recauda fondos poles inundaciones de Tinduf by asturnet 19 de febreru, 2006 L’Asociación Asturiana d’Amigos del Pueblu Saharaui entama una campaña de recoyida de fondos y alimentos con destín a los refuxaos de los campamentos de Tinduf, arrasaos va unos díes por mor de les lluvies tropicales y les inundaciones que provocaron. Una caravana con cincuenta tonelaes d’alimentos básicos va salir dende Asturies a finales d’abril con destín a los campamentos saharauis. Enantes d’entamar los preparativos pa la caravana solidaria la organización non gubernamental ta entamando una campaña de recoyida de fondos pa unviar a la Media Luna Roja Saharaui. La xente que quiera colaborar con esti unvíu de perres puede facelo ingresando la so aportación enantes del 10 de marzu na siguiente cuenta, de la que ye titular l’Asociación Asturiana De Amigos del Pueblo Saharaui : 2048 0000 24 0340086603 , poniendo nel conceptu Ayuda Inundaciones. 19 de febreru, 2006 0 FacebookTwitterPinterestEmail
Sociedá L.lena coloca cartelos de doce llugares cola toponimia arreglada by asturnet 17 de febreru, 2006 L’Ayuntamientu de L.lena va empezar a instalar esti viernes 17 los nuevos cartelos de doce llugares del conceyu cola denominación tradicional. La colocación d’estes señales viaries constitúi la segunda fase de la campaña de recuperación de la toponimia local. Les señalizaciones van llantase nos barrios de la capital del conceyu y nos pueblos d’Arnón, Xomezana Riba, Xomezana Baxo y San Bras. Los nuevos indicadores formen parte d’un programa del Serviciu de Normalización Llingüística de L.lena para recuperar los nomes tradicionales locales. Nesta segunda fase van colocase un total de 12 cartelos que van empezar instalase esti viernes 17 nos barrios de La Pola: La Caleya, L.lencia, La Fuente l´Ablanu, La Crespa, Robleo, El Masgaín, El Molín de la Sala y Santa Cristina. La instalación va siguir nos prósimos díes. El coste de los nuevos cartelos y la so instalación asciende a 2.400 euros nuna iniciativa subvencionada pola Conseyería de Cultura al través del Plan pa la Normalización Social nel ámbitu municipal. 17 de febreru, 2006 0 FacebookTwitterPinterestEmail