Comunicación RTPA va usar la señal y la producción de la TVG na tresmisión del Ferrol-Sporting by asturnet 3 de xineru, 2006 La primer retresmisión deportiva de la Radio Televisión del Principáu d’Asturies (RTPA) va utilizar la señal y la producción de la Televisión de Galicia (TVG) pa la difusión del partíu Rácing de Ferrol-Sporting de Xixón del prósimu sábadu 7 de xineru. El primer alcuentru televisáu con producción propio pola autonónica asturiana va ser al día siguiente dende l’estadiu Miramar de Lluanco cola emisión del partíu Marino-Durango. La RTPA va desplazar esti domingu 8 hasta la capital gozoniega el so primer equipu de retresmisiones deportives compuestu por una unidá móvil y seis cámares. Cola emisión d’estos dos alcuentros deportivos la televisión autonómica escomienza nel so periodu de prebes la programación de partíos d’equipos asturianos. El Sporting, el Marino y darréu el Real Uviéu, son los clubes colos que RTPA tien llegao a alcuerdos pa la emisión de los sos partíos. 3 de xineru, 2006 0 FacebookTwitterPinterestEmail
Lliteratura As Figueiras acueye la presentación d’una obra de teatru en gallego-asturiano de 1926 by asturnet 3 de xineru, 2006 L’asociación cultural Rapalacóis entamó esti llunes 2 de xineru en As Figueiras un actu de presentación de la obra teatral ‘El trato’, escrita en 1926 pol escritor castripolense Francisco F. Arias Campoamor en gallego-asturiano. El tapiegu Xosé Miguel Suárez ye l’autor de la edición actual y de les notes y comentarios qu’avíen esta pieza costumista. La obra d’Arias Campoamor ta publicada pola asociación Rapalacóis con una tirada de mediu cientu d’exemplares que se van repartir por escueles y centros culturales de la rexón eo-naviega. El llibru tamién va poder mercase nes llibreríes a un preciu de seis euros. ‘El trato’ ye una de les poques obres escrites abenayá en gallego-asturiano que se conserven íntegres. 3 de xineru, 2006 0 FacebookTwitterPinterestEmail
Lliteratura Adolfo Camilo Díaz recueye nun volume presentáu n’Uviéu venticinco años d’opinión crítica by asturnet 1 de xineru, 2006 “In Articulo mortis” ye’l títulu del volume nel qu’Adolfo Camilo Díaz recueye venticinco años d’opinión crítica publicada en diferentes medios escritos asturianos y que presentó’l vienres 30 d’avientu n’Uviéu cola collaboración de los periodistes Ramón Lluis Bande y Próspero Morán. L’escritor xunta nesti volume dalgo más d’una trentena d’artículos nos que la reflexón, l’análisis y la ironía afonden en llúcides instantánies de l’actualidá pública del nuestru país. El llibru nel qu’Adolfo Camilo Díaz recopila una esbilla de la so obra periodística ta publicáu pola editorial Madú y presentóse esti viernes 30 d’avientu a les 19,00 nel centru social La Escandalera d’Uviéu. El periodista y director d’Asturnews Próspero Morán foi l’autor de la presentación de “Articulo mortis” xunta’l prologuista del llibru, el tamién periodista Ramón Lluis Bande. Mentres que Bande s’averó na so presentación a cualidaes de los artículos recoyíos nel trabayu, Próspero Morán fizo alcordanza de los tiempos de llucha y animación cultural que compartiera nos 80 con Adolfo Camilo y afitó que “Dolfo, Ramón y yo mesmu, y de xuru que munchos de los equí presentes nesti asoleyar en volume de artículos y pensamientos abondo asoleyaos a lo llargo de 25 años, vivimos nuna Asturies irreal, la que cualaquier otru pueblu atalantaría normal, pero quel de nueso sostituye por una Axturies que se paez más a esi planeta de la primer película ente gore y humorística, ente serie b y serie h, que fizo albidrar el remanecer del cine con caspa na España de los 90. Esa Asturies que tendrá de manifestase hasta pa despedir lañu vieyu y acoyer el Nuevu na plaza lAyuntamientu dUviéu pa pidir lo que ye normal en tolos llaos, la oficialidá de la llingua que fala. Esa Asturies, que ye la de nueso, que ye la destos 25 años dArtículos de Dolfo, de Ramón de quien-yos fala, de García Arías, de Ana Cano, de Xosé Ramón Riaño, de Roberto González Quevedo ” Pela so parte, Adolfo Camilo desplicó’l contestu de dellos de los artículos recoyíos nel volume y dió llectura a ún espublizáu por La Voz d’Avilés nos años 80 sobre la política cultural gallega qu’albidró tien agora rabiosa actualidá. La llectura del artículu por Adolfo Camilo Díaz pue descargase nel ficheru d’audiu qu’acompanga esta información. 1 de xineru, 2006 0 FacebookTwitterPinterestEmail
Comunicación RTPA estrena les sos tresmisiones deportives col partíu Sporting-Ferrol by asturnet 30 d'avientu, 2005 La Radiotelevisión del Principáu d’Asturies (RTPA)va estrenar les sos retresmisiones deportives nel so periodu de prebes col alcuentru que disputen el prósimu 7 de xineru el Sporting de Xixón y el Ferrol nel estadiu coruñés d’A Malata. Los siguientes partíos televisaos van ser el del Marino de Lluanco contra la Cultural de Durango esti 8 de xineru nel estadiu gozoniegu de Miramar y el del Real Uviéu contra l’Unión d’Irún el domingu 15 nel Carlos Tartiere. La televisión autonómica quier aprovechar el so periodu d’emisión en prebes p’amosar un adelantru de lo que van ser los conteníos de la futura programación de la canal pública asturiana una vez completaos los llabores técnicos pa la so rededifusión y axeitada la so parriella definitiva. El prósimu domingu 7 de xineru del nuevu añu va ser la estrena de les sos retresmisiones deportives cola difusión del partíu que van disputar el Sporting y el Ferrol nel estadiu d’esti últimu equipu. El Marino y el Real Uviéu van ser los siguientes equipos de fúbtol asturianos en ver emitíos los sos alcuentros cola Autonómica. L’ente públicu de comunicación del Principáu va tresmitir partíos, de mano, d’estos tres equipos, darréu del principiu d’ alcuerdu algamáu coles directives de les entidaes deportives pa la merca de los derechos d’emisión, un alcuerdu qu’inda nun ye definitivu nel casu del Real Uviéu y que nel casu del Sporting ta supeditáu a lo roblao pol equipu xixonés cola asociación audiovisual FORPA, cola que ya tien un alcuerdu asemeyáu al que tenta formular RTPA. L’únicu club al que-y paez prestar el contratu cola autonómica asturiana ye’l Real Marino de Lluanco. El gabinete de prensa del canal televisiva al dar a conocer la estrena de les retresmisiones deportives nel periodu de prebes nun aclarió si se contempla nelles la locución n’otra llingua que nun sea’l castellano. 30 d'avientu, 2005 0 FacebookTwitterPinterestEmail
Lliteratura Trabe publica la primer obra traducida del aragonés al asturiano by asturnet 28 d'avientu, 2005 Chusé Raúl Usón ye’l primer autor en llingua aragonesa en ver traducida una obra suya al asturiano. La editorial Trabe ye la responsable de la publicación de ‘Les cien llaves’, una novela del escritor mañu que s’ufierta en versión d’Héctor Xil y que presenta esti xueves n’Uviéu el propiu autor introduciu por Xuan Bello. Usón, nacíu en Zaragoza nel añu 1966, ye un de los autores más prolíficos de la nueva lliteratura aragonesa, con obres como ‘Dezinueu repuis duna bida dallata'(1986); ‘Ixe buxo biello entre fierros(1988); ‘Luna, arto y poemas de bardo’ (1989); ‘Fuellas chobenas’, 1991; ‘Trista boira baxa'(1994) y el so últimu llibru: ‘Benzina’, (2003). Cola novela qu’agora se publica en llingua asturiana: ‘Les cien llaves’ algamó’l Premiu Arnal Cavero del Gobiernu d’Aragón. L’actu de presentación de ‘Les cien llaves’ de Chuse Raúl Usón va ser esti xueves 29 na llibrería Trabe d’Uviéu a les 20,00 hores y van asistir a él, amás del propiu autor, el traductor de la obra, Héctor Xil y l’escritor Xuan Bello. 28 d'avientu, 2005 0 FacebookTwitterPinterestEmail
Lliteratura Xulio Vixil ufierta una apuesta pola utopía lliteraria y vital na so nueva novela by asturnet 27 d'avientu, 2005 L’escritor Xulio Vixil publica la so segunda novela embaxo’l títulu de “L’Inmoral”(Trabe, 2005), una apasionada defensa de les utopíes lliteraries y vitales na que’l narrador yerbatu da rienda suelta a les sos obsesiones nun llinguaxe llaráu de llirismu y humor. La novela de Vixil cuenta la trayectoria esistencial de Mon Legué, un personaxe perteneciente a la categoría social de los “bantu” y que se defín como “comedor de caparines”, obligáu a vivir nun mundu domináu polos “undanda”, la categoría inferior. En palabres del tamién escritor Pablo Rodríguez Medina la narración de Xulio Vixil (Bimenes, 1964) ye “muncho más qu’un ensayu o un estudiu, ye’l retratu llíricu de Mon Legué, un simple ya inmoral bantu” y que con esta novela, el narrador yerbatu “vuelve a refrescar la prosa asturiana de llirismu, ritmu, fantasía y un humor y amor especiales como mui pocos saben facer”. La nueva obra de Xulio Vixil preséntase esti martes 27 na llibrería Trabe d’Uviéu a les 20.00 hores nun actu nel que l’escritor Inaciu Llope va glosar el llibru y falar del so autor. 27 d'avientu, 2005 0 FacebookTwitterPinterestEmail
Comunicación El Centru Asturianu concede los sos Urogallos del 2005 by asturnet 26 d'avientu, 2005 El Centru Asturianu de Madrid fizo públicos los nomes de los personaxes y colectivos que reciben esti añu los sos Urogallos de Bronce. Ente los distinguíos resalten l’académicu Xosé Bolado nel apartáu de llingua asturiana y el cuentacuentos Milio’l del Nido como personaxe más popular. El teólogu José María Díez Alegría y el gastrónomu José Antonio Fidalgo reciben Urogallos especiales poles sos respectives trayectories humanes. Los otros galardonaos son: n’artesanía, el constructor y restaurador d’horros Abel Llosa; en baile tradicional el grupu Escarpinos; Salvador Vázquez Sánchez, en tonada; Oscar Fernández, na categoría de gaiteru solista; el restaurante Casa Emburria de Tineo en gastronomía; en defensa de la natura, el Parque de Redes y el Muséu de la Madera; por último, en fiestes populares, los Güevos Pintos de La Pola Siero. El Centru Asturianu de la capital del estáu concede tamién los Urogallos especiales que nesti añu 2005 correspuenden al músicu Pedro Pangua; al conductor del programa “Bravo asturianísimo”, Gonzalo Mieres; a los restauradores Josefa Suárez y Máximo Díaz de La Parra d’Avilés; y al monologuista José Manuel Reguero “El Maestru”. Los premios con Urogallos especiales y mención honorífica son el teólogu y xesuíta José María Díez Alegría, el gastrónomu José Antonio Fidalgo, l’inxenieru Avelino Suárez y la Hermandá La Probe de Morcín. 26 d'avientu, 2005 0 FacebookTwitterPinterestEmail
Comunicación Industria reconoz que la TVG llega hasta San Xuan de Nieva by asturnet 26 d'avientu, 2005 La Xefatura Provincial de la Inspección de Telecomunicaciones n’Uviéu del ministeriu d’Industria reconoz nun escritu unviáu a Andecha Astur que les emisiones de la televisión autonómica de Galicia lleguen hasta San Xuan de Nieva. El organismu oficial respuende a la denuncia fecha pola formación política asturiana remitiendo ésta a Madrid pa qu’investigue la posible irregularidá de les emisiones de la TVG. L’escritu de la delegación de Telecomunicaciones reconoz qu’esistieron va años repetidores de l’Autonómica gallega nes prosimidaes de Xixón y Avilés por mor de la celebración de dellos alcuentros deportivos y a cuenta d’un conveniu con TVE. Al empar Industria afirma qu’anguaño nun hai nengún repetidor instaláu en territoriu asturianu polo que remite a Andecha a presentar la denuncia na sé central del ministeriu en Madrid. Nes midiciones feches pola Inspección por solicitú d’Andecha Astur l’organismu oficial reconoz que les emisiones de la TVG lleguen hasta San Xuan de Nieva y que l’orixe d’estes emisiones ye’l repetidor instaláu pol ente de comunicación de la comunidá vecina en Ribadeo, na llende con Asturies. La delegación del ministeriu n’Asturies insta a qu’Andecha pida a la sé central d’Industria en Madrid pa que s’averigüe si esti algame de les emisiones supón dalguna irregularidá acordies cola lexislación vixente. 26 d'avientu, 2005 0 FacebookTwitterPinterestEmail
Lliteratura Pablo Texón peñera les voces de la intimidá personal y el sentimientu colectivu nel so primer llibru de poesía by asturnet 26 d'avientu, 2005 Pablo Texón Castañón (Felechosa, 1977)acaba de publicar el volume de poemes col que ganó en 2003 el premiu Nené Losada Rico: “Toles siendes”, una declaración de principios lliterarios que tien el sellu d’una nueva voz xeneracional y al empar xenuinamente personal. Referencies a la esperiencia asimilada d’un llector y d’un home del so tiempu al que nun-y son ayenos los guiños de la cultura pop o del universu multimedia, una voz íntima y el verbu cenciellu de la poesía de llinia clara definen el conxuntu de poemes de “Toles siendes” (Trabe, 2005). Texón Castañón nacíu en Felechosa en 1977 apurre nel so llibru dalgo más qu’un primer volume: toa una llección d’estrena nel panorama de les lletres asturianes más actuales. Una voz que busca el so propiu rostru ente les sombres de la realidá y un autor qu’al pesar de publicar la so opera prima amuesa la so destreza sabiamente ensayada en publicaciones disperses anteriormente. Agora axunta una colección cerrada de poemes onde s’albidren intenciones de continuar la serie en futures nueves entregues. 26 d'avientu, 2005 0 FacebookTwitterPinterestEmail
Comunicación El PP anuncia la so intención de sentar nel Conseyu d’Aministración de la tele autonómica by asturnet 23 d'avientu, 2005 El diputáu del Partido Popular (PP) Fernando Goñi anunció esti xueves 22 la intención del so grupu de sentar nel Conseyu d’Administración del Ente Públicu de Comunicación del Principáu a los seis representantes qu’hasta agora renunciaran a participar. El cambiu d’idea vien motiváu, según declaró’l parlamentariu del PP, pol enfotu de los populares en “fiscalizar dende dientro” a la televisión autonómica. Los seis representantes del PP nel Conseyu d’Aministración de RTPA van empezar a asistir a les reuniones col oxetivu d’acceder a información sobre l’Ente que, según afirmó Goñi, hasta agora nun disponíen al través de la Xunta Xeneral. Dende la creación del Conseyu d’Aministración de la radiotelevisión del Principáu los representantes del Partido Popular refugaron participar dende los seis puestos que-yos asignara la Xunta Xeneral. De magar los populares denunciaran repetidamente nel parlamentu asturianu falta d’información de los responsables del Ente. Tener accesu directu a esta información ye’l principal motivu esgrimíu por Fernando Goñi pa desplicar el cambiu de decisión del PP. 23 d'avientu, 2005 0 FacebookTwitterPinterestEmail