Lliteratura Remedios Menéndez Calvo algama’l concursu de narrativa breve de Cangas by asturnet 15 de payares, 2005 Remedios Menéndez Calvo algamó’l primer premiu del Concursu de Cuentos Breves n’asturianu del Conceyu de Cangas cola so obra “L.letra a l.letra”. L’escritor Xosé María Rodríguez quedó finalista del certame y Ezequiel Cala Arias llevó’l premiu al meyor relatu en variante occidental. La madrilana d’orixen canguesu, Remedios Menéndez Calvo (1975)resultó ganadora del IV Concursu de Relatos Curtios en Llingua Asturiana “Ayuntamientu de Cangas del Narcea” pol so trabayu “L.letra a l.letra”, premiáu con 600 euros. Amás de ser galardonada nesti mesmu certamen n’anteriores ediciones, l’autora fue finalista del concursu de relatos hiperbreves de la editorial Alcumán nel año 2003 y una de les escritores incluíes nel volumen ‘Cuéntame’. Menéndez Calvo desarrolla la so actividá profesional na facultá de Derecho de la Universidá d’Alcalá de Henares. Nel apartáu de meyor relatu n’ asturiano occidental, instituíu con oxetu de promover la creación nesta variante, el galardón fue parar a Ezequiel Cala Arias pol so cuentu “L.lobus d’anguano”. Colaborador habitual de la edición xixonesa de La Nueva España ente 1998 y 2004, también publicó en Les Noticies y El Canciu’l Cuélebre. Esta categoría tá dotada tamién con 600 euros. Detrás del trabayu de Remedios Menéndez Calvo, resultó elexíu en segundu puestu el relatu ‘L’acabóse’, del cangués José María Rodríguez (1956), autor pioneru del Surdimientu y que recientemente publicó la novela ‘Tiempos de Nublina'(Trabe). A la fin Xuan Carlos Crespo Lanchas (1970) fue reconocíu pol so relatu ‘La hestoria de la muyer qu’escaeció cómo llorar y lo qu’aconteció cuando recordó’ con un tercer premiu de 180 euros. Crespos Lanchas, natural de Xixón, publicó esti mesmu añu na editorial Trabe “Poemes raros (de sangre seco)” y colaboró nes revistes Lletres Asturianes, Lliteratura, Reciella Malory y La Ratonera. El xuráu taba presidíu pola conceyal de Cultura, Mónica Díaz y formábenlu el secretariu de l’Academia de la Llingua Asturiana, Roberto González-Quevedo; l’escritor Xuan Bello; el responsable del Serviciu de Normalización Lingüística de Cangas del Narcea, Nacho González; y la maestra d’asturianu Mar Llano. Los miembros del xuráu resaltaron l’altu númberu de relatos presentaos n’asturiano occidental amás de la mocedá de los participantes. 15 de payares, 2005 0 FacebookTwitterPinterestEmail
Lliteratura ASMA celebra la so Selmana Cultural cola IV edición de Nomes Propios by asturnet 15 de payares, 2005 L’Asociación Asturianos en Madrid entama a partir d’esti vienres la programación de la IV Selmana Cultural, con un conciertu del grupu Gueta na Fonte más nueve gaiteros, na Cervecería O’Neills. Una conferencia de Roberto Hartasánchez sobre l’osu pardu n’Asturies, otra d’Ana Pinto Llona sobre los neaderthales y cromagnones nel conceyu d’Onís, cuenta cuentos pa nenos y la IV edición del recital de poetes asturianos ‘Nomes Propios’, na llibrería La Central, del Museu Reina Sofía, completen un programa d’actos que termina’l prósimu 28 de payares. El vienres 18 de payares entama la Selmana Cultural preparada por ASMA (Asociación d’Asturianos en Madrid) con un conciertu na Cervecería O’Neills del grupu asturianu Gueta na Fonte que, acompañaos por nueve gaiteros de diferentes bandes de gaites, llevarán a la capital madrilana los sones asturgaelicos colos que compuxeron el so ultimu discu ‘Como Agua de Mayo’. Los actos continúen el llunes día 21 a les siete la tarde cola conferencia de Roberto Hartasánchez, presidente de FAPAS, sobre l’osu pardu n’Asturies y la Cordillera Cantábrica. El xueves día 24 va ser la investigadora del Departamentu de Prehistoria del Centru Superior d’Investigaciones Científiques, Ana Pinto Llona, la encargada de dar una charla sobre los neaderthales y cromagnones nel conceyu d’Onís. Estes dos conferencies van tener llugar nel salón d’actos del Museu Nacional de Ciencies Naturales. Como yá ye tradición, ASMA entama una nueva edición del recital de poetes asturianos tituláu ‘Nomes Propios’. Nesta cuarta edición, que se fairá na Llibrería La Central, nel nuevu edificiu del Museu Nacional Centru d’Arte Reina Sofía, los poetes invitaos son Silvia Ugidos, Jordi Doce, Ana Vanessa Gutierrez y Julio Rodríguez, que van tar presentaos pol escritor asturianu Martín López-Vega. El domingu día 27, a les doce la mañana, l’espaciu cultural ‘Menos Uno’ va ser la se d’un cuentacuentos, arte, movimientu y música, a cargu d’Alicia Bustamante y Bea Toro, pensáu pa que los nenos participen nes actividaes coles sos manes, a travies d’instrumentos, canciones, bailles y pintures. Web d’ASMA 15 de payares, 2005 0 FacebookTwitterPinterestEmail
Lliteratura Lliteratu saca un especial sobrel Mieres más lliterariu by asturnet 15 de payares, 2005 La revista lliteraria dixital Lliteratu, de recien creación, saca un númberu especial dedicáu al Mieres más lliterariu. Cola escusa de la conmemoración de la XV edición del Premiu Teodoro Cuesta de poesía, y del cabudiañu de la muerte del popular poeta mierense, Lliteratu rescata la memoria de los personaxes que dio esta villa a lo llargo de la historia, al tiempu que dedica les sos entrevistes a cuatro poetes que se fixeron nos últimos años col prestixosu galardón poeticu. Tres escritores tan diferentes como Xabiero Cayarga, ganador del Teodoro Cuesta nel añu 2000 col poemariu ‘Pequeña Europa’; Xuan Bello, que lu consiguiere en 1993 col llibru ‘El llibru vieyu’ y Ánxel Álvarez Llano, premiáu por ‘Na mesma piedra’ nel 2001, contesten a la sección ‘Tres escritores, tres llectures’; mentes que Pablo Antón Marín Estrada, ganador nel añu 1997 col poemariu ‘Otra edá’ failo na sección ‘Autoentrevista’. Pero non solo se fala de poesía. La lliteratura asturiana ta enllena de firmes d’escritores naturales del valle del Caudal, como ye’l casu de Fulgencio Argüelles, Lourdes Álvarez, Xuan Santori, Jose Luis Piquero o’l propiu Tiadoru Cuesta. Pero primero y amás d’ellos hebo otros que tamien escoyeron el camín de les lletres pa siguir la so trayectoria vital. De manera que los reportaxes especiales de Lliteratu ayúdennos a siguir la historia de la villa de Mieres al travies de la vida y les obres de los sos personaxes, dalgunos d’ellos cuasi escaecíos, rescatando la memoria d’homes y destinos tan estremaos como los de Diego Suárez Corvín, nacíu en 1521, Rodrigo Álvarez Albuerne o Julián Burgos, ente otros. Escritores, obres, noticies y, por supuesto, la collaboración de los llectores, completen esti segundu númberu de la nueva revista dixital. Web de Lliteratu, Revista Cultural 15 de payares, 2005 0 FacebookTwitterPinterestEmail
Lliteratura El premiu Teodoro Cuesta de poesía cumple quince años by asturnet 13 de payares, 2005 El pasáu 9 de payares finó’l plazu de presentación d’orixinales pal Premiu de Poesía Teodoro Cuesta que convoca añalmente el Conceyu de Mieres. Nesta ocasión el certamen cumple quince ediciones y ye anguaño’l concursu lliterariu más prestixosu de los que s’entamen en llingua asturiana. Ente la nómina de ganadores del Teodoro Cuesta figuren dellos de los másimos esponentes de les xeneraciones poétiques actuales, ente ellos Berta Píñán, Lourdes Álvarez, Xuan Bello, Martín López-Vega, Chechu García, Xuan Santori, Xabiero Cayarga, Vanessa Gutiérrez y Marta Mori d’Arriba, la última ganadora. Anguaño el Premiu Teodoro Cuesta ta dotáu con una compensación económica de 5.000 euros y la publicación de la obra. Nos prósimos meses va poder conocese’l nome del autor qu’a xuiciu del xuráu va recibir el premiu na so edición decimoquinta. 13 de payares, 2005 0 FacebookTwitterPinterestEmail
Lliteratura Xosé Nel Riesgo retrata l’Asturies caciquiega del sieglu XXI na so última novela by asturnet 11 de payares, 2005 Xosé Nel Riesgo presenta esti sábadu 12 n’Uviéu la so última novela “Parque temáticu”, un acedu retratu de l’Asturies caciquil del sieglu XXI na que la política local de grandes proyectos clisa cualquier intentu de racionalizar l’actividá pública del país. El caderalgu d’Economía David Rivas y l’escritor Humberto González van facer de padrinos de la segunda novela de Riesgo, dende qu’en 1989 diera a estampa la polémica “El cai nunca duerme”. La nueva obra del narrador avilesín asitia l’acción nun conceyu modestu d’una fastera indeterminada d’Asturies gobernáu por un cacique prototípicu de los nuestros díes: grandón, babayu, ignorante que sueña con instalar en territoriu municipal un parque temáticu que centre l’atención de tol mundu. Riesgo retrata un país onde les caleyes tan urbanizaes con faroles de diseñu seudodecimonónicu, los polígonos industriales nun dexen volver salir la yerba y s’entamen talleres pa emprendedores ensin capital. La presentación de “Parque temáticu” de Xosé Nel Riesgo ye esti sábadu 12 a les 13.00 hores del mediudía na Llibrería Trabe d’Uviéu. 11 de payares, 2005 0 FacebookTwitterPinterestEmail
Lliteratura Ismael María González Arias publica una nueva novela sobre lo real by asturnet 10 de payares, 2005 L’escritor Ismael María González Arias acaba de publicar “El tiempu de Manolo”, una novela qu’afonda n’alcordanza de los díes perdíos de la mocedá con un tresfondu autobiográficu y real. La obra del narrador mierense preséntase esti viernes 11 en Fnac nun actu que va cuntar cola presencia del propiu autor. Autor de diversos volúmenes divulgativos y d’ensayu, asina como de noveles realistes como “La boda del añu”(2002) o “El cuartu negociu”(1992) González Arias fai nel so últimu llibru un minuciosu relatu vital de la memoria propia. En “El tiempu de Manolo” l’autor al través d’un vivu estilu torrencial descubre los misteriosos detalles de la vida d’un pueblu onde “como en tolos llaos, los habitantes valen muncho más polo que son que polo que paecen”. La presentación de la nueva novela d’Ismael María González Arias va facese esti viernes 11 a les 20.00 hores nel Forum de Fnac en Siero. 10 de payares, 2005 0 FacebookTwitterPinterestEmail
Comunicación Jean Daniel, Régis Debray y Mario Soares participen nun debate organizáu pola Fundación Príncipe d’Asturies by asturnet 7 de payares, 2005 El fundador del diariu Le Nouvel Observateur Jean Daniel va participar xunto al filósofu francés Règis Debray y l’ex presidente portugués Mario Soares nun debate organizáu pola FPA en conmemoranza del so XXV aniversariu. L’actu va celebrase esti xueves 10 nel Teatru Palacio Valdés d’Avilés y nel van participar tamién Luc Montagnier y Jerónimo López. Los participantes nel debate d’Avilés tienen en común amás de la so proyección internacional l’haber sío premiaos pola Fundación Príncipe d’Asturies con dalgún de los sos galardones. L’ex ministru d’Educación Gustavo Suárez Pertierra va ser l’encargáu de moderar l’alderique, el primeru d’un ciclu organizáu pola fundación asturiana pa xuntar de nuevu nel Principáu a dellos de los premiaos polos galardones que concede añalmente la institución. 7 de payares, 2005 0 FacebookTwitterPinterestEmail
Lliteratura Preséntase nel Atenéu Obreru de Xixón un llibru sobre les muyeres de la guerra civil by asturnet 7 de payares, 2005 La hestoriadora alicantina y colaboradora del diariu EL Mundo Llum Quiñonero presenta esti martes nel Atenéu Obreru de Xixón el llibru “Nosotras que perdimos la paz”, un volume nel que se reconstrúi la esperiencia personal de cuatro muyeres marcaes pola derrota del bandu republicanu na guerra civil. La presentación va ser a les 20.00 hores nos locales del Atenéu Obreru y va completase cola proyección del DVD “Muyeres del 36”, un documental del que ye tamién autora Llum Quiñonero. 7 de payares, 2005 0 FacebookTwitterPinterestEmail
Comunicación El cursu d’asturianu pa periodistes de la Conseyería inda nun cubrió toles sos places by asturnet 4 de payares, 2005 El cursu de llingua asturiana pa profesionales de los medios d’información qu’organiza la Conseyería de Cultura inda nun cubrió les trenta y cinco places que s’ufiertaben pa participar nél. El modulu formativu va empobináu a la capacitación llingüística de periodistes y la so matriculación ye gratuíta. La Oficina de Política Llingüística del Principáu y el Seminariu de Filoloxía Asturiana de la Universidá d’Uviéu son los organizadores d’esti cursu coordináu pol profesor Xulio Viejo y empobináu a profesionales de la información, ya seyan llicenciaos en Periodismu o que desenvuelvan el so llabor en medios de comunicación. El prósimu 10 de payares ye la fecha final pa matriculase nesti cursu que se va impartir ente’l 11 de payares y el 17 d’avientu, con una duración de 30 hores distribuíes en xornaes de viernes y sábadu. 4 de payares, 2005 0 FacebookTwitterPinterestEmail
Comunicación Andecha Astur denuncia a la TVG poles sos emisiones n’Asturies by asturnet 3 de payares, 2005 Andecha Astur denunció énte’l Ministeriu d’Industria a la Televisión de Galicia (TVG)poles sos emisiones en territoriu asturianu que la formación nacionalista entiende que pueden ser illegales. La organización pide-y retiren a la Xunta de Galicia la concesión del ente de comunicación de nun terminar estes tresmisiones fuera les sos llendes administratives. Según informa Andecha na so web oficial la denuncia énte Industria vien motivada en que la sintonización de la señal de TVG n’Asturies podía tar vulnerando la llei que regula la concesión de les canales autonómiques. Esta normativa, recueye que les emisiones «han ceñise, de forma esclusiva, al so ámbitu territorial, nun pudiendo, por tanto, estendese fuera de les sos fronteres». Andecha Astur considera que la emisión de la TVG débese «única y esclusivamente a una campaña de galleguización del Occidente d’Asturies» y cita les pallabres del d’aquella presidente de la Xunta de Galicia ,Manuel Fraga, afirmando na nauguración d’un repetidor en Ribadeo qu’esta infraestructura «permitirá culturizar la reserva india del Occidente d’Asturies, vamos tresmiti-yos los fondos raígaños de la nuestra cultura». 3 de payares, 2005 0 FacebookTwitterPinterestEmail