Música Los raperos Tres Coronas lleguen al Festival Urbanu La Street de Noreña by asturnet 14 de setiembre, 2006 El grupu Tres Coronas, consideraos como los reis del rap n’España, visita Noreña con motivu del primer Festival Urbanu La Street, encuadráu nes Fiestes del Ecce Homo, el próximu 16 de setiembre. Esti festival qu’apuesta pola cultura urbana va ufiertar diferentes actividaes y conciertos a lo llargo d’estos dos díes nos que tamien van poder vese exhibiciones de skate, break dance y graffiti. Tres Coronas ye un grupu formáu nes cais de Queens na ciudá de Nueva York y que se presentó n’España hai dalgunos años, con actuaciones mui puntuales nos festivales de más renome del estáu. El pasáu mes d’abril daben a conocer el últimu trabayu de so nel Festival Street Four Elements de San Javier (Murcia) qu’esti sábadu día 16 va presentar na carpa del Parque de los Riegos en Noreña a partir de les 4.00. 14 de setiembre, 2006 0 FacebookTwitterPinterestEmail
Música Conciertu de Stukas nes fiestes del Cristu la Paz de Brañella by asturnet 14 de setiembre, 2006 La veterana banda llangreana Stukas va actuar esti sábadu 16 nes Fiestes del Cristu de La Paz, na localidá entreguina de Brañella. El grupu lideráu por Jose Ramón Ordóñez va repasar nel conciertu los grandes esitos de la formación asina como les nueves canciones del so últimu discu ‘A pesar de todo’, editáu nel añu 2005 y col que la banda volvía a los sos oríxenes musicales con una apuesta polos patrones fieles a les formes del rock’n’blues de los años sesenta y setenta. L’últimu discu de Stukas vien a resumir el llabor d’una etapa de transición ente l’anterior recopilatoriu grabáu con músicos del Conservatoriu de Llangreu y la incorporación al grupu de nuevos miembros, los cambios na banda coincidieron cola composición de temes nuevos. En palabres del so volalista, Ordoñez, nel trabayu hai una vuelta a los oríxenes: “ta mui influenciáu pola música qu’empezamos tocando nos años 60 y 70, rock’n’roll y blues, presentes siempre nel nuestru repertoriu y que nesti discu fáense más evidentes”. La situación vivida nel contestu críticu de les cuenques tien un fiel reflexu nes lletres de les canciones, con títulos como:’Aquí me quede’ o ‘Conmigo en la cuerda’, y nel espíritu del discu dende la mesma portada: les instalaciones abandonaes d’un pozu mineru. Ye una amuesa del comprosimu del grupu “cola nuestra realidá social”, afirmaba Jose Ramón Ordoñez nel momentu de la presentación d’ ‘A pesar de todo’: “ye una realidá desesperante na que la xente paez resignada a aceptar la situación ensin nengún enfotu pol futuru de les cuenques y de les xeneraciones más moces, nós reflexamos esa situación nes nuestres canciones, inda paeza poco habitual facer esti tipu de denuncia social nel formatu del rock’n’roll, nel nuestru casu ye dalgo que siempre ficimos y esti discu nun ye una escepción”. Música y denuncia que va poder vese nel conciertu que la banda va dar a partir de les doce y media la nueche nel pueblu de Brañella (Samartín del Rei Aurelio) que celebra les sos fiestes del Cristu de la Paz. 14 de setiembre, 2006 0 FacebookTwitterPinterestEmail
Patrimoniu Sietes remocica los sos horros con trés años de retrasu by asturnet 14 de setiembre, 2006 L’Ayuntamientu de Villaviciosa acaba d’empezar la rehabilitación de los horros de Sietes, dientro d’una primer fase que va tratar la recuperación integral de siete de les edificaciones más estropiaes y con mayor valor patrimonial de la zona. La obra, con una inversión incial d’unos 116.000 euros, prevista pa un añu y mediu de duración, empieza con más de tres años de retrasu. Per otra parte, l’oxetivu municipal ye seguir col llabor de recuperación de los horros nuna segunda fase, amás d’abrir un aula didáctica nel antiguu Casinu de Sietes, del que sólo falta l’equipamientu, y que va llevar el nome de Rafael Balbín, etnógrafu que dedicó la so vida a recuperar la historia de los horros y paneres de la zona. 14 de setiembre, 2006 0 FacebookTwitterPinterestEmail
Música Conciertu del cantautor Edu Vega na Plaza’l Paragües d’Uviéu by asturnet 13 de setiembre, 2006 El cantautor uviedín Eduardo Alonso Vega va dar un conciertu esta tarde, a partir de les siete, na Plaza’l Paragües d’Uvieu. Tres del exitu de la so actuación el pasáu 1 de setiembre nel Teatru Filarmónica, el proyectu ‘Hacia un mundo lejano’ (primer discu de Vega) va poder ser escucháu nesti conciertu acústicu que tien la entrada llibre. Eduardo Alonso Vega nació n’Uvieu’l 5 de febreru de 1975, siendo el más pequeñu de cuatro hermanos. A los 16 años empezó a interesase pola música, aprendiendo de forma autodidacta a tocar el pianu y la guitarra. Nos siguientes años forma con dalgunos amigos un grupu musical, col que va creando les sos primeres canciones y dando los sos primeros conciertos. A la fin, nel 2004 sacó’l so primer álbum “Hacia un mundo lejano” compuestou por diez canciones que cuenten histories y sentimientos de la vida, dende’l puntu de vista del so autor. 13 de setiembre, 2006 0 FacebookTwitterPinterestEmail
Música Anabel Santiago lleva’l so espectáculu al Mercat de la Música Viva de Vic by asturnet 12 de setiembre, 2006 La cantante asturiana Anabel Santiago va llevar el so espectáculu al Mercat de la Música Viva de Vic, un festival pel que tienen pasao artistes de la talla de Carlos Núñez, Diego Cigala, Dominique A, Dusminguet, Elliott Murphy, Enrique Morente i Lagartija Nick, Els Pets, Fermin Muguruza, Françoiz Breut, Jorge Drexler, King Changó, Macaco y Maria del Mar Bonet, ente otros. Acompañada de María Alvarez, al curdión, Michael Lee Wolfe, coles guitarres, el dobru y la mandolina, Jacobo de Miguel, al pianu y Sergio García a la percusión, Anabel Santiago va cantar nes fiestes de la Merce, de Barcelona, el próximu 23 de setiembre a les diez y media la nueche, na plaza de Sant Jaume. Dende hai diecisiete años, el Mercat de Música de Vic ye un puntu d’encuentru pa profesionales de tolos sectores diseñáu pa garantizar la diversidá musical, mesmo d’estilos como de procedencies. Con una media de quinientos profesionales al añu y más de cien mil visitantes, per esti festival tienen pasao otros artistes mui reconocíos como Mártires del Compás, Miguel Poveda, Miquel Gil, Ojos de Brujo, Peret, Raimundo Amador, Sau, Sidonie, Violadores del Verso o Zebda. 12 de setiembre, 2006 0 FacebookTwitterPinterestEmail
Música Cádaba faise con un segundu puestu nel I Concursu de grupos folk d’Ermua ‘Folkezblai’ by asturnet 11 de setiembre, 2006 El grupu asturianu Cádaba, nacíu nel añu 2001 de l’Asociación Cultura Arcánxel San Miguel, ta acabante de llograr un segundu puestu nel I Concursu de grupos folk d’Ermua ‘Folkezblai’. La formación folk, qu’en marzu d’esti mesmu añu tamien se ficiere col segundu premiu nel I Concursu de Música Folk ‘Escenario Prau’ de Cantabria, va recibir un premiu de 1500 euros. El grupu Cádaba repasa nel so repertoriu mesmo obres propies que pieces tradicionales, asina como arreglos d’obres d’otros autores. La formación cuenta con instrumentos tradicionales como la gaita d’occidente, la curdión, la curdión diatónica, tambor y bombu, amás de guitarra acústica, bodhram, tecláu, flautes, wistles y percusiones africanes. Depues de rodase per diferentes nueches celtes y conciertos, Cádaba grababa nel añu 2005 el so primer trabayu baxo’l nome ‘Do y sidemól’, compuestu por 12 temes, la mayor parte de composición propia xunto a dalgunes adaptaciones de pieces tradicionales. 11 de setiembre, 2006 0 FacebookTwitterPinterestEmail
Música El Memorial Silvino Argüelles entrega mañana los premios a los diez meyores cantantes de tonada del añu by asturnet 5 de setiembre, 2006 La gala d’entrega de premios y actuaciones per parte de los consideraos diez meyores cantantes del añu de tonada y meyor gaiteru acompañante del XX Memorial Silvino Argüelles va tener llugar mañana xueves 7, a les ocho la tarde, nel barriu de Requexu de Mieres. Nel actu de reconocimientu como meyores cantantes a Liliana Castañón, Rosario González, Anabel Santiago, Jorge Tuya, Sergio Agüeros, Jeremías Cuello, Laudelina Hortal, Urbano Prieto, Jose Manuel Robledo, Marisa Valle y Óscar Fernández como meyor gaiteru, ta prevista l’asistencia del alcalde de Mieres y del director Xeneral de Cultura, Carlos Madera. Les diez meyores voces del añu son contrataes pa intervenir nel actu públicu del citáu Memorial, consideráu’l premiu más importante pa los cantantes de tonada asturiana, onde tamien reciben un trofeu del Ayuntamientu de Mieres. El xuráu d’esta edición tuvo formáu polos cantantes históricos de tonada Diamantina Rodríguez y Alfredo Canga. Rellacionaos col mundu de la tonada participaron el presidente de l’Asociación d’Interpretes de la Canción Asturiana, Julio Cesar Baragaño, el presidente de l’Asociación d’Interpretes del Valle’l Nalón, Jose Luis Rozada, el director del Departamentu de Musicoloxía de la Universidá d’Uvieu, Jose Antonio Gómez, el Director del Archivu de la Música Asturiana, Fernando Ornosa y, per parte de la familia de Silvino Argüelles, el so nietu, el periodista Alberto Argüelles. Igualmente, como periodistes de los diferentes medios de comunicación intervinieron Miguel Fernández, Saul Fernández, Próspero Morán y Celso Fernández. 5 de setiembre, 2006 0 FacebookTwitterPinterestEmail
Música El grupu astur-arxentín Fardaxu convoca un concursu pa pone-y nome al tercer discu de so by asturnet 5 de setiembre, 2006 El grupu astur-arxentín de música folk Fardaxu ta a piques de grabar el so tercer discu y pa celebrar colos sos siguidores esta noticia convoca un concursu nel que llama a la so participación, proponiendo posibles nomes pa tala grabación del grupu. El ganador del concursu va aparecer nel llibretu del propiu álbum y, amás, va recibir como regalu un exemplar autografiáu polos miembros de Fardaxu. Pa participar nel concursu del grupu arxentín namás hai que visitar la so páxina web, y ente toles persones que lo faigan, Fardaxu va sortear entraes pa velos en vivo, en casu de que foren arxentinos, o exemplares d’esti tercer trabayu ente los que sían de cualasquier otra parte del mundu. 5 de setiembre, 2006 0 FacebookTwitterPinterestEmail
Música Gueta na Fonte y Xuacu Amieva lleven la música al Día d’Asturies en Bruseles by asturnet 4 de setiembre, 2006 El Centru Asturianu de Bruseles va celebrar ente los díes 8 y 10 de setiembre la festividá del Día d’Asturies, ocasión na que va facer entrega del galardón de la entidá, conocíu como l’Horru d’Oro, al alcalde de la capital belga, Freddy Thielemans, y al conseyeru de Xusticia, Seguridá Pública y Rellaciones Esteriores, Francisco Javier García Valledor. Los actos de celebración de la fiesta asturiana van terminar con un conciertu a cargu del grupu Gueta na Fonte y les sos gaites. L’actu d’entrega va tener llugar el día 8 de setiembre, festividá de la Santina, nel ayuntamientu de la capital belga, pero los festeyos que remembren el Día d’Asturies van allargase hasta’l domingu, 10 de setiembre. Nel programa previstu pol Centru Asturianu pal sábadu 9 de setiembre, los tradicionales desfiles de grupos y bandes de gaites pela capital de Belxica, asina como la espicha que tolos años se celebra nel MannekenPis, van dar pasu a una misa n’honor de la Santina tres de la que va haber una procesión peles cais de Bruseles. Asinamesmo, el Centru Asturianu de Bruseles va organizar la tradicional puya’l ramu, a la que van seguir un torneu de bolos y un mercáu astur na Plaza d’España, que va contar con puestos de música, llibros, indumentaria popular, gastronomía asturiana, y muestres de xoyería y cerámica de la tierra. Nel mesmu emplazamientu, les autoridaes presentes nel actu van entregar los trofeos a los bolos, asina como los diplomes acreditativos de la participación nos cursos de llingua asturiana. La xornada del sábadu va rematar con un conciertu del gaiteru Xuacu Amieva, que tamien va participar na clausura de los actos de celebración del Día d’Asturies el próximu domingu 10, nel que la música tradicional asturiana, les gaites y los desfiles, van volver tomar la Gran Plaza de la capital belga. 4 de setiembre, 2006 0 FacebookTwitterPinterestEmail
Música Actuación de Dulcamara y Gueta na Fonte nel teatru Filarmónica d’Uviéu by asturnet 4 de setiembre, 2006 El Ciclu de Musica d’Asturies 2006, organizáu pola Conseyería de Cultura, Comunicación Social y Turismu del Principáu d’Asturies, trai esta tarde al teatru Filarmónica d’Uvieu entrambes actuaciones de los grupos Gueta na Fonte y les pandereteres de Dulcamara. El conciertu, pal que la entrada ye de baldre, va escomenzar a partir de les ocho y media la tarde. 4 de setiembre, 2006 0 FacebookTwitterPinterestEmail