Cine Ribedeva da’l primer pasu pa crear un festival añal de cine con películes vinculaes al oriente asturianu by asturnet 17 d'agostu, 2004 Un certame añal de cine fechu nel oriente d’Asturies o dirixíu por directores de la comarca. L’Ayuntamientu de Ribedeva plantégase da-y continuidá nesos términos a l’amuesa cinematográfica que tien en marcha esta selmana y que quier afitar a partir de 2005 cola incorporación de llargumetraxes y l’apertura del certame al vecín occidente de Cantabria. Asina lo espresa el responsable de la Casa Cultura de Colombres, Javier Sampedro, quien avanza qu’en tóu casu manexaráse un programa “pequeñu”, acordies cola capacidá presupuestaria del municipiu, y nun s’optará pola fórmula de concursu, sinón que se caltendrá l’apuesta por una amuesa audiovisual con tintes hestóricos ya etnográficos. Nesti sen, l’Ayuntamientu de Ribedeva proyecta dende ayeri y hasta’l 31 d’agostu tres curtiumetraxes vinculaos a la comarca y tres documentales, ente ellos ‘Alma de Dios’, una cinta rodada a primeros del sieglu XX pol director Manuel Noriega, natural de Pimiangu, y recuperada recientemente del escaezu pola Filmoteca de Zaragoza. Según Sampedro, l’envís de los rexidores municipales pasa por mantener les feches del certame de cine n’agostu, coincidiendo cola selmana grande de les fiestes llocales, y nel diseñu de la edición de 2005 tendrá muncho que dicir el siguimientu que’l públicu faiga de l’amuesa yá en marcha, cuyos organizadores consideren “una preba”. Ente les pieces que se proyecten nos xardinos de la Casa Cultura de Colombres, baxo’l títulu xenéricu de ‘Luces y sombras del Oriente, un acercamiento al cine del oriente de Asturias’, figuren amás dos documentales sobro la llegada’l ferrocarril a Llanes y la vida nesa llocalidá nel críticu añu de 1917, cuando tres movimientos militares, obreros y parllamentarios confluyeron na más intensa crisis del periodu de la Restauración. 17 d'agostu, 2004 0 FacebookTwitterPinterestEmail
Cine L’asturianu permanez ausente de les películes de gran difusión, tres años depués de ‘Carne de gallina’ by asturnet 12 d'agostu, 2004 L’asturianu nun vende nel cine. Tres años depués del estrenu de ‘Carne de gallina’, llargumetraxe dirixíu por Javier Maqua con notable presencia de la llingua asturiana nos diálogos, la industria audiovisual nun xeneró nenguna otra obra cinematográfica de gran difusión asemeyada a la realizada por Maqua, que foi siguida nes sales por más de 67.000 espectadores. Asina lo asoleyen les estadístiques del Ministeriu de Cultura, que cifren en 67.235 el númberu total de persones que fueron al cine a ver ‘Carne de gallina’ nel añu 2002, mientres el llargumetraxe permaneció en cartelera. Esi datu, que se traduxo nuna recaudación en taquilla de casi 300.000 euros, allugó la película rodada na cuenca’l Caudal na mitá de la llista de los llargumetraxes españoles más ‘taquilleros’ nel exerciciu d’hai dos años, per delantre de ‘Lucía y el sexo’, de Julio Medem, y xusto perbaxo de ‘En Construcción’, obra de José Luis Guerín. Estrenada na clausura oficial del Festival Internacional de Cine de Xixón, en payares de 2001, ‘Carne de Gallina’ tuvo como protagonistes a los actores Karra Elejalde, Anabel Alonso, Nathalie Seseña y Maxi Rodríguez, sobro un guión d’esti dramaturgu asturianu. Productores, actores y otros profesionales vinculaos a la industria audiovisual enfótense na puesta en marcha de la futura radiotelevisión autonómica asturiana, cuyes primeres emisiones regulares tán previstes pa mediaos de 2005, como motor de dinamización del sector. 12 d'agostu, 2004 0 FacebookTwitterPinterestEmail
Lliteratura Luis Sepúlveda axunta les sos duldes y esmoliciones en ‘Moleskine’, trescripción d’un cuadernu de notes by asturnet 3 d'agostu, 2004 Apuntes sueltos, reflexones, capítulos de novela, recetes de cocina. L’escritor Luis Sepúlveda, exiliáu de la dictadura chilena y director del Salón del Llibru Iberoamericanu de Xixón, axunta toos esos xéneros en ‘Moleskine’, un llibru que ye resultáu de la trescripción d’un cuadernu de notes personales y que se presenta al públicu esta tarde na xixonesa Llibrería Central. Recuperando la zuna de ciertos intelectuales de los últimos dos sieglos, qu’apuntaben compulsivamente testos mui diversos nun cuadernu que siempre los acompañaba, Sepúlveda define’l llibru qu’agora asoleya como “una llibreta de tapes negres na qu’espardo les mios duldes, les mios esmoliciones y les mios bronques de cada día”, y señala qu’esi cuadernu permite-y comprobar, al revisalu, “que nun perdí la capacidá de plasmu”. ‘Moleskine’, que se presenta al públicu na Llibrería Central a partir de les 20,15 hores de güei, incorpora apuntes que se corresponden con tres cuadernos sucesivos escritos pol autor chilenu ente 2002 y 2004, y nellos ve Sepúlveda una oportunidá pa “rebobinar la vida y vela fugazmente fotograma a fotograma”. Nacíu na llocalidá d’Ovalle en 1949, Luis Sepúlveda ye ún de los autores en castellán más lleíos y tornaos d’Europa. Ente los sos títulos más destacaos figuren ‘Un viejo que leía novelas de amor’ (1992), ‘Mundo del fin del mundo’ (1994), ‘Patagonia Express’ (1995), ‘Historia de una gaviota y del gato que le enseñó a volar’ (1996), ‘Historias marginales’ (2000), y ‘Hot Line’ (2002). 3 d'agostu, 2004 0 FacebookTwitterPinterestEmail
Cine El director Ventura Pons graba n’Uviéu la banda sonora pa la so última película, ‘Amor idiota’ by asturnet 3 d'agostu, 2004 El cine de Ventura Pons pasa per Uviéu. El director catalán, autor ente otros títulos de ‘El porqué de las cosas’, ‘Anita no pierde el tren’, ‘Caricias’ y ‘El gran gato’, grabará nel Auditoriu ‘Príncipe Felipe’ la banda sonora del so últimu llargumetraxe, ‘Amor idiota’, cuyu rodaxe ta acabante rematase en Barcelona protagonizáu por Santi Millán y Cayetana Guillén Cuervo. La encargada d’executar la música de la película, compuesta por Carles Casas, sedrá la orquesta de Los Virtuosos de Moscú, que prevé completar la grabación nuna única xornada intensiva -esti vienres-, ente les 9,30 y les 22 hores. Con esi envís, los músicos tienen yá formalizada la reserva de la sala de cámara del auditoriu d’Uviéu y esperen dexar llistu’l llabor esi mesmu día pa facilitar el montaxe final de la cinta, que va estrenase na seronda. Basada nuna novela de Lluís Antón Baulenas y rodada en llocalizaciones de Barcelona y Buenos Aires dende xunu pasáu, ‘Amor idiota’ ye una comedia de 105 minutos de duración que narra una hestoria d’amor pasional, n’ocasiones violenta, de dos mozos cuya dependencia mutua conduz-yos la vida. Amás de los dos protagonistes principales, el repartu complétase colos actores Mercè Pons, Marc Cartes, Jordi Dauder, Gonzalo Cunill, Andrea Fantoni, Pere Tomàs, Héctor Mas y Xavi Fernández. ‘Amor idiota’ ya la película númberu dieciséis que sal del obradoriu cinematográficu de Ventura Pons (Barcelona, 1945), aniciáu nel mundu’l teatru a los 20 años d’edá y debutante na dirección en 1977 con ‘Ocaña, retrato intermitente’, un singular documental sobro un artista conocíu polos sos espectáculos de travestismu na rambla barcelonesa. 3 d'agostu, 2004 0 FacebookTwitterPinterestEmail
Lliteratura El premiu de novela ‘Café Gijón’ recibe 260 orixinales, la cifra más alta na hestoria’l certame by asturnet 2 d'agostu, 2004 El Premiu ‘Café Gijón’ supérase a sí mesmu. El prestixosu galardón lliterariu, entamáu en 1949 nel establecimientu madrilanu del mesmu nome y patrocináu anguaño pol Ayuntamientu de Xixón, recibió na so edición de 2004 un total de 260 noveles aspirantes, once más que l’añu pasáu y la mayor cifra contabilizada na hestoria’l certame. Asina lo precisó esti mediudía la conceyala xixonesa de Cultura, Mercedes Álvarez, que se felicitó pola gran participación d’autores nel concursu y, magar de nun avanzar quién formará parte’l xuráu que va conceder el galardón, anunció qu’esi xuráu emitirá’l so veredictu a mediaos de setiembre nel escenariu habitual, el Café Gijón, asitiáu nel madrilanu paséu de Recoletos. Al premiu concurren nesta edición testos aportaos de países estremaos ente los que figuren Israel, Estaos Xuníos, Cuba, Ecuador y Colombia, con un pesu destacáu, según esplicó Álvarez, de los orixinales empobinaos a concursu dende Llatinoamérica. De toes eses obres saldrá un únicu ganador que verá editada la so novela pola casa Acantilado y recibirá los 18.000 euros con que ta dotáu el galardón. L’emblemáticu certame nació en 1949, alitáu por un grupu d’intelectuales encabezaos por Fernando Fernán-Gómez, Eduardo Haro-Tecglen, Manuel Aleixandre y el premiu Nobel Camilo José Cela. Dende 1989, el Conceyu de Xixón revitalizó’l concursu asumiendo la dotación y promoción del premiu, que na so última edición recayó nel ayerán Fulgencio Argüelles, pola novela ‘El palacio azul de los ingenieros belgas’. 2 d'agostu, 2004 0 FacebookTwitterPinterestEmail
Cine Carlos Navarro gana’l concursu de guiones de curtios d’Avilés con una crónica d’oportunidaes perdíes by asturnet 2 d'agostu, 2004 Carlos Navarro Suárez (Uviéu, 1968), llicenciáu en Ciencies Económiques y Empresariales ya esplorador de la realización cinematográfica, estrena’l palmarés del Concursu de guiones pa curtiumetraxes ‘Villa de Avilés’. El xuráu de la primer edición del certame premió la so obra ‘Último tren a Haití’ -una hestoria alredor de les oportunidaes perdíes y les consecuencies d’acciones pasaes- pol “aciertu” del autor uvieín nos diálogos, el bon desendolcu de los personaxes y la capacidá d’emocionar ensin cayer nel sentimentalismu. Carlos Navarro, que yá caleyara poles siendes del guión y la dirección de cine en ‘La profecía’, ‘Truchas’, ‘El espejo’, ‘Al otro lado’ y ‘La neña los mios güeyos’ -esta última premiada en Portugal hai agora cuatro años- recibirá los 6.000 euros colos que ta dotáu el premiu y estrenará la so obra nel IV Certame Nacional de Curtiometraxes ‘Villa de Avilés’, que va cellebrase en 2005. Les bases del concursu establecen asinamesmo que la pieza tien que se rodar a lo menos nun 60 por cientu en llocalizaciones d’Avilés, dos d’elles esteriores qu’han reconocese fácilmente. A la final del concursu, al que concurrieron un total de 18 obres, llegaron amás los curtios ‘Una suma de certezas’, del avilesín Saúl Fernández; ‘La visita’, de la zaragozana Pilar Gutiérrez Aguado, y ‘Sesión continua’, de la uvieína Elena García Tamés. 2 d'agostu, 2004 0 FacebookTwitterPinterestEmail
Lliteratura Héctor Pérez Iglesias y Mar Sancho ganen el premiu de narrativa curtia ‘Art Nalón Lletres’ by asturnet 28 de xunetu, 2004 El rellatu ‘Cuentu de Navidá’, obra d’Héctor Pérez Iglesias, val 1.500 euros. El xuráu del certame de narración curtia ‘Art Nalón Lletres’ 2004, entamáu pol Ayuntamientu de Llangréu, otorgó-y a esi cuentu el primer premiu de la modalidá en llingua asturiana. Na categoría de castellán, la vencedora foi l’autora Mar Sancho, cola obra ‘Puerto Hambre’. Amás d’eses dos distinciones en metálico, qu’inclúin la entrega d’una estatuina conmemorativa a los dos autores premiaos, el xuráu escoyó otros dos rellatos n’asturianu pa ensertalos na publicación de los meyores cuentos que concurrieron al concursu nesta edición: ‘Narcosis’, de Ricardo Saavedra, y ‘La soledá de los dioses’, d’Elías Fernández. Na modalidá de llingua castellana, la llista de rellatos esbillaos pa la so publicación ye enforma más llarga: ‘El murallón de Sindalerza’, de Santiago Javier Ambao; ‘Oficina de cambio’, de Nuria Calderón; ‘El culto’, de José Luis Erausquin; ‘Café de contrabando’, de Mercedes González; ‘Jardineros’, de Jaime Alejandro Roda; ‘Albricias’, de Roberto Vivero; ‘Entrar, saludar, esperar, salir’, de Jonathan Préstamo; ‘La apuesta’ y ‘Una nota en la cocina’, d’Ismael Piñera; ‘Celia pies de flor’, de Carlos del Puerto; ‘El ladrón de flores’, de José Manuel Moreno; ‘Plato de jnuuj’, de Juan Jacinto Muñoz; y ‘Nassau’, de la propia Mar Sancho. Según precisa l’Ayuntamientu de Llangréu nun comunicáu públicu, el xuráu del certame tuvo integráu por Nieves Fernández Mateos, Javier García Cellino, Alberto Vega Gutiérrez y José Campal Fernández. 28 de xunetu, 2004 0 FacebookTwitterPinterestEmail
Lliteratura La revista de cómic El Wendigo piensa n’echar el pieslle depués de tres décades nel mercáu by asturnet 28 de xunetu, 2004 Amorrenta un ‘dinosauriu’ del cómic n’Asturies. Los responsables de la revista xixonesa El Wendigo piensen n’echar el pieslle a la cabecera, nel mercáu dende 1974, tres de la publicación del númberu cien, que yá ta na cai y qu’inclúi sendes entrevistes a los autores Sydney Jordan y Moebius, nun volume especial con 48 páxines y un suplementu a collor. Na páxina web de la revista, cuyu equipu organiza’l festival Internacional del Cómic del Principáu d’Asturies, esprésase la posibilidá de que’l númberu cien seya’l caberu col que la publicación salga a la venta, depués de tres décades de continuidá que ficieron d’El Wendigo la revista de crítica de cómic más veterana del Estáu. Agora los sos responsables, lideraos pol director de la publicación, Faustino Rodríguez Arbesú, almiten que trenta años de camín son abondo y avancen que ye mui probable l’adiós de la revista, en cuya plantiella de redactores figuren Ramón Fermín Pérez, José María Flores y Florentino Flórez. Nel últimu númberu d’El Wendigo incorpórense, ente otros conteníos, una crónica’l Salón Internacional del Cómic d’Asturies na so edición de 2003, un artículu sobro l’autor Rubén Pellejero y un testu monográficu dedicáu al retornu de de Richard Corben, tituláu ‘Planchas, viñetas y bocadillos’. Web oficial de la revista 28 de xunetu, 2004 0 FacebookTwitterPinterestEmail
Lliteratura Cultura prepara un intercambiu d’escritores con Uruguay by asturnet 21 de xunetu, 2004 Asturies y Uruguay ultimen un intercambiu d’escritores de dambos países. Responsables de la Conseyería de Cultura, Comunicación Social y Turismu del Principáu cellebrarán nes prósimes hores un alcuentru cola directora xeneral del Ministeriu de Cultura uruguayu nel qu’esperen concretar los términos del alcuerdu, que-y dará continuidá al vínculu lliterariu entamáu cola reciente creación d’una sala dedicada a Asturies na Biblioteca Nacional d’Uruguay. Según precisó esta mañana n’Uviéu el director d’esa entidá, Raúl Vallarino, la sala cuenta yá con más de 500 títulos d’autores asturianos y les previsiones del Ministeriu de Cultura -organismu del que depende la biblioteca- pasen por ampliar esi númberu darréu con otros milenta exemplares. L’espaciu monográficu de la Biblioteca Nacional d’Uruguay, denomináu ‘Sala del Llibru Asturianu’, ta yá en funcionamientu a la espera d’una prósima inaguración oficial y empobínase a los asturianos emigraos nesi país, a cuya disposición pon amás terminales informátiques con conesión a internet pa caltener “el contactu directu con Asturies”. Abierta yá esa llinia de cooperación, el Principáu y el Gobiernu uruguayu busquen agora el mou más afayadizu de da-y puxu al Centru de Formación del Escritor del país sudamericanu, en plenu procesu de llanzamientu y concebíu, según Vallarino, pa incentivar la creación lliteraria de calidá. “N’Asturies sedría importante una iniciativa asina”, afirmó’l director de la Biblioteca Nacional uruguaya. Raúl Vallarino, que tien traducida al asturianu por Adolfo Camilo Díaz la so obra de narrativa ‘Los suaños del delanteru centru’, compareció esta mañana n’Uviéu xunta’l director xeneral de Promoción Cultural y Política Llingüística, Carlos Madera, que llamentó’l retrasu del vuelu nel que la so homóloga nel ministeriu uruguayu viaxa p’hacia Asturies. La so llegada ta prevista pa esta tarde. 21 de xunetu, 2004 0 FacebookTwitterPinterestEmail
Lliteratura La Selmana Negra vendió 41.000 llibros, un 25 por cientu más que na edición anterior by asturnet 18 de xunetu, 2004 La XVII Selmana Negra pieslla con mayor consumu de lliteratura que n’años anteriores. Según los organizadores del certame policiacu, qu’ayeri finó en Xixón depués de nueve xornaes de programación continua, nel recintu ‘negru’ despacháronse esti añu un total de 41.070 llibros, lo que supón un 25 por cientu más de ventes que na edición de 2003. Tala cifra val-y a la organización de la Selmana pa calcular que los llibreros aconceyaos nel eventu policiacu vendieron al públicu más de 4.100 llibros diarios y despacharon una media estimada de 455 exemplares cada hora. L’aumentu nes ventes prodúzse nuna edición que’l director de la Selmana Negra, Paco Ignacio Taibo II, presentara como especialmente atenta a la lliteratura frente al gran potencial festivu y gastronómicu’l certame. Nesti sen, 131 autores d’estremaos xéneros asoleyaron la so esperiencia en creación lliteraria nes presentaciones y alderiques qu’acoyó l’eventu ‘negru’, procedentes d’España, Arxentina, Cuba, México, Alemania, Francia, Estaos Xuníos, Italia y Grecia. No que cinca a l’asistencia de públicu, los númberos nun cambien sustancialmente respecto a años anteriores. Los responsables del certame de lliteratura policiaca cifren n’alrodiu d’un millón de persones la cifra total de visitantes que pasaron pol recintu de la Selmana Negra nos nueve díes completos que se prollongó’l certame. 18 de xunetu, 2004 0 FacebookTwitterPinterestEmail