Lliteratura ‘Cuentos del Sil’ recueye la lliteratura escrita n’asturianu de les comarques d’El Bierzu by asturnet 11 de xunu, 2006 Les asociaciones de defensa del asturlleones El Toralín y El Fueyu tán acabantes d’espublizar, col apoyu de la Diputación de Lleón, un volume de cuentos que, baxo’l títulu de ‘Cuentos del Sil’, recueye los testos de nueve autores lleoneses, d’ente 20 y 80 años, escritos nesta llingua que, como dicen los propios promotores, ‘ye la de so’ y ta amenazada pol prestixu de la llingua castellana y la presencia d’un gallegu normativu na fastera más occidental d’El Bierzu, arrequexando al lleones qu’ellí se fala. Siguiendo l’exitu algamáu por ‘Cuentos de Lleón’, editáu en 1996 y escosáu pocu tiempu depues, varios escritores de la parte más occidental de Lleón tán acabantes d’espublizar, cola ayuda de la Diputación lleonesa, un volume de cuentos escritos nel asturlleones faláu na parte d’El Bierzu. D’esta manera, les asociaciones El Toralín y El Fueyu, promotores d’esta iniciativa, quieren ‘potenciar y dignificar’ una llingua en peligru d’estinción, destacando amás qu’estos relatos vienen de comarques como Ribasdesil, El Bierzu Este y Central, Furniella y La Cabreira. Asina, nel entamu de la obra, que correspuende a Abel Pardo, los promotores d’esti proyectu editorial con vocación de continuidá analicen una situación na que ‘la llingua castellana cumu idioma de prestixu, y el gallegu normativu na fasteira más oucidental, arrequeixan al Llïones’. En ‘Cuentos del Sil’ pueden encontrase los relatos de nueve autores, d’orixen y nacencia bien estremada, que tienen en común la llingua na qu’escriben. Col subtítulu de ‘Na nuesa llingua’ escritores como Severiano Álvarez, Álex Díez, Daniel Fernández, Eva González, Roberto González-Quevedo, Xuasúa González, Felix Llópez, Adrianu Martín y Abel Uxeniu Pardo, d’edaes estremaes que van dende los venti a los ochenta años, axunten los sos relatos nun proyectu lliterariu de dignificación de la llingua asturiana falada n’El Bierzu. L’escritor presente nesta antoloxía, Roberto González-Quevedo valora esta iniciativa ‘como un fechu mui importante pa la dignificación de la llingua nestes comarques onde se fala asturlleones, sobremanera teniendo en cuenta que la so edición foi apoyada pola Diputación de Lleón’. L’academicu de la llingua asturiana, estima especialmente la diferencia d’edá de los autores d’estos relatos, asina como la diferencia d’estilos y tradiciones lliteraries que representen, ‘porque amuesa la vida de la llingua y la so continuidá xeneracional’. Sicasí, como únicu puntu negativu nesti volume de relatos, González-Quevedo considera un error ‘ensin futuru’ la introducción d’un rasgu ortográficu nos testos ‘qu’incumple dafechu la normativa academica’, y asina lo manifestó nuna recien presentación de la obra xunto al restu d’autores de la obra. ‘Rechazo dafechu esti cambiu ortográficu absurdu’, comentó González-Quevedo, dexando claro que pa el ‘les normes ortográfiques academiques son sagraes’, y insistiendo ‘no absurdo d’esti asuntu, hasta tal puntu qu’inclusive yo tardé varios díes en reparar nello, pensando que yera una errata d’imprenta’. 11 de xunu, 2006 0 FacebookTwitterPinterestEmail
Comunicación La XPDLLA acusa al Gobiernu de desaniciar l’asturianu énte la puesta en marcha de la RTPA by asturnet 8 de xunu, 2006 Güei empiecen les emisiones regulares de la canal pública de televisión asturiana cola programación, a les ocho, del parte informativu de la tarde. Énte la puesta en marcha de la RTPA y la “presencia marxinal del asturianu nes sos emisiones”, la Xunta pola Defensa de la Llingua Asturiana denunció “‘l despreciu del Gobiernu asturianu pola opinión de los asturianos, que dende hai más de 15 años vien manifestándose mayoritariamente a favor de la esistencia d’emisores públiques de radio y televisión qu’emitan íntegramente n’asturianu” y acusólu d’ “avanzar nel procesu de substitución y desaniciu de la llingua”. La Xunta pola Defensa de la Llingua Asturiana considera inalmisible que la presencia de l’asturianu nes emisiones de la RTPA se solventen cola “especial protección al bable” que figura na llei que dio pie a la creacción del Ente de Comunicación públicu asturianu. “El Gobiernu asturianu demuestra que non solo nun tien intención de trabayar na defensa del patrimoniu llingüísticu d’Asturies, sinon que mantien firme la so voluntá de siguir avanzando nel procesu de substitución y desaniciu de la llingua asturiana”, asegura la organización cívica nun comunicáu públicu. “La esperiencia d’otres comunidaes con llingua propia que yá cunten con organismos de radiotelevisión amuesanos que los medios de comunicación audiovisuales son ferramientes indispensables de normalización social de les llingües amenazaes”, poro l’asociación en defensa de la llingua asturiana considera que quita-y esi usu na televisión pública a l’asturianu ye “imponer el castellanu nun ámbitu nuevu d’usu que-y va dar más puxu na presión qu’exerce pola sustitución llingüística total y apostar pola muerte segura del nuesu idioma autóctonu”. Por ello, la Xunta pola Defensa de la Llingua Asturiana acusa al Gobiernu asturianu “d’actuar d’espaldes a la Constitución, qu’afita como obligación de los poderes públicos «promover les condiciones pa que la llibertá y la igualdá de los individuos y de los grupos nos que s’integra seyan reales y efectives, a la vez que reconoz y garantiza’l derechu a la llibre espresión y al accesu a los medios de comunicación públicos de los grupos sociales significativos, respetando el pluralismu de la sociedá y les demás llingües d’España»; de nun respetar l’Estatutu d’Autonomía d’Asturies, qu’otorga a Asturies les competencies sobre’l desarrollu llexislativu y execución del rexime de tolos medios de comunicación social y sobre’l fomentu y protección del asturianu; y d’incumplir la Llei 1/98, d’Usu y Promoción del Asturianu, qu’obliga a l’Alministración Autonómica a velar por una presencia axeitada del asturianu nos medios de comunicación nos que participe”. 8 de xunu, 2006 0 FacebookTwitterPinterestEmail
Comunicación La TPA empieza a emitir en pruebes dende la Laboral de Xixón by asturnet 6 de xunu, 2006 La Radiotelevisión del Principado de Asturias (TPA) va estrenar les sos emisiones regulares el prósimu vienres, 9 de xunu, colos partes informativos de les ocho y media la tarde. Echa a andar d’esta manera la televisión pública asturiana que, anque yá empezó a emitir en pruebes dende la so se na Laboral de Xixón, va dir a poco y a poco completando la so parrilla de programación. Esti empiezu d’emisión “ye’l pasu definitivu pa la puesta en marcha d’un complexu tecnolóxicu que se va encargar de la emisión regular de la programación” al travies d’un sistema basáu dafechu na tecnoloxía dixital, según afirmaron los responsables de la canal pública rexonal que tovía nun confirmen los conteníos de tala programación. 6 de xunu, 2006 0 FacebookTwitterPinterestEmail
Lliteratura Recital d’Antonio Gala nel Paraninfu de la Universidá d’Uviéu by asturnet 6 de xunu, 2006 L’escritor Antonio Gala va facer llectura esta tarde, a les ocho, de los sos poemes nel Paraninfu de la Universidá d’Uvieu, nun actu lliterariu organizáu pola cátedra Emilio Alarcos, qu’amás prepara la visita del centenariu Francisco Ayala pal miercoles de la selmana qu’entra. Antonio Gala (Córdoba 1936) ye autor de varios llibros de poemes, relatu, teatru, ensayu y articulismu, que cunta na so carrera con reconocimientos tan importantes como’l Premiu Planeta, el Premiu Nacional de Lliteratura, asina como’l prestixosu Adonais. Gala espublizaba’l pasáu mes d’avientu un poemariu col títulu d’ ‘El poema de Tobías desangelado’ que foi tou un esitu de ventes. 6 de xunu, 2006 0 FacebookTwitterPinterestEmail
Lliteratura Berta Piñán presenta ‘El tiempu de la espera’ de Marta Mori by asturnet 4 de xunu, 2006 La escritora canguesa Berta Piñán (Cañu, 1963) presenta esti sábadu, día 10 de xunu, a les siete la tarde, na Llibrería Asturiana d’Ediciones Trabe (C/ Padre Buenaventura de Paredes, 4 – 33001 Uvieu) el poemariu tituláu “El tiempu de la espera” col que la poeta xixonesa Marta Mori d’Arriba (1965) algamó’l Premiu de poesía Teodoro Cuesta ‘ex aequo’ con Xelu Gutierrez Morán na edición 2004. 4 de xunu, 2006 0 FacebookTwitterPinterestEmail
Lliteratura José Luis Olaizola presenta na Fnac un don Pelayo desmitificáu by asturnet 4 de xunu, 2006 L’escritor y premiu Planeta nel añu 1983, Jose Luis Olaizola, presenta esti martes, día 6 de xunu, a les ocho la tarde, nel Fórum de la Fnac Parque Principado, el so últimu llibru sobre l’heroe de la reconquista editáu por Temas de Hoy. “Don Pelayo” busca la faceta más humana del mitu, del que’l so autor asegura que “fue un perdedor al que la vida nun trató mui bien”. Alredol d’una historia d’amor que propició la reconquista más angitua de la hestoria del nuestru país, Olaizola retrata de la manera más humana la figura de don Pelayo, un heroe, en palabres del autor, “que nun llegó a ser Rei nin a casase cola muyer qu’amaba”. Capaz de les mayores xestes y de les piores derrotes, don Pelayo deseaba l’amor d’una muyer llamada Egilona. Al travies d’esta hestoria de desamor, Olaizola desmonta la creencia de que don Pelayo fuere un “iconu de la cristiandá”, asegurando que “yera un cristianu discretu que se llevó bien colos árabes”. Olaizola achaca precisamente la so desapartación col Islam al despechu de que’l valí de Córdoba casare cola so amada Egilona, perdiendo Pelayo les posibilidaes de consumar el so amor. Don Pelayo presentase como una obra amena y llena d’anecdotes, que non por ello dexa de tar bien documentada dende un puntu de vista historicista. Olaizola siguió los testos del espertu Claudio Sánchez Albornoz, asina como los relatos del conde Clonard o los llibros sobre los visigodos de Juan Antonio Cebrián y d’Orlandis. 4 de xunu, 2006 0 FacebookTwitterPinterestEmail
Lliteratura Avilés presenta la XIX Feria del Llibru de Vieyo y la X Feria LlibruAvilés by asturnet 1 de xunu, 2006 L’alcalde d’Aviles, Santiago Rodríguez Vega, va inaugurar esta tarde, xunto a la conseyera de Cultura del Principáu d’Asturies, Ana Rosa Migoya, la XIX Feria del Llibru de Vieyo y d’Ocasión y la X Feria LlibruAviles, que pa poder ser visitada hasta’l día 18 de xunu nel Parque Les Meanes de la ciudá. Ente dalgunes de les presentaciones previstes pa esta feria destaca’l Día de les Lletres Asturianes que se va celebrar el martes día 6, y qu’a partir de les siete la tarde va repasar les obres de los autores avilesinos Susana Rodríguez Sela, autora del poemariu ‘Cuantayá que Dios fuxó’, ‘Onde pisen poques güelles’ de la corverana Cristina Muñiz, ‘Parque temáticu’ de Xose Nel Riesgo, y los monólogos de Cellero espublizaos baxo’l títulu ‘De chigre’, de Carlos Alba. Amás d’estos autores n’asturianu, tamien vas desfilar peles carpes de la Feria avilesina otros autores como Celso Peyroux, pa presentar el so ensayu sobre la Guerra Civil n’Asturies ‘Matar para seguir viviendo’, el periodista Saúl Fernández cola so obra ‘Basado en hechos reales’, o Tino Perez col so recien estudiu ‘Cómo pescar truchas’. Xunto a los llibros tamien habrá actuaciones musicales, como les de Vicente ‘El Pravianu’ y Jose Manuel Reguero ‘El Maestro’, na tarde del xueves día 15, depues de la presentación del documental ‘Víctor Botas, con el lenguaje de la melancolía’ de Jose Havel. 1 de xunu, 2006 0 FacebookTwitterPinterestEmail
Lliteratura Carolina Gutiérrez gana’l XIII Concursu de Cuentos del FUNDOMA by asturnet 1 de xunu, 2006 Carolina Gutierrez ye la ganadora de la modalidá d’adultos del XIII Concursu de Cuentos n’asturianu pa rapacionos y mozos d’Asturies, organizáu pola Asociación Cultural El Portón en collaboración cola Asociación moza El Tragaluz. El xuráu d’esta edición tuvo formáu polos escritores Marta Mori d’Arriba, Esther Prieto y Xose Ánxelu Gutierrez. Na categoría de Primaria, los ganadores foron David Jimenez Carballo del Colexu Públicu Liceu de Mieres; Jose Luis Álvarez Fernández, del Colexu Públicu de Degaña, y Rodrigo Álvarez Fernández de la mesma escuela. Álvaro Alonso Celerín, tamien del Colexu Degaña, recibió un accesit na mesma categoría. En cuantes a la categoría de Secundaria namás se concedió un primer premiu que foi a parar a la xixonesa Marina Mayo Alonso, pol so relatu ‘Añada al mineru’. Mentes que na categoría de mozos d’hasta 30 años, la ganadora foi Carolina Gutierrez Hernández, d’Uvieu, pol cuentu ‘La furgoneta’. 1 de xunu, 2006 0 FacebookTwitterPinterestEmail
Lliteratura Jesús García presenta en L.lena los ‘Cuentos de güilu’ by asturnet 31 de mayu, 2006 El catedráticu de llingua y lliteratura, Jesús García (Samiguel del Río, L.lena, 1932) presenta esta mañana nel Centru de Persones Mayores de La Pola la so obra ‘Cuentos de güilu’, ún de los pocos llibros escritos na variante llingüística d’una parte del conceyu. Al actu, que se celebra a la una la tarde, ta previsto qu’asista l’alcalde de L.lena, Hugo Morán, y la conceyala de Cultura, Paz García, amás del catedráticu Jesús Neira y el responsable de Política Llingüística del Principáu, Ramón d’Andres. ‘Cuentos de güilu’, que cuntó cola collaboración del Ayuntamientu de L.lena y la Conseyería de Cultura, ta escritu na variante llingüística de la parte L.lena, lo que, dende’l Serviciu de Normalización, se valora especialmente, buscando recuperar esta variante propia de la zona na que l’Ayuntamientu lleva tiempu programando los anuncios de les sos actividaes, fiestes y folletos. 31 de mayu, 2006 0 FacebookTwitterPinterestEmail
Lliteratura Paul Auster gana’l Premiu Príncipe d’Asturies de les Lletres by asturnet 30 de mayu, 2006 L’escritor estadounidense Paul Auster (Newark, 1947), autor de noveles de prestixu como ‘El libro de las ilusiones’ o ‘La noche del oráculo’, ye l’autor reconocíu col Premiu Príncipe d’Asturies de les Lletres 2006, al ganar na última votación a Amos Oz y al so compatriota Philip Roth, siendo Auster el cuartu autor anglosaxón que se fai con esti galardón tres de Doris Lessing, Arthur Miller y Susan Sontag. El xuráu de los premios reconoció n’Auster “la renovación lliteraria que fixo al xuntar lo meyor de les tradiciones norteamericana y europea, innovar el relatu cinematográficu y meter na lliteratura dalgunes de les sos aportaciones”. L’acta del xuráu, lleíu por Victor García de la Concha, valoró la obra d’Auster por “allegar a los llectores mozos al dar un testimoniu esteticamente mui valiosu de los problemes individuales y colectivos del nuestru tiempu”. Auster ta casáu dende 1981 cola tamien escritora Siri Husvedt. 30 de mayu, 2006 0 FacebookTwitterPinterestEmail