Música Retueyu entama’l cursu de la Escuela de Música Tradicional La Quintana by asturnet 3 d'ochobre, 2005 La Escuela de Música Tradicional La Quintana abre’l cursu 2005/2006 esti miercoles 5 d´ochobre na so se de la Escuela Pública Rei Pelayo de l’Avda. Constitución. La Quintana cumple con esti l´octavu añu dando clases de varios instrumentos, amás d’enseñar folclor y llinguaxe musical. Les especialidaes qu’ufierta esta escuela son: gaita, tambor, zanfona, vigulín, bandurria, xiblata travesera, curdión y asturianada. Les clases práctiques impartense individualmente y l´alumnáu integrase nel nivel que-y correspuenda, dándose dalgunes clases xunto con alumnos y alumnes d´otros instrumentos pa empobinar a la formación en conxuntu. Los profesores encargaos de dar estos cursos son músicos perconocíos na escena musical asturiana, formando parte de grupos con una llarga trayectoria. Como ye’l casu de Xuan Nel Esposito (curdión) y Diego Pangua (gaiteru), de Felpeyu; Daniel García de la Cuesta (vigulín y bandurria) de LLiberdón; o David Varela (percusión) y Merce Santos (zanfona) de La Bandina. Los horarios de la Escuela son les tardes de los martes, miercoles y xueves a partir de les seis de la tarde nel Rei Pelayo. 3 d'ochobre, 2005 0 FacebookTwitterPinterestEmail
Tecnoloxía IAS pide al gobiernu del Principáu que solicite’l rexistru d’un dominiu n’Internet p’Asturies by asturnet 3 d'ochobre, 2005 El portavoz nacional d’Izquierda Asturiana (IAS) Inaciu Llope pide al gobiernu del Principáu qu’ésti tome la iniciativa pa rexistrar un dominiu propiu p’Asturies, como acaba de facer la Xunta de Galicia, siguiendo los pasos daos enantes pola Generalitat de Cataluña a instancies d’entidaes en defensa de la cultura y la llingua propies d’esi país. Tres l’anunciu por parte del organismu intermacional ICANN, que regula los dominios d’Internet, de l’autorización de la puesta en marcha del nuevu ‘dominiu cat’, que va abellugar a los sitios de la rede dedicaos a la llingua y a la cultura catalanas, Izquierda Asturiana (IAS) solicita al Gobiernu asturianu qu’escomience les xestiones y busque apoyos d’empreses y otres instituciones pa solicitar el dominiu propiu .ast, al igual que fizo’l Gobiernu gallegu col dominio .gal. Según Llope “nos últimos años amosóse qu’esiste una demanda d’un dominio asturiano ya que cientos d’empreses y d’ instituciones asturianes tan rexistraes nel dominiu .as, que nun ye un dominiu propiu asturianu -sinón que pertenez a les isles Samoa Americanes- pero que los internautes ya adoptaron provisionalmente énte la falta de dominiu propiu como’l dominiu qu’identifica a Asturies nel ciberespaciu”. Pal portavoz de IAS, “lo que nun principiu nun yera más qu’ una ocurrencia, pasó adquirir carta de naturaleza dende’l momentu en que grandes empreses como Telecable, o instituciones como l’Ayuntamientu d’Uviéu, utilicen, ente munchos otos, el dominio .as, colo que se demuestra qu’esiste una necesidá d’ identificación de lo asturiano nel ciberespacio”. Por ello pa Llope, “aprovechando la puerta abierta que dexa al dominiu la aprobación del dominiu .cat el Gobiernu asturianu había potenciar la nuestra cultura, la nuestra llingua y los nuestros productos promoviendo la concesión d’un dominiu propiu qu’asitie Asturies nel mundu con identidá propia, lo que sin dulda va reportar múltiples beneficios”, afirma’l voceru de la organización nacionalista. 3 d'ochobre, 2005 0 FacebookTwitterPinterestEmail
Música La Fundación de la Tonada empezará a funcionar a primeros del 2006 by asturnet 2 d'ochobre, 2005 La Fundación de la Tonada de Mieres va empezar a funcionar a primeros d’añu, cola intención de ser un referente cultural pa la música asturiana. Pa ello, lo primero que se va facer ye recoyer tol material biográficu, discos y tola fonoteca posible, pa lo que l’Ayuntamientu Mieres yá cuenta cola ayuda del director xeneral de Promoción Cultural. Diana González, conceyala de cultura, anunció que la fundación tien pensao facer una páxina web dende la que puean consultase tolos archivos recopilaos pol Museu. Dende l’ayuntamientu yá tienen pidío al Principáu que forme parte del patronatu de xestión d’esti museu de la tonada, pal que yá se ta pensando na ellaboración de los estatutos. 2 d'ochobre, 2005 0 FacebookTwitterPinterestEmail
Música Xueves musicales nel Tierra Astur de Cualloto by asturnet 29 de setiembre, 2005 Como lleva faciendo dende hai unos meses, la sidrería Tierra Astur de Cualloto entama’l mes d’ochobre cola programación de conciertos de los sos xueves musicales. A lo llargu d’esti mes, los encargaos de poner música nel llagar van ser los grupos Dulcamara, Los Llanzones, La Bandina’l Tombo y Celia González. Xueves, 6 d’ochobre: Dulcamara. Dientro de la cita habitual de tolos xueves cola música asturiana, na primer selmana d’ochobre va actuar el grupu de pandereteres y cantantes Dulcamara. Establecíes de forma estable como banda dende nun hai muncho, les sos integrantes nun son precisamente novates nesto de la música tradicional. Toes elles pertenecieron o pertenecen a grupos d’investigación folklórica, lo que-yos permite conocer de primer mano les fontes de la música que depues interpreten. Espertes pandereteres, conocen mui bien los sones y ritmos peculiares interpretaos con esi instrumentu. Xueves, 13 d’ochobre: Los Llanzones. Dende hai unos años hai n’Asturies un renacer de les bandines. Pequeñes formaciones en formatu cuartetu o quintetu normalmente qu’interpretaban pieces dirixíes principalmente a animar el baille nes romeríes. Una de les agrupaciones qu’ayudó a fomentar esi festival ye la de Los Llanzones, que va tocar el xueves 13 d’ochobre. Los Llanzones yá lleven varios años percorriendo la xeografía asturiana ufiertando los sos “sones” en múltiples eventos (fiestes, romeríes, alcuentros, festivales…) Xueves, 20 d’ochobre: La Bandina’l Tombo. Esta formación ye yá una de les más conocíes y apreciaes de la música tradicional asturiana. La so propuesta, totalmente acústica, nun ye otra que la de recrear les músiques qu’interpretaben les bandines o orquestines qu’a finales del sieglu XIX y principios del XX percorríen les romeríes asturianes colos sos “baillables”, onde entemecíen los ritmos más tradicionales (xotes, muñeires, saltones…) coles nueves incorporaciones que veníen de fuera (vals, mazurca, polca…). La Bandina’l Tombo ta formada por: Carlos Tejerina (contrabaxu), Dolfu Fernández (violín), Marga Lorences (curdión) y Pepín de Muñalen (flauta). Van tar el xueves venti d’ochobre dando un conciertu nel que van interpretar pieces del so primer discu y otres inedites. Xueves, 27 d’ochobre: Celia González. Celia González ye una interesante zanfonista asturiana que vien del mundu de la investigación etnográfica, fundamentalmente en tolo que tenga que ver colo musical. Escoyó pa la interpretación esti ancestral y dificil instrumentu con un timbre y una sonoridá mui especial. El so repertoriu básase principalmente nes coples y romances que diben ofreciendo pelos pueblos los antiguos zanfonistes,pero amás incorpora otres pieces del acervu tradicional asturianu. Too ello vien nel so primer discu tituláu “Coloradina la guinda”, que tien dieciocho pieces interpretaes cola zanfona o “gaita rabil”, siendo’l primeru que publica una tañedora d’esti instrumentu n’Asturies. Toos estos grupos van tocar na sidrería Tierra Astur de Cualloto na tarde/nueche de los xueves. 29 de setiembre, 2005 0 FacebookTwitterPinterestEmail
Música Nacho Vegas publica un minielepé con cinco canciones nueves by asturnet 29 de setiembre, 2005 Nacho Vegas acaba de rematar un minielepé con cinco canciones inédites y una sesta ya incluída nel so últimu trabayu “Desaparezca aquí”. El nuevu discu tituláu “Esto no es una salida” (Limbostarr) va ponese a la venta’l prósimu 10 d’ochobre y pa presentalu en directu el músicu xixonés va ufiertar dellos conciertos por diverses ciudaes del estáu. La primera de les actuaciones va ser el día 6 d’ochobre na Sala Loco Club de Valencia y al día siguiente Vegas va tocar acompañáu pola so banda habitual de Las Esferas Invisibles nel Teatru Calderón de Madrid. Los prósimos conciertos de presentación de “Esto no es una salida” van ser n’Alicante, el 14 d’ochobre, na Sala Stereo; el 28 vuelve a Valencia p’actuar con Jet Lag & Friends nel Heineken Green Space y el 29 toca en Guadalajara nel Festival Panorámico Musical. La xira de Nacho Vegas y Las Esferas Invisibles sigue en payares con una actuación en Castellón el día 3 nel Tanned Tin; el 4 de payares en Córdoba na sala Musitek; el 18 en Cartagena y el 19 en Murcia. 29 de setiembre, 2005 0 FacebookTwitterPinterestEmail
Música Los sones más monteses y combativos xúntense nel Festival Puelles Rock by asturnet 21 de setiembre, 2005 El llugar de Puelles acueye esti viernes 23 un festival de rock nel que participen siete bandes asturianes y una vasca col apueste polos sones más contundentes y combativos como elementu en común. Skama la Rede, La Tarrancha, Sikarios, Kuarentena, Kema Guaje, Desorden, Ásperos y Kaskarreko formen el cartelu del Puelles Rock. La cita ye dende les 20,30 d’esti viernes en delantre con entrada de baldre pa la xente que se desplace hasta esti llugar asitiáu xunta’l Concentu de Valdediós y a siete kilómetros de La Villa. La organización del festivla tien preparada una fastera d’acampada y otra d’aparcamientu nes inmediaciones del prau onde se celebra’l festival. Tamién va haber serviciu d’autobuses dende la capital del conceyu maliayés pa esta, una de les últimes atopaes musicales al aire llibre de la temporada. 21 de setiembre, 2005 0 FacebookTwitterPinterestEmail
Música Trashtornados esti sábadu na Fnac by asturnet 21 de setiembre, 2005 La formación mierense Trashtornados, qu’amesta los sones del swing colos del jazz, actúa esti sábadu día 24 de setiembre a les ocho y media la tarde na Fnac de Parque Principado. El quintetu lideráu pol cantante y guitarrista Bobby González (ex Los Coronados) acaba de sacar el so primer trabayu discográficu, ‘Cool Bop!’, nel qu’inclúin una versión del clásicu del wing ‘Bye, bye blues’, de Louis Armstrong. Esta banda, que lleva más de dos años n’activu y que ta formada por ocho músicos de llarga trayectoria profesional en diferentes formaciones, ta volviendose una de les propuestes musicales más sorprendentes y reveladores del panorama musical español. 21 de setiembre, 2005 0 FacebookTwitterPinterestEmail
Tecnoloxía La comunidá llingüística y cultural catalana va tener un dominiu propiu n’Internet by asturnet 20 de setiembre, 2005 ICANN (Internet Corporation for Assigned Names and Numbers), l’organismu internacional que concede’l resxistru de dominios na Rede, acepta la propuesta formulada por varies entidaes de Cataluña, ente elles el Gobiernu de la Generalitat, de que la identificación .cat pueda utilizase pa nomar sitios web de la comunidá llingüística y cultural catalana. La decisión de ICANN sienta un precedente pa que d’agora n’adelantre cualaquier comunidá idiomática, non necesariamente con estáu propiu, pueda disponer d’una identificación de los dominios perteneciente a ella. Hasta agora los identificadores nacionales limitábense a países independientes y col so corrspondiente organismu de rexistros de sitios web. La propuesta agora aprebada ye una iniciativa de PuntCat, una entidá ensin ánimu de lucru que de cuantayá fai campaña pa consiquir que la comunidá de llingua catalana tenga un nome de dominiu propiu. ICANN acepta esta posibilidá con una fórmula alternativa a les hasta agora más corrientes: l’identificador .cat va ser un dominiu patrocináu por un esponsor, que se fai responsable de tolos nomes rexistraos. El Gobiernu de la Generalitat va ser l’esponsor del nuevu dominiu llingüísticu, al través d’una fundación creada pa tal fin y na que van participar entidaes públiques y privaes. puntCat 20 de setiembre, 2005 0 FacebookTwitterPinterestEmail
Música Amazing Grace presenten en directo les sos nueves canciones by asturnet 16 de setiembre, 2005 La banda Amazing Grace actúa esti sábadu 17 de setiembre a les 20.30 hores nel Forum de Fnac-Parque Principado pa presentar en directo les sos nueves canciones. El quintetu xixonés va tocar los temes conteníos nuna maqueta na que colaboraron músicos como Xabel Vegas (Manta Ray) o Pedro Vixil (Edwin Moses, Pedro Pereira). Amazing Grace ye una banda xixonesa d’orientación post-rock e influenciada por formaciones que van dende la electrónica al pop como Sigur Rós, Radiohead o Spiritualized. Les sos lletres comprometíes y atrevíes critiquen la perda d’identidá del individu na sociedá actual. Actuaron n’ Asturies y nel festival francés Tremplin Rock, onde’l quintetu tuvo tocando los temes de la so primer maqueta. 16 de setiembre, 2005 0 FacebookTwitterPinterestEmail
Música Gwendal y Llan de Cubel actúen na Nueche Celta de San Mateo by asturnet 15 de setiembre, 2005 Gwendal, la mítica banda bretona que fundó xunta Alan Stivel el movimientu de la Música Celta de los setenta, vuelve a tocar n’Asturies con nueva formación y discu nuevu. La cita ye esta nueche na Plaza la Catedral dientro los conciertos de San Mateo. Como compañeros de cartelu, los asturianos Llan de Cubel ya Iñaqui Santianes. El grupu fundáu a mediaos de los años setenta por Youenn Le Berre y Jean Marie Renard llega a Uviéu casi tres décades después de la so primer actuación n’Asturies, en 1979, y failo col so últimu trabayu discográficu: “War-Raog” (Alantre). Ye’l nuevu discu de Gwendal darréu de siete años de silenciu. Nel conciertu d’esta nueche n’Uviéu la banda bretona preséntase con nueva formación, de la que namás Le Berre, el líder del grupu, queda de la primera formación. La cita ye a les 21,30 na Plaza la Catedral. 15 de setiembre, 2005 0 FacebookTwitterPinterestEmail