Educación SUATEA acusa al Gobiernu asturianu de privatizar la educación by asturnet 26 d'abril, 2006 El Sindicatu Unitariu y Autónomu de Trabayadores de la Enseñanza d’Asturies cuestiona’l pactu de Gobiernu ente les formaciones PSOE y IX-BA, al proceder la Conseyería d’Educación a la privatización de les unidaes d’infantil ampliando los conciertos colos centros privaos y estendiendo a partir d’agora la concertación a los centros de nueva creación del Opus Dei. Con ello, SUATEA denuncia que dalgunes escueles privaes van concertar inclusive un mayor númberu d’aules de les qu’anguaño tienen subvencionaes. Per otra parte, el colectivu de trabayadores de la enseñanza alvierte del peligru de pieslle de decenes d’unidaes na escuela pública asturiana y la desaparición d’enseñances mesmo obligatories como de FP y Bachiller, mentes que s’abriríen na enseñanza privada. SUATEA esixe al Gobiernu asturianu que dea desplicaciones a la sociedá ‘sobre’l marafundiu de millones d’euros que va suponer financiar con perres públiques una enseñanza elitista que va contra l’articuláu constitucional’. 26 d'abril, 2006 0 FacebookTwitterPinterestEmail
Educación La XIII Escuela de Seronda celébrase na primavera by asturnet 2 d'abril, 2006 Esti añu la Escuela de Seronda, actividá qu’entama tolos años el Conseyu la Mocedá, pasa de la época del añu que-y da’l nome a la primavera. La 13ª Escuela de Seronda tendrá llugar los díes 29, 30 d’abril y 1 de mayu nel Centru de Cultura Antiguo Instituto de Xixón. Los foros, xornaes y Talleres entamarán el sábadu 29 d’abril pela mañana y finarán el llunes 1 pela tarde, col siguiente horariu d’apertura de Centru: Mañanes de 9:30 a 14:00 hores y tardes de 16:30 a 19:30 hores (anque cada foro tendrá la so propia duración y marcará los sos horarios). Cada foru va tener 25 participantes, preferentemente xóvenes cabezaleros d´asociaciones xuveniles, conceyales, técnicos/técniques de mocedá y profesionales que desenvuelven el so llabor n´estayes rellacionaes colos conteníos que se dean en cada foru, o xóvenes en xeneral que tean interesaos/es na temática de los mesmos. La inscripción pa los/es mozos/es de Xixón podrá facese nel Conseyu de Mocedá de Xixón, Cai Manuel Llaneza, 68 – Xixón, o llamando al teléfonu 985155072, tamién per fax al nu 985990739 o email: coordinacion@puntojoven.com y http://www.puntojoven.com. Pa los/es mozos/es de tola Comunidá Autónoma y otres CCAA la inscripción puen facela nel Conseyu de la Mocedá d´Uviéu, Pl. Lago Enol s/n, d´Uviéu o llamando al teléfonu 985116965, coordinadora@cmu.as http://www.cmu.as, y nel Conseyu de la Mocedá del Principáu d´Asturies, C/ Fuertes Acevedo, 10 d´Uviéu o llamando a los teléfonos 985250065 y 985250668, tamién per fax al nu 985273949, o al email: info@cmpa.es . Inscripción on line en http://www.cmpa.es. El plazu pa inscribise va tar abiertu hasta les 14:00 hores del día 25 d´abril de 2006, confirmandose via mail o sms a aquellos que nos lu facilitaren. Mentres dure Escuela de Seronda los Conseyos de Mocedá van poder entamar dellos actos vindicativos pa buscar la implicación de tolos/es participantes na Escuela. Estos actos, qu´en nengún casu pueden afectar al númberu total de hores llectives, hai que los comunicar d´antemano a los y les participantes. Páxina Web cola programación 2 d'abril, 2006 0 FacebookTwitterPinterestEmail
Educación SUATEA afirma que se paga la privatización col pieslle d’aules públiques n’educación infantil by asturnet 29 de marzu, 2006 El sindicatu SUATEA criticó les declaraciones a medios informativos del conseyeru d’Educación, José Luis Iglesias Riopedre, nes qu’anunciaba l’apertura de venti aules públiques pa escolinos de 3 años. La formación afirma que’l responsable d’enseñanza del gobiernu autonómicu, por contra, informó a los representantes del profesoráu esti llunes 27 de la supresión de ventiocho unidaes nesi mesmu tramu educativu. SUATEA acusó a Riopedre de pretender ocultar la que califiquen de “vergoñosa política de privatización de la enseñanza” y de refugar a los sindicatos “faciendo declaraciones enantes mesmo de la reunión con diches organizaciones”. Nun comunicáu, el sindicatu autónomu, alerta de que la propuesta d’unidaes educatives pal cursu reduz la ufierta nel de nivel de 3 años “p’asina continuar n’años posteriores col pieslle d’unidaes de 4 y 5 años y en tola primaria”. Según SUATEA nesa propuesta “caltiénense les ratios al másimu, lo que supón per un llau dexar a los centros ensin la posibilidá de nueves incorporaciones d’alumnos a la rede pública y obligando a la matrícula na rede privada concertada”, dalgo que significa, a xuiciu del sindicatu “deteriorar deliberadamente la calidá de la enseñanza”. La formación sindical pide-y al gobiernu tripartitu asturianu un replanteamientu en materia educativa y “una apuesta decidida pola escuela pública asturiana”, que pa SUATEA “había traducise nuna correcta administración de los dineros públicos, que habíen destinase al aumentu del númberu d’unidaes en tolos niveles educativos de la rede pública”. 29 de marzu, 2006 0 FacebookTwitterPinterestEmail
Educación Los XI Alcuentros de Llingua Minoritaria y Educación busquen estratexes pal futuru by asturnet 27 de marzu, 2006 Los recursos y les estratexes didáctiques pa la enseñanza de los idiomes, sobremanera l’asturianu, centren los XI Alcuentros Internacionales sobre Llingua Minoritaria y Educación qu’escomiencen esti miércoles 29 n’Uviéu. Especialistes de diverses universidaes van xuntase pa tratar de la problemática qu’arrodia al deprendizaxe de la nuestra llingua y tomar nota d’otres esperiencies asemeyaes col futuru nes mires d’estos alcuentros entamaos pola Escuela Universitaria de Maxisteriu. Na primer de les xornaes, el miércoles 29, a les 18,00 hores, Christian Puren de la Université Jean Monnet de Saint-Etienne (Francia) va abrir los alcuentros con una conferencia tituladada “Enseñanza de les llingües: dende l’enfoque comunicativu hasta la perspeutiva aicional”. Darréu el profesor de llingua asturiana Xulio Berros va presentar la comunicación “Lleendo y navegando col asturianu”. La profesora de la Universitat de Barcelona, Celia Romea, pieslla la primer xornada de los alcuentros cola conferencia. “El cine como recursu didáuticu nos deprendizaxes llingüísticos”. El xueves 30, a les 18,00 hores, Alie Van Der Schaaf, collaboradora del proyectu européu Mercator fa pronunciar la conferencia “Educación bi/trillingües n’Europa”. Loreto Díaz, de la Universidá d’Uviéu, va falar de “Tratamientu didáuticu del vocabulariu de la llingua asturiana” y Joaquim Dolz de la Université de Genève, va falar de “Delles estratexes didáutiques na enseñanza d’una llingua minoritaria”. Les xornaes rematen el viernes 31 con una conferencia de Xandru Martino titulada “Música asturiana y llingua asturiana: una interrellación didáutica”; síguelu Ruth González cola comunicación “As isoglosas nel Navia-Eo: recurso metodolóxico nas clases de fala”. Pieslla los alcuentros, l’asesor téunicu docente de la Conseyería d’Educación, Fernando Padilla cola conferencia titulada: “La llingua asturiana nel sistema educativu: estáu actual y plantegamientos de futuru. 27 de marzu, 2006 0 FacebookTwitterPinterestEmail
Educación IAS califica de tomadura de pelo la Universidá Popular de les cuenques by asturnet 26 de marzu, 2006 Izquierda Asturiana (IAS) al través del so portavoz en Mieres, Faustino Zapico, truña contra la puesta en funcionamientu de la Universidá Popular de les cuenques, una iniciativa que la formación nacionalista califica de “tomadura de pelo” y que supón, afirmen: “favorecer otru comederu a cuenta de la escuela pública”. Zapico espresó el refugue de la so organización a la UP de les cuenques por “la situación absurda de que dende un ente como FUCOMI, participáu pol Principáu, entame una Universidá Popular cobrando a la ciudadanía por una ufierta educativa qu’en parte solapa la ufierta de la escuela pública y gratuita”. Asina, el portavoz d’IAS señaló que “parte de los cursos que ofrez la UP , como’l de Historia d’Asturies que s’ufierta en Mieres y pol que se cobren 56 euros, ye proporcionáu gratuitamente nel Centru d’Adultos de la mesma localidá, o los cursos de Llingua Asturiana, ofrecíos en L·lena y Ayer, y polos que tamién se cobra a los usuarios 73 euros, deberíen ser ofrecís gratuitamente ya que los ayuntamientos que lo soliciten tienen una subvención de la Conseyería de Cultura”, dixo’l representante d’IAS. A xuiciu del portavoz de la formación nacionalista: “la Universidad Popular comportóse de forma chapucera, ya que nin siquier fizo nada por enterase de cuála yera la ufierta educativa na comarca enantes de llanzar la suya”. Faustino Zapico criticó tamién “el secretismu que siguió a tol procesu, especialmente na contratación del profesoráu” asina como lo que calificó de “l’absurdo que supón gastar dinero de los fondos mineros n’ofrecer unos cursos -cobrando- iguales a otros que ya proporciona la escuela pública de forma gratuita en vez d’invertilos en xenerar actividá económica productiva, única garantía pa frenar l’éxodu demográficu nes nuestres comarcas”, afirmó’l portavoz nacionalista. 26 de marzu, 2006 0 FacebookTwitterPinterestEmail
Educación SUATEA pide a los grupos parlamentarios españoles que caltengan la enmienda sobre interinidá aprebada nel Senáu by asturnet 22 de marzu, 2006 SUATEA y la Confederación de STES-Intersindical valoren positivamente la incorporación d’una enmienda sobre la interinidá del profesoráu na tramitación de la Llei Orgánica d’Educación (LOE)nel Senáu. Pa la organización sindical ye importante que nesta enmienda se reconoza’l problema de la interinidá relacionáu cola calidá de la enseñanza. Tamién consideren positivo el que se tenga en cuenta la esperiencia docente hasta’l másimu llegal permitíu. La enmienda incorporada a la LOE na cámara baxa configura la fase d’oposición con dos partes non eliminatories (Memoria y Preba), lo qu’a xuiciu de SUATEA “si se concreta nesta llinia va ser beneficioso pal profesoráu interín”. El sindicatu encamienta-yos a los grupos políticos con representación parlamentaria a que caltengan esta enmienda na fase siguiente de la tramitación lexislativa con fin de que “acierten en dar solución a la precariedá del empléu na Función Pública Docente”. El sindicatu asturianu tien convocada una asamblea informativa d’interinos esti viernes 24 nel IES Alfonso II d’Uviéu col fin de tratar la situación actual d’esti colectivu. 22 de marzu, 2006 0 FacebookTwitterPinterestEmail
Educación Premien al gobiernu vascu por fomentar el deprendizaxe del inglés nes escueles by asturnet 21 de marzu, 2006 El departamentu d’Educación del gobiernu vascu recibió’l premiu Sellu Européu a la Inovación na Enseñanza por fomentar el deprendimientu de la llingua inglesa ente escolinos de 4 a 5 años. La concesión d’esta distinción ye una iniciativa de la Comisión Europea que reflexa’l so interés por incentivar el deprendimientu de los idiomes como vehículu necesariu pa una auténtica integración europea. El programa d’introducción temprana del inglés llévase a cabu nel País Vascu dende’l cursu 1999-2000 y participen nél cerca de 200 escueles públiques de tola comunidá autónoma. El proyectu consiste nel inxerimientu de la llingua inglesa como llingua vehicular nes aules d’Educación Infantil, con neños de 4 y 5 años. Pa ello, el Departamentu d’Educación, Universidaes y Investigación ofreció al profesoráu especialista en llingua inglesa la formación necesaria pa entamar el proyectu dientro l’horariu lectivu. La formación realizóse al través de seminarios zonales coordinaos por asesores de llingua inglesa de los Berritzegune (centros d’apoyu a la formación ya innovación educativa), y el material`pedagóxicu lleva’l títulu “Dip, dip, dip”, amás d’un dvd (en euskera, castellano ya inglés) nel que se desplica la metodoloxía y el procesu de formación del profesoráu. 21 de marzu, 2006 0 FacebookTwitterPinterestEmail
Educación SUATEA critica la subvención a la enseñanza concertada de 3 a 6 años by asturnet 20 de marzu, 2006 SUATEA califica nun comunicáu de golpe baxu a la escuela pública la decisión del Conseyu de Gobiernu del Principáu de destinar 21,7 millones d’euros a subvencionar en colexos privaos concertaos 180 aules pa escolinos de 3 a 6 años. La formación sindical caltién qu’esti conciertu d’aules d’educación infantil supón “despilfarrar recursos públicos pa financiar la segregación social”. Según SUATEA el conseyeru d’Educación, José Luis Iglesias Riopedre, comprometiérase a que nun diba haber concertación nesi tramu educativu si nun se recibía financiación bastante per parte del Ministeriu d’Educación. Pal sindicatu la partida empobinada a esti fin nun apaez contemplada nos presupuestos xenerales de la comunidá autónoma y pregúntase “de ónde se van sacar esos fondos, de qué pardida van salir y a qué-y va quitar financiación pa entrega-yoslo a la patronal de los centros privaos.” La organización sindical espresa’l so malagustu a propósitu del conciertu alcordáu pol executivu autonómicu y considera que “destinar 3.600 millones de pesetes a privatizar un trambu educativu non obligatoriu supón un golpe baxu a la escuela pública y a los bolsiellos de tolos ciudadanos”. SUATEA encamienta a los partíos políticos presentes nel tripartitu asutrianu “cuála fue la so posición nesti asuntu y si van actuar como los sos compañeros n’otres comunidaes como Aragón”. 20 de marzu, 2006 0 FacebookTwitterPinterestEmail
Educación La gaita incorpórase el prósimu cursu a los estudios reglaos de los conservatorios by asturnet 13 de marzu, 2006 La gaita va incorporase a los estudios reglaos de los conservatorios asturianos el prósimu cursu si se cumple la promesa fecha pol conseyeru d’Educación, José Luis Iglesias Riopedre, que na presentación de los currículos de grau mediu y elemental d’esti instrumentu afirmó que’l periodu lectivu de 2006-2007 va facese realidá l’inxerimientu como titulación especializada. El responsable d’Enseñanza dixo responder asina a “una importante demanda del sector”. Los conservartorios d’Uviéu y Xixón van ser los primeros n’abrir les matrícules pa la especialidá de gaita nel prósimu cursu y los estudios impartíos habrán siguir les llinies redactaes nos currículos de grau elemental y mediu elaboraos por diversos espertos. Inda en fase de borrador los proyectos curriculares tán abiertos agora a les posibles suxerencies de maestros gaiteros, bandes o escueles de gaites, etc. La incorporación de la gaita a los estudios musicales reglaos ye una vieya aspiración de los profesionales y estudiantes d’esti instrumentu tradicional asturianu. Si se cumplen les previsiones de la Conseyería d’Educación el pósimu cursu podía entamar la normalización académica de la gaita. 13 de marzu, 2006 0 FacebookTwitterPinterestEmail
Educación SUATEA pide l’añu sabáticu nes sos negociaciones con Educación by asturnet 13 de marzu, 2006 SUATEA va plantear nes sos desixencies pa meyorar les condiciones llaborales del profesoráu na mesa de negociación cola Conseyería d’Educación el derechu a disfrutar d’un añu sabáticu con permisu retribuiu, ente otres reivindicaciones profesionales. La propuesta ufierta la posibilidá de que los docentes puedan trabayar cuatro años con una reducción parcial del sueldu que habrá vali-yos pa disfrutarr d’un permisu retribuíu el quintu añu. El sindicatu señala la esistencia d’esta posibilidá n’otres comunidaes y afirma que contribúi a favorecer la conciliación de la vida personal y llaborar, la dedicación al estudiu y la formación y a reducir delles enfermedaes profesionales como l’ansiedá y l’estrés. La organización sindical autónoma va defender tamién nes sos negociaciones con Educación l’ampliación del permisu de maternidá y el cambiu de permisu de lactancia por incrementu del de maternidá, xunto a l’afitamientu del permisu por paternidá y l’ampliación d’entrambes modalidaes si la pareya tien fíos menores. Otres de les dispenses temporales que va reinvindicar SUATEA son los permisos por adopción, con tratamientu especial nel casu de l’adopción internacional; l’ampliación por guarda llegal; les escedencies pol tiempu necesariu pa cuidáu d’un familiar al so cargu y la llicenca ensin retribución de tres meses, escepcionalmente ampliada a otros tres, pa en casu d’atención a un familiar por enfermedá grave. El tercer bloque de reivindicaciones llaborales del sindicatu constitúilu la propuesta d’un sistema de permutes temporales dientro y fuera d’Asturies, col enfotu de conciliar vida llaboral y personal, asina como a meyorar les condiciones de salú llaboral del profesoráu. 13 de marzu, 2006 0 FacebookTwitterPinterestEmail