Sociedá L’Observatoriu fai balance de la política llingüística nel 2005 by asturnet 20 de xineru, 2006 L’Observatoriu presentó ayeri en rueda de prensa l’informe ellaboráu por esti “órganu asesor de política llingüística” pa valorar los avances que se fixeron nel últimu añu sobre les actuaciones previstes nel Plan de Normalizacion del Asturianu. Na rueda de prensa, na que tuvieron tres de los sos miembros, Xuan Bello, Vanessa Gutierrez y Ismael González Arias, apreciáronse los tímidos avances daos nesi sen, dándo-y especial importancia a los llabores de la Xunta Asesora de Toponimia, anque tamien se llamentaron de “lo muncho que queda por facer”. Nel informe presentáu pol Observatoriu, y que se va facer llegar a toles fuerces polítiques, valórense sobre manera tres aspectos de l’actual política llingüística: “el procesu de recuperación y d’oficialización toponímica entamáu pola Xunta Asesora de Toponimia; l’aumentu del presupuestu de la Oficina de Política Llingüística; y el fomentu a la creación y funcionamientu de los Servicios de Normalización Llingüística nos conceyos”. Sicasí, l’Observatoriu fai un repasu críticu de dalgunes de les polítiques previstes nel Plan de Normalización, nes qu’echa en falta dalgunes midíes. Por exemplu, no tocante al presupuestu de la Oficina, afirma que “nun pue cayenos embaxo que tovía nun se superaron los 2360000 € del añu 1998 y que les necesidaes d’acuerdu col actual Plan andaríen, faciendo un cálculu bien modestu, alredor de los 2900000 €”. Pesie a que’l trabayu de la Xunta Asesora de Toponimia ye seguramente’l más valoráu de tolos pasos daos a lo llargo del 2005, l’Observatoriu echa en falta dalgunes midíes complementaries a la oficialización toponímica, qu’aseguren l’usu real d’esos topónimos oficiales. Como lo seríen actuaciones polítiques de la Conseyería que garantizaren esi usu n’organismos y instituciones del Principáu, nos Ayuntamientos, nos medios de comunicación y nes empreses, asina como campañes d’información y sensibilización dientro los conceyos. Per otra parte, l’Observatoriu llamenta la “inhibición inesplicable de l’Academia de la Llingua Asturiana nun procesu de trabayu institucional en comuña, onde tan necesaria ye la so aportación”. No tocante a la Rede de Servicios Municipales de Normalización, l’informe critica la falta d’un compromisu más decidíu per parte del Principáu, de forma “esplícita y efectiva, dende’l puntu de vista políticu y económicu”, considerando “una carencia grave” que nun se concrete esi apoyu na firma de Convenios colos conceyos, que-yos dieren “continuidá y estabilidá a dichos Servicios”. Otru motivu d’esmolición pal Observatoriu de Política Llingüística ye la Radio Televisión del Principáu d’Asturies, al faltar “l’asturianu de los criterios de selección del personal, y pol fechu de que nun esisten mayores precisiones sobre la presencia de la llingua asturiana, que sigue siendo un enigma”. Poro, considera necesaria “la creación dientro del ente d’un órganu asesor llingüísticu, onde participen la Oficina de Política Llingüística, l’Academia de la Llingua Asturiana, la Universidá d’Uvieu y les asociaciones periódistiques”. A lo llargo de la rueda de prensa, l’escritor y miembru del Observatoriu, Xuan Bello, afirmó ente les preguntes de los periodistes que “queda muncho tovía pal aprobáu”, en referencia a l’actuación del Gobiernu d’Asturies, y aseguró que taba convencíu de que la postura que mantienen cola llingua los partíos mayoritarios asturianos respuende más a posiciones “táctiques qu’ideolóxiques”. Bello dixo que se negaba a creyer que “políticos progresistes, como Javier Fernández, de verdá rechacen el reconocimientu d’un derechu”, en clara referencia a les últimes declaraciones del Secretariu de la FSA en rellación a la reforma estatutaria. 20 de xineru, 2006 0 FacebookTwitterPinterestEmail
Sociedá Izquierda Xunida apuesta pol federalismu y l’ampliación del autogobiernu en toles comunidaes by asturnet 20 de xineru, 2006 El coordinador xeneral d’Izquierda Unida Gaspar Llamazares defendió esti xueves 19 “el binomiu federalista: autonomía y solidaridá” tres l’aconceyamientu de les diecisiete agrupaciones territoriales de la coalición pa tratar de les estratexes polítiques énte la estructura autonómica del estáu. El documentu aprebáu na reunión apuesta pola ampliación del autogobiernu en toles comunidaes. La reforma de los estatutos d’autonomía ye la fórmula escoyida por IU y les sos dieciesiete federaciones pa redefinir la nueva realidá territorial. Ési ye’l conteníu esencial del aconceyamientu celebráu en Madrid pa coordinar el llabor de les agrupaciones nes diferentes comunidaes autónomes y xunise nun proyectu común nesti tema. Respective al Estatut catalán Llamazares amosó’l so convencimientu de que l’ alcuerdu ye posible si se pon en marcha lo que definió como “binomiu federalista: autonomía y solidaridá”, una fórmula que ye la que se va acabar imponiendo, aseguró. El dirixente estatal d’IU faló de la necesidá d’algamar un pauto “bien lluego” col fin de “nun dar pábulu a la desestabilización de la derecha” y, nesi sen, opinó que les negociaciones habíen consolidase no que tan toos d’alcuerdu, como nel asuntu de les competencies, y “avanzar no pendiente”, el debate sobre el términu nación y sobretoo, la financiación. 20 de xineru, 2006 0 FacebookTwitterPinterestEmail
Sociedá Palacios diz que la responsabilidá sobre la llingua nun puede caer namás nos asturianistes by asturnet 20 de xineru, 2006 El portavoz nacional del Bloque por Asturies y director de l’Axencia Asturiana de Cooperación de la Conseyería de Xusticia y Esteriores, Rafael Palacios afirmó esti viernes 20, na rueda de prensa que dio la formación nacionalista alrodiu la reforma l’Estatutu, que “l’asturianismo amosó ser capaz de mantener les sos posiciones polítiques al través del diálogo” y qu’hai otres fuerces polítiques y sociales, qu’a xuiciu del dirixente nacionalista: “nun saben tar a l’altura de la situación, faciendo declaraciones públiques sectarias ya irresponsables que cierren la puerta al diálogu, al alcuerdu y al consensu”. Nesi sen, Palacios manifestó que “la responsabilidá de que la reivindicación llingüística n’Asturies nun acabe nun conflictu de consecuencies imprevisibles, nun puede recaer esclusivamente nes fuerces asturianistes”. Pal dirixente del Bloque, les asturianistes son “les Únicas fuerzas polítiques, hasta esti momentu, que ficieron y faen tolos esfuerzos pa llegar a alcuerdos de mínimos” y añadió que “frente a les posiciones democrátiques, respetuoses y responsables de los defensores de la llingua asturiana, alcontrámosnos permanentemente l’insultu, la descalificación y les posiciones belixerantes pa col nuestru idioma y la nuestra identidad, que namás buscan l’enfrentamientu”, dixo. El portavoz de la formación nacionalista personalizó -ensin nomalu- nel secretariu xeneral de la FSA, Javier Fernández, les posiciones belixerantes contra la llingua al recordar les declaraciones nes que’l dirixente socialista falaba de la oposición del so partíu a “cualquier cláusula d’imposición” nel tema de la oficialidá: “Amás de nun correspondese cola verdá y tresmitir un mensaxe provocador, gustábanos que fuesen igual de belixerantes coles que son verdaderes cláusules d’imposición que tenemos de tragar ensin chistar los ciudadanos y ciudadanes d’esti país, como pueden ser, ente otres: el peaxe del Güerna, l’esiliu económicu de los nuestros xóvenes o la reconversión económica permanente que soportamos dende fai más de 20 años”, declaró. Rafael Palacios encamentó a “la responsabilidá de toos y toes, a la responsabilidá de les fuerces polítiques asturianes, pa nun convertir el reconocimientu d’un derecho humanu, nun conflictu d’imprevisibles consecuencies. Nel mesmu sen espresárase enantes na rueda de prensa, el secretariu xeneral del Bloque por Asturies Roberto Colunga que refiriéndose al nuevu estatutu p’Asturies dixo que tenía de ser de la negociación y el diálogo abierto y sincero entre todas las fuerzas políticas, sociales e instituciones asturianas, con el objetivo de ser un Estatuto de Autonomía frutu “del más ampliu consensu y que nun escluya a nenguna parte de la sociedá asturiana”. 20 de xineru, 2006 0 FacebookTwitterPinterestEmail
Sociedá La memoria hestórica y les intromisiones de Galicia na revista Entrambasaguas by asturnet 19 de xineru, 2006 La revista Entrambasaguas, editada pola Secretaría Llingüística del Navia-Eo, algama el so númberu 22 con una nueva entrega dedicada a diversos conteníos culturales referenciaos na estaya más occidental d’Asturies. La recién polémica poles intromisiones gallegues, la memoria hestórica, xunto a la escritura na fala eonaviega son dellos de los conteníos d’esti nuevu númberu. La revista ábrese con un artículu de Tania Cascudo Loza sobre “A memoria dos anos peridos. Un recordo de la guerra civil”, al que sigue un reportaxe sobre l’establecimientu “Casa Lidia” de Balmonte y otru sobre la presencia de As Figueiras nun artículu del New York Times. La ruta del estraperlu ente Galicia y Asturies, xunto a diversos temes d’interés local y delles collaboraciones lliteraries completen el númberu 22 d’Entrambasaguas. Les recientes intromisiones de diversos sectores gallegos na rexón eonaviega centra l’artículu del responsable de la Secretaría Llingüística de la zona, Xosé Antón González Riaño, tituláu: “¿QUé ye pasa a Galicia con Asturias?”. La publicación pieslla cola avezada axenda, la sección El Arco da Veya dedicaca a colaboraciones d’escolinos y artículos sobre testos recuperaos en gallego-asturiano. 19 de xineru, 2006 0 FacebookTwitterPinterestEmail
Sociedá El Gobiernu va aprobar la prósima selmana la so propuesta de reforma d’Estatutu by asturnet 19 de xineru, 2006 La Conseyera de Cultura y portavoz del Gobiernu del Principáu, Ana Rosa Migoya, anunció esti miércoles 18 tres la reunión del executivu que’l documentu base de la propuesta de reforma del Estatutu va aprobase la prósima selmana. Una vez avaláu pol Conseyu de Gobiernu el testu habrá enviase al Conseyu Consultivu pa qu’emita’l dictame sobre’l qu’entamar el procesu de reforma. Migoya informó que va ser na reunión del martes que vien cuando’l gobiernu que preside Vicente Álvarez Areces dea’l vistu bonu al documentu sobre’l nuevu estatutu. L’anunciu de la portavoz del Principáu coincide nel tiempu coles declaraciones del secretariu xeneral de la FSA, Javier Fernández, manifestando que’l so partíu contemplaba tener lista la reforma d’equí a un añu col consensu de los otros grupos políticos. 19 de xineru, 2006 0 FacebookTwitterPinterestEmail
Sociedá El debate sobre’l nuevu Estatutu escomienza con abondes diferencies ente PSOE, IX-BA y PP by asturnet 18 de xineru, 2006 La pitición al Conseyu Consultivu del dictame sobre la reforma del Estatutu podía producise esta mesma selmana y con ello l’empiezu de los trámites colos que se va entamar el debate hacia l’ampliación del autogobiernu. A puntu de principiar l’alderique les diferencies ente les tres fuerces representaes na Xunta Xeneral sobre la reforma autonómica son abondo estremaes como pa barruntar un alcuerdu. La última aportación al discutiniu facíala la conseyera de Vivienda y Servicios Sociales, Laura González, que buscó un puntu d’alcuentru ente les discrepancies de la FSA ya Izquierda Xunida-Bloque por Asturies sobre la necesidá de la reforma y el ritmu d’entamala asegurando en declaraciones a Canal 10 que: “na reforma del Estatutu nun tenemos que ser los primeros, pero tampoco los últimos”. Pa la conseyera d’IX-BA nin siquier la importante diferencia que separa al so partíu de los socialistes en materia llingüística había ser insalvable: “la llingua nun tien por què ser un escollu pa camudar l’Estatutu”, aseguró. Nos últimos díes el responsable de la Federación Socialista Asturiana Javier Fernández dibuxara les llinies esenciales de la reforma que quier la so formación, una reforma “ensin idea identitaria, como ampliación de competencies p’allegar l’administración a los ciudadanos” y na que la cooficialidá del asturianu taría descartada. A estes declaraciones retrucaran el coordinador d’Izquierda Xunida d’Asturies Jesús Iglesias afirmando que’l PSOE “tarrecía la reforma” y tocante a la llingua qu’ésta “corría seriu peligru de supervivencia” si les posiciones socialistes nesti asuntu triunfaben. Nel mesmu sen espresárase’l conseyeru Francisco Javier García Valledor qu’aseguró respective a la rocea de los socialistes asturianos a apostar pol autogobiernu que “la FSA va a la reforma como oveya al Macelo”. La posición de la otra fuerza política de la Xunta Xeneral, el Partido Popular, nun puede tar más allonxada de les de PSOE ya IX-BA y nos últimos meses el so másimu cabezaleru, Ovidio Sánchez lleva recalcando que la so formación nun considera necesaria la reforma asturiana y menos “mientres nun se solvente’l problema nacionalista n’España”, como repite constantemente’l presidente de los populares d’Asturies. Col debate esparmentáu nesos términos discrepantes, el Conseyu de Gobiernu del Principáu podía solicitar al Conseyu Consultivu el so dictame pa entamar los trámites del nuevu testu estatutariu. El secretariu xeneral de la FSA, Javier Fernández, aseguró esta mesma selmana que la intención del so partíu ye tener la reforma fecha d’equí a un añu, un plazu sobre’l que tampoco paecen tar d’alcuerdu los sos socios de pautu de gobiernu d’IX-BA nin la oposición del PP. 18 de xineru, 2006 0 FacebookTwitterPinterestEmail
Sociedá Preséntase’l Mapa Asturianu de Servicios Sociales by asturnet 17 de xineru, 2006 Mañana miercoles 18 de xineru, a les once la mañana, el Círculu de Belles Artes de Madrid va acoyer la presentación del Decretu 108/2005 que configura’l Mapa Asturianu de Servicios Sociales. Un plan pioneru nel conxuntu del estáu español que permite concretrar el desarrollu del sistema públicu de servicios sociales. La Llei 1/2003 del Principáu d’Asturies, de Servicios Sociales, impunxo un nuevu marcu llegal que supunxo un importante avance nel sistema públicu de protección de la nuestra Comunidá Autónoma, de tal forma que non solo s’ofrecíen los medios adecuaos p’abordar nuevos retos sinón que tamien llantaba les bases d’un ordenáu sistema públicu de servicios sociales. En virtú d’esta norma, el pasáu 27 d’ochobre aprobóse’l Decretu 108/2005 pol que se crea’l Mapa Asturianu de Servicios Sociales. Trátase del desarrollu reglamentariu de la Llei 1/2003, pioneru a esti nivel nel conxuntu del Estáu, que permite concretar la ordenación del nuestru sistema públicu de servicios sociales, mesmo qu’hasta agora se fixo colos sistemes públicos educativu y sanitariu. El Mapa Asturianu de Servicios Sociales ye’l resultáu d’un llargu exerciciu de diseñu participativu con axentes sociales, alministraciones locales y organizaciones ciudadanes que permitieron algamar un ampliu consensu alrodiu de les prioridaes, la rede de protección, los nuevos recursos y la so organización. Amás, constitúi una ferramienta que permite siguir na consolidación d’un sistema públicu de protección dirixíu al conxuntu de la sociedá asturiana. 17 de xineru, 2006 0 FacebookTwitterPinterestEmail
Sociedá XEGA pide que nun se subvencione al Festival d’Aristébano por homófobu by asturnet 17 de xineru, 2006 Xente Gai Astur (XEGA) considera “ablucante” y “refugable” que’l Festival d’Aristébano, una folixa que reivindica al colectivu de los vaqueiros, practique la homofobia cola prohibición de que pareyes del mesmu sexu puedan casar na folixa que se celebra cada branu y qu’atrai a numberosos visitantes y medios informativos. El colectivu de gais y lesbianes piden a les administraciones que nun sofiten económicamente a la “vaqueirada”. Nun comunicáu XEGA calfica de “clara manisfestación d’homofobia” les bases feches públiques pola asociaciòn Amigos del Festival d’Aristébano, según les cuales los casorios pol llamáu ‘ritu vaqueiru’ qu’acueye esta romería cada añú en xunetu namás tán reservaos a contrayentes heterosexuales. L’ensame gai y lésbicu considera esta esclusión “ablucante y refugable cuando procede d’un colectivu -el de los vaqueiros d’alzada- qu’esperimentaron a lo llargo de sieglos non poques esclusiones y discriminaciones inxustificaes”. Pa XEGA l’argumentu esgrimíu pola asociación organizadora pa xustificar la esclusión de pareyes del mesmu sexu de los casorios n’Aristébano apelando a la tradición sirve pa caltener una discriminación que “nin en nome de la tradición nin de nenguna otra consideranza puede tener cabida na nuestra sociedá”. Xente Gai Astur defende que “les tradiciones permamentemente tán adaptándose a los tiempos actuales y los aspectos nos que nun se deban adaptar nun tienen de suponer nunca motivu de discriminación y homofobia”. El colectivu de gais y lesbianes fai un llamamientu pa que alcuerdos como l’adoptáu polos Amigos d’Aristébano “nun tengan cabida en nengún tipu d’asociación” y desixe a les administraciones municipal, autonómica y estatal, que nun apurran apoyu económicu dalu “a activadaes nes que se practique la homofobia o la discriminación, incompatibles colos valores democráticos y el respetu a la dignidá de les persones.”. 17 de xineru, 2006 0 FacebookTwitterPinterestEmail
Sociedá Denuncien la paralización de les ordenances del asturiano en Xixón by asturnet 17 de xineru, 2006 Izquierda Asturiana (IAS) denuncia nun comunicáu el retrasu en llevar a plenu les ordenances sobre usu del asturianu nel Conceyu de Xixón redactaes pola Oficina Municipal de la Llingua y entregaes a los distintos grupos políticos va más d’un añu. La formación nacionalista acusa a la conceyal de Llingua y Cultura Asturianes, Carmen Rúa, d’IX_BA, de ser la responsable de la situación por “pasividá total, plegándose a los dictaos del PSOE”. Pablo Rodríguez, portavoz d’ Izquierda Asturiana (IAS) en Xixón, señaló que “al pesar de que los miembros del equipu de gobiernu disponen del testu dende fai más d’un añu, tovía nun se llevó a Xunta de gobiernu, polo que too fai indicar que non namás nun tienen intención d’aprobalo, sinón nin tan siquier de debatir la ordenanza en Plenu”. Rodríguez estendió la responsabilidá del asuntu a los socios de gobiernu del grupu socialista: “si ye grave la responsabilidá del PSOE nesti casu pola so nula atención y sensibilidá pa colos derechos d’una parte de los ciudadanos, ye inda mayor la del so sociu de Gobiernu, IX-BA, que nun sabe o nun quier facer respetar los compromisos qu’adquirió per un llau col so electoráu y por otru al través de los pautos de gobiernu que firmó nel añu 2003”. IAS personaliza na conceyala de Llingua y Cultura Asturiana Carmen Rúa la responsabilidá última na paralización de les ordenances al considerar que “amuesa una pasividá total nesti asuntu, plegándose a los dictaos del PSOE”. Pa la formación nacionalista “estes ordenances suponen la reglamentación del usu de la llingua asturiana nel ámbitu municipal y, sin ser equivalentes a la oficialidá, garantizaríen una bona parte de los derechos llingüisticos de los falantes d’asturiano nel conceyu, unos derechos que polo visto tanto al PSOE como a IX-BA tráenlos sin cuidao”. Izquierda Asturiana cuenta que l’aprobación de les ordenances diba ser bien acoyida pola ciudadania xixonesa, remembrando que según la encuesta sociollingüística municipal del profesor Llera Ramo recientemente fecha pública, más d’un 63% de la xente del conceyu amuésase favorable a la oficialidá de la llingua asturiana. Según el representante de la formación nacionalista “estas ordenanzas suponen la reglamentación del uso de la llingua asturiana en el ámbito municipal y, sin ser equivalentes a la oficialidad, garantizarían una buena parte de los derechos lingüisticos de los hablantes de asturiano en el concejo, unos derechos que por lo visto tanto al PSOE como a IU-BPA les traen sin cuidado”. 17 de xineru, 2006 0 FacebookTwitterPinterestEmail
Sociedá L’Academia abrió’l plazu de matrícula pa la so preba de conocencia de xineru by asturnet 17 de xineru, 2006 L’Academia de la Llingua Asturiana abrió esti llunes 16 el plazu de matriculación pa la so Preba de Conocencia semestral, correpondiente a xineru. Los interesaos en concurrir al esame de la institución llingüística tienen hasta’l prósimu 26 d’esti mes pa formalizar la so inscripción. La fecha pa la celebración de la preba ye’l prósimu 28 de xineru y l’exame va consistir nun exerciciu escritu (dictáu, torna, exercicios gramaticales, redaición) y otra parte oral (conversación). La convocatoria puede consultase na web oficial de l’Academia o na sé de la institución na cai Santa Cruz, 6, 2u. d’Uviéu. Preba de Conocencia 17 de xineru, 2006 0 FacebookTwitterPinterestEmail