Lliteratura Acábase’l plazu pal Premiu de Poesía Elvira Castañón by asturnet 22 de payares, 2005 El plazu pa la presentación de obres a la XV edición del Premiu de Poesía “Elvira Castañón”, convocáu pol Ayuntamientu d’Ayer al travies de la conceyalía de Cultura, acaba’l prósimu 30 de payares. La entrega de premios va coincidir cola cellebración del Día del Llibru, n’abril del 2006. Los poemarios presentaos tien que tener ente 250 y 500 versos y han de presentase por triplicao na Casa Cultura, avenida Constituciñon 31, 33670 de Morea enantes del 30 de payares. Na edición del añu 2003, los ganadores d’esti concursu foron Manuel Perez Casauz, col poemariu “Hijos de una patria”, na modalidá de castellán, y Carlos Pitcairen con “L’ecu de les flores”, na modalidá d’asturianu. Otros ganadores n’ediciones anteriores foron Xaviel Vilareyo, Xose Lluis Campal y Nel Amaro, ente otros. El certame reparte 2000 euros en premios; mil pa cada modalidá. 22 de payares, 2005 0 FacebookTwitterPinterestEmail
Lliteratura LEntregu entama les VIII Xornaes de lliteratura asturiana by asturnet 21 de payares, 2005 La Casa de Cultura de L’Entregu, en Samartín del Rei Aurelio, acueye a partir de güei llunes 21 de payares y hasta’l vienres 25, les VIII Xornaes de lliteratura asturiana, nes que se fairá un repasu históricu sobre la creación n’asturianu a travies de cinco ponencies que van correr a cargu de Xulio Viejo, Álvaro Ruiz de la Peña, Lourdes Álvarez, Antón García y Xuan Bello. Dente esti llunes 21 de payares y hasta’l vienres 25, na Casa Cultura de L’Entregu van desendolcase les XIII Xornaes de lliteratura asturiana que, como cada añu, empobinen les biblioteques públiques del Ayuntamientu de Samartín del Rei Aurelio. Estes xornaes, que van constar de cinco conferencies de mano de los meyores espertos na lliteratura asturiana, van repasar per epoques históriques les evoluciones de la creación n’asturianu. Les xornaes entamen esta tarde con una conferencia del profesor de la Universidá d’Uvieu Xulio Viejo titulada “La lliteratura asturiana: los anicios y el desendolcu hasta’l sieglu XVIII”. Mañana martes, Álvaro Ruiz de la Peña va falar de “Los sieglos XIX y XX. Figures más destacaes hasta’l Surdimientu”. La escritora Lourdes Álvarez disertará’l miercoles sobre el nacimientu del Surdimientu; mentes que l’editor y escritor Antón García va siguir na tarde del xueves falando d’”El Surdimientu: l’españíu lliterariu”. Les xornaes acaben el vienres 25 con una conferencia del escritor Xuan Bello que repasará los últimos tiempos a lo llargo d’un ponencia titulada “Nueves tendencies na lliteratura d’anguaño”. Les cinco conferencies entamen a partir de les siete la tarde nel salón d’actos de la Casa Cultura de L’Entregu. Toles persones qu’asistan a les xornaes recibirán, a la final de les meses, un certificáu acreditativu d’asistencia. 21 de payares, 2005 0 FacebookTwitterPinterestEmail
Lliteratura ‘Autopsia’ de José Luis Piquero premiu de la crítica asturiana by asturnet 18 de payares, 2005 ‘Autopsia’, el poemariu del asturianu Jose Luis Piquero, que-y valiere tamien el premiu ‘Ojo Crítico’, foi l’elixíu pola Asociación d’Escritores d’Asturies col Premiu de la Crítica d’Asturies 2004 na modalidá de poesía. Miguel Allende y Xandru Fernández, na modalidá d’asturianu, Milio Rodríguez Cueto por ‘La piedra de la culebra’, Pepe Monteserín y el periodista Javier Cuervo foron el restu de los premiaos. El xuráu destacó d”Autopsia’ “el realismu, distanciáu de les tendencies dominantes na poesía española contemporánea”, asina como la voz personal y crítica del autor. L’escritor Pepe Monteserín ganó’l premiu de novela con ‘Se detuvo el mundo’, publicada pola editorial Algaida, y que yá-y valiere tamien el premiu Emilio Alarcos Llorach. D’ella, destacóse l’aparente cenciellez de la historia onde la vida apaez llevantanda como un mosaicu onde de continu s’entemez y se confunde cola lliteratura. Na modalidá de columnismu lliterariu, premióse la trayectoria del periodista Javier Cuervo. Mentes que l’escritor Milio Rodríguez Cueto recibió’l galardón na modalidá de lliteratura infantil y mozo pol llibru ‘La piedra de la culebra’, que destaca por abrir una “ventana a un tiempu pasáu, a una Asturies rural y primitiva”, en tiempos de la invasión francesa. Como adelantábemos ayeri, Xandru Fernández foi’l ganador del premiu de novela n’asturianu por ‘Les ruines’; y Miguel Allende,pol poemariu ‘Pallabres de payaso’. 18 de payares, 2005 0 FacebookTwitterPinterestEmail
Lliteratura El colectivu Les Filanderes falla’l so premiu de relatos by asturnet 18 de payares, 2005 El colectivu de muyeres Les Filanderes, de Llangreu, falla esta tarde la cuarta edición del so Certame Internacional de Relatos Cortos “Filando cuentos de muyer”, nun actu nel que tarán presentes Begoña Fernández, directora del Institutu Asturianu de la Muyer; Luis Bada, conceyal de Cultura del Ayuntamientu de Llangreu; Montserrat Fernández, diputada na Xunta Xeneral y el director de l’Axencia Asturiana d’Emigración, Luis Miguel Fernández Romero. Más de 265 trabayos presentaos dende más de ventidós países diferentes, dalgún de los cuales escritu n’asturianu, opten a ser el ganador de la cuarta edición del Certame Internacional de Relatos Cortos “Filando cuentos de muyer”, qu’entama’l colectivu llangreanu Les Filanderes, en collaboración col Institutu Asturianu de la Muyer y Cajastur. El premiu ta dotáu de mil euros y la publicación del relatu, xunto colos otros seis testos finalistes. Amás, van entregase dos accesit de 250 euros caún. L’actu va tener llugar nel Restaurán Palacio de las Nieves, de La Felguera, a partir de les dos de la tarde, cuando se lleerá’l nome del relatu ganador en presencia de cuatro de los seis finalistes elixíos pol prexuráu. 18 de payares, 2005 0 FacebookTwitterPinterestEmail
Lliteratura La crítica asturiana premia a Miguel Allende y Xandru Fernández by asturnet 17 de payares, 2005 Esta tarde, a les ocho y media, va facese entrega de los Premios de la Crítica 2004 nel cafe Apolo d’Uvieu, que nesta ocasión, reconocen, na modalidá de los meyores llibros n’asturianu, el trabayu de Miguel Allende, pol poemariu “Pallabres de payaso” y la novela “Les ruines” de Xandru Fernández. Xandru Fernández (Turón,1970), escritor precoz y prolíficu, ye seguramente ún de los meyores novelistes asturianos d’anguaño, teniendo publicaes noveles como “El silenciu en fuga”, “Tráficu de cuerpos”, “El suañu de los páxaros de sable” y “Los homes de bronce”. Como poeta, publica “Primer bestiariu” en 1990, al que dempues siguen “Breviariu de la diáspora”, “Lletra muerto” y “Servidume”. “Les ruines” ye la última novela de so, na que retrata la familia de Rosa l’Alemana y del so home, Goyo Godina, militante antifranquista que muerre n’accidente de mina. Alredol d’ellos y del valle, enguedeyense un cientu de rellaciones marcaes pol desarraigu y les dificultaes comunicatives ente les persones. Miguel Allende (Llaviana, 1960) recueye en “Pallabres de payaso” munchos de los poemes escritos nos primeros años de la decada de los 80, al abellu de la tertulia lliteraria ‘La Seronda’. Pesie a ser un primer poemariu, la voz d’Allende sorprendió pola ironía cola que’l personaxe (payaso) enfrenta la vida, a travies d’una voz mui personal na que se reconocen tendencies mui estremaes, como les formes clásiques, castellanes, asturianes, franceses y estaounidenses; y nel que destaquen les influencies cinematográfiques y sobremanera la música. 17 de payares, 2005 0 FacebookTwitterPinterestEmail
Lliteratura Trabe dona más de siete mil llibros a les biblioteques asturianes by asturnet 17 de payares, 2005 Ediciones Trabe, dientro de la so política de difusión de la lliteratura asturiana y del so enfotu por allegar la llingua asturiana a los sos potenciales llectores, fixo una donación desinteresada a la Rede de Biblioteques d’Asturies de más de siete mil quinientos exemplares del so catálogu editorial, que se terminaron de distribuir a les biblioteques a lo llargo d’esti añu 2005. Los diferentes titulos seleccionaos pola editorial foron sesenta y ocho, la mayor parte de narrativa, anque tamien se fixo entrega d’ensayu, poesía o cómic. Sigún Antón García, responsable d’Ediciones Trabe, “a la hora de facer esta importante donación consideróse que la lliteratura n’asturianu tien que tener una mayor presencia nes biblioteques d’Asturies”. Con esti xestu, Ediciones Trabe aprovecha pa manifestar la so “oposición a que se lleve a efectu la directiva europea de pagu por prestamu (el llamáu canon) y reclamar a les autoridaes asturines, al tiempu, una mayor atención y dotación económica pa la compra de llibros asturianos (en cualisquier de les sos llingües).” 17 de payares, 2005 0 FacebookTwitterPinterestEmail
Lliteratura Xuan Bello y José Luis García Martín participen nun homenaxe a Eugenio d’Andrade en Xixón by asturnet 16 de payares, 2005 El Centru de Cultura Antigu Institutu de Xixón acueye esti xueves 17 un homenaxe al poeta portugués Eugenio de Andrade nel que van participar los escritores Xuan Bello, José Luis García Martín y Pablo Antón Marín Estrada. L’actu, organizáu pola asociación cultural Área Ibérica, tenta remanecer l’alcordanza d’un de los autores más influyentes de la lliteratura contemporánea na obra de los poetes de les últimes xeneraciones n’Asturies. El poeta y críticu José Luis García Martín, un de los principales difusores de la obra andradiana nel estáu, va tar al llau del que ye de xuro, xunto a Antón García l’ introductor del autor de “Memoria do outro rio” na nueva lliteratura asturiana: Xuan Bello y xunta a Marín Estrada, un de los autores que reconocen la impresión de la obra del poeta portugués como imprescindible. L’homenaxe a Eugenio de Andrade escomienza el xueves 17 a les 20.00 hores nel Centru de Cultura Antigu Institutu de Xixón. 16 de payares, 2005 0 FacebookTwitterPinterestEmail
Lliteratura El Premiu Nacional de Poesía Antonio Gamoneda recita esta tarde en Xixón by asturnet 16 de payares, 2005 Antonio Gamoneda, premiu de Castiella y Lleón en 1985 y Premiu Nacional de Poesía de 1988, presenta güei, a les ocho la tarde, nel Centru Municipal de l’Arena la so obra completa reunida nel llibru ‘Esta luz’. El poeta asturianu va ser presentáu pol escritor Antonio Merayo y depues fadrá una llectura comentada de los sos poemes, nun actu entamáu pola Asociación Poegía y la Fundación Municipal de Cultura. Antonio Gamoneda (Uvieu, 1931) ye una figura emblemática de la poesía europea del últimu sieglu. Doctor Honoris Causa pola Universidá de Lleón, tien recibío ente otros, el Premiu Castiella y Lleón de les Lletres en 1985, el Premiu Nacional de Poesía en 1988 por «Edad», y foi nomináu al Premio Europa 1993 pol «Libro del frío». Como críticu d’arte publicó estudios monográficos d’escultores, como Jose Luis Sánchez (1981) y Julio Hernández (1981), y de los pintores Francisco Echanz (1978) y Juan Barjola (1980). A finales del añu pasáu publicaba la so obra poetica completa nel volume ‘Esta luz’ (Galaxia Gutenberg), siendo ún de los llibros más vendíos del añu. 16 de payares, 2005 0 FacebookTwitterPinterestEmail
Lliteratura Remedios Menéndez Calvo algama’l concursu de narrativa breve de Cangas by asturnet 15 de payares, 2005 Remedios Menéndez Calvo algamó’l primer premiu del Concursu de Cuentos Breves n’asturianu del Conceyu de Cangas cola so obra “L.letra a l.letra”. L’escritor Xosé María Rodríguez quedó finalista del certame y Ezequiel Cala Arias llevó’l premiu al meyor relatu en variante occidental. La madrilana d’orixen canguesu, Remedios Menéndez Calvo (1975)resultó ganadora del IV Concursu de Relatos Curtios en Llingua Asturiana “Ayuntamientu de Cangas del Narcea” pol so trabayu “L.letra a l.letra”, premiáu con 600 euros. Amás de ser galardonada nesti mesmu certamen n’anteriores ediciones, l’autora fue finalista del concursu de relatos hiperbreves de la editorial Alcumán nel año 2003 y una de les escritores incluíes nel volumen ‘Cuéntame’. Menéndez Calvo desarrolla la so actividá profesional na facultá de Derecho de la Universidá d’Alcalá de Henares. Nel apartáu de meyor relatu n’ asturiano occidental, instituíu con oxetu de promover la creación nesta variante, el galardón fue parar a Ezequiel Cala Arias pol so cuentu “L.lobus d’anguano”. Colaborador habitual de la edición xixonesa de La Nueva España ente 1998 y 2004, también publicó en Les Noticies y El Canciu’l Cuélebre. Esta categoría tá dotada tamién con 600 euros. Detrás del trabayu de Remedios Menéndez Calvo, resultó elexíu en segundu puestu el relatu ‘L’acabóse’, del cangués José María Rodríguez (1956), autor pioneru del Surdimientu y que recientemente publicó la novela ‘Tiempos de Nublina'(Trabe). A la fin Xuan Carlos Crespo Lanchas (1970) fue reconocíu pol so relatu ‘La hestoria de la muyer qu’escaeció cómo llorar y lo qu’aconteció cuando recordó’ con un tercer premiu de 180 euros. Crespos Lanchas, natural de Xixón, publicó esti mesmu añu na editorial Trabe “Poemes raros (de sangre seco)” y colaboró nes revistes Lletres Asturianes, Lliteratura, Reciella Malory y La Ratonera. El xuráu taba presidíu pola conceyal de Cultura, Mónica Díaz y formábenlu el secretariu de l’Academia de la Llingua Asturiana, Roberto González-Quevedo; l’escritor Xuan Bello; el responsable del Serviciu de Normalización Lingüística de Cangas del Narcea, Nacho González; y la maestra d’asturianu Mar Llano. Los miembros del xuráu resaltaron l’altu númberu de relatos presentaos n’asturiano occidental amás de la mocedá de los participantes. 15 de payares, 2005 0 FacebookTwitterPinterestEmail
Lliteratura ASMA celebra la so Selmana Cultural cola IV edición de Nomes Propios by asturnet 15 de payares, 2005 L’Asociación Asturianos en Madrid entama a partir d’esti vienres la programación de la IV Selmana Cultural, con un conciertu del grupu Gueta na Fonte más nueve gaiteros, na Cervecería O’Neills. Una conferencia de Roberto Hartasánchez sobre l’osu pardu n’Asturies, otra d’Ana Pinto Llona sobre los neaderthales y cromagnones nel conceyu d’Onís, cuenta cuentos pa nenos y la IV edición del recital de poetes asturianos ‘Nomes Propios’, na llibrería La Central, del Museu Reina Sofía, completen un programa d’actos que termina’l prósimu 28 de payares. El vienres 18 de payares entama la Selmana Cultural preparada por ASMA (Asociación d’Asturianos en Madrid) con un conciertu na Cervecería O’Neills del grupu asturianu Gueta na Fonte que, acompañaos por nueve gaiteros de diferentes bandes de gaites, llevarán a la capital madrilana los sones asturgaelicos colos que compuxeron el so ultimu discu ‘Como Agua de Mayo’. Los actos continúen el llunes día 21 a les siete la tarde cola conferencia de Roberto Hartasánchez, presidente de FAPAS, sobre l’osu pardu n’Asturies y la Cordillera Cantábrica. El xueves día 24 va ser la investigadora del Departamentu de Prehistoria del Centru Superior d’Investigaciones Científiques, Ana Pinto Llona, la encargada de dar una charla sobre los neaderthales y cromagnones nel conceyu d’Onís. Estes dos conferencies van tener llugar nel salón d’actos del Museu Nacional de Ciencies Naturales. Como yá ye tradición, ASMA entama una nueva edición del recital de poetes asturianos tituláu ‘Nomes Propios’. Nesta cuarta edición, que se fairá na Llibrería La Central, nel nuevu edificiu del Museu Nacional Centru d’Arte Reina Sofía, los poetes invitaos son Silvia Ugidos, Jordi Doce, Ana Vanessa Gutierrez y Julio Rodríguez, que van tar presentaos pol escritor asturianu Martín López-Vega. El domingu día 27, a les doce la mañana, l’espaciu cultural ‘Menos Uno’ va ser la se d’un cuentacuentos, arte, movimientu y música, a cargu d’Alicia Bustamante y Bea Toro, pensáu pa que los nenos participen nes actividaes coles sos manes, a travies d’instrumentos, canciones, bailles y pintures. Web d’ASMA 15 de payares, 2005 0 FacebookTwitterPinterestEmail