Lliteratura Vicente García Oliva recibe un premiu de la Comisión Católica Española pa la Infancia by asturnet 1 de xunetu, 2007 Redacción. Acaba de conocese que’l Premiu de la CCEI (Comisión Católica Española pa la Infancia) va entregase esti añu al escritor xixones Vicente García Oliva, pola so novela en castellán ‘Relato de las aventuras de Ines Saldaña y de cómo ayudó a Colón a descubrir America’. Esti organismu internacional con sede en Xinebra, concede esti premiu, que va pola edición 46, a la obra xuvenil que meyor defenda los Valores Humanos. L’autor de llibros como ‘Les aventures de Xicu y Ventolín’ tuviere yá nomináu cola novela ‘El barco de los locos’, que quedara en cuartu llugar de la Llista d’Honor, pero pal autor, “ganar el premiu ye perimportante pues, anque nun cunta con dotación económica, tien munchu prestixu dientro’l mundu lliterariu infantil y xuvenil”. Pal autor, miembru de l’Academia de la Llingua Asturiana “paez que los escritores asturianos sonamos dalgo fuera del Payares”. 1 de xunetu, 2007 0 FacebookTwitterPinterestEmail
Comunicación La programación en llingua asturiana de la TPA cumple trés meses demisión esti sábadu by asturnet 28 de xunu, 2007 Redacción. Esti sábadu 30 de xunu cúmplense tres meses del entamu de les emisiones de programes n’asturianun na televisión autonómica asturiana. Los presentadores Xose Antón ‘Ambás’, Próspero Morán, Milio’l del Nido, Inaciu Galán, Carlos Suari, Lluis Antón González y Mercedes Menendez son cares yá conocíes ente los televidentes asturianos y los espacios que presenten supieron llegar al públicu asturianu con unos resultaos d’audiencia mui llamativos en dalgunos casos. El primeru n’estrenase, el 31 de marzu pasáu, foi Pieces, dirixíu por Ramón Lluis Bande y estructuráu en cinco secciones fixes Voces, Museu, Al son, En tables y Periferia. Per esti programa, producíu por Ediciones Ámbitu, tien l’asturianu como llingua vehicular, pero nel conviven los conteníos en llingua asturiana y en castellán. Otru de los programes que s’estrenó aquel 31 de marzu ye ‘Nós’, un espaciu dirixíu y presentáu por Próspero Morán, una de les poques persones que yá ficieren televisión en llingua asturiana a finales de los ochenta, cuando presentó les emisiones n’asturianu d’Asturias Aquí, un programa del Centru Territorial de TVE n’Asturies. Nós, cambia de formatu con cada emisión. Nunu de los formatos un personaxe popular describe’l barriu nel que vive acompañáu de los sos vecinos, otra aborda les nueves tecnoloxíes dende una perspectiva divulgadora, ‘Nes escueles’ vien andando los colexos onde los alumnos deprenden asturianu, ‘Músiques’, na que los músicos mozos cuenten cómo recuperen soníos d’antaño y ‘Personaxes’ qu’acerca a la obra d’escritores, músicos, actores ya investigadores que manifiesten la so creatividá na so llingua materna. Ún de los programes con más esitu foi ‘Camín de Cantares’, que ta presentáu por Xose Antón ‘Ambás’ y que percorre les cases de falantes d’asturianu de toles fasteres d’Asturies, amosando los cantares, les hestories y los bailles de cada zona. El programa convirtióse dende’l primer día nún de lo más vistos de la TPA, con audiencies ente’l 10 y el 18% de cuota de pantalla. La emisión d’estos programes supunxo la realización d’unes trenta hores de televisión en llingua asturiana a lo llargo d’estos meses. La primer temporada terminó estos díes y los programes van tornar dempues del branu. Por embargu, la presencia diaria del asturianu va siguir pel branu na TPA, coles secciones nel programa ‘Con dos de azucar’. ‘A galmiaes’, onde Carlos Suari repasa l’actualidá deportiva, ‘La risión’ con monólogos, dirixíu por Lluis Antón González, ‘Recetes con cuentu’ con Milio’l del Nido, ‘Xente de casa’ noticies internaciones con Inaciu Galán y l’‘Axenda d’Asturies’ con Mercedes Menendez. 28 de xunu, 2007 0 FacebookTwitterPinterestEmail
Lliteratura Berto García y Carlos Suari presenten nUviéul poemariu conxuntu Treslallende by asturnet 28 de xunu, 2007 Redacción. Berto García y Carlos Suari presenten el poemariu conxuntu ‘Treslallende’, editáu por Trabe Ediciones, nel Club Prensa Asturiana de La Nueva España d’Uvieu a les 8 de la tarde y nel van actuar como presentadores los escritores Xose María Vega Blanco y Pablo Rodríguez Alonso. Pa los autores “hai munches formes d’esiliu, pero toes desemboquen na mesma llamarga amarga. L’esiliu pue ser económicu, políticu o inclusive amorosu”. Esti llibru, que son dos, “ye l’esiliu modernu de los que nun esisten, de los llamaos lleendes urbanes”. Nesti casu, Berto García y Carlos Suari “amósenmos dos visiones poetiques de la fuxida forzosa, del dolor que significa pa ellos dexar atrás l’alma qu’alluma los caminos, pa ganase la vida nel ermu ayenu”. García y Suari son dos escritores de los más mozos de la lliteratura asturiana y tienen collaborao en revistes como Lletres Asturianes, Lliteratura o Formientu. 28 de xunu, 2007 0 FacebookTwitterPinterestEmail
Lliteratura Lisraelí Amos Oz ganal Premiu Principe dAsturies de les Lletres 2007 by asturnet 26 de xunu, 2007 Redacción. Esti meudía, el xuráu del Premiu Príncipe d’Asturias de les Lletres 2007 apaeció en rueda de prensa pa dar a conocer el ganador del galardón. El premiu resultó ser l’escritor israelí Amos Oz. Que los miembros del xuráu consideren “ún de los maestros de la prosa hebrea moderna y ún de los intelectuales israelíes más comprometíos cola búsqueda d’una salida pacífica al conflictu ente Israel y Palestina”. Amos Oz ye profesor y ñació en 1939 en Xerusalem, de rapaz marchó a vivir a un ‘kibutz’ y estudió Filosofía y Lletres. Ye profesor visitante de la Universidá d’Oxford y titular de Lliteratura na Universidá Ben Gurion, onde ye catedráticu de lliteratura. 26 de xunu, 2007 0 FacebookTwitterPinterestEmail
Lliteratura LArribada convocal Timón 2007 pa premiar la trayectoria lliteraria en llingua asturiana by asturnet 25 de xunu, 2007 Redacción. L’Asociación Cultural l’Arribada anuncia la convocatoria del Premiu Timón, que la organización de la conocida como ‘vagamar lliteraria en Xixón’ convoca “col envís de facer reconocencia de la trayectoria lliteraria y/o’l llabor de promoción de la lliteratura asturiana”. Pa ello l’asociación abre’l plazu pa la presentación de candidatures dende esti momentu y hasta l’1 de setiembre. Según indiquen les bases de la convocatoria, les candidatures van poder ser presentaes por una persona un coleutivu a les señes de correu lletrónicu que siguen: arribada_sectec@yahoo.es El Premiu quier sirvir de reconocencia a trayectories bien llarges y por ello, pa esta edición de 2007, “opten al premiu los/es escritores n’asturianu que ñacieren nel añu 1957 o anteriormente”. Pal fallu del premiu la Xunta Direutiva de l’Asociación Cultural l’Arribada va aconceyar un xuráu integráu por persones venceyaes a la cultura del país. El premiu entregaráse en Xixón demientres la celebración de l’ARRIBADA 2007, que ta pesllando yá la programación d’esti añu, nel que va pasar de seis a nueve díes de celebración. 25 de xunu, 2007 0 FacebookTwitterPinterestEmail
Lliteratura L’autora Eva González enterróse esti día en Palacios del Sil by asturnet 25 de xunu, 2007 L’autora l.lacianiega Eva González, madre del tamién esritor y secretariu de l’Academia de la Llingua Roberto González-Quevedo, morría’l llunes 25 tres d’una llarga enfermedá. El so entierru tuvo llugar esti día a les 18:30 en Palacios del Sil (Lleón). Eva GOnzález, que nacíal 17 de xineru de 1918 en Palacios del Sil, conceyu de L.laciana (Lleón), tien asoleyao dientro la serie Na Nuesa Tsingua y a comuña col so fíu Roberto González-Quevedo los siguientes volumes: Poesías ya cuentus (1980), Poesías ya hestorias (1980), Bitsarón (1982), Xentiquina (1983) y Brañas dantanu ya xente danguanu (1990). Basándose en delles de les sos poesíes compusol músicu Vicenç Acuña, Bitsarón, seis canciones asturianas, pa coro de voces blanques y orquesta de cuerda.Esta obra estrenóse nel Teatru Campoamor dUviéu en 1984. En Cuentus de Nós (Madrid 1983) espublizó tamién un cuentu tituláu Ruda, Ruda. En 1991 lAcademia de la Llingua Asturiana editó Poesía completa (1980-1991). Munchos de los sos trabayos tan entá güei ensin asoleyar. 25 de xunu, 2007 0 FacebookTwitterPinterestEmail
Lliteratura El Día Internacional en Sofitu a les Víctimes de la Tortura va celebrase con un recital by asturnet 20 de xunu, 2007 Redacción. ‘Pallabres y música frente a la tortura’ ye’l títulu escoyíu pa un recial poetico-musical que va celebrase en conmemoración del Día Internacional en Sofitu a les Víctimes de la Tortura afitáu pola ONU y va celebrase’l 26 de xunu a les 8 la tarde, nel auditoriu del Conservatoriu Superior de Música ‘Eduardo Martínez Torner’ na Corrada del Obispu d’Uvieu. L’actu va ser un espectáculu poetico-musical como forma de rechazu “a los intentos de llegalización de la tortura del gobiernu de los EE.XX.”. Nel actu van participar tres agrupaciones de cámara del Conservatoriu van interpretar obres de Muczynski, Iturralde y Faure. Ente los escritores participantes van tar Carmen Yánez, Luis Sepúlveda, Juanjo Barral, Miguel Rojo, Javier Laceras y Antonio Merayo. 20 de xunu, 2007 0 FacebookTwitterPinterestEmail
Lliteratura Abiertul plazu pal II Concursu de Relatos Curtios Muyer y Participación del conceyu de Siero by asturnet 17 de xunu, 2007 Redacción. El Conseyu Llocal de la Muyer del Conceyu de Siero convoca la segunda edición del Concursu de Rellatos Curtios ‘Muyer y Participación’. Los rellatos han de tratar temes sobre la participación de la muyer na vida social, política, económica y cultural. El llargor máximu ye de diez fueyes per una cara. Les obres tienen que se presentar n’asturianu y nun tar premiaos nin espublizaos. Los trabayos presentaos nun tienen que pasar de los diez folios d’estensión, per una cara namás, en tamañu DIN A4 y escrites a ordenador o máquina a doble espaciu. Cada participante puede presentar, como muncho, dos obres con una estensión máxima de diez folios per una cara. Cada rellatu tien que presentase per triplicao, grapáu, en sobre zarráu y col sistema identificativu del pliques ente’l 3 y el 28 de setiembre de 2007 na Casa d’Alcuentru de les Muyeres de Siero: Cai Celleruelo 67, baxu. 33510, La Pola (Siero). Na pasada edición resultó ganador Inaciu Galán y González pol rellatu ‘Suañar en tiempu de guerra’ y Mar Cueto Aller, que recibió un accesit por ‘Los llibros cola fueya en blancu’. Bases completes 17 de xunu, 2007 0 FacebookTwitterPinterestEmail
Lliteratura Alborá Llibros echal pieslle dempués de cuasi trenta años como referente de les llibreríes asturianes by asturnet 6 de xunu, 2007 Redacción. Alborá Llibros, celebre llibrería asturianista de Xixón, echó’l pieslle ayeri dempues de cuasi trenta años d’actividá. Asitiada na Plaza Romualdo Alvargonzález, nun primer momentu nun llocal pequeñu nel númberu 4 y más tarde y hasta güei nel 5, la llibrería convirtióse nun referente de les llibreríes de temática asturiana, embaxo la xerencia de Xicu y Pilar Yepes.Alborá Llibros va siguir abierta embaxo la xestión de ‘Distribuciones Cimadevilla’, pero como llibrería xeneralista. La crisis nel mercáu del llibru lleva años pesllando llibreríes n’Asturies. La primera foi Seronda d’Aviles, a principios d’esti añu foi la Llibrería Ítaca, asitiada nel barriu L’Arena de Xixón y que tuvo en funcionamientu alredor de tres años. Xixón queda agora ensin nenguna llibrería especializada en llibros asturianos. La llibrería, que llegó a ser editorial, editó llibros tan recordaos como Coses Vivíes de Mánfer de la Llera o les ediciones llitúrxiques n’asturianu, amás de los llibros de rutes de Xuerde Morán, ente munchos otros. Per munchos años foi llugar pa la presentación de llibros n’asturianu y autores como Xuan Xose Sánchez Vicente, Antón García o Humberto González presentaron dalgunos de los sos llibros ellí. L’últimu actu públicu foi un recital de los autores de la revista Formientu, que se celebró’l vienres 23 de marzu. 6 de xunu, 2007 0 FacebookTwitterPinterestEmail
Lliteratura La esposición Un tiempu de traducciones va tar en Llangréu hastal 18 de xunu by asturnet 5 de xunu, 2007 Redacción. El llunes llegó a la Casa la Cultura “Escueles Dorado” de Sama Llangreu la esposición titulada “Ello yera una vez… un tiempu de traducciones (1974-2006)”, conformada por noveles traducíes al asturianu. La esposición va poder vese hasta’l 18 de xunu ente les 10:00 y les 13:00 hores pela mañana, y de 17:00 a 21:00 hores pela tarde. La esposición recueye exemplares de cien noveles de les diverses lliteratures hispániques y universales, traducíes al asturianu dende llingües como’l castellán, el catalán, el gallegu, el vascu, l’aragones, l’ingles, el frances, l’italianu, l’alemán, el portugues o’l rusu. Amás, un pequeñu catálogu que se da na puerta recueye toles obres traducíes al asturianu. La esposición ta entamada pola Oficina de Política Llingüística del Principáu en collaboración colos Servicios de Normalización Llingüística de los Conceyos y tuvo yá en Xixón, Uvieu y Aviles. En marchando de Llangreu va poder vese la esposición en L’Entregu, pero habrá qu’esperar al 16 d’ochobre. 5 de xunu, 2007 0 FacebookTwitterPinterestEmail