Música L’uvieín Ramón Melendi completa l’añu del so despegue musical grabando’l villancicu de la Vuelta by asturnet 12 de payares, 2004 Ramón Melendi remata el so añu triunfal. L’intérprete uvieín, que lleva más de 200.000 copies vendíes del so discu d’estrenu, ‘Sin noticias de Holanda’, y qu’ocupó durante selmanes los primeros llugares nes llistes de ventes, pesllará 2004 con otru ‘güelpe’ de gran difusión: El músicu grabará el llunes el villancicu promocional de la Vuelta Ciclista a España xunta varios corredores profesionales. El nome de Melendi yá s’asociaba dafechu a la competición ciclista, depués que’l so tema ‘Con la luna llena’ -y pusiera la sintonía a la Vuelta y el músicu uvieín grabara un anunciu promocional xunta’l ciclista Abraham Olano. Esa iniciativa upó al intérprete asturianu en poques selmanes al númberu ún nes llistes musicales de ventes del Estáu. La segunda de les grandes cites que Ramón Melendi tien previstes pa rematar l’añu ye un conciertu el prósimu 22 d’avientu nel Palau Sant Jordi de Barcelona, un equipamientu polivalente emblemáticu de la Ciudá Condal y con un aforu pa más de 13.000 espectadores. Nacíu n’Uviéu en 1979, Melendi ta consideráu como ún de los cantantes revelación del añu, depués d’ufrir 70 recitales per tol Estáu na so xira de veranu. En febreru de 2003, el cantautor asturianu asoleyó el qu’hasta agora ye’l so únicu trabayu nel mercáu, ‘Sin noticias de Holanda’. 12 de payares, 2004 0 FacebookTwitterPinterestEmail
Música Xixón abre’l telón del so festival de jazz, con Brandford Marsalis, Nnenna Freelon y Bill Bruford by asturnet 9 de payares, 2004 Música pa la seronda. La ciudá de Xixón abre esta tarde el so Festival de Jazz, que tendrá como domiciliu permanente el teatru Xovellanos y por cuyu escenariu pasarán, hasta’l prósimu sábadu, el saxofonista Brandford Marsalis, la vocalista Nnenna Freelon y les bandes lideraes por Terence Blanchard y Bill Bruford. L’encargáu d’estrenar l’eventu musical sedrá, a partir de les 20,30 hores de güei, l’intérprete Brandford Marsalis, ún de los saxofonistes más valoráu nel jazz modernu, formáu nuna dinastía familiar volcada na música y afincada en Louisiana. Fíu y hermanu d’afamaos executores de jazz, Marsalis actuará en Xixón en cuartetu, acompañáu de percusión, pianu y contrabaxu. La banda’l trompetista Terence Blanchard garrará’l relevu el prósimu xueves, con formatu de sextetu qu’incorpora, amás de la trompeta, un guitarrista, mientres que la vocalista Nnenna Freelon actuará el vienres acompañada de Brandon McCune a los teclaos, Wayne Batchelor al baxu, Kinah Boto na batería y Beverly Botsford na percusión. El remate al festival xixonés pondrálu el sábadu -tamién a partir de les 20,30, horariu ecomún a los cuatro conciertos- la banda encabezada pol batería Bill Bruford, consideráu ún de los más destacaos intérpretes nel so xéneru. Web del Teatru Xovellanos 9 de payares, 2004 0 FacebookTwitterPinterestEmail
Música Deua Dubra presenta en Bruseles la so concepción de la música folk by asturnet 5 de payares, 2004 Deua Dubra esporta’l so soníu a la capital alministrativa d’Europa. El grupu folk de la cuenca’l Nalón viaxa a Bruseles pa participar mañana nun conciertu entamáu pola emisora Radio Alma, entidá qu’anima la vida cultural de Bélxica dende hai más de dos décades. La banda presentará en directu los temes del so discu ‘El Soyáu de Mardana’. Cola so presencia na capital belga, Deua Dubra retoma la so proyección internacional, abierta n’agostu pasáu con una aplaudida participación de la banda nel Festival Intercélticu de Lorient, onde los componentes del grupu amosaron un amiestu de tradición nos temes y de modernidá nel soníu. Agora, el conxuntu viaxa a Bélxica pa salir a escena na sala De Rinck, contratáu por una emisora radiofónica concebida p’atender les necesidaes de comunicación de los emigrantes procedentes del Sur d’Europa y qu’emite espacios en francés, italianu, portugués, griegu, gallegu, castellán y asturianu. Integráu na so mayoría por muyeres y formáu na cuenca alta del ríu Nalón, Deua Dubra tien nel mercáu un únicu discu integráu por doce temes nos que contaron cola collaboración, ente otros, de los músicos Fred Morrison, Jeamie McMenemy, Marie Lecam y Diego Pangua. Archivu. Crónica de la participación de Deua Dubra en Lorient 5 de payares, 2004 0 FacebookTwitterPinterestEmail
Música Australian Blonde edita’l so séptimu discu, plenu de matices y cuidáu nel soníu by asturnet 4 de payares, 2004 Australian Blonde llega al séptimu. La banda xixonesa saca al mercáu el so discu númberu siete, ‘Canciones de amor y gratitud’, un trabayu plenu de matices, continuista respecto al pop rock de cedés anteriores y mui cuidáu na producción, que se prollongó a lo llargo de los dos últimos años a cargu’l guitarrista Paco Loco. Depués d’afitar un soníu propiu nos dos trabayos anteriores (‘Momento’ y ‘Lay it on time’), Australian Blonde pon agora nes estanteríes de les tiendes de discos un productu que los propios miembros de la banda reconocen como la meyor grabación d’estudiu de la so carrera. “Sé que ye lo que siempre se diz nes entrevistes, pero piénsolo honradamente”, señala’l vocalista del grupu, Fran Fernández. Nuna nota difundida pola casa discográfica Astro, qu’edita ‘Canciones de amor y gratitud’, los músicos xixoneses prometen un pop “preciosista llenu de matices que va presta-yos a quienes disfruten con Brian Wilson, Lambchop, Lloyd Cole, Wilco o Jayhawks”. El sellu asoleya’l sétimu discu d’Australian Blonde en dos formatos estremaos: en digipack, con cuatro temes adicionales, llibretu coles lletres y un recopilatoriu de regalu pa los clientes de ciertos establecimientos musicales; y na versión de bolsiellu, con menos elementos extra pero tamién con un preciu menor. Formada en Xixón hai agora diez años, la banda Australian Blonde ta considerada como una de les creadores, xunta Penélope Trip, del movimientu musical definíu como ‘Xixón Sound’. 4 de payares, 2004 0 FacebookTwitterPinterestEmail
Música Los nuevos soníos norteamericanos aporten a Uviéu y Xixón de la mano de Paybacks y Dayna Kurtz by asturnet 3 de payares, 2004 Banda sonora pa una xornada decisiva n’Estaos Xuníos. Nel día posterior a les elecciones de les que saldrá’l nome’l presidente d’esi país, la banda de rock The Paybacks, procedente de Detroit, y la solista Dayna Kurtz, afincada nel estáu de Jersey, presenten esta nueche n’Asturies dos concepciones estremaes de la nueva música fabricada en Norteamérica. La primera en salir a escena sedrá la vocalista y guitarrista Dayna Kurtz, que pesie a tener nel mercáu un únicu discu editáu -Postcards From Downtown (2003)- acumula un trabayu de carretera que la mantién actuando en sales d’Estaos Xuníos dende mediaos de los años noventa y llevóla a ser reconocida, en 1997, como meyor compositora del añu. A partir de les 20 hores, nel Centru Cultural de Caxastur n’Uviéu, la intérprete norteamericana espardirá los sos sones con toque personal, eloxaos pola so casa discográfica como un amiestu de la guapura nos testos de Suzanne Vega, la intensidá de Van Morrison y l’inxeniu poéticu de Leonard Cohen, de cuyos temes l’artista fai varies versiones. Dos hores y media depués, nun horariu más propiciu pal rock and roll, The Paybacks arrancarán na Sala Albéniz de Xixón un conciertu col que van abrir una xira por nueve ciudaes del Estáu. Pal recital n’Asturies, el grupu de Detroit promete una mecigaya de “riffs palpitantes, pop brillante y poderosu punk de tres acordes”. Con Wendy Case al frente, la formación norteamericana presentará en directu los temes del so últimu trabayu, ‘Harder and harder’, nel qu’intervinieron el cofundador de la banda Marco Delicato y el guitarrista Calvin Cooke. Web oficial de Paybacks 3 de payares, 2004 0 FacebookTwitterPinterestEmail
Música La Sociedá d’Autores y Esbardu negocien un alcuerdu qu’asegure la continuidá del Intercélticu d’Avilés by asturnet 3 de payares, 2004 L’asociación Esbardu y la Sociedá Xeneral d’Autores y Editores (SXAE) negocien un alcuerdu que nun estrangule’l crecimientu del Festival Intercélticu d’Avilés, consideráu el principal nel so xéneru n’Asturies. Los abogaos de dambes partes esperen algamar un pactu de forma “inminente” pa formalizar el pagu por drechos d’autor, cola cantidá final como principal motivu de disensión. Según precisó el presidente d’Esbardu, Juan Casas, les negociaciones tán na so fase final y pesllaránse en cuestión de díes, darréu se pacte la cantidá que los organizadores del festival han pagar en conceptu de drechos d’autor polos conciertos cellebraos na última edición del festival, en xunetu pasáu. Hores depués del alcuerdu ‘in extremis’ que dambes partes aceptaron entós a la puerta’l xulgáu na viéspora l’empiezu del festival, Casas amosó la voluntá d’Esbardu de nun pagar en nengún casu una cantidá superior al 10 por cientu de los beneficios totales del festival, asuntu que centra agora les negociaciones. Magar d’asumir qu’habrá un pagu pa evitar les acciones xudiciales entamaes -y llueu paralizaes- pola Sociedá d’Autores, Casas aseguró qu’esi desembolsu supondrá un esfuerzu importante pa les arques del festival, y alertó de que l’acción de la SXAE pon en peligru o liquida la cellebración d’otros eventos asemeyaos, ente los que citó la Xuntanza Astur de Santu Adrianu y la Nueite Celta de Xedré. Pal presidente d’Esbardu, la presión de la Sociedá Xeneral d’Autores ye “inxusta” enforma pa un collectivu como’l qu’entama el Festival Intercélticu d’Avilés, “que lleva munchu tiempu trabayando na estaya de la música tradicional, modalidá pola que nun se debieren pagar drechos d’autor”. La octava edición del Intercélticu d’Avilés y Comarca aconceyó ente’l 16 y el 27 de xunetu a unos 20.000 asistentes, según el balance de los organizadores, nun añu que supuso un importante saltu cualitativu pal eventu, qu’axuntó a 850 participantes y aumentó la so duración respecto a 2003. Archivu. La Sociedá d’Autores retira la demanda contra l’Intercélticu y negociará un cobru a la baxa 3 de payares, 2004 0 FacebookTwitterPinterestEmail
Música Los Berrones ultimen la edición d’un discu-llibru cola hestoria del grupu y 25 temes en vivo by asturnet 28 d'ochobre, 2004 Dos por ún. El grupu Los Berrones, pioneru nel usu de la llingua asturiana en pop-rock d’amplia difusión, prevé sacar a la venta a mediaos de payares el so primer discu en directu, qu’incluyirá 25 temes grabaos en vivo en Xixón n’agostu pasáu y un minillibru de 24 páxines cola hestoria de la banda. Según avancen los integrantes del grupu de Tolivia na so páxina web, los testos qu’acompañarán al nuevu discu incorporarán amás anécdotes asocedíes nos más de quince años de vida del grupu, y apoyaránse en semeyes atropaes polos miembros de la banda. Los Berrones anuncien, asinamesmo, que l’inminente discu-llibru va incluyir un “diccionariu de barbaridaes berroniles”. Si el primer trabayu en directu del grupu llavianés llega a les tiendes -como prevé la banda- dientro de quince díes, cumpliránse los plazos marcaos dende un principiu, yá que la intención del grupu yera editar el discu antes de fin d’añu. El formatu final escoyíu ye’l de dos cedés, un dvd y el minillibru. Finalistes del concursu de maquetes de Radio Asturias en 1988, Los Berrones saltaron darréu a la fama col premiu d’esi certame: La grabación d’un ‘single’ nel que s’incluyeron los temes ‘Tais de yogur’ y ‘Nun yes tú’ -primer gran ésitu del pop-rock n’asturianu- y qu’escosó dos tiraes acabante ser editáu. En mayu de 1989, la banda de Tolivia asoleyó’l so primer discu de llarga duración, ‘Voi dicítelo’, que popularizó la música en llingua asturiana a niveles hasta entós inéditos al traviés d’un singular amiestu de modernidá sonora y raigañu rural. Nos siguientes cuatro años, Los Berrones editaron tres trabayos más -‘Si rompe, que rompa’, ‘¿Lo tuyo cómo ye?’ y ‘No, home, non’- y somorguiáronse llueu nun silenciu que nun frañeron hasta 1998, cola publicación del so quintu cd, ‘Da-y fuerte’. Los dos últimos trabayos editaos pola banda foron el recopilatoriu ‘Diez años berrando’ (1999) y ‘República Independiente de Tolivia’ (2003). Crónica’l conciertu de Los Berrones en Xixón 28 d'ochobre, 2004 0 FacebookTwitterPinterestEmail
Música La Mancomunidá de la Sidra coordina una rede europea d’escueles de música tradicional by asturnet 27 d'ochobre, 2004 La Mancomunidá de la Sidra en collaboración cola escuela de Música de Nava y la Escuela de Música Tradicional de Bimenes ta coordinando un proyectu européu empobináu a caltener una rede d’escueles de música tradicional a nivel comunitariu. El proyectu nomáu Entramus ta agospiáu pol programa Sócrates de la UE y el primer aconceyamientu de les instituciones de dellos países europeos que participen nél va ser en Nava los díes 11, 12 y 13 de payares. El proyectu presentóse esti xueves 28 na sé de la Mancomunidá de la Sidra nun actu encabezáu pol presidente d’esta entidá Javier Parajón, el xerente de la mesma, Alejandro Vega, xunto a otros responsables municipales de Nava y Bimenes. Na presentación participaron tamién Flavio Benito, director de la Escuela de Música de Nava y Orfelina Suárez Pandiella de la Escuela de Música Los Yerbatos. La Rede Europea de Música Tradicional encarrilada dende la Mancomunidá de la Sidra quier promueve un ampliu abanicu d’actividaes como la participación en festivales y conciertos y a la organización de talleres d’etnomusicoloxía del entornu al través de la información de la tradición musical, cancioneru y costumes. Les escueles de música participantes van aportar al proyectu la so esperiencia y conocimientos na recuperación de les tradiciones musicales de la so zona, asina como nos enfoques pedagóxicos de la enseñanzaa musical. Les instituciones que participen nel proyectu Entramus son la Associaçao Tocandar de Marinha Grande (Portugal), Association Tera, Saint Groux (Francia), Scuola Comunales di Musica ‘G.Verdi’, de Prato,(Italia), CNV-Kundstenloond, de Rótterdam (Holanda), Loimaan Seudun Musiikkiopisto, de Loimaa (Finlandia) y l’Associazione Musicale Spazi Sonori. de Cosenza (Italia). 27 d'ochobre, 2004 0 FacebookTwitterPinterestEmail
Música Nacho Vegas acompaña a Enrique Bunbury na so minixira ‘Freak show’ by asturnet 25 d'ochobre, 2004 El cantante xixonés Nacho Vegas forma parte del heteróclitu combu del que s’arrodia Enrique Bunbury nuna minixira por delles ciudaes españoles titulada ‘Freak show’. Xunto a Vegas acompañen nel escenariu al ex cantante d’Héroes del Silencio otros músicos como Ariel Rot, Iván Piratas Ferreiro, Adriá Puntí, Carlos Ann y Mercedes Ferrer. L’espectáculu en xira ufierta eshibiciones circenses, con payasos, muyeres forzudes, quiromantes, etc. combinaes con música de cabaret y rock & roll. La xira empezó la so andadura en Valencia con un conciertu nel Xardín del Turia que desllumó y allorió a partes iguales al públicu asistente. En declaraciones a EFE Enrique Bunbury declaró que’l ‘Freak show’ yera “una idea que me rondaba de cuantayá” hasta que decidió ponela en marcha acompañáu por una serie de músicos amigos, ente ellos l’asturianu Nacho Vegas. Na parte musical del espectáculu les pieces del propiu Bunbury intercálense con temes de los artistes que lu acompañen xunto a la so banda avezada El Huracán Ambulante. Esta minixira ye un paréntesis del periplu entamáu cola edición del últimu discu d’Enrique Bunbury y col mesmu títulu qu’esti: “El viaje a ninguna parte”, un homenaxe al mundu del cómicu Fernando Fernán Gómez. 25 d'ochobre, 2004 0 FacebookTwitterPinterestEmail
Música Schwarz presenta nun conciertu n’Uviéu el so nuevu discu ‘Arty Party’ by asturnet 21 d'ochobre, 2004 La banda murciana Schwarz actúa esti sábadu na Sala Antigua Estación d’Uviéu pa presentar el so nuevu trabayu discográficu: ‘Arty Party'(Astrodiscos,2004). Vuelve asina a los escenarios asturianos un de los grupos más innovadores y arriesgaos del panorama musical español con un espectáculu en directu que promete emociones fuertes, sones contundentes y una puesta n’escena d’asoballadora ambientación audiovisual. El quintu discu de los murcianos Schwarz ufierta otra vuelta de tuerca al camín d’esperimentación sonora entamáu por esta banda dende que se dieron a conocer col so trabayu ‘These Songs Means Nothing’ (Greyhead, 98) y qu’agora con ‘Arty Party’ afonda nuna apuesta igual de tresgresora y enérxica. Schwarz nun son nengunos desconocíos n’Asturies desque entamaron en colaboración con Manta Ray el proyectu común del discu ‘Heptágono'(Astro, 2001) y tampoco ye la primer vez que toquen nun escenariu del nuestru país. Va un par d’años los murcianos ufiertaron un memorable conciertu n’Uviéu pa presentar el so meyor discu hasta agora: ‘Cheesy'(Astro, 2002. Nel conciertu de mañana sábadu na Sala Antigua Estación (C/Martínez Vigil, 9) d’Uviéu los sos abondos incondicionales van poder disfrutar d’un conciertu que promete ser una esperiencia tan máxica y irrepetible como la ufiertada na so anterior visita a Asturies. La cita ye a les 21,00 hores na sala uvieína. 21 d'ochobre, 2004 0 FacebookTwitterPinterestEmail