Sociedá El CMPA centra la inauguración de los Alcuentros de Cabueñes na represión llingüística by asturnet 25 de setiembre, 2006 La situación llingüística y la denuncia sobre los 6 militantes proderechos llingüísticos centraron l’actu inaugural de los Alcuentros de Mocedá de Cabueñes. El presidente del CMPA vindicó nel so discursu d’apertura la llibertá d’espresión y la pluralidá política “recoyíes na Constitución española”. Feito recordó continua represión que se ta faciendo a los y les militantes de Xunta Moza por mor de les protestes cíviques que vienen desenvolviendo sobre’l gobiernu asturianu. Pa Feito “el derechu a la llibertá d’espresión ye ún de los Derechos Fundamentales afitaos na nuesa Constitución, y xunto col principiu del pluralismu políticu constitui ún de los pegoyos sobre los que se sofita’l nuestru sistema democráticu”. Nel actu xunta a Paulino Feito participaron tamién el conceyal de Promoción Económica, José María Pérez López; la directora del Institutu Asturianu de la Mocedá, Carmen Barrera Fernández; la presidenta de la Comisión de Mocedá de la FEMP, Pilar Pérez Lapuente; el responsable de Participación y Promoción Asociativa del Conseyo de la Mocedá d’España; Javier Igareda Pañeda, y el presidente del Conseyu de Mocedá de Xixón Jordán Suárez. Los Alcuentros de Cabueñes qu’entamen güei cuenten cola participación de 140 mozos y moces del mundu asociativu asturianu y latinoamericanu. Cabueñes ufre demientres esta selmana una perimportante actividá cultural na que destaca’l ciclu Arenes Movedices, nel que’l colectivu FiumFoto desenvolverá actividaes alrodiu la temática de los alcuentros. Pa más información: Conseyu de la Mocedá d’Asturies Conseyu de la Mocedá de Xixón Cabueñes 2006 Xunta Moza 25 de setiembre, 2006 0 FacebookTwitterPinterestEmail
Sociedá Areces promete meyorar los tresportes y exenciones nel Impuestu de Sucesiones nel Debate del Estáu de la Rexón by asturnet 25 de setiembre, 2006 El presidente del gobiernu asturianu, Vicente Álvarez Areces, foi l’encargáu d’abrir ayer la xornada inaugural del Debate sobre la Orientación Política Xeneral del Conseyu de Gobiernu, popularmente conocíu como Debate del Estáu de la Rexón, y fízolo prometiendo una serie d’exencies nel Impuestu de Sucesiones asina como la meyoría de los tresportes asturianos con un tranvía que conecte les ciudaes d’Uvieu, Siero y Llanera. Un Centru d’Investigación en Biomediciona, el Centru de Tecnoloxíes Llimpies de Llangreu, el Parque Tecnolóxicu de Mieres y el Centru Tecnolóxicu de la Madera de Siero, foron otros de los anuncios d’un Areces pletóricu que se felicitó por tener ‘la meyor Asturies que tuvimos nunca’. La intervención del presidente, Vicente Álvarez Areces, tachada de ‘trunfalista’ polos sos socios de gobiernu, abría l’últimu debate de l’actual llexislatura. Tres del anunciu de que los Presupuestos rexonales van pasar de los 3800 millones, lo que supón una xubida de más del 7%, Areces comprometió una rebaxa tributaria nel Impuestu de Sucesiones que suponga la exención pa los heriedos que reciban los fíos más pequeños de 21 años asina como les persones con una discapacidá mui grande. Pero les promeses del cabeza de gobiernu nun quedaron ehí, y na so intervención de cuasi dos hores tamien dio anuncia a un proyectu d’ordenación del territoriu pa la zona d’Uvieu, Siero y Llanera, nel que destaca un tren-tram (mediu de tresporte qu’entemez les característiques propies del ferrocarril coles del tranvía) que conecte les árees universitaries, col hospital, los centros comerciales y les árees industriales colos prinicipales núcleos de población d’estos conceyos. Sobre l’apoyu del gobiernu del estáu español al asturianu, Areces manifestó que se va ver traducíu, ente otres coses, nel empiezu pal añu qu’entra del tramu Unquera-Llanes de l’Autovía’l Cantábricu, asina como na terminación de siete tramos más na parte occidental de la mesma. El proyectu de desarrollu del Centru d’Investigación de Biomedicina, y tres centros financiaos con fondos mineros como son el Centru de Tecnoloxíes Llimpies de Llangreu, el Parque Tecnolóxicu de Mieres y el Centru Tecnolóxicu de la Madera en Siero, amás del aumentu de les ayudes a la mocedá y a los conceyos, foron otres de les promeses del presidente asturianu nun debate que sigue esta mañana na Xunta Xeneral del Principáu cola intervención de Noemi Martín, portavoz d’Izquierda Xunida d’Asturies. 25 de setiembre, 2006 0 FacebookTwitterPinterestEmail
Sociedá Vicente Álvarez Areces: “Tamos encantaos de defender la llingua” by asturnet 25 de setiembre, 2006 La portavoz del grupu parlamentariu d’IX-BA, Noemí Martín, usó esta mañana’l so turnu de replica nel Debate d’Orientación Politica del Principáu pa tratar ente otros temes la política llingüística seguida pol gobiernu nesta última llexislatura. La portavoz d’IX, que reclamó mayor esfuerzu presupuestariu nesta materia y la desaparición de les ‘abondes torgues’ qu’atopa’l Plan de Normalización, desixó-y al presidente asturianu ‘la obligación de desarrollar esti plan na so totalidá’. Álvarez Areces, na so defensa, enumberó ‘los abondos apoyos’ mostraos, como la presencia de la llingua na educación, nes publicaciones y nos medios de comunicación, llabor que resumió diciendo que ‘tamos encantaos de defender la llingua’. Les declaraciones d’Alvarez Areces en materia llingüística volvieron ser tachaes pola portavoz d’IX-BA, Noemí Martín, como ‘trunfalistes’, quien tamien pidió qu’esti debate ‘valga pa facer un balance colo bono y lo malo’ de la llexislatura. Por eso, Martín tamien alvirtió’l que so partíu va pidir responsabilidaes al so sociu de Gobiernu (PSOE) pola edición del llibru ‘Construyendo Asturias’ si ye que se demuestra que collaboraron cola mesma. ‘Somos testigos de que’l gobiernu como órganu colexáu nun tuvo nada que ver con esa espublización, pero queda por aclariar si dalguna persona tuvo dalgo que ver’, dixo Martín. No tocante a esti tema, Areces aseguró que nun tien ‘incoveniente’ en que dalgún miembru del so Gobiernud dea desplicaciones sobre la espublización. 25 de setiembre, 2006 0 FacebookTwitterPinterestEmail
Sociedá Xixón recupera la toponimia tradicional by asturnet 21 de setiembre, 2006 El Conseyu de Gobiernu aprobó a la fin el Decretu pol que se determinen los más de setecientos topónimos oficiales del conceyu de Xixón, faciendo d’esta manera que sían yá doce los conceyos que recuperen oficialmente la so toponimia tradicional. Asina, Xixón, seis meses depues d’aprobala en Plenu, súmase a Carreño, El Franco, Llanes, Gozón, Llangreu, L.lena, Villaviciosa, Sariegu, Bimenes, Cabranes y Nava que yá determinaron la so toponimia. Na busca de terminar coles polemiques que llevantaron dalgunos topónimos como Valdornón o Cimavilla, l’Ayuntamientu xixones anunció que tol trabayu fechu nestos dos últimos años va vese espeyáu nun llibru que va recoyer, non sólo la nueva toponimia del conceyu, sinón tamien la historia de cadún de los nomes, el so orixe y la so razón de ser. 21 de setiembre, 2006 0 FacebookTwitterPinterestEmail
Sociedá Mitos galleguistes, lliteratura y arquitectura tradicional nes fiestes de Samiguel na Caridá by asturnet 18 de setiembre, 2006 La fala va primar na Selmana Cultural que, con motivu de les fiestes de Samiguel, ta celebrándose estos díes na Caridá. Asina, Ignaciu Llope falará de dalgunos mitos galleguistes sobre l’Occidente asturianu mentes que’l xeógrafu cuañes Benxamín Mendez va dar una conferencia sobre la casa tradicional na marina occidental. Los escritores y miembros de Xeira Fredo de Carbexe y Xose Miguel Suárez Fernández van presentar les sos obres, ‘Soños de pellegrin’ y ‘Unde letras falan (antoloxía da poesía en gallego-asturiano (1891-2006)’. Mañana miercoles 20 a les siete y media la tarde, el Salón de Sesiones del conceyu va acoyer una conferencia d’Ignaciu Llope que lleva por títulu ‘Dalgús mitos galleguistas sobre el Occidente d’Asturias’. El vienres 22, a les ocho, el mesmu Salón de Sesiones va celebrar un actu lliterariu nel que dos miembros de Xeira van presentar les sos últimes obres. De manera que Fredo de Carbexe va dar a conocer el so poemariu ‘Soños de pellegrín’ mentes que Xose Miguel Suárez Fernández va facer lo propio cola antoloxía de poesía en gallego-asturiano ‘Unde letras falan’ qu’abarca dende l’añu 1891 hasta anguaño. Al cabu, el sábadu 23, tamien a les ocho, el xeógrafu cuañes Benxamín Mendez va pronunciar una conferencia sobre ‘A casa tradicional na marina occidental asturiana’. 18 de setiembre, 2006 0 FacebookTwitterPinterestEmail
Sociedá El xuiciu a los seis militantes de la Xunta queda aplazáu hasta’l 27 d’ochobre by asturnet 17 de setiembre, 2006 El xuiciu a los seis militantes de la Xunta pola Defensa de la LLingua Asturiana pola so participación, el pasáu 14 de xunu, nuna manifestación a favor de la oficialidá de la llingua asturiana tres d’un actu d’inauguración en Llugones al qu’asistió’l presidente Vicente Alvarez Areces, foi aplazáu hasta’l próximu vienres 27 d’ochobre, en cuenta de la primer citación que lu convocaba pa esti 25 de setiembre. Por esta razón, la concentración d’apoyu a los militantes denunciaos queda convocada pa la una y media d’esi día, na cai Párrocu Fernández Pedrera, delantre los xulgaos de La Pola Siero. Va más de tres años que la Xunta pola Defensa de la Llingua Asturiana empezaba una nueva campaña pa denunciar la situación de marxinación de la llingua asturiana y de los derechos llingüísticos de les persones falantes d’asturianu, que ye popularmente conocida como ‘la Pita’, pol personaxe qu’acompaña nos actos públicos al presidente del gobiernu asturianu. La Xunta pola Defensa de la Llingua Asturiana denuncia que vien sufriendo presiones pa renunciar a esta campaña, pesie a que les actuaciones tán basaes na denuncia y protesta contra la marxinación que carez la llingua asturiana, pero siempre de manera respetuosa y non violenta, ensin torgar nunca el desarrollu normal de los actos nos que se convoca. ‘Nos últimos meses, les persones que participen nestos actos son sistemáticamente identificaes y reteníes pola policía, y yá en cuatro ocasiones entamáronse procesos contra elles, que finalmente quedaron en nada pola falta de rigor de les denuncies’, asegura la organización nun comunicáu públicu. Pa la XPDLLA, ‘los derechos de llibertá d’espresión y de crítica política son exes fundamentales de cualquier democracia. El so exerciciu, siempre respetuosu, ha ser protexíu de cualquier tentación de coacción per parte de los poderes públicos’, razón pola que convoca una manifestación d’apoyu a los sos militantes ente’l xulgáu nel que se va celebrar un xuciu de faltes contra ellos, el próximu 25 de setiembre. 17 de setiembre, 2006 0 FacebookTwitterPinterestEmail
Sociedá L’Academia de la Llingua entrega los diplomes de los XXIV Cursu de Branu y vuelve reclamar la titulación universitaria en Filoloxía Asturiana by asturnet 17 de setiembre, 2006 El pasáu vienres día 15 de setiembre, l’Aula Magna de la Universidá d’Uvieu acoyó l’actu de pieslle de los XXIV Cursos de Branu de l’Academia de la Llingua Asturiana cola presencia del Rector de la Universidá d’Uvieu. Nel actu de clausura y entrega de diplomes a los 150 alumnos matriculaos nos siete niveles que s’impartieron, la presidenta de l’ALLA volvió reclamar la titulación en Filoloxía Asturiana. A lo llargo d’entrega de diplomes, tomaron la palabra tanto’l director de los Cursos de Branu, Xose Antón González Riaño, que valoró mui positivamente’l resultáu de los cursos, el rector de la Universidá d’Uvieu, Juan Vázquez, como la presidenta de l’ALLA, Ana Mª Cano, qu’aprovecho la so intervención pa declarar que ‘l’Academia de la Llingua y la Universidá ta afitada y funciona como tien que funcionar’, anque, sicasí, recalcó qu’existe un ‘gran tema pendiente, el del allugamientu de los estudios de Filoloxía Asturiana dientro de la enseñanza reglada nes titulaciones de la Facultá de Filoloxía’. Na última edición de los cursos de l’Academia n’Ibias participaron un total de 150 alumnos matriculaos nos siete niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, Cursu de Capacitación pa la Traducción al Asturianu —toos tres inxertos nos Cursos d’Estensión Universitaria de la Universidá d’Uvieu—, los cursos de Nueves ferramientes informátiques d’aplicación al asturianu, Patrimoniu arqueolóxicu, artísticu y etnográficu d’Asturies, y la segunda fase del Curso de Capacitación en Gallego-Asturiano. Toos ellos recibieron los dipl????½?r?Domes acreditativos pola so participación. 17 de setiembre, 2006 0 FacebookTwitterPinterestEmail
Sociedá Los actos del Día d’Asturies volvieron centrar el debate na reforma estatutaria by asturnet 10 de setiembre, 2006 Los actos de celebración del Día d’Asturies de los partíos políticos asturianos volvieron a centrar el debate na próxima reforma estatutaria y nes elecciones de mayu de 2007. Asina, el coordinador xeneral federal d’Izquierda Xunida, Gaspar Llamazares, metía priesa en Xixón pa la reforma del Estatutu d’Asturies porque, de retrasalu más, ‘les posibilidaes d’arrancar compromisos financieros y d’inversiones del Estáu van ser mui remotes’. Reforma que ye ‘un procesu trescendental’, como lu calificó’l presidente del Principáu, Vicente Álvarez Areces, nos actos oficiales organizaos en Nava. Pela so parte, el Bloque por Asturies avisó a IX dende La Pola L.lena de que ‘les aliances de cara a les próximes elecciones hai que faceles cuanto primero meyor’. El coordinador xeneral federal d’IX, Gaspar Llamazares, manifestó nel actu políticu organizáu pol so partíu en Xixón que lo más importante del procesu de reformes estatutaries ‘nun ye’l debate identitariu, sinón los compromisos económicos’, razón pola que llamó a afalar la situación n’Asturies porque, de retrasala más, ‘les posibilidaes d’arrancar compromisos financieros y d’inversiones del Estáu van ser mui remotes’. Sobre esti tema, Llamazares dixo que yera cuanto menos chocante que’l PP ‘nos sitios que gobierna súmase a les reformes ya inclusive fai bandera d’elles, mentes qu’equí niega’l pan y el sal a los asturianos’. Jesús Iglesias, coordinador xeneral d’IX n’Asturies, tachó tamien la postura de la FSA, que ‘n’otros territorios acepta mayor autogobiernu y la cooficialidá de les sos llingües, mentes qu’equí nun lo fai’. Dende Nava, el presidente del Principáu, Vicente Álvarez Areces, aseguraba que ‘somos profundamente asturianos y españoles’ y tamien señaló la necesidá ya importancia del debate sobre la reforma del Estutu Asturianu. ‘Asturies nun ha de quedar fuera d’un procesu trescendental’, dixo’l llíder socialista, quien mañana va defender nel Parlamentu asturianu la reforma estatutaria. Sin embargo, el Partíu Popular, pesie a les crítiques del restu de formaciones, sigue manteniendo que nun ye’l momentu pa facer un debate sobre la reforma del Estatutu n’Asturies y en boca del so presidente, Ovidio Sánchez, pidió que nun hubiere ‘priesa’ pa esti alderique, posponiendolu pa depues de les elecciones de 2007. Sobre estes elecciones autonómiques tamien xiró’l discursu del Bloque por Asturies que celebró’l Día d’Asturies en L.lena presentando al so candidatu a l’alcaldía del conceyu, Agripino Perez. El portavoz del Bloque, Rafael Palacios, mandó un mensaxe a IX sobre les aliances polítiques de cara a les elecciones, asegurando qu’han de facese ‘cuanto primero meyor’. L’actu l.lenizu tamien valió pa presentar al Bloque de les Mocedaes Asturianistes y al so portavoz, Hector Torre. Otros grupos políticos asturianos ficieron tamien la so propia celebración del Día d’Asturies. Asina, Unión Asturianista organizó un actu delantre del palaciu de Revillagigedo de Xixón nel que los sos presidentes, Xuan Xose Sánchez Vicente y Sergio Marques lleeron entrambos discuros pa facer depues una ofrenda floral ente la estatuta de Pelayo. YAndecha Astur llevó les sos reivindicaciones a la cai con una manifestación que salió al mediudía de la estación de la Renfe d’Uvieu. Pero tamien la Xunta pola Defensa de la Llingua Asturiana tuvo presentes na celebración oficial del Día d’Asturies en Nava. A lo llargo de tol programa festivu, asina como nes siguíes retresmisiones en directu de la TPA, pudo vese a la Pita pidiendo la oficialidá de la llingua asturiana mesmo que se pudieron lleer los carteles que teníen los sos militantes faciendo visible la reivindicación. 10 de setiembre, 2006 0 FacebookTwitterPinterestEmail
Sociedá Darreu espubliza’l segundu númberu de la revista Irguite nel Día de la Nación Asturiana by asturnet 10 de setiembre, 2006 La formación nacionaliega moza Darreu sacó a la cai’l segundu númberu de la so revista Irguite con motivu del día de celebración de la Nación Asturiana. Nesti nuevu númberu, que se repartió na manifestación qu’Andecha Astur celebró n’Uvieu’l pasáu vienres, el númberu de páxines y conteníos vióse ampliáu, respective al anterior, destacando un especial d’historia a cargu de Rafael Rodríguez Valdes asina como una entrevista al grupu musical K-Nalón. Col títulu ‘Visiones de los asturianos que combatieron el güelpe d’estáu (1936-1937)’ Rafel Rodríguez Valdes firma l’Especial Hisotira del segundu númberu de la revista Irguite de Darreu nel que tamien se puede atopar una entrevista col grupu de hip hop K-Nalón. Como novedaes nesti númberu inclúyese la sección ‘Opinión Moza’. Amás la revista cuenta col habitual resume de l’actualidá d’estos meses de “Asturies’06”, “El mecigayu” con información de llibros, música, revistes, internet.. y el “Puestu Material”. 10 de setiembre, 2006 0 FacebookTwitterPinterestEmail
Sociedá El V Congresu de Dialectólogos y Xeollingüistes de Portugal da-y reconocencia internacional a la llingua asturiana by asturnet 6 de setiembre, 2006 El V Congresu de Dialectólogos y Xeollingüistes aconceyáu na Universidade do Miño, na ciudá portuguesa de Braga, axuntó a casi un cientu d’especialistes de 26 países ente los díes 4 y 8 de setiembre. Ellí, el profesor García Arias, ex Presidente de l’Academia de la Llingua Asturiana, espunxo nunca conferencia multitudinaria’l desarrollu del tema ‘De la dialectoloxía a la llingua nel dominiu llingüísticu ástur’. El resultáu del interes que llevanta la recuperación del asturianu alvirtióse nesti Congresu Internacional nel fechu de que la llingua asturiana tuviere presente nun llugar d’honor, al acutase una de les xuntes plenaries del Congresu al desarrollu del tema «De la dialectología a la lengua en el dominio lingüístico ástur», conferencia pronunciada pol profesor García Arias, ex-Presidente de l’Academia de la Llingua Asturiana. La conferencia celebróse’l día 5 de setiembre, con muncha asistencia de públicu. Tamien el mirandes foi oxetu d’atención gracies a la participación del Dr. Antonio Bárbolo Alves, que-y dedicó un importante espaciu n’otra xunta plenaria del día 6. 6 de setiembre, 2006 0 FacebookTwitterPinterestEmail