Cine ARDA edita dos DVD colos meyores cortos de directores asturianos n’español by asturnet 24 de marzu, 2006 L’Asociación de Realizadores d’Asturies (ARDA) presentó esti xueves 23 n’Uviéu los dos nuevos volúmenes de la colección de DVD entamada apocayá con una esbilla de los meyores cortos en llingua asturiana. Agora ye la ocasión de les obres feches por directores asturianos en castellano y inclúi títulos como “Nenyure” de Jorge Rivero, “El beso de la tierra” de Lucinda Torre o “Lo que el ojo no ve” de José Braña. L’oxetivu de l’asociación qu’axunta a los realizadores asturianos ye difundir la obra que tan desarrollando los creadores de les nueves xeneraciones y que non siempre tienen la difusión que merecen. Los dos nuevos volúmenes publicaos recueyen cortometraxes de los directores Lucinda Torre, Alberto Pardo, Nacho Carballo, Gonzalo Tapia Suárez, Alfonso S. Suárez, Elena Tamés, Carlos Navarro, Tomás Fernández, José Antonio R. Maniega, Iñaki Ibisate, Sergio Sánchez, Jorge Rivero, Amanda Castro, Roxana Popelka, Teresa Marcos, Javier Martín, José Braña, Fernández Prada y Antonio de Benito. 24 de marzu, 2006 0 FacebookTwitterPinterestEmail
Comunicación Lletres Asturianes dedica’l so últimu númberu a les Xornaes d’Estudiu by asturnet 23 de marzu, 2006 La revista Lletres Asturianes de l’Academia de la Llingua llega al so númberu 90 con una entrega dedicada a asoleyar dellos de los trabayos presentaos por diversos especialistes nes últimes Xornaes d’Estudiu. Ente los artículos d’investigación publicaos destaquen el firmáu por Ignaciu Llope embaxo’l títulu “Xuegos d’identidá na tierra Navia-Eo: un averamientu críticu” y del de Carmen Alen tituláu:”Algunas consideraciones sociolingüísticas sobre dos lenguas minoritarias: el occitano y el asturiano”. Otros trabayos qu’apaecen nesti númberu de Lletres Asturianes son “El bable y los bablistas. La paya nel güeyu axenu. Un documentu de Matías Conde” de Rafael Rodríguez Valdés, “La reivindicación asturianista dende la emigración en Barcelona” de Iván Cuevas y “Un sainete del XVIII: ‘Los asturianos picados'” de Ramiro González Delgado. Completen esti númberu 91 les avezaes secciones de Faza Lliteraria, onde’l profesor García Arias recupera un poema anónimu de 1848 y Daniel García Pedrayes publica delles versiones del poeta balear Joan Salvat-Pappaseit. El remate d’esta entrega pónenlu les Notes y Anuncies, con diverses reseñes de trabayos filolóxicos y noticies de variu calter sobre l’actualidá llingüística asturiana. 23 de marzu, 2006 0 FacebookTwitterPinterestEmail
Comunicación Un foru estatal d’aficionaos a la metereoloxía permite mensaxes n’asturiano by asturnet 22 de marzu, 2006 Un de los foros d’aficionaos a la metereoloxía más populares de la rede nel estáu foro.meteored.com permite d’apocayá l’emplegu de la llingua asturiana nos mensaxes unviaos al alderique. Na última camudación de les normes d’usu d’esti foru abrióse la posibilidá de que los usuarios se comuniquen en cualquier idioma del estáu, sea oficial o non. Veceros asturianos d’esti alderique na rede sobre asuntos metereolóxicos resalten la importancia de que la nuestra llingua pueda valir pa comunicase nun de los foros más populares d’esta materia y llamen l’atención de que los únicos alderiques asemeyaos del nuestru país: www.asturmet.com y www.meteoasturias.com nun usen l’asturianu nos sos foros. Pa los usuarios de Meteored que se feliciten pol so plurillingüismu “la inclusión del asturianu como llingua vehicular pa falar de meteoroloxía nun foru a nivel estatal radica na falta de prexuicios del equipu d’alministración y la so valentía al tener qu’enfrentase a opinones contraries (notar qu’un foru d’esti calter nun trabaya por amor al arte, sinon que, tien que nutrise económicamente de daqué pa poder mantenese)”. Sicasí, no tolos usuarios del foru paecen igual de gustosos, ya que “en meteored.com tan surdiendo opiniones a la escontra y al favor d’esti cambeu d’actitú, opiniones qu’amuesen que, pesie a qu’el falar nuna llingua o n’otra nun condiona l’accesu nin la compresión del foru xeneral, entá hai xente que piensa qu’esta decisión tien un tresfondu políticu”,a firmen estos veceros asturianos. Les señes del enllaz nel que puede atopase el siguimentu n’asturianu son estes y esti otru enllaz onde puede atopase’l siguimientu metereolóxicu de la zona norte de la península, onde ta incluída Asturies. 22 de marzu, 2006 0 FacebookTwitterPinterestEmail
Comunicación TPA reparte ente los tres diarios d’Asturies la producción de programes by asturnet 21 de marzu, 2006 El director xeneral del Ente Públicu de Comunicación del Principáu, José Antonio Pérez Ornia, presentó esti llunes 20, a les productores que van elaborar los conteníos de la programación de la canal autonómica y adelantró les llinies xenerales de la parriella televisiva. Empreses formaes alrodiu de los tres periódicos diarios d’Asturies van copar la mayor parte de la producción de programes xunto a Telefónica y dos productores asturianes. La Televisión del Principáu d’Asturies (TPA) quier escomenzar la so andadura coles empreses de comunicación del país contentes. La decisión salomónica de repartir ente productores de los grupos empresariales españoles a los que pertenecen los tres rotativos diarios asturianos va empobinada a implicar nel Ente a unos medios que podíen ver amenazaos los sos ingresos y la so influencia por mor de la competencia de la canal autonómica. Consciente d’ello, Pérez Ornia opta por compartir les oportunidaes de negociu con La Nueva España, El Comercio y La Voz de Asturias. La productora Asturmedia, vinculada al grupu de La Nueva España, va ocupase principalmente de los conteníos deportivos, con un procuru especial poles tresmisiones. Pel so llau El Comercio Televisión va encargase d’ocho de les corresponsalíes de TPA, a escepción de la d’Uviéu, que va tar a cargu de la empresa Videoimagen y de la de Madrid, responsabilidá de Telefónica Servicios Audiovisuales. Zebra-Proima, vinculada a ZETA, el grupu de La Voz de Asturias ye otra de les productores que van elaborar programes pal Ente del Principáu. Otra empresa d’esti últimu grupu de comunicación: Zeta Gestión de Medios va comercializar los productos publicitarios. De la elaboración de la publicidá corporativa y les promociones internes va ocupase Bitácora Grupo. Informativos, deportes, cine, documentales van cubrir la mayor parte de la parriella de TPA, a la que’l so director calificó como “canal temáticu sobre Asturies”. Ente les llinies xenerales de la programación cola que va escomenzar emitir la canal del Principáu, José Antonio Pérez Ornia, nun fexo dala mención al espaciu que va tener la llingua asturiana na televisión autonómica. 21 de marzu, 2006 0 FacebookTwitterPinterestEmail
Comunicación Pérez Ornia comparez na Xunta pa informar de la programación de la TPA by asturnet 20 de marzu, 2006 El director xeneral del Ente Públicu de Comunicación del Principáu, José Antonio Pérez Ornia comparez esti llunes 20 na Xunta Xeneral pa informar de les llinies básiques de la programación de la televisión autonómica y de la parriella cola que va ponese en marcha. La presencia del responsable de RTPA nel parlamentu asturianu ye a pitición propia ya inxértase nes comparecencies informatives avezaes del cabezaleru del Ente. Pérez Ornia va esponer nel hemiciclu autonómicu con qué triba d’espacios va escomenzar TPA les sos emisiones tres el periodu de prebes y los que van dir ampliando la ufierta de la so parriella. La estrena de la programación definitiva de la radiotelevisión autonómica podía producise d’equí a mes y mediu, talu anunciaba’l presidente del gobiernu asturianu, Vicente Álvarez Areces esti domingu 19 nuna entrevista al diariu El Comercio. La última comparecencia nel parlamentu del director xeneral de RTPA fue va un mes, el 21 de febreru. Nella anunció la intención del Ente d’emitir nuna canal internacional pa los asturianos repartíos per tol mundu y recalcó el calter “temáticu” y non xeneralista de la televisión autonómica del Principáu. 20 de marzu, 2006 0 FacebookTwitterPinterestEmail
Cine Javier Maqua presenta el DVD de “Apuntarse a un bombardeo” by asturnet 19 de marzu, 2006 El realizador Javier Maqua presenta esti llunes 20 n’Uviéu la edición en DVD del so documental “Apuntarse a un bombardeo”. La productora uvieína Blaster Televisión y l’Axencia de Cooperación del Principáu promueven esta versión doméstica d’una película protagonizada polos brigadistes asturianos que s’opunxeron en Bagdag a la invasión d’Irak. El documental, producíu pol actor Guillermo Toledo y Geno Cuesta, narra el realcuentru de los brigadistes na casa qu’una d’elles, Teresa Tuñón, tien nel conceyu de Quirós: ende remembren los díes pasaos en Bagdag embaxo los bombardeos del exércitu americanu y británicu al través de la llectura de los sos diarios personales. La edición en DVD recueye dellos de los testos escritos por dos de los activistes: Teresa y Mino, asina como otros del propiu director Javier Maqua y del responsable de Cooperación del Principáu, Rafa Palacios. El DVD “Apuntarse a un bombardeo” preséntase esti llunes 20 a les 18.30 nun actu na Biblioteca del Fontán n’Uviéu, con presencia del autor del documental y de los sos principales protagonistes. 19 de marzu, 2006 0 FacebookTwitterPinterestEmail
Comunicación La Cámara de Comercio d’Uviéu y les productores audiovisuales xúntense nun proyectu común by asturnet 16 de marzu, 2006 La Cámara de Comercio d’Uviéu y l’Asociación de Productores de Televisión del Principáu d’Asturies(APTPA)van desarrollar a lo llargo de los prósimos cinco meses un programa empobináu a meyorar la competitividá de les empreses del sector na nuestra comunidá. La necesidá d’entamar esta colaboración ente la Cámara carbayona y los productores audiovisuales surde de la nueva realidá d’esti sector profesional n’Asturies, cola implantación de la televisión dixital terrestrea y la puesta en marcha del Ente Públicu de Comunicación, asina como l’afitamientu de les emisores locales. El plan de competitividá va tentar analizar carencies y tendencies del sector anguaño, al empar qu’estudiar estratexes comerciales pa favorecer la ufierta nel mercáu de les empreses audiovisuales. 16 de marzu, 2006 0 FacebookTwitterPinterestEmail
Cine Un miniciclu de Caxastur recupera’l melodrama americanu en seis títulos clásicos by asturnet 14 de marzu, 2006 La Obra Social y Cultural de Caxastur escomienza esti martes 14 un miniciclu de cine dedicáu al melodrama. El programa, coordináu pol director del Festival de Cine de Xixón, José Luis Cienfuegos, presentóse esti llunes n’Uviéu y inclúi títulos como “Esplendor en la hierba” d’Elia Kazan o “Dos en la carretera” de Stanley Donen. Los primeros títulos en proyectase son el citáu de Donen: “Dos en la carretera”, que podrá vese esta tarde a les 20.15 nel centru cultural de Caxastur n’Uviéu y “Siempre hay un mañana” de Douglas Sirk, proyectáu nel Monte de Piedá de Xixón a la mesma hora. El ciclu va desarrollase nos centros culturales de la Obra Social de Caxastur de Xixón, Uviéu, Mieres y Sama hasta’l prósimu 29 de marzu cola proyección de “Quiero vivir” de Robert Wise, “Tu y yo” de Leo MacCarey y “Esplendor en la hierba” d’Elia Kazan. La programación entera y los horarios pueden consultase nel portal de la Obra Social y Cultural de Caxastur , na sección de ciclos . 14 de marzu, 2006 0 FacebookTwitterPinterestEmail
Comunicación El muséu de Niemeyer divide al PP d’Avilés énte la posición del partíu n’Uviéu by asturnet 13 de marzu, 2006 La campaña entamada pol equipu de gobiernu municipal d’Uviéu en defensa del Muséu de los Premios Príncipe na ciudá divide al Partido Popular d’Asturies. La posición oficial de los conservadores afáyase del llau de Gabino de Lorenzo mientres tenta nun despertar el refugue de la población avilesina. Una amuesa de la situaciòn incómoda que vive’l PP asturianu fue la protagonizada polos conceyales populares María Fernández y Franciso Menéndez nel plenu estraordinariu del Ayuntamientu d’Avilés esti domingu 12. Los dos ediles conservadores ausentáronse nel momentu de la votación del plenu monográficu pa tratar de la polémica surdida alrodiu el proyectu de Niemeyer que se celebró na mañana d’esti domingu. Nuna sesión a la qu’asistieron varies docenes de ciudadanos nos bancos destinaos al públicu, la coalición de gobiernu de PSOE ya Izquierda Xunida-Bloque aprebó una moción na que manifiesten el so rechazu a lo que consideren “ataques continuos y carentes de tou respetu a Avilés” per parte del equipu popular del Ayuntamientu d’Uviéu. La moción aprebada colos votos de PSOE y IX-BA felicita al Principáu y la Fundación Príncipe por escoyer la villa avilesina como sé del proyectu d’Oscar Niemeyer y condena la campaña encabezada pol alcalde carbayón Gabino de Lorenzo a la que considera una “manipulación que dende l’Ayuntamientu d’Uviéu se ta tentado facer dende’l primer momentu d’esti asuntu tan importante pa tolos asturianos y asturianes, asina como la inxerencia más deslleal nes competencies del Gobiernu del Principáu, la Fundación Príncipe d’Asturies y l’Ayuntamientu d’ Avilés. L’últimu puntu de la moción aprebada dexa en manes del alcalde de la villa l’Adelantráu la posibilidá d’entamar les acciones xudiciales y administratives que pudieran precisar la defensa del Ayuntamientu d’Avilés “en toles competencies plenaries a les que se refier esta propuesta”. 13 de marzu, 2006 0 FacebookTwitterPinterestEmail
Comunicación El Principáu encamienta a la Fundación Príncipe a actuar contra Pérez Espinosa by asturnet 11 de marzu, 2006 El gobiernu asturianu salió al pasu de les declaraciones de la conceyal popular uvieína Isabel Pérez Espinosa nes qu’afirmaba que la ubicación del Muséu de los Premios Príncipe d’Asturies n’Avilés yera’l resultáu d’un alcuerdu ente’l director de la FPA, Graciano García y el presidente del Principáu, Vicente Álvarez Areces. El Principáu caltién que la Fundación ye ayena a la negociación pol afayamientu del muséu y anima a esta institución a actuar xudicialmente contra Espinosa. L’executivu autonòmicu al través d’un comunicáu fechu públicu tres l’últimu Conceyu de Gobiernu califica les manifestaciones de la conceyal del PP de “calumnioses ya inaceptables” y recalca que l’alcuerdu algamáu ente l’administración asturiana y l’Ayuntamientu d’Avilés pal afayamientu del proyectu d’Oscar Niemeyer respuende a equipamientos ya contemplaos nel PGOU d’esi conceyu. Unos proyectos que’l Principáu considera decisivos pal futuro d’Aviles y la so comarca, polo que considera “inadmisible que dende l’Ayuntamientu d’Uviéu se quiera cuestionar la llegalidá d’unes decisiones tomaes democráticamente” pola corporación avilesina. Darréu l’executivu autonómicu manifiesta que “la Fundación Príncipe d’Asturiesy les persones que la representen, ye totalmente ayena al alcuerdu tomáu poles citaes administraciones públiques, polo que consideramos totalmente inxurioso atacar al Presidente y al Director de la Fundación, por parte de la citada portavoz”. Pa rematar, el Principáu cuida que los términos empleaos por Isabel Pérez Espinosa “obliguen, en defensa de la honorabilidá d’instituciones y persones afectaes a encamentar a los Servicios Xurídicos l’inicio de les actuaciones pertinentes pa treslladales al ámbitu xudicial”. 11 de marzu, 2006 0 FacebookTwitterPinterestEmail