Lliteratura L’antoloxía ‘Palabres clares’ preséntase n’Uviéu con parte de los poetes seleccionaos by asturnet 2 d'avientu, 2005 L’antoloxía ‘Palabres clares’ de José Luis García Martín preséntase esta tarde n’Uviéu nun actu que van cuntar cola participación de dalgunos de los autores seleccionaos, que habrán lleer los sos poemes. La esbilla respuende a un encargu fechu al críticu y profesor de la Universidá d’Uviéu con motivu de la última Selmana de les Lletres dedicada a la poesía contemporánea. El Club de Prensa Asturiana ye’l sitiu escoyíu pola editorial Trabe pa presentar l’antoloxía ‘Palabres clares’. La primer presentación del volume de García Martín féxose en mayu d’esti añu nel Aula Magna de la antigua Universidá, enmarcada dientro los actos de conmemoranza de les Lletres. Esti viernes 2 a les 20.00 de la tarde l’antólogu, acompañáu de dalgunos de los autores seleccionaos, va repasar la poesía contemporánea en llingua asturiana y los criterios d’escoyeta siguíos nel so llabor. Darréu los poetes presentes na antoloxía van lleer dellos de los sos testos. ‘Palabres clares’ recueye la obra d’autores nacíos dende 1960 hasta los años ochenta: escomienza con Antón García y remata con Ana Vanessa Gutiérrez. 2 d'avientu, 2005 0 FacebookTwitterPinterestEmail
Comunicación El conceyu de Noreña apreba crear una emisora de radio municipal by asturnet 1 d'avientu, 2005 Les asociaciones integrantes de la Plataforma ‘Por una radio’ de Noreña amosaron el so contentu pol alcuerdu aprebáu pel consistoriu en plenu municipal pa poner a funcionar una emisora de radio nel conceyu. La creación de la radio local yera una demanda manifestada por abondos colectivos sociales del conceyu. La decisión de la puesta en marcha de la furura Radio Noreña solventóse por unanimidá nel plenu del pasáu 24 de payares y l’alcuerdu implica’l compromisu del Ayuntamientu en facer realidá el proyectu con una partía presupuestaria específica. Les asociaciones integraes na plataforma popular que pidía la emisora municipal congraciáronse de la iniciativa del consistoriu y amuésense enfotaes en que’l procesu de creación de la radio siga’l so cursu cola mesma “propiedá y naturalidá” cola que se consiguió l’alcuerdu unánime de los grupos presentes nel plenu. 1 d'avientu, 2005 0 FacebookTwitterPinterestEmail
Lliteratura Una editorial de Nueva York va publicar la edición n’español de la obra ‘Pa nun escaeceme’ de Paquita Suárez Coalla by asturnet 1 d'avientu, 2005 El volume de narraciones reales ‘Pa nun escaeceme'(Trabe, 2002) de Paquita Suárez Coalla va traducise al español publicáu pola editorial Campana de Nueva York. L’autora, natural de Grullos de Candamo y anguaño profesora nel College York de la CUNY, escomenzó a escribir en llingua asturiana nos Estaos Uníos y ye autora d’otru volume asemeyáu: ‘La mio vida ye una novela’ tamién publicáu pola uvieína Trabe.En 2004 participó como ponente nes Xornaes d’Estudiu de l’Academia de la Llingua con una comunicación sobre la comparanza ente la creación n’asturianu y la creación n’español nos Estaos Unìos. Suárez Coalla remanez nos sos llibros los testimonios orales de muyeres campesines del so llugar natal que tracen les sos esperiencies personales al través de la recodanza de les sos vides. En ‘La mio vida ye una novela’ reproduz testualmente los testimonios recoyíos y nel volume qu’agora va traducise al español en Nueva York ‘Pa nun escaeceme’ ye la propia autora la que pon voz a personaxes reales del so pueblu. El llibru de Paquita Suárez Coalla va publicase n’español nel mes de mayu y va facelo xunta’l volume autobiográficu “Fragmentos de la memoria. Recuerdos de una experiencia carcelaria” de la ex prisionera política de la dictadura militar arxentina Margarita Drago. El sellu editorial Campana ta especializáu na difusión d’autores latinos nos Estaos Uníos y tien la so sé na ciudá de Nueva York. 1 d'avientu, 2005 0 FacebookTwitterPinterestEmail
Lliteratura Jaume Subirana ufierta una llectura de poesía catalana de güei nel Aula de les Metáfores de Grao by asturnet 1 d'avientu, 2005 L’escritor Jaume Subirana va ufiertar esti viernes 2 una llectura de poesía catalana de güei nel Aula de les Metáfores de Grao dientro de les actividaes qu’esti espaciu divulgativu entama a lo llargo del añu. Subirana ye un significativu autor de la lliteratura actual en llingua catalana y director de la Institució de les Lletres. El fundador de l’Aula de les Metáfores y poeta Fernando Beltrán va ser l’encargáu de presentar al escritor catalán na Casa de la Cultura de Grao. Jaume Subirana (Barcelona, 1963) ye Doctor en Filoloxía Catalana y tien publicaos llibros de poesía, narrativa y ensayu, ente los que destaquen Adrada, En altres coses, Tota la veritat sobre els catalans, Suomenlinna (Premio de la Fundació Enciclopèdia Catala-na), Per a què serveix un escriptor? o Final de festa (Premio Carles Riba 1988). Na so bibliografía hai tamién volúmenes críticos sobre la obra d’autores catalanes contemporáneos y diverses traducciones. Ye miembru del Pen Club Internacional de Cataluña y dende setiembre de 2004 director de la Institució de les Lletres Catalanes. La llectura de Jaume Subirana tien previsto escomenzar a les 19.00 hores na Sala Polivalente de la Casa de Cultura de Grao. 1 d'avientu, 2005 0 FacebookTwitterPinterestEmail
Comunicación Radio Asturias entama una nueva FM y cambia les frecuencies del so dial by asturnet 30 de payares, 2005 El grupu Radio Asturias de la cadena SER cuenta dende esti xueves 1 con cuatro emisores na nuestra comunidá: tres en frecuencia modulada y una n’onda media. L’ampliación del so llabor informativu con una nueva emisora de FM y la reordenación de los espacios esistentes faen que cambien la configuración de les sos frecuencies col empiezu del mes d’avientu. Les emisores de RADIO ASTURIAS OM y RADIO ASTURIAS FM van centrar la so programación nel ámbitu autonómicu dende esti viernes 1 d’avientu, mientres que SER ALTO NALÓN y SER BAJO NALÓN, amás de tresmitir la señal y programación convencional del Grupu, van poner la so atención nes sos comarques d’ influencia na Cuenca del Nalón, nel casu de SER ALTO NALÓN y los conceyos de Grao, Pravia, Candamo, Sotu’l Barcu y Avilés, en el caso de SER BAJO NALÓN. 30 de payares, 2005 0 FacebookTwitterPinterestEmail
Comunicación El Principáu firma un alcuerdu de colaboración de RTVE cola televisión autonómica by asturnet 30 de payares, 2005 El presidente del Principáu Vicente Álvarez Areces y la directora xeneral de RTVE Carmen Carafell firmaron esti miércoles 30 pela mañana un alcuerdu de colaboración ente l’ente públicu español y la radiotelevisión autonómica asturiana. El conveniu vixente hasta 2007 contempla l’accesu del ente autonómicu a recursos ya instalaciones del centru territorial de RTVE, asina como l’intercambiu de conteníos informativos y l’alquiler a precios preferenciales d’equipos técnicos. La radiotelevisión asturiana va poder disponer tres esti alcuerdu del usu de les instalaciones del centru de San Esteban de les Cruces na so planta baxa pal entamu de les sos emisiones de la programación informativa. L’intercambiu de noticies y de cobertura d’actos insitucionales tamién se contempla nel alcuerdu, asina como l’accesu preferencial a equipos d’unidá móvil per parte de l’autonómica asturiana y a los fondos audiovisuales del centru territorial de RTVE. Nel testu del conveniu especifícase que’l Principáu nun fai darréu aportación económica dala, a nun ser nel casu de l’asunción de los pagos prefernciales por usu de recursos ya instalaciones que fixe l’ente públicu español. L’alcuerdu entra en vigor dende la so firma hasta’l 31 d’avientu de 2007, fecha na que va tener que ratificase o propiciar la firma d’un nuevu conveniu de colaboración ente les dos empreses de comunicación. 30 de payares, 2005 0 FacebookTwitterPinterestEmail
Lliteratura Pedro de Silva presenta la so última novela by asturnet 28 de payares, 2005 L’escritor Pedro de Silva va presntar la so última novela, “La mosca”, qu’inauguró la colección “Biblioteca d’Autores Asturianos”, esti llunes día 28 de payares a les siete y media la tarde na Llibrería Cervantes d’Uvieu. La novela de Pedro de Silva inauguró la colección “Biblioteca de Autores Asturianos” que publica la editorial Laria dende’l pasáu mes de mayu, y que ta dirixida polos escritores Tino Pertierra y Saúl Fernández. Precisamente esti autor va ser l’encargáu de charrar con Pedro de Silva na presentación que va facer esta tarde na Llibrería Cervantes. “La mosca” ye una novela corta estructurada en torno a la comida de dos pareyes nun mesón perdíu en Castiella. A lo llargo la conversación repásense asuntos como la vida lliteraria, les relaciones amoroses y sexuales, o la vitalidá de la convivencia en pareya. Depues de “La mosca” la colección “Biblioteca d’Autores Asturianos” publicó los siguientes títulos: “Ancila en los fuegos”, de Carmen Gómez Ojea; “Amores que atan”, de Manuel García Rubio y “Las dos caras de Jano”, de Carmen Ruiz-Tilve. 28 de payares, 2005 0 FacebookTwitterPinterestEmail
Lliteratura La Biblioteca de Turón algamal Premiu Nacional de Fomentu a la llectura by asturnet 28 de payares, 2005 La Biblioteca de Turón, del Serviciu Municipal de Biblioteques de Mieres, foi premiada pol Ministeriu de Cultura con ún de los galardones dedicaos a reconocer los programes de fomentu de la llectura pol so programa “Bibliotecariu per un día”, dirixíu a neños de quinto y sesto de Primaria, d’ente 11 y 12 años. Nel presente cursu, Mieres promovió distintos programes de fomentu de la llectura que tuvieron una gran acoyida, como ‘La Escuela de Maxa’ o los ligaos al ‘IV Aniversariu d’El Quijote’. Sin embargu, Bibliotecarios per un día yá llamare l’interes nacional, siendo retratada la so orixinalidá en distintes televisiones d’ámbitu estatal. “Bibliotecariu per un día” tien como oxetivu l’implicar a los más mozos na xestión d’una biblioteca y nel tratu colos usuarios, col fin d’espertar asina l’interes polos llibros. Y nes prósimes selmanes pa reeditar el programa na so segunda edición. El premiu de fomentu a la llectura ye de 3000 euros y 200 llibros que van dir parar a la Biblioteca de Turón 28 de payares, 2005 0 FacebookTwitterPinterestEmail
Lliteratura Suárez Coalla y Marín Estrada van participar nel congresu internacional de LART en Santo Domingo by asturnet 25 de payares, 2005 Los escritores Paquita Suárez Coalla y Pablo Antón Marín Estrada van ser los representantes del mundu de la creación asturiana nel prósimu congresu internacional de LART (Latin Artists Round Table) que se ta cellebrando estos díes en Santo Domingo y que nesta ocasión tien por títulu: “Aquì me tocó crear. Globalización y dislocación cultural”. La cuarta edición del congresu internacional va celebrase per primer vez na República Dominicana, después de les sos tres ediciones anteriores que tuvieron por escenariu la ciudá de Nueva York. Creadores asturianos de diversos campos tuvieron presentes nes ediciones anteriores, ente ellos los escritores participantes nel congresu d’esti añu: Paquita Suárez Coalla y Pablo Antón Marín Estrada. Nel LART de 2003 participaron l’artista Paco Cao, les poetes Esther Prieto y Berta Piñán y el realizador Alfonso Suárez y nel congresu de 2002, los escritores Antón García, Consuelo Vega y tamién Piñán. Los espacios creativos sobre los que xira’l Latin Artists Round Table van del cine a la música, pasando pel teatru, la lliteratura, la televisión y les nueves artes audiovisuales. Nel IV congresu de LART va afondase sobre la identidá cultural nel mundu de la globalización y de los esilios voluntarios o forzosos nuna realidá cada vez más mudable y deslocalizada. Suárez Coalla y Marín Estrada van falar nel alcuentru del sitiu en mundu de los autores en llingua asturiana partiendo de la so esperiencia personal. 25 de payares, 2005 0 FacebookTwitterPinterestEmail
Lliteratura Charra sobre Neruda nel Aula les Metáfores de Grau by asturnet 25 de payares, 2005 L’Aula les Metáfores de Grau sigue col so programa d’actividaes relacionaes cola poesía presentando nesta ocasión, en collaboración cola Fundación Príncipe d’Asturies, una charra sobre’l poeta chilenu Pablo Neruda, acompañada d’una llectura de poemes, a cargu de Bernardo Reyes, sobrín-nietu del poeta. L’actu va tener llugar esta tarde a les 20 hores na Capiella de los Dolores de Grau. Bernardo Reyes (Temuco-Chile, 1951) ye tamien escritor y tien publicaos varios poemarios, como “Pájaros de Contrasueño” (1991), “Grito del Solo” (2001) y “Duelo de Pájaros Mudos” (2004). Foi coordinador del “Tren de la Poesía”, una serie d’actos d’homenaxe pa conmemorar la muerte de Neruda. No que se refier al restu de la programación del Aula, el prósimu vienres, día 2 d’avientu, el poeta catalán Jaume Subirana, director de la Instituciò de les Lletres Catalanes, va ufiertar una llectura de poesía catalana. L’actu va tener llugar a les siete la tarde na Sala Polivalente de la Casa Cultura de Grau. 25 de payares, 2005 0 FacebookTwitterPinterestEmail