Lliteratura “Trenta razóis pra nun medrar” esta nueche en La Casa Posafuelles by asturnet 27 d'ochobre, 2010 foto1>El poeta Miguel Rodríguez Monteavaro presentará esta nueche, de magar les 21:30 hores, nel chigre La Casa Posafuelles el so poemariu “Trenta razóis pra nun medrar”, escritu na llingua del Eo-Navia. El chigre ta na Cuesta la Vega d’Uviéu y pertenez a la Xunta pola Defensa de la Llingua Asturiana. Miguel Rodríguez Monteavaro (Bual, 1990) ye una de les voces más moces de la poesía en gallego-asturianu. Diose a conocer con collaboraciones en revistes como Entrambasauguas, Lletres Lliterariu o Trabatel cuando entá nun algamare la mayoría d’edá. Tamién prosista ganó nel 2009’l Premio Xeira de narracióis curtias, llega col enfotu de la so mocedá pa brindanos esti poemariu. 27 d'ochobre, 2010 0 FacebookTwitterPinterestEmail
Convocatories Convoquen el Ier Premiu d’Idees “Intraemprendedores” by asturnet 25 d'ochobre, 2010 El Vicerrectoráu d’Estudiantes y Empléu promueve, en collaboración con Bancaja, la convocatoria d’esti premiu col envís “d’impulsar les iniciatives de los estudiantes de la Universidá d’Uviéu” que contribuyan a ameyorar los procesos de xestión del serviciu públicu de la enseñanza, investigación y tresferencia tecnolóxica na universidá asturiana. Pueden participar nesta convocatoria los alumnos matriculaos nel cursu académicu 2010/11 en cualesquier de les enseñances oficiales impartíes n’Asturies, hasta’l 20 de payares. Bases completes de la convocatoria 25 d'ochobre, 2010 0 FacebookTwitterPinterestEmail
Lliteratura Escritores n’asturianu celebraron una xunta na casa natal de Fernán-Coronas by asturnet 25 d'ochobre, 2010 Esti sábadu pasáu, 23 d’ochobre, y coincidiendo cola celebración del Día de la Biblioteca celebróse la II Xunta d’escritores y otros profesionales na casa natal del Padre Galo, en Cadavéu. Nel actu participaron escritores, editores, bibliotecarios, profesores de Llingua y Lliteratura, tantu en castellán como n’asturianu, persones qu’asisten a los Talleres de Llectura y otres persones de la cultura. La xornada dedicóse al llibru infantil y xuvenil n’asturianu, coles conferencies “Escribir llibros infantiles y xuveniles n’asturianu”, por María Esther García; “La edición de llibros infantiles y xuveniles n’asturianu”, por Ángela Sánchez Vallina, de la Editorial Pintar-Pintar; y el “El llibru infantil y xuvenil n’asturianu na escuela”, por Carmen Guardáu Parga (escritora y profesora d’Educación Primaria) y Norbero Martín (profesor d’Educación Primaria). Amás, fízose una mesa redonda y dempués “Una alcordanza pa Nené Losada y dos poetes de Cadavéu: el Padre Galo y Casimiro Cienfuegos Rico”, por Mary Ricu, familiar de Casimiro y persona venceyada a l’animación a la llectura. La música tuvo’l so espaciu cola actuación de Dani García de la Cuesta, Rafa Lorenzo y gaiteros de la Banda de Música de L.luarca. 25 d'ochobre, 2010 0 FacebookTwitterPinterestEmail
Lliteratura La Cruz de Grau convoca’l Premiu de Narrativa “Silverio Cañada” by asturnet 25 d'ochobre, 2010 Ediciones La Cruz de Grau convoca la primer edición d’esti premiu como homenaxe al editor xixonés Silverio Cañada Acebal (1938-2002) creador d’Ediciones Júcar y de la Gran Enciclopedia Asturiana y Gran Enciclopedia Gallega, ente otros munchos títulos, llegando a espublizar más de 2.000 títulos na so vida como editor. El premiu ta empobináu a escritores ente los 18 y 40 años que presenten trabayos escritos en llingua castellana y en prosa, orixinales ya inéditos. La temática y el conteníu de los trabayos va ser llibre, pudiéndose presentar más d’un trabayu cada autor, con una estensión mínima de 100 páxines y máxima de 200 en Tipografía Arial, Times new Roman o Garamond, cuerpu 12 y con espaciáu d’1,5. Los trabayos van presentase por cuadruplicáu embaxo nomatu, acompañáu d’un sobre zarráu nel que conste’l lema nel esterior y nel interior los datos del concursante: nome, apellíos, casa, teléfonu, corréu lletrónicu y una curtia reseña biográfica. El plazu d’almisión de los trabayos va rematar el vienres 28 de setiembre de 2011. La unviada d’orixinales va realizase per corréu certificáu a la siguiente dirección: I Premiu de Narrativa Silverio Cañada Acebal Casa de Cultura de Grau Biblioteca Municipal Valentín Andrés Álvarez, cai Cuetu de La Muria, e/n 33820 Grau. Tamién se pue mandar per corréu lletrónicu a edlacruzdegrado@yahoo.es El premiu va ser únicu, dotáu con seiscientos euros, placa conmemorativa, diploma y publicación de la obra, entregándose en Xixón, n’avientu de 2011. 25 d'ochobre, 2010 0 FacebookTwitterPinterestEmail
Conceyos El Franco entama’l II Cursu de Llingua y Cultura del Navia-Eo by asturnet 21 d'ochobre, 2010 El Conceyu d’El Franco, en collaboración cola Fundación Parque Históricu del Navia, entama l’II Cursu de Llingua y Cultura del Navia-Eo. L’actividá formadora va facese tolos martes y xueves a partir del 2 de payares y hasta’l 16 d’avientu, ente les cinco y los ocho de la tarde, y va impartise na Sala Cultural El Payar del Complexu Cultural As Quintas d’A Caridá (El Franco). Demientres el Cursu, continuación de la primer edición fecha nel añu 2008, van impartise charres y ponencies sobre distintes materies rellacionaes col territoriu a tratar, como son la gramática del gallego-asturianu, lliteratura y sociollingüística de la llingua, tradición oral musical nel Navia-Eo, interpretación toponímica, mitoloxía, recursos naturales principales, esperiencies de normalización llingüística o una obra de teatru costumbrista. Pa ello, esti cursu va cuntar coles collaboraciones d’Ignacio Vares, Xosé Miguel Suárez Fernández Tapia, Xosé Antón Fernández Ambás, Benjamín Méndez, Refael Cascudo Noceda, Marta Trevín o Iván Iglesias Fernández Cazarón. La inscripción nesti cursu, de places llindaes, hai de faese enantes del próximu 29 d’ochobre nel teléfonu 985.478.737 (Teresa Díaz) o unviando un corréu electrónicu a la dirección adl@elfranco.es 21 d'ochobre, 2010 0 FacebookTwitterPinterestEmail
Conceyos Los Amigos de Mieres vuelven a atopase esti vienres by asturnet 21 d'ochobre, 2010 Esti vienres, 22 d’ochobre, entama un alcuentru de socios y simpatizantes de l’Asociación Amigos de Mieres, entidá que tuvo una gran actividá ente 1968 y 1991 y quun grupu de socios, intenta “rellanzar” nestos momentos. L’alcuentru va consistir nel descubrimientu d’una placa, a les siete la tarde, nel llocal onde entamó les sos actividaes, na cai Ayer 4, güei llar d’una sucursal de Caxastur, a cargu del Alcalde de Mieres, pa darréu participar nuna espicha nel Restorán La Xagosa, nel Polígonu de Gonzalín de Mieres, onde va cuntase cola intervención del Coru Mineru de Turón y la proyección d’un vidiu que recueye la hestoria d’esta asociación. 21 d'ochobre, 2010 0 FacebookTwitterPinterestEmail
Lliteratura Miguel Mingotes nel Aula de les Metáfores de Grau by asturnet 21 d'ochobre, 2010 Mingotes va dar un rectial poéticu nel Aula de les Metáfores de Grau esti xueves 21, a les ocho tarde. Nel actu va facer repás de la so trayectoria lliteraria. 21 d'ochobre, 2010 0 FacebookTwitterPinterestEmail
Conceyos Siero convoca beques d’investigación sobre’l conceyu by asturnet 18 d'ochobre, 2010 Hasta’l 2 de payares ta abiertu’l plazu pa presentar proyectos sobre hestoria, economía, xeografía, folclore y tradiciones ya industria. La convocatoria ábrela la Fundación Municipal de Cultura de Siero y ta dirixada a profesionales o persones dedicaes a facer trabayos d’investigación sobre estudios específicos del Conceyu de Siero. Los trabayos pa los que se soliciten les ayudes nun pueden tar espublizaos enantes. Les bases completes y la ficha de solicitú de d’esta convocatoria tán na web del Conceyu de Siero. Bases completes de la convocatoria 18 d'ochobre, 2010 0 FacebookTwitterPinterestEmail
Lliteratura USO convoca’l concursu de rellatos “Pola diversidá cultural y la tolerancia”. by asturnet 18 d'ochobre, 2010 L’Área de Mocedá de la Unión Sindical Obrera convoca esti concursu de rellatos que va yá pola so tercer edición. Nesta ocasión la temática a tratar ye la diversidá, la interculturalidá, el respetu énte otres cultures, la tolerancia énte les persones que vienen d’otros países. Pueden participar mozos d’ente 16 y 30 años. En casu de ser menores de 18 años, va ser necesariu’l consentimientu espresu de los padres o tutores llegales pa la participación y recepción de los premios. Cada concursante va poder presentar hasta un máximu de 3 rellatos. Éstos van tener una estensión máxima de seis fueyes a una sola cara siguiendo la tema y conteníu del concursu. Establezse un únicu premiu valoráu en 300 euros n’efectivu, acompañáu del respectivu certificáu acreditativu. Establezse la posibilidá d’editar el rellatu ganador. El plazu de recepción de les obres remata’l 12 de payares, teniendo de mandase les obres a Área de Mocedá de la Unión Sindical Obrera, cai Llastres, 2 – entresuelu, 33207 Xixón. Bases completes del concursu 18 d'ochobre, 2010 0 FacebookTwitterPinterestEmail
Lliteratura Marta Veneranda y Paquita Suárez conversen en Nueva York sobre les sos histories prohibíes by asturnet 18 d'ochobre, 2010 Esti pasáu viernes 15 d’Ochobre, nel Centru Español, allugáu nel 239 Oeste de la Calle 14 en Manhattan, facíase la presentación de “Les histories prohibíes” de Marta Veneranda con una llectura y conversación pública cola so autora Sonia Rivera-Valdés y la traductora Paquita Suárez Coalla, que punxo de relieve la complexa relación ente los autores hispanos na ciudá de Nueva York. Escritu orixinalmente en castellán y ganador del Premiu Casa de las Américas en 1997, “Las historias prohibidas” de Marta Veneranda componse de diez rellatos, nos qu’apaecen dellos aspeutos de la vida íntima d’inmigrantes latinos en Nueva York. Na presentación, la traductora Paquita Suárez Coalla, que ye amás profesora nel Colexu Comunitariu del Condáu de Manhattan de CUNY, señaló que l’asturianu ye una llingua romance que tuvo la poca fortuna de nun ser reconocida como idioma al puntu de que los propios falantes, que son fundamentalmente xente rural, xente que nun tuvo accesu al estudiu y que nin siquiera ye consciente de falar una llingua diferente. Pala traductora nacía n’Uviéu, “Las historias prohibidas” de Marta Veneranda ye un textu mui averáu. En Nueva York conoció’l llibru que la influyó porque al traviés d’él diose cuenta de que “había otros modelos de lliteratura mui diferentes a los que nos dixeran que yera lo literario. La presentación taba organizada por Latino Artists Round Table y por María Martín, del Centru Español. 18 d'ochobre, 2010 0 FacebookTwitterPinterestEmail