Cine Caxastur programa un nuevu ciclu de cine independiente by asturnet 4 de febreru, 2006 Esti martes 7 escomienza un nuevu miniciclu cinematográficu organizáu pola Obra Social y Cultural de Caxastur embaxo’l títulu de ‘Latitudes Emocionales’. Seis películes de diverses procedencies integren esta entrega dedicada a amosar producciones que nun llegaron estrenase nes sales comerciales del nuestru país. Los títulos que se van poder ver nos centros culturales de la Caxa en Llangréu, Mieres, Xixón y Uviéu son “El niño”(Fr.Belx.2005), “Tú, yo y todos los demás”(USA, 2005), “El sabor de la sandía”(China, Fr.2005), “Election”(China, 2005), “Gente de Roma”(It.2005) y “La escurridiza o cómo esquivar el amor”(Francia, 2005). Latitudes Emocionales 4 de febreru, 2006 0 FacebookTwitterPinterestEmail
Comunicación Colectivos culturales xixoneses organicen la Semana del Aula Popular José Luis García Rúa by asturnet 3 de febreru, 2006 La Semana del Aula Popular José Luis García Rúa escomienza esti viernes 3 en Xixón embaxo’l títulu de “La utopía aplazada”. L’alcordanza y pervivencia de los ideales llibertarios ye un de los asuntos alrodiu de los que van xirar les actividaes programaes nesta Selmana polos colectivos culturales y sociales qu’organicen les xornaes. L’Atenéu Obreru, la Sociedá Cultural Xixonesa, Radio Krass, el centru social Sextaferia y l’Equipu de Teatru La Máscara son los colectivos organizadores de los actos qu’escomiencen esti viernes cola so presentación y siguen el domingu 5 cola proyección a les 19.00 hores de la película “Sacco & Vanzzeti” nel centru social Sextaferia. El llunes 6 Pilar Sampedro ufierta una conferencia titulada “El mito del amor” nel salón d’actos del Antigu Institutu. El colectivu teatral La Máscara representa el martes 7 nel Teatru Xovellanos la obra “Las abarcas de Miguel Hernández”. Les actividaes d’esta selmana cultural siguen el miércoles 8 con una conferencia de Manel Aissa titulada “El anarquismo hoy” nel Antigu Institutu y el xueves 9 nel mesmu sitiu Gregorio Morán va falar sobre “Rafael Barret o la invención del anarquismo”. La última conferencia va pronunciala el filósofu del que cueyen el nome estes xornaes, José Luis García Rúa, que va esplayase el vienres 10 sobre “Los cortos veranos del anarquismo”. Les xornaes rematen el sàbadu con una cena de confraternización nel Hotel Tryp Pelayo. 3 de febreru, 2006 0 FacebookTwitterPinterestEmail
Comunicación Una web recueye firmes pa restituir Vientos de agua’ al so horariu orixinal by asturnet 1 de febreru, 2006 El cambiu d’horariu de la teleserieVientos de aguaa la madrugada fechu pola cadena Telecinco ta siendo retrucáu por una iniciativa de recoyida de firmes na que se pide a la canal privada que restituya la producción del arxentín Juan José Campanella a la so emisión n’hora de prime time. Alrodiu de dos mil firmes avalen esta solicitú de siguidores de la serie. La producción na que se narra la hestoria d’una saga d’emigrantes orixinarios d’Asturies y rodada en parte n’esteriores del nuestru país tuvo nes sos primeres emisiones unos índices d’audiencia que Telecinco nun consideró bastantes pa caltener ‘Vientos de agua’ nel so horariu orixinal, a les 22.00 hores. Aurora Vergara, una avilesina afinancada en A Coruña, ye l’autora de la iniciativa qu’al través de la páxina web www.petitiononline.com pide al equipu directivu de la cadena española la reposición de la serie de Juan José Campanella al horariu nel qu’escomenzó emitise porque a xuiciu de los firmantes “la serie, tanto pola so calidá como pola so temática de gran interés, nun ha ser relegada a la madrugada de los viernes, como ocurrió el día 20 de xinero”. La solicitú ta recibiendo alrodiu de dos mil solicitúes que l’apoyen. Más información 1 de febreru, 2006 0 FacebookTwitterPinterestEmail
Cine Cortomieres afítase como cita imprescindible del cine breve independiente by asturnet 31 de xineru, 2006 El festival de cortometraxes Cortomieres escomienza esti martes 31 con un total de trenta y cinco películes a competición na sección oficial y una docena de video-clips pal concursu nesta modalidá. Coordinao pol realizador Jorge Rivero, el certame de la villa’l Camín, afítase un añu más como cita imprescindible del cine en formatu breve de tol estáu. Amás de la sección oficial de concursu, Cortomieres ufierta na edición de 2006, un apartáu especia pal documental y dellos pases especiales, ún d’ellos dedicáu a amosar la produccion de realizadores mozos asturianos en colaboración cola Asociación de Realizadores d’Asturies (ARDA). En xunto tres secciones oficiales: cine, video y video-clips; una sección paralela nomada “Cortos asgaya”; otra sección de documentales y pases especiales de películes como “Jaime Herrero”, “Nenyure”, “El despropósito” y “La buena letra”. El chigre L’Abellugu va ser l’escenariu de la proyección de dellos pases especiales. Más de cuatrocientos cortometraxes recibió la organización de Cortomieres pa la edición d’esti añu, una cifra superior a la d’anteriores ediciones y qu’amuesa l’interés que despierta’l festival en tol estáu. El lema d’esti Cortomieres 2006: “Experiencias intensas en formato corto” y el respaldu del Gobiernu’l Principáu, la Universidá d’Uviéu, Caxastur y el semanariu Les Noticies. Los pases de les películes programaes empiecen tolos díes hasta’l prósimu 5 de febreru a les 18.00 hores nel salón Caxastur de Mieres con entrada llibre y de baldre. Cortomieres 31 de xineru, 2006 0 FacebookTwitterPinterestEmail
Comunicación La Fundación Príncipe d’Asturies convoca’l premiu al Pueblu Exemplar by asturnet 30 de xineru, 2006 La Fundación Príncipe d’Asturies acaba d’entamar la convocatoria pal premiu Pueblu Exemplar correspondiente a esti añu y que va tar abierta hasta’l prósimu 18 d’agostu. Al empar la esposición fotográfica “Impresiones.XV años de los Premios Príncipe d’Asturies” recibió na so primer selmana más de 6.000 visites y va poder vese na Plaza Trescorrales d’Uviéu hasta’l prósimu 10 de marzu. El reglamentu de la convocatoria pal premiu Pueblu Exemplar establez que van poder presentar candidatures al mesmu instituciones, centros culturales, asociaciones de vecinos, entidaes, empreses asina como los ciudadanos que lo deseen. Amás de la documentación y los apoyos que cada candidatura presente nel so favor, la Fundación y los propios miembros del Xuráu pueden solicitar o realizar ocasionalmente los informes precisos a fin de complementar cada propuesta. a Fundación Príncipe d’Asturies escomenzó la distribución de casi 3.000 exemplares del folletu que contién les bases pal premiu Pueblu Exemplar d’Asturies 2006, na so decimoséptima edición. Esta información ta disponible tamién nel portal d’Internet de la FPA (www.fundacionprincipedeasturias.org). La Fundación convoca esti galardón dende 1990 y na so dotación económica, de veinticinco mil euros, colabora al cincuenta por cientu’l Gobiernu del Principáu. Fundación Príncipe d’Asturies 30 de xineru, 2006 0 FacebookTwitterPinterestEmail
Comunicación La organización moza Darréu publica’l so anuariu d’actividaes by asturnet 30 de xineru, 2006 La organización nacionalista moza Darréu acaba d’asoleyar el so Anuariu correspondiente a les actividaes desenvueltes a lo llargo de 2005. Los conteníos íntegros del trabayu pueden consultase na páxina web de la organización en versión dixital y van distribuise como documentos de papel en centros sociales y d’ociu. LAnuariu 2005 de Darréu tien 60 fueyes y dixébrase en tres partes: per un llau les memories dactividaes y actos onde participó o que desendolcó la organización amás de materiales y campañes feches, per otra una seición dedicada a la nuesa páxina web y per último la seición de prensa, onde se recueyen los comunicaos asoleyaos asina como tamién un dossier de prensa nel tan toles noticies de los medios de comunicación escrita y dixital onde se menciona a Darréu. Darréu 30 de xineru, 2006 0 FacebookTwitterPinterestEmail
Cine L’Atenéu Obreru de Xixón remembra’l so 125 aniversariu con un ciclu d’Iciar Bollain by asturnet 30 de xineru, 2006 L’Atenéu Obreru de Xixón escomienza esti llunes 30 les actividaes de la conmemoranza del so 125 aniversariu con un ciclu de cine dedicáu a Iciar Bollain. El ciclu repasa tola obra cinematográfica de la realizadora de “Hola ¿estás sola?”, incluyendo los sos cortometraxes. El Teatru Xovellanos ye’l sitiu escoyíu pa l’amuesa de les proyecciones de la obra de Bollain, que van escomenzar toes a les 20.30 de la tarde. Esti llunes 30 van ponese el cortometraxe “Baja corazón”y “Hola ¿estás sola?”; el martes 31 los títulos que se proyecten son “Los amigos del muerto” y “Flores del otro mundo”. El ciclu remata el prósimu 1 de febreru col cortometraxe “Amores que matan” y el llargometraxe “Te doy mis ojos”. Los actos del 125 aniversariu del Atenéu incluyen tamién entrambes esposiciones que van celebrase a lo llargo del añu, una sobre la hestoria de la institución y otra con caricatures del dibuxante republicanu Emilio Vera, feches mientres taba presu na Cárcel de Coto tres la toma de Xixón poles tropes de Franco. Conferencies y actividaes relacionaes col axedrez van completar el programa de la conmemoranza del Atenéu Obreru. 30 de xineru, 2006 0 FacebookTwitterPinterestEmail
Cine “Nenyure” de Jorge Rivero aspira pol Goya al meyor cortu de non ficción by asturnet 29 de xineru, 2006 La película “Nenyure” del realizador mierense Jorge Rivero puede algamar esti domingu 29 pela nueche na ceremonia d’entrega de los Goya el premiu al meyor cortometraxe documental. El filme de Rivero ye una de les cuatro qu’opten a esti premiu del que se va desvelar el nome del ganador na gala televisada de la fiesta añal del cine español. “Nenyure” estrenóse nel Festival de Cine de Xixón y viaxó dende entós per dellos otros certámenes con una bultable acoyida de crítica y públicu. Rodada n’inglés con sotítulos, la cinta del realizador mierense retrata los espacios abstractos y concretos d’una barriada obrera de la cuenca talo s’amuesa anguaño, en plenu fin de la industria del carbón y convertida nuna polvorienta sucesión repetía de nichos, un cementeriu con ventanes y seres inda vivos. Jorge Rivero pertenez a una xeneración de nuevos realizadores asturianos que tenten definir una triba de cine centrada na realidá y nel retratu despiadáu del entornu ambiental de l’Asturies actual. El so últimu trabayu fue la filmación del poema “Ente nós” de Vanessa Gutiérrez dientro’l proyectu colectivu “Cinco poemes”.Ye autor tamién del documental musical “Pasamientu”, sobre’l discu del mesmu títulu del colectivu etnográficu Muyeres. 29 de xineru, 2006 0 FacebookTwitterPinterestEmail
Comunicación Asturnews estrena una nueva estaya d’opinión en blogs by asturnet 25 de xineru, 2006 Asturnews, diariu cultural asturianu, estrena una nueva estaya d’opinión abierta a los comentarios de los propios usuarios y llectores. La participación de los visitantes de la sección y l’actualización de los artículos van ser les característiques cimeres d’esti nuevu espaciu empobináu al análisis críticu de la realidá. Los primeros blogs publicaos fírmenlos Vanessa Gutiérrez y Pablo Antón Marín Estrada. El director d’Asturnews, Próspero Morán va ser otru de los articulistes de la estaya d’opinión xunta un garrapiellu diversu de colaboradores que van dir publicando los sos artículos personales abiertos al comentariu de los llectores. Con esta nueva sección Asturnews quier ufiertar a los sos usuarios un espaciu de reflexón y pensamientu críticos a propósitu de l’actualidá pública d’Asturies y del mundu que nos arrodia. Esta estaya d’opinión vien arriquecer los conteníos informativos diarios del nuestru periódicu dixital y el restu de les estayes que lu componen. Esperamos que tenga una bona acoyida y una prestosa respuesta por parte de los nuestros llectores. 25 de xineru, 2006 0 FacebookTwitterPinterestEmail
Comunicación Una web recueye fotografíes de cartelos en llingua asturiana by asturnet 24 de xineru, 2006 Una weblog gráfica dedicada a recoyer semeyes de cartelos de toa clase en llingua asturiana tenta atropar el númberu más ampliu d’estes fotografíes. Anuncios, rótulos d’empreses privaes ya instituciones, señalizaciones, plaques col únicu elementu en común de tar escrites nel nuestru idioma aparecen nesta páxina. La weblog ta dividida n’estremaes secciones: rótulos de comercios, instituciones, publicidá d’empreses y comercios, campañes públiques, vehículos, plaques de cais, señales de tráficu y un apartáu heteroxéneu dedicáu a “otres coses”. El proyectu ta abiertu a la colaboración de los usuarios y quier amosar que l’idioma asturianu pasín ente pasu va abriéndose camín na visualización pública de la so presencia tanto nel ámbitu de lo privao como de les instituciones. Proyeutu Cartelos 24 de xineru, 2006 0 FacebookTwitterPinterestEmail