Sociedá Areces diz que’l PSOE ye’l que más tira pol asturianu pero niégase a da-y calter oficial by asturnet 8 d'agostu, 2006 El presidente del Gobiernu del Principáu d’Asturies, Vicente Alberto Álvarez Areces, dexó-yos claro ayeri a los sos socios de gobiernu que nun apoyaría la oficialidá del asturianu si saliere victoriosu nes elecciones autonómiques del añu qu’entra. Negando les crítiques d’Izquierda Xunida a la falta de polítiques llingüístiques, Areces aseguró que’l PSOE ‘considerámonos los verdaderos impulsores d’esa política. Si hai dalguien que tiró pol asturianu ye’l PSOE y tolo qu’anguaño tenemos ye porque vien daquella’, refiriendose a los tiempos nos que yera director provincial d’Educación. Vicente Álvarez Areces, actual presidente del Gobiernu asturianu, negó que la promoción del asturianu dende’l so gabinete fore escasa, tal y como-y echen en cara los sos socios de gobiernu d’Izquierda Xunida. ‘La so política ye dicir eso, pero nun se correspuende cola realidá’. Recordándose de los tiempos nos qu’el yera director provincial d’Educación, cuando s’empezaron a poner clases voluntaries de llingua asturiana nes escueles, Areces aseguró que’l so partíu foi’l principal impulsor del usu, difusión y fomentu del asturianu. ‘Considerámonos como los verdaderos impulsores d’esa política dende hai decadez; ayudamos a que nun se pierda una parte importante de la nuestra cultura. Y si hai una fuerza política qu’apostó pol asturianu ye’l PSOE y tolo qu’anguaño tenemos ye porque vien daquella’, manifestó. Sicasí, el presidente del Principáu dexó bien claro que, anque van seguir apostando pol fomentu del asturianu dende’l so partíu, nun van defender el reconocimientu llegal del mesmu na prósima reforma estatutaria, yá que, nes sos palabres, el nun ta d’acuerdu cola oficialidá de la llingua. 8 d'agostu, 2006 0 FacebookTwitterPinterestEmail
Sociedá El VII Festival Intercélticu de Sendim, en Portugal, apuesta pola promoción del mirandés by asturnet 8 d'agostu, 2006 El pueblu portugues de Sendim, que la pasada fin de selmana celebró una nueva edición del so Festival Celta nel que tuvo como representación asturiana’l gaiteru Jose Angel Hevia y el tríu DRD, organizó una serie de talleres destinaos a la promoción del so patrimoniu llingüísticu y musical. Asina, cola ‘Carreira de la lhengua’ los organizadores del eventu llevaron a los turistes peles cais y cafes de la villa col envís de dar a conocer la so llingua. D’esta manera, esta localidá de la Tierra de Miranda, convidaba a propios y estraños a conocer el so patrimoniu llingüísticu, espertando l’interes nunos y recuperando la llingua na vida diaria de los otros. El llabor fechu dende les alcaldíes, les asociaciones culturales y los filólogos y defensores de la ‘lhengua’, vióse traducíu na fuerte presencia del asturlleones nel VII Festival Intercelticu de Sendim que se celebró ente los díes 3 y 6 d’agostu. Baxo’l nome de ‘Carreira de la lhengua’, los organizadores prepararon un recorríu per cais, cafes y sitios de la villa de Sendim col envís d’esparder l’idioma ‘ente la xente que nos visita, incentivando tamien a los propios mirandeses pa que falen la so llingua’. Encabezaos por un grupu de gaiteros que saludaben a los participantes en mirandes, convidaben a la xente a participar na Oficina de la Lengua Mirandesa, onde-yos aprendíen dalgunes palabres en mirandes, al tiempu que-yos desplicaben que llingua ye esta, ónde vien, ónde se fala y cuála ye la so situación. 8 d'agostu, 2006 0 FacebookTwitterPinterestEmail
Sociedá El Serviciu de Normalización de L.lena va facilitar l’adaptación de les fontes informátiques a la grafía ‘l.l’ by asturnet 8 d'agostu, 2006 El Serviciu de Normalización L.lingüística de L.lena va desarrollar a partir de setiembre seis programes d’actuación qu’abarquen tarees de recuperación de la tradición oral, la retulación de pueblos y dependencies municipales, asina como diferentes campañaes de promoción ente hosteleros y comerciantes del conceyu. Pa ello, l’Ayuntamientu l.lenizu va cuntar con un presupuestu de 11.280 euros aportaos pola Conseyería de Cultura del Principáu d’Asturies dientro de la llinia d’ayudes a la normalización social del asturianu. Col envís d’ufiertar a los hosteleros materiales que permitan la integración del asturianu na so rellación colos clientes, l’Ayuntamientu va repartir manteles de mesa individuales, lletreros (abierto/pesllao, home, muyeres, telefonu, acutao, reservao,…), asina como un CD con una aplicación informática que permite editar les cartes n’asturianu o billingües. Siguiendo la esperiencia empezada esti branu por Serviciu de Normalización xixones, el CD inclúi un total de 800 platos, que se van poner tamien na variante l.leniza. Nel casu de los comercios, van repartirse materiales concretos pa carniceríes, pescaderíes y fruteríes, por exemplu, con carteles colos nomes de los principales productos que vienden esti tipu de tiendes. Na recuperación de la tradición oral, l’Ayuntamientu cunta con un presupuestu de 2.000 euros pa la edición d’un CD coles grabaciones feches nel conceyu y que formen parte de los archivos de Xose Antón Fernández ‘Ambás’. De la mesma forma, L.lena apuesta por una campaña de rotulación toponímica del conceyu asina como la retulación billingüe de les dependencies municipales como yá se ficiere nel Hotel d’Asociaciones. Pero si hai una novedá nel plan d’actuaciones del Serviciu de Normalización, ye l’apueste pola adaptación de les fontes informátiques a les particularidaes llingüístiques de la zona. La falta de fontes nos teclaos como la ‘l.l’, ye un problema importante a la hora d’escribir na variante l.leniza de la llingua, por eso, el Serviciu de Normalización ta terminando de preparar la solicitú de los permisos necesarios pa camudar les fontes y meter esta nueva grafia, que se va repartir al travies d’un CD y de la Internet cola intención de que valga tamien pa otres partes d’Asturies qu’empleguen la mesma grafía. 8 d'agostu, 2006 0 FacebookTwitterPinterestEmail
Sociedá Carmen Rúa acusa al PSOE de tener ‘poca voluntá política’ na promoción del asturianu by asturnet 7 d'agostu, 2006 La conceyala d’Izquierda Xunida nel Ayuntamientu de Xixón acusó ayeri al PSOE de tener ‘poca voluntá política’ pa la promoción del asturianu. Na valoración del grupu municipal d’IX, Rúa llamentó les dificultaes coles que s’atopa’l so área pa trabayar na estaya llingüística y refiriendose a los sos socios de gobiernu del Partíu Socialista aseguró tener ‘tol derechu del mundu a falar na llingua que quiera y l’Alministración tien la obligación d’escuchame y aceptame la documentación oficial nesa llingua’. Carmen Rúa, que valoró los esfuerzos de la Oficina de la Llingua xixonesa nestos años, aprecia especialmente los resultaos del so llabor llingüísticu no tocante a la repercusión que ta teniendo nos más mozos. ‘Ta calando muncho ente los más mozos, nes escueles y nos institutos’. Por eso, llamentó la ‘poca voluntá política’ del PSOE na promoción de la llingua asturiana, ún de los temes nos que más difícil se fai’l pactu de gobiernu, según la edil xixonesa. 7 d'agostu, 2006 0 FacebookTwitterPinterestEmail
Sociedá Les Mocedaes d’Izquierda Asturiana debaten les sos llinies ideolóxiques y estrenen nueva Dirección Nacional by asturnet 7 d'agostu, 2006 El pasáu sábadu 29 de xunetu celebróse n’Uvieu la I Asamblea Xeneral de Mocedá d’Izquierda Asturiana nel que s’analizó’l cursu políticu de la organización venceyada a IAS ideolóxica y estratexicamente, anque estremada alministrativamente. Na Asamblea, na que s’aprobó una definición y unos oxetivos xenerales, quedaron espeyaos los ámbitos de trabayu políticu de MIAS asina como quedó configuráu l’órganu de representación del partíu. Na I Asamblea Xeneral de Mocedá d’Izquierda Asturiana lleóse una ponencia ideolóxica que nes próximes selmanes va ser debatida internamente col envís d’aprobala y publicala en breve. Nesta propuesta queden espeyaos tolos ámbitos de trabayu políticu de MIAS, ente los que destaquen la mocedá d’Asturies, l’ecoloxismu, l’asturianismu, el nacionalismu d’izquierda, el republicanismu, los derechos humanos, la solidariedá y los desequilibrios sociales, la cooperación internacional, la globalización, la soberanía y l’autodetermín, la rellación d’Asturies col estáu español, la rellación d’Asturies cola Unión Europea, el pacifismu, la política llingüística, la cultura, la vivienda, el trabayu, la sexualidá, l’ociu, les polítiques d’igualdá, la participación y l’asociacionismu xuvenil. Otramiente, l’agrupación dexo configuráu l’órganu de representación de MIAS, la Dirección Nacional, que cunta con un portavoz nacional y dos redes, una tecnica y otra política. El portavoz nacional ye Carlos Suari Rodrigue, de 23 años, escritor y estudiante de Ciencies de l’Actividá Física y del Deporte y d’Antropoloxía Social y Cultural. Na rede tecnica alcontramos como Secretariu de Comunicación y Nueves Tecnoloxíes a Xuacu Rodríguez Morón, de 22 años y cocineru y estudiante de Ciencies Polítiques, como Secretaria de Finances a Almudena Suárez Flórez, de 16 años y estudiante de Bachilleratu, como Secretariu d’Organización y Rellaciones a Iyán González Castro, de 21 años y estudiante de Xeoloxía. Na rede política ta como Secretaria d’Igualdá y Xusticia Social, Clara Díez Márquez, de 17 años y estudiante de Bachilleratu, como Secretariu de Desendolcu Socioeconómicu a Carlos Fernández Fuente, de 27 años, llicenciáu n’Económiques y trabayador nuna aseguradora, como Secretaria d’Ecoloxía a Paula Fernández Montes, de 20 años y estudiante de Filoloxía Inglesa y como Secretariu d’Enseñu y Cultura a Xandru Blanco Huergo, de 18 años y estudiante de Filoloxía Clásica. 7 d'agostu, 2006 0 FacebookTwitterPinterestEmail
Sociedá IAS convida al Bloque a trabayar por una alternativa asturianista d’esquierdes y ecoloxista pa 2007 by asturnet 6 d'agostu, 2006 Énte la presentación de Rafael Palacios como cabeza de llista pa les ellecciones autonómiques del 2007 per parte del Bloque por Asturies, presentando asina una candidatura estremada de la d’IX, el portavoz d’IAS, Ignaciu Llope, apuntó qu”estes declaraciones abulten poco creíbles y parecen una forma de presionar pa llograr meyores puestos nes llistes d’IX’. Sicasí, Llope emplazó al Bloque por Asturies a difinise ente la posibilidá de configuración d’una ‘alternativa d’esquierdes y ecoloxista pa 2007, ‘dexando de ser parte del problema y pasando a ser parte de la solución’. El portavoz d’Izquierda Asturiana, Ignaciu Llope, aseguró que ‘les coses pinten mal pa qu’IX vuelva a pidir el votu asturianista en 2007 al perder la inmensa mayoría de los apoyos que tuvo nesti sector en 2003 por mor del refileru de promeses incumplíes y sucesión de xestos a la galería esteriles que supuxenon esta lexislatura pal votante asturianista d’esquierdes’. Tachando al Bloque por Asturies de ‘coartada asturtianista’ na política de pactu col PSOE, Llope convidó a Rafa Palacios a definise ente una ‘situación catastrófica de la que ye responsable en parte la participación en gobiernu d’IX-BA y ente la posibilidá de que s’igüe pa 2007 una alianza electoral que puede ser una alternativa real a les polítiques d’IX y PSOE’. Nesi sen, Llope recordó los aconceyamientos que la so formación tien fechos con Andecha Astur, Los Verdes d’Asturies y grupos asturianistes locales y independientes, na busca d’ufierta-y a la sociedá asturiana ‘una alternativa ellectoral d’esquierdes, ecoloxista y asturianista’. Anque Llope aclarió que nun hebo contactu dengún col Bloque, instó a Palacios a ‘decidir si quier siguir siendo parte del problema o pasar a ser parte de la solución desmarcándose d’IX y trabayando por facer una alternativa real y non dependiente de factores externos que se pueda ofrecer al electoráu asturianu nes próximes elecciones’. 6 d'agostu, 2006 0 FacebookTwitterPinterestEmail
Sociedá Valledor llamenta la falta de diálogu ente Izquierda Xunida y el Bloque y llama a la renovación del pactu nel 2007 by asturnet 3 d'agostu, 2006 El conseyeru de Xusticia y dirixente d’Izquierda Xunida, Francisco Javier García Valledor, ente la presentación de Rafael Palacios como candidatu a les prósimes elecciones autonómiques per parte del Bloque por Asturies, nuna candidatura independiente a la d’IX, llamentaba ayeri la falta de diálogu ente la so formación y el Bloque, asegurando que dende la so organización ‘debemos ser un poco más autocríticos tocante a la falta de comunicación’ ente les dos fuerces. Valledor considera ‘imprensincible renovar el pactu’, a lo que Jesús Iglesias, candidatu a les elecciones del 2007 por IX, añedió que ‘yá qu’hai voluntá común, podríemos empezar contactos en setimbre’. El Bloque por Asturies concurrió coaligáu a Izquierda Xunida a los pasaos comicios. Sin embargo, ayeri presentaba una candidatura independiente pa les prósimes elecciones autonómiques, con Rafael Palacios a la cabeza de les llistes, achando la decisión a la ‘falta de diálogu con IX’, que presentó la so candidatura posponiendo les negociaciones col Bloque hasta’l prósimu mes de setiembre. Énte la falta de comunicación ente les dos fuerces, el Bloque por Asturies decidíase a presentar una candidatura propia, fechu qu’ayeri llamentaba Francisco Javier García Valledor, conseyeru de Xusticia y dirixente d’IX, manifestando que la so organizacón debía ‘ser un poco más autocrítica tocante a la falta de comunicación col Bloque’. Valledor insistió na importancia de ‘renovar el pactu col Bloque’ y confió en que se ‘retomen los contactos pa que la situación nun se vuelva irreversible’. Rafael Palacios, qu’aseguró esperar ‘un cambiu d’actitú en cuantes a diálogu y negociación con otres fuerces’, nun descartó un posible alcuerdu nos prósimos meses y añedió que se van respetar los pactos autonómicos hasta que termine la llexislatura, mentes qu’en setiembre van presetar los candidatos locales. Pela so parte, Jesús Iglesias, actual candidatu d’Izquierda Xunida pa les elecciones del 2007, aclarió que la falta de comunicación ente les dos fuerces d’izquierda ‘nun ye tanto cuestión d’autocrítica pela nuestra parte como de normalidá d’un partíu independiente como ye’l Bloque’. Sicasí, añedió que ‘yá qu’hai voluntá común, podríemos empezar contactos en setiembre’. 3 d'agostu, 2006 0 FacebookTwitterPinterestEmail
Sociedá La Xunta recupera la edición de les Fueyes Informatives nes que fai memoria de les actividaes de los últimos meses by asturnet 3 d'agostu, 2006 La Xunta pola Defensa de la Llingua Asturiana recupera la espublización de les sos Fueyes Informatives, basaes nunos boletinos de tirada periódica nos que fai memoria del trabayu fechu, treslladando asina la opinión de la organización sobre la situación de la llingua asturiana y de los derechos llingüísticos de los asturianos. Conscientes de la importancia d’esti llabor informativu, la Xunta pola Defensa de la Llingua Asturiana vuelve recuperar la edición d’esta estaya, na que tamien trabayen dende la so páxina web http://www.exunta.org, con una llista de correu abierta na que s’informa de les noticies de la organización y, a partir d’esti nuevu boletín, cola espublización bimensual de les nueses Fueyes Informatives. Nesti nuevu númberu de les Fueyes Informatives, la Xunta recueye la información sobre les campañes y actividaes feches nos últimos tres meses pola Xunta y Xunta Moza y pola plataforma Conceyu Abiertu pola Oficialidá, na que la Xunta ta implicada dafechu. 3 d'agostu, 2006 0 FacebookTwitterPinterestEmail
Sociedá El Conseyu de Gobiernu aprueba a última hora l’espediente toponímicu de Nava by asturnet 3 d'agostu, 2006 L’últimu Conseyu de Gobiernu enantes del periodu vacacional aprobó ayeri a última hora, y ensin que’l tema tuviere plantegáu nos temes a tratar nel día, l’espediente toponímicu de Nava que llevaba meses paralizáu, ensin recibir el preste que lu fixere oficial, depues de pasar tolos trámites alministrativos. Con esta aprobación, y la intención de siguir aprobando espedientes a partir del mes de setiembre, ruempese’l silenciu d’ocho meses colos qu’Alministración tenía bloqueada l’aprobación oficial de la toponimia. Pesie a que les notes oficiales del Conseyu de Gobiernu nun contemplen l’aprobación d’esti nuevu espediente, fontes oficiales del Gobiernu confirmaron el vistu bonu a la toponimia naveta que, depues de llevar meses preparada y cola burocracia alministrativa previa cumplida, tovía nun recibiere esti últimu trámite pa recibir la reconocencia oficial. Esti nuevu emburrión na aprobación de la toponimia, y el compromisu de siguir alantre con ella una y buena que termine’l periodu vacacional, ye frutu de la recien valoración del pactu de gobiernu nel qu’una de les mayores taches foi precisamente les torgues que per parte de l’Alministración recibíen la Xunta Asesora de Toponimia y los propios conceyos pa ver aprobaos los sos espedientes. 3 d'agostu, 2006 0 FacebookTwitterPinterestEmail
Sociedá El Bloque presenta a Palacios como candidatu a les elecciones del Principáu y termina l’alcuerdu con IX by asturnet 2 d'agostu, 2006 El Bloque por Asturies, formación política d’izquierdes qu’hasta’l momentu participaba del gobiernu del Principáu al travies d’un pactu robláu con Izquierda Xunida, presentó ayeri al so portavoz, Rafael Palacios, como candidatu a les prósimes elecciones autonómiques, terminando asina’l pactu de la presente llexislatura con IX. Tres d’un primer intentu por repitir aliances pal añu qu’entra, el Bloque por Asturies decidió presentar candidatura en solitario porque ‘existe la conyuntura adecuada’, según Palacios. Anque’l Bloque por Asturies plantegare nes últimes selmanes la renovación del alcuerdu con IX, la postura del partíu encabezáu por Jesús Iglesias, que prefier aparcar les negociaciones hasta setiembre, fixo que cambiaren d’estratexa electoral, decidiendose a presentar una candidatura indepediente, con Rafael Palacios a la cabeza de les llistes. Palacios, que llamentó la poca disposición d’IX pa negociar, anque matizó que nun se trata de denguna rotura, sinón del final d’una alianza, aseguró qu’esta decisión ‘ye lo meyor pa nosotros como formación política’, si bien Izquierda Xunida, pela so parte, nun descarta, tal y como tenía calculao, retomar l’alcuerdu a partir del prósimu mes de setiembre. El Bloque por Asturies afronta d’esta manera una candidatura en solitario pa les prósimes elecciones autonómiques, que se van celebrar nel mes de mayu del 2007, anque, sicasí, nun descarta tampoco l’averase a postures d’otres formaciones polítiques, tal y como alcordaren n’abril nes sesiones del conceyu nacional del partíu, momentu nel que pensaben en reforzar el consensu y aclariar les directrices del programa electoral que teníen pensao compartir con IX. 2 d'agostu, 2006 0 FacebookTwitterPinterestEmail