Lliteratura Martín Ardines espón ‘De la gloria les ruines’ en Nueva de Llanes by asturnet 29 d'agostu, 2006 La Casa la Cultura del Valle de San Xurde en Nueva de Llanes va acoyer a partir del prósimu vienres 1 de setiembre a les ocho la tarde hasta’l 15 del mesmu mes la esposición ‘De la gloria les ruines’ del escritor Xose Ramón Martín Ardines. Cuarenta poemes y retratos qu’espeyen, a travies de ruines industriales y escumbrios ‘una realidá diferente a l’Asturies qu’aparez nos folletos turísticos, recordándonos lo que somos, lo que fuimos y lo qu’irremediablemente vamos ser: ruines d’estos tiempos de gloria’. ‘De la gloria les ruines’ yá pasó pela Casa la Mocedá de Sotrondio, la Casa la Cultura de Bimenes y l’Hotel La Marquesita nos Ozcos. 29 d'agostu, 2006 0 FacebookTwitterPinterestEmail
Comunicación El Principáu convoca un concursu pa una canal de televisión dixital n’Asturies y reserva otres trés pa si by asturnet 24 d'agostu, 2006 El conseyeru d’Economía y Alministración Pública, Jaime Rabanal, anunció ayeri la convocatoria d’un concursu públicu pa una nueva canal de televisión dixital autonómica. De les cuatro canales de la TDT rexonal, el Gobiernu asturianu reservó pa si tres d’ellos, destinando ún pa la TPA; guardando un segundu pa la mesma fin; y dexando’l terceru pa prestar servicios ‘on line’ como yá lo fai’l Principáu dende la internet. La ufierta pública pa la canal que’l Principáu sacó a concursu ta abierta hasta’l prósimu 30 de setiembre y va tar basada en siete puntos, según desplicó Jaime Rabanal, nos que se va estimar los conteníos de la mesma, el plan tecnicu del proyectu y la so ayuda pal desarrollu económicu, tecnolóxicu ya industrial d’Asturies. Los licitadores de la ufierta habrán de tener un capital mínimu d’ún millón d’euros, desembolsáu polo menos nun cincuenta por cientu, y namás van poder presentar una propuesta. La concesión de la canal va ser por un plazu de 10 años, con posibilidá de ser prorrogaos por otros diez, y obliga a emitir, a lo menos, cuatro hores diaries de producción propia. 24 d'agostu, 2006 0 FacebookTwitterPinterestEmail
Lliteratura Xixón acueye más de cinco mil obres nel IV Salón del Llibru Asturianu by asturnet 24 d'agostu, 2006 El Gremiu d’Editories asturianos inaugura güei en Xixón el IV Salón del Llibru Asturianu que va tar abiertu al públicu na cai Tomás y Valiente hasta’l prósimu 3 de setiembre. Les cinco mil obres en castellanu y n’asturianu que se van poner a la venta esta selmana van tar ordenaes por materies envede por editoriales pa facilitar la busca de los visitantes. El Salón, organizáu pol Gremiu d’Editories d’Asturies col patrocioniu del Ayuntamientu xixones y la Conseyería de Cultura, va tar abiertu de 11.00 a 14.00 hores y de 17.00 a 21.00 hores de llunes a xueves, y de 11.00 a 14.30 hores y de 17.00 a 21.30 hores los fines de selmana. 24 d'agostu, 2006 0 FacebookTwitterPinterestEmail
Lliteratura Verines abre les sos puertes a América na XXII edición de los alcuentros lliterarios by asturnet 23 d'agostu, 2006 Los alcuentros lliterarios de Verines, dirixíos pol profesor de la Universidá de Salamanca, Luis García Jambrina, van celebrar una nueva edición ente los díes 14 y 15 de setiembre baxo’l lema ‘America desde las dos orillas: suaño, mito, utopía, literatura’. La casona de Quintueles va axuntar a ventidós escritores en diferentes llingües y nacionalidaes. Con presencia per primer añu internacional, ente los convidaos encuentrense Clara Obligado, Juan Carlos Mestre, Luis Sepúlveda, Jon Kortazar y Flavia Company, ente otros. Nel quintu centenariu de la muerte de Colón, los organizadores del Alcuentru d’Escritores y Críticos de les Lletres Españoles vieron n’America’l tema más afayadizu pa debatir na casona d’indianos de Verines. Asina, per primer vez na hestoria de los alcuentros tán convidaos escritores d’orixe o vinculación hispanoamericana, como Flavia Company, Luis Sepúlveda, Horacio Vázquez Rial, Adolfo García Ortega, Alfredo Conde, Jorge Volpi o Jose María Merino. Nel encuentru tamien va participar l’asturiana Vanessa Gutierrez. Tres d’esta esperiencia, los organizadores de los alcuentros piensen n’abrir el conceptu de la lliteratura, convidando, más alantre, a otros escritores europeos que puedan arriquecer los debates de Verines. 23 d'agostu, 2006 0 FacebookTwitterPinterestEmail
Comunicación Salas acueye una esposición quamuesa la visión que se tien dAsturies nel esterior by asturnet 13 d'agostu, 2006 A partir d’esti miercoles, 16 d’agostu, y hasta’l prósimu día 31, la sala d’esposiciones del Edificiu de Servicios Múltiples de Salas va acoyer la esposición itinerante ‘Asi nos ven’; una muestra centrada nos artículos de prensa nacional ya internacional y na visión del ‘Paraísu Natural’ que tienen los periodistes que visitaron Asturies nos viaxes de conocimientu organizaos pola Sociedá Rexonal de Turismu. La muestra recueye tamien una serie d’imáxenes que faen un recurríu pol llabor promocional turísticu del Principáu d’Asturies. 13 d'agostu, 2006 0 FacebookTwitterPinterestEmail
Comunicación La xira europea contra la discriminación llaboral fai parada en Xixón by asturnet 13 d'agostu, 2006 El 10 d’agostu’l camión mariellu brillante de stop-discrimination de la UE marchó nel so tercer viaxe per toa Europa cola intención d’informar a los ciudadanos sobre los sos derechos sigún la llexislación de la UE y de cada país. Esta campaña, que fadrá parada en Xixón nel mes de payares, ta pensanda pa que la Unión Europea puxe pola llucha contra la discriminaicón y promocione la diversidá nel sitiu de trabayu. Con ocasión de la presidencia finlandesa de la UE, la xira d’esti añu va empezar en Helsinki y va pasar per 13 estaos miembros visitando 22 ciudaes de tola UE. Na xira de cuatro meses, el camín va recorrer 13610 quilómetros y XXX milles náutiques hasta’l final de payares, mes nel que la caravana va visitar España. Les sos últimes cites van ser n’España: en Xixón el 15 de payares, en Madrid el 17 y, finalmente, en Valencia’l 21 d’esi mes. L’escenariu de 50 metros cuadraos tendrá un programa informativu y d’entretenimientu fechu especialmente xunto colos socios locales de la campaña, incluyíos ministerios, sindicatos y asociaciones d’emplegu en cada país. Aquellos que visiten la caravana van recibir información y asesoramientu sobre cómo la xente puede protexese contra la discriminación nel puestu de trabayu cola ayuda de les directives de la UE. 13 d'agostu, 2006 0 FacebookTwitterPinterestEmail
Lliteratura ‘Na boca de todos’ amuesa la poesía que s’escribe nel Occidente d’Asturies by asturnet 9 d'agostu, 2006 La conceyalía de Cultura del Ayuntamientu de Vegadeo, representada pol so titular Juan Santiago, cola collaboración de la Conseyería de Cultura del Principáu, ta acabante d’espublizar ‘Na boca de todos’, una antoloxía poetica que quier amosar la poesía que s’escribe nel Occidente d’Asturies, asina como toles variantes de llingüístiques emplegaes polos autores. Peñerada pola escritora Aurora García Rivas ya introducida con una nota pol filólogu Luis Casteleiro, la obra axunta testos de poetes como Nene Losada Rico, Fredo de Cabexe, Xuan Bello y Victoria Veiguela, ente otros. ‘Na boca de todos’ va ser presentada mañana, a les ocho la tarde, na Casa Cultura da Veiga. ‘Esta mostra de parte da poesía que s’escribe no Occidente d’Asturias (namáis en lengua e variantes vernáculas), ta feita dende os criterios esclusivos do qu’eu entendo por calidá poetica e coa estetica d’agora mesmo. Toda a antoloxía e de poetas vivos vinculados d’algunha maneira co Occidente. A responsabilidá dos poetas escollidos, así como dos poemas, e miña. A da ortografía ou da grafía qu’aparece, e de cada ún dos autores’. Con estes palabres, Aurora García Rivas, responsable de la selección de los testos, introduz los poemes de los ventidós escritores antologaos. Los autores escoyíos ‘Na boca de todos’ son: Álvarez de Ponticella, Alfredo C. (Villayón, 1948), Álvarez Fernández, Arturo (Castropol, 1973), Bello, Xuan (Tineu, 1965), Fernández, L.luis (Xixón, 1962), Fernández, Sabela (Tineu, 1962), Frías Conde, Xavier (Salamanca, 1965), García, Anton (Tineu, 1960), García López, Mª Esther (Valdes), García Rivas, Aurora (San Tiso d’Abres, 1948), González Fernández, Alfredo (Fredo de Carbexe) (El Franco, 1967) , González-Quevedo González, Roberto (Palacios del Sil, Lleón, 1953) , Losada Rico, Nene (Luarca, 1921), Lorences, Taresa (Salas, 1955), Martínez Castro, Jose Ramón (Castropol, 1979) , Riguilón, Naciu’i (Cangas del Narcea), Rojo, Miguel (Tineu, 1957), Suárez Fernández, Xose Miguel (Tapia, 1965), Veiga, Elías (Allande, 1972), Veiguela, Victoria (León,1979), Veiguela Martins, Crisanto (A Veiga, 1959), Velázquez, Alfonso (Tineu, 1956) y Vilareyo, Xaviel (Mieres, 1967). ‘Na boca de todos’ va presentase mañana, a les ocho la tarde, na Casa Cultura da Veiga. Tres del actu, el tenor asturianu Cristobal Blanco y la pianista Laura Martin darán un conciertu pa los asistentes. 9 d'agostu, 2006 0 FacebookTwitterPinterestEmail
Lliteratura ‘Nordés’ de Carmen Guardado Parga gana’l Fernán Coronas de Poesía by asturnet 9 d'agostu, 2006 El XIII Premiu de Poesía Fernán Coronas que cada añu convoca la Sociedá Popular ‘La Regalina’ de Cadaveu foi esti añu pal poemariu que llevaba por títulu ‘Nordes’ de la escritora Carmen Guardado Parga. Guardado, que trabaya como maestra de Primaria y que ye miembru de l’Asociación de Poetes Valdesanos ‘Alfonso X El Sabio’, nun tenía hasta agora denguna obra espublizada. El xuráu del que ye miembru la escritora Nene Losada Rico estimó l’usu de la fala de la escritora de L.luarca, que va recibir el galardón l’últimu domingu d’agostu, coincidiendo coles tradicionales fiestes de La Regalina en Cadaveu. 9 d'agostu, 2006 0 FacebookTwitterPinterestEmail
Lliteratura Héctor Pérez Iglesias presenta en Candás el poemariu ‘Prisión de náufragu’ by asturnet 9 d'agostu, 2006 ‘Nesti so primer llibru, Hector Perez Iglesias escueye alloñase del estrofismu pa proponer un llargu viaxe iniciáticu a traves d’una poesía fecha d’imáxenes sueltes, cercanes a la escritura automática, nes que la ruptura sintáctica, l’acumulación conceptual o la diriva semántica son a crear imáxenes de gran fuerza. El resultáu ye un llibru sorprendente, novedosu, ensin concesiones lexiques, que dexa en quien llee’l posu amargu de la desolación’. Con esti comentariu editorial, Hector Perez Iglesias (Arlós, 1978) presenta güei a les siete y media la tarde na Casa la Cultura de Candás el so primer poemariu n’asturianu. Llicenciáu n’Historia y ganador del premiu Asturias Joven de Poesía na convocatoria del 2003 col poemariu ‘Las tardes baldías’, Hector Perez Iglesias tien ganao n’asturianu dalgunos concursos lliterarios de cuentos como ye’l casu del Art Nalón Lletres o El Tragaluz. Con ‘Prisión de náufragu’, Perez Iglesias entra a formar parte de les files más moces de la poesía asturiana, con una propuesta novedosa y una voz diferente. Enriedador cola palabra y directu nel versu, llevanta poemes a base d’imáxenes precises y llamatives que-y treslladen al llector la sensación del náufragu que s’agarra al so imaxinariu fabulador y señaldosu con tal de sobrevivir. El poemariu va ser presentáu per primer vez esta tarde, na Casa la Cultura de Candás, de mano de la tamien escritora Vanessa Gutierrez. Editáu por Trabe na colección Albera, Perez Iglesias súmase a la xeneración d’autores más mozos que nos últimos tiempos vienen asoleyando les sos primeres obres, llamando bien l’atención de públicu y crítica. Exemplu d’ello son los poemarios recien espublizaos por Pablo Texón, Elías Veiga, Xuan Carlos Crespos, Berto García o Pablo Rodríguez Alonso, que presentó esti martes tamién nel mesmu marcu candasín, acompañáu pol escritor Naciu Varillas, ‘La lluz del nordés’. 9 d'agostu, 2006 0 FacebookTwitterPinterestEmail
Lliteratura Presentación de ‘La lluz del nordés’ del poeta Pablo Rodríguez Alonso by asturnet 6 d'agostu, 2006 ‘La lluz del nordes’ ye’l primer poemariu de Pablo Rodríguez Alonso, un llibru col qu’esti poeta mozu se daba a conocer el pasáu mes d’avientu al facese col prestixosu premiu Teodoro Cuesta de Mieres. L’escritor xixones, autor tamien de dellos estudios d’investigación, va presentar esta obra en Candás mañana martes 8 d’agostu, a les siete y media la tarde, dientro del ciclu ‘Fecho n’Asturies’. El ciclu candasín ‘Fecho n’Asturies’, que naz cola intención d’amosar la producción más nuevo fechu na tierra, tamien va acoyer esti xueves, a la mesma hora, la presentación d’otra primer obra d’un autor mozu, Hector Perez Iglesias. Con ‘Prisión de náufragu’ esti escritor que yá ganare’l premiu Asturias Joven de Poesía en castellanu, estrenase na llingua asturiana completando asina un añu nel que, la poesía asturiana, destacó pola aparición de voces dafechu nueves. Esti xueves, Perez Iglesias va tar acompañáu en Candás pola poeta Vanessa Gutierrez. 6 d'agostu, 2006 0 FacebookTwitterPinterestEmail